31/10/2007

صار عندي مليار دينار


شلونكم

أدري مقدار الغضب الشعبي على قرار لجنة التحقيق بحفظ حفظ حفظ حفظ يا جريدة الوطن

حفظ القضية

نص يقول شلون ونص يقول نزاهة قضاء وما نشكك فيها

وانا الصراحة اوقف مع الفريقين

الفريق اللي يقول شلون يقول شنو يعني عدم كفاية الأدلة؟

والفريق اللي يقول نزاهة قضاء

صح هذا قضاءنا ولا يمكن نشكك فيها

بس خل نتكلم بعقل

وحبة حبة

واليوم الموضوع جد جدا جدا

بقتبس شي من جريدة
القبس اليوم

وكانت اللجنة استمرت في عملها منذ أكثر من ستة أعوام، حيث قدم وزير النفط الأسبق عادل الصبيح بلاغا في 29 مايو ،2001 واستدعت العشرات من الأشخاص والشهود للاستماع إلى إفادتهم، وسافرت إلى دول عدة لمتابعة تحقيقاتها، وأجرت تحقيقات مكثفة مع الشيخ علي الخليفة وجلسات تجاوز عددها ال20 بمعدل خمس ساعات لكل جلسة



هذي وثيقة وحدة بس أو دليل واحد بس

طيب على كثر اجراءات لجنة التحقيق

على مدى السنين لكنهم ما إكتفوا بالأدلة المقدمة

طيب

الجهة الوحيدة المخولة بتقديم الأدلة

اهيا حكومة دولة الكويت

واذا كانت الأدلة على مر السنين كافية ان تدين علي الخليفة

بالنسبة لأبسط رجل شارع

شنو اللي خلاها مو كافية للجنة التحقيق

انا أقول لكم

الفرق بين أدلة لجنة التحقيق وأدلة رجل الشارع البسيط

ان رجل الشارع البسيط يقدر يطلع على الادلة المقدمة من الحكومة ومن جريدة القبس بالتسعينيات

ومن النيباري والطليعة ومن حكم القاضي موربك

ومن الحكم الكويتي اللي نسوا التاريخ مساكين فيه

اي صج احتاج لصورة من الحكم اللي يملكها خل يدزها لو سمحتوا

أما لجنة التحقيق بس تشوف الأدلة اللي تقدمها الحكومة بس

إحنا جدّام إحتمالين

الأول إن اللجنة تقدمت لها كل الأدلة المتوفرة لرجل الشارع البسيط ومع هذا قالت عدم كفاية الأدلة

وهذا الإحتمال مو منطقي لان القضاء نزيه وما نشكك فيه

الإحتمال الثاني إن الحكومة على مر السنين وتحديدا وزراء النفط

أحمد الفهد وعلي الجراح ومحمد العليم ومادري اذا في غيرهم بعد عادل الصبيح ما قدموا ادلة كافية

وإهوا الإحتمال الأقوى بسبب إن الإحتمال الأول غير متوقع الحدوث

اذا المسؤول الأول عن حفظ القضية لعدم كفاية الأدلة إهما الحكومة الكويتية الموقرة

ويا ريت ال خمسين نائب يسوون شي الحين تجاه هالموضوع

هذي بيزاتنا يا ناس

طيب السؤال الملح دايما شنو الحل

الحل جدا سهل وماكو ابسط منه

تقدم الحكومة أدلة جديدة ما قدمتها للجنة وبإمكان الحكومة الإستعانة بصديق ويا كثر الأصدقاء

اللي يملكون ادلة

بهالحالة ممكن

فهمتوا السالفة شلون

وحان دور الكويت لتتكلم

عمي الخليفة..تهانينا
لا على صك البراءة..بل ملايينا
ومالم يقع بين أيادينا
عمي الخليفة
لست أول من سرق امانينا
لكنك أكبر السارقينا
عمي الخليفة
لك منا قصة طريفة
في بلادنا..السرقة وظيفة
والمال العام..حجة سخيفة
تهانينا
فاللص أشرف الناس فينا


المبدعة أمل خالد

خلصنا من هالنقطة نروح حق
جريدة الياهل

بالإجماع.. براءة الشيخ علي الخليفة من التهم المنسوبة إليه

لجنة التحقيق حفظت القضية وما برأت احد

مو بكيفكم يعني

دام جذيه انا صار عندي مليار دينار

عادي الكلام الظاهر ببلاش

أبي الحين دور اللجنة انها تكذب الخبر بنفس المكان بالجريدة يالله يالعطار توكل على الله وقول مو براءة

عيب يجذبون بلسانكم

والجذب واضح والدليل صفحتهم الاولى

يعني الأدلة كافية

وطبعا الكلام ينطبق على بلبل

إي على فكرة ترى في قضية ثانية مرفوعة على علي الخليفة

من يوسف الابراهيم وزير المالية السابق يعني ما خلصنا


ختاما نبارك لأمثال الأحمد زواجها من عبدالله معيوف ونتمنى لهم حياة سعيدة

وشهر عسل سعيد باليابان

30/10/2007

عدنا


تــحــديــث


علمت الآن أن اللجنة القضائية الخاصة المكلفة بمحاكمة الوزراء قد حفظت القضية التي وجهت فيها اتهامات لوزير النفط الأسبق الشيخ علي الخليفة الصباح والتي اشتهرت بقضية الناقلات، وقد استندت في حفظها للقضية على عدم كفاية الأدلة

البعض إلتبس عليهم الموضوع وإعتقد إن الحكم براءة علي الخليفة

لكن الحفظ لعدم كفاية الادلة

مو معناته البراءة

وننطر الوطن باجر

والحين اقروا موضوعي اللي تحت التحديث


مبروك للقدساوية الفوز على العربي انا أشهد إن ويهي خير

أول ما وصلت فزنا

:)

المهم

شنو يعني هالديرة ما نقدر نخليها شوي

بس سافرت لي جم يوم

استجوابين

وتشكيل وزاري يديد

وتوقيف منتخب الكويت

لا ووصلني خبر عن الوسط الديمقراطي بعد

يبا ردينا خلاص ردينا

ونحل الأمور كلها

عندي وايد تساؤلات والله

ألحين النواب محتجين لأن غيروا وزارة الحميضي
قبل الاستجواب وهذا تفريغ للدستور من محتواه

والله كلامي حلو

بس مبيوق اشكره

اي مو مايصير قبل الاستجواب تدورونه مو كلام هذا

ياجماعة خلونا محايدين

ميخالف دوروه دوخوه سووا اللي تبونه

بس مو قبل الاستجواب

يمكن يطلع بايق مثل علي بابا

شلون يعني تعطونه النفط بعد المالية

انا ما اشكك بالحميضي لأني ما أدري عنه بس اقول مثلا يعني

بس اشوه ما اكتشفت الحكومة هالحركة على ايام التلميذ جان مدورينه الحين

ياجماعة قصّوا الحق من نفسكم شوي ولا تقولون النوّاب يسوون بلبلة مو لا تعطونهم فرصة وما يسووون بلبلة


يا زينهم زيناه والله بنات الكويت يعني العرباوية حجاب وكبوس

والقدساوية صايره كابتن

:)

انزين دام يومنا رياضي خنشوف شسالفة توقيف المنتخب من المشاركة الدولية

السالفة مثل ما عرفت ان مجلس الامة قال لازم اتحاد كرة القدم 14 عضو منتخب

شصار عاد

الفيفا بشهر 3 قالوا مو مشكلة احنا موافقين وسووا انتخابات وفكونا وشيلوا احمد اليوسف بعد

بس تكفون فوزوا
:)

شصار بعدها

اللي سمعته ان

قاموا بعض الاندية الكويتيه وراحوا وقالوا حق الفيفا ترى احنا مو راضين عن 14 مانبي هالعدد نبي 11 أو 9

مع ان قانون مجلس أمه وموقع عليه الأمير

يعني باختصار هالانديه عصت اوامر الكويت

ألحين رويشد ونبيل ونوال وبلوشي طلعوا مع بعض

شمعنى بلوشي اللي صار حده يغني دعايات ال اف ام والباجي حفلاتهم وصلت امريكا؟؟

وثانيا ليش عادل رويشد ليما الحين يغني بالنافورة الموسيقية مادري الراقصه؟؟
لا لا موسيقية ا يسكرها الطبطبائي

المهم

مثل ما قلت هالانديه عصت اوامر الدولة

ومو بس جذيه اتحاد الكرة اليديد مثل ما قريت بالقبس من جم يوم داز كتاب للفيفا يقول تكفه لا تعاقبونا

مع ان السيد فيفا ما بطّل حلجه بكلمة بس لما شاف الكتاب عاقب الكويت

وقال لهم نبيها خمسه

يعني خمس اعضاء بالاتحاد مو 14

انا مادري شالدبره الحين وشنو الحل

اللي يعرف خل يقول


هذي سفالة بوسخافه اليوم

المربع الثالث بالضبط

يقولون الليبرالي ما يصلي

ابي وين أحمد الفهد السلفي على هالكلام الطيب هذا بارك الله فيه

اي صج خليف شريت لك

Game boy advance

بس الصراحة اوقاف ومواصلات مع بعض خوش تركيبة وعدل وشؤون بعد

الله الله يعني الصراحة ابداع

وثانيا ما يصير المحيلبي يعرف كل شي

بلدية واعلام وصحة ومواصلات واوقاف بسنتين






يعني على هالقعدة يالشحومي ناقصك كره

:)

لا وعاشور قاعد يزفه بعد

يالله عاد مصختها انا

خل أختم

وصلني خبر ان الوسط الديمقراطي اقترحوا باجتماع انهم يقاطعون جريدة سراق المال العام

بس ما مشى الاقتراح الظاهر الخوف شوي مأثر عليهم

بس هم زين تقدم اقتراح

طلع شي من القوائم على الاقل

وان شاء الله يطلع شي من المستقلة والهندسية والأكاديمية والوحدة مالت امريكا بهالخصوص

والله اي احد منهم يسويها راح احط شعاره بكل بوست

يالله شدّوا الحيل

اليوم لأني توني رادّه ماراح اجابل يكيكي وبلبل والشلّه بس الوعد جدّام



ماكو وحدة على شعار القادسية

بس خلاص
اي شريط ميامي اليديد يونّس

24/10/2007

إستجوابين



يعني غباء وتشلخ وخبث وبدليات

هذا انتاج جريدة الحرامية الدائم وما راح يوقف

بس لحظة خنشوف شسالفة الاستجوابين

أنا هنا في غربتي صمتي غريب ..أنا هنا عن ناظري إيدي تغيب

هذي تكملة المقطع بأغنية رويشد

بورمية والطبطبائي كل واحد متسابق مع الثاني عشان يقدم استجواب

على فكره انا ما شفت نائب يحب الكاميرا مثل بورمية

لاحظوا لما يتكلم بأي جلسة شكثر يخز الشاشة وطبعا مو عشان الوقت لان بين كلمة وكلمه يخز الشاشة بشوف قاعده تصوره ولا تصور غيره

ومادري ليش كلما أشوفه أذكر محظوظة بالمستشفى لما تقول يسقط عمي وتسقط مرته



المهم

الشباب اللطاف الطبطبائي وبورمية رايحين ركض حق المجلس من الصبح عشان كل واحد يقدم استجوابه قبل الثاني

وبيت القرين ومواكبة للحدث قامت بهذا اللقاء الإفتراضي القصير مع النائبين المحترمين

ليش قدمتوا استجوابين بيوم واحد وكل واحد فيكم يبي يقدمه قبل؟

بورميه: لأن أبي إستجوابي ياخذ الأولوية بالطرح بالمجلس وأنا سبقته

الطبطبائي: لأن أبي إستجوابي ياخذ الأولوية بالمجلس بس إهوا سبقني

إنزين ليش تبون الاولوية بالطرح بالمجلس؟

الطبطبائي: لأني أعتقد إن القضايا اللي فيه حساسه وخطيره وما ينسكت عنها بس إهوا سبقني

بورميه: لأني أعتقد إن القضايا اللي فيه حساسه وخطيره وما ينسكت عنها وأنا سبقته

طيب دام القضايا اللي بإستجوابكم خطيرة وما ينسكت عنها ليش ما قدمتوه بشهر 7 و 8 و 9 ؟

الطبطبائي: بورمية دامك سبقتني جاوب

بورميه: بس انت سابقني بالعمر جاوب

وأنا ليما الحين أنطر منهم إجابة

الله يعيننا عليكم

المهم الوطن أمس كاتبين مانشيت

استجوابان قدما في يوم واحد لأول مرة في تاريخ المجلس

وهم بأول سطر من الموضوع

لأول مرة في تاريخ مجلس الأمة، استجوابان لوزيرين مختلفين قدماً في يوم واحد

ظاهرة تقديم استجوابين او اكثر ليست جديدة على البرلمان الكويتي بل شهد مجلس 1985 وبالتحديد 3 يوليو من عام 1986 تقديم ثلاثة استجوابات دفعة واحدة

هذي بالقبس أمس

المصيبة إن اللي كاتبين الموضوع بالوطن خمس أشخاص

ولا واحد فيهم كلف نفسه يدور شوي قبل لا ينزل الخبر

ما ينشره عليكم تكتبون بالوطن

شكرا يا باشا

يكيكي اليوم

ن30 أو 40 من مترفي ضاحية عبدالله السالم والنزهة والخالدية
يريدون ان يتكلموا باسم مليون من الشعب الكويتي

مسلّم مو بهالمناطق ولا علي الراشد ولا احمد المليفي ولا وليد الجري قبلهم ماني مكمله بعد

بس عشان ابين لك انك مادري ليش محتر

الا ما قلت لي اللي يسكنون بالبدع من المترفين ودماء زرقاء ولا الطبقة الكادحة؟

قول عشان نعرف

نختم ويا بلبل مالي خلق اطول زيادة

أو زرقاء اليمامة مثل ما شفت بمقالته

الحل لهذه المعضلة فهو موجود فقط بين يدي حضرة صاحب السمو امير البلاد، فهو ولي الامر وهو حامل مسؤولية هذا الوطن، علما باجماع الآراء ان استمرار الوضع الحالي هو قتل وتدمير للكويت، وان اللجوء للحل الدستوري لن يقدم ولن يؤخر، فنفس الوجوه ستعود حتى في الدوائر الخمس، وان لم تعد فمن سيحل محلها سيمارس نفس الممارسات المضرة القائمة لانها مع الوقت اصبحت جزءا من المفردات الحياتية للعمل البرلماني.ان حل مجلس الامة حلا غير دستوري مؤقتا بحيث يشمل الدعوة لانتخابات قادمة بعد سنتين او ثلاث سنوات، يستغلها الحكم في اعادة ترتيب صفوفه، وتستغلها الحكومة في تطهير جهازها من جراثيم بعض النواب وبكتريا القوانين المخالفة للدستور

انت ما تقول لي على اي اساس حكمت ان هذا الحل

وثانيا تعال تبي حل غير دستوري عشان يتم تطهير بكتريا القوانين المخالفة للدستور

يعني نوقف الدستور عشان نوقف القوانين المخالفة له

مو الحل الغير دستوري مخالف للدستور يا طبل

بس شقول طبل ما ينشره عليك

والقرار الذي يتخذه سمو الأمير هو القرار الذي سيقبل به الشارع الكويتي.. ما عدا الراديكاليين وتكتلهم وأربعة خمسة كتاب من ربعهم

شنو هذي بعد؟؟

يعني جذيه كلامك بيتصدق يا شين الحلايا

والله قلادة مبارك طيرت مخك يا مسكين

بس لا انت ولا الف من امثالك يتكلمون باسم الكويت والشعب الكويتي

بالصفحة الفنية يعلنون عن برنامج على تلفزيونهم اسمه

فوضة ولا موضة

بس عشان نعلمهم شي قبل لا ينبث ونفتشل

فوضى تنكتب جذيه

فشلتونا

باي ولي حديث عند العودة من السفر

21/10/2007

يكيكي عاد عاد




من خارج الكويت وما راح أقول ويني ليما ارجع

لأن الكويتيين فيهم بلاغة شف مو طبيعية ويقعدون يدورون مادري شيسوون

المهم انا لاحظت بالفترة اللي طافت ان يكيكي كان يحاول يتعدل والتشلخ كان مقلل منه بشكل كبير

وطبعا لأنه لقى ناس تفضحه والحلو ان شنو

ان اللي قاموا يقرون بيت القرين اكثر من اللي يقرون مقالاته

بس قبل يكيكي

اليوم هم الطبل كاتب

دروا اني سافرت وخذوا راحتهم
:p

الطبل أيضا متساءل خوش سؤال

ولأن يبي إجابة نعطيه إجابة ما يمنع حاضرين يا مستر طبل

ولكن لم يتوفر لنا رجل شريف واحد ولا كاتب شجاع واحد ليقول لنا ما هي مؤسسة الفساد!!. ومن هم مؤسسوها ومن هم إداريوها وكوادرها ومنظموها. فلا يعقل ان يعرف هؤلاء المتذاكون عن مؤسسة بكاملها ولا يعرفون من ورائها ومن يعمل بها

يبا إحنا متوفرين وموجودين بس انت تقرى وتستهبل طبعا

انا ما راح ارد عليك بأسامي تدري ليش لأن كل واحد راح يكتب تعليق بهالموضوع راح يكتب اسم من اعضاء المؤسسة وسببه، عاد مو تفشلوني

بس هم مايمنع ان نقولك ان ابو الناقلات من المؤسسة وابو الوسيلة من المؤسسة وابو كاس الخليج 16 من المؤسسة وابو مجمع اولمبيا من المؤسسة وابو القروض من المؤسسة وابو الاستثمارات وغيرهم وايد

راح تشوف شكثر فيه كتاب شجعان ما توصل انت لمواصيلهم يا بو قلادة مبارك

اي على فكرة عندي صورة لك يا طبل راح تخليك تستخف

بس مابي احطها الحين

انطرك تقل ادبك وايد بعدين اكشفك

بس فكّر بمنطقة بنيد القار شوي ومعهد فلكس القديم شويتين

ما ولهتوا عليه؟؟؟




يكيكي يعود للتألق من جديد

الظاهر الحكومة مشلخينه قضايا وهذي ضريبة الجذب طبعا

ومسكين حده خايف

خلننتقل لموقع الحدث واهوا مقالة يكيكي

يقول عن قضية ولدنا بشار الصايغ وجاسم القامس اللي يسميه ولد ليلى احمد بالمقالة مادري ليش يناديه بإسم أمه؟؟

إذا كان قاعد يتطنز هذا شي مضحك لان الطنازة مليقة اذا تبي تتطنز صج قول يصير حق نواف الفزيع

وهذي قمة الضحك

المهم يقول عن بشار

وبإسلوب الأطفال طبعا

ناس كذبت على أمن الدولة واتهمتهم بكلام مو صحيح وما شفنا القضايا هلت عليهم؟

يعني ليش ترفعون قضايا علّي وما ترفعون على هذيلاك

والله يحسسني ان ما يكتب المقال الا لما يلبس شورت ازرق وقميص ابيض ووياه قوطي فيه مطارة وتوسته مغلفه بقصدير او نايلون

دامها بقوطي اكل ليش مغلفينها بعد مادري؟؟

المهم يقول عن بشار ان جذاب

حلوين ياولاد

اعتقال مهين لبشار الصايغ مخالف لاجراءات القانون الجزائي

سؤال واحد بس وين قاعدين؟ لا يكون عبالكم ان احنا في عراق صدام حسين، في دستور وفي قانون، وراح نحاسبكم ان إما حركتوا الموضوع للنيابة لكن طراقات وسب وحجز غير قانوني هذا شيء لم ولن نقبله

امس بدر العنزي واليوم بشار الصايغ والله يعلم باللي جاي، ولا تنسون الجلاهمة الذي وان كنت من اشد المختلفين معه الا ان اعتقاله غير القانوني وما تعرض له اثناء الاعتقال من اعتداء كذلك يمثل مساسا ولا ننسى محمد هايف وما تعرض له كذلك


شفتوا هذي الثلاث فقرات

تصدقون انها كلام نواف الفزيع نفسه
!!!!

لا والله والله صج ما اتغشمر

هذا كلام يكيكي في 21-8-2007
قبل شهرين بالضبط

يعني قبل شهرين يا يكيكي يا ولد ام يكيكي قلت انهم تعرضوا للاهانة والاعتداء

واليوم تقول ان اللي يقول انهم تعرضوا للاهانة والاعتداء جذّاب ولازم الداخلية ترفع عليه قضية

يالله مبروك الظاهر الداخلية بترفع عليك قضية لأنك جذبت بكلامك عنهم


وهذي جملة من مقالته اليوم

وين المراجل وين اللي ينتخي يا كويت؟

وضحااااه

والله بس ناقص تقول ولي ونّة من سمعها ما يناما

أحب أبشركم درب المحاكم ادله، وماني خايف منه

والله درينا انك قوي وشجاع و سوبر فالكن لا تحن روح المحكمة واطلع براءة وبعدين اكتب قد ما تبي

الا صج انك انت محامي تنظيفكو؟؟

تهقون ليش سوبر فالكن كان مغتر؟؟
لا وحاط قفل بعد

شهالديرة اللي ما تعرف

لا تهدم نفس الناس


ولا تبني نفس الناس؟

يعني ما تفهمومني ليش سووا مواقف سوق شرق على البحر مو السوق نفسه على البحر


أبي تخيلوا انكم بتروحون مقابلة وظيفة وانتوا ناس جامعيين ومتخرجين من هارفارد

واللي مقابلينكم يدرون بهالشي ومع هذا ييبون لكم سؤال بهالنص

How do we spell the word car?

شنو شعوركم بالذمة ما تحسون بالاهانة وان اللي ممتحنيكم قاعدين يستصغرونكم

انا بالضبط هذا شعوري كل ما اقرى جريدة الوطن

المهم خلصنا بس عندي سؤالين اليوم أول شي شنو اسم كامل الأوصاف بمسلسل الغرباء؟

ثاني شي شنو كلمات الجملة اللي يقولها رويشد بأغنيته أمشي وبالضبط في الدقيقة سبعة و خمس تعش ثانية؟

بعد ما يقول انا هنا في غربتي صمتي غريب

17/10/2007

دام الأبو جذيه ما نشره على الولد


شلونكم

ليش السنكرس ناجح اكثر من مارس؟


يعني الحركة الدستورية ما تطل علينا الا ببلاوي ولا شنو

يكونون اليوم طالعين بموقف وطني وخلاص بنشيل علم الكويت ونحط حدس بداله

الحركة الدستورية: نؤيد إسقاط القروض وشراء الدولة مديونية المواطنين والـ 50 ديناراً

شهالخرابيط هذي

يعني مسوين خير

شهالهدر بالفلوس يمين ويسار

بدال لا تقولون نبي تنمية

نبي تطوير الديرة

تقولون اسقاط القروض؟؟

انزين ولما ناخذ قروض يديدة هم تطيحونها؟؟

لا ويعني مسكّت مبارك الدويلة ومصرح

الحركة تنطلق من قواعد شعبية ومن رؤى تصب في مصلحة المواطنين والبلاد ومن معالجات واقعية للقضايا الماثلة

خوش مصلحة للبلاد والله

فسفس بالحلال وبعدين قول مصلحة بلاد

خلاص انت ادفع من مكتبك الهندسي مو أحسن

الحركة الدستورية تؤيد شراء الدولة لمديونية المواطنين بطريقة وضوابط معروفة، وكذلك تؤيد اسقاط فوائد القروض وتحديدا اقساط سدادها بنسبة لا ترهق المواطنين»، مشيرا الى ان «الحركة تؤيد ايضا زيادة الـ 50 دينارا في رواتب المواطنين والمتقاعدين للجميع بدون اي تحفظ

شرايك بعد تطالب بضم كل المواطنين للمنتخب مرة وحدة

عندي لك خوش راي بس ما تسويه

شرايك تطالب باسترجاع فلوس علي بابا ونطيح من خلالها القروض

دام الفلوس راحت راحت

بس دام انت جذيه ما نشره على ولدك مال اتحاد الطلبة ومواقفه اللي تفشل

رئيس اتحاد وبس شاد حيله يرفض الكريسماس

نروح حق الموضوع اللي لازقين فيه سراق المال العام بجريدتهم

البهرة ومسيدهم

ناس ويبون مسيد ليش كل هاللوية

الحين وايد يقولون عنهم ومنهم السلفي أحمد الفهد بمقالته اليوم انهم مسلمين
(تم تبديل كلمة الكل بالمكتوب بالازرق)

ودين الدولة الاسلام بالدستور

وحرية الاعتقاد هم بالدستور

مادري شالمشكلة ان يكون عندهم مسيد

وبعدين في حديث ما معناه ان ستفترق امتي الى كذا وسبعين طائفة كلها بالنار الا واحدة

اي يمكن هالطائفة اهما البهرة شتسوى عليكم؟

بس طبعا الحرامية يدورون اي فتنة لانهم يدرون ان البهرة قراب من الشيعة ونواب الشيعة معاهم

فيقولون يالله فتنة يتهم وببلاش

وطبعا ما ظل كاتب الا وكتب عن الموضوع بس ناقص ياسر العيلة يكتب عنه

هذا محرر الصفحة الفنية بو دم ثقيل

اي وعلى الطاري كاتب مقال اسمه أحمد الكوس كاتب
مقال عن الموضوع هذا

بس الحلو شنو

ومختصر عقائدهم: عدم اقامة الصلاة في مساجد عامة المسلمين له ظاهر في العقيدة ولكن باطنهم شيء آخر فهم يصلون، ولكن صلاتهم للامام الاسماعيلي المستور من نسل الطيب بن الآمر ويذهبون الى الحج ولكنهم يقولون ان الكعبة هي رمز الامام

يعتقدون بان الله تعالى لم يخلق العالم خلقا مباشرا بل كان ذلك عن طريق العقل الكلي الذي هو محل لجميع الصفات الالهية ويسمونه الحجاب وقد حل العقل في انسان هو النبي وفي الائمة المستورين الذين يخلقونه، فمحمد هو الناطق وعلي هو الاساس الذي يفسر

هذا جزء من مقالته ولا ذاكر مصدر ولا شي


موسوعة ويكيبيديا العربية شتقول

لا يقيمون الصلاة في مساجد عامة المسلمين ولهم مساجدهم الخاصة بهم

ظاهرهم في العقيدة يشبه عقائد سائر الفرق الإسلامية المعتدلة أما باطنهم فشئ آخر فهم يصلون ولكن صلاتهم للإمام الإسماعيلي المستور من نسل الطيب بن الآمر

يذهبون إلى مكة للحج لكنهم يقولون أن الكعبة هي رمز على الأمام

يعتقدون بان الله لم يخلق العالم خلقا مباشرا بل كان ذلك عن طريق العقل الكلي الذي هو محل لجميع الصفات الإلهية ويسمونه الحجاب، وقد حل العقل الكلي في إنسان هو النبي وفي الأئمة المستورين الذين يخلفونه فمحمد هو الناطق وعلي هو الأساس الذي يفسر

يعني بوق عينك عينك

ما تنلام شوف وين تكتب

شكرا يا باشا

ومادامنا بصدد كتّاب الحرامية اللي اهما حرامية وكل واحد على طريقته

نروح حق الطبل بس هذا حرامي بيزات مو كلمات

طبعا موقع الأمة كاتب موضوع عنه ومتصرف وياه ويستاهل القراءة

بس خنقول الصافي على قولتهم

سر عداء الطبل حق وزير الديوان الاميري

ان الطبل اهوا اللي ييب القلادات الرسمية مثل قلادة مبارك حق الديوان

ويبيع القلادة بربع مليون

ولما استفسر من المصنع وزير الديوان اكتشف ان التكلفة 60 الف بس فوقف صفقات او بوقات الطبل

مو ماخذ شي الولد بس 200 الف من كل قلادة

دشوا الامة وشوفوا التفاصيل

عبدالله النجار

دلاغي مشقوق يا ريت تصوره وتنزله بموضوع نص صفحة

اي على فكرة نادية صقر مذيعة تلفزيون الوطن بلقاء مع طلال الفهد تقول

الناس يتكلمون عن الدستور وكأنه قرآن

خوش قناة وخوش اعداد

اخيرا باركولي يتني خوش اجازة وفيها سفرة باجر

بس لا تحاتون اللاب توب وياي وما راح اطوف لهم شي

الى اللقاء

15/10/2007

إنتخابات الجامعة -7- الحلقة الأخيرة

تحديث أسفل المقال

جريدة الوطن ماخذين راحتهم ع الآخر بهالفترة اللي طافت

بس أبشركم هذي آخر حلقة وراجعه لهم

الـــــــــحــــــــل

نختم الموضوع اليوم

بس قبل لا أدش بصلب الموضوع

وبناء على اللي شفته من تعليقات وإيميلات وردود أفعال أحب أوضح شغلتين

الاولى

أنا كنت غلطانه بمسألة مؤسس القائمة المستقلة

كتبت إن مرزوق الغانم وهذا الشي غلط

إهوا واحد ولد الشرهان

وأرد وأقول ما أنتمي حق أي قائمة بس أتابع اللي يحصل

وأشوف إن كل القوائم ما تحقق المطلوب منها بشكل مناسب بالوقت الحالي

الشغلة الثانية عبارة عن شي صار لي فترة ملاحظته شوفوا هالمثال معاي

نموذج أ

واحد ساكن بالجابرية والثاني ساكن بسلوى

الي ساكن بسلوى قال حق اللي ساكن بالجابرية

ترى المصبنة زادوا عندكم بالجابرية

اللي ساكن بالجابرية رد عليه وقال له
وشدعوة إنتوا مقصرين يعني بسلوى ذاك اليوم طايحين على واحد بأولى روضة شاري باكيت
LM
أزرق فاتح

نموذج ب

اللي ساكن بسلوى قال حق اللي ساكن بالجابرية
ترى المصبنة زادوا ندكم بالجابرية

اللي ساكن بالجابرية رد عليه وقال له
والله صدقت بس شنو نقدر نسوي عشان نحل هالمشكلة

انا شخصيا احب دايما إني أتبع نموذج ب

إنتوا يا ترى شتتبعون؟

اللي يتبع نموذج أ ما أعتقد إن الموضوع كان مفيد له كلش

واللي نموذج ب خلكم معاي

لما نتكلم عن إنتخابات يعني إحنا نتكلم عن حرية إختيار

وعن أشياء ممكن تعزز حرية الإختيار هذي

خلاص عيل خلونا نسعى حق حرية اختيار

وحق انتخابات مرتبة وحليوة وشزينها

أول شي

من المشاكل اللي طرحناها مشكلة الطائفية وان في ثلاث قوائم بالجامعة تفرق الناس وتقسمهم حق شيعة وسنة

وهذا شي يعارض الدستور اللي اهوا قانون دولتنا

دام جذيه لازم يكون في نص واضح على عدم قانونية ان يقوم كيان اي قائمة على هالاساس
أو اي شكل من اشكال التمييز المرفوض دستوريا

وفي حال انوجدت قائمة تمارس هالطائفية وتنزل على انتخابات الروابط والجمعيات العلمية

يكون في تصرف من عمادة شؤون الطلبة بتجميد انشطة القائمة ومنعها من نزول الانتخابات

اما اذا كانت على مستوى الاتحاد فالاتحاد اهوا اللي يقرر هالشي

واذا ما قرر هالشي وطبعا هذا الأمر متوقع منهم بالقيادة الحالية

فتقوم الجامعة بتجميد انشطة الاتحاد داخل اسوار الجامعة مثل ما سوت ب 78

طبعا هذا مو قمع بسبب تطبيق لقوانين الدولة والدين والفطرة والعقل وكل شي

ثاني شي

لأن العنف منتشر ولأن الوعي قليل طبعا وهذا الشي طبعا بسبة وزارة التربية بشكل خاص والدولة بشكل عام

من واجب عمادة شؤون الطلبة اعداد برامج ودورات نقابية الزامية على قيادات القوائم واذا ما حققت او شاركت اي قائمة بهالدورات ما يسمح لها بالمشاركة بالانتخابات

ثالث شي

طبعا بعض الناس متوقعين اني اقول تحالف المستقلة والوسط
لكن ما راح اقول هالشي بحكم ان هذا شي مرتبط بالقوائم
والعداء اللي بين هالقائمتين كبير
صج اني اشوفه سخيف ومحد مستفيد منه الا تيارات الاسلام المسيس
لكن ما اتوقع ان عقولهم تقدر تستوعب المشكلة بشكل جيد حاليا
وخنشوف شيصير بالمستقبل

رابع شي

اعتقد كلنا نرفض شراء الاصوات صح؟
وكلنا ندري انها جريمة حسب القانون صح؟
وكلنا نعرف ان شراء الاصوات مو شرط بالفلوس صح؟
يعني معاملة ممكن تكون شراء اصوات
صفقة ممكن تكون شراء اصوات

وبما إن الجامعة بمديرها المغوار تسمح للإئتلافية بس إنهم يدشون صالة التسجيل ويدشون على المستجدين
ويضبطونهم على قولة القوائم وهذا يعتبر شراء واضح للاصوات بحكم ان المستجد غالبا ما يدري وين الله قاطه
ويبي اي مساعدة
ومحد مسموح له بالمساعدة غير الائتلافية
فهذا يخلي الائتلافية تشتري الاصوات من خلال الخدمات وبمباركة مدير الجامعة طال عمره

لازم يتم منع كل القوائم من التواجد بصالة تسجيل المستجدين
او السماح لكل القوائم
غير جذيه ما يصير

أما نهاية عرس الدم قوية
يعني بس كان ناقص ميسا مغربي تنبت لها ريول يديدة
:)

خامس شي

المادة 9 من دستور الاتحاد "أن يكون الطالب كويتيا" هذا شرط من شروط العضويةوالمادة 12 من شروط العضوية تقول "الطلبة المنتظمون في الجامعات والدراسات العليا وما يعادلهما" بدون لا تحدد اذا كانوا بجامعة الكويت أو لأ
ومع هذا من أكثر من 5 سنين الطلبة الكويتيين بالجامعات الخاصة مغتصب حقهم بالمشاركة

يعني إنتخابات الإتحاد قاعده تصير بشكل مو قانوني من خمس سنين
ومعناتها إن الإنتخابات غير شرعية

يعني ما يصير بانتخابات المجلس يمنع سكان قرطبة من المشاركة مثلا

وهذا نفس الشي صاير بانتخابات الاتحاد

لازم تلغى نتايج انتخابات السنين الخمس الاخيرة ويشاركون بالإنتخابات اليايه او تلغى الانتخابات
لأن حالها حال المجلس الوطني

سادس شي

وهذا أهم شي اعتقد بالفترة الحالية
وأيضا مايو

الانتخابات مثل ما قلنا بحلقة سابقة
قاعده تصير خلال اسبوع من الدوام
وغالبية المصوتين يكونون من المستجدين
يعني ما يمديهم حتى يعرفون شي عن القوائم

اذا احنا جدام حل من حلين

الاول ان المستجدين ما يصوتون بأول سنة مثل اللي حاصل بكلية الطب
أو يتم تاجيل الإنتخابات للكورس الثاني في مايو
عشان كل الطلبة يعرفون وياخذون وقتهم بمعرفة القوائم المتنافسة
وهذا الشي ما راح يفيد الا اذا تحقق رابع شي

اي وعلى فكرة تم إختيار مايو
بسبب ان في طلبة مستجدين بس عددهم مو كبير ينقبلون بالكورس الثاني وهم تكون لهم فرصة
يتعرفون على القوائم

وأيضا مايو خل تكون شعار
وطبعا تم اختياره
لأن بمايو 2005 حقوق المرأة
وبمايو 2006 الدوائر
وبمايو 2007 سراق المال العام
صار مايو عنوان للإصلاح

ويالله همتكم

ويا قوائم انا عطيتكم حل ممكن يحقق اكبر قدر من حرية الاختيار
وما عليكم الا المطالبة بهالشي

وطبعا الرسالة موجهة حق المستقلة والوسط وصوت الكويت والهندسية والاكاديمية وتجمع القوى الطلابية واتحاد امريكا بعد

انا سويت اللي علّي يعطيني العافية الصراحة
وبدون مجاملة ما قصرت
وسويت واجبي واكثر من واجبي
وأيضا مايو

وباي


إستفتاء على أجكر عضو مجلس أمه حالي

صوتوا في مدونة

وجهة نظر



11/10/2007

إنتخابات الجامعة -6


اللي مو عاجبهم موضوع الجامعة ويبون ارد ع الحرامية وجريدتهم اقول لهم بس ليما الاربعا الياي تحملوني لو سمحتوا

لـــيـــش

وايد اخبار حلوة االيوم

أول خبر باجر عيد فعيدكم مبارك

وأيضا مايو

ثاني خبر سمعت ان واحد من صحفيين الوطن بيرفع قضية على بيت القرين

وانا الصراحة تزيد قناعتي يوم عن يوم ان غباؤهم وصل حده

يعني اكثر جريدة منتشرة بالكويت على قولة خليف ترفع قضية على مدونة؟؟؟

ومو بس جذيه

تزيد الشهرة وأصير المدونة اللي هزت جريدتهم

ومو بس جذيه

أصير أول مدونة كويتية تنرفع عليها قضية

اتمنى يوم الثلاثا الياي يرفع القضية

وأيضا مايو

الخبر الثالث وصلني حزّة الفطور على الايميل شكله مو صايم اللي دازه

بس قبل لا انقل الخبر

لازم نعرف ان الوطنية للاتصالات سحبت كل اعلاناتها من تلفزيون الوطن وجريدة الوطن قبل رمضان بمدة قصيرة

وهاجموها الوطن وحاربوها

دانه
توه فاز فريق الوطنية للاتصالات بدورة الروضان اللي تنقلها قناة الوطن
وهذا يعني ان تلفزيون الوطن سوا دعاية شبه يومية للوطنية من اول يوم برمضان الى آخر يوم وببلاش بعد
وزيادة بعد ان فريق الوطنية كان بمجموعة اسمها مجموعة تلفزيون الوطن
مبروك


مبروك للوطنية

وأيضا مايو

المهم ندش بالموضوع

ليش منقسمة عندي لي قسمين بكتبهم اليوم

اول ليش

اهوا ليش اكتب هالموضوع؟

وثاني ليش
دام كل هذي فضايح الائتلافية ليش تفوز وبفرق كبير؟

وندش على اول ليش
في معظم مدارس الكويت اذا مو كلها

مدارس البنات او الشباب

يعني من عمر 6 الى عمر 17 وشوي تقريبا

نلاقي ان الطلبة ما بينهم اي مشاكل وماكو تفرقة طائفية او قبلية أو غيرها

وحتى اذا لقيناها ممكن تنحل بسهولة

لكن بكل سنة ينقبل 6000 طالب وطالبة بالجامعة تقريبا

واهيا المرحلة اللي ترسمهم

من هال6000 تقريبا 5000 مستجد يصوتون بالانتخابات باول سنة ومعظم هالاصوات تروح للائتلافية

السبب شنو

لأن الإئتلافية اهيا اللي تتولى التالي بحكم قيادتها للاتحاد
كشوف المقبولين توصلها قبل النشر بالجرايد يعني أول من يزف الخبر للطالب اهما الائتلافية
تسجيل الطالب المستجد بالجامعة تتولاه الائتلافية
يتم تعيين مرشد من طلبة الائتلافية للطلبة المستجدين حلوه هذي

النتيجة شتكون
ان الطالب يرتبط شغله الاكاديمي بشكل كبير مع الائتلافية
وطبعا يصيرون بهالحالة اول ربع له داخل الجامعة
وعاد تبلش تغذيتهم بافكار ورؤية الائتلافية مثل الطائفية وتحجيم المرأة وغيرها

وعندنا قائمتين ينتهجون نفس المسار الطائفي اللي اهما الاسلامية والاتحاد الاسلامي
شوفوا شيزرعون عاد بمخوخ الطلبة المسالمين الزينين
يعني المستجد يدش الجامعة غالبا ابيض وملاك من ناحية التفرقة وغيرها
يطلع بعد اربع سنين اذا كان من انتاج القوائم الثلاث طائفي من الدرجة الاولى
وكله يقعد بالمرسم
:)
وكله على حساب الكويت طبعا

تخيلوا معاي غسيل المخ هذا اللي استمر لأربع سنين شنو المدة اللي بينعكس فيها على الكويت

يعني الخريج راح يشتغل باي قطاع بالدولة لمدة 15 الى 20 سنة وشوفوا الدمار

وماكو دليل اوضح من التخلف اللي بدا ينتشر بالكويت وبكل المجالات من بداية الثمانينيات ليما اليوم

وسبب رئيسي من اسباب هذا التخلف
اهوا مكينة التفريخ الطائفية الحزبية داخل الجامعة

عندي ايمان مطلق ان اذا انصلح حال الجامعة وايد الاوضاع بتتغير بالكويت

وأيضا مايو

يعني معقولة انتخابات الجامعة بتغير شي؟؟
يبا الديرة كلها خربانه مو واقفه على شباب الجامعة؟
لا انتخابات الجامعة تغير اشياء

منو حرك حقوق المرأة بقوة غير شباب الجامعة او شباب توهم مخلصين الجامعة
والنتيجة اقرار حقوق المرأة
منو حرك تقليص الدوائر غير شباب الجامعة او شباب توهم مخلصين الجامعة
والنتيجة تقليص الدوائر
منو اللي حرك قضية سراق المال العام
غير شباب الجامعة أو شباب توهم مخلصين الجامعة
والنتيجة ابعاد علي الجراح

ولاحظوا ان كل هالقضايا تفعلت بدون لا يكون الاتحاد طرف رئيسي فيها
وياريت ما ينط احد ويقول الاتحاد قاد الدوائر
لأن السؤال وين 5000 صوت عن ساحة الارادة اذا انتوا اللي قدتوا؟؟

يعني شوفوا معاي اقلية شباب الجامعة كان لها دور قوي بثلاث قضايا مصيرية
غيرت شي بالكويت للأفضل

فتخيلوا معاي تكون القيادة بيد نفس مجموعة الشباب اللي حركت الكويت بهالشكل

انزين خندش بالليش الثانية

غريبة محد سأل شنو أيضا مايو

شنو ما فيكم لقافة كلش!!؟؟

بس لاتسئلون ما راح اقول

سؤال وايد منطقي
ليش الائتلافية تفوز طول هالسنين رغم بلاويها؟

مثل ما قلت بالليش الأولى إن الائتلافية تتفوق بشي ما تملكه اي قائمة ثانية اللي اهوا

لأن الإئتلافية اهيا اللي تتولى التالي بحكم قيادتها للاتحاد
كشوف المقبولين توصلها قبل النشر بالجرايد يعني أول من يزف الخبر للطالب اهما الائتلافية
تسجيل الطالب المستجد بالجامعة تتولاه الائتلافية
يتم تعيين مرشد من طلبة الائتلافية للطلبة المستجدين حلوه هذي

وطبعا هذا يشكل فرق كبير ومنافسة غير متوازنة مع باجي القوائم
ومو بس جذيه
القوائم المتنافسة مثل الوسط والمستقلة يتحاربون ما بيناتهم وبشكل حده بايخ وعلى أتفه الأمور وهذا هم يصب بصالح الإئتلافية

ماكو قائد طلابي قوي للأسف بالفترة الأخيرة

يمكن كلامج عدل بس هم في شغله
يعني كا أمريكا انزاحو الائتلافية من قائمة ما صار لها ثلاث سنين


صح هالكلام
لكن لا تنسون ان بأمريكا طريقة تواصل الائتلافية مع الطلبة وايد اصعب من طريقتهم داخل الكويت
اكو دواوين بالكويت والمسافة بين الجهره ليما الوفره ما تزيد عن ساعة ونص بالسيارة

طبعا هذا غير طبيعة الحياة بامريكا البعيدة عن القيود
غير ان اللي يبي يصوت لازم يدفع مادري شكثر عشان يروح مكان التصويت

والاهم ان عقليات الطلبة هناك اكثر تقبل حق الراي اليديد وتسمع احسن من قوائمنا هني الوسط والمستقلة تحديدا

وأيضا مايو

عيدكم مبارك مرة ثانية

والوعد مع الحل يوم الثلاثا ان شاء الله


10/10/2007

إنتخابات الجامعة -5


وأيضا مايو

أول شي نهاية عرس الدم تلقونها عند عاجل


ونكمل مع

الــمــشــكــلــة


مثل ما قلت لكم هالجزء من المشكلة راح يكون مختص بالاتحاد وقيادته


واللي فيه القلب لا سمح الله لا يقرى ترى بلاويهم وايد


بس اشكر ساره وحسين وفهد و آلاء ويوسف

على تزويدي ببعض الصور

وهم قبل لا ابلش احب ارد على سؤال مطقوق

مطقوق يقول شنو الاشياء الزينه اللي سووها باجي القوائم

أنا أقول له إن أنا ما اسوق باي شكل من الأشكال حق القوائم الباجية بوضعها الحالي

ومع هذا ما نقدر نحكم على القوائم شبتسوي طالما اهيا ما مسكت الاتحاد بعد الائتلافية عشان نقدر نقارن ومقارنة الاتحاد بالجمعيات والروابط مو منطقية

والوضع الطلابي بوضعه القائم كلش مو شي

خلونا ندش بالموضوع

اول شي أو اول جذبة للائتلافية اهيا انكارها المستمر لتبعيتها للاخوان المسلمين وجمعية الاصلاح بشكل خاص

وعشان نسكر هالباب من أول شي هذا كلام عبدالله المطوع الله يرحمه في بداية التسعينيات

وأيضا مايو





هذي التبعية وخلصنا منها وماصار في اي مجال للنقاش

نروح حق موضوع ثاني

المعروف ان الاتحاد له ميزانية خاصة والهدف منها خدمة الطلبة وفايدتهم سواء من خلال انشطة ولا دورات علمية ولا اصدارات

وهذا شي نفهمه لكن ان تقوم بهدر فلوس الطلبة بهالشكل المو منطقي كلّش يخلينا نحط الف علامة استفهام

شوفوا وحكموا

وأيضا مايو














الوثيقة الياية عبارة عن موضوعين الموضوع الأول يعبر شلون هذي القيادة تمارس الوعد بعد الوعد والنتيجة ماميش

والموضوع الثاني عبارة عن توضيح لطيف جدا

نيو وينك ما مريت؟؟

أرت يعني انت موجود وتكتب شنو اكتب لك

ليش انت موجود؟

مثل ما نعرف موقفهم من الاختلاط وشلون مستذبحين على فصل الاختلاط بس بالصورة مبين غير اللي يطالبون فيه

اي وعلى فكرة ترى الائتلافية وقفت مع حقوق المراة ومع هذا ترفض الاختلاط

يعني شلون يقطون نورية بغرفة والباجي كلهم بالقاعة

واذا تبي تتكلم شلون؟؟

صوت المراة عورة

وأيضا مايو



هذي احدى تحف التيار الديني بكلية الشريعة ما راح اعلق عليها اقروها انتوا بس

وأيضا مايو





سعود الناصر كان سفير الكويت بامريكا وقت الغزو

اسمه غزو حق اللي ما يعرف

اسمه غزو إعتداء إجتياح عدوان حق اللي ما يعرف

شوفوا شيقول بس وتعرفون شنو يعني هالقيادة

وأيضا مايو







الاستاذ محمد الوشيحي والاستاذ عبداللطيف الدعيج

أنا على الاقل اعرف ان انتوا الاثنين تتابعون المدونات

اذا قريتوا هالموضوع فأنا بحاجة لأقلامكم تنشره بالجرايد

لأني اعرف انكم تحبون الكويت

يمكن الناس تقول سعود الناصر متحامل على التيارات الدينية

وعشان جذيه قال هالكلام

وانا أقول ممكن البعض ياخذ هالموضوع حجة ويقول لا جذب عيل شوفوا هالوثيقة

وأيضا مايو


البيان صادر في 9-9-90

خامس اسبوع من الغزو اسمه غزو

يعني مو بعد التحرير

مو قبل الغزو

خامس اسبوع والاخوان المسلمين يسمونه خلاف

ويطالبون بانسحاب القوات الاجنبية

ونصير مثل فلسطين ندور عن حل عربي اسلامي من 1948

اي مو الحل العربي الاسلامي خلى السودان والاردن واليمن وفلسطين وليبيا وغيرهم ضد الكويت

شنو الحل اللي تبونه؟؟

أسرار صارت خلاف؟؟
قبازرد صار خلاف؟
سناء الفودري وفاء العامر سارة الحسن هشام العبيدان خلاف؟
أحمد العصفور فايق عبدالجليل خلاف يا مسلمين؟
الطفل أحمد عبدالله بوحمدي عمره اربع سنين صار خلاف يا ائتلافية؟
شهداء بيت القرين خلاف؟
دمعة جابر الأحمد خلاف؟
إنت يابو دموعه تهطل وينك عن الخلاف؟
قسما بالله العظيم هذيله مفروض يتهمون بالخيانة العظمى مثل علاء حسين وعبدالفتاح البدر وحسن قبازرد وغيرهم من الخمه
حاولوا يخشون الوثيقه كثر ما يقدرون لكن الله كشفهم

شوفوا
والله لو الائتلافية مسويه الجامعة جنه
والطيور تغرد بكل مكان
وكل الاوضاع اروع ما يمكن
هذا الموقف القبيح يكفي ان ينقطون بمزبلة التاريخ

اللي يقول انه ائتلافي والله مفروض يستحي
ويسأل نفسه لو واحد من الشهداء كان عارف بموقف طلبة ديرته
شنو راح يكون موقفه وشعوره

وابي احمد فهد الاحمد
ابن الشهيد
شلون يفتخر ان ماكو نشاط حق الائتلافية الا ويرعاه
مو ابوك شهيد الغزو
ولا ابوك ضحية خلاف؟؟؟

سراق المال العام انتوا وجريدتكم اللي متمسكة بمصطلح دول الضد وينكم عن اتحاد الضد هذا
ليش تمجدونهم؟؟
اي عرفت ليش لو مو الغزو جان ما عندكم جريدة

قبل لا اسكر موضوع المشكلة بقول شغله

ترى الاخوان المسلمين يردون على هالاتهامات وغيرها برد ولا اقبح

يقولون احنا عيال اليوم ووعمرو دياب يقول مابلاش نتكلم بالماضي
وانا اقول لهم قائمتكم تفاخر بمواقف بالماضي بس لما تيي على الفضايح تصيرون عمرو دياب؟
وثاني شي اذا ما تبون نتكلم بالماضي
مابي اسمع واحد فيكم يقول ان الائتلافية تقود الجامعة لاكثر من 25 سنة
لان ما بلاش نتكلم بالماضي هم تنطبق على الانتصارات

وأيضا مايو

آخر شي احب أقوله
الاتحاد الوطني في السنين الاخيرة ما يقدم تقريره المالي للطلبة
والاتحاد ما يسوي الجمعية العمومية داخل الجامعة
مع ان الاماكن متوفره سواء مسرح الخالدية او مسرح الشويخ وغيرهم
واساسا ما يعلن عن مكان الجمعية العمومية الا قبلها بيوم

طبعا عشان لا تنكشف البلاوي

عموما صار في تغيير بسيط
وباجر بدال لا تكون حلقتنا عن الحل راح تكون بعنوان ليش وبعد العيد نقدم الحل

وأيضا مايو

09/10/2007

إنتخابات الجامعة -4

هلا


الــمــشــكــلــة

قبل لا ابلش أنوه تنويه مهم

إن علي حسين العوضي أحد مصادري في هذا الموضوع

ماهو علي العوضي عضو الوسط الديمقراطي في كلية العلوم الادارية سابقا

بل شخص مختلف عشان لا يكون في لبس

قسم المشكلة من الموضوع راح ينقسم لقسمين الأول اكتبه اليوم والثاني باجر

القسم اللي راح اتكلم عنه اليوم عبارة عن المشاكل العامة بإنتخابات الجامعة

وباجر راح اتكلم عن المشاكل الخاصة والمتعلقة بالإتحاد وقيادته

المشاكل العامة عبارة عن التالي

الحركة الطلابية ليما الحين مكانك راوح بمعنى إن المشاكل نفسها تتكرر

وأعطيكم نموذج منها بس وهذا اللي كانوا يطالبون فيه القوائم من اكثر من 20 سنة

حل مشكلة الشعب المغلقة
إلغاء إحتكار المواد من قبل هيئة التدريس
المطالبة بتطبيق نظام الفصلين الصيفيين

هذا طبعا غير ان كلية الآداب وكلية البنات وكلية التربية مازالوا يداومون بمباني مدارس
كلية العلوم وكلية الهندسة مازالوا في المبنى نفسه من سنة 66

بعض المناهج اللي تتدرس يرجع تاريخها إلى السبعينيات يعني عادي نلقى جملة
إن الحرب الباردة بين الإتحاد السوفييتي والولايات المتحدة ألقت بظلالها على كل دول المنطقة

عادي عادي نلقى مادة تعلم الطباعة على الآلة الكاتبة

اي صج نهاية عرس الدم ما يتني ليما الحين واذا ما وصلتني اليوم ما راح انزلها وخل يستانسون اللي متابعين

التقسيم الطائفي البغيض لبعض القوائم الطلابية

يعني الإئتلافية والإتحاد الإسلامي على سبيل المثال نلاقيهم وعلى مر تاريخهم اللي اكثر من 30 سنة

ما نزلوا مرشح واحد شيعي بالنسبة للائتلافية والاتحاد الاسلامي

ومانزلوا ولا مرشح سني بالنسبة للاسلامية
وهذي القوائم حصلت على أكثر من 7000 صوت في الانتخابات الأخيرة من اصل 11000 صوت تقريبا؟؟؟؟

قناعة ممثلين وأعضاء القوائم بأنهم انبياء ومنزهين عن الخطأ

يعني عمرنا ما سمعنا إن الإئتلافية تعتذر مثلا عن موقف معين ولا الاسلامية ولا الاتحاد الاسلامي ولا غيرهم
لكن الوسط اعتذر عن حادثة التزوير اللي حصلت بسنة 2000 والمستقلة اعتذرت عن حادثة سب الصحابة بسنة 2002 وفصلت العضو اللي سب مع ان كان ماسك منصب قيادي
وهذا شي يحسب لهم

تمسك القوائم الطلابية بحل مشكلة المواقف على مر السنين

وهذا اللي يخلينا نتوقع إن اذا الطالبة سفطت بمكان عدل معدلها يصير 4 نقاط

والمشكلة إن ليما الحين ما انحلت هالمشكلة البسيطة

العنف الطلابي يعني اذا اختلفوا مع بعض يطقون بعض مثل الميانين الحمدلله والشكر

والغريبة ان 99% من احداث العنف اذا مو 100% تكون الائتلافية طرف فيها او تيارات الاسلام المسيس

موعد الانتخابات الطلابية اهوا من اعظم المشاكل

يعني هالسنة مثلا صارت انتخابات الجامعة خلال اسبوع واحد من بداية الدوام

يعني اكثر من 6000 طالب وطالبة مستجدين ما كان عندهم الا اسبوع واحد يحددون اختيارهم للقائمة اللي تمثلهم
والمستجدين مساكين يتراوالي على ما يدلون قاعاتهم يبون اكثر من اسبوع

مع العلم ان موعد انتخابات الاتحاد يحدده اتحاد الطلبة

إدارة اتحاد الطلبة لانتخابات اتحاد الطلبة هذي بروحها نكتة
طبعا يمكن احد يقول ان كل قائمة لها مندوب ويحضر الفرز

لكن لنفرض ان مندوب القائمة المستقلة شك بالنتايج
وبغى يطعن فيها
وراح وطعن
منو راح ينظر بالطعن؟؟؟

نيو وبشار وينكم؟؟

التغطية الاعلامية السيئة للانتخابات الطلابية
اكثر جريدة تهتم بانتخابات الجامعة اهيا جريدة خليف
خليف عنده مجموعة حبربش وانا قد هالكلمة واعنيها
عبدالحميد المضاحكة نهى الفيلكاوي يوسف كاظم وواحد ولد الحمادي وواحد ولد العجمي
وانا عشان ابين مستواهم بس
المضاحكة مثلا سألوه ليش تنقل اخبار غلط
جان يقول لانهم يدفعون أكثر
ولد الحمادي وولد العجمي أعضاء بالائتلافية حاليا ويهاجمون اي احد ضدهم
حتى لما الإئتلافية طقت صحفي بالقبس
وانفصل طالب الإئتلافية
حبربش الوطن ماذكروا ولا كلمة عن هالموضوع
وطبعا هالاحتضان للائتلافية نابع من سياسة خليف وربعه لأن تيار الاسلام المسيس ما يتكلم عن بوقاتهم

اي على فكرة يوسف كاظم وهذا بروحه نكتة شفتوه بتلفزيون الوطن المتين بوخدود كان صحفي وإنطرد من السياسة لانه كان ينقل اخبار غلط
واول ما انطرد عرضوا عليه الوطن مبلغ خيالي بالاضافة لمبلغ اضافي في حال كتابته اي موضوع يهاجم فيه المدافعين عن المال العام بالجامعة

اللي يبط الجبد صج ان الوسط والمستقلة دايما يطالبون بمحاربة الحرامية
بس نص تصريحاتهم يعطونها حق الوطن!!!؟؟؟

ومن المشاكل بعد ان الاتحاد ما يسمح للقوائم بتوزيع مطبوعاتهم داخل الجامعة الا بفترة الالنتخابات بس
يعني خلال اسبوع او اسبوعين بالكثير لازم يسوقون حق قوائمهم

وتدرون ان الاتحاد ما يسمح لطلبة الجامعات الخاصة الكويتيين بالتصويت بالاتحاد مع ان لهم الحق
المادة 9 من دستور الاتحاد "أن يكون الطالب كويتيا" هذا شرط من شروط العضوية
والمادة 12 من شروط العضوية تقول "الطلبة المنتظمون في الجامعات والدراسات العليا وما يعادلهما" بدون لا تحدد اذا كانوا بجامعة الكويت أو لأ

ومع هذا من أكثر من 5 سنين الطلبة الكويتيين بالجامعات الخاصة مغتصب حقهم بالمشاركة

فقدان ايمان الطلبة بأن الانتخابات تسوي او تغير شي
وهذا اللي يخلي وايد ناس ما يصوتون او يصوتون عشان ربعهم مو عشان مبدأ او فكرة

الاعتماد على الشعارات من قبل القوائم بدون وجود شي على ارض الواقع
يعني مثل ما قلنا الوسط والمستقلة يحاربون سراق المال العام بنشراتهم لكن يتراكضون على جريدة الحرامية للتصريح
وهذا اكبر تناقض
وغيره وايد من الامثله

قناعة البعض ان الائتلافية ساعدتهم بالتسجيل
وطبعا ما ساعدتهم لوجه الله لأن يبون اصواتهم والشرهة على الجامعة اللي تسمح للائتلافية بالوجود داخل صالة المستجدين بروحها
يعني يمعوا اصوات
والطالب المسكين ما يشوف غيرهم فيقول والله ما قصروا

عموما هذا قسم المشاكل العامة
وترقبوا بلاوي الاتحاد والإئتلافية باجر
وصج المدونين خل يسوون دعاية حق موضوعي بعد
اتشرط مو؟ بس أمون

08/10/2007

إنتخابات الجامعة -3

هلا

الــــواقــــع


أول شي وقبل لا أكمل الموضوع

أحب أقول

ويع ويع ويع على النجرة اللي لاحظتها ببعض تعليقات البوست اللي قبل هذا

مادري ليش الأودام يكونون شزينهم لما أكتب عن كل المواضيع

بس لما يصير الكلام عن انتخابات الجامعة

يستخفون الحمدلله والشكر

كل واحد يقول الزين عندي

وانتوا فعلتكم وتركتم

وأبوي أحسن من إبوك

شوي ثقلوا ترى القوائم محد سواها الا اوادم وعادي يغلطون مو انبياء ترى علامكم

هذي شغلة

اما بالنسبة للي يقول في أغلاط تاريخية

انا يمكن اتفق معاكم والاسباب بسيطة

إن المراجع اللي تتكلم عن الحركة الطلابية بالكويت بشكل مفصل

اهيا 3 مراجع اساسية فقط حسب علمي

كتاب حق نورية السداني

وكتاب حق علي العوضي

وكتاب حق حمود عقله العنزي

وانا استمد من كتابين من هالثلاثة
الا صج بشار ونيو وشروق مو قاريه تعليقاتكم من زمان
السلام لله

لسبب واحد بس

ان علي العوضي ماكان ينتمي لأي قائمة من القوائم اللي تعرض لها بكتابه وهذا يعطيه موضوعية اكبر

نورية ماكانت طالبة لما كتبت الكتاب

اما حمود عقله فإهوا إخو النائب الحدسي خضير العنزي وعضو مع الائتلافيه لما كتب كتابه

والكتاب أساسا من إصدارات اتحاد الطلبة بقيادة الائتلافية

فأكيد بعيد عن الموضوعية

أما للي عايشوا فترة من الفترات وشافوا ان المكتوب ما يطابق اللي شافوه

فهذا مو ذنبي

هذا بسبب ان الكتب مكتوبة بفترات متباعدة

يعني واحد بأول الثمانينيات والثاني ب 2000

يعني اكيد عدم معايشتهم لبعض الفترات ما تخليهم ينقلون بوضوح كامل

يعني اذا محد وثق الفترة اللي الحين مثلا
اكيد اللي بيكتب عنها بالمستقبل راح يشوف عدم تطابق كامل

واللي عنده اي تصحيح خل يدزه على الايميل مع ذكر مصدره

وترى والله اذا بتكملون بتكسر المياديف والتحبيط والتغليط

والله
اني راح أكمل الموضوع

وقد أعذر من أنذر

:p

المهم

قلنا امس إن الإئتلافية مارست تكتيك يديد

والمستقلة هم بدت تكون اكثر انفتاح على كافة الطلبة وقامت تستقطب كل فئات الطلبة من نص التسعينيات تقريبا

وهذا اللي خلّى ارقام المستقلة ترتفع بالتدريج وكانت قفزتها الفعلية بانتخابات 97

ب 96 يابت 520 صوت بالاتحاد وب 97 قفزت بالارقام ليما 1119 صوت

يعني بنسبة ارتفاع اكثر من 100% وهم صارت تنافس بكلية العلوم الادارية او التجارة سابقا

هذي رنة علي جمعة بالخراز

وهذي الأصلية بصوت زهور حسين

اول ما تروحون على الصفحة ضغطوا على

free

وبعدين كتبوا الاحرف بال
security box

ومع هالتطور للقائمة المستقلة

وخصوصا ثقلها في كلية العلوم الادارية

واقترابها من الوسط

قامت الائتلافية وبحركة مدروسة جدا وقلبت الوضع

ومادري اذا كانت مدبرة مع المستقلة او لأ

بس الارجح ان لأ

انسحبت الائتلافية من انتخابات كلية العلوم الادارية سنة 98

وهذا اللي خلّى المنافسة بالادارية تصير بين قائمتين

وبالفعل نجح تكتيك الائتلافية وفازت المستقلة بإنتخابات الادارية بفرق اقل من 20 صوت عن الوسط

سنة 97 كلية العلوم الادارية
الوسط 624
المستقلة 412
الإدارية (إسم الائتلافية بالعلوم الادارية) 389

سنة 98
مستقلة 787
وسط 769

لوجمعنا أصوات الادارية باصوات المستقلة ب97 يطلع الناتج أحبك لا لا ملاقة واللي قال جذيه واهوا يقرى هم مليق الناتج 801
يعني مجموع زايد ب14 صوت عن مجموع اصوات المستقلة ب 98

وهذا اللي خلّى المستقلة تفوز بأثقل كليات الجامعة ومو بس جذيه

هم فازت بالمركز الثاني بإنتخابات الاتحاد وبفرق 500 صوت عن الوسط

وزاد للألف في 99

وانتهى صراع الديكة بين الوسط والائتلافية

وبدى صراع يديد بين المستقلة والائتلافية

استمر الوضع جذيه الائتلافية الاول والمستقلة الثاني والوسط ثالث لغاية 2004

لما فازت القائمة الاسلامية بالمركز الثالث وطاح الوسط للمركز الرابع ونزل تحت حاجز الالف صوت لأول مرة من 1992

ومازال الوضع بهالترتيب مستمر لغاية انتخابات الاتحاد الاخيرة

مع العلم ان بالست سنين الاخيرة الائتلافية والاتحاد الاسلامي ينزلون مع بعض بالانتخابات يعني متحالفين
ومع العلم بعد إن الوسط والمستقلة متفقين بالفترة الأخيرة بوايد قضايا
مثل حقوق المراة - تقليص الدوائر - محاربة الحرامية - والاهم تطبيق الدستور
وخلافهم من اللي اشوفه و هجومهم على بعض يعتمد على الماضي بشكل اساسي

هذا واقع الانتخابات بالجامعة

ويمكن النقطة اللي لازم نبينها

ان الائتلافية تمارس اسلوب محاباة القائمة اللي بالمركز الثالث ومحاربة المركز الثاني

وهذا اللي ممكن يأدي بالسنين اليايه الى حصول الاسلامية على المركز الثاني

نكمل باجر مع فصل يديد من فصول الموضوع بعنوان المشكلة

على فكرة واحد اسمه يوسف المنديل كاتب مقالة بالوطن بعنوان فتيات الصالونات النسائية

شوفوا معاي مستواه بس

وباجر هم راح أقول نهاية عرس الدم بلون مختلف عشان اللي متابع المسلسل ما يقراه

07/10/2007

إنتخابات الجامعة -2

هلا

الــــواقــــع


وقفنا عن الكلام المباح أمس عند إحتجاج الإئتلافية قبل نهاية الفرز

وكان الرد عليهم إن ما يصير تطعنون قبل نهاية الفرز

وطبعا اصحاب الإسلام المسيس ما عجبهم الكلام

فقاموا وقسموا نفسهم حق ميمنة وميسرة وقلب

زين ما حفروا خندق بعد

ودشوا القاعة وهوشة وطق كالعادة


وهذا اللي خلّى ادارة الجامعة تجمد انشطة الإتحاد داخل الجامعة

بسنة 78 واستمر التجميد لغاية مايو 79

وطبعا القرادة كانت ان ب 79 كانت الثورة الايرانية ببدايتها

وطبعا تاثرت الكويت مثل كل دول المنطقة بهالشي

وبلشت الطائفية تعم بالكويت

ناهيكم عن انقسام التيار القومي اللي قلنا عنه في الحلقة اللي طافت وهذا هم أثر على انتخابات الجامعة


وبالفعل كانت النتيجة متوقعة

يابت الائتلافية 1241 صوت

الحرة الاسلامية الحرة وهي عبارة عن قائمتين شيعيتين متحالفتين 730 صوت

والوسط الديمقراطي 417 صوت

على فكرة قائمة الاتحاد الاسلامي انسحبت في 79 لصالح الائتلافية بعد

وطبعا من 79 ابتدى العهد الجديد لانتخابات الجامعة وليما اليوم مستمر

بس المشكلة كانت بسنة 80 لما قررت قائمة الوسط الانسحاب من الانتخابات احتجاجا على انتخابات 79

وهذي اظن اكبر غلطة بتاريخ الحركة الطلابية الكويتية كلها

واللي قرر القرار بذاك الوقت بالوسط لازم يتحمل المسئولية ليما اليوم

المهم طبعا بفترة الثمانينيات والحرب العراقية الايرانية اللي قسمت الكويت شيعة وسنة وليما الحين بعض الآثار موجودة

وظلت المنافسة بين الشيعة والسنة بالانتخابات حدها قوية لدرجة ان بسنة 84 صار الفرق بين الائتلافية والحرة الاسلامية الحرة 700 صوت بس

وبسنة 85 نزل مرشح مستقل بكلية الهندسة يقولون إن إهوا مرزوق علي الغانم بس ماني متأكدة

وبسنة 86 عيال بطنها على قولتهم استثمروا فكرة المرشح المستقل ونزلوا القائمة المستقلة وكانت فكرتها الاساسية

إنها تكون قائمة التجار

يعني اذا واحد بوكه سعره أقل من 100 دينار ما يدش القائمة

حتى في واحد ليما الحين منقهر ان سعر بوكه 99 دينار وما دخلوه القائمة

وطبعا هالشي عادي يعني مو عيب

كل واحد وطريقة تفكيره ورؤيته

بس انا الفكرة ما تعجبني

شنو المسلسل اللي مافيه الا ضابط واحد من بدايته ليما حلقة أمس؟

واستمر الوضع جذيه لنهاية الثمانينيات

وبسنة 89 استمر الوضع لكن التغيير صار بموعد الانتخابات بدال لا يكون بالكورس الثاني صار بالكورس الأول

او بداية الكورس الأول بالأصح يعني الطالب المستجد ما يمديه يتعرف على القوائم الا خلال شهر واحد

بعد ما كان عنده فرصة يتعرف عليهم لمدة 6 اشهر تقريبا

وانتخابات الكورس الاول مستمرة بالكورس الاول من ذاك الوقت

الكل توقع التغيير بعد الغزو

خصوصا ان الغزو وحد الكويتين شيعة وسنة وبدو وحضر

بالاضافة للموقف الوصخ اللي سواه الاتحاد بقيادة الائتلافية ب 9-9-90

وهذا الشي راح اتطرق له بالحلقات اليايه

لكن الغريب ان ب 91 هم فازت الائتلافية وهم الحرة الاسلامية الحرة حصلت على المركز الثاني

وبسنة 1992حصلت قائمة الوسط على المركز الثاني للمرة الاولى بتاريخها والكل استبشر ان خلاص الوسط يبي يمسك الاتحاد بالسنوات اليايه

واستمرت المنافسة بين هالقائمتين مع اختفاء تدريجي للاسلامية

وصعود بطيء للمستقلة

وطبعا من 92 كان الوسط الديمقراطي مسيطر على كلية التجارة وهالكلية لها ثقل خاص بالجامعة مادري ليش

لدرجة ان بسنة من السنين الوسط حصل فيها على ما يقارب الألف صوت بهالكلية بس

وهذا اللي خلّى الإئتلافية تمارس تكتيك يديد وقوي

راح أذكره بآخر حلقات الواقع باجر

على فكرة

ما أتبع ولا قائمة ولا لي شغل فيهم بس هذي قناعاتي لحّد يفكر إني اجامل احد على حساب أحد

واللي مو عاجبه كلامي

ما أقول له إلا إن كلامي حلو

ماشاءالله عليّ والله يحفظني

:p

اي شاركوا بالتصويت على اليمين للضرورة القصوى خلال يوم واحد بيتسكر التصويت

06/10/2007

إنتخابات الجامعة -1

عدل عدل مو مضيعين بس مغيره التصميم عادي كيفي

الـــــواقـــع

إئتلافية مستقلة إسلامية وسط ديمقراطي

أسامي قوائم طلابية بجامعة الكويت يعرفها كل طالب جامعي ويعرف بعضها اذا مو كلها كل أهل الكويت تقريبا

بعد إصرار وتكرار من ناس وايد

ولأني شفت المدونين ما غطوا موضوع الجامعة بشكل جيد على الأقل المدونين اللي أتابعهم

قررت إني أكتب موضوع مطول عن انتخابات الجامعة

وراح أقسمه لمحاور رئيسية تنقسم للواقع والمشكلة والحل

بشكل يومي لغاية نهاية رمضان ان شاء الله

عاد إقروا وخاصة ربع القوائم

الواقع يقول يا محفوظين السلامة إن الحركة الطلابية الكويتية إهيا الأعرق بالمنطقة كالعادة

وهذي الحركة مرت بمراحل

المرحلة الأولى في العمل الطلابي المنظم

كانت من بداية افتتاح جامعة الكويت بسنة 1966

إلى 1974

كانت هالمرحلة اهيا مرحلة التأثر بالتيار القومي او الناصري بالاصح

ومع نكسة 67 ووفاة جمال عبدالناصر بعدها ب3 سنوات

لقى تيار الاسلام المسيس فرصة ان يبني له كيان وان يسعى لدخول الجامعة

خصوصا ان القوميين انقسموا لثلاث تيارات اللي اهما تيار ثوري وتيار الدكتور احمد الخطيب وتيار العم جاسم القطامي

ويمكن الظهورالابرز لتيار الاسلام المسيس كان من خلال ندوة الاختلاط بنوفمبر 1971

هالقضية اللي ليما اليوم يحجون فيها الحمدلله والشكر

وطبعا

على طول عبروا عن مستواهم

وما خلوا الندوة تمر لأنهم طبعا ما يتحملون الراي الآخر

وقلبوها طق ومهزلة كالعادة

اللي شقوا دشداشته

واللي باقوا تكرمون نعاله

واللي ضيعوا شحّاطتها مسكينة ليما اليوم تدورها كانت شاريتها من فهد السالم وقاطه كل ما وراها ودونها عليها

طبعا طقوا البنات والشباب

صج اسلامهم عجيب

طبعا هذا مو كلامي كلام دكتور محمد جواد رضا بكتابه معركة الاختلاط تلاقونه

بمكتبة الربيعان بحولي شارع بن خلدون

مجمع جبال مجمع العثمان

ماكو سوق الذهب مال حولي اللي عند محلات الكمبيوتر

اي شفتوه

مو يمّه

ولأن الشارع الطلابي بذاك الوقت كان واعي ومثقف اكثر بوايد من الحين

فرفض هالممارسات وما سمح حق هالاشكال انها تتواجد بقوة داخل الجامعة

وطبعا بدت المرحلة الثانية بسنة 1974 مع اندماج القائمة الديمقراطية مع قائمة الوسط الطلابي

وكونوا قائمة الوسط الديمقراطي

وطبعا هذا درس تاريخي محد استفاد منه

يبين شلون كان مهم عند الطلبة ان الكيان الطلابي يكون اقوى وما يسمح حق تيار الاسلام المسيس بأنه يقوى ويكبر

وظلت قائمة الوسط الديمقراطي مسيطرة على اتحاد الطلبة

وبسنة 77 سووا الاخوان المسلمين من خلال جمعية الاصلاح حركة عبارة عن انهم اسسوا قائمتين اللي اهما المتحدون والمستقلون

وكان في قائمة موجودة بالساحة اسمها المعتدلة

ما كانت تتبع الاخوان بس كانت مدعومة منهم

مثل االطبية الحين بالطب يعني

المهم هالقائمتين اللي اسستهم جمعية الاصلاح اتحدوا مع المعتدلة ب 77وسموا القائمة الائتلافية منطلقين من مبدأ كمال ولميس بالرجل الحديدي "الاتحاد قوة" وبإنتخابات اتحاد 78

واثناء الفرز كان التفوق بسيط للإئتلافية

وباقي صندوق كلية التجارة اللي كان محسوم منطقيا للوسط

ولان الإئتلافيين عرفوا السالفة

قاموا وطعنوا بالفرز قبل لا يخلص

لكن المسؤلين عن الانتخابات من القوائم الثانية رفضوا وقالوا الطعن بعد الفرز ما يصير الحين

وصارت المفاجأة

اللي نقولها باجر

عموما ترى هذا رايي الشخصي بعد قرائتي لكتاب علي حسين العوضي بعنوان الحركة الطلابية الكويتية والتيارات السياسية
وكتاب نورية السداني الجماعات الضاغطة
وبعض الايميلات والمتابعات الخاصة

05/10/2007

مزاج اليوم - عمي الخليفة + جذبة يديدة

هذه صيده تستحق الاشارة لها كونها طازجة وتكشف غباء جريدة الوطن بكافة أقسامها
جريدة الوطن

وفي رده على سؤال حول قضايا التحييد قال الفلاح "ليس من المفضل ان نتحدث عن موضوع أمام القضاء فالأمر لم ينته حتى الآن من درجات التقاضي مع كامل احترامنا للقضاء سواء كان لنا أوعلينا".
تأتي إجابة الفلاح لتؤكد انه نسي أو ربما تناسى أن الحكم النهائي في قضايا التحييد اصدره القضاء وتم تسليم شركة المال إلى مجموعة الخرافي وانتخاب مجلس إدارة جديد .. يبدو ان الإدارة القانونية في البورصة لم تعلم مدير السوق بمجريات الأحداث

http://www.alwatan.com.kw/Default.aspx?MgDid=552098&pageId=39


أما بيان شركة الاستثمارات والتابعة لمجموعة الخرافي فتقول

اما المؤتمر الصحفي الذي ردت فيه لجنة وادارة السوق ممثلة بمدير السوق فقد اكدت حرصها على حماية السوق والاقتصاد الوطني ومدخرات المستثمرين وهي اهداف لا يختلف عليها اثنان وان كانت هناك بعض نقاط الاختلاف الرئيسية في ما يتعلق ببعض القرارات التي نصفها بالمتسرعة وغير المنطقية، مثل ازمة التحييد التي لا يزال امرها منظورا امام القضاء، وان كان قد اصدر بها قرارا اوليا ببطلان اجرائها.

http://www.alqabas.com.kw/Final/NewspaperWebsite/NewspaperPublic/ArticlePage.aspx?ArticleID=320090



نلاحظ أن الشركة تقول أن قضية التحييد مازالت منظورة في القضاء وتتفق فيما ذكره مدير البورصة صالح الفلاح، أما جريدة الوطن أعطت أحكامها النهائية بالقضية، وحاولت ضرب الفلاح من خلاله
ا
شكرا يا باشا
________________
مزاج اليوم ماكان بالحسبان بس روعة
بواردي
من جريدة الجريدة

الحرامي مو مثل أول
كريه.. وإلاّ شيفه
ولا لازم .. تلقا في وجهه أثر
جرحٍٍ قديم
أو بعد.. ندبه خفيفه
الحرامي الحين ممكن لو تشوفه
من حلاته .. تقول :هاك
هاك كل اللي تبيه
بس أطالع بسمتك هذي الظريفه
أنا ما أقصد أبد عمي الخليفه
***
الحرامي الحين تغير
وصار يواكب الحياة
صار ما يهتم للأشيا البسيطه
والفتات
صار يفكر
شلون يبوق الشركات؟
شلون يسرق ناقلات؟
شلون ينهب بورصه؟
شلون يخلي الديره تمشي
على كيفه؟
أنا مو قصدي ترى.. عمي الخليفه

***
الحرامي مو مثل أول يبوق
لنّه.. جايع
الحرامي صار يظن البوق
من أحلى الطبايع
وإن مال الناس هذا
مال حلال
مال ضايع
لو ما لحَق أهو عليه
صار هذا المال .. فاسد
لا له شاري .. ولا بايع
واحنا مفروض نشكره
إن هو فكر يبوقه
ونشكر الفكره الحصيفه
أنا مو قصدي ترى.. عمي الخليفه

***
الحرامي الحين يبوق
من أجل الهوايه
مو لأن المجتمع
ما عطاه الحق يعيش
أو لأنه مالقى
فالعيش وسيله
ولا غايه
أو لأنه شاف نفسه ..فجأه يائس
وشاف عمره يقترب نحو النهايه
أبدا
أهوَ ياسيدي يبوق
بس.. هوايه
أو أحيانا يظن
إن هذا المجتمع كله غبي
وشي محزن له ..وجوده بينهم
فضروري يدفعون
شي أشبه "بالجبايه
وهَمّ ..لازم يدفعون
حق هالطلة البهية
والذرابه
والتهندم
والغتره البيضا النظيفه
أنا مو قصدي ترى.. عمي الخليفه

02/10/2007

يا فرحتك يا خليف بهالمكان


أحضر حق موضوع عن انتخابات الجامعة
اللي عنده شي لا يتردد
danatelq8@gmail.com