24/11/2007

دائرة وحدة

تحديث
***********
عندها موضوع عن الحرامية يستاهل نعرف رايكم فيه
:::::::::::::::::::::::::::::::

من اللي عروقهم بالماي وصلتني ان في ثلاث شغلات تحر خليف هالايام

راح اقول لكم ياهم مع الموضوع

أول شغلة تحر خليف هاليومين إن مو قادر يتكلم ويطبل حق إبوه عن حفظ القضية بأوامر عليا

مادري شسالفة أوامر عليا هاليومين

بالاوساط الدولية او بالاصح الاوساط المحيطة للكويت تعريف دولة الكويت اهو

دولة عربية صغيرة تقع في الشمال الشرقي للخليج العربي وتحيط بها دول كبيرة كالسعودية والعراق وايران وتتميز بمواقفها المحايدة وعلاقاتها الطيبة مع جيرانها الثلاثة وبقية الدول الخليجية على وجه الخصوص

وقد دأبت الكويت على رسم هذه الصورة منذ قديم الزمان وتعزز هذا السعي منذ تشكيل وزارة للخارجية الى يومنا هذا

اهم شي بالموضوع او التعريف اهوا مسألة إحاطتنا بدول كبيرة

الحلوين بجريدة الوطن مصرين على نشر العداء مع الكويت

يعني شبوا على ايران من حرب لبنان مع اسرائيل السنة اللي طافت وليما اليوم

وبعدين شبوا على العراق وشغالين والدليل
مانشيتهم اليوم

أخطاء ما قبل 2 أغسطس1990 تعود
غزو عراقي بشري... للكويت


وطبعا هذا غير نجرتهم مع قطر وغيرها من الدول

هالفتن اللي قاعده تبثها هالجريدة يوميا شنو راح تسوي بعلاقتنا مع دولتين كبار مثل ايران والعراق

ومنو بيتحمل المسؤولية؟؟

ان أعتقد إن إذا في أوامر عليا لازم تكون ألحين عشان توقف هالاشكال اللي لا تمثل الكويت ولا أهلها

بس تمثل مجموعة حرامية ودهم تصير بلبلة بالكويت يمكن يقدرون يبوقون

عندي سؤال مهم

ابي شي واحد مسكه احمد الفهد ونجح فيه؟؟؟



أحلى شي ان فاطمة حسين بدت تكتب بالوطن وثاني مقالة لها تنتقد فيها جريدة الوطن

اتمنى ان اقول لمن اثاروا غبار الاحتجاج ان يتمهلوا فالوطن متخم بقضايا اكثر اهمية من (دويخة) الخميس والجمعة والسبت
انها مجرد نهاية الاسبوع لا نهاية العالم


الشغلة الثانية اللي تحر خليف هالايام

ان مجبور يرعى نشاطات اتحاد امريكا لأنها مفيدة حق انتشاره

مع ان اتحاد أمريكا مسوي
صفحة خاصة على موقعه مختصة ببوقات ابوه

والشخصيات اللي مضطر يغطيهم كلهم ضده يعني مرزوق الغانم ومحمد الصقر وخالد الهلال

فمسكين حده منقهر قاعد يدفع فلوس حق اللي يفضحون بوقة الناقلات

وناسة

المهم خندش
بموضوعهم اليوم

اللي اهوا موضوع الدائرة الوحدة

طبعا انا من البداية مستغربة شلون هذيل يدعون لتقليص اكبر للدوائر

لكن اليوم بانت النية

وخاصة من الابطال اللي مطالبين بتقليص الدوائر ليما دائرة وحدة امثال سعدون حماد وربعه

الفكرة كلها متلخصة بمسألة التصويت

يبون دائرة وحدة بس بصوتين

يعني كل واحد له صوتين

يعني لا طبنا ولا غدا الشر

صوتين معناته ان اللي يحتاج للفوز ماراح يحتاج اكثر من 10 الاف صوت على مستوى الدولة كلها

يعني ما صار شي

اهيا الفكرة كلها من تقليص الدوائر ان نبي المرشح اللي يفوز يحصل على اصوات وايد من دائرة كبيرة

عشان نضمن ان ما يقدر يشتري مو نضمن كثر ما نقلل من الشرى والفرعيات والطائفية

والشباب الحلوين طبعا ما يبون هالشي لأن يدرون النوعيات اللي بتطلع من انتخابات فيها صعوبة بالفوز ما توالم مهازلهم وفتنهم

يقول لكم ان اندية التكتل برئاسة سعادة الشيخ طلال فهد الأحمد الصباح حفظه الله ورعاه

ومن
جريدتهم يقولون

حيث كان هناك اتفاق مطلق على الانصياع الكامل لقرارات الفيفا خاصة وان التعهد الذي قدمته الكويت وقرار رفع الايقاف من قبل لجنة الطوارئ بالاتحاد الدولي جاء مشروطا بالانصياع خاصة للمادة 32 المتعلقة بتركيبة مجلس الادارة الخماسية وفقا لقرار المكتب التنفيذي الصادر في 27 مايو الماضي

يا سلام عليهم والله جان زين تحترمون قانون الدولة مثل احترامكم للفيفا

بس انا اقول خوش ديرة وخوش قانون

وبالنسبة لوزير الشؤون يعني مثلا حضرتك شنو ناطر متى بتحولهم للقضاء

مادري

قاعدين يخالفون قانونك شناطر معاليك؟؟

آخر شغلة تحر خليف هالايام شكل صندوق جريدة الجريدة لأن كل الناس تقول عنه حلو وستايل

بس انا ما اقول الا

ما يحتر من قوطي الا... حطوا اللي تبونه
بس ما اقدر أكمل عندي أوامر عليا
:)

وهم

16 comments:

حمودي said...

خوش بوست
:)

هالخليف هذا حتى من قوطي يحتر
انا ما اقول الا ماينلام اذا ابوه
بوووووووووووووووووووواق

kila ma6goog said...

اعتقد ان الاوامر العليا يجب ان تتدخل بشكل اكبر في التعامل مع مشكلجية ابناء الاسرة

مصخوها

بهاما ماما said...

وهم مايو

وهم ليش بالافلام المصريه لمه تطق الباب على واحد بالليل يبطل الباب وبعدين يربط روب النوم ؟؟ شنو يعني يبي يورينه انه كان نايم؟؟

Eng_Q8 said...

وايد زين سعدون حماد هذا الي ماادري اشلون فاز
لا والله ادري من ..... بعض الناس عاد انتوا اكملوا الفراغ
الدائره الواحده اذا بتصير راح تتغير سياسه الكويت بكبرها واكيد راح تصير احزاب واذا مو احزاب قوائم يعني صب حقنا لبن والحبيب يبي صوتين انا اقول خل يصوت على روحه صارت خمس وماكو فوز واذا فاز انا بنتحر
هذيل اعضاء مجلس الامه اللهم لا اعتراض

فريج سعود said...

ما في احد ضد الدائرة الواحدة الكل ينادي فيها حتى الامير فضلها قبل اكثر من سنة
بس الظاهر ما راح تصير لانهم مو مشتهين وتأيدهم لها اعلامي فقط
عدد الاصوات لكل ناخب اعتقد انه سيكون هو مقدار التمثيل النيابي لكل ناخب فالعدد عشرة مثلا سيكون كبير لانه اي مجموعة ستمثل بعشرة نواب وهذا باعتقادي كثير
والعدد اثنين ايضا قليل ويسمح بالشراء فالعدد اربعة او خمسة مناسب
وسيكون فيه تمثيل للكل

العرزاله said...

صح اهو متوهق غصبا عليه يغطي اخبار اعداءه :))

ButterFlier said...

قوطي

Q8i_Blogger said...

معطيهم 98 ألف دولار امريكي
حق الاتحاد

بس المشكله .. اشلون الاتحاد يقبل مبالغ من واحد حرامي بشهادتهم
يعني قاعد ياخذون فلوس حراميه

Anonymous said...

مادري لي وين يبون يوصلونها التكتل ... مبينه اشكره شارطين ان الهيئة تتحمل المسؤولية في حال صدور اي قرار عكسي من قبل الفيفا .... يعني اشكره طابخينها و لا تعورون راسكم ويانا لان هدفنا مصالح شخصية على ابعاد رياضية ب محسوبية سياسية ... ناقصها دقوس صبار و لبن ... لعب لعب لعب .... شلون يعني ملينا طقت جبدنا يبا شوفولنا حل اذيتونا مافي ب هالبلد غير هالولد !!!

فتى الجبل said...

آنا أكمل عنج
ما يحتر من قوطي الا الأهبل
وخليف أكبر أهبل بالتاريخ
________
الدائرة الواحدة لن تنجح الا بوجود الأحزاب
________
أحمد الفهد نجح بوايد أشياء
النهب بواسطة شركة التنمية
زرع الفتن بالديرة
الرشاوي

nEo said...

نواف الفزيع يحجي حاضر بلادي



K.O

بيت القرين said...

حمودي
لا تتهمه
عدم كفاية الادلة

مطقوق
جان زين

بهاما
مادري عنه
:)

مهندس
يا امة الاسلام خلص مني الكلام

فريج سعود
اربعة او خمس اصوات انا معاك

العرزاله
اي يكسر الخاطر

بتر
لا تحط بذمتك
:p

كويتي
خوش سؤال هل من مجيب؟؟

انو
اللي يسمعهم يقول اذا مشى راي التكتل ناخذ كاس العالم

فتى الجبل
درر

نيو
ما فهمت
شالسالفة؟؟

Anonymous said...

لتكون لنا كلمة تحمل في طياتها كل معاني التطبيق و العمل بانه دستورنا و انه سورنا
يتشرف تجمع القوى الطلابية بدعوتكم لحضور ندوة سورنا يوم الثلاثاء القادم في تمام الساعة السابعة مساء في مقر جمعية المهندسين الكويتية
نرجو الاعلان

نائب الامين العام لتجمع القوى الطلابية
احمد الشخص

احمد الشخص said...

لتكون لنا كلمة تحمل في طياتها كل معاني التطبيق و العمل بانه دستورنا و انه سورنا
يتشرف تجمع القوى الطلابية بدعوتكم لحضور ندوة سورنا يحاضر فيها د.عبدالرضا اسيري و د.ابتهال الطاهر و الاستاذ عبدالكريم الشمالي و الاستاذ جاسم السعدون يوم الثلاثاء القادم في تمام الساعة السابعة مساء في مقر جمعية المهندسين الكويتية
نرجو الاعلان

نائب الامين العام لتجمع القوى الطلابية
احمد الشخص

بو حامد said...

نحن مع الدائرة الوحده ولكن لسنا مع الصوتين ، لأن مثل ما تفضلتم ( ما سوينا شي ) .

كـــويــــتـــي said...

صوتين معناته ان اللي يحتاج للفوز ماراح يحتاج اكثر من 10 الاف صوت على مستوى الدولة كلها
==================

السؤال كم عدد الاصوات الافضل؟؟
لو قلنا 4 او 5 او 6 او 7 او 8 او 9 او 10

كل قبيله او كل طائفه راح تسوي انتخابات فرعيه وتطلع العدد المطلوب
والقبيله اللي عددها قليل راح تتحالف مع قبيله ثانيه
يعني نفس المشكله تبقى موجوده

بصراحه صعب تحديد العدد الافضل للاصوات
يمكن يكون 50 صوت افضل شي بشرط اللي يقل عن 50 صوت يعتبر تصويته ملغي

او على الاقل 20 صوت