15/10/2007

إنتخابات الجامعة -7- الحلقة الأخيرة

تحديث أسفل المقال

جريدة الوطن ماخذين راحتهم ع الآخر بهالفترة اللي طافت

بس أبشركم هذي آخر حلقة وراجعه لهم

الـــــــــحــــــــل

نختم الموضوع اليوم

بس قبل لا أدش بصلب الموضوع

وبناء على اللي شفته من تعليقات وإيميلات وردود أفعال أحب أوضح شغلتين

الاولى

أنا كنت غلطانه بمسألة مؤسس القائمة المستقلة

كتبت إن مرزوق الغانم وهذا الشي غلط

إهوا واحد ولد الشرهان

وأرد وأقول ما أنتمي حق أي قائمة بس أتابع اللي يحصل

وأشوف إن كل القوائم ما تحقق المطلوب منها بشكل مناسب بالوقت الحالي

الشغلة الثانية عبارة عن شي صار لي فترة ملاحظته شوفوا هالمثال معاي

نموذج أ

واحد ساكن بالجابرية والثاني ساكن بسلوى

الي ساكن بسلوى قال حق اللي ساكن بالجابرية

ترى المصبنة زادوا عندكم بالجابرية

اللي ساكن بالجابرية رد عليه وقال له
وشدعوة إنتوا مقصرين يعني بسلوى ذاك اليوم طايحين على واحد بأولى روضة شاري باكيت
LM
أزرق فاتح

نموذج ب

اللي ساكن بسلوى قال حق اللي ساكن بالجابرية
ترى المصبنة زادوا ندكم بالجابرية

اللي ساكن بالجابرية رد عليه وقال له
والله صدقت بس شنو نقدر نسوي عشان نحل هالمشكلة

انا شخصيا احب دايما إني أتبع نموذج ب

إنتوا يا ترى شتتبعون؟

اللي يتبع نموذج أ ما أعتقد إن الموضوع كان مفيد له كلش

واللي نموذج ب خلكم معاي

لما نتكلم عن إنتخابات يعني إحنا نتكلم عن حرية إختيار

وعن أشياء ممكن تعزز حرية الإختيار هذي

خلاص عيل خلونا نسعى حق حرية اختيار

وحق انتخابات مرتبة وحليوة وشزينها

أول شي

من المشاكل اللي طرحناها مشكلة الطائفية وان في ثلاث قوائم بالجامعة تفرق الناس وتقسمهم حق شيعة وسنة

وهذا شي يعارض الدستور اللي اهوا قانون دولتنا

دام جذيه لازم يكون في نص واضح على عدم قانونية ان يقوم كيان اي قائمة على هالاساس
أو اي شكل من اشكال التمييز المرفوض دستوريا

وفي حال انوجدت قائمة تمارس هالطائفية وتنزل على انتخابات الروابط والجمعيات العلمية

يكون في تصرف من عمادة شؤون الطلبة بتجميد انشطة القائمة ومنعها من نزول الانتخابات

اما اذا كانت على مستوى الاتحاد فالاتحاد اهوا اللي يقرر هالشي

واذا ما قرر هالشي وطبعا هذا الأمر متوقع منهم بالقيادة الحالية

فتقوم الجامعة بتجميد انشطة الاتحاد داخل اسوار الجامعة مثل ما سوت ب 78

طبعا هذا مو قمع بسبب تطبيق لقوانين الدولة والدين والفطرة والعقل وكل شي

ثاني شي

لأن العنف منتشر ولأن الوعي قليل طبعا وهذا الشي طبعا بسبة وزارة التربية بشكل خاص والدولة بشكل عام

من واجب عمادة شؤون الطلبة اعداد برامج ودورات نقابية الزامية على قيادات القوائم واذا ما حققت او شاركت اي قائمة بهالدورات ما يسمح لها بالمشاركة بالانتخابات

ثالث شي

طبعا بعض الناس متوقعين اني اقول تحالف المستقلة والوسط
لكن ما راح اقول هالشي بحكم ان هذا شي مرتبط بالقوائم
والعداء اللي بين هالقائمتين كبير
صج اني اشوفه سخيف ومحد مستفيد منه الا تيارات الاسلام المسيس
لكن ما اتوقع ان عقولهم تقدر تستوعب المشكلة بشكل جيد حاليا
وخنشوف شيصير بالمستقبل

رابع شي

اعتقد كلنا نرفض شراء الاصوات صح؟
وكلنا ندري انها جريمة حسب القانون صح؟
وكلنا نعرف ان شراء الاصوات مو شرط بالفلوس صح؟
يعني معاملة ممكن تكون شراء اصوات
صفقة ممكن تكون شراء اصوات

وبما إن الجامعة بمديرها المغوار تسمح للإئتلافية بس إنهم يدشون صالة التسجيل ويدشون على المستجدين
ويضبطونهم على قولة القوائم وهذا يعتبر شراء واضح للاصوات بحكم ان المستجد غالبا ما يدري وين الله قاطه
ويبي اي مساعدة
ومحد مسموح له بالمساعدة غير الائتلافية
فهذا يخلي الائتلافية تشتري الاصوات من خلال الخدمات وبمباركة مدير الجامعة طال عمره

لازم يتم منع كل القوائم من التواجد بصالة تسجيل المستجدين
او السماح لكل القوائم
غير جذيه ما يصير

أما نهاية عرس الدم قوية
يعني بس كان ناقص ميسا مغربي تنبت لها ريول يديدة
:)

خامس شي

المادة 9 من دستور الاتحاد "أن يكون الطالب كويتيا" هذا شرط من شروط العضويةوالمادة 12 من شروط العضوية تقول "الطلبة المنتظمون في الجامعات والدراسات العليا وما يعادلهما" بدون لا تحدد اذا كانوا بجامعة الكويت أو لأ
ومع هذا من أكثر من 5 سنين الطلبة الكويتيين بالجامعات الخاصة مغتصب حقهم بالمشاركة

يعني إنتخابات الإتحاد قاعده تصير بشكل مو قانوني من خمس سنين
ومعناتها إن الإنتخابات غير شرعية

يعني ما يصير بانتخابات المجلس يمنع سكان قرطبة من المشاركة مثلا

وهذا نفس الشي صاير بانتخابات الاتحاد

لازم تلغى نتايج انتخابات السنين الخمس الاخيرة ويشاركون بالإنتخابات اليايه او تلغى الانتخابات
لأن حالها حال المجلس الوطني

سادس شي

وهذا أهم شي اعتقد بالفترة الحالية
وأيضا مايو

الانتخابات مثل ما قلنا بحلقة سابقة
قاعده تصير خلال اسبوع من الدوام
وغالبية المصوتين يكونون من المستجدين
يعني ما يمديهم حتى يعرفون شي عن القوائم

اذا احنا جدام حل من حلين

الاول ان المستجدين ما يصوتون بأول سنة مثل اللي حاصل بكلية الطب
أو يتم تاجيل الإنتخابات للكورس الثاني في مايو
عشان كل الطلبة يعرفون وياخذون وقتهم بمعرفة القوائم المتنافسة
وهذا الشي ما راح يفيد الا اذا تحقق رابع شي

اي وعلى فكرة تم إختيار مايو
بسبب ان في طلبة مستجدين بس عددهم مو كبير ينقبلون بالكورس الثاني وهم تكون لهم فرصة
يتعرفون على القوائم

وأيضا مايو خل تكون شعار
وطبعا تم اختياره
لأن بمايو 2005 حقوق المرأة
وبمايو 2006 الدوائر
وبمايو 2007 سراق المال العام
صار مايو عنوان للإصلاح

ويالله همتكم

ويا قوائم انا عطيتكم حل ممكن يحقق اكبر قدر من حرية الاختيار
وما عليكم الا المطالبة بهالشي

وطبعا الرسالة موجهة حق المستقلة والوسط وصوت الكويت والهندسية والاكاديمية وتجمع القوى الطلابية واتحاد امريكا بعد

انا سويت اللي علّي يعطيني العافية الصراحة
وبدون مجاملة ما قصرت
وسويت واجبي واكثر من واجبي
وأيضا مايو

وباي


إستفتاء على أجكر عضو مجلس أمه حالي

صوتوا في مدونة

وجهة نظر



18 comments:

Anonymous said...

يعطيج العافيه
وفعلا محد فكر ان القوائم يجب
ان يطبق عليها ما سيطبق على
الاحزاب!!


خوش فكره ولله


احمد عقاب

kila ma6goog said...

ما عندي شي اقوله الصراحة

حلولك جيدة و لكن يبيلها رجال يمشونها و حاليا ما اشوف مدير الجامعة يملك الجرأة على احقاق الحق و تغيير النظام

شكرا

Anonymous said...

نموذج أ

يغلط على الناس ويعطيهم نماذج عشان مايردون عليه

نموذج ب

يغلط على الناس وينطر ردودهم ومايستخف يعقولهم ويعطيهم نماذج (ابر مخدرة)

صراحه انا افضل النموذج الاخير

نموذج ج

مايغلط على الناس مني والطريج وما اييب معلوماته من الشارع

بايات

Bad-Ran said...

يالله .. خل يتحركون

bo9ali7 said...

مايووو!!

حمودي said...

يالله خل يطالبون وخل يصيرون خوش اوادم واذا ماصارت مطالبهم لا ينزلون خهل يبينون للناس انهم جادين مو يقولون ان هالشي فلط ويشاركون فيه مثل الي حاصل الحين

Anonymous said...

س : هل الاتحاد الوطني لطلبة الكويت

قد تم أشهاره رسميا ؟

Anonymous said...

Aaaaaa Mayoo qa9dich el shahar, anaa mo5ee ra7 eb3eed :S

ARTFUL said...

يعطيج العافيه

حجي وايد حلو

والله لا يضيع تعبج

والجذب خيبه اللي كنت حاطه في بالي عن مايو غير اللي كتبتيه ;p

تحياتي لج خيتو

=)

Anonymous said...

walla ana law a3ref mino entay 7ta law jaikra a`76bech

ARTFUL said...

أنونيي

أوووب أووووب

سمعنا خطبه عن طريق خطابه
سمعنا خطبه عن طريق التشات
سمعنا عن طريق التلفزيون
سمعنا عن طريق التلفون
بس أول مره عن طريق البلوق
ولااا علني بعد

يمكن البنيه متزوجه شفيك مستعيل الله يهداك
لوووول

على العموم الراي الاول والأخير لها

لووووووول ;p

rwatan said...

بصراحه.. فرحان لأن هذه آخر حلقه من موضوع إنتخابات الجامعه

;)

إشتقنا لما تعودنا عليه منكم من مواضيع

Anonymous said...

heheeh hathee zwja t`3neek 3n elqera2ah ehya tegra w tshr7alek :P w enta tetfslaf 3la eltyarat :P fa ana na6er radech ya dandoon :P

bo bader said...

بالثمانينات يوم كنت بالجامعة كانت انتخابات الاتحاد فعلا في شهر مايو ، هذا خبري لحد سنة 88

مادري متى تغير الموعد إلى الفصل الأول ، أظن بعد الغزو .
عموما مواضيع ممتازة كالعادة

Anonymous said...

ادري اني بره الموضوع لكني
اعترض بشدة على الاستهزاء
باعضاء البرلمان بالطريقه
اللي سويتي لها دعايه في
التصويت على اشكال الناس
وهذا مو حلو و هذا ويهه
ودر و هذا مادري شنو..

هالاسلوب غير مقبول و دعايتج
لموضوع التصويت يحسب عليج للاسف

احمد عقاب

Mostaqilla G.U.S.T said...

بإذن الله نشوف بداية انهيار الإخوان بإشهار الإتحاد
-اتحاد الجامعة فرع الكويت ماله أي صفة قانونية يعني لو نفترض صار تلاعب بالميزانية مافي اي جهة تحاسبه

-إتحاد أمريكا حسب ما سمعت من الشباب هناك يدقق على الميزانية شركة تدقيق و من بعدها ف ب اي

- جماعة الإخوان في الاتحاد رافضين موضوع الإشهار لإنه في حالة الإشهار ملزوم عليهم انهم يلتزمون بدستور الاتحاد و مثل ما انتو شايفين وتفضلت الاخت وعلقت على موضوع مشاركة طلبة الجامعات الخاصةو غيرها من مواضيع الوفود الخارجية و توزيع التقرير المالي وتحديد موقع الجمعية العمومية و الاإنتخابات.

الكلام مايخلص و انتهاكات الاتحاد هم بعد ماتخلص

الحل هل بتحالف المستقلة و الوسط؟ ما أعتقد راح يكون في تحالف لأسباب كثيرة ومعضمها تافه بس بعطيكم مثال واحد على هل الحواجز ..و انتو حكموا

القوائم كلها متفقة على موضوع الإشهار لكن للإسف في من القوائم اللي تحب تسبح عكس التيار وهذا الكلام مو تحيز هذا الحجي حصل بجلسة مع قوائم مختلفة و نوقش هذا الموضوع بالصيف الوسط يقوولك انا مع الإشهار بس لازم يكون تحت مظلة التعليم العالي ...

مع العلم ان كل القوائم بإستثناء الإتلافية مع الإشهار تحت مظلة الشؤون ..

نسأل ممثل الوسط انزين قولنا الحين ليش ملزم إلا يكون تحت مظلة الشؤون ؟ يخي إقنعنا؟؟! يقوول والله هذا موقف القائمة من سنة 1974 ومحنا مستعدين نغيره هذا اللي عندي !!!


إنشاءالله بالمستقبل نشوف قيادات تهمها مصلحة الكويت... لكن إذا كانت القيادات ما تهتم إلا لمصالحها فلا طبنا ولا غدا الشر

بيت القرين said...

شكرا احمد

مطقوق
اشوه عجبتك

أنو
ما ينطبق على موضوعي نموذجك
:)

بدران
على ايدك

بوصالح
اي مايو شفيها؟

حمودي
يا رب

أنو
لأ

انو
ما عليه
:)

ارت
الله يحييك
شنو كان ببالك

انو
حبتك العافية

rwatan
ردينا

أرت
لا تقلبونها غراميات ذبحتوني
:)

انو
يالله عاد يالله عن المصاخة
:p

بوبدر
عدل كلامك بس غيروه

أحمد
غشمره بس
وآسفه ضايقتك

مستقلة الخليج
اهما خل يسوون اللي طرحته والله يوفق

ARTFUL said...

مالج شغل

;p