30/01/2010

سالم العلي والدوحة

الشيخ سالم العلي عميد أسرة الصباح الكريمة رجع من السفر قبل أيام بعد رحلة علاج طويلة والحمدلله على سلامته والله يشافي كل مريض داخل وبره الكويت ويردهم بالسلامة ان شاء الله

بس تنحط نقطة هني

أما حفلة التصاريح اللي حاصله واللي يطالب بمنطقة بإسم الشيخ سالم واللي يطالب بنصب تذكاري وغيرها من أمور

أول شي مو قانونية حسب ما ينص القانون مثل ما عرفت ان مايجوز تتسمى المناطق الا باسامي الأمراء أو أولياء العهد

وهذا القانون يديد على ما أظن لأن عندنا مناطق مو بأسامي حكام مثل عبدالله المبارك وفهد الأحمد

ثاني شي في ناس برايي أولى من الشيخ سالم ضحوا بحياتهم عشان هالوطن ومنهم أسرار القبندي وأحمد قبازرد وفايق عبدالجليل ووفاء العامر وهشام العبيدان وغيرهم مئات من اللي ضحوا بحياتهم عشان يعيش هذا الوطن

أدناة الدون حطوا منطقة باساميهم مجتمعة تسمى منطقة الشهداء بدل شارع واحد بالديرة بأسامي الشهداء

لمصلحة منو قاعد يطمس تاريخهم ويتم إختزالهم بالشهيد فهد الأحمد؟؟

غير الشهداء في ناس ثانية تستحق ايضا ان يكون في مناطق باساميهم مو الاكتفاء بمدارس مثل المعلم يوسف بن عيسى الجناعي أو أحمد الربعي أو أحمد الخطيب ومئات غيرهم رسموا تاريخ الكويت المشرق

ماهو عداء للأسرة الحاكمة ولاهو معارضة وبس لكن الحق حق والكويت للجميع لا نقتصر الكويت على عايلة وحده نحبها ونقدرها وإرتضيناها تحكمنا

أما السالفة الثانية اهيا حادث وصلة الدوحة واللي توفوا نتيجتها شباب بعمر الورد الله يرحمهم برحمته ويصبر اهاليهم

الحادث باختصار سيايير تتسابق وتسوي حركات بالشارع وجمهور يتفرج ويشجع

وصار الحادث وتوفى عدد من الجمهور

نوابنا ما صدقوا خبر وإستغلوا على طول حادثة إنسانية عشان يقطون البلاوي على الحكومة

وانا معاهم إن الحكومة غلطانة وتحديدا الداخلية

بس مو غلطانة لأنها بس ما حضرت موقع السباق سريعا على الرغم من تبليغ الناس لهم بالسباق

لا غلطانة من الاساس لأنها بالأصل كانت تسمح لنواب من شاكلة اللي صرحوا ينددون فيها بعد الحادث انهم يتوسطون ويطلعون أي مستهتر يعبث بروحه وأرواح الناس

وراح يظلون يتوسطون وراح الداخلية تظل تخضع لوساطتهم

وهذا اللي خلى الداخلية تتقاعس في القبض على مستهترين الشوارع لأنهم يدرون إن عنوتهم وقبضهم على هالشباب راح يطلع بوش بمجرد واسطة من نائب وأحيانا سكرتير نائب بعد

طبعا مو عذر كافي هذا، الداخلية لازم تقوم بدورها

بس الأهم وقف الواسطات بأرواح البشر ومو بس وقفها الإعلان عن كل نائب يطلب الواسطة

وحزتها تعرفون منو يعبث بأرواح عيالكم وإخواننا

20/01/2010

حتى إنت؟؟؟

فإننا نقترح مجموعة من الشروط والضوابط، على أن يعمل بها بجميع الجهات الحكومية والأهلية في البلاد

وفيما يلي عرض للشروط والضوابط المقترحة
عدم التعدي على الذات الإلهية
عدم التعرض للنبي وآله بيته وأزواجه أمهات المؤمنين بسوء

عدم التعرض للصحابة بسوء

عدم التعدي على الذات الأميرية

عدم التعدي على رموز البلاد

عدم التعرض بسوء لدولة الكويت مباشرة وشعبها

ويمنع منعا باتا من يخل بها ويتعداها من استضافته ودخوله لدولة الكويت

عبد الرحمن العنجري د.وليد الطبطبائي فلاح الصواغ د.فيصل المسلم محمد هايف سالم نملان حسين مزيد خالد السلطان د.على العمير مبارك الوعلان خالد الطاحوس د.محمد الحويله محمد المطير سعد زنيفر د.ضيف الله أبورمية مخلد العازمي دليهي الهاجري د.جمعان الحربش علي الدقباسي شعيب المويزري خالد العدوة ناجي العبد الهادي

حنث بالدستور وباليمين الدستورية لا وحاط اسمه اول واحد يعني زين

حمدالله والشكربتغيرون الكويت بكيف ابوكم

واذا مشى هالقانون انا اطالب بأن أي واحد ما يحب رويشد ما يدش الديره

كيفي انا اعتبره رمز من رموز البلاد واحسن منكم كلكم ايها الموقعون

حمدالله والشكر والله يفكنا من هالمعاتيه اللي بالمجلس قولوا آمين


15/01/2010

عاشووووور!؟؟


مليون كويتي وشوي

لو حسبنا ان متوسط الاسر الكويتية اهوا خمس اشخاص

راح يصير عندنا 200 الف اسرة كويتية

هذا غير اللي ماخذ ثنتين وعنده عيال منهم شلون نحسبهم اسرة ولا اسرتين

ولا اللي متزوجه اثنين وعندها عيال منهم شلون نحسبهم بعد؟؟

خل ناخذها ان احنا 200 الف اسرة

بعشر آلاف دينار حق كل اسرة

هذيل مليارين دينار كويتي

زائد

خمس آلاف حق كل مطلقة يعني خنقول عندنا 10 آلاف مطلقة كويتية بس راح تاخذ 5 آلاف دينار

هذي خمسين مليون دينار

ونقول عندنا 10 آلاف ارمله بعد وهم تاخذ خمس الاف دينار

هذي خمسين مليون دينار ثانية

وعندنا ألف كويتية ماخذه مو كويتي وهم تاخذ 5 ألاف

هذي خمس ملايين

وكل كويتي بالغ 21 ومو متزوج ونقول عددهم 100 الف ب 5 آلاف بعد

هذي 500 مليون دينار

يعني الاجمالي على اقل تقدير 3 مليارات دينار كويتي تقريبا

تقدم هبة حق الكويتيين وابتلشوا بأجيالكم القادمة

هذا مجلسنا وهذولي نوابنا الحمدلله والشكر

واذا الحكومة عارضت قالوا تأزيم



عموما تمر اليوم الذكرى الرابعه لرحيل الشيخ جابر الله يرحمه

نختلف مع اللي سواه او نتفق لكن يبقى حبيب الشعب

والله يرحمه برحمته

وهم ما يفوتنا نهني الجماهير العرباوية بحصولهم على أول 3 نقاط بعد 6 مبارايات من الدوري وخذوها من الصليبخات طبعا

ما تشوفون شر

06/01/2010

الدستور ما يتجزأ يا شعبي




قلنا من قبل خالد الطاحوس ونجاحه بالفرعية وبعدين وجوده بالشعبي

قالوا لأ الطاحوس مو شعبي بس قريب منهم

ونحن نربأ بالعم بوعبدالعزيز ان يقبل على نفسه ان يكون معاه بالكتلة خاين للدستور وهاتك عرض القانون

وهذا تصيد وانتقاص من قيمة السعدون

انزين اليوم شنو الحجة؟؟

اعلان رسمي بانضمام ابن الفرعيات علي الدقباسي للتكتل الشعبي

شوية خلونا نكون حقانيين

هل نرضاها ان من يحاول يبين لنا ان يبي كويت الدستور اهو نفسه اللي يرحب بمنتهكين الدستور؟؟

مو منطق ابد وماكو عقل يقبلها

اي نعم قاعدين يتحركون في اتجاه بعض القضايا العادلة ويمكن يكونون اكثر المتحركين بالمجلس حاليا تجاه بعض القضايا العادلة

بس مو من الانصاف ان نصير كلنا سعد العجمي ونخليهم آلهة لمجرد وجود بوعبدالعزيز معاهم

المهم، اليوم الأربعاء الساعة خمس ونص مباراة المنتخب مع استراليا بنادي الكويت

الله يوفق كويتنا

وأووه يالأزرق

03/01/2010

كلمة زيادة عالمانشيت

من زمان ما لقيت أحد يبرد جبدي صج

ويحامي عن ديرتي من قلب وبعنف وقوة

ليما قريت القبس اليوم

وشفت سبع وإن شاء الله يكمل باستسباعه يرد على مدير العلاقات باللجنة الاولمبية الدولية

اللي دز لنا 3 كتب ماشاء الله عليه بشهر 12 يهدد ويتوعد يا ترجعون طلال الفهد يا نوقفكم؟؟؟

على فكرة بس ترى أحمد الفهد عضو باللجنة الأولمبية الدولية اللي وقفتنا

بس شوفوا رد السبع وزير الشؤون على بو 3 رسايل بشهر واحد
يا حمار إنت واللي وراك

هالاضافة من عندي عالمانشيت

أخيرا صار في أحد يحامي عن الكويت وما يخاف

وفي سبع ثاني بعد ينقال له فيصل الجزاف قاعد ياكل طق من جريدة علي خليفة ومن تلفزيونه بعد

لكنه ما زال مصر وثابت على موقفه والليلة "الأحد" الساعة 10 عنده لقاء بالراي مع ولدنا عبدالله بوفتين بيكشف فيه فضايح شلّة الأنس

قبل لا يطيح الفاس بالراس وقبل لا تخضع الدولة حق جريدة الوطن مثل ما خضعت لها بسالفة القهاوي والتأبين وكل شي يثيرونه

احموا فيصل الجزاف قبل لا يطيرونه لأنه مزعل طلال