31/08/2007

مزاج اليوم


أنا ما أدري شصاير المدونين باردين هاليومين

بس موضوع الوطنية تفاعل بشكل حلو

سواء من مقال محمد الوشيحي ولاّ من مطقوق

ومادري ليش أم صدّه مو منزلين شي

أشكره مسافرين


المهم مزاج اليوم عبارة عن صورتين مو أكثر





هذا رئيس وزراء نيو غينيا

عجبني ستايله

:)

29/08/2007

الوطنية وطنية

أول شي أقوله ترى شعار الوطنية الموجود بالمدونة غير مدفوع الاجر

بس لأنهم سجلوا موقف وطني يستحقون عليه الاحترام وانا راح أقول لكم ليش

ألحين لنفرض إن الأردن مثلا ومن خلال جريدة الأهالي الأردنية ولا جريدة السبيل الأردنية

هذي أساميهم شسوي أنا؟

يت جريدة منهم وسبّت الكويت

وبعدها قررت شركة الإتصالات المتنقلة

اللي عندها خدمات بالأردن وقررت مقاطعة جريدة الاهالي او جريدة السبيل

شنو راح يكون راينا احنا ككويتيين؟؟؟

أتوقع إن الراي الطبيعي والمعقول إن الاتصالات المتنقلة راح تكبر بعيننا ككويتيين

إنها سجلت موقف وما رضت على كرامة الكويتين حتى لو كان هذا على حساب إعلاناتها أو مبيعاتها بالأردن

وبعدين تعالوا إنتوا يا جريدة الوطن

مو صار لكم دهر تصارخون دول الضد ومادري شنو

ليش الاتصالات عندها شبكة بالاردن والسودان والعراق

مو علي الخليفة يملك اسهم كبيرة بالاتصالات

ولا وقت البيزه ماكو شي اسمه دول الضد

عموما أنا الوطنية للإتصالات كبرت بعيني لأنها ما رضت على إهانة دولة أصحابها

وبالعكس هالشي يستحق التحية مو المقاطعة مثل ما يطبل البيلر والوطن كلها

عموما موقعهم مو راضي يشتغل وياي

بس حبيت أقول لكم إن يكيكي رايح النيابة أمس

وكاتب عن بطولاته وشجاعته وقوته ورايح مرفوع الراس

بس انا أوعده إن أول ما يدش السجن

الاكل علي

بس خل يشوف له واحد ييبله زقاير
والثاني يودي له طبشير عشان يشخط عالطوفة كل يوم

مدونة يديدة إسمها نهاش

27/08/2007

بعد الشهرة


تحديث مهم بالأسفل
*****

أحب أقول إن وناسة
:)

ومشكورين يالراي وحسين الحربي على هالموضوع

اهم شي مصورين المدونة وفيها شعار الوطنية
لول

وطبعا لازم أشكر السبب الرئيسي في الشهرة العزيز
مطقوق
وبعده
ساحة الصفاة وأم صده ماقصرتوا

لاحظت بالموضوع اللي طاف إن النصايح وايد بتخفيف حدة الإسلوب

وانا أقولها بصراحة إن الإسلوب ماهو حاد مني والطريج

يعني لما أقول أهبل او غباء أو خبل هذي مو عشان أبي أسب

الفكرة وما فيها إني أسمي الأشياء بأسمائها

والله مو قصدي الاهانة وبالنهاية اراء وتختلف بس الفكرة تعرية الحرامية ومحامينهم


تلفون الكاتل وين إختفى؟؟؟؟


موقفنا من استجواب معصومة واضح، فنحن معه ولكن عندما اقيلت كان كافيا لنا، وما يقال غير ذلك انما هو تحليل تآمري ضدنا نعرف ابعاده جيدا

هذي جملة من بيان الاخوان على موضوع استجواب معصومة

سؤال مهم معصومة استقالت ولا اقيلت؟؟

اللي اعرفه إنها استقالت

ليش الاخوان يجذبون كله من دعيج أكيد اهوا كاتب البيان

أم صده ناطره منكم موضوع عنهم
مصختوها

معلق رياضي قطري في قناة »الجزيرة« يدعى »الكعبي« كرر ـ اكثر من مرة ـ جملة »المحافظة 19« حين يأتي على ذكر »الكويت« في اخباره الرياضية، ثم يعود ويستدرك ـ في بلاهة مصطنعة ـ ويصحح ما قاله! ثم تأتي هذه الحركة التي تتسم بالعنجهية والغرور من الملاك القطريين الجدد للشركة الوطنية للاتصالات بمقاطعة جريدة »الوطن« لأنها تتصدى لكل ما من شأنه المساس بالكرامة الكويتية! ادعو كل الكويتيين ـ والمقيمين ـ الذين لديهم اشتراكات هواتف مع »الوطنية« الى الغائها فورا والتوجه الى شركة الاتصالات المتنقلة »الكويتية« ومقاطعة »القطرية«.. فورا! دعونا نريهم »العين الحمرا«، وبأن الشعب الكويتي شرس حين يتعلق الامر بكرامته وكرامة وطنه! اعيدوا لهم ارقامهم ودعوهم يستخدمونها في محادثة.. انفسهم

هذا البيلر يقول إن معلق بالجزيرة يقول المحافظة 19

مع إني أستبعد بس شوف يالكعبي والله لو صج بس خل اتاكد يا ويلك ويا سواد ليلك مني

والله راح تاكلها وأخلي بيت القرين يدش بيت بيت بقطر ويعرفهم قدرك

اذا كان الكلام صج

وبعدين عاد يدش البيلر باللي يبيه المعزب

يبينا الكل يشتري خط من الإتصالات
ونخلي الوطنية

وطبعا اللي ما يدري اللص العود يملك اسهم كبيرة بالإتصالات المتنقلة

وهذا اللي يبيه فؤادو

وثانيا الوطنية كيفهم يقاطعونكم بالعكس زين يسوون
وهذا الشي انتوا بجريدة الحرامية تسوونه

يعني النيباري والخطيب والسعدون والصقر وغيرهم طايحين فيهم سب بس لأنهم تكلموا عن الحرامية

اذا تبون التعديل سنعوا روحكم مع إن ماكو امل

وزين إنك تدري إن الشعب الكويتي شرس لما يتعلق الأمر بكرامة ديرته

وعشان جذيه ما ننسى اللي باقنا وقت الغزو لانها مسألة كرامة


عموما انا أستأذن بروح أشتري خط وطنية
:p

إي صج
مدونة مستحي يديدة زوروها

مصطلحات شائعة
يكيكي: نواف الفزيع
بلبل الطبل: نبيل الفضل
البيلر أو رفيج بوش: فؤاد الهاشم
المزيون بيرق: ماني كاتبه إسمه ما يستاهل

26/08/2007

ماكو شي

مدونة بالكويتي الفصيح

مع إن صاحبها ما يمرني مادري ليش

بس شنسوي انا وربعي كل ابونا جماعة

المهم تم إختراق جهازه وتوقفت المدونة وعنده مدونة مؤقتا لحين إصلاح الخلل

وهذا
عنوانه اليديد

المهم

النائب المحترم وليد الطبطبائي
كاتب مقالة بالوطن عن إستجواب معصومة

يقول النائب المحترم

سألنا بعض الناس لماذا قدمتم الاستجواب بينما الوزيرة اعلنت انها تقدمت باستقالتها الى رئيس مجلس الوزراء؟ ويهمني ان اقدم اجابة مفصلة عن ذلك في النقاط التالية

طبعا كاتب نقاط ومنها النقطة العجيبة هذي

ان الاستقالة لم يتم البت فيها رسميا حتى ظهر يوم السبت، بينما نحن وعدنا الجمهور بتقديم الاستجواب يوم السبت وكان يجب ان نوفي بالعهد

شنو هذي وعدنا الجمهور

الأخ قاعد بجرش مثلا وجومانا بوعيد بتقدمه مثلا

شوي شوي يقول مرسي لجمهوري الحبيب

وين قاعدين؟؟؟

ويكيكي يقول

لاحظوا صمتهم من صمت قبور ضحايا مستشفى الجهراء.. وينك يا مسلم من قضية الصحة وشنو نفسر سكوتك؟

مع إن بالصفحة الاولى أمس وبجريدة الحرامية كاتبين هالشي

أعلنوا طرح الثقة
طلال العيار - محمد الخليفة - خضير العنزي - محمد البصيري - ضيف الله أبورمية - حسين مزيد - مزعل النمران - فيصل المسلم - وليد الطبطبائي - جمعان الحربش - جابر المحيلبي - خالد العدوة - سعدون العتيبي - علي الدقباسي - غانم الميع سعد الشريع ـ مسلم البراك ـ علي العمير، والبقية تأتي


تلوموني اذا قلت اهبل؟؟؟

25/08/2007

بشتري خط وطنية


هذي الصورة حق محمد ثلاب برؤية موقع

Lifemood

اليوم طبعا عندهم اكثر من جنازة يشبعون فيها لطم

وانا عندي أكثر

:)

على كلام جريدة اللصوص

يقولون صار لهم الحين مدة إن السعدون عنده صبيان

يمشون بامره ويتبعونه ويحركهم مثل ما يبي

حلو حلو حلو حلو

إلا ليش محل بوأحمد كل الكويت تعرفه وأشهر من روتانا؟؟؟؟



بالصفحة الاولى حاطين

السعدون.. ليش ساكت؟حتى الآن لم يعلن النائب أحمد السعدون موقفه من وزيرة الصحة معصومة المبارك بعد حادث الجهراء، رغم وفاة اثنين واصابة اخرين، وتداعي نواب كثر الى اعلان مواقفهم وهذا أثار استغراب الجميع

يعني بما ان السعدون ساكت مفروض صبيانه على حد تعبير الوطن ساكتين

واذا كانوا محددين موقفهم معناته إن إهما ما يخضعون لاوامر السعدون
عدل لو مو عدل؟

أكيد عدل

عيل ننتقل حق هالفقرة

طلال العيار - محمد الخليفة - خضير العنزي - محمد البصيري - ضيف الله أبورمية - حسين مزيد - مزعل النمران - فيصل المسلم - وليد الطبطبائي - جمعان الحربش - جابر المحيلبي - خالد العدوة - سعدون العتيبي - علي الدقباسي - غانم الميع - سعد الشريع ـ مسلم البراك ـ علي العمير، والبقية تأتي

مما نشاهده اعزائي المشاهدين بأن في نائبين من اللي أعلنوا طرح الثقة يتبعون التكتل الشعبي اللي يتبعه السعدون

وهذا دليل من جريدتكم يا أغبيا إن مو صبيان يا صبيان

إي صج ياني تعليق بأحد الموضوعات يقول لي مو مفروض أكتب أهبل او غبي

على كتاب الوطن

وانا أقول ترى أنا مو قاعده أسبهم أنا قاعده أقول واقع وبالادلة

يعني لما أروح حديقة الحيوانات وأشوف شاذي وأقول له شاذي انا ما سبيته أنا قلت وصفه أو إسمه

ماهو قصد إني أسب وهذا ينطبق على أغبياء الوطن او كتابها

بعد بعد تو الناس اليوم مطولين

الا صج إنتو مو ايام علي الجراح كنتوا تقولون ليش التازيم وما يصير استجوابات والامير قال ما يصير وعطوهم فرصة شاللي قلبكم؟؟

على فكرة ترى انا مع إستقالة معصومة وهذي مسؤولية سياسية ومعصومة لازم تتحملها

بس اللي حارني إن البصيري والعدوة والعمير والحربش

اعلنوا طرح الثقة ويا ريت ترجعون حق مواقفهم من إستجواب الجراح

أم صدّه تكفون جابلوهم بموضوع ناري منكم

أهم شي أهم شي الوطنية شمسوين بجريدة الحرامية

قررت الوطنية إنها تسحب إعلاناتها من مطبوعات الوطن وحتى من تلفزيونهم

وكل هذا عشان غلطوا على قطر

لوول

والوطن حدهم محترين مابقى شي ما كتبوه

الإفتتاحية عن هالموضوع

وحاطين ثلاث إستفتاءات مرة وحدة عن نفس الموضوع بسايتهم

وبما إن الوطنية سوت جذيه انا قررت إني أشتري خط وطنية بس ابي سعر حلو ورقم حلو ويفضل 6666666

عاشوا الوطنية والله

:)

وهم بشتري اسهمهم بالبورصة

وبحط شعارهم بالمدونة وببلاش

اذا بيدفعون ما اقول لأ
:)

إي البيلر كاتب و يكيكي هم كاتب وواحد ميت عشان أكتب عنه وما راح اكتب اسمه وليد بورباع

بس مالي خلقهم اليوم كلش

وطولت عليكم بعد

الحين السبت الياي عطلة ولا دوام؟

مطقوق على فكرة إذا ما عندك شي تكتبه حط شي عالمزاج

:)

24/08/2007

رد بشار

ماكو شي اليوم وإجازة عاد مصخوها

بس البيلركاتب بمقالته

رئيس مجلس الامة «السابق» النائب «احمد السعدون» طالب ـ ومعه عدد من «الارزقية» من اعضاء كتلته ـ بالغاء.. «جهاز امن الدولة» لأن عددا من «اليهال» في صحيفة «الجريدة» قرروا ان يكونوا.. «سعد زغلول» و«مصطفى كامل» و«جمال عبدالناصر» و.. و..!! من المؤكد ان «السعدون» يريد تأسيس جهاز امن دولة ـ قطاع خاص ـ بنظام الـ (B.O.T) ليتسلم مجلس ادارته النائب.. «محمد الصقر» والذي سيختار له موقعا يطل على البحر مثل مدينته.. الاعلامية!! و.. «ان لم تستح.. فاصنع ما شئت

مالي خلقك وما تستاهل تعليق حتى لأنك سخيف وجابل نهلة سلامة احسن لك

أخليكم مع رد بشار وايد أحسن

Bashar said...
صباااح الخير
ماكان ودي أرد على نبيل الفضل احتراما لعقلي :) لكن رد سريع مافيه مشكلة
..يقول نبيل .. ان بشار لم يحضر أمن الدولة حين طلبته لذلك قامت بالاعتقال .. حلو .. وايد حلو
ليش وكيل الداخلية بالانابة الرجيب ما ذكر هالكلام بالمؤتمر؟ :)يقول نبيل .. أن بشار اعترف باسم كاتب المقال!! همممم .. ما أدري اذا كان نبيل كان حاضر التحقيق
لو اتكلم .. أخلي المحيلان والرجيب يستقيلون .. بس ناطر القضية تنتهي وسوف أزود لجنة تحقيق مجلس الوزراء اذا شكلت فعلا بكل المستندات :)تحياتي

23/08/2007

الطبل وصل


هذا الإعلان ينحط بالوطن ومطقوق يبي يعرف قصته

وعشان احرق المفاجاة على الوطن

هذا إعلان قناتهم

وإذا كان الثوب ثوبكم ورقعته إنتوا لا طبنا ولا غدا الشر

يعني الحين مستعينين بخبير الخبراء

وبطل الأبطال

والمغوار الهمام

نبيل الفضل

كاتب مقاله اليوم بعد انقطاع كان مريحني من كمية الغباء اللي ينشرها بمقالاته

يعني اللي بمنجم الفحم يعطونه بدل خطر عشان صحته

انا والله ترى احتاج بدل غباء

على اللي اشوفه منهم

يقول

وهذا الأمير اهم واعلى من الدستور، بل ان الأمير، وبالذات امير الكويت، هو رئيس السلطات جميعا، وهو من يعلق الدستور ويحل مجلس الأمة ويقيل الحكومة متى ما استعدت مصلحة البلد ذلك

هل نسيت يا بلبل إن الدستور يقول إن الامة مصدر السلطات

وثانيا إن الامير تحدد مهامه من خلال الدستور

وإن إختيار سمو الأمير صباح الاحمد كان وفق الدستور

وإختيار الامير المقبل أيضا وفق الدستور

بلبل مو بكيفك

امرت النيابة العامة امن الدولة بالقاء القبض على صاحب الموقع الالكتروني والتحقيق معه لمعرفة كاتب ذلك المقال البذيء. وهكذا فعلت ادارة امن الدولة، واثناء القبض عليه لعدم تعاونه بالحضور كما طلب منه، كان معه صديق مشاغب تهجم على رجال امن الدولة بعدما حاول تصويرهم

ممكن تشرح لي شلون حاول التهجم على امن الدولة بمحاولة تصويرهم؟

يعني طقهم بالكاميرا مثلا يعني ولا الفلاش عور عيونهم؟

ولا شنو بالضبط

كل ما تم كان ضمن القانون والاجراءات وبشار الصايغ اعترف باسم كاتب المقال »الزفت« الذي تدافعون عنه، وتم اطلاق سراحه

ندافع عن منو ألحين عن بشار ولا كاتب المقال الزفت

إحنا دافعنا عن بشار وكاتب المقال الزفت ما عرفنا منو إلا من الجرايد

وبنظل ندافع عن بشار لان الإسلوب اللي صار غلط

وثانيا أبي افهم إنتوا الحين مع وزارة الداخلية ولا ضدهم؟

ان واجب امن الدولة ووزارة االداخلية ان تقاضي صاحب بشار على مقاله المسيء لرجال أمن الدولة
خلاص خل يقاضون ونشوف الحكم حق منو

وشعب بوسالم هو شعب بوناصر


منو بو سالم؟
وشمعنى بو سالم؟
وليش بو سالم؟

وثانيا تعال ما تقول لي منو اللي نص على إن الذات الأميرية سامية

مو الدستور يا طبل؟

حالت رحلتنا البحرية في عباب البحر المتوسط عن متابعة قضية هذا المقال الحقير وتداعياته السياسية المخجلة، فاعذرونا على التأخر في الرد على صفاقات مقاولي التأزيم، ونعود الآن الى بياتنا الصيفي

شتسوى عليك يصير فيك اللي صار بتايتنك؟

وترى مصطلح بيات صيفي ينقال حق الحيوانات

ليش تستخدمه حق روحك؟

كتبت نكتة ومحد عبرني امس
وبعيدها اليوم مدونتي وكيفي

محشش كل يوم يروح حق راح البرد يقول له عندك برّد بالكوسا ؟
راعي البرد يقول لأ؟

على يوم راح وقال له عندك برّد بالكوسا
راعي البرّد قال إي
جان يقول المحشش: ويييع

يكيكي

وتاليها يعني

ما وراي شغل غيرك؟

ترى خميس شتبي كاتب ؟

أساءوا للذات الأميرية ولم نسمع تصريحا من رئيس الحكومة ولا من نائبه الأول ويوم انتقدوا مستشارك في مجلس الأمة يا معالي الرئيس عقدت مؤتمرا صحافيا عشانه، وتبوني أسكت وتبوني أهادن؟ قسماً عظماً وقفتي ضد اللي قاعد يصير لو على رقبتي يا حكومة

منو اللي أساء

مو بالنيابة ماخذينه

شتبي إنت

وشنو تبوني اهادن هذي
من طلب منك مهادنة

شدعوة الزير سالم؟؟؟

وكاتبين لك على الطوفة

سالم لا تصالح

عيب عيب إستح شوي

إي في واحد إسمه يوسف يدز لي إيميلات
أقول له ما قصرت وصدقني أستفيد منهم مو تتحبط إذا ما كتبت عنهم شي
واصل معي يا زين لا تقطع

22/08/2007

ألحين نتفاهم

بعد المقبلات اللي كتبتها اليوم الظهر بالموضوع اللي تحت
بكتب الموضوع الصجي
شوفوا عاد بطوّل وكيفي

عندي حجي بقوله ولازم تقرونه كيفكم

طبعا انا فالسة من تعليقاتكم يمرون 400 كل يوم والقى عشر تعليقات

بس ما عليه اقروا بس

انا ماراح أعلق على اللي قالوه وزارة الداخلية لسببين

الأول إن ساحة الصفاة ومطقوق جابلوهم عدل

والثاني عشان اذا خطفوا مطقوق وجماعة الصفاة أنا أدافع عنهم

:)

أشكره خايفة مو؟

لا اذا الداخلية قاعدين يقرون ترى مو خايفة

الحق ما ينخاف عليه بس يخوف ناس

المهم نروح حق سراق المال العام

وأتباعهم الجذابين

طبعا اهما كانوا متوهقين بالايام اللي طافت شيسوون

يوقفون مع الشباب الوطنيين أمثال بشار

ولا يوقفون مع الداخلية

فالموقف صار بالنسبة لهم بالضبط مثل واحد حسران وايد وعطشان وايد بنفس الوقت
وبالنهاية يوقف متنح

تخيلوا شكله

لول

المهم كل وقاحتهم وحماقتهم وغباؤهم تتجلى ببوسخافة وبوسخيف

هذا همهم تتسكر المواقع أول

هذي رسمة الفنان العود محمد ثلاّب

بس طبعا فكرة المزيون بيرق

لاحظوا معاي آخر جملة

بدال ما تطقونهم سكروا مواقعهم أول

هذا هدف اللصوص اعداء الحرية

اللي تكشف قذاراتهم يعني اول شي يسكرون المواقع بعدين ننطق

انا اشهد إنكم ما تستحون

بس شرايكم تتسكر جريدة الوطن لمدة شهر ونشوف وضع الكويت يتحسن ولا لأ

بعدين تتسكر المواقع لمدة شهر ونشوف الفساد يزيد ولا لأ

عموما ترى مواقعنا ومنها بيت القرين المليفي قال عنها وطنية بجريدتكم

لول

اي صج ترى التحقيق مع علي الخليفة بيوم 25 يعني السبت الياي

شرايكم نروح نستقبله بالمطار

:)

ننتقل الآن إلى مستر يكيكي

انا ودي افهم هذا يتمشى بين الناس عادي ولا يدري ان الناس لما تشوفه تقول وصل الجذّاب

ترى والله فشلة يمشي ويجذب يقول اليوم

والله ما عرفنالكم على موضوع بشار، قلتوا لنا انه انضرب وبهدلوه أمن الدولة، واليوم يقول في النيابة (بحسب جريدة الرأي) انه محد تعرض له ولم يتعرض للضرب، منو نصدق بشار ولا كلام النواب؟

منو ياب سيرة ان بشار انطق واحنا ما ندري عن اخباره يا خبل جاسم انطق ومحد قال غير هالكلام استح على ويهك

والمصيبة انه في محامين مثل الاستاذ أحمد المليفي اللي قاعد يقول انه (كنا في السابق نفتخر ايام حكم المقبور صدام حسين بأننا ننتقد الحكام والشيوخ فهي ميزة لنا) ياأستاذ هذا أمير والمساس بالذات الاميرية جريمة نص عليها القانون

يالمينون هل بشار سب الامير يا محامي يا يكيكي؟

منو اللي يخلط الأمور وتعال بالله انت ما تقول لي شكو تدافع عن اعلان الاهرام؟

يا مينون احنا مو عشان السعدون او الصقر نتكلم عشان صاحب معزبك راح ودفع فلوس حق جريدة تطب بديرتك بمصر فهمت يا خبل؟؟

لا انت فاهم بس ريحة الدينار وما تسوي

وثانيا يبا احنا ترى عادي ننتقد الصقر وغيره انتقدنا الصقر والراشد والشايع وغيرهم بقانون عمل المرأة

وانتقدنا السعدون بحقوق المرأة 99ترى عادي احنا

بس حليب امك عليك سم هل انتقدت ولو نص مرة علي بابا وخليف

ثانيا تعال انا أغط لي يومين انت تجذب وايد يعني ولا شسالفتك؟

ترى والله اتابع وافهم انا مثل وايد غيري

خل اقول لك شلون جذبت لا تبطل حلجك اقرى وشوف

انت بيوم السبت 11-8 قلت بمقالتك

هل يملك قطري واحد مثلما يملكه المواطن نواف الفزيع؟ وهو يكتب ويعبر عن رأيه بكل حرية ويرجع الى بيته آمنا من زوار المباحث، وآمنا على اسرته وعلى بقائه في هذا البلد؟

لكن أمس شقلت

حذرت ومازلت من نهج وزارة الداخلية الأخير وكنت من اشد المنتقدين عليها، بينت ورصدت في اكثر من مرة من خلل وتخبط، وقلت ان النية المبيتة في الوزارة تصل لحد العودة بأسلوب زوار الفجر

يعني انت قبل 10 ايام تقول حرية وماكو زوار ومباحث و داش بشرك وتحدياتك

وامس تقول ان انت طول الفترة كنت تحذر وترصد حركات الداخلية عن العودة لاسلوب زوار الفجر

العودة يعني وجودها بالسابق

يعني يا انت تجذب على القطريين او تجذب علينا وبكل الحالات انت جذاب


نكتفي بهذا القدر من الكلام ولنا لقاء قريب


مقاله عورة قلبي

في

مدونة

وجهة نظر

أنا هنا

أنا هنا

طبعا الحين كل واحد لازم يطمن الناس ان موجود إلى الآن وما خذوه الجماعة

:)

مثل ما وعدتكم ما راح أكتب إلا لما بشار الصايغ يكتب تعليق

وكتب بالموضوع اللي طاف الحمدلله

بس والله مو راضي يشتغل موقعهم الحرامية

بس أنطر يشتغل وعندي حجي وايد

عموما نعطيكم مقبلات بس

على ما موقعهم يشتغل

أمس احمد المليفي نائب المجلس داز بيان حق كل الجرايد ومنها الوطن

يقول بالبيان

لافتا الى ان هؤلاء الشباب الذين يديرون المواقع الالكترونية كأمثال موقع الامة دوت اورغ وشبكة ساحة الارادة ومنتدى الوطنية ومدونة الصفاة وام صدة وبيت القرين وغيرها من المنتديات والمدونات ذات الفكر الواضح والهادف هم من الشباب الذين لا يشك باخلاصهم لوطنهم وتمسكهم بشرعيتهم

أول شي تسلم يا بو أنس على الكلام الطيب

ثاني شي الوطن نزلوا بيان فيه مدونات وطنية ومنها بيت القرين

لول

طافت عليهم

والمحرر الله يعينه اللي نزل البيان

مخصوم عليه من فلوس الناقلات

:)

المهم هذي تصبيرة بس على ما يفتح موقعهم واعطيكم الدسم

إي صج بما اني مسؤولة المدونات اليديدة
في مدونة يديدة إسمها مختصر
فكرتها زينة على ما اظن
مروا عليها
محشش كل يوم يروح حق راعي البرد
يقول له عندك برّد بالكوسا
وكل يوم يقول له لا
مرة راح له المحشش قال له عندك برّد بالكوسا
قال: إي
جان يقول له المحشش: ويييع

20/08/2007

تحديث

تحويل بشار للنيابة وبعده معتقل
وتم تحويل الإعتصام إلى مقر التحالف بالروضة
الساعة 6
لحد يخاف وخنروح كلنا
----------------------------------------
مواضيع متميزة عن مهزلة إعتقال بشار وجاسم

في مدونات

واره

عاشق وطن -هالباب ما ينفع

مطقوق -نحن الدولة يا أمن الدولة

بوجيج - خلاص

ليما الحين كتبت ثلاث مواضيع اليوم

لكن ما راح أكتب زيادة إلى أن يكتب بشار تعليق على موضوعاتي

إلى من لا يعرفنا

ماطقوهم

باقوا ما طقوهم

نهبوا ما طقوهم

فرقوا ما طقوهم

جذبوا ما طقوهم

سبّوا ما طقوهم

إغتالوا ما طقوهم

لكن

حبوا الكويت طقوهم

خدموا هالأرض طقوهم

شباب الورد طقوهم

أمل الكويت طقوهم

صمود الكويت طقوهم

ما راح اتكلم عن جريدة الفتن اليوم بس فريق الزلزال بوربع ساعة

ما حرك هالربع ساعة للحرية

للتعبير
لإحترام اهل الكويت

طبعا ما راح يتكلم لان مو هذا الهدف

الحرية عمرها ماكانت هدف اللصوص

والحمدلله إنكشفوا

انا بختصر كل اللي بقوله بشغلة وحدة بس ذكرها كاتب بالوطن اليوم ينقال له أحمد الفهد

يقول

ان لكل صحيفة أو مجلة هابطة جمهور هابط

لا تعليق أكثر

-------------------------------------------

لمتابعة موضوع بشار الصايغ

ساحة الصفاة- الطارق- الكوت- ام صدّه

حلم جميل - مطقوق - كراكاتوا- حمودي - بالكويتي الفصيح - وجهة نظر - فهد العسكر -

معارضة - كلبونا جماعة - عاشق وطن

واخليكم مع الفيديو اللي فوق كرسالة لكل واحد ما يعرف الكويتيين عدل

على فكرة هذا آخر شي أكتبه لغاية ما أشوف بشار يكتب تعليق بالمدونة

بشار الصايغ و أمن الدولة

19/08/2007

منو زين إنزين

اليوم بالصفحة الاولى بجريدة الحرامية

كاتبين بطولاتهم عن إنهم حطوا خبر الزلزال
يعني شي يحسب للحرامية إنهم غطوا الخبر وهالشي من واجبات الصحافة

بس شوفوا الجذبة

بعد وقوع الزلزال الأول بربع ساعة، كان طاقم «الوطن»، مكتملاً في مقر الجريدة للمتابعة، وتم نشر الخبر على طبعة مختلفة نزل منها إلى الأسواق نحو 35 ألف نسخة

يعني درينا إنتوا تتحرون الخبر وتراكضون عليه

بس شكو الطاقم مكتمل بالله؟
يعني هل بتفهموني إن محررين الصفحة الفنية والإقتصادية والرياضية ومحمد ثلاب كانوا موجودين بالجريدة عشان صار زلزال؟

خلاص قولوا إن فريق تغطية الزلزال كان متواجدا

وثانيا شنو ربع ساعة هذي؟
شنو كل محررينكم ساكنين بمكان واحد؟
وكلهم كانوا قاعدين بسياييرهم لما صار الزلزال ؟

عن التشلخ فشلتونا؟

وبعدين هم في فقرة غريبة بعد

رأى رجال الدين ان «الزلزال جند من جنود الله وبلاء منه تعالى.. وهذا يفرض على الجميع التوبة وتجنب عصيان المولى جل شأنه والابتعاد عن كل مايغضبه».واكدوا ان «العودة الى الله تجنبنا الكوارث بمشيئة الخالق عز وجل
!!!!

شنو هذا يعني
اللي يقرى هالكلام يقول إن نيو توه طالع من ملهى ومطقوق كان قاعد يبجي عند حائط المبكى وبتر فلاير شاب نار وقاعد يعبدها وشروق قاعدة تدور دين يديد توّه نازل وانا مجابلة بقرة وأصلي جدّامها

شنو هالكلام الفاضي ليش خليتونا كفرة؟ والعودة إلى الله معناتها إن إحنا مبتعدين عنه

ترى محد مبتعد إلا اللي يرتكب المعاصي ومنها البوق يا حلوين

نروح حق تاج الرووس يكيكي

وأرد وأقول ما بيننا وبينه شي بس اهوا كاتب وخل يتحمل النقد واذا ما يبي خل يوقف كتابة عادي

المهم اليوم متعرف على هيوغو تشافيز رئيس فنزويلا

ورابطه بنواب المجلس

المهم يقول
انا مع الوزارة الشعبية بس الجيل الموجود في الحياة السياسية اليوم غالبيته فاسد ومتورط في شبهات مالية وانتماءات سياسية

مو مشكلة

بس بما أن يكيكي يقرى المدونة وعنده يكايكة يدافعون عنه

بس سؤال واحد يا ريت يكتب عنه بمقالاته

يقول الجيل الموجود غالبيته فاسد
وهذا معناته في أقلية مو فاسدة

ممكن تحدد لنا بالاسماء يا يكيكي منو المو فاسد يمكن نقتنع؟ ونعرف نناقشك


هذا الموجود اليوم وأخليكم مع

عطني بعد


17/08/2007

حتى يوم اليمعة حسبي الله عليكم؟؟



يعني انا ما ادري شنو الأفكار الجهنمية اللي عند خليف ويتوقع إن الناس بتمشي وراه وبس

موضوع طويل عريض عن المتسللون الايرانيون طريقهم خضر

يهاجم فيه الداخلية اللي مو مهتمة

مع إن الوزير شيخ يا يكيكي وشوف عيال العم شيسوون ببعض

طبعا هذا على مستواك وحد فهمك وتفكيرك إن ما يصير الشيوخ يهاجمون بعض

كلم معزبك انا اقول أحسن

تفاصيل الموضوع تقول إن ماكو مراقبة جيدة ومخفر واحد وبعيد وهالسوالف

وهذا معناته إن جابر المبارك ما غير شي من اللي كان قبله اللي اهوا ولي العهد الشيخ نواف الاحمد

يعني لما تنقدون على هالاوضاع قاعد تنقدون على ولي العهد يا خبول


بس هم مو مهم هالموضوع






بعدين كاتبين موضوع حق التكتل الشعبي ترى انتوا تحبون السعدون وتمجدونه وإهوا ما يحبكم ولا يمجدكم

يعني بالذمة بالذمة جذيه يزلغون وايرات؟؟؟

الحين يعني مسلم البراك راح يعلن كرهه لأحمد السعدون بعد هالموضوع

أو إن عدنان عبدالصمد راح يدق على فوزية دريع يبجي ويشكي مر الخيانة

ولا مرزوق الحبيني بيدق على روتانا ويطلب أغنية خالد عبدالرحمن تقوى الهجر

شنو بالضبط بيصير

هذا اللي الله قدركم عليه يعني عشان تزلغون وايرات

يبا اذا بتزلغون وايرات قولوا مثلا ترى سعدون حماد قايل بدوانية انا ما اقدر اواجه جابر المبارك

ولا وليد العصيمي مطقوق بشاليه ومعتذر على كلامه عن السعدون

ولا حدس متحسفين على سكوتهم على علي الجراح

ولا دعيج الشمري قال الصج

يعني هالسوالف مو جذيه بس والله تفشلون





أول صورة حق عمرو دياب

صار لها يمكن 20 سنة

والثانية يمكن قبل سنة

ملاحظين إن ما يكبر

بس الشعر اختلف

ما شاء الله بعد لا أحسده

:)

15/08/2007

اليوم عيد ميلادي

أصبحنا وأصبح الملك لله

يا فتاح يا عليم يا رزّاق يا كريم

بس أبي واحد يكب ماي عالارض مثل المسلسلات المصرية

نبدأ بهالشي

والا كيف تفسرون لي نداءاتكم بأن ينقلب الشيوخ ضد هذا الشيخ أو ذاك، كيف تفسرون لي سعيكم لزرع الكراهية بين ابناء عم الاسرة الواحدة؟، وبدلا من ان تنادوهم ليجتمعوا على كلمة الوحدة الوطنية وطي صفحة الخلافات بل والعمل المشترك لما فيه رفعة الكويت

هذي جملة من مقالة يكيكي يوم الخميس 9-8-2007 بعنوان غض النظر

ركزوا إن يقول بأن لازم ننادي الشيوخ ليجتمعوا على كلمة الوحدة الوطنية وطي صفحة الخلافات

حتى ليلى مراد تقول لك كلام جميل كلام معئول مأدرش أئول حاجه عنه

طيب ليش كل يوم خليف وربعه شايلين الجنطة ال

NAF NAF

شخباري مو؟؟

وحاطين فيها كتب وصور من جوجل إيرث (كتبتها جذيه عشان يفهم يكيكي) عشان يهاجمون وزير الداخلية اللي اهوا شيخ

ليش ما تقول حق معازيبك خل يجتمعون على الكلمة الوطنية مع جابر المبارك

وعلى قولة المفيدي بخالتي قماشه

يا أخي قول وخلصنا

ترى صج مشكلة لما يكتبون كتاب الوطن بدون اوامر
لأنهم على طول يتناقضون مع المزيون بيرق

أبي متى أول مرة بديتوا ياللي قاعدين تقرون تلبسون جوتي بو خيوط بدال بو لزقة قولوا الصج

وثاني شي ليش لما الصبيان كانوا يشترون ملابس الألعاب كانوا يقصّون السير اللي موجود تحت
:)


وثاني شي تعالوا

بالذمة يعني بالذمة ما لقيتوا غير سعدون حماد يقدم إستجواب حق جابر المبارك

يعني شنو موقفكم بنص استجواب سعدون

يقول له جابر المبارك اعطيك 100 معاملة علاج بالخارج

ترى سعدون بهالحالة راح يتكلم معارض لإستجوابه

:)

سعدون حماد عاد

يعني صج صج إنتوا مقتنعين
!!!

والله لو خليف على كثر ما اهوا ما يعرف يتكلم يروح يستجوبه يكون أحسن من سعدون حماد

بس لا يقول دموعي تهطل

عموما هذا يوم الاربعا وكافي عليكم هالشي
اي صج أم صدّه عندهم خوش فيديو عن علي الجراح ويصفق بعد
:)
على فكرة ترى مو عيد ميلادي اليوم بس من خلال التعليقات اللي مهنيني راح ينفضح إن مو قاري الموضوع كله
:p

13/08/2007

قطايف

شلونكم؟

هاليومين مادري علامي احس ببرود مو طبيعي

واليوم بعطيكم بعض السوالف عن جريدة الحرامية

اول شي إنتهت المهلة اللي كنت معطيتهم ياها عشان ينزلون بيان المدونين عن الغزو

وطبعا ما نشروا شي كما هو متوقع

جريدة الوطن ترفض نشر بيان المدونين عن الغزو لتعرضه للصوص الكويت

هذا نص مسج

اللي عنده خدمة المسجات خل يدزه لو تكرمتوا

خل وايد ناس يعرفون عنهم

المزيون بيرق أو خليف دازين لي ايميل عنه وموقع

lifemood

هم كاتبين عنه موضوع

داش ال
facebook

ومو عاجبه سلم قلبه

شوفوا الموضوعين احسن

أما يكيكي فالصراحة غير قناعاتي وخلاص انا من اليوم ورايح راح اوقف معاه قلبا وقالبا

وما راح اتردد في تشجيعه ابدا

يكون يعني واقف مع الشباب والمدونين بشكل خاص بمقالته أمس

ويقول إن الشباب لانهم يئسوا من الوضع السياسي قاموا يتكلمون

يا نواف يا ولد سليمان الفزيع

اقولها لك وبأعلى صوتي ترى نقدنا الأساسي على الناس اللي على شاكلتك يسعون لهز الدولة ويخربون ويوقفون ويا الحرامي

يالفزيع إرجع لرشدك واوقف مع الحق لا تكتب عند وحق الحرامي العود وراح تشوف شباب الكويت

معاك لا تتنازل حق الدينار وشوفنا معاك بس الله يهدي من يشاء

إلا صج ليش النواب معترضين على إغلاق المكاتب الإعلامية ممكن احد يفهمني

شنو سوت هالمكاتب وإنجازاتها شنو؟

أخيرا وليس آخرا

انا ما شفت الإعلان مال قطر

يا ريت اللي شايفه ينزله على ال
youtube



تستكمل مدونت وجهة نظر سلسلة تاريخ الكويت السياسي
باسلوب مشوق و تستحق القراءه

هنا



واللي راحوا امس اعتصام رابطة الأدباء خل يقول شنو صار من تكلم شالسالفة وأهم شي شنو اللي وصلوا له؟
أدري كل موضوع ماله شغل بالثاني بس مادري علامي والله
سامحوني وخل اروح أنزل أغاني بال
ipod
bye

11/08/2007

عالسريع

شلونكم؟

بختصر إجازة ومابي أثقل عليكم

نواف الفزيع اليوم مقالته عنوانها

ديرتنا ديرة الخير.. قصبن على غمزاتكم

بس أبي واحد يقول لي شنو قصبن؟؟؟

المهم انا راح أكتب الجزء اللي شدني بمقالته وما راح اعلق عليه

اللي متابع المدونة بيفهم واللي مو متابع خل يسئل اللي متابع

شوفوا شيقول

هل يملك قطري واحد مثلما يملكه المواطن نواف الفزيع؟ وهو يكتب ويعبر عن رأيه بكل حرية ويرجع الى بيته آمنا من زوار المباحث، وآمنا على اسرته وعلى بقائه في هذا البلد؟ اتحداكم بفخر وباعتزاز

لا تعليق
:)

الشغلة الثانية ماهي بجريدة الوطن هالمرة بالقبس

شوفوا هالخبر

الحاسة السادسة تعرض في هوليوود قريبا

ستعرض لجمهور شارع بافرلي هيلز الشهير أولا ثم سيفتح الباب للجمهور الاميركي

يعني بالذمة توم كروز ومرته
وبيكام وفيكتوريا
وغيرهم بيروحون يشوفون رعب المسلم
عشان يقول لهم عبيد ولد ام عبيد بقطعة أربعة؟؟

ويعني العرض أول شي بس راح يكون ببيفرلي هيلز
وبعدها راح يتوافد الجمعور الأمريكي
عشان يشوف خفة دم المسلم وصوت مرام وملاقة مشعل الشايع

بالكويت مو بالعينكم هناك بعد

اخيرا

باجر الأحد الساعة 7 برابطة الأدباء في إعتصام لرفض قمع الحريات

اللي يقدر خل يروح ويلبس أبيض هذا اللون الرسمي
شكلنا باجر بنكون أشباح قاعدين هناك بس مو مهم
المهم المعنى

إي صج في فريج يديد دخل عالم التدوين اهوا فريج سعود يستحق الزيارة والتشجيع

09/08/2007

دزيت البيان

أول شي حبيت اقول لكم اني دزيت البيان

حق جريدتهم

وعندهم مهلة ليما يوم الاثنين اذا ما نشروه فضحيتهم حتبئى بجلاجل
واللهي لخلي روض الفرج كله يتكلم عنهم
واللي ما يشتري يتفرج

انا بيت القرين والاجر على الله

الا صج ليش بالمسلسلات المصرية الممثلة تقول حق الشغالة
حضريلي الحمّام
شتسوي يعني؟

بما أن اليوم خميس فبعطيكم خفايف بس

دستور الكويت اهوا قانون الدولة اللي ينظم عملنا كلنا

ومخالفة الدستور تعني عدم الاعتراف بدولة القانون

وطبعا مثل ما انتوا عارفين ان الدستور شي مو معترف فيه بالنسبة للحرامي وعياله وربعه

شوفوا هالفقرة بس بموضوعهم اليوم بالصفحة الاولى عن المحيلبي اللي حول صاحبهم مبارك الدعيج للنيابة

وبعدما رمت الحكومة باشارات تستهجن عقد اجتماع للجنة التعليمية يناقش الموضوعين الاحد المقبل «وهو امر غير دستوري لان اعلان الاهرام هو في النيابة حاليا، والمكاتب الاعلامية قرار اعتمده مجلس الوزراء»، لكن الطرف الاخر، بدأ يرد بلهجة اقوى مفادها ان «الوزير المحيلبي بدأ ينحرف عن مساره الصحيح.. واذا لم يعالج وضعه فانه سيُحرج كثيرا»، وهو ما تُرجم بأسئلة نيابية عدة تعد الآن لتقديمها رسميا «قد تكون وقود مواجهته سياسيا

يعني الحكومة تقول غير دستوري
يعني ما يتوافق مع قوانين الدولة
يعني ماكو شي اقوى من خرق قوانين الدولة
لكن طبعا بالنسبة للوطن الدستور دفتر فيه 183 مادة تتطبق ولا ما تتطبق بالطقاق

والدليل لما يقولون

الطرف الآخر بدا يرد بلهجة أقوى
شنو اكو أقوى من الدستور يا الميانين بدولة القانون

هذا الكلام لأن إعتقادكم إن القانون والدستور شي من الخيال

بس عيب عليكم احنا موجودين وما نطوف لكم شي

يكيكي وما ادراك مايكيكي

زبدة كلامه إن حل مجلس الأمة راح يكون مفيد حق النواب اللي واقفين ضد علي الخليفة يبوقون وينهبون ويسوون اللي يبونه

طيب خل نرجع بالذاكرة شوي حق آخر حل غير دستوري صار
اللي اهو بنص الثمانينيات لما انحل مجلس 85
حل غير دستوري
وسؤالنا ليكيكي
منو اللي باق بذاك الحل؟
منو اللي نهب الاستثمارات بفترة الحل غير الدستوري؟
منو اللي نهب الناقلات
بفترة الحل غير الدستوري؟

ما سمعنا بمسلم البراك ينهب بذاك الوقت ولا الصقر ولا العنجري
بس سمعنا بعلي الخليفة ينهب
ومثل ما سواها اول مرة واستغل الحل غير الدستوري راح يسويها ثاني مرة
اهوا او واحد من جماعته

السعدون كان رئيس مجلس بذاك الوقت يعني قوته اكبر ما سمعنا انه نهب
بس تاج راسك علي الخليفة اهو اللي نهب
لا تقلب الحقائق ترى نفهم يا يكيكي

بعدين تعال انت ما تقول شسالفة التحدي معاك

فإن كان كلامي غير صحيح، أتحداكم
اتحدى شواربكم
اتحداكم ومنكم قانونيون يعرفون عن ماذا اتكلم

يبا دام جذي انا اتحداك تعال جابل شباب الكويت عشر دقايق بس
ونعرف منو البطل المغوار

بس طبعا ما تقدر
انخش ورا جريدة الحرامية وتكلم بس

الحين ليش في بعض الناس يقولون صوط بدال صوت
او غررت بدال قررت
اقنية بدال اغنية هذي مالت منيرة عاشور

شنو أكو بعد علموني

نرجع حق محور حديثنا

يكيكي يقول

والا كيف تفسرون لي نداءاتكم بأن ينقلب الشيوخ ضد هذا الشيخ أو ذاك، كيف تفسرون لي سعيكم لزرع الكراهية بين ابناء عم الاسرة الواحدة؟، وبدلا من ان تنادوهم ليجتمعوا على كلمة الوحدة الوطنية وطي صفحة الخلافات بل والعمل المشترك لما فيه رفعة الكويت

انت من وين يايب نظرية عيال عم هذي يعني علي بابا يبوق ونقول لا عفا الله عما سلف

شهالخرابيط يالدثوي

والله حلوة دثوي
:)

آخر شي يقول

وكل هذا لأجل الدينار الذي تتقاضونه، فلبئس عبدة الدينار ممن استباحوا البلد واستقرار البلد حتى تستمر رواتبهم الشهرية وتلقيها من معازيبهم، بغض النظر والله انكم مكشوفون، ان كنتم لا تعلمون فاعلموا الآن

السؤال جم يعطونك الوطن مقابل مقالاتك

وهم يبقى سؤال مهم شسم ميعاد بمسلسل الغرباء
لحّد يستذكي ويقول الفارس الملثم
:)

07/08/2007

عن النحاسة ووقعوا

الوطن أمس وبشكل متعمد نشرت وسوقت خلو البيان الحكومي من المرور على ذكرى الغزو

وطبعا الفكرة ماهي حبا بالكويت كثر ما اهيا طق للحكومة اللي تخلو من أحمد الفهد وربعه

طبعا انا كنت افكر اكتب عن عدد اليوم أو عدد امس

ولكن لقيت ان موضوع امس اقوى

بس ما يمنع اقول لكم شنو كاتبين اليوم
ابتلشت فيكم بس شسوي

اليوم يقولون

إن لجنة التحقيق اللي تحول فيها صاحبهم مبارك الدعيج للنيابة كانت ناقصة تفاصيل مهمة صادرة من جريدة الأهرام

وجريدة الجريدة تقول

وزير الإعلام عبدالله المحيلبي أرفق كتاب عطا الله مع التقرير النهائي للجنة التحقيق في «إعلان الأهرام» المحال الى النائب العام، مشيرا الى أن وزارة الإعلام «تبحث عن خطأ وقع ولا تبحث عن أشخاص محددين». وأوضح أن موضوع «إعلان الأهرام» أصبح الآن بالنسبة للوزارة منتهيا، بعد أن تمت إحالتة الى النيابة
وقال إن وزارة الإعلام قدمت إلى النيابة جميع المعلومات والبيانات التي استطاعت الحصول عليها طوال فترة التحقيق. ونفى أن تكون هناك أي مساع لتضليل لجنة التحقيق في إعلان «الأهرام» بإخفاء أي معلومة عنها

بس كافي عليكم جذبة وكشفناها عالسريع

المهم نرجع لموضوعنا

بكتب بيان صجي وكلام كبير مو تنطرون نكته بعد

ابي توقيعكم عليه عشان بدزه للوطن

والله من صجي

وفيما يلي نص البيان

انزين انزين يبا

يقول لكم تم بحمد الله وبعد عملية جراحية استغرقت ايام فصل دينار كويتي عن حساوي
وكل المؤشرات تدل على أن الدينار بخير ولكن الحساوي وافته المنية

مو يزعلون الحساوية ويتمردون غشمرة وأنا أمون

يالله عاد بقول البيان

قبل أيام قليلة مرت الذكرى السابعة عشرة لغزو النظام العراقي البائد لدولة الكويت
هذا الغزو الذي إستمر سبعة أشهر تقريبا ونسف كل مبادئ التضامن والعروبة والأخوة

إن هذا الغزو البربري وعلى الرغم من الالم الذي زرعه في النفوس و القتل والأسر والتشريد والدمار الذي خلفه

إلا أنه كشف أمورا كثيرة قد يعجز اللسان عن وصفها ولكن نذكر منها اليسير

فقد أثبت الغزو إن اللحمة الكويتية والإلتفاف الكويتي حول الشرعية لن يستطيع كائن من كان نسفها أو تفريقها

فنحن نختلف ولكننا نتفق على الكويت

لقد سطر الغزو وما نتج عنه من صمود شعبي بأن الكويتيين كلهم شعب واحد لا تفرقهم طائفة او قبيلة او جنس
فهاهو بيت القرين يرسخ درسا شاملا في الصمود والوحدة والولاء للوطن والتضحية بالروح من اجل الكويت
كما أن هذا الغزو كشف من كان يطعن الكويت سواء من الأشقاء او من أبناء هذه الأرض وللأسف

إننا اليوم وبعد مرور سبعة عشرة عاما من الغزو نشكر الله ونحمده على أنه اعاد الحق لاصحابه بفضل الله العزيز القدير

وصمود الكويتيين والقرارات الدولية

فهاهو صدام حسين رحل شر رحلة غير مأسوف عليه ونظامه مازال ما تبقى منه متخفيا خانعا خائفا

تلك هي عدالة الرب التي لا ترضى بالظلم أبدا

إننا وبعد إسترجاع حقنا من الغزاة البائدون
نناشد بل ونطلب من الجهات المختصة محاسبة أعداء الداخل الذين سرقوا ونهبوا ووقفوا ضد الكويت في فترة من أقسى فترات حياتها

فهم العلامة السوداء الكبرى التي لم تمحى الى الآن من تبعات الغزو

ولن يهنأ بال ذوي الشهداء من اجل الكويت ولن يهنأ بال أي كويتي مخلص إلا بعد الإقتصاص ممن سرقونا في محنتنا حينما كنا وذوينا نقدم الدماء والشباب من اجل الكويت

راجين من المولى العلي القدير أن يرجع الحق لأصحابه ويقتص من الظالمين


أبناء الكويت المخلصين

الرجاء من كل من يقرأ هذا البيان ويوافق عليه ان يرفق توقيعه بالتعليق سواء إسم أو لقب ووالله راح أدزها للوطن
أكثر من جذي فصحى بعد ما اعرف
:)

عموما هذا اللي عندي بس حبيت أقول ترى مدونة وجهة نظر عندها خوش موضوع عن تاريخ الكويت يصك على الزعفراني

ومشاري عنده تصويت على أفضل نائب في دور الإنعقاد

باي

06/08/2007

مزاج اليوم - لووول


دازين لي هالفيديو من جم يوم وما قدرت أقاوم قلت لازم تشوفونه بس طوفوا سبة ولا سبتين بالفيديو
بس يضحك والله لوول
اي صج اللي مسويه اسمه
miccoli83
بس نحفظ حقوقه الادبية

04/08/2007

الأهرام

بعد مرور شهرين بالضبط على فضيحة جريدة الأهرام

طلع اليوم قرار بإحالة مبارك الدعيج الصباح مدير كونا للنيابة بناء على توصية لجنة التحقيق

بس نسوي فلاش باك شوي على جريدة الوطن وموقفها من الموضوع هذا من اول ما انكشف ليما اليوم

اعلان نزل بجريدة الاهرام يقول ان الكويت مو شي والمجلس ولا ببيزة والسعدون اهوا اللي قاعد يخرب ديمقراطية الكويت

قام محمد الوشيحي وكتب مقال عن هالموضوع شرشح فيه الأهرام

قامت الأهرام من خلال مدير مكتبها بالكويت ونزلت رد على مقال الوشيحي

هذا اهم شي فيه

هناك أصابع خفية تعبث في الخفاء لإثارة الرأي العام وهذه الأصابع من داخل الكويت حيث إنها اختارت أن يُنشر هذا الإعلان في جريدة «الأهرام» لأنها أوسع الصحف العربية انتشاراً من المحيط إلى الخليج، والغريب في الأمر بل والمثير للدهشة أن هذه المقالة لم تُنشر داخل الكويت إلا في جريدة «الوطن» الكويتية فقط ولم تتناقله صحف أخرى، وهذا يثير تساؤلات كثيرة حيث اعتادت هذه الجريدة الهجوم على شخص النائب الموقر أحمد السعدون والتكتل الشعبي لخلفيات يعلمها الجميع، وهذا ليس برأيي بل رأي عدد كبير من قراء الصحف الكويتية، مما يوضح من قد يقف وراء نشر هذا الإعلان

طيب الوطن شكان موقفهم؟

وليد الجاسم نائب رئيس تحرير الوطن قال عن الموضوع

جماعة الكتلة الشعبية صرخت كعادتها موجهة اتهاماتها لـ »الوطن« بأنها وراء نشر الاعلان في تجاوب أهوج مع رد غبي، أو مصاغ بسوء نية.ونحن هنا نضم صوتنا للشعبي، وندعوهم للبحث والتدقيق وكشف الحقيقة، واذا كانوا رجالا حقاً وتحت خشومهم شوارب فليستجوبوا المسؤول عن هذا الأمر، ولا يطمطموها كما فعلوا في مؤسسات أخرى

وهم قال

تبقى ملاحظة أخيرة، وهي ان المنشور في الأهرام اذا ثبت انه بالفعل اعلان مدفوع الأجر، يجب ان يكشف علناً من وراءه.. وما هي أهدافه.. وكم دفع ومن أين.. وهل ما دفع من الأموال العامة.. وهل سيحاسب التكتل الشعبي المسؤول عنه

يعني داش بشره وموقفه قوي

يقول لو رياييل خل يكشفون ويستجوبون
وهم يقول لازم يكشف ويحاسب اللي وراه

رفيج بوش فؤاد الهاشم قال عن هالموضوع

لا أستبعد ان يكون السعدون وكتلته هما اللذان يقفان وراء ذلك «الاعلان» المشبوه، والهدف؟ اثارة زوبعة كبيرة بحجم افعى سيدنا موسى حتى تلتهم كل أفاعي السحرة التي تحمل اسماء «الفحم المكلسن» و«المدينة الاعلامية» و.. «مطافىء شارع الهلالي» و«قرض البنك الصناعي» و.. غيرها، لكي يصلوا في نهاية هذا التصعيد الى المطالبة باستجواب رئيس الحكومة فيصدر مرسوم الحل والدعوة للانتخابات الجديدة فيتحقق المراد «للسعدون» وبقية «فداويته

سمّى الإعلان إن مشبوه وقال ان السعدون ممكن يكون وراه

كل هذا حلو

ومن ظلام الليل يتبختر خلسة مخلوق من زمن الهاوية يترنح شمالا ويمينا بيده سكين صغير يعتقد بانه سيف بتار لا يملكه سوى ولد السلطان وشمشون الجبار

يأتي متيكيكا وكأنه من جيل العباقرة الافذاذ وبعد شهرين من ترنح الوطن في قضية الأهرام

نعم نعم كما تعتقدون

هو يكيكي حامي الحمى الشريف النظيف الشفاف الذي قد يتهيأ للبعض أنه غرشة ماء ويشربه من كثر شفافيته

يأتي هذا الرجل ويقول

أبي موسيقى تصويرية ويا كلامه لأن لازم مؤثرات ويفضل تكون المؤثرات موسيقى السنافر

يقول بمقالته اليوم

التقرير المنشور في الاهرام، كان في مضمونه يحمل تحليلا عن الاوضاع الداخلية في الكويت ولم يتضمن خبراً عن الأوضاع الداخلية في البلاد وان حمل على احمد السعدون واعتبر ان طموحه لرئاسة مجلس الامة جعله يجر البلاد الى أزمات سياسية لا أول لها ولا اخر، فلست ادري كيف للعبقري الذي يريد احالة الشيخ للنيابة العامة تحت تهمة نص المادة 15 »وبغض النظر عن الادلة التي تربط الشيخ بالتقرير المنشور« وهو يقرأ تقرير تحليلي للاوضاع وليس تقريرا اخباريا فيه اخبار كاذبة عن الاوضاع الداخلية في الكويت، مثلما استجوب نص المادة 15 وانا اتحدى ان يكون بالتقرير صيغة خبر حتى يدان بما اشارت اليه نص المادة 15

كالعادة يتحدى

ويكمل

الظاهر ان المحيلبي يبي السلامة وخايف، بس هذا مو معناه التجني على القانون وتفسيره ارضاء للسعدون وصبيانه، لست اعلم فيما اذا كان الشيخ مبارك الدعيج هو المسؤول عن نشر هذ الخبر، ولكن اعلم ان نص المادة 15 يتبع قانون جرائم امن الدولة، وهي جرائم تندرج تحت مفهوم الخيانة الوطنية

يعني صار الحجي إن لا والله مو لازم يحاسب أو يحول النيابة

ليش يا يكيكي ليش ؟ لأن رفيج المعزب ما تبي يحال للنيابة

مو قبل شهرين قرعتم طبول الحرب لكشف المسئوول ولما طلع صاحبكم صار المحيلبي خايف

يا راجل اي ده بقى ده بقى ده بقى ده على قولة المطرب الكبير حكيم

على العموم طلعوا رياييل التكتل الشعبي ولاحقوا المتسبب وتحول للنيابة بس هل انت ريّال يا وليد وتعتذر

ذس إز ذا كويسشن على طريقة يكيكي

ختاما يبقى سؤال مهم جدا وحساس


شنو أسامي بنات مريم الغضبان في خالتي قماشة؟؟

03/08/2007

موضوع وايد مهم وحرني



اليوم كنت مفكره اني احط شي عالمزاج

لكن ياني ايميل عكّر هالمزاج وااااااااايد

على فكرة ترى الايميلات اللي توصلني غالبيتها مهمة

لكن ما استخدمها على طول اخشها بالبال لا تحاتون وواصلوا على اي اخبار عندكم

المهم الموضوع اللي حرني وايد ماله شغل بالوطن ومهازلهم

لكن له شغل بجامعة الكويت

الظاهر ان قائمة الوسط الديمقراطي مسوية نشرة تنقل فيها بعض الأوضاع الأي شي اللي بالجامعة

وكالعادة طق مطاقق

مادري لي متى بيخلون الاخوان المسلمين يمسكون ويتحكمون بالجامعة

لكن شغلة وحدة قهرتني وايد بهالنشرة

مادة شبه إلزامية على كل طلبة الجامعة

يعني لازم ياخذونها عشان يتخرجون

إسمها ثقافة إسلامية

شوفوا المكتوب فيها

طبعا الوسط حاطين رقم الصفحة واسم المقرر

أنا اقول حق مندوب جريدة الوطن أو اللي يسمونه مدير الجامعة

بدال لا كل شوي يراكض ورا كافتيريا مختلطة مالت كلية الطب وهالخرابيط

وبدال لا ينطر أي شي ينزلونه الوطن ويروح يلاحقه

يجابل هالمهزلة اللي صايرة بالجامعة لا رقيب ولا حسيب

يعني وقاحة ما بعدها وقاحة وقلة ادب وإهانة حق ناس مسلمين لهم إعتقادهم وأفكارهم

ويعتبرونهم فرقة تبث سموم؟؟؟

على فكرة ترى الشيعة يشكلون نسبة من الكويت

وجزء من المجتمع

وأي تفرقة من مجموعة حثالة حاطين هالمقرر اللي يفرق

والسكوت من ادارة الجامعة او مندوب الوطن بالاصح

ووزيرة التربية

هذا يعتبر اهانة للكويت

عذروني بطوّا جبدي

واذا في احد يبي يلبس لي غترة بدون عقال أو عمامة

ويذكر لي تاريخ وهالحجي لا يكتب أحسن له

أنا مابي ادش بجدل منو صح ومنو غلط وهذيل قالوا وهذيله سووا

انا جدامي وضع وشي يفشل بجامعة الكويت وأرفضه

لا أكثر ولا أقل

سلام

01/08/2007

توهقت

طبعا بعد الفيديو مال خليف

توهقت وايد

لأن ردة الفعل عليه كانت روعة

حتى إذا إختلف معاي البعض لكن

الفكرة إن الأغلبية عجبها الفيديو

وطبعا لأني ما أقدر كل شوي اسوي فيديو معين

ولازم أرد للكتابة

فحدي متوهقة شنو أكتب ألحين

بس شوفوا هالله هالله بالتعليقات عشان لا أتحبط

وإذا تحبطت آكل

وإذا كليت أمتن

وإذا متنت أتكيسل
وأتحبط زيادة وهم آكل

واذا كليت أمتن زيادة

وإذا متنت اتكيسل
وأتحبط زيادة وهم آكل

وأمتن زيادة

واتكيسل

وأتحبط وهم آكل

تهقون لي متى بعيد الحجي
؟؟
المهم

لا تخلوني أمتن

خلال الجم يوم كان في اشياء ملفتة للنظر

بس مو ذاك الزود

يعني مثلا مثلا بس

يكيكي أمس شيقول

والتهديدات التي تأتيني بأحالتي للنيابة وألا يكون مصيري مصير الجوعان

هذا سطر من معلقة الفزيع أمس

يتوقع الحبيب إن الناس تنظر له مثل ما تنظر لحمد اليوعان الله يشفيه يا رب

بس الظاهر ما يدري شنو حمد اليوعان

طبعا للي ما يدري

حمد اليوعان حصلت له محاولة إغتيال

والسبب طبعا طبعا طبعا

إن تكلم عن السرقات وعن الأموال العامة

وضد منو تتوقعون

إي صح صح
ضد علي الخليفة

ونفس الشي صار مع النيباري

والله يستر من اللي بيجربون فيه مستقبلا بعد ما يطلع الحكم بإدانة علي بابا

لا تحاتي يا يكيكي

إنت في مأمن دامك مع علي بابا وخليف وشلة الأنس

وخسئت بعد أقوى من هالكلمة ما عندي

خسئت ان تكون يوما ما في مصاف حمد اليوعان أو عبدالله النيباري أو بيت القرين

تهقون أحب نفسي؟؟؟

أنا اللي ودي أعرفه شي واحد

اللي حاول إغتيال عبدالله النيباري دق على علي الخليفة بعدها ب 3 دقايق بس

ابي اعرف شقال له؟؟

فهموني بس شنو الحوار اللي بينهم

اللي يبي يقط قطّات الصقر بجلسة المال العام بشهر 5 على هالموضوع لا يقطها

لاني راح أستملقه

الحين خلونا نروح حق الثاني بلبل ولا باباي ولا اي اسم كاتب مقالة أمس

يقول فيها الفداوي

غير ان ما ساءنا حقا في مقال عبدالمحسن جمال هو قوله »وبالتالي فانا ارى ان رد السيدة الدكتورة سعاد الصباح والسيدة بدرية الصباح...«!!سيدة سعاد وسيدة بدرية؟!! وين رايح يا الحبيب، السيدة هي تلك »الملاية« التي تقرأ عليك عندما تصاب بـ »الصخونة« وتتفل على رأسك بعد قراءة بعض آيات، كما هو متبع في الطب الشعبي.اما سعاد الصباح فهي الشيخة سعاد المحمد الصباح، وبدرية الصباح هي الشيخة بدرية سعود الصباح، غصبا عن عينك ورغما عن انفك. هاتان شيختان من نساء شيوخ الكويت وبنات اسرتنا الحاكمة، فان اردت مخاطبتهن فخاطبهن بمقامهن ومسمياتهن، فكرامة وعز الكويتيين من كرامة وعز اسرتهن الحاكمة رجالا ونساء، ام ان التعظيم سلام عندك محصور بأسرة أو أسر أخرى غير أسرتنا الحاكمة؟! وهي كذلك أسرة حاكمة غصباً عن فنطزيات مهاتراتك

طبعا أنا ما أدري شنو سر الصخونة المزمنة عندك

وما أعتقد الملاية لو قرت القرآن ألف مرة على راسك

واهل الكويت كلهم تفلوا على راسك ما أعتقد إن في فايدة

بس عندي سؤال واحد

لازم كلمة شيخ عندك

واللي يذكر أبناء الأسرة بدون كلمة شيخ يكون مو محترم وما يحترم كرامة الكويتيين

طيب السؤال اهوا


هالاسامي اليوم منشورة بالوطن وبكل الجرايد بالشكل التالي

ريم بدر محمد الصباح
منيره سلمان محمد الصباح
روان سلمان داود الصباح
فهد فيصل خليفة الصباح



اول شي مبروك قبولهم بالجامعة
وثاني شي هالاسامي بدون كلمة شيخ أو شيخة صادرة من جامعة الكويت ومنشورة بجريدة معزبك

يعني على كلامك انت لا الجامعة محترمة كرامة الكويتيين ولا جريدة معزبك


اللهم لك الحمد والشكر

اي على فكرة اذا السيدة تنقال ساعات حق الملاية وعشان جذيه ما يصير نقول عن بدرية وسعاد سيدة

ترى حتى شيخ تنقال ساعات حق المشعوذين

بس لان تفكيرنا وايد أنظف من تفكيرك ما نفسرها جذيه

استح على ويهك شوي وخلك بأي مكان انت فيه انثبر وإنت ساكت