20/07/2008

Edward 1


برج التحرير بلشوا بنائه بالثمانينيات

لنفرض ان ماكان صاير الغزو

شنو كانوا بيسمّونه؟؟

يا جماعة محّد عنده رقم خليف

محامي

وحق اللي يدفع أكثر

أشكره ينفع كاتب مقال بالفتن

الحق يا خليف

أو طرّش فؤاد الهاشم دام صار رفيج الأردنيين بعد جم بيزه منهم



وعدت إسرائيل وستفي بوعدها قريبا

أجهزة الإستخبارات الإسرائيلية ستصل إليه

ولن تهدأ قيادة الإستخبارات الإسرائيلية حتى تحقق للمجرم الإرهابي ما أراد

اياما حزينة تنتظره على ايدي قوات الجيش الإسرائيلي

الهدلق إنت محتر أكثر من اليهود

عسى ما شر؟؟؟

من أقرب مواضيع المدونة وأجملها بالنسبة لي موضوع عــنــبــر

اللي قلت لكم قصته بشهر 11 اللي طاف

اليوم عندي لكم سالفة عن إدوارد

إدوارد هذا يا محفوظين السلامة مليونير انجليزي بالاربعينيات من عمره

عنده انشطة تجارية متعددة بديرته

ابوه من مقاطعة كنت البريطانية

ابوه يا طويلين العمر كان يتاجر بالخمسينيات ولغاية استقلال الكويت بالكويت

المهم بو إدوارد كان دايما يتكلم عن ذكرياته مع زوجته أم إدوارد اللي عاشت معاه بالكويت فترة من الفترات

ويسولف عن شعب الكويت وطيبة قلوبهم وبساطتهم وتفتحهم

وشلون يتعاملون بثقة وبعد نظر بنفس الوقت في التجارة

إدوارد سمع من روايات وقصص أبوه وايد

لدرجة خلته يعشق الكويت ويتمنى إن يعيش التجربة اللي عاشها أبوه بالكويت

فقرر بنهاية التسعينيات إن يفتح باب للتجارة مع الكويت

شرّف إدوارد الكويت وقرر إن يشتغل بمجال المقاولات

بحكم إن عنده خبرة بهالمجال

وصل الكويت

وتجول بمدينة الكويت

وعجبته المنطقة اللي عند دروازة عبدالرزاق تقريبا

اللي اهيا منطقة البورصة والمسيد الكبير وقصر السيف

فقال حلو هذي المنطقة ودي أسوي فيها برج ضخم يكون معلم إضافي من معالم الكويت
وراح وسوّى المخططات وجهز كل شي

ودّاهم حق الجهات المختصة جان يقولون له ما يصير؟؟

تفاجأ إدوارد

افا ياذا العلم

طبعا ما قال ياذا العلم

بس تفاجأ

قال لهم ليش

قالوا له بهالمنطقة حدك 10 ادوار او 11 مو أكثر

قال يالله ميخالف خيره وديره وعندها قوانين ونظم وأنا غلطان ما سألت

بعدها بأشهر شاف ان في مبنى انبنى اكثر من 20 دور

بنفس المكان اللي اهوا كان باني عليه البرج؟؟

إنصدم بس قال اكيد لما شافوا مشروعي فكروا ان المنطقة يبيلها مباني طويلة بحكم إن الكل قاعد يتهافت عليها وسعر المتر صار غالي وايد بهالمنطقة

طبعا البرج اللي اقصده مو بنك يبدي بحرف الباء واسمه مثل اسم اكبر حقولنا النفطية

المهم استانس ادوارد المسكين على هالسالفة

وقال صدق ابوي لي قال انهم شعب متفتح ويتقبل الآراء

فكّر إدوارد ودوّر شسوي شسوي

قال عندهم بهالديرة خوش ساحل

وجوهم بحري جيّد

وفنادقهم شويه ماكو الا اشارك لي كويتي ونسويلنا فندق عالبحر

وحط عينه على ارض بالسالمية وراح بس قال خل اسأل قبل لا اسوي

قالوا له هالارض مو مرخصة ما تقدر تسوي عليها شي

قال اشوه اني ما كملت مصاريف على المشروع وابتلشت نفس المرة اللي طافت

ومع هذا شاف ان الارض اللي كان يبيها للفندق صارت فندق صج بس مو حقه حق غيره

بس طوّف هالمرة وقال اكيد رخصوها

مع ان ما كانوا مرخصينها

لأن يجوز لشسمه ما لا يجوز لغيره

المهم

واهوا يقرى العرب تايمز بلوبي الفندق ولّا يشوف ان الدولة فتحت المجال للجامعات الخاصة انها تفتح بالكويت

قال حلو ثلاث مرّات

هذي فرصتي

اروح واكلم أحسن الجامعات البريطانية اللي اعرفها

بحكم العلاقات المصلحية المشتركة

ويكون لي السبق بإفتتاح الجامعات الخاصة بالكويت

راح الولد ادوارد

وسوّا اتصالاته مع الجامعات

ووايد من الجامعات العريقة ببريطانيا رحبت بالفكرة

ورد الكويت ومعاه اوراق الموافقة المبدئية من اعرق الجامعات اللي تبدي رغبتها بفتح افرع لها بالكويت

ردوا عليه التربية بكل برود ادوارد الله يهداك علامك

انت يوم رحت تدور جامعة البرلمان الكويتي طلّع قرار


قال وبكل فرح بينه وبين نفسه

والله خوش ديره متحضره ومتقدمه صدق ابوي يوم قال متفتحه

عندهم برلمان يحدد قراراتهم مو مثل معظم الدول المحيطة المتفردة بالقرار

وقال حق موظفة التربية اللي كلمته

وعلى فكرة ترى موظفة التربية مو متحجبة

ولا كانت تتريق او تتكلم بالتلفون لمّا كلمها

ولا كانت لابسه لبس نفس الشي مع رفيجتها بالدوام

ولا حاطه صبغ اظافر اسود بعد

المهم قالها

وشنو القرار

قالت له القرار اللي طلعه البرلمان يقول

ماكو اختلاط

قال شنو

قالت اختلاط ماكو

جان يضحك

ويقول

نايس ون

يعني حلوه خوش قطّه

خزتّه وقالت لا صج صج ماكو اختلاط

قال لها وهو يعقد حاجبيه

سيريوسلي

يعني جد؟؟

قالت اي حتى هذا القرار شوف

قال لها ليش انزين؟

قالت لأن الشباب والبنات

لما يختلطون تصير مشاكل وبلاوي وجذيه يعني اشياء لا اخلاقية

قال لها ادري ان مالج ذنب بس ممكن سؤال

قالت له اي قول بس بسرعة

قال انتوا مسلمين مو؟

قالت مو

والمسلم محاسب من اول ما يبلغ مو؟

جان تقول ما فهمت بس مو

قال لها يعني اقصد لازم يصلي ويصوم ويبتعد عن المحرمات مثل الزنا والخمر مو؟

قالت عليك نور تعرف بالاسلام والله

قال لها عشّون عيل

وكمّل

دام المسلم محاسب من البلوغ والبنت والولد لما يدشون الجامعة يكونون بالغين

يعني محاسبين دينيا

من شنو إنتوا خايفين؟؟
وانتوا مدرسينهم دين 12 سنة
وغير البيت والمسيد والتراويح والحسينيات

ترى إدوارد اللي مطول السالفة مو انا

يا انكم مو واثقين بتربيتكم لعيالكم

يا ان برلمانكم تفكيره مو نظيف

قالت مممممم والله مادري

وعن اذنك بروح محاضرة اسمها كيف تتلذذ بالصلاة ابي اتلذذ بصلاتي

قال لها قبل لا يمشي

شنو انتي طول السنين اللي طافت تصلّين غصبا عليج ولا شنو

خزته بحقد ومشوا

ونكمل بالحلقة اليايه سالفة ادوارد

20 comments:

kuwaitforus said...

غلطان من قاله يستثمر بالكويت
واذا يبي يحل مشاكله لازم يروح حق باقر

Bad-Ran said...

على هالمنطق راح ترد عليه الموظفة و تقوله .. يعني عادي نبيع خمر لأن احنا ربينا الناس على ان الخمر حرام ؟
شنو راح يرد عليها ادوارد ؟

...........

my point is
ان الموضوع مو الناس متربية ولا لأ .. الموضوع ان الاختلاط ما فيه أي شي غلط

Anonymous said...

جان سموه برج يابر الاحمد

Cute But Imperfect said...

فديييت ادوارد! حبيته بصراحه!
كان المفروض الموظفه تعلمه شي واحد بس! تقوله "هذي الكويت صل على النبي" :D

kuwaitya_7saweya said...

بسمونه برج المواصلات
او اي شي بايخ

اساسا يحمد ربه محامي صدامووو انه لقى وظيفه
وزين سوى طلعه من الوظيفه انا اقول خل يبيع بنك

خوش قصه هههههه
ادوارد ليش يسمع كلام ابوه
بس زين يسوي بالموظفه اللي لابسه نفس رفيجتها شخباري

Anonymous said...

btw
خل يرد بيتهم ادوارد ابرك
وخل يبطل حسد مو قالوا ان الحسد هو سبب مشاكلنا بهالديره ؟

Mohammad Al-Yousifi said...

ادوارد مو سامع بالدوحة و دبي؟

بعد نظر said...

Smathlin Colin

Anonymous said...

لمعلوماتش:

البرج كان مقررا له ان يسمى برج جابر

ولكن بعد التحرير آثر الامير الراحل رحمه الله تسميته على هذه المناسبة العظيمة وهي تحرير الكويت.

بيت القرين said...

كويت فرس
ابوه قال له
وبيوصل حق باقر لا تحاتي

بدران
ويور بوينت صح

حمودي
صار معلوم

كيوت
ينحب ادوارد
:)

كويتيه حساويه
ادوارد يحب ابوه

حمودي
حسود هالادوارد

مطقوق
سامع بس يبي ينفذ وصية ابوه

بعد نظر
جورج ادوارد

برج جابر
شكرا على المعلومة ورحمة الله عليك يا بومبارك

Anonymous said...

دانه مسا الخير... لا وانتي الصاجه الموظفه كلش ما كانت من غير حجاب ولا حاطه لها مق كوفي هارودز كنه صج ولا لابسه لققزز ونعال ولا طايحتلا مسجات مع صاحبها !! ( القصد لا تتطنزين على الحجاب لان اكو واااااااااااااااااااااايد محجبات راقين جدا جدا )

Salah said...

الهدلق صاحي؟

Anonymous said...

dalal_eng:
anonymouse معاج حق لموضوع الحجاب بس دانة انسانة مومعصومة من الهفوات وشابة بعد يعني نظرة الشباب عندنا فيها سطحية ومرات يمكن من الحره
وانا مو متحجبة (:

ودمتم سالمين

بعد نظر said...

Smathlin Colin يا يبه

lwatan-ajmal said...

مسكين ادوارد هذا والمساكين صج احنا اللي متحملين البلاوي والأفكار الرجعيه هذي
ما اقول الا عمار يا كويت

بوشملان said...

تدرين المشكلة شنو عندما نجعل بعض الامور المتعلق بالدين محل للسخرية والتندر والضحك

وانا اعتقد ان هذا ليس بغريب على التيار الليبرالي

الامر الاخر الستي تؤمنين بالراي والراي الاخر ؟؟؟
ليش التقليل من قدر الراي الاخر والاستهزاء به وهو راي الاغلبية ؟؟
اعتقد انك في حاجة لمراجعة نفسك ومراجعة كتاباتك لانها تعكس حالة التيار الليبرالي !!

المهم الكويت يبيله انفتاح اقتصادي اكبر من خلال تسهيل الاستثمار الاجنبي وتعديل القوانين وتقديم المعونات المالية للمستثمرين الصغار واشراك اهل الكويت بالبرامج العمالقة المتعلقة بالتنمية من خلال فتح باب المساهمة برأس مالها

الامر الاخر اتمني انك تعلقين على مقال كتبته في نقد التيار الليبرالي والذي ارى انه الان في مرحلة الاحتظار
http://m3m3ah.blogspot.com/2008/07/blog-post_20.html

شكرا للمساحة الواااسعه للتعليق

بيت القرين said...

أنو
ما تطنزت على المتحجبات او الحجاب افا عليج
اهوا مثل ما في متحجبات يضحكون في مو متحجبات يضحكون
لا تعطين الكلام اكبر من معناه

صلاح
اشك في ذلك

المهندسة دلال
لا افا عليج ما اتطنز وشوفي ردي عليها

بعد نظر
جورج ادوارد قلنا

لوطن اجمل
عمار

بوشملان
اؤمن بالرأي الآخر ومو شرط اقبله
فاللي ما يعجبني منه ليبرالي كان او ديني انتقده
هذا كل الموضوع ببساطة

Anonymous said...

من فترة كنت أقرأ عن البرج وقريت إنه معلم قوي وترتيبه حسب الطول 32 على العالم .. البرج حسب الموسوعة كان يفترض أن يسمى برج الإتصالات للكويت

It was meant to be called The Kuwait Telecommunications Tower.


http://en.wikipedia.org/wiki/Liberation_Tower

Unknown said...

المسألة مو إدوارد ومشاريعة العفسة كلها يات من أبوه يوم راح ومدح الكويت وما بين إن فيها شوية حقد وأنانية ومصالح وحسد وجشع وطمع كل هذي السوالف ما بينها حق إدوارد ولو ابوه كان يفتهم جان دزه حق شيخ ولا وزير ولا تاجر أقلتن جان قال حقه روح حق وزير الاوقاف اول يعني حق المعتوق جان حصل مكان مثل وقف البابطين وبعدين ادوارد بسميه وقف الأجنبي ويخصص %5حق الاجانب وهو أجنبي ياخذ كل مدخول المشروع ويأخذ %5كلها للأنه أجنبي

Anonymous said...

عبدالله الهدلق ....ماتشوف شر حبيبي ...
اقترح عليك تنزل هالمقال بجريدة معاريف او هآرتس بس عاد غير اسمك من عبدالله الهدلق الى مناحيم الهيلق لان عيال عمك هناك يكرهون العرب حتى لو صاروا دلاغات لهم ....بتضل في عينهم دلاغ مهما تصهينت ..عضوية ناديهم مسكرةعلى اليهود فقط ...
مسكين هالماسوخي ما هان عليه يشوف فرحة على و جوه العرب ...
عسى الله يفكه من الماسوخية ...موخوش مرض..
اما ادوارد فمادري شلون صار مليونير و هو على نياته جذي...يمكن مليونير بالوراثه ...