22/07/2008

Edward 2


ليش الواحد أول ما تصوره الكاميرا بالشارع يطق بريك؟؟؟

شالفكرة يعني بينزل بيقول تكفين سامحيني؟؟

حسين الاحمد المطرب التائب بغض النظر عن كل كلامه من اول ما حط لحية ليما اليوم

بس ابي الكلام اللي بالمستطيل الاحمر

يبي يروح يشوف امه ما سلّم عليها ليما الحين



المزيون راح حلق

وراح شرى بولو شيرت

وشرى نظارة

ولقى كبوس مشقق

طبعا ما كان بهالهيئة بأفغانستان ولا جان علوم

ولا امن الدولة عندهم حلاق ومحلات بالميزانين

وبعدين يقول ما سلّم على أمه

المهم نرجع حق ادوارد احسن

ادوارد بعد ما فلس من سالفة الجامعات الاهلية وقانون منع الاختلاط

ظل يروح ويرد للكويت عل وعسى يلقى مشروع

ليما صارت حرب العراق

قال حلو مرتين

و هذي فرصتي اول ما يطيح النظام العراقي

الكويت راح تزدهر تجاريا وتصير مركز للأجانب لدخول العراق

فقال خل اروح اشتري اراضي بالكويت

وابني عليهم عماير استثمارية وسكنية وتجارية

ووصل الكويت

واول ما سأل قالوا له

لا يحق للأجانب التملك بالكويت

انزين انا بعمر لكم البلد وببني اجزاء من هالصحاري الخالية وبفيد الديرة اقتصاديا بضخ فيها فلوس

قالوا له لا ما يصير

قال اوكي عيل جم لازم اقعد عشان تعطوني جنسية ويحق لي اتملك

خزّه الموظف وقال له كلام رباعي الحروف

تخسي

بالذمة سر حبي مالت راغب ما تضحك

انصدم ادوارد من الرد وقال له ليش ليش شطالب انا شنو شروطكم حق الجنسية

قال ماعندنا شروط

قال شلون يعني

قال بس محد ياخذ الجنسية الكويتية

حتى اللي موجودين بالكويت واستشهدوا عشانها هم بعضهم ما ياخذونها

قال ليش عاد عددكم وايد؟

قال لا تونا واصلين مليون

قال انزين وضعكم مو مستقر؟

قال لا الحمدلله بخير ونعمة وامن وامان

قال انزين كلكم علماء ومفكرين وما تبون تخترب التركيبة يعني؟

قال المسؤول شهالحجي الفاضي لا طبعا

الزبدة مالك فرصة

دور لك كويتي تشتغل باسمه

طلع ادوارد واهوا متضايق
قال بالله شسوي بهالديرة

الله يسامح ابوي الظاهر كان رايح دولة ثانية عباله الكويت

وكلها جم شهر وطلع قانون المطبوعات اليديد

وفتحوا المجال للجرايد

استانس ادوارد

وقال بس عاد هذي فرصتي

وافتح جريدة واخليها اكثر جريدة منتشرة والناس تصدقها

راح حق احد المستشارين الاعلاميين بالكويت

وقال له

ابي افتح جريدة تكون اكثر انتشارا ونسخ بين الجرايد وهم ابي الناس تثق فيها

المستشار قال له وبالحرف الواحد

إنت ياهل؟؟

قال افا شهالحجي، لا طبعا ما تشوفني شكبري، ليش تقول جذيه؟

قال ما ينفع

اذا تبي جريدة توزع اكثر شي والناس تصدقها لازم تكون ياهل

قال ليش

قال بس لازم تكون ياهل، انزين سؤال ثاني إنت تشلّخ؟

قال شفيك انت? يايك عشان تسبني

قال ما ينفع يا حبيبي يا ادوارد لا ياهل ولا تشلخ شلون اخليك تنتشر والناس تصدقك؟

قال يعني ماكو الا جذيه

قال لا اكو حل اخير قال شنو

قال تسوي جريدة مافيها كلام بس صور

استغرب ادوارد

قال صور منو؟

قال صور اي احد مو مشكلة هالديرة تحب الصور وتشتري مجلة صور بدينارين كل اسبوع بعد

طلع ادوارد وقال لا طبنا ولا غدا الشر

بفتح لي فندق خلاص هذا اسهل شي

قالوا له مو مشكلة

تشقق ادوارد

بس عندنا شروط

شنو؟

ما تسوي حفلات مختلطة حتى لو خاصة

ما تستضيف شركات من برّه تقابل الكويتيين

اذا بتخلي عادل الرويشد يغني بالمطعم مال الفندق

في ضوابط للحفلات

يعني محد يوقف ويصفق وبعد ال 12 يمشون كل الناس و اذا كنت يايب مغنية لازم كل الفرقة بنات
إي وإذا مغنية لازم الساعة 8 تخلص حفلتها عندنا قانون ما يسمح لها بالعمل بعد الثمان


واذا مغني لازم كل الفرقة رياييل

وما تعطي اي كويتي غرفة الا بعقد زواج بس اذا كويتية عادي عطها

طل إدوارد بويه الموظف وقال

ماتبي اخلي باب الغرفة مفتوح من فوق وتحت بعد؟؟

قال والله شلون طافت علينا هذي

خل اقول حق مسؤولي يمكن يعطيني بونس عليها

قال إدوارد ماكو الا ادش المجال اللي بالعالم كله ما يخسر هالايام

راح ادش مجال الاتصالات واضمن الفلوس بهالديرة العجيبة

توه ياي بيسوي دراساته

قال له صاحبه الكويتي

تعال عندي اليوم الديوانية وزير التجارة موجود عندي وكلمه بنفسك

قال زين هم اشكيله همومي

قبل لا ينطق ادوارد جدّام الوزير

رحب فيه وزيرنا المبجل

وقال ان الحكومة الكويتية اليديدة ترحب بالاجانب وحريصة على سماع توجيهات سمو الامير في ان تكون الكويت مركز مالي

طبعا حاول ادوارد يفضفض للوزير عن اللي مر فيه

وكان الوزير يهز راسه ويوافقه

ليما اخر شي ادوارد قال له عن مشروع الاتصالات اللي وده يسوي

قال اوكي مو مشكلة بس على شرط

مايكون في غرف محادثة

ممكن تستغل للحوارات بين الجنسين

ويه ادوارد صار علامة تعجب

قال له مولاي وزير التجارة

ممكن سؤال


قال له معالي الوزير تفضل

قال الحين الاتصال الهاتفي مو معناته ان اثنين يسولفون مع بعض وممكن تسوي كونفرنس اذا تعرف يا معالي الوزير ويكونون اكثر من 2 بالمكالمة نفسها يا مولاي

قال له معالي الوزير عدل كلامك

قال له ادوارد يعني ممكن هالاثنين او اكثر اللي قاعد يكلمون بعض بالمكالمة الهاتية العادية يكونون اهل او ربع او بينهم اعمال
او واحد قاعد يتحرش بوحده او العكس يا مولاي؟


قال له معالي الوزير ممكن

قال له ادوارد بكل عصبية

عيل شتبي

وياكبرها بحلجك ممكن يعني فاهم

شنو تسكر غرف محادثة خو نفس الشي

وآل مركز مالي آل

طلعتوني من طوري

ديره مافيها شي سنع يقول مركز مالي

قم زين قم

عاد ادوارد واهوا يسولف ومعصب يوله مسجين الأول من ترشيد

يقول له طف الليتات

يقول للوزير يود

قاط عشر ملايين دينار عشان يدزون مسجات يقولون طف الليت بدال لا يشترون مولد

حمدالله والشكر

والمسج الثاني كان عن غرف المحادثة بالتلفون

من الحرّه دش غرفة المحادثة جدام الوزير

ولا منو طلعت له

دانة

:)

جان يقول لها سالفته

جان تقول له

يا مستر ادوارد ازيدك من الشعر بيت

صار لنا 17 سنة ليما الحين ما ندري منو باق ملايين الناقلات رسميا

صار لنا سنة وشي ليما الحين ما ندري منو نزل اعلان يسب الكويت بجريدة الاهرام

صار لنا سنة ونص ليما الحين مو قادرين نسوي انتخابات حق اتحاد الكرة بسبة ولد اخو الامير وربعه

صار لنا شهر الحين والجامعة مو قادره تاخذ قرار باللي طاق الصحفي

صار لنا 17 سنة تقود الجامعة قائمة مخونة بالكويت

شتحجي يا ادوارد

ادوارد ما قال الا

cover me ya Dana

:(


18 comments:

Anonymous said...

cover me ya Dana

خلصت اللحف والبطانيات يادانه

: )

Anonymous said...

أهم شي المزيون والكبوس المشقق

ويقول رايح جهاد ومادري شيخربط

أنا جنه قريت اليوم بس مادري وين إنه بيروح يسلم على ربعه بشار الشطي ومادري منو بدور لك على اللنك وأحطه

شكله مايفرق عن أي واحد قاعد يتمشى الحين على مارينا كرسنت

شكرا على المقال

حمودي said...

لووووووووول
كاسر خاطر عادل رويشد :)

سرحان said...

sweet dreams ya Edward.. :\

Cute But Imperfect said...

صح لسانج

Sn3a said...

ضايق خلقي اكثر من ادوارد
بس احلى شي كفر مي دانا
لول

يبا
نبي مثل شباب نبيها خمسه
نبيهم يقولون نبيها سنعه
مو انا
الديره

بس عاد بتضيع والله بتضيع

al-nokhitha said...

Mara wa7ed men el rabi3 eb 6ereej el shalaiih 9awiirta camera chan
ye7tar o edoos akthar chan
et9eeda sayra feeha camera 3ogob el camera el a9liiya eb 100 meter ;p

la 7aram 3alaich malat raqiib wayed 7elwa ana hab feeha hal ayam ;p


Al7een el e2telafiiya bas 9arlaha 17 Sena ?! chena ana 5abiirhum masken el etii7ad men el 80 aw el 79 shay chethii :)

Salmiili 3ala Edward o goolilah
5al ya36eena 5 sneen o yerja3 mara thanya o enshalah el kuwait
bet9eer akbar markaz malii o tejari
3arabi :)

Anonymous said...

dalal_eng:
كل هذا بقلبج دانة شدعوه هونيها وتهون انشاءالله ادري من خوفج على الكويت بس الدنيا للحين بخير وامان

وعجبتني سالفة الفندق

ودمتم سالمين

:)

Anonymous said...

ee wala `3a6nee ya 9afeya

amwaaj said...

if i was edward- i wouldn't give up, the time will come (enshala) when these dreams and ideologies can be realized together...in the meanwhile; to get what u want in this country, u gotta be rough & 'play it their way!' even if it meant swallowing ur pride a little :-p

Bad-Ran said...

خل يستعمرونا مرة ثانية

Anonymous said...

شوفي شدازين حق نبيل العوضي

http://i37.tinypic.com/mkdn9w.jpg

Salah said...

مسكين!

Anonymous said...

كل الي بقوله كانت مدينتنا ذهب قبل هالقندهاريين


اتوقع بيطلع قانون من مجلس قندهار الكويتي بفرض زي موحد على المطربات في هلا فبراير

وعش رجبا ترى عجبا
ودمتي

Bu Jassem said...

يا حليلج يا دانة
طلعتي تدشين الجات :))
ما يصييير
وبعدين مفيش فايدة يا صفية
واذا ماني غلطان اتحاد الطلبة من مليون سنة مو بس 17 :)
وحلوه صيدة حسين الأحمد
يمكن يبي يفاجئها بكشخته :)
طوفيها عاااد يا يبا يااات عليه

Bashar said...

الدانة!

اشدراج انه في ميزانين بأمن الدولة!!!!!

تحياتي

بيت القرين said...

أنو
إي والله خلصت

أنو
بنفس الجريدة قال هالشي بس شارط عليهم انهم يصلون
:)

حمودي
اهوا يبي يكون جذيه ما عليك

سرحان
نوى ينتحر ادوارد

كيوت
صح بدنج

سنعه
اي والله نبيها سنعه

نوخذانا
الائتلافية صار لهم 30 سنة ماسكين الاتحاد بس 17 سنة على خيانتهم الوطن في بيان تونس الشهير

واغنية راغب تضحك كيفي
:p

دلال
كل هذا واكثر يا دلال

انو
الكل بيتغطى

امواج
نلعب بطريقتهم لكن المشكلة ان طريقتهم تنتهك اي مبدأ يا أمواج

بدران
ابلغهم

انو
لوول
بس طبعا ما يقدر يقول شي

صلاح
والله احنا المساكين

انو
ودمتم

بوجاسم
30 سنة صار لهم
بس 17 سنة على توقيعهم على خيانة الكويت ببيان اتحاد تونس

بشار
شنو ما تدري إني أنا اللي فتنت عليك انت وجاسم
:p

مطعم باكه said...

السلام عليكم ..

عندي بلوق يديد وموضوع يهمني تشاركوني فيه الراي ..

اتمنى تزورونا في :
http://freej-alhailag.blogspot.com/