29/11/2007

أظن فلّت

حاطين استفتاء الوطن من الاسبوع اللي طاف على امل تطلع نتايج تعجبهم عن الدائرة الوحدة وطبعا ليما الحين ما سكروا الاستفتاء عشان النتايج ليما الحين مو على هواهم

وعشان لا يغشون بالنتايج مثل ما سووا من قبل مع استفتاء شركة الوطنية للاتصالات انا احط لكم النتايج مالت 12 ونص الظهر يوم الخميس 29-11-2007

اللي يؤيدون الدائرة الوحدة على الخمس نسبتهم 70.53% وهذا شي جدا طبيعي ومو عجيب

عدد الاصوات اللي تمنح للناخب
صوت واحد يؤيدونه 25.46% لتحارب الحزبية على قولتهم

أربع أصوات 22.53% بالمركز الثاني

صوتين مثل ما يبون الوطن 17.02% بالمركز الثالث

السؤال اللي كاسر ظهرهم اهوا السؤال الاخير عن السبب اللي يدفع النواب للمطالبة بالدائرة الوحدة

نسبة 53.04% يقولون لأنهم اكتشفوا ضعف موقفهم بالخمس

لأن الدائرة الوحدة تقلل من الفساد يابت نسبة 34.58 % من الأصوات

والإجابة اللي يبونها الوطن لرغبة صادقة في ترسيخ الوحدة الوطنية يابت 12.37% بالمركز الاخير

ننقل الارقام عشان نمنعهم من التشلخ

طبعا مو هني الموضوع

تدرون ان محل
guess?
اللي بمجمع مريم بالسالمية

مكتوب بهالشكل
سوق جس المركزي
يحسسوني انهم يبيعون خيار
:)

الصراحة يكيكي
ذبحني و بط جبدي من كثر ما يتكلم عن الفقارة

AGUN FOR HIER

هذي يكيكي كاتبها بأحد
مقالاته

إحترت بمعناها بعدين استوعبت إن قصده

مصطلح يقصد به المرتزقة الذين تم استئجارهم من قبل بعض الدول لخوض الحروب بالنيابة عن جيوشهم النظامية

راح اخلي اللي يعلقون يعلمونك شلون تكتبها

مو تفشلوني
انا قلت اطوف له واسكت عل وعسى يتأدب

بس الظاهر تصور ان السكوت يعني ما عندي شي عليه

لكل من يتعشم خير بهالمحامي نصير الفقراء

خل أعطيكم معلومات عنه يمكن يتوب ويسكت

عنده رنج روفر ب 20 الف وعنده جاكوار ب 11 الف سيارتين حقه اهوا غير سيارة مرته

يتقاضى 1000 دينار شهريا من الكتابة عند الحرامية

حملته الانتخابية بانتخابات 2006 تكلفتها 70 الف دينار قبل لا يكتب بالوطن يعني بدون معاش المعزب

يبني بيت بمنطقة البدع حاليا

محامي لشركة تنظيفكو

بس مع هذا فقير المسيكين

عن الهذره الزايده

تكلمت عن ان في بوقات وكشفناك

تكلمت بلسان الشباب وصرت نصيرهم وهم كشفناك

وهذا انت تكتب للفقراء على قولتك وهم كشفناك

شتبي ذبحتنا تشلخ

وهم مو هذا موضوعي

ليما الحين محد قال لي شنو بداية حريجة مريجة في مدرسة خديجة ترى والله صج ابي اعرف

يقولون بصفحة الرياضة وبمانشيت رئيسي

محضر العمومية يدين المعايير رسمياً بخرق القوانين المحلية

المعايير اهما ثلاث اندية كاظمة والعربي والكويت مثل ما شرحت لكم بموضوع طاف

بس الحلو شيقولون

لان الفرسان اصبحوا مارقين على القانون المحلي حالهم حال الجميع

الفرسان مقصود فيهم اندية المعايير

لكن الجملة وايد حلوة ان جريدة الوطن تعترف ان 11 نادي فيهم شيخين طلال فهد الاحمد الجابر الصباح ولد اخو الامير وخالد اليوسف الصباح

شيخين واحد فيهم حفظه الله ورعاه يرأس عشر اندية

يالله مو شناطرين محكمة على طول

واذا صج المعايير نفس الشي وياهم على المحكمة مخالفين قانون الدولة

يالله نبيهم ورا القضبان واولهم كبيرهم الذي علمهم

ابي احمد الفهد مو قال راح يحل المشكلة

وينه؟؟

وثاني شي سمعت ان اندية التكتل يجتمعون باسطبل

خل افهم بس شغلة

اسطبل بالافلام يصير شبرة عوده وفيها غرف صغيرة مثل الكباين

كل كبينة فيها حصان

يعني اهما وين يجتمعون بالضبط بفهم؟؟؟

وهم مو هذا الموضوع

صج نادية صقر مو كويتية؟؟؟

ندش بالموضوع

الحين خرق القوانين عادي والدليل سالفة الرياضة

فرض الحجاب على الشرطة النسائية

حفظ قضية الناقلات

المطالبة باسقاط القروض ويمكن تطيح

فصل التعليم بالمدارس الخاصة

منع الكتب بمعرض الكتاب

مطالبة الطبطبائي باقالة وكيل الصحة لأن شيعي

تعيين محمد عبدالله المبارك لمتابعة الاداء الحكومي ومن يتابع اداء محمد مادري

الحركة الدستورية ما حددت موقفها من استجواب الجراح ليما اليوم

التعامل مع جريدة الحرامية سواء بالعمل معاهم او التعاون معاهم حتى من الناس اللي مفروض وطنيين

ما عندنا وزير نفط بدولة نفطية من شهر 5 اللي طاف على قولة
عاجل

بورمية نائب

وسعدون حماد يقول عن المكلسن والاعلامية سرقة العصر

راعي الفحماء متحدث

المثقفين والمتنورين الكويتيين ما يتحركون الا كردة فعل مثل الدوائر والرياضة

يعني ما يبادرون بشي

مادري بس اظن فلّت الديرة وصارت سايبه

وعشان نقدر نعيش بهالارض

شرايكم نسوي غزو وهمي يعني التلفزيون يعلن ان صار غزو

واللي يطلع يقعد بره خلاص ما يدش

والصامدين يظلون

اراهن ما يظل 100 الف بالديرة ونبدي من يد ويديد

ونسميها سياسة العودة

على قولة سعد الفرج بحامي الديار

اذا ما نتحرك الحين ما اظن يمدي نتحرك بعدين

ماكو احد يدعونا للتحرك

اخاف ادعو انا واكون بروحي
ويطيحون علّي وبعدها يودوني أمن الدولة
بس ماعندي خمسين فلس عشان اكتب كنت هنا من اجل الكويت
مثل ما سوّا بشار الصايغ

26/11/2007

موضوع استهواني


تحديث
**********
شارك مع مدونة العرزالة
لا لصحيفة سراق الوطن

::::::::::::::::::::::::::::::::::::::::
موضوع غلبته للعزيزة

white wings

إستهواني وايد وخلاّني أفكر وأحاول اكتب موضوع أغطي فيه جوانب معينة

بس دامنا بطاري

white wings

ترى عندها ندوة مع تجمع القوى الطلابية باجر الثلاثا مع عبدالرضا أسيري وجاسم السعدون وعبدالكريم الشمالي

بجمعية المهندسين جبال فدركرز شارع الخليج الساعة سبع

المهم الموضوع اهوا عن مقاطعة مؤسسة الوطن

ويمكن الشي اللي خلاني اكتب هالموضوع الحين

إني قمت ألاحظ إن صج صج ماكو مستوى

يعني بالفترة اللي طافت لما كنت أرد عليهم كان في أمور ممكن تكون خافية على الناس فأوضحها

بس هالايام لما يجذبون فأهما يجذبون أشكره

وماله داعي ينكشفون بس هذا مو معناه كلش إني أوقف عن كشفهم

بس اذا لقيت ان في مستوى

يعني أتمنى يرفعون مستوى الجذب شوي عشان أرد عليهم عدل

المهم ندش بالموضوع

بس قبل الموضوع

كان في اغنية

حريجة مريجة في مدرسة خديجة

ابي شنو بدايتها

صار لي اسبوع افكر وماني قادره اتذكر

يملك مؤسسة الوطن الاعلامية وزير سابق ارتبط اسمه بسرقات اموال عامة

وتحديدا سرقات الناقلات

وبعد ما كان ما عنده الا راتب حكومي صار عنده ملايين

خلص الغزو وشرى اشياء وايد ضخمة بالكويت ومنها جريدة الوطن

والله يسامح اللي باعها على هالاشكال

وطبعا من يوم ما استلموها لصوص الناقلات

واحنا مو شايفين منها اي خير

فتن - تفرقة - افتراءات - كذب

وطبعا لأن الفلوس ما تعب فيها كلش

فقام يصرف على الجريدة ويوزعها ببلاش ليما تغلغلت ووصلت حق عدد كبير من الناس

وطبعا هالانتشار حقق له نسب كبيرة من الاعلانات اللي قامت تزيد فلوس الناقلات اكثر واكثر

إلى أن اتحفنا بتلفزيون الوطن

وطبعا راح يكون مسيس وايد امس مستضيفين سعدون حماد وقبله العيار وقبله طلال الفهد والخرافي ووايد من هالنوعية

والخافي اعظم

شتبين دانه خلصينا؟
انا اقول لكم
لنفرض ان واحد يه وباق بيتج أو بيتك
وبعد جم يوم يه يبي يشتري بيتك من الفلوس اللي باقها
هل راح تبيعين البيت أو تبيعه له؟
او إن طلب منك تشاركه بشركة هل راح تشاركه؟
أو طلب ياخذ بنتك هل راح تعطيه؟

مفروض الإجابة المنطقية منكم تكون لأ

واذا سألتكم ليش لأ؟
راح تكون اجاباتكم
هذا حرامي هذا مو شريف هذا باقني شلون أفكر إني أتعاون معاه

طيب انا راح اسألكم شلون عيل تتعاملون مع اللي باق فلوسنا كلنا ككويتين؟
شدعوه اهوا الوحيد اللي بايق؟؟ ديرة بطيخ الكل يبوق فيها واذا قلت ماني متعامل معاه يعني ما راح اتعامل مع نص الكويت

ليش ما نخلي عدم التعاون مع الحرامية منهج انزين؟
عن المثالية الزايدة اذا ما تعاملنا معاهم ما راح نعيش

اي مو اهما بسبب هالفكرة عندنا اهما يبوقون وبفلوس البوق يستانسون ويربحون؟
شنسوي بعد هذا قدرنا

اذا الشعب يوما اراد الحياة لا بد ان يستجيب القدر؟
هذا شعر وكلام خيالي والشعوب السعيدة لا تكتب شعرا
وعن الخيال الزايد

وتعالي دانة شمعنى علي الخليفة يعني؟
شكو بعلي الخليفة أو دعيج الخليفة حتى؟ مالي شغل فيهم
بس هذا الإنسان باق ونهبنا بوقت الغزو وغير جذيه بفلوس البوق قاعد يفرقنا ويمزق ديرتنا

شلون باق يعني طلع حكم عليه؟
يا جماعة لجنة التحقيق لو كانت تحقق مع صدّام جان طلعوا بعدم كفاية الادلة على الغزو
مو مقياس
احنا عندنا وصولات واشياء ملموسة ان كان يتحول له مبالغ
وشوفوا موضوع اتحاد امريكا عنه، اللي حطيت له رابط بالموضوع اللي تحت
اي صج مبروك فوز الوحدة

خلصينا شنسوي يعني؟
ليش ما نقاطع هالمؤسسة بكبرها؟

إنتي من صجج جريدة ولها إنتشارها وتوصل ببلاش حق وايد ناس؟
إنتوا من صجكم؟!؟؟ مو هذي نفس الجريدة اللي سبتنا أيام نبيها خمس؟ مو هذي نفس الجريدة اللي صورت حملات نبيها خمس انها حفلات رقص؟ مو هذي الجريدة نفسها اللي ما خلت احد بالكويت الا وحرامي، شنو انتوا كلش ما عندكم احساس
تاكلون لحم خنزير؟؟؟
يقولون لحم الخنزير يموت الاحساس مادري عاد صج جذب بس قلتها

قاطعناها شبيصير يعني؟
ابد ما يصير شي، بس يقل الانتشار، يقل الاعلان، تقل ايرادات فلوس البوق
هذا من جانب اقتصادي
من جانب المواضيع
منو يدري مجلة المجتمع موجودة هالايام ولا لأ؟
انا مادري الصراحة بس اللي اعرفه ان قل الانتشار وايد
وما اعتقد إن احد يقرى شي عنها و في ناس ما يعرفونها
شاللي يمنع ان نسوي بجريدتهم جذيه؟

وتلفزيونهم وين بتروحين منه؟
مو اقول لكم اذا صار في مقاطعة من الناس للجريدة انهم ما يتعاملون معاها وما يشترونها او يشتركون فيها نفس الشي نقدر نسويه للتلفزيون
على فكرة سئلوا أي مفتي سني أو شيعي ما حكم العمل وتقاضي الأجر من جهة مشكوك في مصدر أموالها شك كبير؟
راح تكون الاجابة ان حرام ويجب تفاديها
هذا بالنسبة للي ما يعترفون بقانون الدولة ويا كثرهم ناخذهم من جانب ديني عشان يسكتون

إنزين شدعوه بنقدر يعني احنا جم واحد 10 أو 20 شدعوه بتفرق معاهم؟
نبيها خمس بدت بعشرة أو أقل وصارت قضية دولة وانقرت ارادة العشر لأن عندهم ارادة

هذا جزئي الأول من الموضوع ويمكن في جزء ثاني بناءا على ردودكم اللي يمكن تنبهني على اشياء غافلة عني

24/11/2007

دائرة وحدة

تحديث
***********
عندها موضوع عن الحرامية يستاهل نعرف رايكم فيه
:::::::::::::::::::::::::::::::

من اللي عروقهم بالماي وصلتني ان في ثلاث شغلات تحر خليف هالايام

راح اقول لكم ياهم مع الموضوع

أول شغلة تحر خليف هاليومين إن مو قادر يتكلم ويطبل حق إبوه عن حفظ القضية بأوامر عليا

مادري شسالفة أوامر عليا هاليومين

بالاوساط الدولية او بالاصح الاوساط المحيطة للكويت تعريف دولة الكويت اهو

دولة عربية صغيرة تقع في الشمال الشرقي للخليج العربي وتحيط بها دول كبيرة كالسعودية والعراق وايران وتتميز بمواقفها المحايدة وعلاقاتها الطيبة مع جيرانها الثلاثة وبقية الدول الخليجية على وجه الخصوص

وقد دأبت الكويت على رسم هذه الصورة منذ قديم الزمان وتعزز هذا السعي منذ تشكيل وزارة للخارجية الى يومنا هذا

اهم شي بالموضوع او التعريف اهوا مسألة إحاطتنا بدول كبيرة

الحلوين بجريدة الوطن مصرين على نشر العداء مع الكويت

يعني شبوا على ايران من حرب لبنان مع اسرائيل السنة اللي طافت وليما اليوم

وبعدين شبوا على العراق وشغالين والدليل
مانشيتهم اليوم

أخطاء ما قبل 2 أغسطس1990 تعود
غزو عراقي بشري... للكويت


وطبعا هذا غير نجرتهم مع قطر وغيرها من الدول

هالفتن اللي قاعده تبثها هالجريدة يوميا شنو راح تسوي بعلاقتنا مع دولتين كبار مثل ايران والعراق

ومنو بيتحمل المسؤولية؟؟

ان أعتقد إن إذا في أوامر عليا لازم تكون ألحين عشان توقف هالاشكال اللي لا تمثل الكويت ولا أهلها

بس تمثل مجموعة حرامية ودهم تصير بلبلة بالكويت يمكن يقدرون يبوقون

عندي سؤال مهم

ابي شي واحد مسكه احمد الفهد ونجح فيه؟؟؟



أحلى شي ان فاطمة حسين بدت تكتب بالوطن وثاني مقالة لها تنتقد فيها جريدة الوطن

اتمنى ان اقول لمن اثاروا غبار الاحتجاج ان يتمهلوا فالوطن متخم بقضايا اكثر اهمية من (دويخة) الخميس والجمعة والسبت
انها مجرد نهاية الاسبوع لا نهاية العالم


الشغلة الثانية اللي تحر خليف هالايام

ان مجبور يرعى نشاطات اتحاد امريكا لأنها مفيدة حق انتشاره

مع ان اتحاد أمريكا مسوي
صفحة خاصة على موقعه مختصة ببوقات ابوه

والشخصيات اللي مضطر يغطيهم كلهم ضده يعني مرزوق الغانم ومحمد الصقر وخالد الهلال

فمسكين حده منقهر قاعد يدفع فلوس حق اللي يفضحون بوقة الناقلات

وناسة

المهم خندش
بموضوعهم اليوم

اللي اهوا موضوع الدائرة الوحدة

طبعا انا من البداية مستغربة شلون هذيل يدعون لتقليص اكبر للدوائر

لكن اليوم بانت النية

وخاصة من الابطال اللي مطالبين بتقليص الدوائر ليما دائرة وحدة امثال سعدون حماد وربعه

الفكرة كلها متلخصة بمسألة التصويت

يبون دائرة وحدة بس بصوتين

يعني كل واحد له صوتين

يعني لا طبنا ولا غدا الشر

صوتين معناته ان اللي يحتاج للفوز ماراح يحتاج اكثر من 10 الاف صوت على مستوى الدولة كلها

يعني ما صار شي

اهيا الفكرة كلها من تقليص الدوائر ان نبي المرشح اللي يفوز يحصل على اصوات وايد من دائرة كبيرة

عشان نضمن ان ما يقدر يشتري مو نضمن كثر ما نقلل من الشرى والفرعيات والطائفية

والشباب الحلوين طبعا ما يبون هالشي لأن يدرون النوعيات اللي بتطلع من انتخابات فيها صعوبة بالفوز ما توالم مهازلهم وفتنهم

يقول لكم ان اندية التكتل برئاسة سعادة الشيخ طلال فهد الأحمد الصباح حفظه الله ورعاه

ومن
جريدتهم يقولون

حيث كان هناك اتفاق مطلق على الانصياع الكامل لقرارات الفيفا خاصة وان التعهد الذي قدمته الكويت وقرار رفع الايقاف من قبل لجنة الطوارئ بالاتحاد الدولي جاء مشروطا بالانصياع خاصة للمادة 32 المتعلقة بتركيبة مجلس الادارة الخماسية وفقا لقرار المكتب التنفيذي الصادر في 27 مايو الماضي

يا سلام عليهم والله جان زين تحترمون قانون الدولة مثل احترامكم للفيفا

بس انا اقول خوش ديرة وخوش قانون

وبالنسبة لوزير الشؤون يعني مثلا حضرتك شنو ناطر متى بتحولهم للقضاء

مادري

قاعدين يخالفون قانونك شناطر معاليك؟؟

آخر شغلة تحر خليف هالايام شكل صندوق جريدة الجريدة لأن كل الناس تقول عنه حلو وستايل

بس انا ما اقول الا

ما يحتر من قوطي الا... حطوا اللي تبونه
بس ما اقدر أكمل عندي أوامر عليا
:)

وهم

21/11/2007

سوالف



خنسولف شوي دام الماي راكد وماكو اشياء قوية

بس لا تفكرون بلحظة ان الوطن ما يمارسون الغباء كالعادة وبلبلهم لمبة من غباء الحين اسمها لمبة ولا تريك؟؟؟

وليش تريك اساسا؟

يالله عاد خنسولف

اول شي بما ان الحكومة قررت انها توقف الكوادر لمزيد من الدراسة

انا اقترح ان يدرسون كادر للمدونين مانبي رواتب نبي بس كادر

اذا المدونين موافقين نسوي اضراب

مواطن يعترف بانه قد «دأب على الاعتداء عليها ـ الخادمة ـ بالضرب بالايدي والارجل وتعذيبها بسكب الماء الساخن على أجزاء متفرقة من جسدها..» كما انه «.. لم يعرضها على أحد المستشفيات خشية افتضاح امر تعديه عليها» ثم يقوم «.. بالضغط بيده على عنقها ضغطتين متتاليتين قاصدا ازهاق روحها فسقطت ارضاً وفارقت الحياة»، ثم «.. قام بالقائها باحدى الساحات الترابية... وقام بتغطيتها ببعض أوراق الاشجار اليابسة»!!هذا المواطن «النموذج» حكمت عليه محكمة الجنايات بعدم النطق بالعقاب والزامه تقديم تعهد بكفالة 100 دينار يلتزم بها بحسن السلوك لمدة سنة

هذا جزء من مقالة
نبيل الفضل اليوم

شقصدك يعني الحكم مو عادل

شرايك تقول لأ ويانا بلبل

واحد داز لي ايميل عن مسج من خدمة اسمها الازرق يقول المسج

أحمد الفهد يحاول اقناع اندية التكتل باحترام القانون والتوقيع على ال 14

يعني 10 اندية مادري 11 نادي

بمجالس اداراتهم يرفضون تطبيق القانون وإبن الشهيد يحاول يقنعهم احترموا القانون

يعني وصلنا ان اللي ما يحترم القانون نقنعه ان يحترم

واذا ما اقتنع شبتسوي يا ولد الشهيد؟؟؟

والله خوش ديرة اللي نتفاوض فيها على تطبيق القانون

خو اللي ما يطبق القانون اشتكوا عليه

ولا القضية تحفظ بعد؟؟؟

الا صج أنا في شي مادري لأني ما احب تلفزيون الوطن أشوفه ولا اهوا شي الكل شايفه

نادية صقر ومحمد المنصور ما يعرفون يقدمون ولا يتهيأ لي؟؟

تدرون إن نادية صقر سألت الخرافي بمقابلتهم معاه

ما ولهتوا على أحمد الفهد

وبمقابلة ثانية سألت أظن طلال العيار

ليش بعض الناس يصورون ان الدستور قرآن ومحد يقدر يغيره

يعني اشكره يبون يسوقون هالافكار

آخر شي من السوالف

الحين كل الناس تدري انها جريدة فتن

وكل الناس عارفة هدفهم يقسمون الكويت

طيب ليش كل الناس قاطين روحهم قط على هالجريدة مو في 9 جرايد غيرها روحوا صرحوا فيها

يعني قوائم الطلبة حتى اللي نتريّا منها خير تروح تصرح عندهم مابي اقول اساميهم يفهمون بروحهم

النواب اللي يهاجمون سراق المال العام هم يصرحون عندهم

وغير اللي يعلنون عندهم

اي قاطعوهم ويطيح سوقهم مو قصة

إي على طاري التعليم العالي

من ياب الطاري محد

بس بسولف

ابي اغرب سالفة منكم صارت مع التعليم العالي


وهم



18/11/2007

للبنات بس



سيدي القاضي
نامت أعين اللصوص في بلادي
والقانون حكاية ماضي
وميزان العدل .. مال
لكفة من يملك المال
سيدي القاضي
يُسرق رغيف .. تَحكم بالإعدام
تُسرق دولة ... تَصدر عفوٌ عام
سيدي القاضي .. كافي
حتى لا اتُهم بذكر أسامي
ومن ضحية .. أصبح أنا الجاني

من إبداعات امل خالد

اليوم موضوعنا رياضي

لاني أخيرا فهمت اللي صاير بعد معاناة وألف سؤال و قراءة منتديات

اذا شفنا واحد لابس دشداشة بيت هذي المقلمة وشفناه رايح الجمعية ننقد عليه لان لبسه مو مناسب

واذا شفنا واحد تكرمون لابس نعال حمام (تكرمون تعود على النعال وعلى الحمام بعد) ورايح عرس هم ننقد عليه لان مو مناسب

اللي ابي افهمه ليش لما الشباب يلبسون فنايل الاندية ويقعدون بالمجمعات والكافيهات عادي؟؟؟

مو هذا لبس رياضة ليش يطلعون فيه؟؟

وثانيا ليش لازم أندية عالمية

يعني ليش ما نشوف واحد لابس فنيلة النصر الرياضي وقاعد بالراية؟؟؟

المهم ندش بالموضوع

الحين سالفة الرياضيين

إتحاد الكرة ومن جم واحد يتكون

الفيفا يبيها خمسة

الفيفا طبعا اهوا الاتحاد الدولي لكرة القدم

والقانون الكويتي اللي طلع بشهر 2 يقول لازم الاتحاد يتكون من 14

انزين الاندية الكويتية منقسمة قسمين

قسم اسمه اندية التكتل ويتكون من 11 نادي

وقسم اسمه اندية المعايير ويتكون من 3 اندية

وطبعا ماراح اقول اسامي الاندية ال 11 لأن مو حافظتهم بس المعايير أهما كاظمة والعربي والكويت

أندية التكتل يتحكم في قراراتها معالي سعادة سمو الشيخ طلال الفهد الأحمد الصباح حفظه الله ورعاه

بس اهوا طول المشكلة مو مصرح لان عنده اوامر عليا

من منو محد يدري بس عليا

أندية المعايير تقول لازم يتطبق القانون اللي انقر بمجلس الأمة وأظن رقمه 5\2007

يعني 14 عضو بالاتحاد

وكل عضو يكون من نادي من ال 14

يعني ال 14 عضو باتحاد الكرة

يكون في عضو من كل نادي

قوم ربع سمو معالي سعادة الشيخ طلال الفهد الأحمد الصباح حفظه الله ورعاه وادام ظله وجعله ذخرا للامتين العربية والإسلامية

ليش الأمتين كل الأمم

وقالوا لأ ما يصير

الفيفا ما يرضون

الفيفا يقول ما يصير تتدخل الحكومة بالاتحاد

قوم عاد شنو

بالذمة يا شباب ياللي قاعدين تقرون الموضوع يعني اسم الموضوع للبنات بس

شهاللقافة

صج مو مستحين من نفسكم

بالله قاعده أكتب سوالف خاصه مو عيب عليكم

بس شيقول الفيفا بعد يقول اذا انتوا يا اندية الكويت اتفقتوا

عادي اللي تبونه يصير

قوم شنو

طلعوا 3 اندية وأظنها الفحيحيل وخيطان والجهراء

وقالوا احنا نرفض قانون الدولة

بصراحة وأشكره قالوا نرفض قانون الدولة لاحظوا معاي

وطبعا نادي القادسية برئاسة سمو سعادة معالي الشيخ طلال الفهد الأحمد الصباح حفظه الله ورعاه وسدد خطاه

ما قال نرفض بالعلن خلّى مجموعة من الأندية(الفحيحيل-خيطان- الجهراء) اللي اهوا يتحكم فيهم يقولون جذيه

يعني تكتيك

مسكين محد يدري كلنا على نياتنا

قوم شاللي صار الفيفا قال دامكم مو متفقين عيل احنا نقول خمس اعضاء بس واذا خالفتونا يا ويلكم

والوضع اللي صاير الحين ان اذا ما صار الاتحاد خمس اعضاء ماكو نشاط كروي دولي حق الكويت بأمر الفيفا

واذا ما صار 14 مخالفة لقوانين الدولة وهذا معناته كل ما يتشكل اتحاد من 5 اعضاء يقدر اي واحد يطعن بالانتخابات وتنعاد

يعني نفس الشي ما يكون عندنا طمباخية

شرايكم ان كلمة لأ كل مدون يستخدمها قبل اي تعليق في اي مدونة كانت

عشان نوصل رفضنا للأوضاع اللي حاصله

انزين

الحكومة الايطالية وقّفت الدوري الايطالي بسبب ان واحد من المشجعين الايطاليين انقتل

يعني الحكومة تدخلت

والفيفا ما وقف نشاط ايطاليا

والدليل ان امس السبت منتخب ايطاليا لعب مباراة دولية بس مادري ليش ما لعب دل بييرو

والسبب شنو ان كل الاندية متفقة مع إجراء الحكومة الايطالية

يعني عندنا ثلاث اندية كويتية وبصوت عالي تقول لا لقوانين الدولة

وبالجرايد اشكره

لكن دولتنا العزيزة الظاهر ان مخالفة القانون اشكره جذيه عادي عندهم

بس ما ينلامون اذا اللي باق ملايين ما عليه شي

واقفه على هالاندية؟؟

اللي يونس بالموضوع موقف جريدة الوطن

طبعا واقفه مع معالي سمو سعادة الشيخ طلال الفهد الأحمد الصباح حفظه الله ورعاه وادامه

شمسوين الوطن

واقفين مع قرار خارجي على قرار الكويت

وانا مستعده اوقف معاهم بس على شرط

نوقف مع القضاء البريطاني ونفضله على قضاء الكويت

وبالذات موربك

شرايكم يا جريدة الوطن؟؟؟؟

موضوعي هذا اهداء لجاسم اشكناني مسؤول الصفحة الرياضية بالقبس

و عبدالكريم الشمالي مسؤول الصفحة الرياضية بالجريدة

مساكين تعبوا وايد واهما يشرحون

وهم اللي يقدر خل ينزله بالمنتديات الرياضية ترى وايد ناس يتابعونها

وهم

16/11/2007

لا تبجين


نوعدج نبقى على باب الصبر طول العمر
ولو كان ميزان الذهب غشاش

14/11/2007

للحرية


وهم تــحــديــث
***************
وصلني مسج من كويت نيوز
النائب الطبطبائي سأستقيل من المجلس إن لم يصلح الطويل الصحة خلال شهر

مادري ليش ذكرت جملة طارق العلي بسيف العرب
ترى والله أثوّر بنفسي
:)

تــحــديــث
***************

في شغلة حارتني وماعندي موضوع يديد
قلت أقولها هني
الطبطبائي معطي مهلة حق وزير الصحة شهر وبعدين يوريه وجه آخر على قولته

أنا اقول شرايك تعطيه ربع ساعة مو احسن؟؟

إنت إمسك الوزارة ولك سنة
وعدلها شرايك؟

إي على فكرة ترى أنا بس قاعده أعلن عن الاعتصام وماني من المنظمين
لـلــحـــريــة

السبت ، 17 نوفمبر 2007

اعتصام مفتوح

الساعة 6 مســـاءً

رفضاً للرقابة

دعماً للحريـــــــة

ساحة معرض الكتاب/
مشرف

اشعل شمعة واترك توقيعك

مشاركتك موقف وطنــي

وهم





12/11/2007

عنبر

في تحديث تحت
هلا شلونكم

عنبر هذا واحد مشترك بجريدة الوطن

وما يقرى غيرها

وما يدري لا عن إنترنت ولا عن جرايد ثانية

ويروح حق ديوانيتين بالاسبوع

وحدة كلها رياضيين ووحدة كلها سياسيين

المهم هذا عنبر يفصفص جريدة الوطن صفحة صفحة

لأ

يوم 28-10 راح ديوانية السياسين وشاد حيله

يقول لهم

ها بيّنت الوزارة اليديدة

لا ويقولها ويحسسهم إن إهوا مشكّلها

واحد نط له وقال له شلون شنو بيّن

توهق عنبر

بس قال اللي
قراه بالوطن يومها

ومن ضمن ذلك عادل عاصم وقيس الدويري وعلي جابر الاحمد ومحمد الطبطبائي ومصطفى الشمالي

هذي اسامي بعض الوزرا اليدد
وبتشوفون

جان واحد توه واصل الديوانية يقول له

انت يا عنبر الحين داش علينا بشرك وبينت عشان تعطينا توقعات

ياخي اقرا جريدة الجريدة اليوم منزلين التشكيلة كلها

قبل لا تعلن

ماعدا وزارة الصحة


اهني توهق عنبروطلع من الديوانية مندقر خاصة لما حطوا الأخبار بالتلفزيون وحطوا التشكيلة الوزارية وطلعت نفس كلام جريدة الجريدة

لأ

فاصل شعري قصير مع نمر بن عدوان هذا العصر

مبارك بن شافي

كاتب شعر عن المعزب علي الخليفة

يوم 4-11

يقول في أحد الجمل

شيخنا شيخنا ماله حلايا
:)

نكمل مع عنبر

كان في قطوة أمس بندوة المنبر
أشوه ما راحت صوب النساء

مدونة وطن النهار صادتها

عنبر يوم 29-10 رد ديوانية السياسيين ما غيرها

ويقول
شهالوزارة

هذي الوزارة مشكلها مشاري العنجري

خربوا البلد وعطوها حق هالاشكال

شنو يعني ماكو ارادة؟ اللي مشاري العنجري يشكل الوزارة

شنو يعني يحطون الطويل والشهاب

وهذيل ربع العنجري

وطبعا معلوماته كالعادة من
جريدة الوطن

يوم 7-11 راح ديوانية الرياضيين

وطاح سب بمرزوق الغانم وربعه

هذيل اهما اللي خربوا الرياضة هذيله اهما اللي يبون كل شي على كيفهم

ما يخلون الشيوخ يعدلون الرياضة

ربع الديوانية شافوه مشتط وايد

اي على فكرة ترى عنبر مو أسمر
:)

قالوا عنبر علامك يبا ما تسوى السالفة

قال لهم شلون ما تسوى السالفة تدرون ان واحد من كتاب الوطن ينقال له نواف الفزيع كاتب تفاصيل عن اللي صاير

بين مرزوق وربعه

ورئيس الاتحاد الآسيوي محمد بن همام

قايلين حق بن همام ان نعطيك اللي تبيه بس وخر الشيوخ عن رياضة الكويت

ونبي وقفتك ويانا؟؟

هذا مرزوق الغانم مالكم

لا وسمعت إن بعد دمه أزرق

مسكين عنبر ما يدري شنو يعني دماء زرقاء

بس ماخذها من يكيكي ويقولها

المهم هني توهقوا ربع الديوانية وسكتوا

مشى عنبر واهوا مفتخر وايد ان قدر يسكّت ربع الديوانية ويطلع بطل

وطلع يدعي حق جريدة الوطن انها خلته قوي بموقفه وكلمته مسموعة

المهم قال انا برد الديوانية باجر وخلاص كلمتي اهيا العليا

واصير مصدر الأخبار حقهم بعد

الله يخلي جريدة الوطن

راح ديوانية الرياضيين اليوم الثاني

ولاّ ناطرينه الشباب

الله يابك يا عنبر

حس بالقوة وعباله يبون منه أخبار حصرية وقوية

آمروا شبغيتوا

واحد سأله شسم اللي كاتب عن مرزوق بالوطن

جان يقول لهم نواف الفزيع

جان يقولون هاك اخذ عيل

بسم الله و الحمدالله و الصلاة والسلام على رسول الله ..بالنسبة لما ذكر في مقالات نواف الفزيع طبعا كلها افترائات و اقاويل كاذبة و انا اتحاداه و اتحدى من ورائه في أن يثبت صحة هذا الكلام اما ردي عليه ستقرؤونه حسب قانون المطبوعات في نفس الصحيفة و لن انحدر الى مستواه فهو يهاجمنا منذ فترة طويلة و يهاجم اخواني اعضاء مجلس الامة و كلنا نعرف من ورائه و حقيقة لا يخفى على القارئ سبب نشر هذه الافترائات و الاكاذيب في هذا الوقت بالذات و لكني لن التفت و حقي سأخذه بالقضاء وقد اتخذت الاجراءات القانونية برفع قضية لأخذ حقوقي و لله الحمد هو ذكر الوقت و التواريخ و بسهولة يمكن اثبات اذا كنت متواجد بقطر في الوقت الذي ذكره فأنا لم اتواجد في قطر الا في الفترة ما بين 26-8 الى 3-9 و ذلك لمساندة نادي الكويت الذي كان يشارك ببطولة الخليج لأبطال الدوري و قبلها لم ازور دولة قطر لمدة سنة ونص الى سنتين و لله الحمد كشف الحاقدين سيكون سهل و عليه مواجهة القضاء العادل

هذا كلام مرزوق حصريا بمنتدى اسمه الأزرق

توهق عنبر
وقال يالله فمان الله

واهوا يقول خونوا فيني جريدة الوطن

المهم قعد بالبيت يفكر على انغام بحبك ياحمار

شسوي شسوي

قال راح اغط عن ديوانية الرياضيين شوي

وأجابل ديوانية السياسيين

يوم 11-11 راح ديوانية السياسيين

ولاّ في واحد قاعد دمه ثقيل وما ينسى كلش

قال حق عنبر

الوزارة قلت لي منو مشكلها؟

قال له العنجري جم مرة بعيد لك السالفة

جان يقول له اللي ما ينسى

من وين يايب هالمعلومة انت؟

عنبر: من جريدة الوطن

اللي ما ينسى: عندهم واحد بالوطن اسمه نبيل الفضل عدل؟

جان يقول عنبر اي هذا بو براك
من أقوى أقلام جريدة الوطن
ورايه دايما بالصميم


جان يقول اللي ما ينسى اي

عيل ما قريت شكاتب اليوم بو براك

قال له عنبر لا والله قلت برد بالليل اقرى

لهيت شوي مع زوجتي جمانة


ماتركب عنبر وجمانة مو؟؟

جان يقول له اللي ما ينسى

اي بوبراك مالك
قايل اليوم


الوزارة الحالية يسميها الشارع السياسي بحكومة مشاري العنجري، مع ان سمو رئيس الوزراء لم يستشر العنجري ولا غيره في تعيين وزرائه الاخيرين، وقام بالاتصال شخصيا بكل واحد منهم، وهذا ما اكدته مصادرنا عند هؤلاء الوزراء

يعني مو العنجري متدخل

يعني الفضل قاعد يجذب جريدته


عنبر طلع من الديوانية

وراح شارع الصحافة

وتهاوش مع جريدة الوسيط

لأن يبي يشترك فيها واهيا مافيها اشتراك توصل ببلاش

بس هم ابرك من الوطن

مسكين انت يا عنبر

وهم لأ

ياريت اي تعليق من اليوم ورايح يكون فيه كلمة لأ قبل التعليق عشان الكويت مو عشاني

إي على فكرة أمس المانشيت الرئيسي للوطن

تجسس إيراني بحري على الكويت

اليوم العلاقات العامة بوزارة الداخلية تقول

نفت وزارة الداخلية فى بيان صادر عن ادارة العلاقات العامة فى العاشرة من مساء اليوم يشكل قاطع صحة مانشرته احدى الصحف المحلية عن ضبط زوارق تتجسس على دولة الكويت. كما نفت ضبط اى اجهزة اتصالات لهذا الغرض ووصفت الخبر بانه عار عن الصحة واكدت الوزارة فى بيانها ان وزارتى الداخلية ممثلة فى ادارة خفر السواحل والدفاع ممثلة فى القوة البحرية تقومان بمهام عملهما على اتم وجه

يالله هاردلك خليف

اليوم منزلين خبر الوطن صفحة أولى ومانشيت رئيسي

لا ننفي استخبارات ايرانية على اللنجات

طبعا عشان لا ينخدع أحد بكلامهم الفاضي

اهما اول امس قالوا

ضبط الاجهزة الامنية الكويتية اجهزة لاسلكية على متن لنجات ايرانية، من شأنها «اختراق الاتصالات العسكرية اللاسلكية، وتسجيل تفاصيله

يعني الاجهزة الأمنية صادت شي

مو راح تصيد

يات العلاقات العامة وقالت


لأ وطالعوا ردهم فوق
قالت ما صدنا شي

توهقوا الحرامية

شيسوون

قابلوا وزير الداخلية

وكان رده طبيعي

هذا وارد.. لا استبعد ولا انفي وجود عملاء استخبارات ايرانية يعملون على اللنجات

يعني بإختصار وزير الداخلية قال كل شي جايز
بس ما قال صدنا
مثل ما قالوا الوطن
ان الداخلية صادت

يعني هم جذابين
لا تاخذونا بالصيحة وتشدون حيلكم

ولا تجبروني اكتب مرة ثانية وانا مالي خلق
عندهم خوش موضوع عن خرابيط الوطن

10/11/2007

فهمتوا؟؟؟


توضيح وتحديث مهم جدا جدا

أحد المدونين الاعزاء

إسمه

Exzombie

كاتب تعليق بالموضوع اللي طاف

وكاتب موضوع بمدونته عن سالفة لأ

طبعا رايه وأحترمه جدا جدا

بس لو بس سائل شالهدف من الموضوع

كنت راح أقول له

الفكرة وببساطة

ان نوصل لمتابعين المدونات

ترى إحنا نفزع للكويت

وبأسرع وقت
ولأ كانت رفض للسرقات
وتسهيلها
مو عشان بيت القرين
عزيزي

ما تهمني مسألة منو يقرى أو يكتب تعليق ولما كنت أكتب كتبوا تعليقات من باب الدعابة
وإعتذرت عنها لما نبهني فريج سعود

انا استمريت يوميا ولمدة شهر ونص

ومحد كان يكتب اي تعليق عندي وما شكيت

لأن عندي هدف معين أبي أوصله

وعمرها التعليقات ما كانت هم بالنسبة لي

واذا كان هذا الموضوع همي

جان طلعت لي جم اسم وكتبت فيهم

يعني عندي شعبية

مشكور على رايك وجرؤتك

لكن أعتقد إنك أخطأت
إي وتصميم مدونتك حلو







خلال 27 ساعة تقريبا وصل عدد اللي قالوا لأ

لمنح الكويت لللصوص أكثر من 200

أعتقد الكل فهم الرسالة عدل

وفهم إن مو الكويتيين اللي يفكر احد ان يضحك عليهم

هذي الرسالة لازم تنفهم عدل

ولازم النواب يستوعبونها

عموما

انا مادري ليش المدونين ما يحطون اعلان عن نشاط المنبر الديمقراطي

ساعات بعض المدونين تحوشهم نحاسة مادري ليش

اي حطوا اعلان شخسرانين؟؟

طبعا مو الكل

لا تعفسون ويوهكم

المهم

باجر الأحد مهرجان خطابي بعنوان يوم الدستور

بديوان النيباري بالضاحية الساعة 7

يشارك فيه

الديين والرومي وعدنان عبدالصمد

وكوكبة من الشخصيات

اشكره توهقت وما اعرف الباجي
:)

وراح يكون في عشا فاخر بعد المهرجان

أشكره قاعده أجذب

وأنا راح أكون موجودة

:)

واقول انا غنيمة حرم سليمان ابو الريش

:)

وبعد المهرجان لنا كلام ثاني مع ابطال الناقلات

اي على فكرة

ناس دازين ايميل ان بيسوون لأ ستيكر ويتوزع باجر

ومشكورين كل الناس اللي اعلنوا عن لأ عندهم او من خلال المسجات

نلقاكم باجر

وهم
لأ

09/11/2007

لأ



هالصورة بقتها من مدونة

as you like bazoon

وبدون إستئذان بعد

واللي يبي يتهمني بالسرقة أبشركم ما راح تكفي الأدلة

المهم

الصراحة كلما حاولت أكتب

شفت الكلام يوقف وشي يحن على راسي يقول لأ

جدا جدا متأثرة لأسوأ درجة بمسألة حفظ القضية واليوم براءة الداوود بعد

يعني الرسالة واضحة
وتقول بوقوا

وأظنهم فسروا مادة الدستور للاموال العام حرمة

بمعنى زوجه مو حرام يعني

ماني قادره أكتب والله

وأشوف النواب ساكتين

أبي منكم حرفين مو أكثر
المدونين وغيرهم

كتبوا بالتعليق

اذا ماوصلت التعليقات بهالكلمة الى 200

ماراح اكتب بعد

ابي الكل يسمع

لا تبخلون على الكويت رجاء

07/11/2007

عالم جميل


أبشركم يا جماعة

شروق عادت للتدوين و
بعد

مبروك على الكويت

أنا بعدي مصرّه على إن سراق المال العام ما ضخموا حفظ قضية بطل الناقلات على قولة
النيباري

ولا هاجموا اللي اتهموا البطل طول الاسبوع اللي طاف

لسببين مالهم ثالث

يا إما إن في شي ممكن يرد يورط بطل الناقلات مرة ثانية واهما عارفينه وساكتين

يا اما ان قالوا لهم نحفظ القضية بس لا تسوون صيحة

وانا اميل للسبب الثاني

المهم

صار في تشره من ربعنا
بفريج سعود على اني ما اكتب او أعلق على مواضيع المدونين

وبنفس الوقت أطلب التعليق منهم على مواضيعي

وانا أتفق مع فريج سعود 100% وما راح أطلب التعليق من أحد لاني مقصرة بالتعليقات عندهم

بس أتمنى إنكم تفهمون إني يوميا أتابع تفاصيل جريدة من 80 صفحة

واتابع على الأقل جريدتين غيرها يومين

واتابع مواضيع بعض المدونين

يعني اللي أقراه يوميا لو دعيج الشمري يقراه جان صج صار دكتور

فأتمنى تعذروني وأرد وأقول لا تعلقون دامكم شايفيني مقصره معاكم

بصفحة 25 من القبس اهيا صفحة الخدمات يعني اقلاع ووصول وعيادات وجذيه

وبصفحة 24 من الوطن هم صفحة الخدمات

وبصفحه
X
بجريدة الجريده هم إسمها خدمات

بقسم الأطباء العامون بالقبس أكو عيادة الدكتور أحمد الخطيب وغيره من دكاتره
وبقسم طب العائلة أكو الدكتورة أسيل والدكتورة أريج بنات أحمد الخطيب
ونفس الشي بجريدة الجريدة

تصدقون إن بالوطن كل الأسامي متطابقة بالاطباء الا هالثلاث اسامي

وتقولون اللي ماسكها مو ياهل

شوفوا الحقد ليما وين واصل؟؟

اللي مو مصدق خل يقرى القبس والجريدة

والوطن لا يشتريها

خل يروح بقالة ساحل لندن (انا أول مرة أدري إن لندن فيها بحر وساحل) ويقراها عند البقالة ويمشي

انزين بطل الناقلات مو حرامي

عيل شنو

عاشق وطن يقول لكم

الفهد امس كان اشبه بالنوخذة الذي قاد سفينة الكرة الكويتية وسط امواج عاتية وكان ينتظرها مصير واحد يا طلعة.. يا طبعة» فوصل بها إلى شاطئ الامان وان كان هناك المزيد من العمل ينتظر النوخذة و «ربعه» حتى يبلغوا الهدف الاهم.. عودة الكرة الكويتية إلى المنافسات الدولية

للأسف ما كملوا الكلام عن احمد الفهد

كان مفروض يكملون

المهم في ما تراه هو ما تتطلع إليه
احمد الفهد عالم جميل

:)

هذي الفقرة نبهتني عليها
unbreakable girl

نزلت بالوطن بتاريخ 5-11

بصفحة الرياضة

وعدنا ليكيكي

كان كاتب من جم يوم إن إجتماع حصل بين قادة رياضيين بمزرعة الريان بقطر

اليوم كاتب تفاصيلها

والغريب إن كتب إسم شخص واحد من ثلاث قادة رياضيين حضروا هالإجتماع

وقد زار الاخ مرزوق الغانم وشيخ رئيس اتحاد سابق وشخص ثالث كان رئيس ناد سابق المزرعة

ماني فاهمه ليش ما كتب باجي الأسامي وإهوا الشجاع البطل المغوار

المهم هالثلاثة كانوا ما يبون أحمد الفهد بالرياضة

وعشان جذي راحوا حق بن همام رئيس الإتحاد الآسيوي

ترى شبيب يزعل اذا ما طلبتوا منه شاي او قهوة

مثل ما قلنا الثلاثة ما يبون أحمد الفهد

والرابع بن همام

طيب انا بفهم شلون وصلت المعلومات حق يكيكي

يعني اذا كنا ثلاثة نشتغل ضد شخص واحد

هل معقولة نروح ونوصل اللي سويناه حق واحد من ربع او صبيان هالشخص!!؟؟؟

ما تركب مو؟

يعني يا بن همام موصل لك المعلومات يا هالثلاثة

وما تركب يا يكيكي كلّش

اما اذا السالفة انك بتصير كونان بعد هذا شي ثاني

عن التشلخ يوز

نروح حق بوقلادة مبارك
حاط حكمة للمتنبي

ووضع الندى في موضع السيف بالعلا
مُضري كوضع السيف في موضع الندى
دا إنجليزي يا مرسي؟


وبعدين كاتب
فقد ملت الناس غياب السيف في العلا

منو هالناس؟

وفكرة سيف ومنسف مو يديدة على عالم جميل

بس أظن إن
أحمد مطر اليوم موفيك حقك انت وربعك

الّذي يحمِلُ أوراقاً وأقلاماً
ويستوحي من الإعدامِ إعلاماً

ويُغريكُمْ بأنّ السُّمَّ صِحِّيّ
وأنَّ الخيرَ في أن تشربوه

ويُسمِّي لكُمُ الثُعبانَ سُلطاناً
ويدعو ذلك السُّلطانَ إنساناً

ويدعوكُمْ لأن تحترموهْ
ذلكَ الصِّنفُ قِفُوهْ
فَخُذوهْ

واعتِلوهْ
واحشروا أوراقَهُ في فَمِهِ
ثُمَّ احشروا أقلامَهُ في فمِهِ الثّاني
وَبُولوا فوقَهُ... ثمَّ اكنُسوهْ

إنَّهُ الصّنفُ الذي لو لم يُوظَّفْ
لم يَدُمْ طُغيانُ من قد وظَّفوهْ

إنّهُ الصّنفُ الّذي
يَنْفَضُّ عنكُمْ بؤسُكُمْ
لو فُضَّ فُوهْ
إنّهُ الصّنفُ الذي لا ينبغي أن ترحَموهْ


ليش البدو ما يصلعون
:)
مو تقلبونها عنصرية بعد ملاحظه والسلام


اي
فيصل القناعي

ما راح ارد عليك وضيف بطل الناقلات ويّا الشهيد كخط أحمر

على فكرة
أم صدّه ناشرين تفاصيل توديهم ورا الشمس عن لجنة تحقيق عدم كفاية الأدلة

باي

05/11/2007

لا يقصون عليك




تحديث
****

تم قبول إستقالة الحميضي

والله طلعنا مؤثرين
:)


يا وزير

وحاطتلك صورة وإنت صغير شتبي بعد

كلنا صفقنا لك على جرؤتك في تحدي هدر اموال الدولة واسقاط القروض

يا وزير

تاريخك طيب

يا وزير

انت اللي تميز الوزارة مو اهي اللي تميزك

يا وزير

المشكلة بديرتنا اغلاط ما تتحمل مسؤليتها

يا وزير

سيادة الريّس قال حق بو صباح دشوا استجواب احمد العبدالله وما عليكم

دش احمد العبدالله الاستجواب وما حيلته إلا انا أخوكم وانا ولدكم

وما يندرى إخونا وولدنا وينه الحين

يا وزير

سيادة الريّس قال حق بوصباح دشوا إستجواب علي اليرّاح وترى كلهم 16 نائب ما يسوون شي

ودش علي اليرّاح
وقعد بالاستجواب يصفق ويطق الطار عدل وشوي ويزفن

يا وزير

احمد العبدالله اختفى

وعلي اليرّاح صار وزير يشتغل عند وزير

يا وزير

كلنا نبيك أنور وجدي

تكفه لا تصير حسن فايق

يا وزير

إسم أنس الرشيد مخلد بتاريخ الوزارة وهو ما طوّل فيها

وإسم شرار تلاشى وإهوا عشعش فيها

يا وزير

السالفة بالمواقف مو بالمدة

يا وزير

رامبو ما انشهر الا لأن كان يحل المشكله مو يسويها ويكبرها

يا وزير

خلّك وزير الناس

مو ناقصك جاه او وجاهة

يا وزير

الوزارة ما عادت مكان تكشخ فيه

اللي حتى العصيمي عرضوا عليه الوزارة

وياي الدور على سعدون حمّاد بعد

يرضيك هالشي بالذمة

يعني تخيل اجتماع بمجلس الوزرا والعصيمي على يمينك وسعدون على يسارك
مو ناقص الا يطيحون مندي بالاجتماع

يا وزير

المشكلة عوده اللي حتى
ساحة الصفاة نزلوا موضوع تخيّل

بس ناقص
شروق تكتب
شروق شرايج بعد تنزلين موضوع بعد عيد الأضحى مو أحسن؟؟

اي يا ربع ساحة الصفاة

في كلمة أمل كاتبينها بالأحمر إنتوا

الله لو تحطون لنك على شعر أمل اللي مكتوب عندي تصيرون خوش ساحة

يا وزير
نبيك عشان الكويت تستقيل

يا وزير
رفضت اسقاط القروض عشان الكويت

يا وزير

استقيل عشان الكويت

وهذا قدر الابطال يتحملون اغلاط غيرهم

يا وزير

بس عاد خلصت كلامي

من عيالك اللي يحبون ارضك استقيل


بوفهد يقول

عندما طلب من الشيخ أحمد الفهد الرد على بعض الاتهامات التي طالته في الفترة الأخيرة قال: أنا أعمل لأجل الكويت ومصلحتها وطول عمري أهدف إلى العنب ولم أطلب قتل الناطور أبداً

مشكلتنا يا بوفهد ان عنبك مو شي


أم صدّه
رؤية وطن
الكوت

الا أرت وينك مو كاتب شي عندي؟؟
عن التغلي

شوفوا عاد زيدوا التعليقات لا أعصب
وثاني شغلة شنو يعني كل مدونة تدز مسجات انها نزلت شي وانا

محد يدز عن بيت القرين مسجات

اللي عنده خل يدز يالله عاد يالله

لا التحالف ولا المنبر ولا غيرهم آلهة ما يغلطون

لكن ان يوصل الصراع من زايد الزيد
بهذا الاسلوب على المنبر والتحالف

فهذا موضوع غريب وايد ومتناقض وايد خصوصا انه صادر من زايد الزيد

03/11/2007

أمل


شبّت.. بين الرئيسين


هذا مانشيت الوطن اليوم

انا أقول ليش ما حطيتوا هالصورة يم المانشيت

او أحسن بدلوا شعاركم وخلوه جذيه


***
معدنك طيّب

الصرعاوي بمدحه بس موضوع ماله شغل باي شي ثاني

شنو أول مرة تدشون بيت القرين؟؟؟

وهذي الفاصلة عشانكم

*****

يا شعب حدس المعظم

ليما الحين ما حددتوا موقفكم من استجواب الجراح

وما سمعنا حسكم على تفريغ الدستور بالتدوير

ولا طلع لسانكم على تعليق اتحاد الكرة

متى ناوين تتكلمون؟؟؟

***

أمل
سمعنا فيه
وما حصل

عدل؟
وين العدل؟
وذاك اللي نهبني
بفلوسي قام يسبني
ويتهنّى
وين أقدر أشتكي منّه؟

وين أقدر أقول ظالم؟
سرقني وربي العالم
أمل؟
راح وذبل

خلاص قررت انا أنهب
ببوق فلوس الناس
وبأموالهم بلعب
وبفتح لي جريده
ومن يشتم أقص إيده

وبمدح كل شي فاسد
ومن يفضح بقول حاسد
واذا زادت التشيله
وطاحت ريلي بغيله
بسبهم سب ما مثله
وأجرّم هالوطن كلّه

وإذا طلعوا الأوراق
وقرّب قطع الأعناق
بنطر حكمي المعقول
ما كفّتهم الأدلّه

وأخلّي غيري يردد
أمل
سمعنا فيه
وما حصل

شكرا على الإبداع