31/07/2008

ردوّا ولدنا وإلا + شخصية الإسبوع







هذا الخبر منشور بالرؤية يوم الثلاثاء 29-7 بصفحة 19 عن البرامج المقترحه لتلفزيون الكويت برمضان

طبعا الخط وايد صغير فبكتب لكم ياهم

البرامج الدينية
أحداث رمضانية لمحمد الطبطبائي

وقفات من التاريخ لطارق سويدان

هنا وقف الحبيب لعبدالعزيز العويد

مع الاسلام لخالد المذكور

نور القلب لأحمد القطان

حديث القلوب لمصطفى الزلزلة

العبادة سعادة لحمود الزعبي

قبل الافطار

رحمة للعالمين لوزارة الاوقاف

برامج للاطفال

مسلسل كرتوني من القصص النبوي

برنامج من قصص القرآن

الفلاشات الرمضانية

فلاش التنافس على الطاعات
فلاش سلوك الطاقم في العمل
فلاش الصيام والسنة
فلاش سنة النبي في الافطار
فلاش فضل صلاة التراويح
فلاش فضل السحور

طبعا في مسلسلات ومسابقات

بس الحيز الاكبر اهوا لكل هالامور

انا عندي اقتراح اسهل والله

الصبح تبثون قناة العفاسي
الظهر تبثون المجد
العصاري تنقلون دورة الروضان
المغربية ام بي سي تنقلون التراويح
عقب التراويح تبثون قناة الانوار
وبعدين تبثون العربية الساعة10الأخبار وتسكرون

ليش المصاريف بعد؟؟؟

هذا وخلصنا منه

نروح حق سالفتنا الثانية

واحد من أهل الكويت

تديّن حطوه إمام مسيد

يوم اليمعة خطب بالناس

خلّص الخطبة سأل ربعه ها شرايكم يالربع

قالوا له تمام بس في عندنا خمس ملاحظات

اول شي أكو سلّم حق المنبر ليش تشقح؟؟

ثاني شي ما يصير تولع زقارة بين الصلاة والخطبة

ثالث شي ماكو صحابي إسمه جمعان

رابع شي الملك عبدالعزيز ما شارك بغزوة أحد

وخامس شي

ندري إن بو لهب كافر بس ما يصير تقول عنه ابن ال... ما اقدر اقول

عموما

نروح حق الجيران

أهل ايران

حاطين دوبكم دوب حدّاق

شنو الفكرة يعني خاطفين حدّاق شالفكرة

مابي واحد يقول كا السعودية سووا

أدري في ناس مخوخهم مركبة شمال

نووي ولوية وقصة وتتحدون امريكا وتسكرون هرمز

وتطيحون البورصة

وكل هالجبروت

وبعدين مجابلين حدّاق خاطفينه؟؟

عيب والله عيب

بس الشرهة مو عليكم

الشرهة على
دكتورنا اللي من أول الشهر مخطوف ولدنا قبل يومين يذكر ان في كويتي ولد هالارض يتحمل دكتورنا مسؤليته

وإحنا ما راح نسكت

واصلتني اخبار انها انفرجت تقريبا وبيرد حسين لأهله وربعه

لكن اذا مصخت وعد منا نجابل السفارة الايرانية ليما يرجع لنا

وبعدين لحظة لحظة

نوّاب الامة الحلوين وينهم

لا يقولون إجازة وكلام فاضي

جاسم البحر توفى رحمة الله عليه يتسابقون على التصاريح والمواساة

وهذا من أول الشهر ما ندري عنه

ومحّد تكلم

خصوصا رئيس المجلس الموقر

اللي بس فالح يدافع عن ايران

ما تنطق ما تقول

وأنا هم ما كنت ادري وطبعا الشرهة على إعلامنا

لولا المدونات اللي علمتني عن الموضوع








شخصية الإسبوع

بيضة كندر اليديدة إهيا شخصية الإسبوع

:p

لا لا أتغشمر

ما طلبوا شي المساكين

يبون سلندر غاز

ومعاشهم كامل

وسكن للاستخدام الادمي

ومكيف للواهيب الكويت

وعلى الرغم من حماقة خليف

وسخافة صحيفته

إلا إن ثورتهم وصلّت الصوت على الرغم من بعض التصرفات الطايشة والمتوقعه من القهر والجوع اللي يعيشونه وقلة التعليم أو إنعدامه

الا انهم اطلقوا جرس انذار على ظلم الكويتيين

وعلى الظاهرة السلبية فعلا بالكويت

يستحقون شخصية الاسبوع

ويا رب تسخر لهم اهل الكويت الطيبين

يوقفون معاهم ويردون لهم حقوقهم مو اكثر

البنغال هم شخصية الاسبوع


28/07/2008

تجريم الإنترنت - لأ



في مواضيع وايد

وفي أشياء وايد تنقال

بس فيه
الأهم الأهم الأهم

لا تستصغرونه

يقطون كل بلاويهم بالصيف يستغلون هدوء وسفر الناس

بس إحنا واعين لهم

نحترم الخوف من جرايم الانترنت

البوق وغيره

لكن مو كبت الراي والتعبير

سؤالي للجهابذة

قدرتوا تمنعون الناس من التعبير قبل الانترنت؟؟

اللي ابي اوصل له

ان وجد الانترنت ام لم يوجد

العقل لا يقيد

الفكر لا ينضب

اهيا دعوة لكل القوى ولكل التيارات ولكل مؤمن بحرية التعبير

خنتفق على شعار او كلمة لصد اي محاولة صيفية لقمع حرية التعبير

أنا من هني أقولها لأ

لقمع الحرية

لأ لوأد العقل

لأ لدفن ما فضل اللله به الإنسان على سائر المخلوقات

المسألة مو هينة وخطوة في سبيل قمع أكبر وأكبر

لا تستهينون فيها

مدونات يديدة شرفت

فريج الهيلق وسيشهد

إي على فكرة

مسلسل سنوات الضياع حلال

:)

وبرحيل يوسف شاهين نحط هالغناية اعتقد انها من فلم سكوت حنصور



25/07/2008

الخير بقبال + شخصية الإسبوع + تحديث


تحديث تحت كلمة عيب والله عيب
::::::::::::::::::::



جريدة قطرية إسمها ستاد الدوحة نشرت كلام منقول من أحد الشخصيات الرياضية الكويتية يقول

إن في واحد من المحسوبين على أحمد الفهد متلاعب بنقل كلام اللجنة الانتقالية لادارة اتحاد القدم الكويتي حق الاتحاد الدولي - فيفا

تقدرون تشوفون التفاصيل عند
وجهة نظر

الحين الكلام ممكن يكون صحيح وممكن يكون جذب

مع ان مو غريبة على ربع بوفهد

بس الكلام يحتمل الصواب والخطأ

الغريبة شنو



يعني حضرة وزير الاعلام صباح الخالد

ورطتنا وما عرفت تتصرف او مابغيت تتصرف بالإصح لما كنت وزير شؤون عشان لا تورط عيال عمك

اللي مرمطوا سمعة الكويت عشان كراسيهم

الحين حتى وانت وزير اعلام مو راضي تفكنا من شرّك

شنو يعني تمنع الجريدة من انها تدش الكويت

وين الله يوفقنا وانتوا موجودين بالله

عيب والله عيب


هذي صورة من الكتاب المرسل من جاسوس حولي مثل ما سمّوه حق الفيفا

واهوا أحد المحسوبين على بو فهد

وأيضا تعليق الجريدة القطرية على مصادرة جميع اعدادها من الكويت

والله فشله

شبتسوون بسمعة الديرة زود؟

::::::::::::::::::::

امس الخميس نقلت الجرايد كلها من رويترز معلومات عن مدينة الحرير

حتى سعد الفرج وخالد النفيسي ولا عبدالأمير التركي يتهم الجرؤة إن يشلخون هالكثر بحامي الديار

يقولون

مدينة الحرير بتصير قطارات من اوروبا ليما الصين

وبيسكنونها 700 الف نسمة

والمعلومة الاعظم انها بتخلص ب 2023 يعني بعد 15 سنة

بس قلنا يالله خنتفاءل ويمكن صج

دام ان رويترز قايلين كل شي جايز






وسبحان الله السالفة ما طولت يوم عشان تثبت انها العن من كذبة ابريل

وهذا موضوع الفتن اليوم يثبت



بيمنعون مقرر الفلسفة بالمدارس واسبابهم منطقية الصراحة

لأن مصر والسعودية وقطر ما يدرسونهم فإحنا لازم ما ندرسهم

ولان تزعزع ثقة الطالب بهالمرحلة بالدين الاسلامي

الطالب يحدد مستقبله وتشعيبه بالثانوية ويقرر اول ما يخلص يعني بعد يومين من نهاية الثانوية العامة شنو بيدرس بالجامعة

ويحدد شكل حياته كاملة بس لا راح يتزعزع

انزين سؤال الحين منعتوا الفلسفة من الثانوية

وبعدين منعتوا الكتب المتعلقة بالفلسفة وزعزعة الدين بالمعارض

ما تقولون لي متى البني آدم يقدر يقرى ويتعرف على الأفكار

حسبي الله عليكم

لا وطلعة ثانية بعد

اهيا اللباس الرياضي مال التربية البدنية

يعني احنا طول السنين اللي طافت بالمدارس اللي تخرجوا من الستينات ليما اليوم ما يراعون حدود الله

صج قلة أدب ووقاحة ما بعدها وقاحة

شنو ظل ما شككتوا فيه

بيقفلون على عقولنا وتفكيرنا وبعدين يقولون مركز مالي ومدينة حرير وحجي فاضي

حمدالله والشكر

والخير بقبال دامنا ساكتين ومحد يواجههم

شخصية الإسبوع

شهيد ضحى وقاوم الإحتلال الإسرائيلي وقوفا مع الحق ولا شيء سوى الحق

هذول اهما عيال الكويت الصجيين

الشهيد فوزي المجادي

إلى جنات الخلد بإذن الله


22/07/2008

Edward 2


ليش الواحد أول ما تصوره الكاميرا بالشارع يطق بريك؟؟؟

شالفكرة يعني بينزل بيقول تكفين سامحيني؟؟

حسين الاحمد المطرب التائب بغض النظر عن كل كلامه من اول ما حط لحية ليما اليوم

بس ابي الكلام اللي بالمستطيل الاحمر

يبي يروح يشوف امه ما سلّم عليها ليما الحين



المزيون راح حلق

وراح شرى بولو شيرت

وشرى نظارة

ولقى كبوس مشقق

طبعا ما كان بهالهيئة بأفغانستان ولا جان علوم

ولا امن الدولة عندهم حلاق ومحلات بالميزانين

وبعدين يقول ما سلّم على أمه

المهم نرجع حق ادوارد احسن

ادوارد بعد ما فلس من سالفة الجامعات الاهلية وقانون منع الاختلاط

ظل يروح ويرد للكويت عل وعسى يلقى مشروع

ليما صارت حرب العراق

قال حلو مرتين

و هذي فرصتي اول ما يطيح النظام العراقي

الكويت راح تزدهر تجاريا وتصير مركز للأجانب لدخول العراق

فقال خل اروح اشتري اراضي بالكويت

وابني عليهم عماير استثمارية وسكنية وتجارية

ووصل الكويت

واول ما سأل قالوا له

لا يحق للأجانب التملك بالكويت

انزين انا بعمر لكم البلد وببني اجزاء من هالصحاري الخالية وبفيد الديرة اقتصاديا بضخ فيها فلوس

قالوا له لا ما يصير

قال اوكي عيل جم لازم اقعد عشان تعطوني جنسية ويحق لي اتملك

خزّه الموظف وقال له كلام رباعي الحروف

تخسي

بالذمة سر حبي مالت راغب ما تضحك

انصدم ادوارد من الرد وقال له ليش ليش شطالب انا شنو شروطكم حق الجنسية

قال ماعندنا شروط

قال شلون يعني

قال بس محد ياخذ الجنسية الكويتية

حتى اللي موجودين بالكويت واستشهدوا عشانها هم بعضهم ما ياخذونها

قال ليش عاد عددكم وايد؟

قال لا تونا واصلين مليون

قال انزين وضعكم مو مستقر؟

قال لا الحمدلله بخير ونعمة وامن وامان

قال انزين كلكم علماء ومفكرين وما تبون تخترب التركيبة يعني؟

قال المسؤول شهالحجي الفاضي لا طبعا

الزبدة مالك فرصة

دور لك كويتي تشتغل باسمه

طلع ادوارد واهوا متضايق
قال بالله شسوي بهالديرة

الله يسامح ابوي الظاهر كان رايح دولة ثانية عباله الكويت

وكلها جم شهر وطلع قانون المطبوعات اليديد

وفتحوا المجال للجرايد

استانس ادوارد

وقال بس عاد هذي فرصتي

وافتح جريدة واخليها اكثر جريدة منتشرة والناس تصدقها

راح حق احد المستشارين الاعلاميين بالكويت

وقال له

ابي افتح جريدة تكون اكثر انتشارا ونسخ بين الجرايد وهم ابي الناس تثق فيها

المستشار قال له وبالحرف الواحد

إنت ياهل؟؟

قال افا شهالحجي، لا طبعا ما تشوفني شكبري، ليش تقول جذيه؟

قال ما ينفع

اذا تبي جريدة توزع اكثر شي والناس تصدقها لازم تكون ياهل

قال ليش

قال بس لازم تكون ياهل، انزين سؤال ثاني إنت تشلّخ؟

قال شفيك انت? يايك عشان تسبني

قال ما ينفع يا حبيبي يا ادوارد لا ياهل ولا تشلخ شلون اخليك تنتشر والناس تصدقك؟

قال يعني ماكو الا جذيه

قال لا اكو حل اخير قال شنو

قال تسوي جريدة مافيها كلام بس صور

استغرب ادوارد

قال صور منو؟

قال صور اي احد مو مشكلة هالديرة تحب الصور وتشتري مجلة صور بدينارين كل اسبوع بعد

طلع ادوارد وقال لا طبنا ولا غدا الشر

بفتح لي فندق خلاص هذا اسهل شي

قالوا له مو مشكلة

تشقق ادوارد

بس عندنا شروط

شنو؟

ما تسوي حفلات مختلطة حتى لو خاصة

ما تستضيف شركات من برّه تقابل الكويتيين

اذا بتخلي عادل الرويشد يغني بالمطعم مال الفندق

في ضوابط للحفلات

يعني محد يوقف ويصفق وبعد ال 12 يمشون كل الناس و اذا كنت يايب مغنية لازم كل الفرقة بنات
إي وإذا مغنية لازم الساعة 8 تخلص حفلتها عندنا قانون ما يسمح لها بالعمل بعد الثمان


واذا مغني لازم كل الفرقة رياييل

وما تعطي اي كويتي غرفة الا بعقد زواج بس اذا كويتية عادي عطها

طل إدوارد بويه الموظف وقال

ماتبي اخلي باب الغرفة مفتوح من فوق وتحت بعد؟؟

قال والله شلون طافت علينا هذي

خل اقول حق مسؤولي يمكن يعطيني بونس عليها

قال إدوارد ماكو الا ادش المجال اللي بالعالم كله ما يخسر هالايام

راح ادش مجال الاتصالات واضمن الفلوس بهالديرة العجيبة

توه ياي بيسوي دراساته

قال له صاحبه الكويتي

تعال عندي اليوم الديوانية وزير التجارة موجود عندي وكلمه بنفسك

قال زين هم اشكيله همومي

قبل لا ينطق ادوارد جدّام الوزير

رحب فيه وزيرنا المبجل

وقال ان الحكومة الكويتية اليديدة ترحب بالاجانب وحريصة على سماع توجيهات سمو الامير في ان تكون الكويت مركز مالي

طبعا حاول ادوارد يفضفض للوزير عن اللي مر فيه

وكان الوزير يهز راسه ويوافقه

ليما اخر شي ادوارد قال له عن مشروع الاتصالات اللي وده يسوي

قال اوكي مو مشكلة بس على شرط

مايكون في غرف محادثة

ممكن تستغل للحوارات بين الجنسين

ويه ادوارد صار علامة تعجب

قال له مولاي وزير التجارة

ممكن سؤال


قال له معالي الوزير تفضل

قال الحين الاتصال الهاتفي مو معناته ان اثنين يسولفون مع بعض وممكن تسوي كونفرنس اذا تعرف يا معالي الوزير ويكونون اكثر من 2 بالمكالمة نفسها يا مولاي

قال له معالي الوزير عدل كلامك

قال له ادوارد يعني ممكن هالاثنين او اكثر اللي قاعد يكلمون بعض بالمكالمة الهاتية العادية يكونون اهل او ربع او بينهم اعمال
او واحد قاعد يتحرش بوحده او العكس يا مولاي؟


قال له معالي الوزير ممكن

قال له ادوارد بكل عصبية

عيل شتبي

وياكبرها بحلجك ممكن يعني فاهم

شنو تسكر غرف محادثة خو نفس الشي

وآل مركز مالي آل

طلعتوني من طوري

ديره مافيها شي سنع يقول مركز مالي

قم زين قم

عاد ادوارد واهوا يسولف ومعصب يوله مسجين الأول من ترشيد

يقول له طف الليتات

يقول للوزير يود

قاط عشر ملايين دينار عشان يدزون مسجات يقولون طف الليت بدال لا يشترون مولد

حمدالله والشكر

والمسج الثاني كان عن غرف المحادثة بالتلفون

من الحرّه دش غرفة المحادثة جدام الوزير

ولا منو طلعت له

دانة

:)

جان يقول لها سالفته

جان تقول له

يا مستر ادوارد ازيدك من الشعر بيت

صار لنا 17 سنة ليما الحين ما ندري منو باق ملايين الناقلات رسميا

صار لنا سنة وشي ليما الحين ما ندري منو نزل اعلان يسب الكويت بجريدة الاهرام

صار لنا سنة ونص ليما الحين مو قادرين نسوي انتخابات حق اتحاد الكرة بسبة ولد اخو الامير وربعه

صار لنا شهر الحين والجامعة مو قادره تاخذ قرار باللي طاق الصحفي

صار لنا 17 سنة تقود الجامعة قائمة مخونة بالكويت

شتحجي يا ادوارد

ادوارد ما قال الا

cover me ya Dana

:(


20/07/2008

Edward 1


برج التحرير بلشوا بنائه بالثمانينيات

لنفرض ان ماكان صاير الغزو

شنو كانوا بيسمّونه؟؟

يا جماعة محّد عنده رقم خليف

محامي

وحق اللي يدفع أكثر

أشكره ينفع كاتب مقال بالفتن

الحق يا خليف

أو طرّش فؤاد الهاشم دام صار رفيج الأردنيين بعد جم بيزه منهم



وعدت إسرائيل وستفي بوعدها قريبا

أجهزة الإستخبارات الإسرائيلية ستصل إليه

ولن تهدأ قيادة الإستخبارات الإسرائيلية حتى تحقق للمجرم الإرهابي ما أراد

اياما حزينة تنتظره على ايدي قوات الجيش الإسرائيلي

الهدلق إنت محتر أكثر من اليهود

عسى ما شر؟؟؟

من أقرب مواضيع المدونة وأجملها بالنسبة لي موضوع عــنــبــر

اللي قلت لكم قصته بشهر 11 اللي طاف

اليوم عندي لكم سالفة عن إدوارد

إدوارد هذا يا محفوظين السلامة مليونير انجليزي بالاربعينيات من عمره

عنده انشطة تجارية متعددة بديرته

ابوه من مقاطعة كنت البريطانية

ابوه يا طويلين العمر كان يتاجر بالخمسينيات ولغاية استقلال الكويت بالكويت

المهم بو إدوارد كان دايما يتكلم عن ذكرياته مع زوجته أم إدوارد اللي عاشت معاه بالكويت فترة من الفترات

ويسولف عن شعب الكويت وطيبة قلوبهم وبساطتهم وتفتحهم

وشلون يتعاملون بثقة وبعد نظر بنفس الوقت في التجارة

إدوارد سمع من روايات وقصص أبوه وايد

لدرجة خلته يعشق الكويت ويتمنى إن يعيش التجربة اللي عاشها أبوه بالكويت

فقرر بنهاية التسعينيات إن يفتح باب للتجارة مع الكويت

شرّف إدوارد الكويت وقرر إن يشتغل بمجال المقاولات

بحكم إن عنده خبرة بهالمجال

وصل الكويت

وتجول بمدينة الكويت

وعجبته المنطقة اللي عند دروازة عبدالرزاق تقريبا

اللي اهيا منطقة البورصة والمسيد الكبير وقصر السيف

فقال حلو هذي المنطقة ودي أسوي فيها برج ضخم يكون معلم إضافي من معالم الكويت
وراح وسوّى المخططات وجهز كل شي

ودّاهم حق الجهات المختصة جان يقولون له ما يصير؟؟

تفاجأ إدوارد

افا ياذا العلم

طبعا ما قال ياذا العلم

بس تفاجأ

قال لهم ليش

قالوا له بهالمنطقة حدك 10 ادوار او 11 مو أكثر

قال يالله ميخالف خيره وديره وعندها قوانين ونظم وأنا غلطان ما سألت

بعدها بأشهر شاف ان في مبنى انبنى اكثر من 20 دور

بنفس المكان اللي اهوا كان باني عليه البرج؟؟

إنصدم بس قال اكيد لما شافوا مشروعي فكروا ان المنطقة يبيلها مباني طويلة بحكم إن الكل قاعد يتهافت عليها وسعر المتر صار غالي وايد بهالمنطقة

طبعا البرج اللي اقصده مو بنك يبدي بحرف الباء واسمه مثل اسم اكبر حقولنا النفطية

المهم استانس ادوارد المسكين على هالسالفة

وقال صدق ابوي لي قال انهم شعب متفتح ويتقبل الآراء

فكّر إدوارد ودوّر شسوي شسوي

قال عندهم بهالديرة خوش ساحل

وجوهم بحري جيّد

وفنادقهم شويه ماكو الا اشارك لي كويتي ونسويلنا فندق عالبحر

وحط عينه على ارض بالسالمية وراح بس قال خل اسأل قبل لا اسوي

قالوا له هالارض مو مرخصة ما تقدر تسوي عليها شي

قال اشوه اني ما كملت مصاريف على المشروع وابتلشت نفس المرة اللي طافت

ومع هذا شاف ان الارض اللي كان يبيها للفندق صارت فندق صج بس مو حقه حق غيره

بس طوّف هالمرة وقال اكيد رخصوها

مع ان ما كانوا مرخصينها

لأن يجوز لشسمه ما لا يجوز لغيره

المهم

واهوا يقرى العرب تايمز بلوبي الفندق ولّا يشوف ان الدولة فتحت المجال للجامعات الخاصة انها تفتح بالكويت

قال حلو ثلاث مرّات

هذي فرصتي

اروح واكلم أحسن الجامعات البريطانية اللي اعرفها

بحكم العلاقات المصلحية المشتركة

ويكون لي السبق بإفتتاح الجامعات الخاصة بالكويت

راح الولد ادوارد

وسوّا اتصالاته مع الجامعات

ووايد من الجامعات العريقة ببريطانيا رحبت بالفكرة

ورد الكويت ومعاه اوراق الموافقة المبدئية من اعرق الجامعات اللي تبدي رغبتها بفتح افرع لها بالكويت

ردوا عليه التربية بكل برود ادوارد الله يهداك علامك

انت يوم رحت تدور جامعة البرلمان الكويتي طلّع قرار


قال وبكل فرح بينه وبين نفسه

والله خوش ديره متحضره ومتقدمه صدق ابوي يوم قال متفتحه

عندهم برلمان يحدد قراراتهم مو مثل معظم الدول المحيطة المتفردة بالقرار

وقال حق موظفة التربية اللي كلمته

وعلى فكرة ترى موظفة التربية مو متحجبة

ولا كانت تتريق او تتكلم بالتلفون لمّا كلمها

ولا كانت لابسه لبس نفس الشي مع رفيجتها بالدوام

ولا حاطه صبغ اظافر اسود بعد

المهم قالها

وشنو القرار

قالت له القرار اللي طلعه البرلمان يقول

ماكو اختلاط

قال شنو

قالت اختلاط ماكو

جان يضحك

ويقول

نايس ون

يعني حلوه خوش قطّه

خزتّه وقالت لا صج صج ماكو اختلاط

قال لها وهو يعقد حاجبيه

سيريوسلي

يعني جد؟؟

قالت اي حتى هذا القرار شوف

قال لها ليش انزين؟

قالت لأن الشباب والبنات

لما يختلطون تصير مشاكل وبلاوي وجذيه يعني اشياء لا اخلاقية

قال لها ادري ان مالج ذنب بس ممكن سؤال

قالت له اي قول بس بسرعة

قال انتوا مسلمين مو؟

قالت مو

والمسلم محاسب من اول ما يبلغ مو؟

جان تقول ما فهمت بس مو

قال لها يعني اقصد لازم يصلي ويصوم ويبتعد عن المحرمات مثل الزنا والخمر مو؟

قالت عليك نور تعرف بالاسلام والله

قال لها عشّون عيل

وكمّل

دام المسلم محاسب من البلوغ والبنت والولد لما يدشون الجامعة يكونون بالغين

يعني محاسبين دينيا

من شنو إنتوا خايفين؟؟
وانتوا مدرسينهم دين 12 سنة
وغير البيت والمسيد والتراويح والحسينيات

ترى إدوارد اللي مطول السالفة مو انا

يا انكم مو واثقين بتربيتكم لعيالكم

يا ان برلمانكم تفكيره مو نظيف

قالت مممممم والله مادري

وعن اذنك بروح محاضرة اسمها كيف تتلذذ بالصلاة ابي اتلذذ بصلاتي

قال لها قبل لا يمشي

شنو انتي طول السنين اللي طافت تصلّين غصبا عليج ولا شنو

خزته بحقد ومشوا

ونكمل بالحلقة اليايه سالفة ادوارد

18/07/2008

إحموا الناس من الطاعون + شخصية الأسبوع



أول شي مدونة يدية اسمها

Zueching

ما كنت مخططه اني كل شوي آخذ عنوان الموضوع من مسلسل مبروكه ومحظوظه

لكن الكاتب السخيف المليق اللي شفته امس اجبرني على هالعنوان

قبل كل شي لازم اقول واعلن

اني مستحيل بيوم اوقف مع اي تيار ديني من التيارات الدينية اللي اشوفها حاليا شيعية كانت او سنية

محلية كانت او اقليمية

لا حماس او حزب الله او اخوان او سلف او جمعية ثقافة او عدالة ومادري شسمهم او غيرهم

خلصنا من هالسالفة

من اشهر اشتغلت جريدة الفتن على موضوع كاد إن يقسم الكويتيين مرة ثانية إلى شيعة وسنة بطائفية كريهة

بحجة شنو الدفاع عن الكويت

عماد مغنية قائد في حزب الله تم اغتياله

وسووا له تأبين احدى الحسينيات

وحضر التأبين أكثر من نائب شيعي

الوطن اشتغلت ان هذيل ولاءهم مو للكويت

وهذا خطف الجابرية وحزب الله ارعبوا اهل الكويت واعتدوا عليها

المشكلة في الناس اللي صدقت الوطن في ذاك الماضي القريب جدا

وقامت توزع الوطنية وحب الكويت بميزان جريدة الوطن

المهم انتهت السالفة واندقروا وتهزئوا وصارت الانتخابات وفازوا نواب التأبين على قولتهم

وكان في رجال بالكويت تقول كلمة الحق بصوت عالي حول هالقضية امثال عبداللطيف الدعيج وساجد العبدلي وغيرهم

لكن لنفرض ان الوطن كانوا من صجهم يبون مصلحة الكويت

ويحاربون كل من اعتدى عليها

أدري إن هالكلام يضحك بس نفرض

يوم الأربعا نزل هالكلام من رجل الاعمال الكويتي

ناصر الخرافي وصفحة اخيرة بالقبس


صورة المقالة خذيتها من ساحة الصفاة

يمجد بحزب الله اللي قالت عنه الوطن ان خطف الجابرية وحاول اغتيال اميرنا الراحل الشيخ جابر الله يرحمه

السؤال
سألوه الأمة وأنا هم أسأل

اين جريدة الوطن عن الدفاع عن الوطن

اين هايف وربعه اللي ركبوا الموجة بطائفية بغيضة وطعنوا بالكل

ولاّ صفعة دينار الخرافي اقوى من الوطن يا جريدة الوطن

هذا الكلام بس حق اللي وقفوا وصدقوا جريدة الوطن



الكاتب المليق والطاعون اللي اقصده نزل مقالة امس يقول في احدى فقراتها

تدرون ان لو حزب الله حكم لبنان راح يفرض العباية والحجاب

انا طبعا ما يعجبني هالشي

بس انت يالمليق ما يعجبك ان تفرض العباية والحجاب

ولا الدم الطائفي القذر اللي فيك يخليك حتى تهاجم افكارك لأنها نبعت من غيرك

اعوذ بالله منك

ومن اشكالك

لا وتدري ان راح يفصل الاختلاط حزب الله اذا حكم لبنان

شرايك جذيه زين او مو زين؟

انزين نروح حق الفقرة الثانية اللي يقول فيها

إن أقدم أسير عربي رد إلى أمه بعد ما أنهى حبسه بالسجون الاسرائيلية يعني بسنة 2008 أنهى حبسه

الغريب شنو



إي مثل ما شفتوا ان سنة 1980 حكموا عليه بخمس مؤبدات + 4 سنين فوق البيعة
يعني حكموا عليه بأكثر من 100 سنة

شلون أنهى مدة إحتجازه بالله؟؟

يعني انت مو مفروض انك تتكلم وتجابل الناس على اساس انك متدين وتصلي وتصوم وكل شي مو عيب تجذب على الناس

على الاقل اعتذر وقول انا جذّاب

بس قلة حيا شنسوي

لا ويكمل ويقول

عاد الأسرى الإسرائيليين إلى منازلهم معززين مكرمين

حضرة المليق طاعون

ردوا بتوابيت؟؟

يعني والله عيب هالجذب الاشكره

الناس عبالكم مدمغين مثلا؟؟

الزبدة اللي يبي يقولها باخر فقرة من مقالته

ان حزب الله خسر وماكو فايده من اللي صار

وانا بيني وبينكم فتحت القبس اليوم وشفت


اسرائيل وبريطانيا وغيرهم يقولون حزب الله انتصر

هذا غير ناصر الخرافي

انزين ليش الطاعون المليق يقول عكس جذيه؟؟

الظاهر ان هذا اهوا السبب


شخصية الإسبوع

عاشت في زمن جميل ماكان فيه ظواهر سلبية تحرمها من اكمال دراستها والابتعاث للخارج للتحصيل العلمي السليم

وخدمة المجتمع الكويتي بسلاح العلم

د. نورة مبارك الفلاح الله يرحمج

وياليتنا عشنا معاج في هذاك الزمن الجميل بعيدا عن احمد الفهد وهايف ونبيل العوضي وكل متخلف من اشكالهم

15/07/2008

يبيلنا دكتور شرقان


دكتور شرقان حق اللي ما يذكره مع اني استبعد هالشي

دكتور شرقان اهوا الدكتور اللي كان بالمصح يعالج مبروكه ومحظوظه


اللي كان يميز دكتور شرقان إن كان يتحمل غباء وينون مبروكه ومحظوظه ويصبر عليهم

من اللي شفته باليومين اللي طافوا إكتشفت إن لازم كلنا نكون دكتور شرقان عشان نتحمل كمية الغباء والينون اللي نشوفها يوميا بالديرة خل ندش بالعرض العملي وبدون تنظير

شوفوا معاي


دوام المدارس بيصير مثل ما كان كل سنة بنص تسعه تقريبا

حلو الكلام

وايضا بيبتدي مثل ما إبتدى السنة اللي طافت برمضان

يعني مو بدعه يديده مو ظاهره دخيله

شي طبيعي

وطبعا هذا القرار حكومي بحت

وإهيا الجهة المخولة بإتخاذه

المجلس كان رافع توصية والتوصية معناتها عدم الإلزام

التوصية تقول يا حكومة أجلي الدوام ليما عقب العيد

ورمضان راح يكون هالسنة اما 31-8 او 1-9 حلو

يعني يخلص اما 30-9 او 29-9
حلو الكلام

يعني بكل الاحوال راح يبتدي الدوام حسب رغبة النواب بشهر 10 تقريبا 5-10

يعني تأجيل العام الدراسي عن الوضع الطبيعي لمدة ثلاث اسابيع

الحكومة شقالت

وبررت مشكورة قرارها بعدم التأجيل

قالت اذا اجلنا الدوام معناته مدة التأجيل راح تنضاف على آخر السنة

ورمضان 2009 راح يكون بنص 8

يعني اجازة المدرسين والاهالي اللي عندهم عيال بالمدرسة تصير شهر واحد بس

وحزتها هم راح يتحلطمون على قصر الاجازه

واتخذت الحكومه قرارها بعدم التأجيل

عادي اجراء طبيعي حتى لو اختلف البعض معاه

بس على الرغم من إن الحكومة حرة بقرارها واهيا الجهة المخولة الا ان نوابنا ومثل ما شفتوا بالصورة اللي طافت شلون متذابحين عالتصاريح

يعني رئيس مجلس الامة بالنيابة روضان الروضان يقول هذا يثبت عدم التعاون

يا حكومة اما تاخذين توصيات المجلس او انتي مو خوش حكومة

ليش موجوده الحكومة عيل؟؟

انتوا حكموا وخالصين

هايف يقول تخبط حكومي لأن الحكومة خذت قرار من صلاحياتها؟؟

المحيلبي يحذر من علاقة متوتره بين السلطتين لأن الحكومة خذت قرار من صلاحياتها؟؟

تحمل نوابنا يا شرقان


وهذا مسلم بعد سوّى نورية سجن بوغريب حمدالله والشكر

اي كيفهم هالشي من صلاحياتهم وعطوكم المبررات بعد فوق القرار

نحترم اللي مو عاجبهم بس مو تأجيل الدوام او تثبيته يصير كفر الله يهداكم

انا مو حاريني الا التيار الديني

بكل سالفة يتكلمون بالشرع والشرع يقول يصير وما يصير

ولما رب العباد يقول ان العمل عباده يطالبون بعطلة رمضان والربادة؟؟؟

تعال دكتور شرقان تعال شوف رئيس المجلس الموقر والفاهم

هذا رئيس مجلسنا تصدقون؟؟

يصرح عن حزب الله يصرح عن ايران

يصرح عن العراق
يصرح عن احياء التراث

كل شي يعرف ما شاء الله عليه

الا شي واحد

اهوا الدستور الكويتي اللي اهوا اكثر واحد مفروض ان يتصرف من خلاله ويدافع عنه

تقدر تقول لنا يا جاسم الخرافي

اي ماده من الدستور تنص على اللي تقوله؟؟

والا اهوا عناد مثل عناد اليهال لأن الجريدة مسكت عليك هالجملة من قبل فقلت تكررها يعني قوي

دكتور شرقان ميخالف تحمل شوي بعد واخلص اللي شفته بيومين بس بديرتي
شباب طايحين له هيروين ومحششين وقاعدين يفجرون بخلق الله ويقولون جهاد

هذا واحد لازم تعرفون من اللي وزّه وسهّل له الروحه حق افغانستان

ودلّاه الدرب

عشان يقعد ويّا شلة محششين ومدمنين فاصلين عالدنيا وما فيها

المصيبه شوف التعليق اللي بالصورة عاليسار شيقول

دكتور شرقان انطر شوي

شوف هذا بعد حامي حمى الدستور

إنتظروني في المجلس

ليش ما تقول لي إستاحش علي البيت .. في الشريط القادم مرة وحده
وهذا الثاني بس ناقص نحط له اسم الألبوم .. طمني بس


دكتور شرقان أدري ينّناك

ودام هذي هموم نوابنا وهذا كلامهم

مانقول إلا




13/07/2008

الخروف


مسج كويت نيوز البارح يقول نقلا عن هايف

النائب هايف: العبث الأخلاقي الذي تقوم به شركات الإتصالات عبر غرف الدردشة ورسائل الشات يتحملها وزير المواصلات

مو قلنا لكم

هذا نائب فايز بجريمة انتخابات فرعية

ياي بيتحكم بالمسجات

يا جماعة لحد يقول له في خدمة توفير تقلل سعر المكالمات

وفي خدمة مكالمة الفيديو

وفي خدمة هوائي بعد

اشوه ان ما يعرف ال آي آر سي

الا صج ليما الحين موجود؟

المهم



الخروف كلمة تطلق على كل مسبه تابع يمشي ورا الراعي بلا تفكير او هوية

طبعا المصطلح دارج بين البنات والشباب

أعطيكم مثال

بنت وصبي يكلمون بعض

المهم واعد ربعه الصبي ان يطلع معاهم ويعزمهم على العشا بنينو مثلا

قبل العزيمة بدقايق تدق عليه البنت وتقول له لا ما تروح واهوا لا يحترم كلمته اللي عطاها حق الشباب ويسمع كلام البنت

هذا يطلق عليه خروف

مثال آخرصبي يكلم بنت

ويحبها وما يخونها وكل كلام اغاني الحب يسويلها ياه

صادها مرة بدون لا تدري واهيا تقول حق رفيجاتها ان اهيا ممشيته سيده

دق معصب وقال لها بكل عصبية

حبيبتي لا تقولين جذيه مرة ثانية

المهم واهوا طالع اليوم الثاني شاف واحد يتحرش فيها وواقف معاها بعد ومعطيها الرقم

دق متنرفز يقول منو هذا

قالت له ولد خالتي

قال لها آسف حبيبتي شكيت فيج

اليوم اللي وراه على طول كان فالانتاين شافها شاريه ورد وإيدها بإيد واحد وطالعه من السينما

قالها لها منو هذا

قالت ولد عمي توه راد من بره وهالورد حقك

وصدق واستانس بعد

اكثر من جذيه ماكو

المهم

في يوم 19 مارس 2006

ابتلانا الرب احنا يالكويتيين ببلوى اكملت البلاوي السابقه

هذي البلوى تسمى فؤاد الفلاح

تم تعيينه مدير عام الهيئة العامة للشباب والرياضة

يعني تقريبا وزير للرياضة الكويتية

عاد من يوم تعيينه الى اليوم اليكم بعض ما حدث

على مستوى كرة القدم فقط

خروج المنتخب من تصفيات كأس آسيا يعني حتى ما كنا من أفضل 20 منتخب بآسيا

خروج المنتخب من كاس الخليج بعد تعادل مع اليمن وخسارة من عمان وخسارة من الامارات

يعني دشينا البطولة وما فزنا وطلعنا وأظنها اول مرة بتاريخ الكويت يصير هالشي

خروج المنتخب من التصفيات الأولمبية

الوعد على مدى سنتين بإنهم يزرعون ملاعب القدم عشان تصلح للعب وما صار شي

البدء بتنفيذ ستاد نادي اليرموك والتوقف عن تنفيذه لمدة أكثر من سنة يعني بإختصار نادي اليرموك ما عندهم ملعب

الهروب من حضور اي اجتماعات للجان الشباب والرياضة بالمجلس

يعني بإختصار فؤاد الفلاح كان يبي يتحدى في ان يكون الأسوأ على الإطلاق ونجح بإقتدار

وغيره وغيره من مصروفات وهدر بالمال العام على حساب الدولة

بعد كل هالخمبقه والمهازل اللي يقودها فؤاد الفلاح

نفتح الجرايد اليوم او نفتج جريدة الفتن بالأصح ونشوف

استح على ويهك شوي

من زين رئيس الهيئة عشان تدبر ضده صفقة في ليل على قولتك

يعني ذكرني فؤاد وحضرتك يا نائب بالصبي والبنت اللي كتبت عنهم فوق

فؤاد يخربط وإنت تبيه يستمر

احنا نتكلم عن رفعة الدولة ومجدها وانت حضرتك زعلان ليش يشيلون فؤاد

اذا ما انشال هذي المهزلة صج مو اذا شالوه؟

وين بنروح بعد

اي حضيض بتودوننا زود

حرام اللي قاعد يصير بالبلد والله العظيم

على فكرة اليوم ايضا

قالوا بيوقعون مع مدرب يدرب منتخبنا ويعيد امجاده

الطريف بالموضوع ان المدرب اللي ودهم يوقعون معاه

عاطل عن التدريب من سنتين
نقلا عن القبس

واخر منصب تولاه اهوا تدريب منتخب صربيا في كاس العالم وطلع الأخير بالمجموعة

ومسجلين في مرمى فريقه 10 اقوال من 3 مباريات

وتمت اقالته

يا عيني عليك يا عجب والله يعينك انت وربعك على ما بلاكم


كل الشكر لموقع هايدوو الرياضي واحد المشرفين فيه على تقديم المعلومات الخاصة بفؤاد الفلاح بشكل سريع جدا

ملاحظة مهمه: ما اقصد اني اقول عن النائب قويعان ان حيوان لا حشا لكنه مصطلح دارج لإيصال المعلومة لا اكثر



11/07/2008

سرحان صادهم + شخصية الاسبوع







شوفوا اللي عاليسار بالصورة

هذا العقيد غلوم حبيب

ما عندي شي عليه بس ما يشابه ياس خضر؟؟




المهم خل أقول لكم سالفة سرحان

سرحان هذا إسم مدونة كويتية تستحق الزيارة

المهم سرحان مختنق من كثرة الايميلات اللي توصل له وتهدد وتقول

ارسلها لتسعتعش واحد والا ستنتحر بعد يومين واموالك تذهب هباء منثورا ويموت مطربك المفضل

وستشاهد رجلا جالسا على احد الطاولات في ستاربكس ينادي احد العاملين في المقهى ويقول له بيساب ابي قهوة

المهم عاد قرر شيسوي سرحان

قرر يدش احد مواقع مسابقات الفوتوشوب وياخذ صور عن الالوان وفن الالوان من هذي المواقع

واخذ الصورة واللي اعتقد انها عبارة عن بصله ملونينها

وقرر يدز ايميل حق منتديات ومجموعات الرسائل يقول فيها

سبحان الله والله أكبر.. فواكه وخضروات ملونة طبيعية 100% ودز الايميل

وكتب ان هالفاكهة لقوها بقرية بدائية يم غابات الامازون

المهم خلال اسبوع او اقل وصل له الايميل مرة ثانية

ودازينه حق الف ايميل

والصورة تتكلم


شكرا يا سرحان على هالدرس البسيط حق الاغبياء والمغفلين

ودامنا بهالصدد والارهاب الديني

نقل موقع الامة من جم يوم عن هتك عرض طفل في رحلة تسمى خيرية

تنظمها جمعية احياء التراث

تذكرون الياهل اللي تم هتك عرضه باحد المدارس وأقحموا هالبند باستجواب الشريع حق نورية

وشلون الكل تذابح على اعدام نورية سياسيا لهذا السبب

خل اذكركم بس باللي صوتوا مع طرح الثقة عشان الياهل بس

وليد الطبطبائي - جابر المحيلبي -ضيف الله بورمية -راعي الفحماء - علي الدقباسي - عبدالله مهدي - وغيرهم

هل فيكم رجل ثابت على مواقفه ويسوي شي تجاه هالقضية بجمعية خيرية مرجح جدا انها احياء التراث

طبعا لأ والايام تثبت

السالفة نشرت بتاريخ 9-7 بعالم اليوم واليوم 11-7 والى الآن ماكو ولا كلمة منهم

وننطر ونشوف

عندكم اسبوع وتبين مواقفكم

وعلى طاري نورية

صفقنا لج ايام استجوابج على قوتج وثباتج رغم تهديداتهم

لكن اذا اليوم ثبت انج فعلا بتمررين تعيين حرامية افكار عمداء فهذي ما راح نسكت عنها ابد

شخصية الإسبوع

تم حجب الشخصية هالاسبوع لأن ما لقيت احد مسوي شي يسوى

07/07/2008

شاللي صار يا بو صادق؟

شكرا لجريدة الجريدة وشكرا لنايف الأزيمع على هالكلام

نجذب عليك اذا قلنا ان ما يفرق أو يأثر هالكلام

صدقني اي كلمة إطراء أو تقدير من الناس سواء بالصحف او المدونات او اي وسيلة اعلامية او حتى بالتعليقات والايميلات تعتبر

مثل اعادة شحن لطاقاتنا

أو مثل الرصيد بالنسبة للايزي والاكسبرس

شكرا استاذ نايف على الرصيد هالمرة وما تقصر وان شاء الله ما نخيب ظنكم

هذا اللي يبونه

طاقين محرر صحفي

انتوا يا الخونة الائتلافية

وتستنكرون اعمال العنف يعني تستنكرون انفسكم

بس تدرون شنو الحل بالنسبة لهم

اعادة الحواجز جدام صالة التسجيل لتقليل الاحتكاك بين القوائم

شكو؟

القوائم شكو الحين

محرر بيغطي اخبار ومنها انتقاد على وجود الحواجز يت الجامعة والغت الحواجز بناء على موضوع المحرر

ما عجبهم هالشي لأنهم راح يلقون صعوبة نوعا ما بنشر اكاذيبهم على الطلبة المستجدين لان القوائم الثانية بتزاحمهم

فطقوه وريحوا نفسهم

الحين أكبر راس فيهم يعني الفاهم

يقول ردوا الحواجز عشان ما نطق الصحفي مرة ثانية

صج قلة ادب

مليت منهم ومن سيرتهم بس لازم نفضحهم

المهم

يكيكي مادري شنو بباله لما يكتب هالشي

هذي مقالة بيوم 1-7 كاتبها يكيكي

شوفوا هالفقرة

وما بين شاليهات الخيران وفلل ديفون »المقاطعة السويسرية الشهيرة« نقاط تلاق واختلاف، في صالة البولينج القديمة والتابعة لمنتزه الخيران زحمة لوجوه الكويتيين »الجلحة الملحة« ويا حلو »الجلحة الملحة« فقد زرت سويسرا مرة وتوقفت عند ديفون وعندي الناس الجلحة الملحة بالخيران احلى من الناس »الفاهية« هناك، صيحتهم وضحكاتهم تفز البسمة والخاطر من الصمت الديفوني السويسري القاتل هناك

يقول زار سويسرا مرة وتوقف عند منتجع ديفون السويسري

الطريف بالموضوع ان منتجع ديفون فرنسي مو سويسري

يعني يا جذاب شنو فايدة هالجذبة

قول سمعت عن منتجع بسويسرا ماشي

عشان لما تطلع غلطان تقول والله مادري سمعت

مو تقول زرت

يعني تاكد انك رايح المكان

وأثاريه بفرنسا

شنو يعني بس جذيه تجذب بس من اجل الجذب؟؟

حمدالله والشكر

السيد حسين القلاف - بو صادق

بالنسبة لي وبرايي الشخصي ان يعتبر من اكثر النواب الملتحين تمسكا بقناعاته وآراءه حتى لو اختلفنا معاها

يعني قصدي ان قليل التلون يشبه في ذلك زميله عادل الصرعاوي

مع افضلية برايي للصرعاوي

السيد القلاف كان من أشد المحاربين لجريدة الفتن

وشهدت الفترة النيابية الاخيرة له قبل فوزه بهالانتخابات حرب كبيرة ما بينه وبين جريدة الفتن

ورسموا عنه بو سخافة وبو سخيف اكثر من مرة

ووصفته الجريدة بصفحتها الاولى بالكذاب ايضا في فترة سابقة


الغريب ان بعد خسارته بانتخابات 2006

او بالاصح بعد اعلانه الترشيح لانتخابات 2008

اصبح القلاف صديق ودود لقناة وجريدة الوطن

طلع بتلفزيونهم اكثر من مرة طوال الشهرين اللي طافوا

يطلع بالجريدة بشكل شبه يومي

وطبعا كله من باب تغطية جميع تحركاته اعلاميا مو من باب الشتم والسب اللي كانت تمارسه جريدة الوطن ضده

اعتقد ان القلاف يدري اكثر من أي احد فينا شنو جريدة الوطن

وشنو التفرقة اللي قاعد تزرعها بين اهل الكويت

فشاللي حصل يا بوصادق

واحنا نعرف عنك ثباتك على قناعاتك حتى ولو اختلفنا معاها

ارجع لمداخلتك في جلسة طرح الثقة بيوسف الابراهيم وتعرف شنو كان القلاف امس وشنو اهوا اليوم

لا يكون اشتروك يا بو صادق؟

05/07/2008

فوق شينهم + شخصية الإسبوع


تحديث
:::::::::::::::::::

محرر جريدة الجريدة اللي طقوه جماعة الخونة

قدم شكوى رسمية مرفق فيها ورقة الطب الشرعي اللي تثبت وجود قطع تحت العين

وسلموه حق
عميد شؤون الطلبة الله يستر منه فايز الكندري صديق الائتلافية
والعميد المساعد للشؤون الطلابية بكلية الاداب عبدالله الهاجري

ونتايج التحقيق الاولية تقول ان خمسة من الائتلافية متورطين منهم اعضاء رابطة ومرشحين القائمة

هذا كله شي متوقع لكن الغير متوقع
ونقلا عن الآن

تسربت أخبار من صفوف العاملين في القائمة الائتلافية أن عدد من أعضاء الاتحاد الوطني لطلبة الكويت وعدد من أنصار الائتلافية قد طمأنوا زملاؤهم الخمسة ممن اعتدى على الزميل بأنهم سيرفعون قضيتهم إلى أعضاء مجلس الأمة ليتوسطوا بتعديل قرارات لجنة النظام الجامعي في حال فصلهم من الجامعة ، كما توعد عدد من أعضاء الاتحاد الحاليين أنهم سيقومون بتطبيق كافة الصلاحيات المعطاة لهم والغير معطاة من أجل نصرة زملائهم في القائمة

حلو حلو حلو

وطبعا نوابنا الاشاوس ما يقصرون مع مكينة تفريخهم

وهذا ايضا جزء تاريخي بسيط
منقول من الآن عن سوابق الائتلافية

الجدير بالذكر أن القائمة الائتلافية في السنوات الأربعة الماضية كانت السباقة في أحداث العنف الجامعية واعتبرت أحد أكثر القوائم نشاطا في هذا المجال ، إذ شاركت في أحداث الخالدية الدامية وعلى رأسها رئيس الاتحاد السابق ونائبه حين اعتدوا على زملائهم في القائمة الهندسية في العام النقابي 20052006 ،وشاركوا في حادثة طعن طالب كلية الآداب في العام نفسه ، وتعتبر حادثة الاعتداء على الصحفي الزميل العلي ليست الأولى في سجل القائمة بعد أن اعتدى رئيس رابطة المستجدين في الاتحاد الوطني لطلبة الكويت في العام النقابي السابق على الزميل في جريدة القبس مساعد الوردان .وطالب عدد من طلاب وطالبات جامعة الكويت مدير الجامعة د. عبد الله الفهيد تطبيق أقصى العقوبات على من أسموهم ' فتوة ' الجامعة وإيقاف مسلسل العنف الذي لم ينته حتى الآن ، فجامعة الكويت كانت وستظل أعلى صرح علمي أكاديمي في دولة الكويت ، وطالبوا المدير عدم الرضوخ للضغوطات الخارجية والتي ستمارسها قوى ' الإخوان ' للحيلولة دون معاقبة

تغيير مسماهم الى الطالبانية ضرورة

::::::::::::::::::::::::::::::::::::::

رايحين وطاقين المحرر الصحفي مال الجريدة لأن ما خلاهم على هواهم يسرحون ويمرحون بقاعة التسجيل

ومعورينه وهو يقوم بدوره المهني

وهذي طبعا مو أول مرة

تاريخهم على مر اكثر من 30 سنة

قذر ملئ بالخيانات

يقول لكم مره ندوه مو عاجبتهم طبعا تيارهم مو اهما

راحوا وطفوا الكهربا؟؟

ومرة مهرجان خطابي بكلية العلوم انفضحوا فيه بقوة

قاموا وطقوا البنات بالعقل

فضايحهم كلها كتبتها
بموضوع قديم

الله يخليكم يا قوائم الجامعه اصحوا شوي بس اصحوا

على الاقل بلشوا بخطوة واهيا الضغط على الجامعة ان تصير الانتخابات بالكورس الثاني

عطوا فرصة حق الطلبة اليدد يكشفون أكاذيبهم وعنفهم

كل ما اكتب موضوع واحس اني كررته وايد اقول بيني وبين نفسي في فايده ولا قاعد اعبر عن مشاعري وبس

صدقوني سبب رئيسي في اتاحة الفرصة للبوق بالبلد

للفساد

للتشكيك في الاخلاقيات
اهما هالاشكال المزروعين بيناتنا

يجذبون اشكره ويتكلمون باسم الدين

لا وذاك اليوم يقولون بعد محرمين المولد النبوي

اي واحد يشوف القوى الدينية شلون تسحب الكويت للوراء

ترى عش الدبابير مالهم اهما شلة الخونة هذيل الله يكافيكم الشر

بس خلاص احتريت وايد

شخصية الاسبوع

جهد ومهنية عالية المستوى اطل من خلالها على مدى اسبوعين

لكشف الحقائق ومعرفة الحق من الباطل

شكرا عادل اليحيى على هذه التقصي والدقة



02/07/2008

متى تنتهي الائتلافية؟


هذي رائدة الحركة الطلابية

ونعم الريادة والله

اللي ما يعجبهم يطقونه

خوش رياده

لا وخونه بعد

بس الشرهة مو عليكم

على الطلبة اللي معطينكم ويه

وعلى القوائم اللي مو راضية تستوعب تأثيركم الكريه على الكويت واهلها

جامعتكم بعد؟؟

جامعتكم جمعية الاصلاح وحدس

هالجامعة انوجدت قبل لا تتغلغلون بيناتنا

بس الشكوى لله

انزين هذا جزء

ديره مافيها اختلاط من عمر لا بمدرسة ولا بجامعة ولا بسوق ولا بمجمع ولا بشارع

ديره البنت مو مسموح لها تسوق سياره

ديره عندهم هيئة اسمها بس اسمها امر بالمعروف والنهي عن المنكر من سنين

ومع هذا كله


يا ترى ليش؟؟؟

هذا دليل صريح على ان البلوة مو بالاشتراك والتعاون ما بين الجنسين

البلوة بالتزمت اللامنطقي والكريه اللي يسعى هايف وربعه ان يسوونه بالكويت

لكن مستحيل يصير هالشي بديرتنا الحرة الكويت

عموما المواضيع بالصيف تقل وايد وانا قاعده اكتب بشكل شبه يومي

فسامحوني على قصر المواضيع

وأخليكم مع هالمزاج الاربعائي على غرار ربعنا ام صدّه

سامحوني على اخراجها اللي يضحك بس الاغنية جميلة

اي وعندنا
نواقيس يديده شرفت عالم التدوين زوروها