09/12/2007

عودة الشهيد وتألق واضح ليكيكي

تحديث
************
أعتذر عن التأخير بكتابة موضوع يديد

بس المرض مأذيني شوي

اقروا مواضيعي القديمة دام ماكو شي

او نطروني يوم او يومين

وبالنسبة لأم صده

شنو رايحين الحج؟؟

:::::::::::::::::::::::::::::::::::::


شالاخبار؟؟

خنبلش بتحلطم بعض القراء

واحد يقول ان كان يتابع تو الليل على تلفزيون الوطن

وحاطين فقره عن فار ياكل من اكل المطاعم

وقايلين ان هالحادثة صايره بشارع المطاعم الكويتي

المهم النوخذه اللي دز لي التحلطم شيقول

يقول ان بتو الليل كانوا حاطين الفقره بدون صوت

والنوخذه شايف نفس الفقره على ال ميتا كافيه

بالصوت والصورة واكتشف ان الحادثة صايره بالسعودية وادلته وايد

منها كلام الشباب بالفيديو

واسم المطعم ماكو منه بشارع المطاعم

المطعم كان مسكر بحزة الصلاة وهالشي ما يصير الا بالسعودية

ويمكن ايران

خل يفيدونا العيم بهالسالفة

وطبعا النوخذه قال عني اني ساعات اكون مليقة وانا استنكر هالكلام والدليل

ان في مرة واحد من صعيد الكويت

دش محل شاف لائحة الاسعار ان الغترة ب 150 فلس و الدشداشة ب 300 فلس

فقال حق الهندي اللي بالمحل عطني 4 غتر و 3 دشاديش

رد عليه الهندي وقال له: انت من صعيد الكويت - طبعا تعرفون منو

قال له الكويتي: اي شدراك؟؟؟

رد الهندي: هذي مصبغة

:)

المهم يكيكي

اللي انا قلت تسنع وممكن بدا يعرف يخفف من التشلخ والتفلسف الزايد بس الظاهر الحكم اللي كسبه الصقر منه ومن معازيبه يننه

ويمكن خليف ما يبي يدفع الغرامة فيكيكي ابتلش

كاتب مقالة يقول فيها وايد اشياء ممتعة

بس ابيكم تحفظون هالشي اللي يقوله يكيكي عن الصقر قايله الله يخليكم

انا وعلى عكس ما قلته لصدام حسين في الثمانينيات ان الدم الذي يجري في عروقك عراقي

حفظوا هالجملة الحين وخندش بالمقالة

بس خل اعطيكم مقدمة

الصقر الاسبوع اللي طاف صدرت لصالحه اربع احكام ضد جريدة الوطن

واحد من هالاحكام كان يكيكي مدان فيه

وحكم ثاني بحق جريدة الوطن بسبب خروجهم عن رسالة الصحافة وانحرافهم عن سلوكيات المهنة

يعني الوطن بحكم القضاء منحرفين وناقصهم مخبأ الذيب

يكيكي شاف السالفة فيها 5001 ودينار كحكم ابتدائي

واهوا ما خلى أحد يحارب علي بابا الا وسفّل فيه

فشاف ان المبلغ يمكن يصير عود

فقال خل اصير بطل دامي دافع بيزات دافع

ويمكن اذا سبيت زياده يحن علي خليف

فقام وكتب مقاله

اردى من طبخات مصطفى اشكناني بجدرنا

قد لا املك هذا الزمن فهذا الزمن هو زمنك وزمن من يملك المال من امثالك

من يملك المال هل المقصود من يملك زين والوطن ولود اير وسيركل كيه ما سيركل كيه؟؟؟؟

خرجت بتصريحك على الاحكام التي قد كسبتها واتهمتنا بأننا انحرفنا بالحرية والديموقراطية

مو اهوا اللي اتهمكم المحكمة ادانتكم يعني مو اتهام

انتوا منحرفين شتبي؟؟؟

خذ مقالي وارفع فيه قضية بل ارفع مئات القضايا واكسبها كلها لكن تأكد رأسي مرفوع وثابت على الحق

اذا انت الحق وراسك مرفوع

ليش الصقر يكسب القضايا يكيكي؟؟؟؟

شنو القضاء مو نزيه؟؟؟؟

اذا قلت نزيه يعني الحق مو معاك وراسك ماله داعي ترفعه

واذا لا مو نزيه يعني حفظ القضية مالت الحرامي غلط

جان احكره

:)

اتباعك ممن شتموني وهددوني كثر لكنني اكبر منهم بشموخي وعزة نفسي فمثلي لا يباع ولا يشترى كما هم ومثلي لا يخضعه تهديد

منو هذيل اللي هددوك اخ 007؟؟

وثانيا شنو شموخي ؟

الجسمي شفيك؟؟

تاريخك وتاريخي بعد ان يطوينا الموت هذا ما سوف يبقى لنا لا مجدك ولا زمنك ولا ثروتك ولا سطوتك ولا نفوذك فاحفظ هذا الوعد وتذكره ولا تتناساه

شلون يموت وما ينساه اشرح لو سمحت؟؟

وجهت لك السؤال والاتهام وطلبت منك ومن محاميك ان ترد فلم ترد، وطلبت مواجهتك ولو في عقر دارك فهربت فلا تعد نفسك منتصرا وانت لا تملك شجاعة مواجهتي

واجهك بالمحكمة وفاز شتبي؟؟ اكيد انتصر

ادانتني المحكمة لانني تساءلت عن الشركة الوهمية التي وقعت معها وزارة المواصلات عن طريق شركتك وقبضتم المبالغ عنها وقلت للمحكمة كما قلت في مقالي كما قلت لمحاميك هات برهانك على عدم صحة كلامي

مو يا يكيكي هذا سبب خسارتك للقضية

انك اتهمت وتبيهم اهما ينفون

مفروض انت تثبت مو اهما ينكرون

وين اوراقك اللي هددت فيها لو عندك ادلة جان فزت

انت صج محامي؟؟

رسالة لك يا عزيزي ولكل من يتاجر باسم الكويت..تراب هذه الارض أغلى من آلاف الدنانير التي سأدفعها لخزانتك والتي تفيض بآلاف غيرها

دامك على حق شكو تدفع؟؟

وثانيا ودي اقدم اقتراح حق الصقر

بوعبدالله دام قاعد تربح خوش مبالغ من كثر ما يسبونك

انا بديت احسدك

شرايك اي مبلغ تربحه من الوطن تخصصه حق اللي يردون على جريدة الوطن؟

مثلا مثلا فقط مدونة بيت القرين
:p

وياريت ديوان الخدمة يستحدثون وظيفة يديدة

وظيفة مسماها: ينسب من جريدة الوطن

لان خوش مبالغ تطلع منها

وانا ودي فيها ومابي كادر بعد

انزين

طبعا ما نسيتوا الجملة اللي قلت لكم عنها

واللي يعاير يكيكي فيها الصقر

انزين وهذي الجملة
من بلبل بعد واللي يخليكم

المقال الذي نشرته »الوطن« يوم الخميس الماضي، والذي كانت قد نشرته عام 84 للشيخ الشهيد المرحوم فهد الأحمد.. وهو يصف الوضع الكويتي وقتها اثار بنا الماً.. وفخراً.. وشجناً.الفخر لان فهد الأحمد إذا كان قد غاب عنا بجسده، فهو بيننا بروحه وفكره

انزين بما ان الشهيد يعود بكتابة المقالات القديمة الجديدة على حد تعبير الوطن

ونبيل يقول ان مقالاته تثير الفخر وان اهوا بينهم بفكره وبروحه

ويكيكي يعاير الصقر بمدحه للعراق

ولان بيت القرين تنقل الصورة دائما وتضامنا مع المنحرفين جريدة الوطن

ننقل لكم مقالة للشهيد فهد الأحمد من قديمه بجريدة الوطن

لان الصورة مو راضيه تنعرض عندي ومو متأكده اذا انعرضت عنكم

يمكن كمبيوتري مخرف

بتاريخ 17-2-1986 وبجريدة الوطن

يقول الشهيد رحمة الله عليه

وبالسطر السادس من المقالة تحديدا

وددت ان اطبع قبلة على جبين قائد الأمة العربية صدام

يكيكي ما رأيك وبلبل شرايك تفتخر بالفكر اكثر والمنحرفين شرايكم تنشرونها؟؟؟



آخر شي


فكرة الستيكر اللي طالب فيها وايد من المعلقين على مواضيعي قربت


وراح تكون على مستوى 10000 ستيكر

بس اهم شي ابي اعرفه

فيكم شدّه تنشرون الستكرات بوقت قصير ولا ماله داعي؟؟؟

24 comments:

ButterFlier said...

أنا أول واحد مو سدرة

هاهاهاهاه

ديرة بطيخ said...

خل يوصلني الستكر يا دانه ومن عيوني اوصله لاقصى عدد وتشوفينه على سيايير بيتنه كلها

:)

سلام

العرزالــــــه said...

لوول

لووول

لووول

قويه المقاله قويييييه الصراحه لومكان يكيكي اهاجر

مسكين يمدح نفسه ويقول اي والله

مو منه من حر قلبه

الظاهر خليف قايلهم كل واحد يصلح سيارته يالربع

كل واحد يدفع من جيبه لوول

والله زمن اللي يكيكي صار رياال واهو الشريف بالكويت مالت عليه وعلى معزبه فوقه

Bad-Ran said...

متألق جدا

Bashar said...

مساء الخير

لو كنت مكان يكيكي لتوقت عن الكتابة، وراجعت نفسي قليلا، واتخذت قرار التوقف عن الكتابة والتحول الى القصص القصيرة من نوع "روايات عبير".

الحمدالله أنني لن اكون في مكان يكيكي وأفضل الانتحار قبل ذلك ..

بالنسبة للستيكر .. لازم يكون في ألوان وشفاف :p عشان موديل السيارة ولونها .. مع المودا

تحياتي

Na3am-8admon said...

الله يعطيج العافيه على مجهودج بس عندي مداخلات يليت اتجاوبين عليهم:
*انا ودي اعرف ليش مكرسه كتاباتج على جريدة الوطن انا عارف جوابج جريده اتثير الفتنه ومالكها من سراق المال العام وغيره وغيره انا ما اختلف وياج بس ليش ما اتكون كتاباتج على الواقع المؤسف الي ضايع فيه الشعب بالطوشه ,تكلمي عن التعصب الي صاير بالبلد من طائفي او قبلي او حزبي ,عن الوعي الشبابي ,يعني انا قاعد اتواصل وياج بكتاباتج ما قاعد استفيد منج غير هذا جذاب وهذا منافق والكاتب الفلاني متناقض والكاتب الفلاني مادري اشلون صاير فا اتوقع التغير حلو.

*ثاني شي الاحظ فيج في كلمات اتقطينها على الطاير على قولتهم هذا سلفي وهذا اخونجي فا اتمنى اني اسئت الظن وما يكون التعصب فييج لانه بالنسبه لي ما اتوقع احد فيه التعصب لتوجهاته عنده روح الوطنية والله كان ودي اكتب اكثر بس اتوقع مسختها ;).

على العموم هذا التعليق يعكس اهتمامي في مدونتج ومتابعتي فا لا يروح بالكم ابعيد مجرد مداخلة لتعم الفائده وشكرأ.

أبو جيج يدور نعاله said...

معلش بس على حسب ما توافر من معلومات شبه مؤكدة إن رئيس تحرير الوطن ترك إدارة الجريدة مباشرة بعد الهوشة الشهيرة مع جاسم بودى و تداعياتها السيئة جدا عليه

و من يديرها الآن هو نائب رئيس التحرير

و هذا ما يفسر حالة التيهان و فقدان الأمومة الواضح فى مقالات كتاب الوطن

الله يعينهم و نتوقع تحوّل بعض كتاب الوطن لمقدمى برامج ستايل و طبخ بقناتهم ..بالقريب العاجل

Anonymous said...

منو شهيد ؟

فتى الجبل said...

اهوا بس فهد الأحمد
وسعاد الصباح اللي اكتبت الأشعار بصدام
والفلوس اللي اندفعت حق صدام من خزينة الدولة
الكل بذيج الأيام كان مغتر بصدام فلاحد يزايد على أحد
وآنا أبي استيكر..اشلون أحصله؟

سدرة العشـــاق said...

منو علق قبلي :)

عساج على القوة

انا ابي ستيكر بعد

bo9ali7 said...

حمودي
LOOL
3jeeb :P

فتى الجبل
مو الكل
ناس وايد كانت ضد سياسة دعم الدولة لتهور وجنون صدام

nEo said...

البوست وايد قوي


وايد وايد


واااااااااااااااايد


ضحكت ضحكت ضحكت على يكيكي انه شلون غبي


بعدين صج اكو سؤال اثير لازم انبش وراه

يكيكي اكيد محامي ؟

من اي جامعة !!


الغبي يسب الناس و تبي الناس تثبت العكس !!


اشلون !!


يعني يقول عن الصقر حرامي و يقوله اثبت العكس !!

LOOOOOOOOL


صج دمبك


مشكورة على البوست ونستينا و الله

Eng_Q8 said...

ماادري اشلون لج نفس تقرين هالجريده
اتوقع انج ما تاكلين شي عقب ما تقرينها
خوش رجيم :)

وبالنسبه حق يكيكي هذا بس قاعد ويداحر خلق الله انا اقول خل يخليه عاموده اعلان تجاري احسن يمكن يستفيدون منه

وبالسبه للستيكر مو مشكله لاني قلتها امس في بوستي لا بد من وقفه

والوقفه قادمه انشالله

يعطيج العافيه

ZwaiZ said...

dizeelna 30 sticker plz 3ashan awazi3houm 3ashabaab

bo rashed said...

بوق ولا تخاف
سمعت انه صدر حكمك الا ياليل يا داني
يقول القاضي برئني مالك انت او مالي
انا اللي الوطن بقته وهذا اعظم اعمالي
بوعذبي انا اشهدلك انك عود في فنك
لا مجلس نفع وياك والمنطوق يحكملك
منطوق الحكم سجين في خصر الوطن منك
عرفتوا يا كرام الحين ليش ياليل ياداني
تحياتي

Unknown said...

س : بالنسبة للأحكام القضائية التى صدرت مؤخرا لصالح محمد الصقر هل هى أحكام نهائيه مذيلة بالصيغة التنفيذية أم ما زالت أحكام أبتدائية قابلة للأستئناف والتمييز ؟

بيت القرين said...

بتر
مبروك

ديرة بطيخ
ان شاء الله بس خنشوف طريقة للتوزيع وان شاء الله خير

العرزاله
مقالتي ولا مقالة يكيكي اللي قويه
:p

بدران
شفته؟؟

بشار
خل عبير بحالها وجابلوا رجل المستحيل انتوا
:)

وكلامك عن الستكر محطوط بالحسبان

نعم صامدون
لا تحاتي وقول رايك
بس اول شي مصختها بالصاد مو السين
:p
المهم
انا بمعظم مواضيعي لما اتكلم عن فتنهم
اطرح هم بالوقت نفسه اراء واشياء متعلقة بالوضع العام
ومنها شعار لأ على سبيل المثال او موضوع انتخابات الجامعة أو استقالة الحميضي
بس لازم تعرف ان المدونة مختصة بانها تكشفهم
يمكن انت اقتنعت انهم منحرفين بس غيرك يحتاج دايما يقرى ويستوعب هالشي
وثانيا المدونين الباجي اعتقد انهم مو مقصرين ويجتهدون في ابداء ارائهم واللي بالغالب تتفق مع رؤيتي ورؤية غيري
وبالنسبة لتسميتي اخوان وسلف فهذا الشي مو من عندي اهما يتفاخرون بهالمسميات
واللي يغلط على الكويت منهم او من غيرهم نتكلم عنه
والحين انا طولت ومصختها بالصاد

بوجيج
اذا خبرك صحيح
شدعوه ايام خليف كانت مسكته يعني

حمودي
مادري منو؟؟

فتى الجبل
صدقت
وبالنسبة للستيكر راح اشوف طريقة للتوزيع وابلغكم

سدرة
شنو هالتأخير
الف واحد سبقوك
والله يقويك
ونضبط موضوع الستكر ان شاء الله

بوصالح
شنو يعني ترد على حمودي وفتى الجبل
اقعد مكاني بعد؟؟
وقول عن موضوعي شي يا اخي

نيو
دوم مستانس
بس اظن مصختها وناطرين منك موضوع يالله عاد

مهندس
اي خوش رجيم
والستكر انطر عليه جم يوم بس

زويز
شرايك تعطيني العنوان بعد
واييبهم خلال نص ساعه
:p

بوراشد
كلامك درر الصراحة
لا تقطع رجاءا

911
على حسب علمي نهائية
بس اذا في احد عنده دراية اكثر يا ريت يفيدك ويفيدني

الثائر said...

ما توقعة ان تنفين صفة الملاقة عنج بتجريح ناس

Q80 Blogger said...

بعد اذنج .. استعنت باللنك لهذا البوست

ذكرتيني بكلامج على الفيديو الي بشارع المطاعم

حطيت الفيديو عندي

شكرا على المجهود

Edrak said...

معا لنكرمهم و ننصفهم ( حملة أنصاف )

www.barakota.blogspot.com

http://nationalkuwait.com/vb/showthread.php?t=18607

http://www.forum.kuwaitliberals.com/showthread.php?p=18527#post18527

حنطفيس said...

لووول

خووووش بوست

بس هم النكته مليقه

عن شنو الستيكر ؟

Mozart said...

شنو الموضوع بالضبط !!

على نفسها جنت براقش said...

اول شئ
لأ

و ثانى شى
انا من دهر شابة ليتات السيارة
:)

ثالث شئ
بداية حريجة فى مدرسة خديجة
احم احم

كان فى بطة
على المحطة
ستين دينار
يت المطافى وطوطت
طوط طوط
حريجة حريجة فى مدرسة خديجة
قبقاب على قبقاب
فى مدرسة المرقاب

لووووول
و لا تسألين شنو سالفتها
وعيت و انا اسمعها

سدرة العشـــاق said...

ما تشوفين شر إن شاء الله