29/06/2009

مالت عليهم

عاجل جدا جدا جدا
اللي يقدر يطلع لي كلمة خليفة ولد وزير النفط الأسبق علي الخليفة ببرنامج تو الليل البارح
حلقة الاستجواب
أكون ممنونه له
خنشوف شسالفة خليف

مو هني سالفتي طبعا

طلع حكم على مجرمين الناقلات أخيرا واهما عبدالفتاح البدر وحسن قبازرد ونسيم محسن وتيموثي

كل واحد طلع له بخوش سنين يقضيهم ورا القضبان اذا انصاد

بس مو هني موضوعي

ابي اكبر جريمة سرقة بتاريخ الكويت
والوطن عندها صفحة امن ومحاكم ليش ما نشرتها؟؟

ترى علي الخليفة بريء عادي نشروها
:)

انزين

الاستجواب الأخير قسم الناس لي رايين وهذا شي طبيعي وعادي بكل موضوع

الطرفين اللي عندنا الحين طرف مؤيد لطرح الثقة ويقول هذي خمس ملايين يا ناس وموضوع غير قابل للنقاش

بغض النظر منو اللي مقدم الاستجواب
وبغض النظر منو اللي واقف معاه والهدف من وراه

أما الفريق الثاني فمنقسم لأقسام

طرف رافض طرح الثقة لان نوايا المستجوب وطارحي الثقة موشي ولأنه معظمهم خريجين فرعيات
وطرف رافض طرح الثقة لأن الحكومة ما تغلط ابد
وطرف رافض طرح الثقة لأن الاستجواب قام على اساس غير دستوري في المحور الأول سبب المشكلة تحديدا

الآراء كلها تقريبا حصرتها باللي انذكر اعلاه

طيب انا ماني محدده مع اي طرف اوقف

بس بقول شي للطرف الأول اللي اظنه تطرّف وايد بطرحه

بقتبس احد ردود العزيز جدا نيو وادري ان اهوا من الناس اللي يفهم ان الاختلاف مو خلاف

شوفوا هالرد من عزيزنا
نيو

اذا نواب التحالف و التحالف نفسه كتيار صوتوا مع الوزير مالت على النواب و التحالف فوقهم

طبعا كثيرين من مؤيدي طرح الثقة من المدونين خصوصا والرأي العام بشكل أكبر يتبون هذا التطرف اللي اشوفه من عزيزنا نيو

يمكن اقل حدّه عند البعض وأكثر عند البعض الآخر

اللي أبي اقوله إن بإستثناء بعض البصامين واصحاب المصالح من الطرفين ففريق طرح الثقة وفريق منح الثقة فيهم ناس فعلا اصحاب رأي يا جماعة

يعني ما يصير نكفّر صالح والعنجري واسيل مثلا لأنهم فقط يشوفون موضوع الخمس ملايين من زاوية ثانية حتى لو اختلفنا معاها

محد منهم قال إن الخمس ملايين مافيها شي
وهذا شي كلنا نجمع عليه
من دون إستثناء

لكن هدوّا اللعب شوي والحوار الحوار الحوار مو أكثر

خلنسمع خل نتحاور خل ننظم لقاء مفتوح حتى بهاليومين شالمشكلة؟؟

بس مو كل واحد ينبذ الثاني وبعدين نقول ديمقراطية وتعدد اراء

المسألة ماهي مسألة فساد وإصلاح ولا كل الفاسدين متعسكرين بمعسكر والصالحين بمعسكر ثاني

كل معسكر بالقضية فيه الزين والشين

على سبيل المثال بس المجرم خالد الطاحوس والمجرم سالم النملان والمجرم الصيفي الصيفي وأحمد السعدون بتيار واحد واللي اهوا طرح الثقة بهالقضية

بالمقابل هم في مجرمين فرعيات وخلف دميثير بالاضافة الى معصومة وعلي الراشد وعادل الصرعاوي حسب ما وصلني بتيار واحد اللي اهوا مع منح الثقة

هدوا بالكم شوي

ولا تكفرون أحد أرجوكم
للعلم فإن ملاّك شركة مايكروسولوشينز أصحاب العقد ال 5 مليوني اهما
أحمد حامد الغانم - حمد ناصر العلي الصباح - حازم خالد سليمان الجارالله - سعد محمد الحميدي


وأخيرا أحلام غنّت أغنية حلوة
:)

25/06/2009

صراع و إستجواب تاريخي

خبر: هذا المشجع المصري اسمه علي السباعي توفى الله يرحمه

المهم

أول شي بعد البحث عن اريل ومتابعة الإستجواب ومرافعة البراك ومن ثم مرافعة الخالد وتلاها تعقيب البراك وبعده تعقيب الخالد

وفتح باب التأييد والمعارضة وكلمة الدقباسي المؤيد للاستجواب والراشد المعارض وبورمية المؤيد وسلوى المعارضة والسعدون المؤيد والزلزلة المعارض

وصلنا للتالي

ان هذا الإستجواب تاريخي وقد يكون الوحيد من نوعه بتاريخ المجالس الكويت

لأني بإختصار أول مرة أشوف استجواب محد يعرف يتكلم فيه

شنو هذا

واحد يشلخ، كاميرا تسمع مكاتب النواب

والثاني ما يعرف يقرا

والثالث يتكلم عن البدون والاستجواب مافيه شي عن البدون

والرابع داس ببطن الدستور قالها لمدة ربع ساعه

والخامسه تقول ليش النساء ما يشاركون بالفرعية

حتى ال
powerpoint
يضحك

لو مسوينه على بروجكتر وسلايدات شفافه شغل قبل يطلع احلى

يؤسفني اني اقول ان احسن واحد بالجلسة كان جاسم الخرافي

اللي تحسن اداءه صج عن المرات اللي طافت

طبعا بالاضافة لمحمد المطير
:)

انزين هذا بالنسبة لتاريخية الاستجواب

لكني حاليا وبأمانة أقولكم ياها بصراع مع النفس

الإستجواب كله كلام فاضي بإستثناء مبالغ الإعلانات المخيفة

وردود الخالد السخيفة وطبعا اللي حطوه موقع الأمة عن الإعلانات بعد

وهذا اللي يخلي عقلي يرفض بقاء وزير بهالتخبط المالي ماني قايله بايق لأن عندي قناعة شخصية انه مو بايق والسبب قدرته السهلة على البوق قبل دخوله الوزارة ولكنه ما باق

هذا الطرف الأول من أطراف الصراع اللي اعيشه

اما الطرف الثاني فهو موقعي طلب طرح الثقة

شوفوهم

فلاح الصواغ - سالم النملان - غانم الميع - الصيفي الصيفي - مبارك الوعلان - خالد الطاحوس - حسين مزيد

هذولي سبعه من موقعي طلب طرح الثقة

او بإختصار سبع مجرمين كسروا القانون وشاركوا بإنتخابات فرعية محاربة ومرفوضة قانونيا
والجهة المخولة بمحاربتها وزارة الداخلية

نكمل الاسامي

ضيف الله بورمية

تم اعتقاله من قبل الداخلية على ذمة قضية امن دولة

باقي السعدونين
سعدون حماد واحمد السعدون، آآآآخ يا زمن

عموما سعدون حماد الأصيل يدار من واحد يطمح بوزارة الداخلية بل يقال ان اشترطها لقبول الوزارة في البداية

يعني بالضبط مثل الشطرنج لما احط الحصان وعلى بعد اربع خطوات منه على اليسار الوزير العدو والملك العدو نفس الشي على اليمين
اذا العدو حرك وزيره راح الملك
واذا ما حرك الوزير كليته

وهذا اللي حاصل مع بوفهد وتابعه سعدون
يقدر يهدد الوزير فيه
ويقدر يطمن ناصر المحمد هم فيه
يعني سعدون حاله حال الحصان بالشطرنج

اللي ابي اوصل له ان 8 من مقدمين الطلب متضررين مباشرة من سعي الوزير لتطبيق القانون

بالاضافة لموضوع مراكز الهجانة والتنفيع اللي فيه
وايقافه من قبل هالوزير

وهذا معناته ان طلبهم بطرح الثقة هو لأنهم ما يبون أحد يضيق عليهم في كسر القوانين

ورحيل الوزير راح يكون بمثابة انذار لأي وزير قادم إنه يا تطيع يا تضيع وغياني وإياك تحترم شي اسمه قانون

هذا صراعي الخاص

تخبط مالي وهدر بالأموال من جانب

وكسر القوانين وسيادة الجرائم من جانب

إنتوا شرايكم؟؟

والله ياخوفي

22/06/2009

أخبار

تحديث
:::::::::::

تابعوا اخبار الجلسة اول بأول عند
الأمة

بس في نقطة ذكرها البراك عجبتني

النائب البراك ينتهي من المحور الثاني ويبدء في المحور الثالث (كاميرا ساحة الإرادة): الكاميرا ركبت بتاريخ 16 أبريل لأن كان هناك اعتقاد أنه سوف يحدث شيء، وهي مرتبطة بأمن الدولة
وتملك القدرة على أن تنقل بالصوت ما يدور في مكاتب النواب

أقوى من النفيسي بحامي الديار يا بوحمود
::::::::::::
هذا واحد يهدد ويقول
يعني شنو كنتوا بتروحون تطقون القلاف؟؟

اي وعلى طاري القلاف شنو يعني كل يوم طالع لنا بقناة وطايحله سب بالاوادم هذا حمار وهذا كلب وهذا مادري شنو الحمدلله والشكر

يا يصيرون نفسك يا ميصير

بس اسكت ترى الوعلان ييب اهله ويطقك

انتوا نوّاب بالله؟؟


وهذي أم عادل تشكي من الشيخ رشا الصباح

صار لها 18 سنة ماسكه التعليم العالي ومساهمه بجم بقالة شهادات

يوسف الابراهيم - مساعد الهارون - أحمد الربعي - عبدالمحسن المدعج ونورية الصبيح والدور على موضي كلهم وزرا تربية قعدوا وراحوا والشيخ رشا ليما الحين

يعني بالرياضة وبالتربية اللي اساس عملهم الشباب ماسكينهم شيوخ غير اكفاء ومرجعينا سنين ورا



وهذي اللجنة التشريعية ترفض رفع الحصانة ولا راح توافق على اي رفع حصانة بعد ما يصير نائب يرفع حصانه عن نائب شكلها بايخ

للعلم اعضاء اللجنة التشريعية

المستشار ووزير العدل السابق حسين الحريتي خوش تسهيل لامور العدالة يا وزير العدل السابق

معصومة المبارك دكتورة العلوم السياسية واول وزيرة واول نائبة واكثر النواب مطالبة بتطبيق القانون

خالد الطاحوس فايز بفرعية ما عليه شرهه

سالم النملان هم بفرعية

فيصل الدويسان كيف لك يا سيدي الكريم ان لا ترفع الحصانة وتجعل عجلة العدل تسير وفق المنظومة الصحيحة، على ما يبدو أنك لا تصلح الا ل بعيد الفاصل

محمد هايف المطيري هم فايز بفرعية شهاللجنة القانونية اللي نصها مخالفين القانون

ووليد الطبطبائي هل يجوز شرعا تعطيل سير العدالة سيدنا؟

ما أقول إلا

إمشي ورا كدبهم

19/06/2009

كل عام وإنتي بخير حبيبتي

اليوم 19-6-2009 واهيا الذكرى الـ 48 لإستقلال الكويت

كل عام وإنتي بخير حبيبتي

16/06/2009

سكتوا ترى عمه الأمير وولي العهد ومشعل الأحمد


هوشة يديدة اليوم بين سعدون حماد والصرعاوي

الصرعاوي ينتقد احمد الفهد ويقول وجوده طعن بالدستور

احمد الفهد يرد

لا لا مو احمد الفهد يرد

سعدون حماد يرد يقول

ترى احمد الفهد عمه الأمير وولي العهد ومشعل الأحمد ولازم يعرف الصرعاوي الفرق بينه وبين الفهد

يرد الصرعاوي انا اعرف منو الصرعاوي مثل ما الشعب يعرف منو سعدون حماد

يرد عليه سعدون حماد عبيد مزعل بداح ويقول ان الصرعاوي بيسري ولد بيسري؟؟؟؟

خوش منطق

ودامنا بموضوع أحمد الفهد اللي حلف قبل جم يوم ان يؤدي أعماله بالأمانة والصدق

داز كتاب حق الفيفا يوم 11-6 يعني قبل 5 أيام يقول فيه

ان مثل ما انتوا عارفين ترى إحنا يالكويتيين إنتخبنا إتحاد يوم 16-4 اللي طاف

وهذي ترجمة الكتاب

مع العلم إن محد إنتخب وكل ما حصل تزوير بتزوير

وعشان لا يقولون نتبلى

هذا كتاب من أحد أتباع بوفهد يقول ان اجتماع 16-4 كان تشاوري مو رسمي



والتشاوري طبعا ما يصير فيه انتخابات

يعني بوفهد مزور

كنا نقول قبل لا يمكن ربعه اللي مزورين عشان يكبرون بعينه

ويمكن اهوا بس سكت عنهم

طلع لا رسميا كبيرهم وعلمهم التزوير

ويؤدي أعماله بالأمانة والصدق

يعني لا مراعي لا ربه ولا ارضه ولا حتى عمامه اللي يقول عنهم سعدون حماد عبيد مزعل بداح

لهذا السبب هالناس مو لازم تكون بالوزارة يا بوصباح

ويا ليتك أحسنت الإختيار


بس لا تأسفن
على غدر الزمان

14/06/2009

لهذا السبب

محكمة الجنايات تغرم قناة الوطن 20 ألف دينار لإساءتها للذات الإلهية في برنامج بوقتادة وبونبيل الرمضاني

ها يا نبيل العوضي

يا شيخ الدين يا مسلم يا مؤمن

ياللي تطلع لنا بدعايتك كل يوم عن عبدة الشيطان واهانة الله

ويعبدون بببببقرة

أكيد بتكمل وياهم وتذم المحكمة

بس هذا شي طارئ على موضوعي

دولة دينية وثورة إسلامية على قولتهم

وديمقراطية واذا فاز اللي ما يبونه

شالوه مثل خاتمي

والثاني موسوي توه خسر ويشك بالنتيجة يحطونه بإقامة جبرية؟؟؟

عطوني دولة تتبنى النظام الإسلامي حاليا وماشية صح؟؟

وطبعا العيب مو بالدين

لكن بالاستفراد بالسلطة باسم الدين

وإستغلال الدين أبشع استغلال

هذي ايران

رئيس جمهورية والف تقسيمة ومنصب

وبالنهاية كل شي بيد شخص واحد

يعني اذكر بسنة من السنين الخامنئي

اللي يسمونه ولي امر المسلمين عندهم

مادري ليش

صار عندهم انتخابات برلمانية او شي جذيه

الحبيب منع كل اللي اسمهم تيار اصلاحي من الترشيح

والحجة انهم ما يطابقون الشروط

وطبعا الشروط اهوا اللي يحطها

الحين نجاد فاز على قولتهم

مع اني اشك في ذلك حسب اللي كنت اتابعه بالاعلام

لكن لأن نجاد تبع ولي امر المسلمين ففاز غصب

بس السؤال المهم الحين نجاد يايب 65 % مثل ما يقولون ومع هذا ما شفنا الا مظاهرات اعتراضية على النتايج

وما شفنا مظاهرات الفرح مالت نجاد؟؟
ذكروني بالفريق الازرق ايام نبيها خمس

اللي ابي اوصل له

ان من كل أمثلة الدول الدينية المعاصرة

ما شفت دولة صاحية او غير قمعية

وايران اقرب دليل بحكم انها بلد المذهب الواحد الطاغي

يعني ما عندهم خلافات مذهبية ومع هذا قمع ودكتاتورية هبله

لذلك الحل شنو يا بدران وحمودي؟؟

ومذهله


10/06/2009

قبل الإستجواب

أول شي لجنة الظواهر السلبية لجنة مرفوضة مرفوضة مرفوضة

سواء دشها صالح او رولا او طلع منها هايف ووليد

ولو إن الموقف مضحك وخوش صفعة لتيار الإسلام السياسي

بس اللجنة مرفوضة لانه تفتت أدوار اللجان الأخرى الموجودة

ولأن مالها إختصاص محدد

بس الغريب بالموضوع

إن الحكومة ما كانت مكتملة

وبما ان الحكومة وإهيا مو مكتملة والمجلس لهم القدرة على ان يطلعون رولا دشتي المعارضة للجنة بالمركز الأول

يعني لو بغوا يقدرون ينسفون اللجنة من عرجها

اه لوما الخوف جان ديرتنا وااايد بخير

ورجاء حار من الحكومة انها تصلح من علاقاتها مع خلف دميثير ترى دميثير اسم تعرفه الحكومة وتثق به

نروح حق استجواب التكتل الشعبي ممثلا بمسلم البراك وحيدا

أنا قريت محاوره المنشورة بالصحف

وبغض النظر عن أسباب مسلم وهل فعلا استجواب يسوى او ما يسوى

انا بقول رايي قبل سماع جلسة الإستجواب

مع العلم ان ممكن يتغير بعد سماع المستجوب والمستجوب عاد حطوا فتحه وكسره بكيفكم

المحور الأول من استجواب البراك للخالد يتكلم عن

التفريط باموال الدولة وعدم إتباع الإجراءات القانوينة

وطبعا إهوا يتكلم عن لافتات الإنتخابات اللي توزعت على المناطق في 2008 مو 2009 لا 2008

العقد اللي فيه مشكلة ومشّكل محور من محاور الإستجواب تم توقيعه ب 24-4-2008

تعليقي: بغض النظر عن إن الوزير غير مسؤول عن الأفعال السابقة، لكن يا بوحمود يا عزيزي حضرتك تتكلم عن عقد تم توقيعه قبل سنة وشهر؟
على الرغم من إنك كنت عضو في المجلس السابق ووزير الداخلية أيضا كان عضو في الحكومة السابقة، أعتقد إن عدم توجيهك لإستجواب من ذاك الوقت إلى اليوم يخلينا نتساءل هل كنت راح تتكلم عن هالموضوع لو مو مستفزك وزير الداخلية بإنتخابات 2009؟

المحور الثاني: عنوانه الإساءة للعملية الإنتخابية والتأثير بارادة الناخبين

وطبعا متركز على المهزلة اللي كان يسويها المرشح الجويهل في إدارة الإنتخابات يوم كان يوزع فلوس عشان الناس تنزل بالثالثة

تعليقي: اتفق معاك إن ما حدث مهزلة خصوصا إنه حدث داخل إدارة الإنتخابات، لكن إستوقفني كلامك عن التأثير بإرادة الناخبين
أعتقد إن كان من باب أولى إن حضرتك يا بوحمود تتكلم عن الفرعيات اللي ماهي تأثير بإرادة الناخبين وبس لا هي تزوير واضح لهذي الإرادة
وللأسف للأسف للأسف إن أحد اعضاء التكتل الشعبي حاليا إهوا خالد الطاحوس خريج فرعية العجمان بالخامسة؟؟؟
هذا الموضوع اللي يستحق الإستجواب فعلا، لأن زيف الإختيار وقلص فرص ناس ممكن تكون لها فرصة لولا الفرعيات

المحور الثالث: كاميرا ساحة الإرادة
أنا قلت رايي بموضوع الكاميرا سابقا
وأكرره ألحين إن الكاميرا ما تستحق كل هالضجة بحكم إن سيارة الداخلية كانت متواجدة بساحة الإرادة مع كل حدث من سنة 2006 ليما اليوم وإنت شاركت بأكثر من حدث هناك وشفت السيارة وتم إستبدالها بكاميرا
والكاميرات موجودة باكثر من مكان عام ومو مقتصرة على ساحة الإرادة، فإذا كانت كاميرا الإرادة غلط عيل غيرها أكيد غلط
وإذا كان التواجد الأمني شي طبيعي
إذا هالمحور ماله داعي

عموما هذا راي مسبق قابل للتغيير بعد سماع جلسة الإستجواب إن حدثت

وأتمنى إن ما يكون إستجوابك هذا يا بوحمود إهوا لمجرد عدم رغبتك بالصوم 3 أيام
:)

ويا قصص

07/06/2009

وضعهم مزري.. بس من يسمع؟؟


هالثلاثي البشوش وكتلتهم

بلشوا تحركاتهم بطلب رفع مكافأة الطلبة 100 دينار زيادة

طبعا اللي يقرى الخبر دون ما يعرف خلفياته ممكن يقول

مو شي يديد نموذج من نماذج الهدر اللي يتحفنا فيها المجلس دايما

وأنا أقول صحيح

بس هالهدر هالمرة حق ناس (طلبة الجامعة والتطبيقي) معظمهم مالهم أصوات إنتخابية يعني بالنسبة للتطبيقي ممكن الطالب يدش ويتخرج وبعده ما كمل السن القانوني

أما الجامعة فالطالب ما يكمل السن القانوني الا بعد سنة ثالثة

عيل ليش هالهدر يا ترى؟؟

الثلاثي البشوش خنقسمهم

جمعان الحربش عضو حدس الوحيد

وهذا اكبر مؤشر خطر على ان كيان حدس مهزوز جدا والدليل وجود عضو واحد فقط

والخوف بالنسبة له كل الخوف ان مكينة التفريخ "الإئتلافية" تتزعزع مكانتها داخل الجامعة

وذيك الساعة حتى كرسي اخضر واحد ما يحوش الحدسيين

فماكو الا اقتراح مثل هذا ويصاحبه شوية بوسترات ائتلافية بالجامعة يكسبون منها شوية اصوات

انزين نروح حق فيصل المسلم

كبير المعاونين عنده اهوا احد اعضاء المكتب التنفيذي باتحاد الطلبة من 500 سنة

وطبعا المكتب التنفيذي بقيادة الائتلافية وبالتالي هاجس جمعان يؤرقه اهوا بعد

اما د. وليد فالعلم عند الله بس يمكن يمكن واقف وياهم وبس

طيب شنو ممكن نستنتج من هالاقتراح اللي يعتبر من اول اقتراحات هالكتلة اللي توها متكونة؟

وليش تقديم اقتراح مثل هذا قبل ثاني جلسات المجلس اليديد

وقبل 3 شهور من انتخابات الجامعة

السبب المنطقي الوحيد بناء على هوية مقدمي الاقتراح

إن في قلق عندهم من نتايج صغار الاخوان بعد 3 شهور من اليوم

على الرغم من الفرق الكبير بالاصوات بين الائتلافية واصحاب المركز الثاني السنة اللي طافت

وضعهم جدا مهزوز خارجيا وحتى داخليا بحكم كمية الانشقاقات اللي حصلت داخل الائتلافية بالاشهر الأخيرة

انا بس حبيت ابين هالشي

وادري ماكو اذن تسمع كالعادة

داخل الجامعة

آخر شي عن خاطري

الكاتب المليق اليوم كاتب مقال يقول ان واحد بينتقد الوشيحي داز حق المليق رسالة

سبحان الله انا دايما لما ابي انتقد عبداللطيف الدعيج ادز حق سعد العجمي
:)

وشلون خيره بعد فرقاه

05/06/2009

شوية ركادة

ثلاث مواضيع

أولهم

تلفوني ما سكت البارح من المسجات اللي تقول تابعوا تلفزيون الوطن

والتالي شنو

واحد شايل ويهه بليزر ومطول شعره توافقا مع سياسة القناة والجريدة مقابل وحده اتوقع انها مو صاحية

ويسئلها بشنو حلمتي؟؟؟

شنو القضية يعني خل أفهم؟
ليش كل هالمسجات عشان أشوف وحده تسولف عن حلومها؟؟

الشرهة مو على بو ليزر

الشرهة على اللي ينشرون هالبرامج ويحثون الناس على ان يشوفونها؟؟

والله يشافي البنيه بس

ثاني المواضيع

كاميرا ساحة الارادة اللي يمكن تصير استجواب؟؟

كل من شارك بفعالية من فعاليات ساحة الارادة من نبيها خمسة ليما اليوم يدري وشايف سيارة النقل والتسجيل مالت الداخلية سافطة عند مجلس الامة تنقل الاحداث

وهذا شي كان جدا طبيعي حتى للنواب اللي تواجدوا بساحة الارادة من قبل

اذا تسجيل الداخلية للاحداث مو شي وليد الكاميرا هذي؟

اذا كان في رفض على تسجيل الأحداث مو مفروض يكون مع وجود الكاميرا

مفروض يكون من اول ما تشوفون سيارة النقل مالت الداخلية

وعلى فكرة ترى كاميرات المراقبة التابعة للداخلية مو موجوده بس بساحة الارادة

موجودة على طول خط البحر

مو كاميرات السرعة لا كاميرات المراقبة

فإما الرفض الكامل للمراقبة او عدم الرفض

هذا رايي المتواضع

آخر المواضيع

العراق والكويت

خل نقول مجموعة حقائق

الكويت لها حق بالتعويضات المادية على خسائرها بالغزو اللي ما تعوضها المادة فقط

هذا حق وما ينزعل منه

العراق ما يقدر يعتدي على الكويت لا حاليا ولا بعد سنوات حتى لو بغى هالشي

بحكم وجود اتفاقية امنية كويتية امريكية فرنسية بريطانية قاعدين ندفع لهم الملايين

كل ديرة فيها أشخاص مطافيق وهذا لاهو شي يديد لا بالعراق ولا بالكويت يهذون بكلام أهبل

المطلوب شوية ركادة بالتصريحات

عشان لا نزيد الوضع سوء

خلونا نقعد نفكر شلون نطلع بتعويضات ذكية للكويت والعراق
وعلى ما أذكر صالح الملا كان عنده حل ذكي للتعويضات بس ما أذكر شنو اهوا اللي يعرف صالح او يعرف حله البديل خل يقوله

خل يكون في مفاوضات بوجود دولي يحل المشكلة

مو على طول نقول مستعدين للحرب؟؟؟

وين قاعدين ؟؟

تهدى الأمور بأهل الرأي ما صلحت فإن تولت فبالأشرار تنقاد

02/06/2009

عالي مستواه


مبروك يديدة للأصفر

ولا عزاء لمطقوق وربعه

:p

01/06/2009

آخ لو مكلمها ونازل

الراشد وجه سؤال عن مزدوجي الجنسية

يه الوعلان يعني بيرد الصاع صاعين جان يسأل عن مزدوجي الجنسية باستثناء السعودية

ترى مو نكته صج

ماني مكثره كلام عندي بطل أحتفي فيه

ينقال له صالح الملا


بطل يا صالح وترفع الراس

آخ لو مكملها ونازل بس عشان بابا جاسم ما ياخذها تزكية بس الحلو ما يكمل

وإنت قمرهم كلهم