28/04/2009

مواضيع الحل - ردّوا خطاب الخطيب

اليوم الثلاثاء الندوة الافتتاحية لعلي الراشد بمقره بالقادسية

وأيضا الندوة الإفتتاحية للإستاذ ماضي الخميس بمقره بجنوب السرة المطل على شار ع دمشق

وباجر الأربعاء الندوة الافتتاحية للدكتوره أسيل العوضي بمقرها بالسره

وأيضا عبدالرحمن العنجري بالنزهة

خلصنا اعلانات

ويسامحوني جماعة السعدون ما اعلنت عن ندوته لأني ما كتبت موضوع امس

بس كلامي اليوم عن خطاب أحمد الخطيب بندوة السعدون

الخطيب: التيار الإسلامي يتاجر بالدين

وحتى والوطن يحاولون اثارة الكلام

الخطيب للإسلاميين : استحوا على وجوهكم

الا ان هذا اهوا الخطاب

وهذي الجهة اللي يجب ان نتصدى لها

بالفعل التيار المتأسلم اهما سبب البلا بالديرة

تحالفوا مع الحكومة على مدى ثلاثين سنة

رجعوا الكويت لي ورا 200 سنة

هذي حربنا يا ناس

ماهي مصفاة تمشي او لأ

ولاهي استقرار مالي

مو محاربة الإسلام طبعا

لكن متى ما رضينا بنفوذ تيار رجعي متخلف احمق

وبدينا نترك محاربته ونتوجه حق الامور الاقل اهمية واللي ما تنتزع الموضوع من جذوره

ما راح نفلح

هذي اهم رسالة

مو تصوتون حق فيصل المسلم مع صالح الملا

ولا محمد المطير مع علي الراشد

ولا عدنان مع الرومي

التيار الديني سبب التخلف بالكويت منذ ان تزوجته الحكومة

خنحاربهم ونخلص منهم

بعدين نجابل غيرهم ونبني صح

هذا اهوا الاهم

وليعود زمن الطرح القوي الفكري الثابت مو التلون والتغير بحجة الجمهور عاوز كذه

وتلك لورا

23/04/2009

حرام على علي حلال على الباجي؟

بداية صدر حكم استئناف لصالح جمال العمر ان ما يشتري أصوات

وأنا أشكر جمال العمر

إن وصل لنا رسالة مهمة مفادها

ان مو كل بريء... بريء

الا على الطاري الحين مو علي الخليفة طلع براءة؟

انزين ليش الوطن ليما الحين ما تتكلم ان اكو ناقلات انباقت؟

ترى عادي براءة كتبوا
:)


علي الراشد مع مجموعة من النواب السابقين

راحوا واستقبلوا سيد حسين القلاف بالمطار بعد رحلة علاج طويلة

ووايد ناس اعتبروا ان اغرب ما في الصورة اللي فوق وجود علي الراشد

مع ان اغرب شي اشوفه بالصورة ان لاري موجود بدون
ولي أمره
:p

المهم

شنو كان احتجاج الناس على وجود علي الراشد باستقبال القلاف

الاحتجاج كان ان شلون بو فيصل يروح يستقبل واحد كان يطالب بتعليق الدستور من جم شهر؟؟

واللي يطالب بتعليق الدستور يتعدى على قانون البلد فما يصير نروح له ونستقبله بالمطار

وعشان نبتدي صح

القلاف ماله حق يطالب بتعليق الدستور وغلطان من عمامته لأخمص القدم خصوصا ان السيد نفسه اقسم على احترامه

بس تعالوا يبا

الراشد ما انتهك القانون ولا أيد القلاف بكلامه ولا مرة على موضوع تعليق الدستور

شنو المشكلة عيل

مشكلتنا صارت التعامل مع المتعدين او غير المحترمين للدستور؟؟

التكتل الشعبي واللي اهوا بطل بعيون وايد ناس وضمير الأمة وصوت الشعب وابطال القانون

عضوهم بالتكتل مرزوق الحبيني شارك بفرعية العوازم بالخامسة بدون لا ينطقون ببنت شفه لا احمد السعدون أسد القانون ولا مسلم البراك !!؟؟

حدس ملوك الألوان شاركوا بالفرعية وجمعان الحربش يقول عادي تتغير اساليبنا بإختلاف المناطق والدوائر؟

والسلف كذلك؟؟

مو بس هذي

كان في اجتماع لعايلة الصباح وكان فيها مطالبة من البعض بالحل الغير دستوري يعني تعليق الدستور والانقلاب عليه مثل ما طالب القلاف

وتسربت بعض الاسماء مثل جابر المبارك واحمد العبدالله وعلي الخليفة وغيرهم

احمد العبدالله نفى الخبر اللي بخصوصه

وجابر المبارك كذلك


اما علي الخليفة فما قال ولا كلمة للدفاع عن نفسه مع ان عنده جريدة وقناة

وهذا يعتبر اقرار ضمني باللي حصل منه ومن غيره من عيال الصباح اللي ما نفوا الخبر

معناته ان هم علي الخليفة من المطالبين بالانقلاب على الدستور

وكاهو التحالف يتعامل مع الوطن تلفزيونا وجريدة ونفس الشي المنبر من خلال النيباري

ونفس الشي هم شباب العمل الوطني

كاهم الوسط والوحدة مالت امريكا مرتمين باحضان الوطن

ونفس الشي المستقلة

لي متى بننافق انفسنا

شالنظام بالضبط يعني خل افهم؟؟

شنو اللي سواه علي الراشد وما سووه كل الكتل والمجاميع السياسية؟؟

اذا كان تصرف علي تهمة فكل التيارات والكتل متهمين

واذا كان ما فيه شي ليش مسلطين السنتكم عليه!؟

على فكرة انا من اللي انتقدوا علي الراشد

وما زلت انتقده على موضوع غير منطقي مثل القرض العادل على قولتهم

لكن ما انتقد ممارسة اجتماعية سوّاها ان راح واستقبل زميل مريض

آخر شي رسالة من الإستاذ الشاعر نايف الأزيمع وصلتني وأنشرها مثل ما إهي تقديرا له

توقفت طوعا عن الكتابة منذ فترة .. حسبتها تكاد تكون نهائية .. فما بقى بالعمر اكثر مما مضى ..! لكن الشعر المتدفق يرفض الإستكانة , والقصائد المتمردة لا تعترف بالتقاعد ..!وهذه سداسية متمردة رافضة... الى محمد الصقر


تاريخ يختصر الزمن فيك واشهد
في دفتر اهلك كل صفحه تجدًد
إن كان عمك*عاف من كثر ما شاف
عمك ** غدا لكويتنا ستر ولحاف
وابوك رمز الحق والعلم ينضاف
لحب الوطن معنى وصوره ومسند


الفارس اللي عن حصان ترجًل
عنده خيول مسرجه قول مع فعل
أعطى ويعطي للوطن دون منًه
صوت لشعبه والصحف يعرفنَه
حب الوطن يا ناس فرض وسنَه
قولة هله وآمن بها ما تردَد

*عبدالله الصقر** عبدالعزيز الصقر

ما بغى ينشرها بالجريدة عشان لا يوصف بالتطبيل لصاحب الجريدة مثل ما قال

وسلف ودين

21/04/2009

مواضيع الحل - خمسين ألف دينار؟؟


والنيباري راح يستضيف اليوم الثلاثا ربعنا المدونين عشان يتناقش معاهم

اللي عنده الرغبة بالمشاركة بهاللقاء عشان يفيد ويستفيد خل يروح

الضاحية ق 4 ش سيد علي سيد سليمان جاده 48 منزل 4 الساعة سبع ونص

انزين

ليما امس وصل عدد مرشحين المجلس الى 207 مرشحين

فعليا فإن المرشحين النشطين والمنتشرين اعلاميا عددهم ما يتجاوز الثلاثين بكل دائرة

بمعنى ان اجمالي المرشحين النشطين بالإنتخابات اهوا 150 مرشح ومرشحة

انزين دراسة تم اعدادها السنة اللي طافت ما عندي ياها للاسف حاليا

فاللي يقدر يلاقيها خل يعطيني ياها لو يتكرم

الدراسة تقول ان مصروفات المرشحين في انتخابات 2008 تجاوزت ال 21 مليون دولار

ومن المتوقع انها تفوق ال 28 مليون دولار هالسنة

انا بقول انها راح تكلف 25 مليون دولار

شسويت بعدين

بطلت تلفوني ودشيت على الآلة الحاسبة

وقلت

25000000
ـــــــــــــــــــــــــــ
150

طلع لي هالرقم

166.666

يعني متوسط المصروفات للمرشحين هالكثر بالدولار

يعني بالكويتي يطلع 50 الف دينار تقريبا

ووايد من المرشحين اللي نازلين هالسنة

ما يعتبر هذا النزول الأول لهم

سواء من نواب سابقين او مرشحين ما حالفهم الحظ

يعني مرشحين الكويت عندهم استعداد يدفعون 50 الف دينار سنويا كمتوسط؟

ما ودي ادش بالنوايا

لكن اللي يفوز بفرعية واللي اهيا جريمة او على اساس طائفي شيعي او سني

ويفرق ويقسم المجتمع

هل معقوله تهمه مصلحة الكويت عشان يقط لها خمسين الف دينار سنويا كمتوسط؟؟

مادري اشوفها ما تركب ابد

والسؤال لما الواحد يقط خمسين الف مو عشان مصلحة الكويت مثل ما قلت لكم بالأمثلة اللي طافت

أكيد راح يسعى ان يسترجع فلوسه

انزين شلون ومن وين ومن منو واهوا السؤال الأهم؟

أعتقد إن الوقت صار يستلزم اقرار قانون يحدد السقف الأعلى للمصروفات الإنتخابية

يعني مو معقولة صاحبنا اللي واحد يكتب حتى خطاباته ويرفض يطلع بمقابلات مباشرة على ابو ان عنده فلوس ينتشر اكثر من الفقير اللي عنده مبدأ وكفاءة وعقلية متميزة؟؟

هذا اقتراح يسوى ويحقق سواسية الدستور بعد

و

There are storms we cannot weather
طوفوا الشكل شي واااايد يسوى

17/04/2009

وإنتهت أزمة إرتفاع أسعار الغذاء

الحمدلله نزل سعر الدياي والبصل الى ادنى مستوياتهم بعد فوز القادسية بالدوري بفارق خمس نقاط عن أقرب المنافسين

أتمنى من نادي الكويت إن يستقبل لاعبين القادسية بالتصفيق بمباراتهم اليايه يوم السبت 25 ابريل بنادي كاظمة

وويبقى السؤال متى ياخذ العربي الدوري؟؟؟
ولا عزاء لمطقوق ومناصريه

ويغلبك ويبوسك

14/04/2009

مواضيع الحل - سيادة الريّس

ورأى النائب السابق مرشح الدائرة الخامسة محمد العبيد ان «من المهم إلغاء قانون تجريم الفرعيات.. فهي مشاورات أجراها الصحابة قبلنا، ولا اقتراع الا في يوم الاقتراع

ليش ما قلتوا من الأول إن هذي
السالفة

طلعت الفرعيات من أيام الصحابة

إنزين الدولة العباسية والأموية بحسب كتب التاريخ كانوا طايحين له خمر وجواري شلون هم نسمع كلامهم يالعبيد؟؟

المهم

وكما هو متوقع ونزولا على رغبة الجماهير الوفية ونداء الوطن

قرر النائب السابق صاحب ال "ولا اقتراح بالمجلس" بالنزول مجددا للانتخابات النيابية

جاسم الخرافي معاصر النكبات الكويتية سواء لما كان بالحكومة او بالمجلس

وطبعا وبناء على توقعات النتائج راح يكون رئيس للمجلس من يديد

نوخذانا وينك صار لك جم موضوع مو مسيّر؟

المهم

جدلية من الأفضل السعدون او الخرافي بالنسبة لأنصار الخرافي

كانت تقول ان الخرافي يهدي النفوس و يعالج القلوب وأسير الشوق وهالخرابيط

انزين مجلس 99 برئاسته وانحل، مجلس 2003 برئاسته وهم انحل
مجلس 2006 إنحل و مجلس 2008 ايضا إنحل

عن أي تهدئة نفوس وادارة حكيمة يتكلمون عيل؟؟

أعتقد آن الأوان لكسر اسطوانة قدرة الخرافي على الإدارة

وطبعا هذا مو معناه اني ابي السعدون يكون رئيس اذا فاز

انا مع تجديد الدماء بكرسي الرئاسة خصوصا

وشخصيا اتمنى ان يكون علي الراشد احد المرشحين للرئاسة

ولي اسبابي اولا علي الراشد قاضي سابق ففيه من الجدية والصرامة الشيء الكثير

محبوب من فئات مختلفة من الشعب

حتى سكووب يحبونه وما ننسى ناصر الدويلة بعد

حقاني جدا وقناعاته يصرح فيها حتى لو زعلّت تياره

اي نعم نختلف مع بعض القناعات اللي عنده لكنه يصرح بقناعاته دون وجل او خجل

اي على فكرة مدونة يديدة تحب احمد السعدون وايد

نسيت اعلن عنها من فترة واعتذر لهم

اسمها
بيت الشعب

عموما

رئاسة المجلس من ركائز الاستقرار بالبلد وشغل الصغار اللي كان حاصل بالسنين اللي طافت

ما يحب رئيس الوزراء وليش شلتوا احمد الفهد

ما نبي هالشي يستمر

وياليت يصير في تحرك من الحين لحشد المرشحين من اصحاب الحظوظ لازاحة الخرافي صاحب ال ولا اقتراح من مطرقة الرئاسة

ونعطيه مطرقة يروح يخلص فيه ستاد جابر اللي ما خلصه اهوا وشركته ومتأخرين على الدولة 3 سنين ليما الحين

وما أروعك

10/04/2009

مواضيع الحل - إنت وبشار عبدالله بس


عاجل تدويناتك مهمة وإنت تدري

ورايك مؤثر على اللي يقرون لك

وهم إنت تدري

وأنا ما أوقف مع فريق ضد فريق وإنت تدري

يا عاجل انت حاط على يمين مدونتك المرشحين اللي تدعمهم او تتمنى وصولهم بالانتخابات اليايه

وطبعا هذا اختيارك وحريتك

لكني أشوف انك ما حطيت أسيل العوضي بالذات من مرشحين الدائرة الثالثة

وهذا هم شي بإختيارك وحريتك

لكن ذاكرتي نوعا ما قوية بهالمواضيع

وذكرت ان كان لك موضوع عن دعمك لأسيل وصالح من أيام الوسط الديمقراطي

شاللي تغير؟؟؟

ليش ظل صالح بروحه بدون أسيل يا عاجل؟؟

في سبب ببالي وبأمانه أخاف أقوله لأنه مابي يكون صج

فبنطرك انت تقول لي ليش

أرد وأقول إختيارك وإنت حر فيه

لكن لتأثيرك على الناس اللي يتابعونك

أسألك

وطبعا إنت ما راح تزعل وصدرك وسيع لأنك من ربع الوسط الديمقراطي

نروح حق بوعبدالله محمد الصقر

من يومين نزّل الصقر بيان عزوفه عن إنتخابات 2009 النيابية

والجرايد اليوم الثاني إشتغلت مقالات وآراء عن الموضوع بس
أحلاهم الوشيحي يوم يقول

وهنا لم يبقَ لي خيار إلا أن أذكّره بأن بعض البيوت القائمة على شتيمته والافتراء عليه أضحت الآن مهددة بالزوال بسبب قراره هذا، وسيتشرد الكتّاب - أصحاب البيوت تلك - في الشوارع، وقد تدهسهم السيارات المسرعة على الخط السريع. آه كم بيتٍ بُني على شتيمتك، لكنها بيوت بلا أساس، ليتك «تميت جميلك» وأكملت عضويتك إلى أن ينتهوا من التأثيث، حرام عليك يارجل، ذنب هؤلاء كلهم في رقبتك اليسرى

عموما وكردّة فعل طبيعية حق أي عضو سابق

راح يكون في مؤيدين يطلبون عدم عزوفه

ويتيمعون عند البيبان

وبعضهم يكون عقلاني وبعضهم ما عنده سالفة مثل
هذيل

رفض المواطنون قرار الصقر وقالوا له: هذا مو من حقك ما نخليك تترك كرسي ابوك وعمك

وطبعا لأن إحنا كويتيين تعودنا إن لما نحّن على الواحد يصير اللي نبيه

الكل متوقع إن الصقر يهوّن وينزل انتخابات هالسنة

وطبعا هالكلام مو سليم وما أتمناه يصير

لأن نفس البيوت اللي قال عنها الوشيحي راح تكون فرحتها مو طبيعية اذا هوّن الصقر

بو عبدالله انت قدمت وما قصرت

وإختلفنا وإتفقنا معاك

الدائرة الثانية برايي صارت مسكّره من قبل التيار المقارب لك

النيباري والعنجري والراشد والعبدالجادر

نزولك يمكن ما يفوّز غيرك من اللي ذكرتهم

وما نبي نسوي تمثيليات مثل غيرنا

اللي ارادة الشعب تطالب بوجودهم

وهالأفلام

بوعبدالله نبي تكون ثاني كويتي معاصر يثبت على رايه بالعزوف عن شي لأنه مقتنع فيه

وما تفيد معاه الحنّه

صير مثل بشار عبدالله

يحنون عليه المنتخب بس يشوف إن ما يقدر يقدم للأزرق شي

وعلى طاري بشار

تدرون ان نادي السالمية بعد ما كانوا اعضاءه اقل من الف شهر 7 اللي طاف

صاروا بعد خسارة خالد اليوسف الصباح وصباح خالد اليوسف وتركي احمد اليوسف للانتخابات الأخيرة

صاروا اعضاء نادي السالمية اكثر من 9000 عضو

يعني خلال اشهر صار عندنا زيادة بعدد السلماوية بالكويت

وعاشت الديمقراطية الأبية

وترى ذولا يحبّون


06/04/2009

كرة ع الخازوق

صار لنا 829 يوم على عدم تسليم مجموعة الخرافي لإستاد جابر المقرر إنتهاءه ب نهاية أكتوبر 2006 وطبعا هذي الشركة يملكها جاسم الخرافي وإخوانه

جاسم الخرافي رئيس مجلس الأمة السابق وإن شاء الله بعد شهرين يكون الأسبق يالله يا كريم
يجمبز الدولة

مشروع يكلف الدولة 50 مليون دينار لدى توقيع العقد
تقدر تكلفته ليما اليوم 85 مليون دينار

ونواقصه يحتاج لها مادري جم مليون

هذا الرجل الثالث بالدولة والحريص على مصالحها يعني

ملعب مو عارف يسوي أو بالأصح ما يبي يسوي

هذا شي

الشي الثاني عبدالله النيباري متردد بين الأولى والثانية يا ليت اللي عنده راي حول افضلية وحده فيهم على الاخرى يدلو بدلوه الله يخليكم
ترى النيباري يقرى ويتابع

بالنسبة للي بينتقدون ترشيحه الرجاء ما يعلقون بهالخصوص بحكم ان استطلاع الراي عن افضلية وحدة من الدائرتين مو الترشيح من عدمه

انزين ذاك اليوم تشرفت ادارة الجوازات بمادري منو الصباح
 
شباب الصباح أضاؤوا قلطة الوطن
 
ازدانت الحلقة الاولى من حلقات »قلطة الوطن« بحضور شباب اسرة الصباح الذين أضفى حضورهم لونا مميزا وعطرا خاصا فاض عبقه في نادي النصر الرياضي الذي شهد افتتاح »قلطة الوطن« الثانية بحضور كثيف تابع الحلقة الاولى بحب وشغف

شصاير شالسالفة ؟؟؟

 مرة ينورون مرة يشرفون؟؟

انزين ندش بالسالفة

مشكلة الرياضة بقيادة طلال الفهد وعصابته اللي طولت من فبراير 2007 وما انتهت أو تصورنا ان انتهت الا لما الامير تدخل بشهر 12 اللي فات

عاد يه راعي الحرشا وقتها وتعين رئيس مؤقت للاتحاد على ابو ان يحل المشكلة

ويخلي المتمردين يعني اخوه وربعه يوافقون على قوانين الدولة

وعطوهم 6 اشهر يعدلون الوضع

لكن راعي الحرشا أحمد الفهد وبدال ما يحل المشكلة ويفكنا من بلوة الايقاف الكروي
 
قرر ان يصير مفتاح انتخابي حق شيخ بحريني ويحارب اللي سعى لرفع الايقاف عن الكويت

اللي اهوا رئيس الاتحاد الاسيوي محمد بن همام

وجان زين فالح عاد بهالشغلة قاعد يفتر الدول

ويلبس هدومهم اللي تضحك

وبالنهاية قرر الاتحاد الاسيوي منع الكويت من المشاركة بالتصويت بحكم انها لجنة معينة

اللي ابي افهمه الحين

مرت اربع اشهر وراعي الحرشا ما سوى ولا راح يسوي شي كالعادة

بس كلام على قولة غلام

والحين الكويت انحرمت من التصويت

وما ندري غضب رئيس الاتحاد الآسيوي شراح يسوي على الكويت زود

بسبب صبيانية راعي الحرشا

وهذي كرتنا على الخازوق

بسبّة راعي الحرشا

يعني لا رياضة فلحت قبل ولا فالح الحين

لا طاقة لا اعلام

لا امن وطني

حق شنو تنفع انت بالذمة؟؟

دامك تحب الفرارة خل يعينونك سفيرنا ببوتان او مكاو او ديرة ما تقدر تغزونا او تأذينا
 
هم نفتك من شرّك وهم نضمن ان الديرة اللي انت فيها ما تضرنا

والبس اي شي يعجبك هناك وطول شعرك كثر ما تبي بعد

وطبعا كالعادة قناة الوطن ماخذه ارشيف تلفزيون الكويت كله

وببلاش
 
ومر يا حلو

02/04/2009

مواضيع الحل - مو بس البدو

تشرفت الادارة العامة للجنسية ووثائق السفر الكويتية بزيارة الشيخ خالد الأحمد الجابر الصباح التي تعتبر الاولى له لهذه الادارة ومنذ تعافيه من الوعكة التي ألمت به منذ عدة شهور

الوطن

ممكن افهم شنو الشرف بالسالفة
فريج سعود روح مبنى التأمينات وخنزل خبر تشريفك لمبنى التأمينات
المهم مو هذا موضوعي

الإنتخابات الفرعية تعتبر من اكبر منغصات عدالة الإنتخابات بالكويت

ويمكن قاعدين نسمع هاليومين ان قبيلة المطران بتصفي 14 مرشح وتخليهم 4

وشمّر صفّوا وخلصوا

والعوازم مادري شبيسوون

والرشايده هم عندهم مادري جم واحد

وطبعا ردى الحكومة كالعادة اهوا السبب في استمرار وتفشي هالنوع من أنواع الغش بالإنتخابات

وأنا على ثقة ما راح يسوون شي لهم

مثل ما طوفوها لهم باللي طافت

وكان أحد الفايزين بالفرعية سبب لإستقالة الحكومة وتشكيل حكومة يديدة

بس غلطان اللي يعتقد إن البدو أو بعض أبناء القبايل اهما الوحيدين بجريمة الفرعية

لا في غيرهم وايد

انا أبين لكم الحين

نسمع بالدائرة الأولى تحديدا عن تجمع الوفاق وتجمع العدالة وتجمع الحب والحياة وتجمع الخضر بس طبعا مو خضر البيئة

وهم نسمع عن حدس والسلف بالدوائر الاخرى

كل هذيل يسوون تصفيات ويختارون مرشحينهم

وهذولي طبعا ما يفرقون ابد عن الفرعيات القبلية

بحكم ان ما يقدر شيعي او شيعية يكون احد المشاركين بتصفيات حدس و السلف

ولا يقدر سني او سنية يكون أحد المشاركين بالتجمعات اللي اسماءها على فرق كابتن ماجد مالت الشيعة

والفرعية ليش جريمة

لأنها تسوي انتخابات بين مجموعة من الأفراد مو على اساس فكري يقدر ينتمي له الإنسان

لكن على اساس عرقي غير متحكم فيه

يعني محمد العبدالجادر ما يقدر يشارك بفرعية الرشايدة بسبب ان ابوه ويده وابو يده مو رشايدة

وعلّام الكندري ما يقدر يشارك بتصفيات جماعة الوفاق مثلا لأنه مو شيعي

و صالح عاشور ما يقدر يشارك بتصفيات السلف لأنه مو سني

ممكن تكون تصفيات الشيعة والسنة اكثر مرونة من الفرعيات القبلية بحكم ان الواحد يقدر يصير من شيعي لي سني او العكس

لكن هم مو منطق ابد ان تصير انتخابات على اساس ان انا شلون اعتقد بالاسلام
في دولة علمانية الدستور مثل الكويت


اذا الفرعيات مو مقتصرة على القبائل

واذا الحكومة بتحول الناس النيابة خل تحول الحدسيين والسلفيين والتجمعات الشيعية اللي تصفي مرشحيها

وقبل لا احد يقول انزين وشلون على التحالف والمنبر وربعكم

اقول له ان التحالف والمنبر وربعنا ما فيهم شرط مذهب او عائلة او قبيلة للانتساب

اهيا لوائح واطار عام ومبادئ اساسية تؤمن فيها حياك الله وانت حر باختيارك

و
شوف بئينا فين