28/02/2009

الثلاثي المرح

آخر تحديث
::::::::::::::::::

هالتحديث بلخص فيه كل الردود على منتقدي هذا البوست من خلال تعليقين ممتازين برايي
من أم العيال ومحمد عبدالله

أم العيال
عفوا عزيزتي .. اسمحي لي ان اتدخل دون دعوة .. حرية التعبير مكفولة للجميع وهذا لا اختلاف عليه. ولكن في كل دول العالم هنالك آداب للتعبير لابد الالتزام بها. كما أن التعبير لمجرد التعبير - بغض النظر عن الحرية- مؤشر لخلل شخصي ان لم يكن نفسي

الانسان الناضج يتكلم أو يعبر لهدف واضح ولا يتكلم لمجرد الرغبة في الكلام او جذب الانتباه

عندما يبادر شخص أو مجموعة ما لعمل نشاط ما للصالح العام وعلى حسابهم الخاص من حيث الوقت والمال والمجهود في ظروف تعيسة ومظلمة الغالبية فيها اما متشائمة أو متقاعسة .. فما الحكمة والهدف من الانتقاد؟ اليس من حقنا أن نتسائل عن الدوافع؟ اذا افترضنا ان الدوافع راقية وحسنة النية فالاسلوب والقنوات خطأ. وان كانت النبية سيئة فالمصيبة اعظم

الانسان الناضج والواعي أما يقدم نقد بناء أو يقدم بديل. الانتقاد لمجرد الانتقاد فيه احباط للقلة التي تحاول ان تشعل شمعة في هذا الظلام وفيه مؤشر واضح على خلل نفسي أو فكري .. فبالنهاية الهدم أسهل جدا من البناء ومن يصنع القمامة يده انظف بكثير ممن ينظفها

أعتذر على الاطالة ولكن هذه السوداوية والطاقة السلبية لابد ان تتوقف اذا اردنا البناء. ومن ليس لديه خير ليدلي به فليصمت ليسمح للآخرين التركيز في العطاء

محمد عبدالله
صراحة أتعجب من ازدواج المعايير عند البعض!0

الذين هاجموا الحملة بشكل غير موضوعي يحق لهم هذا تحت ذريعة حرية التعبير ، و لكن معاذ الله أن يتم التعرض للمهاجمين بنفس اسلوبهم!0

إن كان من حق البعض انتقاد الحملة بشكل جارح فمن حق الأخت أن تنتقد نقدهم ، و إن كان كلام الأخت يتعارض مع حرية التعبير حسبما يرى البعض فذلك ينطبق على النقد الأصلي أيضا!0

من ينتقد يجب أن يتقبل النقد فحرية التعبير لا تتجزأ.0

وهني بالنسبة لي هذا البوست منتهي
::::::::::::::

تحديث قبل لا تقرون
:::::::::::::::::

وايد من الربع المعلقين كتبوا عن موضوعي هذا ينتقدونه
إني ما أحترم حرية التعبير

بأمانة رديت وقريت موضوعي

لقيت إن أنا قاعده انتقد اسلوب المدونين الثلاثة في الإنتقاد

ما قلت لهم سكتوا

إي نعم قلت إن نقدهم تافه وهذا رايي دايما أقوله بدون مكياج
إي نعم قلت إستهبال عن بعض ملاحظاتهم وأيضا هذا رايي بدون تجميل
وهذا اسلوبي من بداية التدوين

لكن ما يبت سيرة ان مو لازم يكتبون خير شر

ولا قلت لحّد يقرا لهم

ولا طالبت بتسكير مدوناتهم؟؟

اللي سويته وبإختصار إهوا الرد على نقدهم اللي أشوفه مافيه ريحة الموضوعية

وهذا كله من حقي بالتعبير

وأنا ما ألغيت حقهم

أنا عندي مدونة وإهما عندهم مدونات

وكل واحد ينتقد اللي يبيه

أنا بأمانة ما أتابعهم

لكن سمعت عن سخريتهم من حملة أقسم بشكل مو موضوعي برايي

ولاني أحب أي شخص يقدم حق ديرتي شي زين

ومنهم مجموعة أقسم

ما رضيت إن تمر السخرية عليهم مرور الكرام

لو كان النقد بالاخراج بالتمثيل بالمحتوى جان سكت

لكن يوصل للتجريح والإتهام بالبوق والتبعية وبدون أدلة

هذي مصيبة

وهذا اللي استفزني

اذا احد يشوف اني أسعى لإلغاء الآخر بهذا الموضوع

فهذا أبدا مو قصدي ولو فهم بهذا الشكل أنا أعتذر للي يقرون أولا

ولزملائي الثلاثة المدونين ثانيا

ومادري راح تسعفنا الأحداث الكتابة عن قصة فهد أو لأ

::::::::::::::::::::::::::::::::
هذا الموضوع مو حاطته ببالي إني أكتبه

وكنت قاعده أحضر شي عن الفيلم الوثائقي اللي بعنوان

قصة فهد

أو عبدالله المصري

اللي بثته قناة الوطن من يومين

لكن شفت وضع ماصخ وتافه وايد

وللأسف ما شفت ردة فعل معاكسه لمصاختهم

فماكو إلا إني أجابلهم

ولأني ما أبي أتكلم بتلميح أنا بحدد اللي بتكلّم عنهم

مدونات
As you like
حاكي عقالي
بلوق عمّتي


بعد ما تطوّع مجموعة من الشباب وقدموا فكرة حلوة جدا ولا قالوا إنها من بنات أفكارهم

بالعكس ذكروا
بمدونة حملة أقسم ما يلي

لقد استوحينا فكرة القسم من حملة الرئيس الأمريكي باراك أوباما
I Pledge
مع العلم بأن المحتوى الفني والنص مختلف تماما عن دعاية أوباما، علما بأن هذا الأسلوب الخطابي المباشر في الاعلان متبع ليس فقط في حملة أوباما وانما متبع في كثير من الدعايات الأخرى

يعني المجموعة ما إدعت أي شي

وقدمت فكرة جميلة كل من شافها تأثر فيها وأبدى إعجابه

قبل لا يطلعون الثلاثي المرح ويطعنون ويتطنزون بهالشكل

وراح اقول لكم بعض التفاهات اللي ذكروها

سواء حضرات المدونين الثلاثة أو بعض التعليقات اللي طبعا اهما ما يتحملون مسؤوليتها

بالنسبة للمدونين الثلاثة

آز يو لايك حاط كلمة أقسم

معاها صورة كشعار للمدونة ويقول

أقسم أن أجعل التازيم طريقي؟؟؟

أنطره إهوا يشرح

هالشعار هل إهوا سخرية من الواقع

أو فعلا إهوا يبي يسوي مشاكل وقصة عالفاضي والمليان

وبعدين حاط صورة الصقر بتلميح إن إهوا اللي ورا الحملة

يعني يا مدوننا العزيز

هل وصلت فيك الضحالة انك تفكر ان الصقر ورا الحملة واهيا معروضة بتلفزيون الوطن وجريدة الرؤية؟؟

ولاّ الفكرة ترى بهاجم الصقر وبس

وبعدين كتب واحد من القائمين على أقسم رد شطوله على المدون الكريم

ووضح فيه كل الأمور

وقال الحملة للحث على العمل

والمدون العزيز حط الرد بالبوست نفسه اللي ينتقد فيه الحملة

لكن الرد الظاهر ماكان شافي له أبد

وظل يتهمهم بسرقة الفكرة؟؟؟

مع العلم بأن أوردت لكم إن مدونة أقسم كتبت إن الفكرة مقتبسة

وأيضا سخر من وجود الفنانة القديرة هدى حسين بفيديو أقسم

هدى حسين عراقية الجنسية سابقا

كويتية حاليا

في فترة إحتلال العراق للكويت

ولأنه تعتبر الكويت بلدها

وتوقف مع الحق

هذا كان موقفها

وانت بذاك الوقت يا

آز يو لايك

وين كنت؟؟

هدى حسين قدمت لجيل الكويت من مواليد الثمانينيات خصوصا

اروع القيم والأخلاقيات عن طريق مسرح الطفل

فمو هذي الإنسانة اللي تنقد عليها لمجرد إنها مو كويتية بالتأسيس

وما قصرتي يا هدى وعساج ذخر لديرتج الكويت

وطبعا في أحد المعلقين بمدونة الزميل العزيز إستطرد وما كفاه هدى حسين

وراح على داود حسين بعد

وداود حسين من رجال المقاومة الإعلامية خارج الكويت في فترة الإحتلال
وهذا الشاهد

مو عيب إن الواحد ما يكون كويتي

ترى الواجب على الكويتي ان يخدم ديرته

ولما يكون الشخص مو كويتي ويخدم الكويت

هذا مكانه فوق الراس والعين يا مدونين؟؟؟

احد المعلقين يقول حق مجموعة أقسم ليش ما تعلنون عن هوياتكم

بعد هذي غير شغلة؟؟

اذا اعلنوا تقولون يدورون الرزّه والصور

واذا ما اعلنوا تقولون ليش خايفين

خلاص يا معلّق يا محترم

إطلب من آز يو لايك يعلن عن هويته

قبل لا تطلب من اللي مهاجمهم آز يو لايك
ان يعلنون عن هوياتهم

هذا وخلصنا منه

نروح حق
حاكي عقالي

حاكي عقالي إختصر المسألة

وحط فيديو يسخر من أقسم

وحاط لنك لحملة أوباما

وواصف حملة أقسم بالحرامية

مادري اخونا خالد العتيبي مثل ما كاتب إسمه بالمدونة

عنده نفس مرض إستهبال آز يو لايك

الجماعة ما انكروا انهم خذوا الفكرة من امريكا عشان إنت تتهم بالبوق

ويا ليت طاقاتك هذي السريعة في السخرية من اي عمل وطني حتى لو مو بالعين شي تسخرها حق شي يفيد ديرتك

طبعا التعليقات اللي موجوده بحاكي عقالي شوي فيها دعم لمجموعة أقسم أكثر من اللي شفته عند آز يو لايك

بإستثناء تعليق
مطقوق اللي ما فهمته بأمانة

اذا كان يتطنز على اقسم ولا واقف معاهم

نروح حق
بلوق عمتي

اللي هم مو عاجبه شي

ومو عاجبه ان ميامي وهدى حسين و بشار الشطي يعلمونه حب الكويت

وايضا نفس مرض الاستهبال الموجود عند الاثنين اللي طافوا موجود عند بلوق عمتي

هم يقول بايقين؟؟

يا جماعة والله عيب

قدموا شي بدال هالهذرة الزايدة

سؤال للثلاثي المرح

إنتوا شقدمتوا حق الكويت؟؟

جد جد أبي أعرف ماهو تحدي بس ودي اعرف

خل أقارن يمكن تكونون أحسن من أقسم

أدري الحين بينسبوني للعاملين بحملة أقسم

وأنا أتشرف بهالشي لكني ما عرفت عن العمل الا عقب ما خلصوه ودزوا لي ايميل عنه

فلا تنسبون لي شي ما كان لي الشرف فيه للأسف

أقتبس من
مقال جاسم القامس الاخير بالجريدة واللي قال فيه

العتب هو على النواب الآخرين كمحمد العبيد وضيف الله بورمية وجابر المحيلبي الذين يطلقون تصريحاتهم ضد القانون دون أن يوفروا بدائل

وأنا أتصرف في المكتوب وأقول

العتب هو على الكويتيين الآخرين كآز يولايك و حاكي عقالي وبلوق عمتي الذين يطلقون إنتقاداتهم ضد حملة أقسم دون أن يوفروا بدائل تفيد الكويت ويكتفون بالسخرية

ملاحظة: اخترت اسم الثلاثي المرح لطبيعة كتابات المدونين الثلاثة اللي قصدتهم بهالبوست ومو للسخرية منهم

25/02/2009

أقسم

أول شي جريدة نون الإلكترونية
برئاسة تحرير الدكتور العزيز علي الزعبي صدرت واليوم أول عدد لها زوروها

نتمنى انها تكون احسن من خرابيط الآن

رسالة هزّتني اليوم وصلتني من مجموعة أطلقت على نفسها إسم
أقسم للكويت

وفيها عمل رائع يستحق ألف تقدير ومليون دعم

لا تبخلون عليهم بنشر رسالتهم الرائعة

وخلونا كلنا نقسم حق هالوطن

إي صج شريط رويشد نزل

24/02/2009

إنتوا من يكفلكم؟؟؟


تمر اليوم الذكرى ال19 لبطولة شهداء بيت القرين

وينكم اليوم يا أغلى ناس؟؟؟



حشود الإخونجية الكويتيين مجندين كل فلوسهم لتنظيف ساحة حماس من الغزو وموقف حماس من الغزو

انا مالي شغل بحماس ولا بخرابيط اي تيار ديني سياسي خارجي

انا سؤالي للإخونجية الكويتيين

بدال لا تدافعون عن هذا وذاك وتطهرون ساحتهم من المواقف المشينه بالغزو

نسألكم انتوا من يطهّر مواقفكم من الغزو؟؟؟

صغاركم سمّوه خلاف بخامس اسبوع من الغزو

وقياداتكم طلبت فلوس من سعود الناصر سفيرنا بامريكا بذاك الوقت

عشان يوقفون مع الكويت؟؟

ويايين تكفلون الناس وتنظفون مواقفهم؟؟

طهروا ساحتكم اول بعدين تكلموا

عموما اجازة ماني معوره روسكم زود

والفاتحه على ارواح شهداء القرين



22/02/2009

the curious case of .....


أول شي منت إخونا وعمرك ما راح تكون

ثاني شي إدعائك البراءة تزوير لقرار محكمة الوزراء اللي ما كفّتها الأدلة ولم تحكم ببرائتك

ثالث شي انصحك بفلوسك اللي حصلتها بعرق جبينك تسوي فيلم عن تكوينك للثروة

وراح ينال الأوسكار

ورابع شي دام جذيه نعم لإسقاط القروض "مو من صجّي" قبل لا تروح الفلوس وبعدين ما تكفي الأدلة

وبهالمناسبة المجيدة عسى ما تصير اجازة بس

نفتح المجال لإهداءاتكم

18/02/2009

دين أو دينـ..ار

تحديث
::::::::::

أنا آسفه

صدّقت جريدة الآن لما قالوا إن تقرير عن الفحم المكلسن طلع

وراعي الفحماء عضو اللجنة قال ما طلّعنا اي شي الى اليوم

آسفه إني اتهمت الجريدة والقبس بعدم الموضوعية

ما اقول الا افا يا سعد

خليت جريدتك حالها حال الوطن بالتشلخ والانتقام؟؟؟

كل هذا عشان زايد؟؟

أرد واقول آسفه يالنصف وآسفه يا خالد هلال
::::::::::::

هذا مال ميداس مو شكله لاعب برشلونه
:)

الفنان الشاب يقول طاح وانكسرت ريله

وطبعا الخبر بالوطن

انزين بفهم شي اللي تنكسر ليه ليش ينام بالمستشفى؟؟؟

غرفة الجبس وخالصين

انزين لنفرض قاعد يتدلّع ونام بالمستشفى

اللي مكسوره ريله ليش يحطّون له درب "مغذي" بإيده؟؟

خل نفهم من اللي قاعد يقص علينا

بهمن ولاّ الوطن أو الأثنين معا؟؟

إنزين في شي مو فاهمته من جريدة الجريدة وجريدة القبس بعد

طلع تقرير لجنة التحقيق البرلمانية بالفحم المكلسن

لا الجريدة ولا القبس نشروه؟؟؟؟

حتى وإن كان فيه ادانة للصقر

مفروض جرايدنا ما تتشبه بجريدة علي الخليفة

وهذي اعتبرها سقطة بحق موضوعية صحافتنا

واتمنى يتداركونها سريعا

الحين ندش بالسالفة بعد هالصورتين




لحيتين بالمجلس يتكلمون عن نفس العالم الديني

واحد يقول العالم يجيز والثاني يقول ما يجيز

كله عشان جم دينار واحد يبيهم ينصرفون حق شركاته

والثاني حق اصواته

لما نتكلم ونقول لا امكانية لوجود دولة دينية حاليا

ما نتكلم من فراغ

هايف وخالد اثنينهم لحايا

واثنينهم سنّة

واثنينهم سلف

واثنينهم ماخذين فتوى من نفس العالم الديني

ومع هذا اختلفوا بقرار مصيري يكلف الدولة مئات الملايين

بالله ما تقولولي شلون نقدر نمشي بالحكم الديني اللي يطالبون فيه هالاثنين بالذات وداشين المجلس عشانه

واهما الاقرب لبعض مختلفين بقرار مصيري

ما بالكم اذا صار خلاف بالفتاوي بين عالمين مو عالم واحد بالدين

او خلاف بين مذهبين

شوفوا شلون ما صار لهم سنة وشلون اختلفوا

شنو الحل تهقين يا
وطن النهار؟؟

ومثال هايف / خالد

يشهد

شكرا لكم على اثبات فشل الدولة الدينية

ونخليكم مع عايل الأسمر الصجّية مو مالت كاظم

تهقون شروق تعرف هالمغنّي؟؟




16/02/2009

ما أهيفك


يقترح إن اي واحد يغازل بنت

ومادري هل اقتراحه يشمل البنت اللي تغازل واحد او لأ

المهم يقترح ان ينحبس المغازلجي 6 اشهر

بغض النظر

ان هالاقتراح ما راح يحل لا ازمة السكن ولا الأزمة المالية

ولا الرياضية ولا الطبية ولا التعليمية

بس خنحسبها مع الجهبذ هايف

الحين المغازلجية بالغالب مراهقين

مراهقين بالغالب بين ال 16 ليما نقول 20

ونحط خمس سنين زود بعد

ليما ال 25

يعني هذا اللي ينحبس ست اشهر واهوا بعمر ال 16 او ال 18

يبي يتوظف عقب ما يتخرج

يلاقي ان محّد يوظفه لأنه عليه جريمة مخلّة بالشرف

ومحبوس

انزين يبي فيزا بيسافر

ما يقدر لأن عليه جريمة مخلّة بالشرف

انزين يبي يتزوج

محّد يرضى فيه لأن سابقته انه مغازلجي وخريّج سجون

واذا قلنا ان الشباب الكويتي اللي تتراوح اعمارهم بين ال 16 وال 20 سنة

ماكو الا 30% منهم بس مغازلجية

و نسبة 15% من هالمغازلجية صادوهم

وحبسوهم 6 اشهر

وصاروا اصحاب سوابق واهما في مقتبل العمر

بالله ما تقول لي يا هايف

مشاكل بطالتهم وعدم قدرتهم عالزواج واللي يترتب عليها من جرايم
من يحلها حزتها؟؟

علّمنا إذا عندك سخافة أكثر من جذيه

بس هذا اهو حياتنا كلها منع مو علاج

عندنا موكب

سد الشارع

عندنا حوادث
امنع السيارات

عندنا جم واحد يرقص
الغي الحفلات

عندنا واحد يسب بالنت
سكّر النت

عندنا واحد فيه اسهال
مادري شنسوي فيه بعد

فكروا بشي لمعالجة المشكلة مو بالمنع

بس شنقول يا هايف

هالباب لايق على
هالخراب

ما اقول آخر شي إلا
ههههه
مشكور دسماوي

14/02/2009

تصــوّر

صباحكم خوش خبر
:)

بغض النظر عن ستايله

وشواربه

والبالطو الطويل

لكن هالأغنية من أروع ما تم غنائه بالحب




على فكرة باجر 15-2 عيد ميلاد

W
hite Wings

يعني غوّاصها ييب لها هدية اليوم وباجر

حق المخاسير بس

:p

كل عام وانتي بخير

09/02/2009

شصار فيك؟؟

سعد بن طفله العجمي

هذا العقل الجميل



وأحد رجالات الكويت اللي سجّلوا إسماؤهم بأحرف من نور بتاريخ الكويت وحريتها وديمقراطيتها من صغر سنّه

اهوا الرجل اللي رفض دخول الإنتخابات الفرعية حتى قبل تجريمها قانونيا إيمانا بالمساواة وتكافؤ الفرص

إهوا المدافع المتميز عن الكويت في قنوات الإعلام الخارجي خصوصا وقت الصراع العراقي الكويتي المؤجج من قناة الجزيرة

وأكيد أكثر

ولأنه شخصية ذكية وإعلامية متميزة

قدر خلال فترة وجيزة إن يدخل في مجال الصحافة الإلكترونية بشكل أعتقد إنه الأول بالكويت

وصار مصدر رئيسي من مصادر الأخبار السريعة لوايد ناس

وكان هذا من خلال جريدة
الآن الإلكترونية

لكن وللأسف من كلمة لكن هذي

كانت إنتخابات 2006 اللي نزل فيها بن طفله مرشح عن الدائرة الثامنة بتقسيمة الدوائر الخمسة وعشرين سيئة الذكر

نقطة تحول في فكر سعد بن طفله

لأن كان في شي غبي جدا بإعتقادي إسمه دعم تكتل ال 29

وكانوا وايد من شباب نبيها خمسه الله يسامحهم يرفعون البرتقالي حق اللي يسوى واللي ما يسوى

وهذي غلطة من أغلاطنا وما راح نتعلم منها كالعادة

والكل بيكابر طبعا

المهم

ولأن سعد بن طفله ما كان نائب في مجلس 2003 فطبيعي جدا إن ما يكون من النوّاب ال 29

اللي دعمهم بعض شباب البرتقالي

وبدّوا أحمد المليفي وحسن جوهر على سعد بن طفله

طبعا كان في رعاية إعلامية جيدة حق بن طفله بذاك الوقت من قناة نبيها تحالف لكن الدعم الصريح بالأصوات ما كان موجود

المهم

هذا الشي سبب صدمة كبيرة للدكتور سعد

وإلتم عليه جم واحد من اللي عندهم رغبة الإنتقام من ربع المنبر والتحالف وتحديدا زايد الزيد أحد العاملين بإدارة التحرير بالطليعة سابقا

قبل لا يختلف معاهم

ويطلع

ولمّا تم صدور الجريدة الإلكترونية الآن تولى زايد الزيد رئاسة تحريرها

وشوي شوي وبعد ما إتسع نطاق جريدة الآن

بدا زايد ينتقم من المنبر والتحالف اللي يكرهم
من خلال أخبار وتلميحات هجومية على التحالف والمنبر بشكل شبه يومي

وطبعا كل هذا بهدوء من سعد بن طفله

واهوا اللي ما ينفهم الا موافقة على عبث زايد

سؤال يا دكتور سعد

شصار فيك؟؟

معقولة هذا اسلوب رجل من الرجال ال 45

هل صار اسلوبك اليوم هوا ضرب التيار المدني اللي اهوا تيارك

والسبب خلاف معاهم

معقولة الزمن يغيرك جذيه

بدال ما تحاول تصحيح الأخطاء

تستسلم حق صراع زايد الطفولي؟؟

معقولة يا بن طفله؟؟

ننطر منك صحوة يمكن انها تساهم في لملمة كيان الليبراليين المبعثر

آخر شي بما إن الليبراليين كفرة

أبي واحد مسلم يقول لي الحين شنسوي

ناخذ من اليهود ولاّ ما ناخذ؟؟

يعني مطوية وذكّر مالت الرفاعي تقول بمحرم

إن الرسول عليه وآله افضل الصلاة والتسليم أخذ عادة الصيام في يوم العاشر من اليهود

وبمطوية عيد الحب الله يعيده علينا بكل حب

حاطين حديث عن الرسول عليه وآله أفضل الصلاة والتسليم يقول خالفوا اليهود والنصارى!!؟؟؟

آية الله العظمي فريج سعود يا ليت تنوّرنا

أو حتى العلاّمة مطقوق

أحد يفهمني بس

05/02/2009

منو يايبه


يقول لن نبالغ إن قلنا أن جريدة الوطن تجسيد للوحدة الوطنية

كل هذا عشان رحلة علاج بالخارج؟؟؟

وين يا بوصادق وين

عموما الله يشافيك من المرض



بو مهدي
تكفه
تكفه
لا تــفــكــّـر

بس طلّع رخص حسينيات ومسايد أريح لنا وأريح لك

جبريل الرجوب رئيس اللجنة الأولمبية الفلسطينية

سنة 2001 سب الكويت ووصف الكويتيين بأنهم أنجاس

المهم هالأثول هذا ياي الكويت

وطبعا رئيس اللجنة الأولمبية الفلسطينية مو ياي يزرع شعر ولا ياي عشان يقابله بوخرشد

اكيد ياي يقابل نظيره الكويتي

يعني رئيس اللجنة الأولمبية الكويتية

ومنو رئيس اللجنة الأولمبية الكويتية يا ترى؟؟

فبدال لا تسوون لويه على الرجوب شوفوا منو يايبه

وخنشوف ساعتها وليد الطبطبائي او جريدة الوطن شبيقولون؟؟

وفي موضوع آخر رابطة الطب الكويتية محولينها لجنة تحقيق

لأن يقولون انها سوت ندوة مختلطة مع اني متأكدة إن رابطة الطب تحترم القانون وإلتزمت فيه

بس لأن في شي إسمه إخونجية حدساوية بالجامعة

وطبعا مدير الجامعة وعمادة شؤون الطلبة أهما احد الخاضعين للحدساويين الإخونجية الصغار قبل الكبار

فلازم يسوون مشاكل حق اي جهة طلابية مو ماسكينها صغار الإخونجية

بس ترى عشان تكون رابطة الطب وغيرها بالصورة

لو يدافع عنكم محمد العبدالجادر والراشد والصقر والملا والغانم والمليفي وغيرهم

طالما إنكم مو متحدين وحاطين ايدكم بايد بعض مع المستقلة والوسط والهندسية

راح تشوفون ازيد يوم عن يوم

وهذا انا قلت لكم

بس شدعوه بيفيد معاكم الحجي

انا بعرف بس

رابطة الطب والوسط والمستقلة والهندسية عمركم ما سمعتوا سالفة الابو اللي يمّع عياله وعطاهم عصي صغار وكسّروهم واحد واحد

بس لما حط العصي مع بعض ما انكسروا

تهقون ليش كانوا يقولون لنا هالقصة؟؟؟

وأبي اعرف ليش الوسط والمستقلة والهندسية ما اعلنوا تضامنهم مع رابطة الطب ليما الحين

اللي اعرفه ان المنسق العام للوسط حاليا طالب بكلية الطب

يعني مستحيل ما يدرى

ولاّ الوسط والمستقلة والهندسية هم خايفين من الإخونجية

ترى الاخونجية بدوا يتلاشون وما بقى الا بالجامعة لهم ثقل

والسبّة تخاذلكم طبعا

عموما

يالله خلّص دوامي وويك إند سعيد

03/02/2009

عناوين



ما تبون تسوون له مدتيرم بعد؟؟؟


وهذا بورمية يقول شراء المديونيات تكتيك سياسي

أنا أول مرة أشوف واحد يفضح نفسه وشنو مخططاته؟؟

هذا اكيد مخلّص سبع سنين طب؟؟

انزين شلون؟؟

وهذي قناة الوطن بتفتح قناة أغاني
عسى ما يكون نبيل العوضي مقدم برامج فيها

الا صج نبيل ممكن تعطينا بعض الفتاوي في قنوات الغناوي؟؟

ودامنا بالغناوي عيل نخليكم مع القناوي


01/02/2009

محمد إبراهيم


بعد معاناة وتعب وبحث يومين

وتحمل ملاقة بعض الإيميلات

وصلت لغايتي في البحث عن معلومات عن محمد إبراهيم

بس قبل لا أبلش

الكل إستانس على ترشيح الخرافي للعدساني لرئاسة ديوان المحاسبة

و والنعم بالعدساني كشخص

لكن الريّال عمره تجاوز الثمانين

الله يعطيه طولة العمر إن شاء الله

لكن شنو وشكثر يقدر يقدم وإهوا بالهعمر؟؟

إنزين خل أدش بموضوعي

عن الكابتن محمد إبراهيم

بغض النظر عن الشبه بينه وبين صدّام حسين بالشكل

هذا مو موضوعي

وبغض النظر وين ساكن ابوه مثل ما قال لي فريج سعود

محمد إبراهيم لاعب سابق بنادي القادسية والمنتخب الوطني

من أبرز إنجازاته كلاعب اهو كأس الخليج في الكويت سنة 1990 وإهوا هدّاف البطولة

وكاس الأمير 89 ضد العربي انتهت 2-1 وإهوا صاحب أحد أهداف النهائي

وبطولة الدوري 1992 وغيرها من البطولات القدساوية

بس كل هذا مو مهم

سواء كان لاعب زين او مو زين ما يهم لأني بتكلم عنه كمدرب

خل اقول لكم الارقام لأني أحب لغة الأرقام وعمرها ما تغلط

محمد إبراهيم أول مدرب بتاريخ القادسية ييب لهم بطولة الخليج مو مرة مرتين وكاد ان ييب الثالثة لولا ايقاف النشاط الرياضي قبل جم شهر

محمد ابراهيم اول مدرب بتاريخ الكويت ييب بطولة ولي العهد والأمير والدوري بسنة وحدة مع بعض

محمد ابراهيم اول مدرب يوّصل فريق كويتي لقبل نهائي آسيا للأندية بشكلها الحالي

وغيره من انجازات على مستوى نادي القادسية

انزين على مستوى المنتخب

محمد ابراهيم اهوا المدرب اللي كسر العقدة السعودية مع الكويت وفاز عليهم بكاس الخليج 17 بقطر 2-1 وإهيا المرة الأولى اللي نفوز على السعوديين بكاس الخليج من 96 يعني على مدى 8 سنوات

واهوا المدرب اللي كسر العقدة البحرينية وفزنا عليهم بكاس الخليج الأخير بعد ثمان سنوات عجاف

محمد ابراهيم درب المنتخب الكويتي على المستوى الأولمبي والأول في 23 مباراة رسمية

فاز في 11 مباراة منهم بنسبة 47.8% يعني النص تقريبا

مع ان الفريق هاوي وماكو ملاعب وماكو اي مقومات رياضية سليمة

في حين ان فيليب سكولاري مدرب منتخب البرتغال سابقا في آخر إحصائياته مع المنتخب البرتغالي درّبهم في 18 مباراة فاز في 9 منهم بنسبة 50% يعني النص بالضبط

ومثل ما تلاحظون ان نسبة محمد ابراهيم مع سكولاري متقاربة جدا بالأرقام

مع الفوارق بالمستويات المنافسة طبعا بس هم محمد ابراهيم فريقه (منتخب الكويت) كله قيمته 750 الف دولار اهيا قيمة انتقال احمد عجب

في حين ان قيمة فريق سكولاري تفوق ال 70 مليون دولار

وللعلم ان بالارقام محمد ابراهيم اهوا افضل مدرب درّب منتخب الكويت في ال 11 سنة الأخيرة بما فيهم المدرب الألماني بيرتي فوغتس والبرازيلي كاربجياني وأثنيناتهم مدربين عالميين

وإهوا افضل مدرب بتاريخ نادي القادسية على الإطلاق وحقق مع الفريق الحالي اكثر مما حقق فريق جاسم يعقوب والدخيل

انزين قبل لا اقول شنو ابي من كل هالكلام

في ناس راح يقولون مو اهوا اللي سوا هالشي الفريق اللي يدربه جاهز ومستعد ومتجانس

وعشان نسكر هالباب

محمد ابراهيم حقق كاس الاندية الخليجية مع القادسية سنة 2000 وماكان في الفريق بذاك الوقت ولا لاعب يلعب اليوم

وهذا يبين ان مو الفريق اللي شايل محمد بل العكس صحيح

اللي ابي اوصل له من هالكلام ان محمد ابراهيم اهوا اكفأ مدرب للمنتخب حاليا وأرقامه تتكلم وخسارة من عمان ما تجدّم أو تأخر بإنجازاته

اللي يطالب الاتحاد ان يشيله هذا ما يبي مصلحة الكرة الكويتية وخصوصا حاليا

بس لحظة ليش محمد ابراهيم قرر ينسحب فجأة من تدريب المنتخب؟؟

قبل المباراة المهمة لنا مع عمان يوم 28-1-2009 بيومين طلع لن إبن الشهيد الوحيد ورئيس نادي القادسية وقال بالحرف الواحد

لن نجدد إعارة إبراهيم للمنتخب

هذا يعني اداري ورياضي مخضرم وقائد

بالله هذا تصريح وهذا وقت تصرح فيه

المنتخب عنده مباراة مهمة

وانت تقول حق اللي يحط خطط للمنتخب ان ترى ما راح تكمّل معاهم

وباقي لك مباراة وترجع؟؟

وين العقلية الفذة لدى أبناء الشهيد والحنكة

ولاّ كل هذا صار فيك بعد ما خرّبت الرياضة وإندقرت من قرار الأمير بتطبيق نظام ال 14 عضو

هذا بالله انسان همّه الرياضة الكويتية

ومسيكين محمد ابراهيم لا حول ولا قوة

ملتزم مع نادي القادسية بعقد ورئيس النادي ما يبي محمد ابراهيم يستمر مع المنتخب

مع العلم ان مباراتنا اليايه بأول ثلاثه يعني بعد شهر

يعني لو اي مدرب يي الحين يدربنا ما يمديه حتى يحط خطّة

بس لأن طويل العمر طلال قال لأ خل يولي منتخبكم

وطويل العمر الثاني أحمد الظاهر ما يقدر على اخوه

فخلّوا المنتخب يولي وبالطقاق بسمعة الكويت

ما صدقنا على الله نلاقي منتخب يرد الروح وفيه عزيمة وخطة وثبات

يات القبضة وطشّرت الأمل

شكرا بو نواف على اللي قدمته
ولا بد من كلمة شكر توجه لك في ظل هالجحود اللي اشوفه واسمع واقراه من وايد ناس تكلموا وقطّوا كل بلاوي الكرة الكويتية على راسك
عسى الله يوفقك يا ولد الكويت
اللي يبي ينتقد محمد ابراهيم بهالبوست خل يكتب لي بالمنطق والارقام
مو يقول لي سمعت ان لاعب قال عنه جذيه او بالديوانية يضحكون عليه
حطيت لكم ارقام ودوّرت وايد
احترموا البحث وحطوّا نفس الشي


ولا عزاء للكويت ورياضييها في ظل وجود الأخوان رحباني

Authoress

بالذمة شرايج بالبحث هذا والمعلومات والأرقام؟