16/02/2009

ما أهيفك


يقترح إن اي واحد يغازل بنت

ومادري هل اقتراحه يشمل البنت اللي تغازل واحد او لأ

المهم يقترح ان ينحبس المغازلجي 6 اشهر

بغض النظر

ان هالاقتراح ما راح يحل لا ازمة السكن ولا الأزمة المالية

ولا الرياضية ولا الطبية ولا التعليمية

بس خنحسبها مع الجهبذ هايف

الحين المغازلجية بالغالب مراهقين

مراهقين بالغالب بين ال 16 ليما نقول 20

ونحط خمس سنين زود بعد

ليما ال 25

يعني هذا اللي ينحبس ست اشهر واهوا بعمر ال 16 او ال 18

يبي يتوظف عقب ما يتخرج

يلاقي ان محّد يوظفه لأنه عليه جريمة مخلّة بالشرف

ومحبوس

انزين يبي فيزا بيسافر

ما يقدر لأن عليه جريمة مخلّة بالشرف

انزين يبي يتزوج

محّد يرضى فيه لأن سابقته انه مغازلجي وخريّج سجون

واذا قلنا ان الشباب الكويتي اللي تتراوح اعمارهم بين ال 16 وال 20 سنة

ماكو الا 30% منهم بس مغازلجية

و نسبة 15% من هالمغازلجية صادوهم

وحبسوهم 6 اشهر

وصاروا اصحاب سوابق واهما في مقتبل العمر

بالله ما تقول لي يا هايف

مشاكل بطالتهم وعدم قدرتهم عالزواج واللي يترتب عليها من جرايم
من يحلها حزتها؟؟

علّمنا إذا عندك سخافة أكثر من جذيه

بس هذا اهو حياتنا كلها منع مو علاج

عندنا موكب

سد الشارع

عندنا حوادث
امنع السيارات

عندنا جم واحد يرقص
الغي الحفلات

عندنا واحد يسب بالنت
سكّر النت

عندنا واحد فيه اسهال
مادري شنسوي فيه بعد

فكروا بشي لمعالجة المشكلة مو بالمنع

بس شنقول يا هايف

هالباب لايق على
هالخراب

ما اقول آخر شي إلا
ههههه
مشكور دسماوي

30 comments:

سرحان said...

شنو سبب هالإصرار الغريب عندج على تخريب مواضيعي؟

لول أتغشمر

حياج عندي و لو إنه لي فيه نظرة "شبه" مختلفة

مركبنا said...

يا حليه هايف
وايد وايد
============
الدومات بتصفر جذية

وهذا مايمنع
ان نشوف تجارب الاخرين

في الامارات و قطر هناك عقوبات تطبق على المغازلجيه

ليش ما ندرس الموضوع
عدل مو بس اقتراح عابر و لانقد بدون دراسه

اعتقد ان المغازل
موضوع الكل يتفق عليه سواء دين ولا الفاصخ انه غلط

لان الامر اخلاقي اولا واخر
والاخلاق الكل يتفق عيها

بيت القرين said...

سرحان
انت مادري شسالفتك
شكلك تنطر مسج من كويت نيوز كل يوم
وانا نفس حالتك
:p

مركبنا
الحل بالعلاج الاخلاقي مو بالحبس
ولاّ شرايك؟

محمد said...

واضح سبب هجومكم على النائب المحترم هو بسبب حكم برائته من محكمة الإستئناف .. وين راحت حوبة السيد؟

فريج سعود said...

الحل ان المجمعات وشارع الحب والخليج يتسكرون

وتعمم الكامريات على الشعب ماكو بورشات ماكو فراريات

سبمبوت said...

على قولة ميريدث و ليز في غريس اناتومي ..

Seriously ?!! Seriously !!!!!

مركبنا said...

والحرامي مشكلته مو اخلاقية بعد ليش مانعالجها بلاخلاق فقط

Arfana said...

هذا إذا ما طلع من السجن مدمن مخدرات أو بلطقي أو غيره

يعني من حلاة الريفورم؟

ma6goog said...

انا مع هايف

مَـــــعْــــمَــــعَـــــه said...

اولا : ما أهيفك مرادف ما أتعسك ونقيض ماأروعك

ثانيا : العضو المحترم يقول قمع المعاكسات ما لقى مصطلح ارقى واذرب من قمع

ثالثا : اللي فيه اسهال يمنعه العضو المحترم من اكل البرتقال أو شرب عصيره

اخيرا : صورته حلوه بس ما ادري ليش معصب ، وقضيته في الفرعيات صعبه واحتمال تسقط عضويته

moodless said...

هايف يتمنى ان يمرر هذا القانون
حبس 6 اشهر لأي معاكسة
..
لكن انا متأكد انه سيهرع للمخفر ويتوسط لأول مطيري يمسكونه يعاكس.. رغم انه اقر القانون لكنه سيكسره وفوقها حبة خشم..والولد ولدنا
..
يا راجل

danderma said...

إنزين و الشايب اللي عينه زايغة شيسوون فييه؟

على آخر عمره جريمة مخلة بالشرف؟

و شنو الحد يعني؟

خز بنية؟ قط عليها كلمة؟ لحقها بسيارته؟ رقمها؟؟؟ أم كل ما سبق؟

صج فراغة!!!

Fahad Al Askr said...

أنا أرفض تحديد سن المغازل عند سقف الخمسة وعشرين سنة

lwatan-ajmal said...

حرااااااام انتي الحين قلتي ....
((( هههههههه )))

والحين في فتوى تحرم انه البنت تقول هههههههه
:):):)
شنسوي بس ما ادري والله مطقوق يتغشمر ولا من صجه انه مع هايف :)

abu eldestor said...

اسم على مسمى

طموحة مملوحة said...

حلفوا.....؟؟؟

نوابنا فيهم عقدة نفسية ترا لوووول

عبدالرزاق القطامي said...

انا مع هايف بس موجوده القوانين المشكله بالتفعيل

bof-10 said...

هايف يا هايف .... انزين والمغازلجيه الكبار ؟؟؟


والسلف اللي قاعدين ويغتصبون الشباب الصغار ..هذولا شنو عليهم ؟؟؟


ههههههه .. والله يضحكني هايف ...

بوعمر said...

حبس 6 أشهر ولا أكثر ولا أقل ولا عقاب غير، المهم مو اهوه غلط وهو "بكامل قواه العقلية والبدنية ! " يعني لازم يتحاسب !
وبره لو واحد يأذي جلب واحد "عزكم الله" يتحاسب وانتو ما تبون اللي يغازل بنات خلق الله يتعاقب !!!

Dasmawee said...

بسم الله الرحمن الحيم
(انما انت مذكر لست عليهم بمسيطر)
الله سبحانه و تعالى يأمر سوله بتذكير الناس و ارشادهم لا أن يسيطر عليهم و يمنعهم
بس الظاهر صاحبنا عنده صلاحيات اكبر من الرسول
ابتلشنا بهالاشكال و الله

Cute But Imperfect said...

ممم اهو هايف صح و غلط!
يعني المفروض اكو عقوبه حق المغازلجي! لكنه نط و اقترح بدون دراسات او كلام خبراء -احم احم- مو شي!

بس انا اقترح بعد ان اهل المغازلجي لما يكون اقل من 20 سنه يتخالفون بعد :D

ZooZ "3grbgr" said...

انا حاشني سد الحنك من الصورة

بوحمد said...

لا حرام مايصير نعاقبهم .. بعدين مايقدرون يسافرون ولا يتزوجون ... يمكن بعد مايقدر يغازل مرة ثانية ..
خلوهم على راحتهم ..يبوقون يغتصبون ليش نسجنهم حرام ..
تبون نرضى يتعاقبون !!!
خل يقدم اقتراح واحد غير هايف
الله يصير الاقتراح عسل على قلبي وكل المو حلو فيه يصير حلو
اقتراحاتك مرفوضة مرفوضة يا هايف قبل لا تقولها .. وبعدين يا هايف ليش ماتقدم اقتراح لحل المشكلة التعليمية علشان نرفضه .. وتقدم اقتراح لحل المشكلة الإقتصادية علشان نرفضه ونظحك ونستهزء فيك
نورية الصبيح مو مسؤولة عن المشكلة التعليمية لأنها صاحبتنا ... أنت يا هايف المسؤول عنها لأننا نكرهك
مانبي من وراك حلول يا هايف .. يا أخي شكلك مو عاجبني .. نبي واحد حلو يحل مشاكلنا.. يا أخي احنا مانبلعك ..يعني شنسوي يا هايف هذي عقولنا .

نـاقـوس said...

هههههههههه ما اهيّفك يا هايف

يامعود احس هايف طماشة المجلس
النواب يخططون لبعيييد سواء بوقه او تطوير وما الى آخره

والاخ يفكرلي بالدفاع عن الصحابة و الجنوس و المغازلجيه

5ayrhaa said...

استغفر الله
لا اتقولين ههههههه
الناس صايمين

Anonymous said...

شيلى صورته الله يرضى عليج , كل ماافتح مدونتج هالأيام تحوشنى حكة :/

al-nokhitha said...

shda3wa sejin 6 eshhor 5al
e3dmoona ba3ad a7san ! youba fe
6oroq thanya o 3elaj etha mafad el 3elaj mara o maritain el thaltha theech el sa3a sejna lakin men awal mara wala 7aram :)

Maximilian said...

ماكو احد نفسي يختلف مع محمد هايف في كل شي طرحه قبل وبعد ما دخل المجلس،، مع ذلك..هذا ما يعني ان كل شي يقوله لازم ارده بالمطلق ومثل ماقال الامام علي عليه السلام
انظر الی ما قال ولا تنظر الی من قال

انا اتفق مع هايف بالمبدأ،من أمن العقوبة اساء الأدب، المعاكسة وباء لا بد من انهائه ومحاربته، للحين اتذكر اخت واحد من الشباب اللي توفت وايهي بريعان شبابها نتيجة حادث سيارة.. والسبب؟ شاب هتلي كان يطاردها بالسيارة من مكان لي مكان،بالله هذا واشكاله( هذي مالت الامير سلطان) وين ينفع معاهم الحل الاخلاقي؟ الحل الأخلاقي مو مضمون يا دانة ولاهو كافي، تطبيق مبدأ العقاب في الامور لازم، وتغليظ العقوبات على المعاكسات ماهي تقييد للحريات بل ضمان لها، حرية المراة في انها تمشي بشوارع بلدها.. دون ان يتعرض لها لها المتردية والنطيحة ، حريتها في ان تمشي دون أن يضايقها الهتلية..وضمان لحقها في ان تسير مطمئنة دون تكون هناأعين تصول وتجول معها وتلاحقها وترفض ان يكن لها كيان مستقل، اما اللي خايف على سمعته من العقوبات انا اقول محد طقه على ايده وقاله قوم تحرش ببنات العالم،

واسف على الاطالة

Maximilian said...

مثل ما قلت اتفق بالمبدأ، اي في وجود عقوبة، بس اعترف ان المشكلة في معايير التطبيق وهذا مو اختصاصي

مستفسط said...

هكذا يصبح المرء هايف