28/08/2010

يودوا طفلكم

تاريخ أسود ومظلم من جذب وفتن ومهازل على مر السنين من بداية شراء علي الخليفة لمؤسسة الوطن الاعلامية

ولما تولى خليف رئاسة التحرير بعد ما طرد محمد الجاسم

زادت البلاوي والفتن

كانت الجريدة الوحيدة اللي تنشر او تدور على اي موضوع فتنة بين السنة والشيعه ومشى بنفس الخط بعدهم ولد الدار الحاج مهمود

الجريدة الوحيدة اللي تشيش أبناء القبائل وتوصل لهم رسايل إن ترى باجي الكويتيين ما يبونكم

خلت كل الكويت حرامية لأنهم يبون يكونون سواسية

كل هذا موجود وموثق بالمواضيع القديمة بهالمدونة وغيرها من المدونات ردوا ليما ارشيف 2007 وراح تشوفون بعينكم كمية الجذب والفتن اللي قدمته هالجريدة من ذاك الوقت وطبعا من قبله بعد

عقب ما زرعوا الفتنة داخل الكويت

وخلوا الناس تشييش وتفرق ووصلت لي مرحلة التفاهة حتى على مسلسل كريمو اللي صار هاجس عند بعض المغفلين

وبعد ما نصروا الجويهل واشكاله لدرجة ان المواد اللي يعرضها بقناته او برنامجه اهيا نفس المواد اللي تنشر بنفس اليوم على صفحة الوطن الاولى

عقب ما خلصوا من كل هذا

دشوا على خط يديد اهوا العلاقات الخارجية للكويت

أول بلاويهم الواضحة كانت على المغرب وتصويرهم انهم أهل سحر ومسخرة

والنتيجة كانت شتم الكويتيين على موقع الديوان الأميري الكويتي!!؟؟

ولما الطفل خليف بغى يعتذر قال أن المغربيين خذوا الموضوع بحساسية يعنى البلى فيهم مو فينا

وطال عمره وزير الخارجية يعتذر للمغرب على خماجير خليف!!؟؟

طبعا بدون اي عقاب لهم لأن ما يقدر لا على خليف ولا على ابوه

خلصنا من المغرب دشينا على قطر في حلقتهم رقم 15 من برنامجهم التافه بوسخافة وبوسخيف

اهانة لرأس الدولة أمير قطر، وإهانة لرئيس الوزراء

لأنهم يسبونه بجريدتهم ويرفع عليهم قضايا ويكسبها

فمحترين طبعا

مع العلم ان قطر هذي اهيا نفسها اللي كان موقفها بالغزو صلب وقوي مع الحق الكويتي بنفس الوقت اللي كانت أموالنا تسرق من الكويتيين نفسهم وكان وزير الاموال المسروقة بذاك الوقت اهوا صاحب جريدة الوطن علي الخليفة

طبعا ما كفت الادلة لادانة علي الخليفة بأنه حرامي

لكن محد يقدر يغير واقع ان علي الخليفة اهوا الوزير المسؤول السياسي على الاقل عن السرقات اللي حصلت

تسمية أمير قطر بالشيخ محّد في إشارة واضحة للشيخ حمد

اهانة رأس الدولة تولد مصايب على الكويت وعلاقاتها

وعمرنا ما راح نرضى ان ياهل مثل خليف او غير خليف يتسبب بتوتر علاقتنا مع اي دولة

واذا كانت الحجة قناة الجزيرة ووقاحتها واللي تسويه بالكويت

فتربيتنا ما تسمح لنا يا خليف ان نرد بإهانة لأميرهم ودولتهم بكبرها

مثل ما احنا ما راح نرضى الحين ابد ان ينغلط على سمو الامير وعلى الدولة من القطريين بسبب بوسخافة وبوسخيف

أنا أعذرك يا خليف لأن أبوك ما مداه يعلمك السنع لأنه كان لاهي بالوزارة وشؤونها المسكين

لكن اشره على كل كويتي وتحديدا أبناء الاسرة إن يكون واحد مثل خليف بالواجهة الاعلامية للدولة

سنعوا طفلكم ويودوه وكفانا بلاوي

اي على فكرة خليف

مو معناته انك رئيس مؤسسة الوطن انك تطلع بفص كلاص على ابو انها من انتاجكم



23/08/2010

غــبــقـتـيـن



هذي دعوتين حق غبقة صوت الكويت باجر الثلاثاء والتحالف يوم الاربعا

وبعدها موضوع عن شوية خرابيط ادارية دايره بجامعة الكويت

وهذي نبذه عنها كتبها سرحان


15/08/2010

مرثية فارس سابق

عجبا ! كيف اتخذناك صديقا ؟
وحسبناك أخا بـــــرا شقيقا ؟

واخذنــــــاك إلى أضلاعنا
وسقيناك من الحب رحيقا
واقتسمنا كسرة الخبز معا
وكتبنا بالـدمــــا عهدا وثيقا

وزرعناك على أجفاننا
ونشرنا فوقك الهدب الوريقا
وزعمناك - ولم تبرق - سنا
وكسوناك - ولم تلمع - بريقا

سيفنا كنت ؟ ! . . تأمل سيفنا
كيف أهدى قلبنا الجرح العميقا

درعنا كنت ؟ ! وهذا درعنا
حربة في ظهرنا شبت حريقا
جيشا كنت ؟ ! أجب يا جيشنا
كيف ضيعت إلى القدس الطريقا ؟

ذلك العملاق . . . ما أبشعه
في الدجى يغتال عصفورا رقيقا
مسخ الفارس لصا قاتلا
مسخ الفارس كذابا صفيقــــــــــا

رحمة الله عليه !إنه مات
هل عاش الذي خان الرفيقا ؟

من هذه القصيدة حبيت شعرك اللي عبرت فيه بإبداع عن وقاحة صدام
وعشقت تعبيراتك

رحلت وخلفك ذكرى زكية ما تنمحي

الله يرحم غازي

وعزيزتي 2010 باقي أربع شهور على نهايتج
إن شاء الله ما أصفى بروحي بهالعالم
;p

11/08/2010

أهلا رمضان


عزيزي الصائم

بخصوص الصيام بدون صلاة

رجيم مثلا

مبارك عليكم الشهر وعساكم من العايدين

09/08/2010

العقول تتضاءل

الجويهل أشهر من نايف المطوع

سليمان البسام وسعد الفرج يعرضون إبداعاتهم في لبنان بدال الكويت

أحمد الربعي لا يختاره الشعب لتمثيله

ماكو نص شعري واحد لفايق عبدالجليل في المناهج التعليمية

طارق العلي وعبدالعزيز المسلم تستمر مسرحياتهم أكثر من ستة أشهر

ويرحل البغدادي ليأتي غبي ويقول
أخيرا هلك البغدادي!!!!؟؟

العقول تتضاءل في بلدي