30/03/2011

سموك..سو خير وقطنا بحر

إنقطاع أدرى..إختفاء أدري..وايد أسباب أهمها إن التدوين صار موضه قديمة


بس موضوع اليوم ما شفت أحد تطرق له قلت أنا أتطرق له وأمري لله

بس قبل البداية في كلمة تقرقع

الكلمة تقول إن الكويتيين أصناف هالأيام

صنف يوقف مع طق الكويتيين ويعارض طق الشعوب بالدول الثانية

وصنف يرفض طق الكويتيين ويأيد طق الشعوب الثانية

وصنف يأيد طق الكويتيين ويأيد طق الشعوب الأخرى

وصنف يرفض طق الكويتيين وطق الشعوب الأخرى

إذا كنت من آخر صنفين فإنت منسجم مع نفسك وتحكمك قناعاتك

أما إذا كنت من الصنفين اللي فوقهم فروح إستجوب وزير الخارجية أو رئيس الوزراء وألف لا باس على عقلك وما تشوف شر

إنزين خندش بالسالفة ولا نطوّلها

ماأعتقد في أحد ممكن اليوم وبعد كل هالكوارث الكويتية والصناعة الحكومية ممكن حتى يقول إن الشيخ ناصر قادر على إدارة الحكومة أو توفق فيها

مالله كتب يا بوصباح والحكومة قسمة ونصيب طال عمرك

وأعتقد إن مطالبات الرحيل سواء كانت حادة ولا هادية ولا ذربة ولا دفاشة صارت عامة وصعب نلاقي أحد فاهم أو مو فاهم بالشأن العام ما يقول إرحل

وطبعا أنا منهم

المهم التنبؤات زايدة بعد حركات الشباب النواب الحلوين عاشور والدويسان

فالأول اقصد عاشور يقدم اول استجواب بحياته من 99 إلى اليوم بعد 12 سنة يقدم استجواب يعني لو بالمدرسة كان مخلص ثانوية الحين ويقول فيه ليش سبوني قناة البحرين يا وزير الخارجية الكويتي؟؟

زين ما قال حق وزير الصحة ليش صار غبار يوم اليمعة؟؟

وعلى طاري غبار يوم اليمعة فيصل الدويسان مقدم إستجواب بعد مادري بُعيد

يقول حق وزير الاعلام ليش ما تداوم وليش صار غبار يوم اليمعة

بس باقي حماد يقدم إستجواب يقول ليش معينين إخوي مختار وإهوا ما يستاهل

ودليهي يقدم إستجواب حق وزير الأكل.. ماكو وزير أكل بس إهوا يبي يقول ويا اللي يقولون

كل التحركات مغزاها واضح وما يبي لها تفكير عميق وهذا نص التحركات

لترحل الحكومة اليوم قبل باجر بس تكفون لا توصلون لجلسة 5-4 عشان لحّد يستجوب بوفهد

والمطلوب منك يا سمو الرئيس ان تخليه يصعد وبعدين اتركنا غير مأسوف علينا

بس مو أكثر

وأي إجراء غير هذا راح يثبت فعلا اللي يقولونه المستجوبين إن إحنا في دولة أحمد الفهد وإن إهوا لا يمس.. إنت تصعد عادي وبدال المرة مرتين وثلاث وأربع لكن إهوا لأ

هذا اللي يبي يوصل له فلا تنجح مآربه

خل يصعد ويقول اللي عنده

لا يصير اهوا الشخص الوحيد اللي قاعد بوزارات مختلفة عشر سنين تقريبا بدون لا يصعد وانت بخمس سنين صعدت ثلاث مرات

مو كافي النغزة الكبيرة اللي وجهها لك أي نغزة إلا قطها أشكره يوم قال لن أطلب جلسة سرية

في إشارة واضحة إن طلب الجلسة السرية شي مو سنع أبد

ومحد طلب جلسات سرية غير سموك

ساهم معانا في كشف منو عرقل أعمالك بشكل كبير يا بوصباح ومنو قاعد يصنع له مجد ما يستحقه بإظهار الجميع بمنظر الضعيف الا اهوا

سو فينا هالجميل يا بوصباح وتالي قطنا بحر وراح يذكر التاريخ ان من ازل بعبع أحمد الفهد هو ناصر المحمد

كما يذكر تاريخ الدولة بأن من أزال بعبع عبدالله المبارك قبل هو المرحوم عبدالله السالم

وهذا يكون أحلى كاكاو تقدمه للكويت طال عمرك