11/10/2007

إنتخابات الجامعة -6


اللي مو عاجبهم موضوع الجامعة ويبون ارد ع الحرامية وجريدتهم اقول لهم بس ليما الاربعا الياي تحملوني لو سمحتوا

لـــيـــش

وايد اخبار حلوة االيوم

أول خبر باجر عيد فعيدكم مبارك

وأيضا مايو

ثاني خبر سمعت ان واحد من صحفيين الوطن بيرفع قضية على بيت القرين

وانا الصراحة تزيد قناعتي يوم عن يوم ان غباؤهم وصل حده

يعني اكثر جريدة منتشرة بالكويت على قولة خليف ترفع قضية على مدونة؟؟؟

ومو بس جذيه

تزيد الشهرة وأصير المدونة اللي هزت جريدتهم

ومو بس جذيه

أصير أول مدونة كويتية تنرفع عليها قضية

اتمنى يوم الثلاثا الياي يرفع القضية

وأيضا مايو

الخبر الثالث وصلني حزّة الفطور على الايميل شكله مو صايم اللي دازه

بس قبل لا انقل الخبر

لازم نعرف ان الوطنية للاتصالات سحبت كل اعلاناتها من تلفزيون الوطن وجريدة الوطن قبل رمضان بمدة قصيرة

وهاجموها الوطن وحاربوها

دانه
توه فاز فريق الوطنية للاتصالات بدورة الروضان اللي تنقلها قناة الوطن
وهذا يعني ان تلفزيون الوطن سوا دعاية شبه يومية للوطنية من اول يوم برمضان الى آخر يوم وببلاش بعد
وزيادة بعد ان فريق الوطنية كان بمجموعة اسمها مجموعة تلفزيون الوطن
مبروك


مبروك للوطنية

وأيضا مايو

المهم ندش بالموضوع

ليش منقسمة عندي لي قسمين بكتبهم اليوم

اول ليش

اهوا ليش اكتب هالموضوع؟

وثاني ليش
دام كل هذي فضايح الائتلافية ليش تفوز وبفرق كبير؟

وندش على اول ليش
في معظم مدارس الكويت اذا مو كلها

مدارس البنات او الشباب

يعني من عمر 6 الى عمر 17 وشوي تقريبا

نلاقي ان الطلبة ما بينهم اي مشاكل وماكو تفرقة طائفية او قبلية أو غيرها

وحتى اذا لقيناها ممكن تنحل بسهولة

لكن بكل سنة ينقبل 6000 طالب وطالبة بالجامعة تقريبا

واهيا المرحلة اللي ترسمهم

من هال6000 تقريبا 5000 مستجد يصوتون بالانتخابات باول سنة ومعظم هالاصوات تروح للائتلافية

السبب شنو

لأن الإئتلافية اهيا اللي تتولى التالي بحكم قيادتها للاتحاد
كشوف المقبولين توصلها قبل النشر بالجرايد يعني أول من يزف الخبر للطالب اهما الائتلافية
تسجيل الطالب المستجد بالجامعة تتولاه الائتلافية
يتم تعيين مرشد من طلبة الائتلافية للطلبة المستجدين حلوه هذي

النتيجة شتكون
ان الطالب يرتبط شغله الاكاديمي بشكل كبير مع الائتلافية
وطبعا يصيرون بهالحالة اول ربع له داخل الجامعة
وعاد تبلش تغذيتهم بافكار ورؤية الائتلافية مثل الطائفية وتحجيم المرأة وغيرها

وعندنا قائمتين ينتهجون نفس المسار الطائفي اللي اهما الاسلامية والاتحاد الاسلامي
شوفوا شيزرعون عاد بمخوخ الطلبة المسالمين الزينين
يعني المستجد يدش الجامعة غالبا ابيض وملاك من ناحية التفرقة وغيرها
يطلع بعد اربع سنين اذا كان من انتاج القوائم الثلاث طائفي من الدرجة الاولى
وكله يقعد بالمرسم
:)
وكله على حساب الكويت طبعا

تخيلوا معاي غسيل المخ هذا اللي استمر لأربع سنين شنو المدة اللي بينعكس فيها على الكويت

يعني الخريج راح يشتغل باي قطاع بالدولة لمدة 15 الى 20 سنة وشوفوا الدمار

وماكو دليل اوضح من التخلف اللي بدا ينتشر بالكويت وبكل المجالات من بداية الثمانينيات ليما اليوم

وسبب رئيسي من اسباب هذا التخلف
اهوا مكينة التفريخ الطائفية الحزبية داخل الجامعة

عندي ايمان مطلق ان اذا انصلح حال الجامعة وايد الاوضاع بتتغير بالكويت

وأيضا مايو

يعني معقولة انتخابات الجامعة بتغير شي؟؟
يبا الديرة كلها خربانه مو واقفه على شباب الجامعة؟
لا انتخابات الجامعة تغير اشياء

منو حرك حقوق المرأة بقوة غير شباب الجامعة او شباب توهم مخلصين الجامعة
والنتيجة اقرار حقوق المرأة
منو حرك تقليص الدوائر غير شباب الجامعة او شباب توهم مخلصين الجامعة
والنتيجة تقليص الدوائر
منو اللي حرك قضية سراق المال العام
غير شباب الجامعة أو شباب توهم مخلصين الجامعة
والنتيجة ابعاد علي الجراح

ولاحظوا ان كل هالقضايا تفعلت بدون لا يكون الاتحاد طرف رئيسي فيها
وياريت ما ينط احد ويقول الاتحاد قاد الدوائر
لأن السؤال وين 5000 صوت عن ساحة الارادة اذا انتوا اللي قدتوا؟؟

يعني شوفوا معاي اقلية شباب الجامعة كان لها دور قوي بثلاث قضايا مصيرية
غيرت شي بالكويت للأفضل

فتخيلوا معاي تكون القيادة بيد نفس مجموعة الشباب اللي حركت الكويت بهالشكل

انزين خندش بالليش الثانية

غريبة محد سأل شنو أيضا مايو

شنو ما فيكم لقافة كلش!!؟؟

بس لاتسئلون ما راح اقول

سؤال وايد منطقي
ليش الائتلافية تفوز طول هالسنين رغم بلاويها؟

مثل ما قلت بالليش الأولى إن الائتلافية تتفوق بشي ما تملكه اي قائمة ثانية اللي اهوا

لأن الإئتلافية اهيا اللي تتولى التالي بحكم قيادتها للاتحاد
كشوف المقبولين توصلها قبل النشر بالجرايد يعني أول من يزف الخبر للطالب اهما الائتلافية
تسجيل الطالب المستجد بالجامعة تتولاه الائتلافية
يتم تعيين مرشد من طلبة الائتلافية للطلبة المستجدين حلوه هذي

وطبعا هذا يشكل فرق كبير ومنافسة غير متوازنة مع باجي القوائم
ومو بس جذيه
القوائم المتنافسة مثل الوسط والمستقلة يتحاربون ما بيناتهم وبشكل حده بايخ وعلى أتفه الأمور وهذا هم يصب بصالح الإئتلافية

ماكو قائد طلابي قوي للأسف بالفترة الأخيرة

يمكن كلامج عدل بس هم في شغله
يعني كا أمريكا انزاحو الائتلافية من قائمة ما صار لها ثلاث سنين


صح هالكلام
لكن لا تنسون ان بأمريكا طريقة تواصل الائتلافية مع الطلبة وايد اصعب من طريقتهم داخل الكويت
اكو دواوين بالكويت والمسافة بين الجهره ليما الوفره ما تزيد عن ساعة ونص بالسيارة

طبعا هذا غير طبيعة الحياة بامريكا البعيدة عن القيود
غير ان اللي يبي يصوت لازم يدفع مادري شكثر عشان يروح مكان التصويت

والاهم ان عقليات الطلبة هناك اكثر تقبل حق الراي اليديد وتسمع احسن من قوائمنا هني الوسط والمستقلة تحديدا

وأيضا مايو

عيدكم مبارك مرة ثانية

والوعد مع الحل يوم الثلاثا ان شاء الله


22 comments:

حمودي said...

ايامج سعيدة
وشسالفة مايو ؟؟؟

mtfa2el said...

ايامج سعيدة
معاج بكل اللي ذكرتيه و الكل يعرف عن الإئتلافية بلاويهم السودة
عن نفسي كنت أصوت للمستقلة بس قناعتي الشخصية اللي ما تغيرت لي الحين
إن كل القوائم - بما فيهم المستقلة - قوائم فااااشلة
و الفاشل ما يقدر يوخر الفاسد لو يموت

فتى الجبل said...

أيامج سعيدة
أمراض الجامعة للأسف بدت قبل جم سنة تنتقل حق الثانويات

حمودي said...

تعليقي ماكنت مكمل الموضوع
فسالت قبل لا ادري انج قايله ماني قايله
:)


المهم لاتنسين ان طلعت هالايام قوائم اتلافيه بالثانويات بعد

deeratna said...

كلام حلو منج اختي،

بقولها بصراحة انا طالب ثاني سنة جامعة الكويت، صوتّ أول سنة حق الائتلافية لأن ماكنت افهم شي بالانتخابات ولأن عناد عالمستقله اللي اذوني كثر ما يدقون، بكون صريح الائتلافية فيها خوش ناس وفي موخوش ناس و اللي وياهم كثير اعرفهم و فكرهم والله العظيم يختلف عن فكر القائمة، فكر قائمتهم اسلامي ومتدين وكذا عضو يشتغلون بالقائمة يروحون يغازلون بالجامعه! يعني شوفي التناقض، هذي شغله والشغله الثانية لما نفكر شوي بعقلانية ان قائمة تحمل فكر معين ومذهب معين (سني متعصب واخونجي) تمسك اتحاد بكبره و جمعيه، فيه نوع من الظلم كون ولا عضو فيه من مذهب ثاني او حتى من دين ثاني وولا ائتلافي يقص على نفسه ويقول "عادي نستقبل شيعه وحتى غير مسلمين" طل! .. يعني قائمة تقولك اشكره "اذا انت مو سني عيل وخر عني وراح افوز غصباً عليك يافلان" ، انا شخصياً سني ولكن اغلب ربعي شيعه ومعاشرهم وناس محترمين وما افرق بين شيعه وسنة لأن بالنهاية كلنا مسلمين ومو احنا اللي نحكم على بعض، بس اللي صاير شي خايس، يعني اذا عرفوا ان فلان شيعي خلاص يوخرون عنه، وهالشي بين اللي يشتغلون مع القائمة يعني يسألون واحد من ربعهم يقولوله فلان سني ولا شيعي اذا طلع فلان سني يقولون "اشوه" ويحاولون فيه عشان "يفرّونه" ويصوت لهم واذا في مجال بعد يشتغل معاهم واللي يتكلم بالجرايد من الائتلافيين والمجلات ويقول غير هالحجي والله العظيـم جذاب!

عن نفسي يمكن اميل للوسط بس ماعرف شي عن انجازاتهم وحتى عن بلاويهم اذا كانت موجودة بس كـ مبدأ يعني "فقط" ! اذكر مره كنت اسولف مع واحد "ائتلافي" عن القوائم فـ يبنا سيرة الوسط الديمقراطي جان يقول "هذول الدستور عندهم احسن من القرآن" .. طبعاً مارديت عليه مو لأني ماعند الرد، بس ماقدر اناقش ناس ماتعرف شي اسمه دستور دولة الكويت واهميته للدولة، يتكلمون وبس! والتناقض موطبيعي يعني لو تبيني اقولج عن تناقض اعضائهم والله ،ما اخلص سوالف لي الراس

وهذول الموخووش بالقائمة وفي ناس محترمه بالقائمه ماتحط روحها بمواقف بايخه مع الطلبة، انا اتكلم عن فئة معينة في كلية معينة بالقائمة..

وسوري للإطالة

Bashar said...

دانة .. كل عام وانتي بخير

بانتظار القضية حتى تنضمي الى القائمة :)


تحياتي

Anonymous said...

متفائل و غيره :
يا جماعة احنا اذا ما عالجنا الموضوع الحين بنتحسف على الايام الياية لازم نعالج المشكلة و نبعد خلافاتنا الشخصية و اعتقد كما قال الدكتور احمد الخطيب ان العلاج لمشاكل الكويت يبدأ بالجامعة و اذا سكتنا الحين و سكتنا بعدين و سكتنا مالا داعي نتحلطم على مشاكل الديرة و مالا داعي اساسا نسوي شي لان مثل ماتقولون كلكم ماكو حل وماكو حل لازم نجد الحل
كلنا لازم ندور الحل عقب ماتخلص دانا من موضوعها و نحط ايدنا بايد بعض

Q8i_Blogger said...

وهم يتكرر الهجوم على القوائم الاسلاميه
لا والمدح فقط للوسط

انا مابي ارد على الاشياء الي كاتبتها لأني مو محامي عن هل قوائم... لكن التفرقه ليش
يعني الوسط شنو انجازاته الحاليه ؟!!!

تره الي ماسكين الوسط الحين نصهم مايعرفون تاريخ قائمتهم!!!
ولا فاهمين شنو مبادئها
بس جذي مع الخيل يا شقرا

ما ادافع عن اي قائمه
بس لازم نكون حياديين

اما عن القائمه الي بامريكا
فاسمحيلي الطبقه الموجوده بامريكا غير الطبقه الي بالكويت
يعني الناس الي اهناك غير
مو ثقافياّ ... بس انعرف احنا اشلون الي يدرسون

المقصد انه فوز القائمه الي بامريكا مو من ذكائهم ولا افكارهم
لكن اختلاف الطبقه الي تنتخب

وعيدج مبارك عساج من العايدين

Anonymous said...

q8i blogger :
شفيك الله يهداك اول امس قالت ان الوسط يعيش بحالة تناقض انهم يهاجمون سراق المال العام و يصرحون بجريدتهم

خلنا نشوف الحل و اذا عجبنا خل ندعمه يا جماعة الكويت تستاهل ان نتماسك و الله الاخونجية يبون بسوون اي فتنة عشان ما نوصل لي اي حل عشان يستمر الوضع و يسرحون و يمرحون باللي يبونه

ZwaiZ said...

gawach allah magasartay o zain eli 6ala3 men yetkalam 3anhoum cuz 7adhoum qatheeni .. o allah laygoula etha sarat qathiya wensijantay fa el-chaay wezigayer 3alay o since eni mashteri zigayer 7ag a7ad lo emout cuz i dont smoke fa el-chaay 3alay ;) .. allah yaktib eli feyh el-khair o methil mawigafna weya bashar o jasim mara7 enkhaleech inshallah ;)

Anonymous said...

تقبل الله طاعتكم وكل عام وانتم بخير

kila ma6goog said...

عيدكم مبارك و عساكم من عوادة

أعتقد ان السبب الرئيسي هو ضعف المحتوى لبقية القوائم و غياب الرموز و القدوة اللي تشجع الطالب على الانضمام لهذه القوائم

يعني الفكرة السائدة - فكرة و ليست حقيقة كوني ما اعرف احد من شباب الجامعة - هي ان قيادات القوائم الثانية شباب صيّع و منفلتين اخلاقيا و سوالف مغازل و هالسوالف

طبعا انا اقول هذي فكرة منتشرة و احتمال انها مو صحيحة , لكن السؤال هو شنو قضايا بقية القوائم؟ الائتلافية امتداد لحدس و قضيتهم واضحة وضوح الشمس و هي السيطرة على البلد من خلال استخدام الدين و هم ماشين على هالدرب بوضوح

ممكن نعرف شنو أهداف القوائم الأخرى؟ و مو المهم اني انا اعرف كوني انا شايب لكن لازم الطالب المستجد يعرف و يؤمن بهالأهداف عشان يصوتلكم

و لازم يؤمن بأن الأشخاص و الأسماء الموجودة تؤمن فعلا بالقضايا و ليست فقط حبر على ورق و شعارات بلا طعمة

شكرا

و هم مايو

SiCko said...

اي و الله مايو ؟
وينهم ؟؟
كملي موضوعج بالعكس لايمكن انكار دور الجامعه في الحياه السياسيه

mtfa2el said...

مطقوق
انا معاك باللي ذكرته
القوائم المنافسة للإئتلافية - بلا استثناء - ما عندها برامج واضحة ..يعني لو في برنامج واضح جان ما احتجنا نسأل
بس أهم مشكلتهم من أول ما يبلشون شغل يقولون الإخوان و الإئتلافية فيهم و علتهم ،أوكي أنا معاك بهالشي
بس أنتوا شنو أنتوا منو ..ما يدرون وين الله قاطهم و مثل ما قال مطقوق قبل جم بوست كل تصريحاتهم بيزلزون العروش و بيطيحون الأهرامات
اللي يسمع يقول عرش بلقيس
الواحد يحتاج يعرف من أهو و شنو يبي يسوي حق ديرته قبل لا ينتقد الآخرين

rwatan said...

عــيــدكــم مــبــارك

و حياكم بسينيما الأفنيوز... أضخم و أحدث دار عرض للأفلام المقطعة بالكويت

ARTFUL said...

داش اعيد عليج

عيدج مبارك ، واعادج الله على أمثاله

ويعطيج الف عافيه لا تكتبين بالعيد عيدي استانسي

=)

مــعـــارض said...

عيدكم مبارك وعساكم من عواده

بانتظار المزيد، وخصوصاً "الحل" اللّي راح تطرحينه، عندي احساس انه نفس الحل اللّي في بالي! أتمنى ذلك

Anonymous said...

السلام عليكم.. تقبل الله طاعتكم و عيدكم مبارك و كل عام و أنتم بخير. بخصوص موضوع انتخابات الجامعة أنا كنت طالب في جامعة الكويت و شفت القوائم و لقيت ان أفضل القوائم هي القائمة المستقلة و لي اسبابي الكثيرة ماراح اتطرق حق كل الاسباب انا راح اتكلم عن موقفين!! الأول التحرك الشعبي الي قادته القائمة المستقلة بخصوص موضوع الاسرى إلي وصل إلى حد ان رئيس القائمة في ذلك الوقت قام و تكلم بالمجلس بعد ما اتصلوا على كل أهالي الاسرى و يابوهم بعدها شكلت لجنة الاسرى إلي راحت العراق و هالحجي كان اب 2003 و طبعا الائتلافية و من خلال حملة التواقيع إلي حق الاسرى اقعدوا يطنزون من خلال الارقام المدنية الي احطونها و هم اساميهم و تواقيعهم.. و الموقف الثاني إلي لي اليوم المستقلة بروحها منفرده فيه سالفت طرد مبارك الدويلة إلي غلط علينا ايام ماكنا بالجامعة و طردته القائمة جدام الطلبة. اتوقع كافي هالشغلتين و اتمنى مايكون الحل تحالف القائمتين لأنا راح يفشل.

ModmenQ8 Letrado said...

عزيزتي بيت القرين ...

صارلي فتره امر البلوغ اشوف موضوع الجامعه اطلع على طول واقول متى نخلص شكله دمه ثقيل ...

ويمكن السبب اهو مقالات كله مطقوق (المبدع عادة) المعنونه اصلاح كومباني
وكانت صراحه ثقيلة عالقلب ...
فلما شفت مقالج شطوله قلت ولييييييه ماله داعي!!

بس اليوم فاضي و البلوغات الثانية كلها ببيات عيدوفطري ! فقريت الموضوع لأنه ماكو غيره ...

وبصفتي من ناشطي الحركة الطلابيه سابقا اقدر اقولج انصدمت ان الموضوع روعة و الترتيب روعة والأخراج روعه لي بعض الملاحظات الصغيرونه على النتائج بس بوجه عام توو ثمبس اب ... زلطت الموضوع من واحد لي سته بدال الغدا و عجبني و اهنيج ...

واقترح عليج تأليف كتاب : اتحاد طلبة الكويت - الواقع المضحك المبكي ! و مايكون كتاب تأصيل تاريخي علمي بل ادبي ساخر مثل الي كاتبته بس بالعربيه الفصحى...

تاعلافه! : على فكرة مادري انا موضوع لو جمعناهم يطلع الناتج احبك عجبني صراحه حلوه القطه :))

someone_q8 said...

السلام عليكم
عيدكم مبارك وعساكم من عواده
اول شيء انا مو خريج جامعة الكويت
لكن من خلال كتابة الاخت بيت القرين عرفت اشياء وايد طبعا مع بعض الاطلاع على الانتخابات في الجامعة خلال السنوات الاخيرة
لي ملاحظة يمكن تكون صحيحه او تكون خاطئة وهذه وجهة نظري

الاخت تقول ان الجامعة تقبل سنويا 6000 طالب و 5000 طالب تنتشلهم قائمة الائتلافية ؟
السؤال هو معقولة خمسة الاف طالب ماعندهم مخ عشان يفكرون وين الصح او ما عندعم اي فكرة ؟؟؟؟؟
يعني قائمة مهما كان حجمها تسيطر على كل هذا العدد من الطلاب ؟؟؟؟؟
عيل وين باقي القوائم ؟؟؟ شنو يسوون بس قاعدين يشوفون الائتلافية شتسوي واهم يلطمون ؟؟؟؟؟؟
وهذا احنا داااائما انعلق اخطائنا على الغير ؟؟؟؟
وانخليهم شماعة على فشلنا ؟؟؟
مدام السالفة جذيه عيل شيء طبيعي هالعدد الكبير من الطلاب راح يروحون حق الائتلافية و ما الومهم على تصويتهم لهم لان باقي القوائم نايمة وتبي الطالب ايييهم لي عندهم بدون مساعدة ويصوت لهم !!!!!
ولكم مني كل تحية

Anonymous said...

عيدج مبارك
لووووووووووووول وربي كنت قاعد اسال شنو سالفه مايو قبل مااقرا كلامج عن ليش ماتسألون لوووووووووول بثواني

ماعلي ابي سالفه مايو بدال العيديه يالله عاد اختنا الحبوبه يا صاحبه اروع مدونه كويتيه

ARTFUL said...

انا اعرف شسالفة مايو

;)