31/12/2007

ست نوريه - 2

تحديث
أم صده منزلين موضوع اكثر من روعة
بعنوان
حتى ننصف نورية
الصراحة اعتبره افضل موضوع متعلق بالاستجواب
ويسوى ينقري
يعطيهم العافية
:::::::::::::::::::::::::
في جماعة طيبين وحلوين وخايفين على تحول الاستجواب حق استجواب عنصري فئوي قبلي طائفي عائلي وغيرها من المصطلحات

أبي اقول شغله

من قال لكم إني أفكر بكل هذا

سعد الشريع

الاستجواب من حقه طبعا كنائب مجلس

وأداة دستورية

وخل يستجوب اللي يبي

وخل يقول اللي يبي

بس هذا ما يحرمني ولا يحرم غيري من حقه بإبداء رايه

اي نعم لازم نسمع الاستجواب

اي نعم لازم نسمع الرد

بس هم لازم نشوف المكتوب والمقدم

ونبين راينا فيه

انا ارفض ان يطرح طرح العنصرية او غيره

لكن بعبر عن رايي وكيفي

يعجبكم أو ما يعجبكم الراي هذا امر راجع لكم

المحور الرابع ممتع الصراحة

الاختلاط: لم تبذل السيدة الوزيرة الجهد الكافي لتطبيق القانون الصادر من مجلس الأمة والموقع عليه من حضرة صاحب السمو أمير البلاد حفظة الله ورعاه وإنما تركت الحبل على الغارب خصوصا في الجامعات الخاصة والذي صدر قبل أنشاء هذه الجامعات وحرص على أهمية فصل الطلبة عن الطالبات في المباني

قانون فصل الاختلاط صدر قبل انشاء الجامعات الخاصة

واول جامعة خاصة اعتقد انها جامعة الخليج فتحت من خمس سنوات

يعني نورية شكو ان المباني مو منفصلة يا سعد؟؟

وتعال ثانيا

انت تعرف شنو ينص عليه قانون فصل الاختلاط يا نائب يا مشرع يا شريع

قانون فصل الاختلاط يقول تخصص اماكن للطلبة وأخرى للطالبات في قاعات الدرس

ما قال شي عن المباني المنفصلة مثل ما تدعي يا سعد

لا تجذب على الناس عيب

أن تساهل الوزيرة في تطبيق القانون أثمر هذا الانحلال الأخلاقي في المدارس والجامعات الخاصة

منو هذي اللي انحلوا اخلاقيا

مو عيال ديرتك مو اخواني وخواتي واهلي واهلك

ثمن كلامك لا انت ولا مليون غيرك يتهمون عيال الكويت هالاتهام

وين نصير الشباب يكيكي عن هالموضوع

بالأمس القريب اعتذر وزير النفط الأسبق الشيخ علي الجراح وتمسك نواب الأمة بمسائلته حفاظاً على الدستور وانتصاراً للموائمة السياسية وتكريساً لغاية المشرع الدستوري وهو يرسم إطار المسئولية السياسية في المذكرة التفسيرية للدستور واليوم للأسف نلاحظ أن البعض يعتبر الاعتذار الكاذب للسيدة الوزيرة شجاعة ...لاتعليق

انت يا سعد شكان موقفك من الجراح هل اعتبرت اعتذاره وكأن الامر لم يكن أو لأ

راجع نفسك بس

وثانيا اللي انا اعرفه ان الاستجواب ينطر اجوبة بس اللي موجود بخاتمة استجوابك يقول ان استجوابك حكم نهائي

ابي اللي يقولون حق دستوري

هل الحق الدستوري يعطي سعد الصلاحية ان استجوابه يكون حكم نهائي؟؟؟

عموما

ست نورية الله يعينج ويوفقج
ونشوف شتبين الايام

باجر الثلاثاء الساعة 7 ندوة عند علي الراشد بالقادسية جدام النادي العربي

يحاضر فيها علي الراشد والصرعاوي و د.إبتهال الطاهر ولولوة الملا وعبدالمحسن المدعج و خالد الخالد وعبدالرحمن العنجري

::::::::::::::::::::::::::::
إي صج كل عام وإنتوا بخير وسنة حلوة ان شاء الله

30/12/2007

ست نوريه -1



مني التحيه لج يا رمز بهالوطن شامخ
تحية حب وألف عقال نرفعهم على شانج
علم ودين واصل زين روحي يا سعد فالج

منهو إنت يا فرعون تستجوب هرم ضمك
إنته حرف في قاموس اكبر مني ومنك
هذي العلم والتاريخ هذي أمي وأمك
هذي صرح يا مسكين وإنته حدك البارح

بوراشد



ما اعرف سعد الشريع
ولا اعرف نورية الصبيح
بس قص علي الشيطان وقال اقري استجواب الشريع
وقريت للأسف
وانتوا هم اقروا معاي
فهي مسئولة منذ سنوات طويلة عندما كانت الوكيلة المساعدة للتعليم العام عن الإخفاقات المتتالية وأخرها الكارثة التعليمية التي كشف عنها التقرير الذي أعلنه البنك الدولي منذ 40 يوما
هذي من مقدمة استجوابه
طيب دام من سنين طويلة مسؤولة وينك ما تكلمت وانتقدت لما كان عادل الطبطبائي وزير من ست اشهر مو اكثر؟؟؟
ودامها اخفاقات ليش ما مارست دورك الرقابي ايام الطبطبائي
يعني انت موجود بالمجلس من سنة ونص
واهيا مسكت الوزارة بأقل من نص سنة وينك؟
انطر تو الناس
هنا يكون الاستجواب استحقاقا وحيدا لا نملك إزاءه ترف الاختيار، وحقا علينا كنواب للأمة خوفا على النشء وأجيال المستقبل في أن يتسرب إليهم هاجس الخوف والصراع الذي تفشى في وزارة مدار نشأتها هي التربية
طيب
تقول خوفا على الأجيال أن يتسرب لهم الخوف والصراع
يعني لما الحين ما وصل للاجيال الخوف والصراع من كلامك
ونورية صار لها سنين بالوزارة هم من كلامك يا سعد
إزبلّها يا سعد؟
أنا بعدي بمقدمتك يا سعد
ندش بالمحور الاول
أليس غريبا أن يكون أحد أعضاء الحكومة المعنية بتحقيق هدف بناء علاقة ثقة مع مجلس الأمة هو من يتصدى لتلك السياسة التي وضعها ويعمل على تنفيذها مجلس الوزراء... مع السيدة الوزيرة لايكون الأمر مستبعداً أبداً(مقابلة سيادتها مع صحيفة القبس في 3 ديسمبر 2007 عدد 12395 )حيث قالت السيدة وزير التربية ووزير التعليم العالي نصا: «ولكن الإشكالية التي تحصل هذه الأيام أن بعض النواب يريدون محاسبة الوزير على قيامه بممارسات تعد من صلب عمل الوزير، ويصبح الأمر هنا تداخلا بين السلطات وخرقا للدستور
ست نورية تقول ان غلط ان بعض النواب يتدخلون بصلب عمل الوزير وهذا يعتبر تداخل بالسلطات
ست نورية هم تقول
فالبعض يهددنا إذا لم ننصع لرغباتهم بأنهم سيقفون ضدنا ,وأؤكد أن هؤلاء قلة قليلة من أعضاء مجلس الأمة، فهم الذين يثيرون الضجة في الإعلام
قلة قليلة يا سعد
ست نورية تقول
المشكلة أن الوزراء لا يعطون الفرصة الكافية لإصلاح المشاكل التي تعاني منها وزاراتهم، وهذه المعضلة لا تنسب إلى عهد سمو رئيس الحكومة الشيخ ناصر المحمد، بل إلى فترة ما بعد الغزو، إذ درجت العادة على انتقاد النواب للوزراء منذ توليهم الحقائب الوزارية، فينتقدون أداءهم ويطالبونهم بحل المشاكل القابعة في وزاراتهم بأسرع وقت ممكن وإلا سيحالون للاستجواب والمطالبة باستقالاتهم
والقضية الأخطر أن كل مقصر في أي وزارة يكون علاقة طيبة مع نائب معين عبر 'تمشية' معاملاته حتى لو كانت مخالفة، بالمقابل لو احتاج لهذا النائب مستقبلا إذا ما أحيل هذا المقصر إلى التحقيق، أو صدر بحقه قرار نقله من مركز عمله، أو حرم من مكافأة الأعمال الممتازة، فيلجأ هذا المقصر إلى النائب في أي شيء يحتاجه وهنا وجه الخطورة
ست نورية قالت كلام كل الكويتيين ان ما يصير النائب يتدخل لأن يصير تداخل سلطات وهذا ما يجوز
وقالت قلة قليلة من النواب
سعد مو عاجبه الكلام وما يرضى على القلة القليلة
ويقول ان كل النواب زينين
عشان جذيه قدم استجواب!!!؟؟؟
سالفة د غازي الرشيدي
استقالته غير مسببة
شنو تسوي اهيا
ليش استقال
محد يدري لانها غير مسببة
اهيا افترضت اسباب
سعد يقول ليش افترضت عيب
خلاص سعد قول ليش استقال الرشيدي؟؟
المحور الثاني
فالسيدة الوزيرة التي ترفع شعار الإصلاح وتراوغ به المواطنين مثلما تراوغ مجلس الأمة الموقر أوصلت المنظومة التعليمية إلى الدرك الأسفل ليس من اليوم وإنما منذ أن كانت الوكيل المساعد للتعليم العام
دام يا سعد واصل للدرك الاسفل من ايام ما كانت وكيلة مساعدة
ليش ما استجوبت الوزير اللي قبلها طال عمرك
يقول سعد ان بثانوية الرابية بنات طلعت اسامي حق بنات نجحوا بثالثة ثانوي
ولما راحوا رابعة قالوا لهم لا غلطنا انتوا ساقطين
مدرسة وحدة من مدارس الكويت صارت فيها هالمشكلة فالوزيرة لازم تنشال بعين سعد
انزين سعد ترى مو نورية اللي تصلح الامتحانات
والادارة اللي سوت هالغلطة مو نورية حاطتها
يقول انها تكافئ المزورين وننطر الاستجواب عشان تقدم ادلتك
أنا مابي ازود كلام بس المحور الثالث والرابع بتصرف معاهم باجريا سعد
تحاول تسوي اي شي عشان تبين انها عنصرية وتفرق
وما تؤمن بالمساواة طيب اهيا موجودة من سنين وبنين بالتربية
محد شكى على الوزرا السابقين تفرقتها
وما توقع احد طالب باستقالتها
فدور لك على مخرج ثاني ودامك تزعل من هالكلمة انا بقولها
استجوابك حده ركيك
:p
mr. trash can
إنتهى وقتك

27/12/2007

تخسي

تحديث

*******************

من صجكم ولا إستهبال؟؟

:::::::::::::::::::::::::::::::


يوم الثلاثاء في ندوة عن استجواب وزيرة التربية عند علي الراشد بديوانه بالقادسية جدام النادي العربي

مادري اي ساعة ومادري منو بيحاضر

وهم مادري ليش براس السنة

بس هم نوقف معاهم

المهم

قالوا من جم يوم بتقرير عن ستاد جابر

تم تخصيص مقاعد للامراء والعائلة المالكة وغرف خاصة لمشاهدة المباريات في الدور الثاني

العائلة المالكة الحلم اللي يتمناه خليف وزمرته

يعني شين الحلايا وده يصير امير

وطبعا اذا صار امير اكيد يبي يحكم منطقة بالكويت

وعادي يسوي مهرجان الجنادرية بعد

واكيد بيكتب شعر عشان يغني له بونورة

بس طبعا كل هذا مو مشكلة عوده

الخوف ان يطيح بهولندا وننفضح

امير كويتي يقضي اياما طويلة في هولندا

بكل اختصار يا خليف

كتبت عائلة مالكة كتبت امبراطورية

إجابة الشعب الكويتي كله تقول لك

وبالفم المليان

تخسي

ومثل ما سالفة العائلة المالكة ما تطوف علينا هم رزنامتك مالت بوسخافة وبوسخيف ما تطوف


شوفوا الرزنامة حاط فيها اللي اكو واللي ماكو

حاط عيد الحب يا طبطبائي ويا باجي المسلمين اللي تكتبون عنده

حاط عيد العمال

حاط عيد ميلاد جريدته وعيد ميلاد تلفزيونه

وزين ما حط عيد زواج امه وابوه بعد

صدور الدينار الكويتي

عيد اقرار الحقوق السياسية للمرأة

يعني هالسوالف كلها

اروح على شهر 11

اشوفهم حاطين بتاريخ 24-11 الذكرى ال 47 لرفع العلم الكويتي اليديد

وبس


11-11

هذا التاريخ تحفظه وأدري انك حافظه يا خليف بس تتجاهله

هذا التاريخ اللي قال لك تخسي تتحكم فينا

هذا التاريخ اللي قال لك السيادة بالكويت للأمة

هذا تاريخ الدستور اللي يحكمني ويحكمك غصب عليك وعلى اللي ما يرضى

اذا تحاول تلغي هالتاريخ ما تقدر

لان الشعب الكويتي وبالفم المليان بيقول لك

تخسي

فاهم؟؟
وشوف جم تخسي بتييك بالتعليقات


وليد الطبطبائي الكاتب المسلم بجريدة الوطن وباجي المسلمين

الصورة اللي تحت دازينها لي

الصورة من المدينة المنورة

أبيك تقول شي بعد

سمعني حسك يا مؤمن


فليك لندن أحلى لان الحليب فيه أكثر من الفليك اللي يصدرونه حق باجي الدول

حرامية الوطن ما يبون نورية

والدليل خبرهم اليوم
بالصفحة الأولى

هذا مانشيته

معلم مصري اغتصب طفلة مصرية مرتين في مدرسة الجالية

أنا قريت الخبر بس من باب الفضول

يعني يبون يزيدون شي حق الاستجواب

وعادي الشريع ياخذ المادة حق الاستجواب ما يقرى بس مانشيتات

الخبر يقول

ويتمحور الموضوع حول معلم يعطي دروسا في مدرسة للجالية المصرية وتتبع السفارة المصرية لدى الكويت

يعني ما يتبع التربية

يذكر ان المدرسة هي مدرسة قيس الدويري في منطقة الجابرية، تستغلها السفارة المصرية من الرابعة الى الثامنة مساء يوميا لتدريس تلاميذ الجالية المصرية من جميع المراحل المنهج المصري

دام مالنا شغل والسالفة خاصة بمصر وسفارتهم

ليش صفحة اولى يا حرامية؟؟

مو انتوا تتطنزون على الراي انها بالصفحة الاخيرة تحط اخبار جذيه

انتو حاطينها صفحة اولى من اسوا بالذمة؟؟

واحد اسمه احمد عقاب داز لي مقترح لحل مشكلة الاسكان

شوفوا شيقول

الصورة اللي تحت اهيا صورة

منطقة المطار
يقول أحمد إن إذا حطينا منطقة بحجم جنوب السرة بمنطقة المطار شوفوا شيصير

وهم يقول اذا زدنا على جنوب السرة مناطق القرين كلها وضاحية صباح السالم شوفوا شيصير


يفول أحمد بعد ان نقدر نضيف مناطق بحجم غرب مشرف والسرة والجابرية واليرموك والظهر
وهم في مكان




احمد يقول خلوا المطار بأي منطقة وحلوا ازمة الاسكان

واذا حساباته صحيحة

انا اقول خلوا أحمد وزير اسكان وايد أبرك من مليون وزير مروا على الوزارة

اخيرا

mr. trash can

ابي رايكم

انا ماعندي مشكلة خل يقل ادبه مو مهتمه

بس اذا يضايقكم عطوني حل

تقترحونه

وآخر شي

يكيكي اذا
ما عندك شي تقوله مو الا تكتب

باي

26/12/2007

ندوة

بوراشد يقول

البرميل وصل تسعين والخامس على حاله
والمجلس أبو خمسين مع الخمسين في حاله
وسلملي على بوحمود وإنشدني عن احواله
وأدري إنكم تقولون إني مصرقع وحاله
أنا يالربع سيده كاشف راسي ومصلع
لا مطلق يحب غلوم وجاسم قرضه مولع
شي كادر وشي ديون وشي علومه تخرع
وأحب زينب وأعشق نوف وحصه بقلبي تقرقع
وسامحوني على القصور وأحب الكويت بكل حاله



اليوم الاربعاء في ندوة منظمينها التحالف الوطني بعنوان

قراءة وطنية لاستجواب وزيرة التربية

يشارك فيها

محمد الصقر - علي الراشد - عادل الصرعاوي - فيصل الشايع - موضي الحمود

الندوة راح تصير بديوان الصقر مو تروحون التحالف تنطرون

واللي ما يدل

العنوان

الشامية - ق 9 - شارع ابن بطوطه

الساعة 7

نشوفكم على خير

24/12/2007

ملغي في كل شي انته

يكلموني عن المو متربي اللي يكتب 600 تعليق بالموضوع الواحد عندي بالمدونة

ويطالبون اني اشيل تعليقاته

والوضع بالنسبة لي واضح جدا

ان كلما مسحت راح يكتب زيادة

فخل يكتب ويعبر عن مستواه الحلو

بس خل اقول له شي

شوف انت شخص ما تقدر تعلن عن هويتك جدام بنت مادري تخاف ولا شنو مادري

انا افترض وافتراض لدرجة اليقين

انك من ربع خليف

والزمرة الفاسدة

اكتب كثر ما تبي محد معبرك

ولا توقف

بس افهم شي انت وزمرتك

ان انا كلما حسيت ان في قلة ادب منكم ازيد من كشفي لكم

يعني انت خوش دافع لي وواصل

وعلى فكرة باقي شويه وشويه بس

من تعليقاتك

عشان اجهز فيديو ثاني عن خليف اضحك الناس عليه اكثر من الفيديو الاول

يعني الفيديو الاول شافوه أكثر من 15 الف واحد داخل وبره الكويت

وهالمرة اوعدك ان اذا ما شافوه 20 الف واحد على الاقل

انا اعتبر نفسي فشلت

فإنت حدد تبي الفيديو اليديد أو لأ

وعلى فكرة ترى خليف معزبك

اذا ما كنت انت نفسك خليف لأن أعتقد إن نفس مستوى التربيه ما يتحمل الكلام

والدليل لما رد عليه بودي بمقال واحد ليما اليوم خليف ما كتب ولا حرف المسكين

فما يتحمل

انت قرر بتستمر حياك واذا منت مستمر هم حياك

اي صج

انا اول مرة اشوف واحد يعلنها وبصراحة إن أمه وأبوه ما عرفوا يربونه وهذا اللي انت قعد تسويه

وهذي هدية من الاخ الكبير بوراشد لك

ملغي في كل شي انته صدقني حتى في ذاتك
تعال نشوف انا وياك وضعك بارضك و ناسك
مهرج انته ؟ او طبال ولا صوره شكلها نازك
منتهيه صلاحيتك من اول يوم في عمرك
مجرد ظل مو اكثر للي خبري و خبرك
يعني حتى في موتك مجرد شاهد بقبرك
لاغينك بكل ما فيك من راسك الى ساسك

عموما

ليش فليك لندن أحلى من فليك الكويت

ترى صج في إجابه مو غشمرة

يوم الخميس

بصفحة الرياضة كاتبين تقرير عن ستاد جابر اللي بيخلص سنة 9000

يقولون هالجملة

تم تخصيص مقاعد للامراء والعائلة المالكة وغرف خاصة لمشاهدة المباريات في الدور الثاني

منو العائلة المالكة؟؟

وشتملك؟؟؟

حماة الاسلام وانصار الدين وابطال الجهاد مهاجمين بالصفحة الأولى بالوطن اليوم سلمان العودة والدكتور فضل

الظاهر هالاثنين منتقدين بن لادن

ومو عاجبهم الكلام

اللي ينقال عن سماحة آية الله أسامة بن لادن

فيقولون

وأكثر الأرواح التي أزهقت والدماء التي سالت وأهدرت في ساحات الجهاد كلها بسبب فكر سلمان العودة الذي كان محرضا على القتال

يعني تقولون جهاد

اكيد فيها ذبح السالفة وموت ودم

ولا تبون يوزعون عليكم

ipod

مثلا

ليما الحين تسمون قتل الناس جهاد

وبعدين تسبون اللي دعاكم للجهاد

والله خوش لجل بن لادن كل شي يهون حتى تخاريف الكلام

يكيكي

متى تتعلم تكتب مادري

يعني يكون صايد ناصر المحمد

وخلاص يعني بيمشي بالشارع ويقول انا بطل

يعني ان الكويت فيما لو استمرت الاوضاع السياسية الخارجية على ما عليها لن تعاني من عجز في الميزانية حتى عام 2050 وهذا الكلام المبشر يدحض ادعاءات البعض من كوارث مالية مستقبلية فيما لو استمر معدل الصرف الحكومي على ما هو عليه

انزين

زيدوا الرواتب بنسبة واحدة لا تقل عن %50 بدلا من حرب الكوادر والاضرابات التي اشتغل بها البلد

مو انت تقول انك فهمت من كلام ناصر المحمد ان احنا مستقرين ليما 2050 اذا استمر الوضع على ماهو عليه

يعني مفروض تكون فاهم

انزين على ماهو عليه مو معناها كلش ان تزيد الرواتب بما لا يقل عن 50% انت بالذمه شتفهم؟؟؟

توني استوعب ان جيت المنازل مالت نبيل اهيا النسخة الكويتيه من وانا مارق مريت مالت عاصي
:)

أمس يكيكي يقول

عن السعدون ووزير الداخلية السابق جابر المبارك

ارجعوا للصحافة، وارجعوا لتصريحاتهم، حاولوا ان تجدوا ولو تصريحاً واحداً ضد الوزير السابق من أحمد السعدون أو من علي الراشد

انا اسمع الكلام وبحثت والبحث ما خذا مني نص دقيقة

لقيت هذي بالجريدة

حمّل النائب احمد السعدون رئيس مجلس الوزراء الشيخ ناصر المحمد والنائب الأول وزير الداخلية والدفاع الشيخ جابر المبارك مسؤولية اعتقال الصحفيين بشار الصايغ وجاسم القامس، مؤكدا ان لا أحد محصنا من المساءلة السياسية

ما دورت زيادة
يكيكي افهم شي انا قاعده اكتب من شهر خمسه عنكم
يعني اي شي بهالفترة خصوصا انا كاشفته
يوز


لا تجذب عيب

ياربي شكثر اعاني على قولة الجميلة شيماء علي

16/12/2007

مرزوق رووووح

**********
تحديث
**********

تم إغلاق التعليق و للأسف إن في ناس بالكويت جذي
وتم مسح تعليقات بعض الشرذمه وذلك لحترام مدونة بيت القرين
روادها و قراءها الإعزاء و لاعزاء دام هالنماين موجوده
يا أمة ضحكت من جهلها الأمم
*************************


يكيكي اليوم كاتب مقالة يسقط فيها حال فؤاد السنيورة على حال الكويت

يعني يكون كاتب محنك

وفاهم اللعبة

بيحسسنا ان من اعضاء المجلس التأسيسي

المهم شوفوا شيقول

خ
رجت عليه مظاهرة من مليون شخص تطالب باسقاطه وثبت، دك العدوان الاسرائيلي عاصمته بيروت دكا وثبت

تصدقون ان قاعد يمدح السنيورة بهالكلام

بالذمة هذا ينرد عليه؟؟؟؟

جذيه يمدحون؟؟

دام جذيه انا خل اعلمك المدح

علي بابا تم حل مجلس الامة بالثمانينينات وسرقت

احتلت الكويت واستشهد من استشهد

وهم سرقت

خلص الغزو وبغوا يحاسبونك

وما خضعت

طلع حكم ضدك وادانوك

مسحت التاريخ

علقونا سنين بمحكمة الوزراء

ننطر الحكم

وانحفظت القضية

لا وعطوك اجازة تقعد بمصح بامريكا بعد

فتحت جريدة من فلوس البوق

فتحت قناة من فلوس البوق

شريت الشباب الكويتي بفلوس البوق

هذا اللص القوي

ترى قاعد امدح بس على طريقة يكيكي

بلبل يقول

توجيه اتهام للشيخ مبارك الدعيج فيما يخص إعلان الأهرام غير الشهير، سوى في مجلس الأمة، له أسباب سياسية لا نحترمها، تسعى ومنذ أمد لتصوير أبناء الأسرة الحاكمة بأنهم غير قادرين على تحمل مسؤولية مناصبهم، في حين حتى »الهيلق« والمتردية والنطيحة تعيث فساداً في المناصب دون صوت نيابي معترض

طبعا ابناء الاسرة مثل اي عايلة ثانية فيهم الزين وفيهم الشين

بس السؤال

عليك الله يا نبيل

جم واحد متولي منصب قيادي بالبلد من الاسرة الحاكمة

والمنصب مو وزاري وناجح

يالله عطنا اسامي

خنشوف

وليش وايد مخترعين من اعلان الاهرام

عادي يعني بتحفظ القضية ماكو شي ثاني

معروفة

انزين

مرزق الغانم

وصلني خبر ان سمو الشيخ المبجل طلال الفهد الاحمد الصباح حفظه الله ورعاه

وافق على مناظرة بعد ما شالوا الاوامر العليا

بس على شرط تكون من تلفزيون الحرامية

شوف يا مرزوق يا ولد علي الغانم

اول شي ونستني بكلامك عن مال نادي الفحيحيل وانت تقول له تبي تناظر معزبه مو اهوا

مسكين ما عرف يرد

جان يقول معزبي ومعزبك الامير
اهوا وهق روحه الحين واهوا ما يدري
لأن ممكن الامير يقول طبقوا القانون ويتوهق ويوهق غصبا عليه اهوا وتكتله


المهم

مرزوق سمو الشيخ طلال حفظه الله

يحاول يحرجك ويخليك ما توافق على المناظرة

بس شوف وانا اختك

الله لو صج اختك خالي رئيس مجلس امة ما مدحت خاله لا تسوونها قصة وابوي عنده وكالة بي ام

واخوي عضو مجلس ورئيس نادي
وامي مديرة جامعة
ويدي رئيس المجلس التاسيسي
وخالي من اغنى اغنياء العالم
اللهم لا حسد

المهم

شوف يا مرزوق

انت وافق

ولا تخاف من عدم حياديتهم

مايقدرون

في ناس تتابع

وتعرف شلون تسنعهم

بس قول له على شرط يوافق على مناظرتك بالراي

وطبعا اهوا ما راح يوافق وبيخاف

فانت وافق واشرط

وهم اذا ما وافق

هم روح تلفزيون الحرامية

ودامك على حق

حتى لو ما تعرف تتكلم بتفوز ما عليك
لان بالمباريات ما تقدر تفوز على القادسية والسبب اني قدساوية
:p

بس اذا وافق قول له اول شي بالراي

لأن اهما طلبوا قبل

صدقني راح يتوهق

روح والقلب داعيلك

بناء على ردودكم اللي شفتها بالموضوع اللي طاف فهمت شي اساسي منكم

ان نحتاج الى معرفة على شنو نتحرك

وهذا خوش سؤال يمكن ما سالت عدل اول مرة

ويالله نفتح الموضوع مرة ثانية

ونقول شنو اهم اولوياتنتا؟؟؟

عندنا واحد من المعلقين ينقال له بوراشد

انا بعرض عليك يا بوراشد يا ولد ام راشد

ان لو تسمح من بعد العيد كل يومين تدز لي شعر عشان انشره بمواضيعي اذا ما عليك امر

مدونة محاكم الكويت مدونة مختصة بمواضيع المحاكم الكويتية

روحوا وشوفوا اول قنابلها

وعلى فكرة ترى بوراشد مو ولد ام راشد

مرته ام راشد
:)

اللي طافت عليه خل يقول الصج


13/12/2007

يالله

قوة شلونكم وشخباركم

أعتقد إن خلاص لازم نسوي شي حق ارضنا

شنو شكل هالشي

لازم العموم يحدده

مو لازم كل واحد ينطر الثاني

بشوف آرائكم واقتراحاتكم

الوضع يسوء كل يوم اكثر من اللي قبله

وكأنها كيكة ولازم تخلص للاسف

خل يكون للشعب كلمة

وخل يكون للشباب وقفة

احنا نبنيها ماهو شعار نتغنى فيه

اهو معنى صريح للتطبيق

يالله توكلوا على الله

وخل نتحرك

انطر ارائكم لمدة يومين

يعني لغاية يوم السبت

وراح افتح مجال التعليق للكل

اذا شفتوا احد يسب طنشوه

ليما امسح رده

والله يوفقنا ان شاء الله

09/12/2007

عودة الشهيد وتألق واضح ليكيكي

تحديث
************
أعتذر عن التأخير بكتابة موضوع يديد

بس المرض مأذيني شوي

اقروا مواضيعي القديمة دام ماكو شي

او نطروني يوم او يومين

وبالنسبة لأم صده

شنو رايحين الحج؟؟

:::::::::::::::::::::::::::::::::::::


شالاخبار؟؟

خنبلش بتحلطم بعض القراء

واحد يقول ان كان يتابع تو الليل على تلفزيون الوطن

وحاطين فقره عن فار ياكل من اكل المطاعم

وقايلين ان هالحادثة صايره بشارع المطاعم الكويتي

المهم النوخذه اللي دز لي التحلطم شيقول

يقول ان بتو الليل كانوا حاطين الفقره بدون صوت

والنوخذه شايف نفس الفقره على ال ميتا كافيه

بالصوت والصورة واكتشف ان الحادثة صايره بالسعودية وادلته وايد

منها كلام الشباب بالفيديو

واسم المطعم ماكو منه بشارع المطاعم

المطعم كان مسكر بحزة الصلاة وهالشي ما يصير الا بالسعودية

ويمكن ايران

خل يفيدونا العيم بهالسالفة

وطبعا النوخذه قال عني اني ساعات اكون مليقة وانا استنكر هالكلام والدليل

ان في مرة واحد من صعيد الكويت

دش محل شاف لائحة الاسعار ان الغترة ب 150 فلس و الدشداشة ب 300 فلس

فقال حق الهندي اللي بالمحل عطني 4 غتر و 3 دشاديش

رد عليه الهندي وقال له: انت من صعيد الكويت - طبعا تعرفون منو

قال له الكويتي: اي شدراك؟؟؟

رد الهندي: هذي مصبغة

:)

المهم يكيكي

اللي انا قلت تسنع وممكن بدا يعرف يخفف من التشلخ والتفلسف الزايد بس الظاهر الحكم اللي كسبه الصقر منه ومن معازيبه يننه

ويمكن خليف ما يبي يدفع الغرامة فيكيكي ابتلش

كاتب مقالة يقول فيها وايد اشياء ممتعة

بس ابيكم تحفظون هالشي اللي يقوله يكيكي عن الصقر قايله الله يخليكم

انا وعلى عكس ما قلته لصدام حسين في الثمانينيات ان الدم الذي يجري في عروقك عراقي

حفظوا هالجملة الحين وخندش بالمقالة

بس خل اعطيكم مقدمة

الصقر الاسبوع اللي طاف صدرت لصالحه اربع احكام ضد جريدة الوطن

واحد من هالاحكام كان يكيكي مدان فيه

وحكم ثاني بحق جريدة الوطن بسبب خروجهم عن رسالة الصحافة وانحرافهم عن سلوكيات المهنة

يعني الوطن بحكم القضاء منحرفين وناقصهم مخبأ الذيب

يكيكي شاف السالفة فيها 5001 ودينار كحكم ابتدائي

واهوا ما خلى أحد يحارب علي بابا الا وسفّل فيه

فشاف ان المبلغ يمكن يصير عود

فقال خل اصير بطل دامي دافع بيزات دافع

ويمكن اذا سبيت زياده يحن علي خليف

فقام وكتب مقاله

اردى من طبخات مصطفى اشكناني بجدرنا

قد لا املك هذا الزمن فهذا الزمن هو زمنك وزمن من يملك المال من امثالك

من يملك المال هل المقصود من يملك زين والوطن ولود اير وسيركل كيه ما سيركل كيه؟؟؟؟

خرجت بتصريحك على الاحكام التي قد كسبتها واتهمتنا بأننا انحرفنا بالحرية والديموقراطية

مو اهوا اللي اتهمكم المحكمة ادانتكم يعني مو اتهام

انتوا منحرفين شتبي؟؟؟

خذ مقالي وارفع فيه قضية بل ارفع مئات القضايا واكسبها كلها لكن تأكد رأسي مرفوع وثابت على الحق

اذا انت الحق وراسك مرفوع

ليش الصقر يكسب القضايا يكيكي؟؟؟؟

شنو القضاء مو نزيه؟؟؟؟

اذا قلت نزيه يعني الحق مو معاك وراسك ماله داعي ترفعه

واذا لا مو نزيه يعني حفظ القضية مالت الحرامي غلط

جان احكره

:)

اتباعك ممن شتموني وهددوني كثر لكنني اكبر منهم بشموخي وعزة نفسي فمثلي لا يباع ولا يشترى كما هم ومثلي لا يخضعه تهديد

منو هذيل اللي هددوك اخ 007؟؟

وثانيا شنو شموخي ؟

الجسمي شفيك؟؟

تاريخك وتاريخي بعد ان يطوينا الموت هذا ما سوف يبقى لنا لا مجدك ولا زمنك ولا ثروتك ولا سطوتك ولا نفوذك فاحفظ هذا الوعد وتذكره ولا تتناساه

شلون يموت وما ينساه اشرح لو سمحت؟؟

وجهت لك السؤال والاتهام وطلبت منك ومن محاميك ان ترد فلم ترد، وطلبت مواجهتك ولو في عقر دارك فهربت فلا تعد نفسك منتصرا وانت لا تملك شجاعة مواجهتي

واجهك بالمحكمة وفاز شتبي؟؟ اكيد انتصر

ادانتني المحكمة لانني تساءلت عن الشركة الوهمية التي وقعت معها وزارة المواصلات عن طريق شركتك وقبضتم المبالغ عنها وقلت للمحكمة كما قلت في مقالي كما قلت لمحاميك هات برهانك على عدم صحة كلامي

مو يا يكيكي هذا سبب خسارتك للقضية

انك اتهمت وتبيهم اهما ينفون

مفروض انت تثبت مو اهما ينكرون

وين اوراقك اللي هددت فيها لو عندك ادلة جان فزت

انت صج محامي؟؟

رسالة لك يا عزيزي ولكل من يتاجر باسم الكويت..تراب هذه الارض أغلى من آلاف الدنانير التي سأدفعها لخزانتك والتي تفيض بآلاف غيرها

دامك على حق شكو تدفع؟؟

وثانيا ودي اقدم اقتراح حق الصقر

بوعبدالله دام قاعد تربح خوش مبالغ من كثر ما يسبونك

انا بديت احسدك

شرايك اي مبلغ تربحه من الوطن تخصصه حق اللي يردون على جريدة الوطن؟

مثلا مثلا فقط مدونة بيت القرين
:p

وياريت ديوان الخدمة يستحدثون وظيفة يديدة

وظيفة مسماها: ينسب من جريدة الوطن

لان خوش مبالغ تطلع منها

وانا ودي فيها ومابي كادر بعد

انزين

طبعا ما نسيتوا الجملة اللي قلت لكم عنها

واللي يعاير يكيكي فيها الصقر

انزين وهذي الجملة
من بلبل بعد واللي يخليكم

المقال الذي نشرته »الوطن« يوم الخميس الماضي، والذي كانت قد نشرته عام 84 للشيخ الشهيد المرحوم فهد الأحمد.. وهو يصف الوضع الكويتي وقتها اثار بنا الماً.. وفخراً.. وشجناً.الفخر لان فهد الأحمد إذا كان قد غاب عنا بجسده، فهو بيننا بروحه وفكره

انزين بما ان الشهيد يعود بكتابة المقالات القديمة الجديدة على حد تعبير الوطن

ونبيل يقول ان مقالاته تثير الفخر وان اهوا بينهم بفكره وبروحه

ويكيكي يعاير الصقر بمدحه للعراق

ولان بيت القرين تنقل الصورة دائما وتضامنا مع المنحرفين جريدة الوطن

ننقل لكم مقالة للشهيد فهد الأحمد من قديمه بجريدة الوطن

لان الصورة مو راضيه تنعرض عندي ومو متأكده اذا انعرضت عنكم

يمكن كمبيوتري مخرف

بتاريخ 17-2-1986 وبجريدة الوطن

يقول الشهيد رحمة الله عليه

وبالسطر السادس من المقالة تحديدا

وددت ان اطبع قبلة على جبين قائد الأمة العربية صدام

يكيكي ما رأيك وبلبل شرايك تفتخر بالفكر اكثر والمنحرفين شرايكم تنشرونها؟؟؟



آخر شي


فكرة الستيكر اللي طالب فيها وايد من المعلقين على مواضيعي قربت


وراح تكون على مستوى 10000 ستيكر

بس اهم شي ابي اعرفه

فيكم شدّه تنشرون الستكرات بوقت قصير ولا ماله داعي؟؟؟

05/12/2007

تنتشها يا وليدان


تحديث
الساعة 23:00
****************

صدر حكم قضائي لصالح النائب محمد الصقر ضد جريدة الوطن الزم الجريدة والكاتب فؤاد الهاشم بتعويض مؤقت مقداره 5001د.ك

لا طبعا ما خلصت


صدر حكم قضائي لصالح النائب محمد الصقر يقرر الزام جريدة الوطن وفؤاد الهاشم (يقال ان الحكم كان بيطلع تحت اسم البيلر لكن هونوا بآخر لحظة) بمبلغ ثلاثة الاف دينار


لا لا ما خلصت
صدر حكم قضائي لصالح النائب محمد الصقر يقرر الزام جريدة الوطن والكاتب فؤاد الهاشم (يقال ان الحكم كان بيطلع تحت اسم رفيج بوش لكن بوش رفض) بمبلغ ثلاثة الاف دينار أيضاً كل هذا تعويضاً عن مانشراه ضد السيد محمد الصقر واعتبرته الاحكام خروجاً عن رسالة الصحافة وانحرافاً بسلوكيات المهنة


ليش متوقعين اني خلصت ترى قاعد نتعامل مع جريدة الوطن
صدر حكم لصالح النائب محمد الصقر ضد جريدة الوطن ورسامها محمد ثلاب والمحامي نواف سليمان الفزيع والزمتهم متضامنين بتعويض مؤقت مقداره5001د.ك

بس حلاو اهوا المحكمة ما وراها الا الوطن يعني؟؟

والله خوش فكرة يفتحون لهم محكمة خاصة لهم
واذا يبوني مستشاره ما اقول لأ
:)

طبعا الحكم بالتعويض المؤقت لايمس بحقوق السيد محمد الصقر في المطالبه بالتعويض النهائي الجابر للاضرار المادية والادبية التي لحقت به

منو يعرف شنو يعني مثل صلاة الرويلي؟؟؟
مشكور اللي شرح لي معناها
:)
::::::::::::::::::::::::::::::::::::::::::::::::::

أمس تفاجات بعدد التعليقات اللي موجودة بموضوع لو إنتوا

واعتقد إنكم لاحظتوا قلة الأدب الموجودة بوايد من التعليقات

وطبعا تعمدت اني ما اشيلهم والسبب ان على مر ال 6 اشهر اللي كتبت فيها بهالمدونة

ماشفت قلة ادب بهالكثافة

شمعنى لما قلنا نبي نتحرك وما نكتفي بالكلام صار السب؟؟؟

والممتع صج ان الكل كان حاقرهم بالردود

بس انا مضطرة اني اخلي التعليقات حق المدونين بس

خوفا من التمادي

بس الملفت بالموضوع ان عندنا ناس يعارضون بالسب بهالمستوى من قلة الادب

يحسسوني انهم ما تربوا عدل

او ان اهلهم كانوا لاهين بالبوق بدال لا يربونهم

الله يشفيهم

اي على فكرة

ترى ممكن ارد واحرجكم

واضحك عليكم الناس

حزتها شتسوى عليكم ان بنت هزأتكم؟؟؟

المهم

اليوم شفت 7 او 8 سيارات شابين ليتاتهم

اللهم زد وبارك

وايد ناس قالوا إن ملوت اسقاط القروض راحوا وناموا بساحة الارادة ليلة الاثنين

وهذي
جملة من جريدة الوطن مالت يوم الثلاثا

حملات اعلامية وندوات حاشدة.. ومواطنون احتشدوا في ساحة الارادة وسهروا ليكونوا اول الداخلين الى قاعة عبدالله السالم


وهذي صور دزوا لي ياها ليلة الاثنين الساعة وحده ونص بالليل

عن التشلخ مرة ثانية



ماكو ولا قطو



مواقف ساحة الارادة

انزين عندهم كاتب اسمه أحمد الفهد

سلفي

شوفوا المستوى بس

اكثر ما اعجبني في المذكرات التي تنشرها »الوطن« عن زوجة الملك فاروق.. صور الملك فاروق في ملابس السباحة! فالملك فاروق رغم كرشه و»ديوده«.. الا انه »يتبطح« ويركب القوارب، ويلتقط الصور بكل ثقة وجرأة

يعني شنقول

يعني هالأدب من وين ماشاءالله عليه

وهذي
بصفحة الرياضة بعد وهم أمس

لا يضر السحاب.. نبح الكلاب

سبحان الله نفس مستوى التعليقات اللي انكتبت بموضوع لو انتوا

تهقون شالصلة؟؟؟

نختم ويّا رجل الدين المبجل الموقر السيد الصجي مثل ما يسمونه بعض كتاب الوطن

اللي سوّا قصة حق أبوالحسن لأن ما حط صورة الكعبة بالآذان مال التلفزيون

يا سيد يا صجي يا كاتب بجريدة الوطن

أهديك هالصورة وورني شبتسوي

طبعا ولاشي

بس هم شوف

يمكن لأنك سيد صجي ما تعرف منو هذا

هذا عبدالله رويشد

بس طبعا ما راح تسوي شي

لانك سيد صجي




04/12/2007

لا تنسون

قولوا


وشبّوا الليتات

نهار الاربعا والخميس واليمعه

02/12/2007

لو إنتوا



تحديث
**********


يا خواتي يا اهلي يا جيراني

قلت إن تحرك أولي مو الوحيد ولا النهائي

ما يمنع يكون في ستكر ولا يمنع اعتصام ولا يمنع مظاهرة ولا يمنع انتفاضة

بس أولي نشوف فيه الوضع

ونرفع علامات الاستفهام حق اللي مو عارف شنو الفكرة

الليتات راح تكون واضحه للكل واذا الواحد شاف اكثر من ليت سياره شاب راح يسأل ليش

وعادي يتليقف ويشب ليته واهوا ما يدري شالسالفة

خل توصل فكرة ان الناس مو راضين وهذي بداية تحرك

يا جماعة نشروها وبلغوا عنها

عندنا يومين ليما الاربعا

سووا اللي تقدرون عليه الله يخليكم

آخر شي

إدراك نبهتني على مصطلح يجب إستخدامه بدال شارع كويتي

وإهوا رأي عام كويتي

راح أصلح الجملة الحين

وشكرا إدراك

:::::::::::::::::::::::::
الطبطبائي يجهز استجواب الطويل وينتقد «الشعبي»: أحب الشيعة ولست طائفياً.. واستجوبت وزراء سنّة

هذا صفحة أولى بالوطن اليوم

أما بلبل شيقول

عن الطبطبائي اليوم

أن يكون السيد قد تحول الى أداة تدار بالريموت كونترول من التكتل الشعبي دون ان يشعر

بالذمة هذي جريدة تسوى احد يقراها؟؟؟

ما دققت بمواضيعهم اليوم لأن عندي شي أهم منهم بوايد وايد


اعتقد ان انتهينا من مرحلة التنوير والتوضيح بالمدونات خصوصا ويمكن وصلنا ليما مرحلة التحلطم المكرر

ولأن الدولة تعودت على التحلطم بدون لا ترد أو تهتم معتبريننا فخار يكسر بعضه

فأعتقد إن الحين وقت تحرك فعلي يحتاج لنا كلنا مدونين أوكتاب أوقادة رأي وغيرنا وغيرنا

وخل نبتدي بشي أولي لمعرفة وضعنا كرأي عام كويتي

ونوصل رسالتنا بوسيلة تعبير اولية وأشدد على أولية

يعني ماهي كل شي

ومثل ما قلت بموضوع طاف ان إحنا تعودنا على ان نتحرك كردات فعل على شي ملموس سواء بالمجلس أو الحكومة

وودي نكون اليوم احنا الفعل

واعتقد إنها الطريقة السليمة لتصحيح الوضع

فلو إنتوا تقولون لأ للتعديات على الأموال العامة والخاتمة تصير حفظ القضايا

ولو إنتوا تقولون لأ للتعدي على قوانين الدولة وأبرزها بهالفترة تعدي صاحب السمو طلال الفهد وجماعته

ولو إنتوا تقولون لأ للهدر بأموال الدولة بإسم اسقاط القروض

ولو انتوا تقولون لأ التصرفات الطائفية والفئوية اللي يقوم فيها الطبطبائي وغيره

ولو انتوا تقولون لأ حق جريدة الحرامية وممارستها وفتنها واكاذيبها

ولو إنتوا تقولون لأ حق الفساد اللي انتشر بالديرة بكافة المجالات

ولو انتوا تقولون لأ حق الوضع الطائفي بالجامعة

ولو انتوا تقولون لأ حق الفداوية المتيمعين حول بعض عيال الاسرة

لو إنتوا تقولون لأ حق كل هالاشياء بلا استثناء

مطلوب منكم شي بسيط جدا جدا جدا

لا تترددون فيه ولا تنطرون احد يسبقكم انتوا بادروا فيه وغيركم بيستمر معاكم

يوم الأربعا والخميس واليمعة اليايين 5 و 6 و 7 -12 بفترة النهار

وكل ما تطلعون بسياراتكم

شبوا الليتات بس

لا أكثر ولا اقل

ماكو ابسط من هالامر يا جماعة

خل يكون وسيلة حضارية للتعبير

لا تترددون وتعذربون فيه

يا حبايبي يا باجي المدونين

وتحديدا وماهو نقوص بالباجي

أم صده وساحة الصفاة ومطقوق وعاجل و موقع الامة بحكم انتشاركم الكبير جدا ما شاء الله

ارجوكم بادروا اعتقد خلصنا وقت الكلام

وباجي المدونين لا تترددون ارجوكم

خنبادر يا ناس عشان هالارض

وياريت اللي عنده ايميلات ومسجات و
facebook

هم نشروا الجزء المكتوب باللون الأزرق

خل توصل ال



للكل

والله يوفقنا في سبيل الكويت

29/11/2007

أظن فلّت

حاطين استفتاء الوطن من الاسبوع اللي طاف على امل تطلع نتايج تعجبهم عن الدائرة الوحدة وطبعا ليما الحين ما سكروا الاستفتاء عشان النتايج ليما الحين مو على هواهم

وعشان لا يغشون بالنتايج مثل ما سووا من قبل مع استفتاء شركة الوطنية للاتصالات انا احط لكم النتايج مالت 12 ونص الظهر يوم الخميس 29-11-2007

اللي يؤيدون الدائرة الوحدة على الخمس نسبتهم 70.53% وهذا شي جدا طبيعي ومو عجيب

عدد الاصوات اللي تمنح للناخب
صوت واحد يؤيدونه 25.46% لتحارب الحزبية على قولتهم

أربع أصوات 22.53% بالمركز الثاني

صوتين مثل ما يبون الوطن 17.02% بالمركز الثالث

السؤال اللي كاسر ظهرهم اهوا السؤال الاخير عن السبب اللي يدفع النواب للمطالبة بالدائرة الوحدة

نسبة 53.04% يقولون لأنهم اكتشفوا ضعف موقفهم بالخمس

لأن الدائرة الوحدة تقلل من الفساد يابت نسبة 34.58 % من الأصوات

والإجابة اللي يبونها الوطن لرغبة صادقة في ترسيخ الوحدة الوطنية يابت 12.37% بالمركز الاخير

ننقل الارقام عشان نمنعهم من التشلخ

طبعا مو هني الموضوع

تدرون ان محل
guess?
اللي بمجمع مريم بالسالمية

مكتوب بهالشكل
سوق جس المركزي
يحسسوني انهم يبيعون خيار
:)

الصراحة يكيكي
ذبحني و بط جبدي من كثر ما يتكلم عن الفقارة

AGUN FOR HIER

هذي يكيكي كاتبها بأحد
مقالاته

إحترت بمعناها بعدين استوعبت إن قصده

مصطلح يقصد به المرتزقة الذين تم استئجارهم من قبل بعض الدول لخوض الحروب بالنيابة عن جيوشهم النظامية

راح اخلي اللي يعلقون يعلمونك شلون تكتبها

مو تفشلوني
انا قلت اطوف له واسكت عل وعسى يتأدب

بس الظاهر تصور ان السكوت يعني ما عندي شي عليه

لكل من يتعشم خير بهالمحامي نصير الفقراء

خل أعطيكم معلومات عنه يمكن يتوب ويسكت

عنده رنج روفر ب 20 الف وعنده جاكوار ب 11 الف سيارتين حقه اهوا غير سيارة مرته

يتقاضى 1000 دينار شهريا من الكتابة عند الحرامية

حملته الانتخابية بانتخابات 2006 تكلفتها 70 الف دينار قبل لا يكتب بالوطن يعني بدون معاش المعزب

يبني بيت بمنطقة البدع حاليا

محامي لشركة تنظيفكو

بس مع هذا فقير المسيكين

عن الهذره الزايده

تكلمت عن ان في بوقات وكشفناك

تكلمت بلسان الشباب وصرت نصيرهم وهم كشفناك

وهذا انت تكتب للفقراء على قولتك وهم كشفناك

شتبي ذبحتنا تشلخ

وهم مو هذا موضوعي

ليما الحين محد قال لي شنو بداية حريجة مريجة في مدرسة خديجة ترى والله صج ابي اعرف

يقولون بصفحة الرياضة وبمانشيت رئيسي

محضر العمومية يدين المعايير رسمياً بخرق القوانين المحلية

المعايير اهما ثلاث اندية كاظمة والعربي والكويت مثل ما شرحت لكم بموضوع طاف

بس الحلو شيقولون

لان الفرسان اصبحوا مارقين على القانون المحلي حالهم حال الجميع

الفرسان مقصود فيهم اندية المعايير

لكن الجملة وايد حلوة ان جريدة الوطن تعترف ان 11 نادي فيهم شيخين طلال فهد الاحمد الجابر الصباح ولد اخو الامير وخالد اليوسف الصباح

شيخين واحد فيهم حفظه الله ورعاه يرأس عشر اندية

يالله مو شناطرين محكمة على طول

واذا صج المعايير نفس الشي وياهم على المحكمة مخالفين قانون الدولة

يالله نبيهم ورا القضبان واولهم كبيرهم الذي علمهم

ابي احمد الفهد مو قال راح يحل المشكلة

وينه؟؟

وثاني شي سمعت ان اندية التكتل يجتمعون باسطبل

خل افهم بس شغلة

اسطبل بالافلام يصير شبرة عوده وفيها غرف صغيرة مثل الكباين

كل كبينة فيها حصان

يعني اهما وين يجتمعون بالضبط بفهم؟؟؟

وهم مو هذا الموضوع

صج نادية صقر مو كويتية؟؟؟

ندش بالموضوع

الحين خرق القوانين عادي والدليل سالفة الرياضة

فرض الحجاب على الشرطة النسائية

حفظ قضية الناقلات

المطالبة باسقاط القروض ويمكن تطيح

فصل التعليم بالمدارس الخاصة

منع الكتب بمعرض الكتاب

مطالبة الطبطبائي باقالة وكيل الصحة لأن شيعي

تعيين محمد عبدالله المبارك لمتابعة الاداء الحكومي ومن يتابع اداء محمد مادري

الحركة الدستورية ما حددت موقفها من استجواب الجراح ليما اليوم

التعامل مع جريدة الحرامية سواء بالعمل معاهم او التعاون معاهم حتى من الناس اللي مفروض وطنيين

ما عندنا وزير نفط بدولة نفطية من شهر 5 اللي طاف على قولة
عاجل

بورمية نائب

وسعدون حماد يقول عن المكلسن والاعلامية سرقة العصر

راعي الفحماء متحدث

المثقفين والمتنورين الكويتيين ما يتحركون الا كردة فعل مثل الدوائر والرياضة

يعني ما يبادرون بشي

مادري بس اظن فلّت الديرة وصارت سايبه

وعشان نقدر نعيش بهالارض

شرايكم نسوي غزو وهمي يعني التلفزيون يعلن ان صار غزو

واللي يطلع يقعد بره خلاص ما يدش

والصامدين يظلون

اراهن ما يظل 100 الف بالديرة ونبدي من يد ويديد

ونسميها سياسة العودة

على قولة سعد الفرج بحامي الديار

اذا ما نتحرك الحين ما اظن يمدي نتحرك بعدين

ماكو احد يدعونا للتحرك

اخاف ادعو انا واكون بروحي
ويطيحون علّي وبعدها يودوني أمن الدولة
بس ماعندي خمسين فلس عشان اكتب كنت هنا من اجل الكويت
مثل ما سوّا بشار الصايغ

26/11/2007

موضوع استهواني


تحديث
**********
شارك مع مدونة العرزالة
لا لصحيفة سراق الوطن

::::::::::::::::::::::::::::::::::::::::
موضوع غلبته للعزيزة

white wings

إستهواني وايد وخلاّني أفكر وأحاول اكتب موضوع أغطي فيه جوانب معينة

بس دامنا بطاري

white wings

ترى عندها ندوة مع تجمع القوى الطلابية باجر الثلاثا مع عبدالرضا أسيري وجاسم السعدون وعبدالكريم الشمالي

بجمعية المهندسين جبال فدركرز شارع الخليج الساعة سبع

المهم الموضوع اهوا عن مقاطعة مؤسسة الوطن

ويمكن الشي اللي خلاني اكتب هالموضوع الحين

إني قمت ألاحظ إن صج صج ماكو مستوى

يعني بالفترة اللي طافت لما كنت أرد عليهم كان في أمور ممكن تكون خافية على الناس فأوضحها

بس هالايام لما يجذبون فأهما يجذبون أشكره

وماله داعي ينكشفون بس هذا مو معناه كلش إني أوقف عن كشفهم

بس اذا لقيت ان في مستوى

يعني أتمنى يرفعون مستوى الجذب شوي عشان أرد عليهم عدل

المهم ندش بالموضوع

بس قبل الموضوع

كان في اغنية

حريجة مريجة في مدرسة خديجة

ابي شنو بدايتها

صار لي اسبوع افكر وماني قادره اتذكر

يملك مؤسسة الوطن الاعلامية وزير سابق ارتبط اسمه بسرقات اموال عامة

وتحديدا سرقات الناقلات

وبعد ما كان ما عنده الا راتب حكومي صار عنده ملايين

خلص الغزو وشرى اشياء وايد ضخمة بالكويت ومنها جريدة الوطن

والله يسامح اللي باعها على هالاشكال

وطبعا من يوم ما استلموها لصوص الناقلات

واحنا مو شايفين منها اي خير

فتن - تفرقة - افتراءات - كذب

وطبعا لأن الفلوس ما تعب فيها كلش

فقام يصرف على الجريدة ويوزعها ببلاش ليما تغلغلت ووصلت حق عدد كبير من الناس

وطبعا هالانتشار حقق له نسب كبيرة من الاعلانات اللي قامت تزيد فلوس الناقلات اكثر واكثر

إلى أن اتحفنا بتلفزيون الوطن

وطبعا راح يكون مسيس وايد امس مستضيفين سعدون حماد وقبله العيار وقبله طلال الفهد والخرافي ووايد من هالنوعية

والخافي اعظم

شتبين دانه خلصينا؟
انا اقول لكم
لنفرض ان واحد يه وباق بيتج أو بيتك
وبعد جم يوم يه يبي يشتري بيتك من الفلوس اللي باقها
هل راح تبيعين البيت أو تبيعه له؟
او إن طلب منك تشاركه بشركة هل راح تشاركه؟
أو طلب ياخذ بنتك هل راح تعطيه؟

مفروض الإجابة المنطقية منكم تكون لأ

واذا سألتكم ليش لأ؟
راح تكون اجاباتكم
هذا حرامي هذا مو شريف هذا باقني شلون أفكر إني أتعاون معاه

طيب انا راح اسألكم شلون عيل تتعاملون مع اللي باق فلوسنا كلنا ككويتين؟
شدعوه اهوا الوحيد اللي بايق؟؟ ديرة بطيخ الكل يبوق فيها واذا قلت ماني متعامل معاه يعني ما راح اتعامل مع نص الكويت

ليش ما نخلي عدم التعاون مع الحرامية منهج انزين؟
عن المثالية الزايدة اذا ما تعاملنا معاهم ما راح نعيش

اي مو اهما بسبب هالفكرة عندنا اهما يبوقون وبفلوس البوق يستانسون ويربحون؟
شنسوي بعد هذا قدرنا

اذا الشعب يوما اراد الحياة لا بد ان يستجيب القدر؟
هذا شعر وكلام خيالي والشعوب السعيدة لا تكتب شعرا
وعن الخيال الزايد

وتعالي دانة شمعنى علي الخليفة يعني؟
شكو بعلي الخليفة أو دعيج الخليفة حتى؟ مالي شغل فيهم
بس هذا الإنسان باق ونهبنا بوقت الغزو وغير جذيه بفلوس البوق قاعد يفرقنا ويمزق ديرتنا

شلون باق يعني طلع حكم عليه؟
يا جماعة لجنة التحقيق لو كانت تحقق مع صدّام جان طلعوا بعدم كفاية الادلة على الغزو
مو مقياس
احنا عندنا وصولات واشياء ملموسة ان كان يتحول له مبالغ
وشوفوا موضوع اتحاد امريكا عنه، اللي حطيت له رابط بالموضوع اللي تحت
اي صج مبروك فوز الوحدة

خلصينا شنسوي يعني؟
ليش ما نقاطع هالمؤسسة بكبرها؟

إنتي من صجج جريدة ولها إنتشارها وتوصل ببلاش حق وايد ناس؟
إنتوا من صجكم؟!؟؟ مو هذي نفس الجريدة اللي سبتنا أيام نبيها خمس؟ مو هذي نفس الجريدة اللي صورت حملات نبيها خمس انها حفلات رقص؟ مو هذي الجريدة نفسها اللي ما خلت احد بالكويت الا وحرامي، شنو انتوا كلش ما عندكم احساس
تاكلون لحم خنزير؟؟؟
يقولون لحم الخنزير يموت الاحساس مادري عاد صج جذب بس قلتها

قاطعناها شبيصير يعني؟
ابد ما يصير شي، بس يقل الانتشار، يقل الاعلان، تقل ايرادات فلوس البوق
هذا من جانب اقتصادي
من جانب المواضيع
منو يدري مجلة المجتمع موجودة هالايام ولا لأ؟
انا مادري الصراحة بس اللي اعرفه ان قل الانتشار وايد
وما اعتقد إن احد يقرى شي عنها و في ناس ما يعرفونها
شاللي يمنع ان نسوي بجريدتهم جذيه؟

وتلفزيونهم وين بتروحين منه؟
مو اقول لكم اذا صار في مقاطعة من الناس للجريدة انهم ما يتعاملون معاها وما يشترونها او يشتركون فيها نفس الشي نقدر نسويه للتلفزيون
على فكرة سئلوا أي مفتي سني أو شيعي ما حكم العمل وتقاضي الأجر من جهة مشكوك في مصدر أموالها شك كبير؟
راح تكون الاجابة ان حرام ويجب تفاديها
هذا بالنسبة للي ما يعترفون بقانون الدولة ويا كثرهم ناخذهم من جانب ديني عشان يسكتون

إنزين شدعوه بنقدر يعني احنا جم واحد 10 أو 20 شدعوه بتفرق معاهم؟
نبيها خمس بدت بعشرة أو أقل وصارت قضية دولة وانقرت ارادة العشر لأن عندهم ارادة

هذا جزئي الأول من الموضوع ويمكن في جزء ثاني بناءا على ردودكم اللي يمكن تنبهني على اشياء غافلة عني

24/11/2007

دائرة وحدة

تحديث
***********
عندها موضوع عن الحرامية يستاهل نعرف رايكم فيه
:::::::::::::::::::::::::::::::

من اللي عروقهم بالماي وصلتني ان في ثلاث شغلات تحر خليف هالايام

راح اقول لكم ياهم مع الموضوع

أول شغلة تحر خليف هاليومين إن مو قادر يتكلم ويطبل حق إبوه عن حفظ القضية بأوامر عليا

مادري شسالفة أوامر عليا هاليومين

بالاوساط الدولية او بالاصح الاوساط المحيطة للكويت تعريف دولة الكويت اهو

دولة عربية صغيرة تقع في الشمال الشرقي للخليج العربي وتحيط بها دول كبيرة كالسعودية والعراق وايران وتتميز بمواقفها المحايدة وعلاقاتها الطيبة مع جيرانها الثلاثة وبقية الدول الخليجية على وجه الخصوص

وقد دأبت الكويت على رسم هذه الصورة منذ قديم الزمان وتعزز هذا السعي منذ تشكيل وزارة للخارجية الى يومنا هذا

اهم شي بالموضوع او التعريف اهوا مسألة إحاطتنا بدول كبيرة

الحلوين بجريدة الوطن مصرين على نشر العداء مع الكويت

يعني شبوا على ايران من حرب لبنان مع اسرائيل السنة اللي طافت وليما اليوم

وبعدين شبوا على العراق وشغالين والدليل
مانشيتهم اليوم

أخطاء ما قبل 2 أغسطس1990 تعود
غزو عراقي بشري... للكويت


وطبعا هذا غير نجرتهم مع قطر وغيرها من الدول

هالفتن اللي قاعده تبثها هالجريدة يوميا شنو راح تسوي بعلاقتنا مع دولتين كبار مثل ايران والعراق

ومنو بيتحمل المسؤولية؟؟

ان أعتقد إن إذا في أوامر عليا لازم تكون ألحين عشان توقف هالاشكال اللي لا تمثل الكويت ولا أهلها

بس تمثل مجموعة حرامية ودهم تصير بلبلة بالكويت يمكن يقدرون يبوقون

عندي سؤال مهم

ابي شي واحد مسكه احمد الفهد ونجح فيه؟؟؟



أحلى شي ان فاطمة حسين بدت تكتب بالوطن وثاني مقالة لها تنتقد فيها جريدة الوطن

اتمنى ان اقول لمن اثاروا غبار الاحتجاج ان يتمهلوا فالوطن متخم بقضايا اكثر اهمية من (دويخة) الخميس والجمعة والسبت
انها مجرد نهاية الاسبوع لا نهاية العالم


الشغلة الثانية اللي تحر خليف هالايام

ان مجبور يرعى نشاطات اتحاد امريكا لأنها مفيدة حق انتشاره

مع ان اتحاد أمريكا مسوي
صفحة خاصة على موقعه مختصة ببوقات ابوه

والشخصيات اللي مضطر يغطيهم كلهم ضده يعني مرزوق الغانم ومحمد الصقر وخالد الهلال

فمسكين حده منقهر قاعد يدفع فلوس حق اللي يفضحون بوقة الناقلات

وناسة

المهم خندش
بموضوعهم اليوم

اللي اهوا موضوع الدائرة الوحدة

طبعا انا من البداية مستغربة شلون هذيل يدعون لتقليص اكبر للدوائر

لكن اليوم بانت النية

وخاصة من الابطال اللي مطالبين بتقليص الدوائر ليما دائرة وحدة امثال سعدون حماد وربعه

الفكرة كلها متلخصة بمسألة التصويت

يبون دائرة وحدة بس بصوتين

يعني كل واحد له صوتين

يعني لا طبنا ولا غدا الشر

صوتين معناته ان اللي يحتاج للفوز ماراح يحتاج اكثر من 10 الاف صوت على مستوى الدولة كلها

يعني ما صار شي

اهيا الفكرة كلها من تقليص الدوائر ان نبي المرشح اللي يفوز يحصل على اصوات وايد من دائرة كبيرة

عشان نضمن ان ما يقدر يشتري مو نضمن كثر ما نقلل من الشرى والفرعيات والطائفية

والشباب الحلوين طبعا ما يبون هالشي لأن يدرون النوعيات اللي بتطلع من انتخابات فيها صعوبة بالفوز ما توالم مهازلهم وفتنهم

يقول لكم ان اندية التكتل برئاسة سعادة الشيخ طلال فهد الأحمد الصباح حفظه الله ورعاه

ومن
جريدتهم يقولون

حيث كان هناك اتفاق مطلق على الانصياع الكامل لقرارات الفيفا خاصة وان التعهد الذي قدمته الكويت وقرار رفع الايقاف من قبل لجنة الطوارئ بالاتحاد الدولي جاء مشروطا بالانصياع خاصة للمادة 32 المتعلقة بتركيبة مجلس الادارة الخماسية وفقا لقرار المكتب التنفيذي الصادر في 27 مايو الماضي

يا سلام عليهم والله جان زين تحترمون قانون الدولة مثل احترامكم للفيفا

بس انا اقول خوش ديرة وخوش قانون

وبالنسبة لوزير الشؤون يعني مثلا حضرتك شنو ناطر متى بتحولهم للقضاء

مادري

قاعدين يخالفون قانونك شناطر معاليك؟؟

آخر شغلة تحر خليف هالايام شكل صندوق جريدة الجريدة لأن كل الناس تقول عنه حلو وستايل

بس انا ما اقول الا

ما يحتر من قوطي الا... حطوا اللي تبونه
بس ما اقدر أكمل عندي أوامر عليا
:)

وهم