05/11/2007

لا يقصون عليك




تحديث
****

تم قبول إستقالة الحميضي

والله طلعنا مؤثرين
:)


يا وزير

وحاطتلك صورة وإنت صغير شتبي بعد

كلنا صفقنا لك على جرؤتك في تحدي هدر اموال الدولة واسقاط القروض

يا وزير

تاريخك طيب

يا وزير

انت اللي تميز الوزارة مو اهي اللي تميزك

يا وزير

المشكلة بديرتنا اغلاط ما تتحمل مسؤليتها

يا وزير

سيادة الريّس قال حق بو صباح دشوا استجواب احمد العبدالله وما عليكم

دش احمد العبدالله الاستجواب وما حيلته إلا انا أخوكم وانا ولدكم

وما يندرى إخونا وولدنا وينه الحين

يا وزير

سيادة الريّس قال حق بوصباح دشوا إستجواب علي اليرّاح وترى كلهم 16 نائب ما يسوون شي

ودش علي اليرّاح
وقعد بالاستجواب يصفق ويطق الطار عدل وشوي ويزفن

يا وزير

احمد العبدالله اختفى

وعلي اليرّاح صار وزير يشتغل عند وزير

يا وزير

كلنا نبيك أنور وجدي

تكفه لا تصير حسن فايق

يا وزير

إسم أنس الرشيد مخلد بتاريخ الوزارة وهو ما طوّل فيها

وإسم شرار تلاشى وإهوا عشعش فيها

يا وزير

السالفة بالمواقف مو بالمدة

يا وزير

رامبو ما انشهر الا لأن كان يحل المشكله مو يسويها ويكبرها

يا وزير

خلّك وزير الناس

مو ناقصك جاه او وجاهة

يا وزير

الوزارة ما عادت مكان تكشخ فيه

اللي حتى العصيمي عرضوا عليه الوزارة

وياي الدور على سعدون حمّاد بعد

يرضيك هالشي بالذمة

يعني تخيل اجتماع بمجلس الوزرا والعصيمي على يمينك وسعدون على يسارك
مو ناقص الا يطيحون مندي بالاجتماع

يا وزير

المشكلة عوده اللي حتى
ساحة الصفاة نزلوا موضوع تخيّل

بس ناقص
شروق تكتب
شروق شرايج بعد تنزلين موضوع بعد عيد الأضحى مو أحسن؟؟

اي يا ربع ساحة الصفاة

في كلمة أمل كاتبينها بالأحمر إنتوا

الله لو تحطون لنك على شعر أمل اللي مكتوب عندي تصيرون خوش ساحة

يا وزير
نبيك عشان الكويت تستقيل

يا وزير
رفضت اسقاط القروض عشان الكويت

يا وزير

استقيل عشان الكويت

وهذا قدر الابطال يتحملون اغلاط غيرهم

يا وزير

بس عاد خلصت كلامي

من عيالك اللي يحبون ارضك استقيل


بوفهد يقول

عندما طلب من الشيخ أحمد الفهد الرد على بعض الاتهامات التي طالته في الفترة الأخيرة قال: أنا أعمل لأجل الكويت ومصلحتها وطول عمري أهدف إلى العنب ولم أطلب قتل الناطور أبداً

مشكلتنا يا بوفهد ان عنبك مو شي


أم صدّه
رؤية وطن
الكوت

الا أرت وينك مو كاتب شي عندي؟؟
عن التغلي

شوفوا عاد زيدوا التعليقات لا أعصب
وثاني شغلة شنو يعني كل مدونة تدز مسجات انها نزلت شي وانا

محد يدز عن بيت القرين مسجات

اللي عنده خل يدز يالله عاد يالله

لا التحالف ولا المنبر ولا غيرهم آلهة ما يغلطون

لكن ان يوصل الصراع من زايد الزيد
بهذا الاسلوب على المنبر والتحالف

فهذا موضوع غريب وايد ومتناقض وايد خصوصا انه صادر من زايد الزيد

25 comments:

فتى الجبل said...

موبايده الاستقالة
الوزير عندنا يتحرك بالريموت كنترول
ما عدا الأوادم السنعة اللي يستقيلون لأنهم ما يبون هالشي

nEo said...

الحميضي

استقالته تحفظه هو و تجعله يجنب البلد ازمة سياسية

rwatan said...

الحين إستقال الحميضي و خنشوف شلون الحين بكون رد التكتل الشعبي

لازم لازم يختلقون عذروب عشان يتمون يشحنون و يأزمون

ButterFlier said...

مقالة زايد حلوه و واقعيه

Anonymous said...

انا بعرف ليش ما تكتبين بجريدة

ترى وايد احسن من الكلام الفاضي اللي نقراه بوايد جرايد

واسلوبج روعه

العرزاله said...

نفس الكلام اللي قلته حق نيو

لي تعليق على استقالة الحميضي وعشان ما افصل حياك عرزالتي

كـــويــــتـــي said...

كلام حلو

والحميضي قراره مو بايده
قالوا له قدم استقالت قدمها
قالوا له رد وزارتك ردلها
قالوا له قدمها مره ثانيه ونقبلها
قدمها وقبلوها
ولو يقولون له اي شي بيقول حاضر

Unbreakable Girl said...

((أشاع حضور الشيخ أحمد الفهد وترؤسه الاجتماع أجواء من التفاؤل بين الحضور كما أسهم الفهد بحسه الوطني وخبرته الطويلة في قيادة الاجتماع إلى ما يحقق مصلحة الكرة الكويتية والتسامي فوق الخلافات والمصالح.

الفهد امس كان اشبه بالنوخذة الذي قاد سفينة الكرة الكويتية وسط امواج عاتية وكان ينتظرها مصير واحد يا طلعة.. يا طبعة» فوصل بها إلى شاطئ الامان وان كان هناك المزيد من العمل ينتظر النوخذة و «ربعه» حتى يبلغوا الهدف الاهم..))

والى اخر الخبر
حشى غزل مو خبر رياضي

اما عن الفهد فياهو خوش نوخذه ياهو عنده حس وطني

Unbreakable Girl said...

لا بعد في شغلة بقلبي ودي اقولها

اسماء اعضاء اللجنة الرباعية كما ورد في الخبر:

1- معالي الشيخ فهد الاحمد
2-سعادة الشيخ خالد اليوسف

اشمعنا الاول معالي والثاني سعادة؟

Kuwait Karma said...

سلام

انا ضعيت في هذي الديرة المضاعة. وزير يدخل ويطلع قبل لا يدفىء كرسيه والسكرتارية تتعود على ريحته.
وزير يغلط ويترقى وثاني يعدل وينترك.
وزير يسرق ويتخلل في السياسة ووزير يدافع عن البلد وينجلع ماهو خوش ولد.
ديرة ضيعها كبارها وينقذها يهالها.
ديرة حولها غير جيرة وفي داخلها ضاعوا اهل الغيرة.
ديرة برميل النفط بإمية
وحقل الحرامية بربية.
ديرة شريفها نازل وحقيرها صاعد.
ديرة ما ظل فيها الا كم واوي يحفظ أمنها من بعد الهادي.

وسلامتكم...

kila ma6goog said...

لوول

منو زايد الزايد؟

حمودي said...

مين زايد الزايد ده ؟؟

Anonymous said...

قبل كل شى ما هى اخطاء الحميضى او الجرم اللى قام بة حتى يسب ؟

bo bader said...
This comment has been removed by the author.
bo bader said...

عاد تدرين ان صج الخرافي حاول يضغط على رئيس الوزراء لتعيين سعدون حماد وزير !!
==
بالنسبة للحميضي فهو اللي وهق روحه بروحه !!

غلطة الحميضي انه قبل بالتدوير وبعدين أصر انه ما كان خايف من الاستجواب !

لو انك فعلا مستعد للاستجواب ولا يهمك ، جان قعدت بوزارتك وأصريت على المواجهة !

أنا بديت أحس ان كان خايف من شي في الاستجواب

Mishari said...

محمد عبدالقادر الجاسم وضح نقاط مهمة فى مقالته قبل الاخيرة (( خدعوك فقالو دستوري))
والشغلة الثانية

يا بيت القرين خفي على نفسج شوي
تري المنبر باي باي وقاعدين يشوفله صرفة ومنفذ ثاني

اما الحميضي
ماخذه وايد واستقالته كانت شجاعه ودرء لحفرة سياسية كانت ما تستبعد الحل فيها

Bashar said...

:)

ماعندي شي أقوله :)

تحياتي

Anonymous said...

لما خليفه قال ابونا يابر عيبتي عليه
الحين انتي تقولين اليراح

ARTFUL said...

هلا والله هلا

يسلمووووووووووووو

أخجلتم تواضعنا ،، والله متابعينكم بس ما أعلق ومن حقي اتغلى معرس يديييييد بتي

;p

حمد said...

مشاري العزيز

المنبر مهما تراجع تنظيمياً يبقى المحرك الأساسي و الناشئ للعمل الوطني النظيف..(ركّز على النظيف)..و تبقى قاعدته هي حجر الأساس التي تبنى عليه التحركات و تجمعات كالتحالف

انشئ المنبر بعد التحرير ليلم شمل القيادات و التجمعات السياسية النظيفة في الكويت بجميع أطيافها و بمختلف توجهاتها

و ها هو التحالف اليوم يكرر الخطوة، كل اعضاء المنبر تقريباً هم اعضاء في التحالف...فقط للتوضيح

شكرا دانة شكرا مشاري

حمد2 said...

عن زايد الزيد

مهما اختلفت او اتفقت مع محتوى المقال، يبقى هجوم شخصي رخيص و مشتّت و بأسلوب رخيص على شخص النيباري

زايد من تفنّش من المجلس الوطني للثقافة و الفنون و الآداب، و خرج من الطليعة بعدما كان موظف فيها كمدير تحرير بسبب خلافه مع النيباري عندما اصبح رئيس تحرير و هو متعومس و مو عارف شيسوّي

للعلم: عندما كان يشتغل بالطليعة، حاول يستغل الجريدة ليتهجم شخصياً على بدر الرفاعي (أمين عام المجلس الوطني للثقافة) عندما ضيق عليه و بعدها فصله..

و ربما عدم استعاعته استغلال الطليعة لأغراضه الشخصية..سبب من اسباب خلافه مع ادارتها

عموماً..الكبير كبير و الصغَيَّر صغَيَّر

و اقول لزايد: لي دخل فيك الرصاص مثل ما دخل في النيباري ذيج الساع تكلّم عن النظافة و النزاهة..و عن التأثير في الرأي العام!٠٠

فريج سعود said...

معلش تحمليني شوي
اول مرة اشوف احد يمدح الحميضي غير الحكومة
الحميضي اكبر جذاب يقولون له كم كلفة زيادة بدل الايجار بمقدار خمسين دينار يضخمها ويحسبها لي خمسين سنة جدام يقولون له كم كلفة القروض يلعب بالارقام على كيفه حتى الشيخ صباح ما كان يعتمد على ارقامه ومرة قال بالمجلس خل نشوف ارقامنا صحيحة ولا ارقامكم واذا ارقامكم الصحيحة راح نزيد البدل وهذا الي صار
هذا غير لعبه بصندوق التنمية ولما اجبره المجلس على تخصيص خمسمئة مليون دينار للاسكان حط اعلانات بالشوارع بان صندوق التنمية يتبرع بالمبلغ لصالح الكويتيين واخر سوالفه اشتراك اخوه في اكتتاب شركة امانه
وانتي الحين ياية تمدحينة وتسوينه هو الي حفظ الاستقرار بالبلد ؟
مو هو الي قال خل الكويتيين يروحون بيت الزكاة
هذا المفروض يسمونه وزير العجز الاكتواري
ولو فيه خير جان واجه الاستجواب
واذا كنتي تحسبين ان استجوابه كان فقط على اسقاط القروض تراج غلطانه
---------
بعدين تطالبين الزملاء بالتعليقات والمرور على المدونة واحنا ما نشوف لج ولا تعليق واحد عندنا ولا تواصل ولا شي
انا ما انكر وقفتج ويانا بالبداية واعلانج عن مدونتنا عندج وهذا شي تشكرين عليه
بس هم نبيج تواصلينا ولا بس احنا الي لازم نواصل ونعلق

Anonymous said...

اتفق تماما مع الأخ حمد فيما ذهب إليه من توضيح لسبب الضغينة الغير مبررة التى يحملها الزايد تجاه النيبارى وأضيف بأن أسلوب(الردحة)الذى لجأ إليه الزايد لا يرقى إلى مستوى النقد ولا يستحق التفنيد

ButterFlier said...

http://www.alseyassah.com/alseyassah/new/view.asp?msgID=17215

بيت القرين said...

فتى الجبل
ممكن

نيو
الحميضي اثبت هالشي

rwatan
الله يهديهم ان شاء الله

بتر
شفت شلون
:)

أنو
ماكو جريدة تتحملني
:)

العرزاله
الحين اشوفها

كويتي
ممكن

unbreakable
شكرا على الملاحظة وتم التصرف
:)
وعلى الملاحظة الثانية
شيخ عن شيخ يفرق

كارما
صح لسانك

مطقوق - حمودي
مو الا تعرفون
:p

أنو
منو سبّه؟

بوبدر
ما أظن إن كان خايف
بس رئيس الوزرا كان خايف

مشاري
أنا ما مدحت المنبر
إنتقدت إسلوب زايد بالنقد

بشار
الله يحييك ويسلمك ويخليك
:)

أنو
صدقت أنا آسفه

أرت
مبروك
:)

حمد
شكرا حمد ودانة ومشاري
:)
والله يهدى زايد يا رب

فريج سعود
النقطة الثانية أنا معاك 100% ونوهت عنها بموضوعي اليديد
بس سالفة الحميضي انا أعتقد إن موقفه من إسقاط القروض جدا شجاع

أنو
الله يهدى زايد ان شاء الله

بتر
تم التصرف