29/08/2007

الوطنية وطنية

أول شي أقوله ترى شعار الوطنية الموجود بالمدونة غير مدفوع الاجر

بس لأنهم سجلوا موقف وطني يستحقون عليه الاحترام وانا راح أقول لكم ليش

ألحين لنفرض إن الأردن مثلا ومن خلال جريدة الأهالي الأردنية ولا جريدة السبيل الأردنية

هذي أساميهم شسوي أنا؟

يت جريدة منهم وسبّت الكويت

وبعدها قررت شركة الإتصالات المتنقلة

اللي عندها خدمات بالأردن وقررت مقاطعة جريدة الاهالي او جريدة السبيل

شنو راح يكون راينا احنا ككويتيين؟؟؟

أتوقع إن الراي الطبيعي والمعقول إن الاتصالات المتنقلة راح تكبر بعيننا ككويتيين

إنها سجلت موقف وما رضت على كرامة الكويتين حتى لو كان هذا على حساب إعلاناتها أو مبيعاتها بالأردن

وبعدين تعالوا إنتوا يا جريدة الوطن

مو صار لكم دهر تصارخون دول الضد ومادري شنو

ليش الاتصالات عندها شبكة بالاردن والسودان والعراق

مو علي الخليفة يملك اسهم كبيرة بالاتصالات

ولا وقت البيزه ماكو شي اسمه دول الضد

عموما أنا الوطنية للإتصالات كبرت بعيني لأنها ما رضت على إهانة دولة أصحابها

وبالعكس هالشي يستحق التحية مو المقاطعة مثل ما يطبل البيلر والوطن كلها

عموما موقعهم مو راضي يشتغل وياي

بس حبيت أقول لكم إن يكيكي رايح النيابة أمس

وكاتب عن بطولاته وشجاعته وقوته ورايح مرفوع الراس

بس انا أوعده إن أول ما يدش السجن

الاكل علي

بس خل يشوف له واحد ييبله زقاير
والثاني يودي له طبشير عشان يشخط عالطوفة كل يوم

مدونة يديدة إسمها نهاش

21 comments:

Anonymous said...

البيلر يقولون راح امريكا يسوي عملية تصغير للمعدة يبي يضعف عشان عيون سميه الخشاب و نهله سلامه صج انسان منحط
لكن البيلر طول عمره بيبقي بيلر
ما ادري شلون الكويتيين يقرون له :s

ZwaiZ said...

mabrouk 3alaina Yakyaki o qisat el-wa6aniya kaifhoum "el-beit beit obouna wel goum nashibouna" o 3ala 6ari gi6ar sij salfat li3lanat malat el-kahraba wela bas chethi cuz 3ayazt wana adawer eb youtube malegait shay ma3qoula mako a7ad emsajla!!

moodless said...

الوطن الحين واهي جريدة مصداقيتها صفر تسوي ضجه
تخيلوا بكرة لما تصير قناة تلفزيون

المشكلة مريديها كثير وقراءها اكثر..

ربنا يجيب اللي فيه الخير

Q80 Blogger said...

ألحين شكو علي الخليفه بالاتصالات
حتى لو كان أحد ملاكها ليش نتكلم عن الشركه واهي مالها شغل بالموضوع كلش

انا أحد مشتركي الوطنيه ... بس صراحه زعلت من أول ماسمعت خبر بيعها لشركه كيوتل القطريه
انا أحب دول الخليج وأحس انهم أهلي ... لكن حكومه قطر صراحه محد يتحملها ... كافي الجزيره ووقفتهم مع النظام العراقي وأعوانه و تعاونهم مع اليهود

صراحه حسافه يأتي اليوم إلي أشوف فيه شركاتنا الي تأسست بأيادي كويتيه تدار من الخارج

انا مو مع الوطن أكيد بالي يسوونه ... خصوصا انهم كل يوم ماعندهم شغل غير التقارير الدايخه عن قطر ومشتركي الوطنيه

بس هم حكومه قطر ماتنعطا ويه

شكرا على الموضوع

Unknown said...

بيت القرين ..
أنا ماني مع توجهات الوطن .. بس أشوف اذا صج اللي صار ليش الإخوان القطريين يزعلون هذه حرية راي! يعني شلخونا بالجزيرة وشكينالهم وقلنالهم عيب جذي وردوا علينا احنا مالنا شغل هذه حرية راي !..والجزيرة على كلامهم شركة خاصة ..

اللي أقصده اذا باجر في موضوع أو تصويت ضد الكويت و صالح قطر باجر ابتضغط على جم جريدة عشان يوجهون الرأي العام

وهم يا دانه لازم نكون منصفين شوية موعشان احنا ضدهم نصير ضدهم على طول الخط بدون تفكير .. والمثل يقولج أنا و أبوي على إبن عمي و أنا وابن عمي عالغريب :) وتسلمين

Mohammad Al-Yousifi said...

أولا أقرئي مقال محمد الوشيحي اليوم يبرد الجبد لسببين

ثانيا ليش كل المدونات اليديدة اللي تعلنين عنها شباب ؟ ليش ما عندج ربع بنات؟

نهاش عاد؟

ثالثا أعتقد ان موضوع الوطنية أخذ أكبر من حجمه و ان الوطن داشة بشكل عبيط عالسالفة , منطق عشوائي غريب

الوطنية شركة كويتية

كيوتل شرت - بفلوس مو بتراب - نص الشركة و اصبحت المالك الأكبر فيها و تستطيع ان تعيّن مجلس ادارة كامل فيها حالها حال المشاريع قبل

لسبب ما , كيوتل تشوف ان اعلانهم بجريدة الوطن مو مناسب لهم و أوقفوا الاعلان فيها

هم لم يوقفوا الاعلان بالكويت كلها , شوفوا اعلاناتهم - عناد - على صفحتين ببقية الجرايد

نعم الأسباب سياسية لكن كيفهم , فلوسهم و كيفهم , اللي زعلان عنده حل واحد لا غير و هو انه يكنسل خطه معاهم, و اذا ملياردير يبيع اسهمه بالوطنية عشان يطيح سعرها , غير جذي لا الكويت و لا حكومتها و لا جريدة الوطن و لا انا و انتي نقدر نسوي شي لهم

أما سالفة شاكو باعوها , فكان المفروض الكويت تحط قوانين تمنع ان تباع نسب مؤثرة لشركات اجنبية اذا كان هالشي يضايقهم

و شكرا

Anonymous said...

موضوع الوطنية وجريدة سراق المال العام فهمنا ليش قاطعوهم وليش يهاجمونهم ،بس لماذا يدخلونه من مسئوليهم وشيوخهم ، شنو راح يكون ردهم لو هاجمت احدى صحفهم علنا بلنا المسئولين عندنا وعلى رأسهم رئيس الوزراء ، مو وحده بوحده .
أما المحامى يكيكى أيتها الأخت نسيتى تدزين مع السجائر علب نشا علشان غترته اللى راح تتعسف من قعدة النظارة !!!!!!

Zaydoun said...

تقول شركة الاتصالات المتنقلة انها يمكن تنقل مقرها امستردام

انتوا متخيلين اجتماعاتهم هناك؟ تخيلوا لو يقدمون لهم كيك متروس حشيش، وصاحبنا يرجع الجريدة وهو مسطول... علشان توصل الخوارة حدها

Anonymous said...

لا اخوي الكريم زيدون شركة الاتصالات راح تنقل مقرها الى البحرين مع بدايو العام الجديد وترجع اسباب الانتقال الا انه البحرين اصبحت مركز الاقتصادي للخليج


هااااا يالوطن ساكتييييييين موشركه كويتيه ليش تروح البحرين

والا ماتتكلمون لانه ابو بيرق يملك فيها حصه

someone_q8 said...

السلام عليكم

اشكر الكاتبة على هذا الطرح
و من خلال قراءتي لما تكتبه لدي نصيحة لها و ذلك لما تتميز به من روح الدعابه وتقبل الرأي الآخر وهي
لا اتخلين كل كتاباتج عن جريدة الوطن حاولي اتنوعين بالمواضيع نحن نعلم ان جريدة الوطن سمعتها الخايسة واصلة لي الصين ( كناية عن كثر مساوءها ) ونحن لا ننكر بلاويها لكن هذه نصيحة اخوية اللي اشوفه ان عندج موهبه كبيره وجميلة لا اتخلين اهتمامج فقط على موضوع واحد لان هناك فيه الكثير مثل جريدة الوطن سواء فئه او افراد بالمجتمع على شاكلتها . ارجوا ان يكون كلامي هذا من النقد البناء وليس شيء آخر
لك كل التحية والاحترام

bo9ali7 said...

عدل
هذا الحجي ولا بلاش

أبو زهرة
عدل كلامك الوطن من حقها تنشر اللي تبيه لان هذي حرية راي
وبنفس الوقت شركة الوطنية من حقها توقف تعاملها مع جريدة الوطن لان هذي حرية قرار مجلس الادارة

Anonymous said...

اليوم البيلر فؤاد كاتب بنهاية مقالته عن المقاطعه الي لازم يسوونها الكويتيين للوطنيه

ButterFlier said...

منطجي

Unknown said...

bo9ali7 >>
:)
قال أبو صالح و أبوصالح صادق

Unknown said...

عزيزتى بالبزنزس ماكو شى اسمه دول ضد
الدولار يتحجى
العراق بحر فلوس وانفتح على الكويت وهذا الواقع المشاريع شغالة والكل ربحان سواء اشكره او من تحت الطاولة
أنا بس لى تعقيب بسيط على الموضوع اللى طاف لو حصل ما حصل مع السعودية الكعبي ما راح يعتذر على الاقل والا بس يتدارك الخطأ فى المباراة الثانية
عزيزتى انا كنت قبل اقول ان الوطن صحيفة حالها حال باقى الصحف
ولكن فعلا الان فقدت المصداقية
الا انها لغاية الحين عندها الشريحة الكبيرة من المشتركين والاعلانات
ولكن ليش احنا نحط نفسنا بمكان غيرنا لم نتكلم ليش ما اهم يحطون نفسهم محلنا
وتأكدى الهجوم على الكويت والسعودية من قناة الجزيرة بتفهمينى ما يقدر يوقفه حمد بن جاسم بتليفون واحد؟
والا اصغر قيمة هالدولتين اللى سابقينا بالالاف الاميال بالتطور والحريات علشان ابين نفسى انى الاحسن
وياريت ما تخلين قضيتج مع الوطن سبب بالدفاع عن ناس يحاولون تهميشنا بالمنطقة
مع كل احترامى وتقديرى لج

TReSTeN said...

السلام عليكم ويعطيج العافية

شوفي اي شي ضد جريدة الوطن انا معاه قلبا وقالبا

امس فؤاد الهاشم يطالب الكويتيين يقاطعون الوطنية علشاان

اقطعت الاعلان عن جريدة الوطن

واحنا شكو بجريدة الوطن

زيين تسوي فييكم

انتوا ورسامكم المليق

وانا ماكنت مشترك بالوكنية بس انشالله

بحول عناد فييهم

ويعطييج العافية

Bad-Ran said...

اشوه خطي الوطنية

AuThoress said...

الوطن ، قناتهم داشة بكل عُنف وقوة مادية، وعلى رأي احد الاخوة هنا ،،، مُريديهم كُثُر،وهذا انعكاس لـ حال السواد الاعظم عندنا

:/ مع الأسف

حسام بن ضرار said...

بغض النظر عن دوافع الوطنية او دوافع الوطن

سأنظر للموضوع بنظره حيادية

فيه مفهوم في التسويق و بالتحديد فيما يسمى الاتصالات التسويقية اسمه
Brand Protection

و هو ان الشركة اذا لازم تحمي علامتها التجارية من الاستغلال الخاطئ و ما تنزلها بقناة تسويقية دون المستوى

على سبيل المثال، من الصعب او المستحيل ان نشوف اعلان مرسيدس على صفحات جريدة الوسيط

او دعاية س. ت. ديبون على قناة فلاش

او دعاية شركة امريكية عملاقه مثل شلمبرجير او جنرال موتورز على صحيفة مجيّرة سياسياً كالقدس العربي

المهم: الحين نطلع عن النظرية و نروح للواقع

الواقع ان كيوتل تهيمن على الوطنية بعد شراء نسبه كبيره منها

الوطن تمارس حملة ضد قطر

فبالتالي الوطنية تعمل
Brand Protection

هذا اللي قاعد تشوفه كيوتل بإعتقادي

اما عن هل الوطن معاها حق او لا

فإذا صحت قصة الاعلان التلفزيوني القطري اذن لازم يكون هناك رد كويتي بصورة ما لكن بأسلوب موضوعي و ليس برسوم استهزائية و حط من مكانة شعب شقيق بأكمله بسبب جرم البعض من ابناءه

بيت القرين said...

أنو
بعد هذا قدرنا فؤاد الهاشم
:(

زويز
حتى انا ما لقيت أي شي من إعلاناتهم

مودلس
الله يعين على القناة
المصيبة راح يكون فيها نشرة أخبار
الله يستر من التشلخ

كويتي
ما تكلمنا عنهم بالشينة عطينا مثال بس
لكن أخلاقيا ما يصير انت خصم وتهاجم المنافس
وحكومة قطر انا ما أواطن سياساتهم خير شر
بس اشوف اللي سوته الوطنية صح

أبو زهرة
السؤال لهم حق باللي سووه ولا لأ
جريدة غلطت على ديرتهم قاطعوها
لا أكثر أو أقل
مالي شغل باللي تسويه قطر بس على هالجزئية شرايك

مطقوق
عرفت السبب الثاني
:)
والإعلانات هذي ايميلات توصلني وأسويلهم دعاية
وتصدف شباب شسوي يعني؟
ولا فض فوك

أنو
يكيكي راح يلبس بيجاما مخططة ابيض بأسود ما يحتاج نشا
:)

زيدون
إهيا بدون حشيش وواصلة حدها بالخوارة
بعد حشيش
:)

أنو
طبعا لأن مصالحهم لازم يسكتون

someone
رايك أحترمه جدا لكن فضلت التخصص والمدونين الباجي فيهم الخير والبركة
بس ما يمنع بين فترة والثانية نكتب موضوع عام
مشكور ع النصيحة

بوصالح
أحسنت
ونجمة بعد يمها
:)

حمودي
أدري فيه
والوشيحي مستلمه

بتر
شكرا

مشاري
انا معاك الجزيرة من أوقح الوسائل الإعلامية اللي شفتها
لكن انا كل موضوعي إن الوطنية لهم حق باللي سووه دام شافوا إن الوطن تتعدى على دولتهم
وإحنا لما ما ناخذ موقف من الجزيرة أو غيرها من اللي يتعدون علينا هذا غلط منا وإحنا نتحمله

ترستن
زين تسوي
:)

بدران
أشوه
:)

أوثورس
صدقتي والله
الله يعيننا

حسام
نظرة تبين انك فاهم اعلاميا وإضافة حلوة
تسلم

rwatan said...

الله يستر من تلفزيون الوطن

حسب ما أعلم فإنهم للأسف شغالين صح و عندهم برامج لإجتداب جميع الفئات العمرية

و الخوف كل الخوف لو صارت الإنتخابات قلال أشهر

راح يكون للقناة تأثير خطير على الناس

أما عن الوطنية و غيرها أنا عندي خطين وطنية و أم-تي-سي و الوطن و الوطنية ينيازون إن شاء الله يحترقون بكاز مالي شغل فيهم

إن شاء الله :)