27/08/2007

بعد الشهرة


تحديث مهم بالأسفل
*****

أحب أقول إن وناسة
:)

ومشكورين يالراي وحسين الحربي على هالموضوع

اهم شي مصورين المدونة وفيها شعار الوطنية
لول

وطبعا لازم أشكر السبب الرئيسي في الشهرة العزيز
مطقوق
وبعده
ساحة الصفاة وأم صده ماقصرتوا

لاحظت بالموضوع اللي طاف إن النصايح وايد بتخفيف حدة الإسلوب

وانا أقولها بصراحة إن الإسلوب ماهو حاد مني والطريج

يعني لما أقول أهبل او غباء أو خبل هذي مو عشان أبي أسب

الفكرة وما فيها إني أسمي الأشياء بأسمائها

والله مو قصدي الاهانة وبالنهاية اراء وتختلف بس الفكرة تعرية الحرامية ومحامينهم


تلفون الكاتل وين إختفى؟؟؟؟


موقفنا من استجواب معصومة واضح، فنحن معه ولكن عندما اقيلت كان كافيا لنا، وما يقال غير ذلك انما هو تحليل تآمري ضدنا نعرف ابعاده جيدا

هذي جملة من بيان الاخوان على موضوع استجواب معصومة

سؤال مهم معصومة استقالت ولا اقيلت؟؟

اللي اعرفه إنها استقالت

ليش الاخوان يجذبون كله من دعيج أكيد اهوا كاتب البيان

أم صده ناطره منكم موضوع عنهم
مصختوها

معلق رياضي قطري في قناة »الجزيرة« يدعى »الكعبي« كرر ـ اكثر من مرة ـ جملة »المحافظة 19« حين يأتي على ذكر »الكويت« في اخباره الرياضية، ثم يعود ويستدرك ـ في بلاهة مصطنعة ـ ويصحح ما قاله! ثم تأتي هذه الحركة التي تتسم بالعنجهية والغرور من الملاك القطريين الجدد للشركة الوطنية للاتصالات بمقاطعة جريدة »الوطن« لأنها تتصدى لكل ما من شأنه المساس بالكرامة الكويتية! ادعو كل الكويتيين ـ والمقيمين ـ الذين لديهم اشتراكات هواتف مع »الوطنية« الى الغائها فورا والتوجه الى شركة الاتصالات المتنقلة »الكويتية« ومقاطعة »القطرية«.. فورا! دعونا نريهم »العين الحمرا«، وبأن الشعب الكويتي شرس حين يتعلق الامر بكرامته وكرامة وطنه! اعيدوا لهم ارقامهم ودعوهم يستخدمونها في محادثة.. انفسهم

هذا البيلر يقول إن معلق بالجزيرة يقول المحافظة 19

مع إني أستبعد بس شوف يالكعبي والله لو صج بس خل اتاكد يا ويلك ويا سواد ليلك مني

والله راح تاكلها وأخلي بيت القرين يدش بيت بيت بقطر ويعرفهم قدرك

اذا كان الكلام صج

وبعدين عاد يدش البيلر باللي يبيه المعزب

يبينا الكل يشتري خط من الإتصالات
ونخلي الوطنية

وطبعا اللي ما يدري اللص العود يملك اسهم كبيرة بالإتصالات المتنقلة

وهذا اللي يبيه فؤادو

وثانيا الوطنية كيفهم يقاطعونكم بالعكس زين يسوون
وهذا الشي انتوا بجريدة الحرامية تسوونه

يعني النيباري والخطيب والسعدون والصقر وغيرهم طايحين فيهم سب بس لأنهم تكلموا عن الحرامية

اذا تبون التعديل سنعوا روحكم مع إن ماكو امل

وزين إنك تدري إن الشعب الكويتي شرس لما يتعلق الأمر بكرامة ديرته

وعشان جذيه ما ننسى اللي باقنا وقت الغزو لانها مسألة كرامة


عموما انا أستأذن بروح أشتري خط وطنية
:p

إي صج
مدونة مستحي يديدة زوروها

مصطلحات شائعة
يكيكي: نواف الفزيع
بلبل الطبل: نبيل الفضل
البيلر أو رفيج بوش: فؤاد الهاشم
المزيون بيرق: ماني كاتبه إسمه ما يستاهل

36 comments:

بروفسور حمادو said...

آنا توقعت أدش المدونة و ألقاكم توزعون شربت فيمتو :)

إلى الأمام دائما..

بيت القرين said...

الفيمتو عليك

بس والله والله والله ودي اذوق طعم الشربات

بس أشوفه بالمسلسلات

شكله حلو

جبل واره said...

نيابة عن اخواني الكتّاب في بلوقنا العامر "واره" نبارك للأخت ( كانون الوطن ) بيت القرين على تزيينها لصدر الصفحة الأولى في الرأي

وعئبال ما نشوفج بالـ نيويورك تايمز السنة اليايه ان شاءالله

ملاحظة : ناطرين الفيمتو بالمقر اقصد ببلوقنا :P

Mohammad Al-Yousifi said...

لووول

تصدقين اول شي ضحكني بالمقال مال الراي اهو اعلان الوطنية

كم دافعيلج؟ و الا بس نكاية بالوطن حاطته؟

من امس و انا افكر منو بلير و بلير و بلير

توني اتوعب انه بييييييييييييييييلر

لوول

كييب جونج

bo9ali7 said...

رفيج بوش
LooL
وعليييهم :P

ZwaiZ said...

hahaaaaaaa ams wana an6er etseer esa3a 12:00 3ashan achayik el-jarayid online 6ab3an mako shay ley el-1:00 chayakt wela el-Rai 7a6a ur Blog mit men ethi7ik gilt ba7i6Ha background bas 7asafa matathbi6 cuz sgheera anyways keep goin o dont worry about ur lang kelish mafeyha shay o 3o'abal manshoufich etnafseen daily mail o rabe3ha hehehe ;)

Anonymous said...

ماشالله الصفحة الأولى و بالبونط العريض :)

بيت القرين الحلو فيه إنه مركز على شغله .. للأمام :))

LiL ALiEN said...

وبعدين يعني ؟؟

انا اتشمت .. اتطنز .. اتحلطم ولا احد معبرني


على الاقل خل يحطوني بصفحة الوافيات

Warda said...

الصراحه خف طينتج مو طبيعيه من يضيق خلقي فتحت على البلوغ مالج

زوووووووووووغه

المصطلاحات الي تستخدمينها عجيبه و احلى شيء اليكيكي

LOL

:)

Anonymous said...

في مثل قديم ..
يقولج مو كل تلفزيون صافي ..

مبروك وإلى الأمام يا معتقه :)


تعالي صج .. ترى في مطار قطر حاطين 3 صور وحده الأبراج مكتوب عليها كويت الماضي وصورة لدبي مكتوب دبي الحاضر وصورة لمشروع كاتبين عليه قطر المستقبل .. مادري ليش مداحرينه هذيله

Bad-Ran said...

كونغراتيوليشنز

KQ8 said...

جم دافعتله علشان يزرج بالصحفة الاولى

:)

تستاهلين كل خير حفرتي بالصخر لما حققتيلج مكان

بالديسار said...

لكل مجتهد نصيب

وخبر اليوم اكيد ذبح يكيكي وربعه

bydvsj said...

مبروووك وتستاهلين كل خير مدونتج ممتازه بجداره:)

Anonymous said...

لا تغرج الشهره عاد وتموقين علينا

وحلوه رفيج بوش

Anonymous said...

I wish you could focus on this. Very Ironic.
http://lifemood.com/site/index.php?option=com_content&task=view&id=213&Itemid=95

and Surprise!
http://lifemood.com/site/index.php?option=com_content&task=view&id=223&Itemid=95

Anonymous said...

تصدقين ما عندج سالفة
يعنى الحين مدام ما تدرين ان مذيع الجزيرة بس قاعد ويلعلع المحافظة 19

القطريين عندهم الحين مشكلة العظمة وانهم وصلوا مرحلة انهم احسن ناس بالخليج

ودى مرة فعلا ما تصيرين عبيطة
مهاجمتج المتواصلة حق الوطن اتت ثمارها وتبين الشهرة يالله عفية حطوج بالجريدة اللى تتوزع وتنباع لانها احسن جريدة تنشر اخبار السهرات الحمراء والاغتصاب
وسلميلى على فرج

Anonymous said...

لا يكبر راسك علينا, صج قبل لا أنسى....

بدز لك تي شيرت و أبي توقيع

LOoOoOL

Z.

Sowhat said...

بالتوفيق و تستاهلين الطيب كلة

ومدونة رائعة

معني ماحب انه نسوي جبهة هجوم على ناس معينة لانه في النهاية شنفرق عن مستر يكيكي الي اذا تلكم عن ناسا راح يقول ان ان السعدون كان يطير جراغي ويتوقع انه له اتصال بناسا

سالفة قطر معني في حساسياتخاصة تجاه هل البلد وناسة بس ذبحونا بكلام و ما في ولا دليل اعلان شب اليت و اعلان الكويت سابقا والحين سالفة الكعبي لش محد نشر اي صورة و لا فلم عن الاعلانات هذيلة لأني دورت عنهم بالنت و ما لقيت شي

يعطيج العافية والى الأمام

أبو جيج يدور نعاله said...
This comment has been removed by the author.
أبو جيج يدور نعاله said...

ملاحظات سريعة علشان السيارة واقفة و مشغل التكييف

يقولون رئيس تحرير جريدة الوطن عضو بمجلس إدارة شركة الإتصالات...المنافس الوحيد للوطنية

و بالتالى

هل يعقل...يعقل و يصير و يجوز ...أن يقوم مالك جريدة يومية حكومية له مصلحة مباشرة و أحد الملاك الرئيسيين لشركة بحملة إعلانية يقحم فيها الغزو العراقى و علاقات البلد خليجيا لضرب شركة منافسة ...يملك أسهمها الآلاف من الكويتيين؟

نعم القطريين يملكون نسبة كبيرة من اسهم الوطنية...و لكن شنو ذنب الكويتيين إللى عندهم أسهم فيها؟

إن شاء الله يتحركون و يقاضون جريدة الوطن...قطع الأعناق و لا قطع الأرزاق

و لن نتكلم عن الضرر الفادح بعلاقات الكويت خليجيا و اللى قد تحدث بسبب غضب مالك جريدة الوطن من ظهور منافس قوى لهم على الساحة



نتائج الإستبيان ظهرت اليوم و لله الحمد و علقوها على دريشة مكتب الناظر...يقولون نص الكويتيين مستعدين يفخخون موبايلاتهم و يحذفونها على مبنى الوطنية كقنابل يدوية لأن المبنى تحول مركز لحزب البعث...

منو يملك رخصة تشغيل الموبايلات بالبصرة و جنوب العراق؟؟

أكيد قطريين

لا ...أم تى سى جريدة الوطن




أحلى شى إن الوطنية إسم مشتق من الوطن...ما يقدرون يتطنزون على الإس

Anonymous said...

اولا مبروك الشهرة ولو انك مشهورة من قبل ومثل ما قال احد الاخوة مدونتك دمها خفيف وبصراحة كل يوم أول ما اصبّح فيها وللا مايصير يومي عدل فرجاء عدم الانقطاع
ثانيا ارسل لك هذا الرابط اللي يبين الاصرار وعدم التراجع ويعطينا مثل على الثبات على الرأي مادمت مؤمن به

http://news.bbc.co.uk/hi/arabic/world_news/newsid_6965000/6965365.stm


ابوعلي

forzaq8 said...

الكعبى رد على فؤاد الهاشم
http://www.alraialaam.com/28-08-2007/ie5/sports.htm

و الظاهر كالعاده فؤاد مو فاهم شنو صار و لا سمعه و لكن بس يردد

بيت القرين said...

بوفهد
الله يبارك فيكم والفيمتو برمضان قبل الفطور
نحاسة مو؟
:)

مطقوق
طبعا مو دافعين نكاية بالوطن حلوة نكاية

وفتح معاي شنو بلير هذي
:)

بوصالح
دوم عليهم لا تحاتي
:)

زويز
تسلم، ولاحق ع الجرايد الصبح
شتبي فيهم تالي الليل
يعني تنام وانت عارف شالسالفة
:)

مساعد
بتشجيعكم نستمر
خوش شعار مو؟

ليل
خلاص انا ادق ع الوسيط يحطونك
شرايك
:)

ورده
إنتي الزوغه
تسلمين حبيبتي
:)

أنو
في مثل احلى وأقدم
يقول لك
لمبه أم مسمار ما تركب بأبجوره ام برغي
:)

وعلى سالفة الاعلان عندي خبر فيه
بس ما جذبوا
:(
الشكوى لله

بدران
ثانك يو آي ريلي أبريشيات يور سبّورت
:)

كراكاتوا
عادي الوطن يسوون مدونة عنهم
ويحطونها صفحة أولى يعني شعبية
:)
وتسلم

بالديسار
على هالحال وأردى يكيكي وربعه
:)

نور
الله يبارك فيج ويسلمج حبيبتي
:)

حمودي
انت واحد من الناس اللي حتى لو ابي انغر ما انغر عليه
انت متابع قديم ومن قبل الانتشار
:)

أنو
انا متخصصة بجريدة الحرامية
وهذا ماله علاقة مع ان موضوع مهم
بس ان شاء الله اشير له بمواضيع يايه

أنو
رايك وأحترمه
بس على فكرة الكعبي طلع اماراتي ومنزل بيان بالراي اليوم على كلام البيلر
http://www.alraialaam.com/28-08-2007/ie5/sports.htm

وثانيا شعرفك بفرج
:)

أنو
يمكن افضى بعد شهر تقدر تمرني عشان اوقع
:p

سوهات
اجمعين يا رب وتسلم
وصدقت كله كلام عن قطر سوت
بس انا ما شفت شي

بو جيج
المصيبة إن مصورين الاستبيان وكأن الكويت كلها مشاركة فيه

مع إن ليما أمس كانوا اللي مشاركين ما يعدون ال 200
والواحد يقدر يصوت أكثر من مرة
خوش مصداقية

أبو علي
تسلم والله يبارك فيك ومشكور على كلامك الطيب
الرابط ما اشتغل للأسف

فورزا
صار معلوم
:)

mtfa2el said...

مبروك مبروك
عقبال ما نشوف تصريحاتج بالصفحة الأولى
عاد الكعبي معلق زقرت خاصة لما يقول يا سلاام عملوها شعللوها
ولا ذاك يوسف سيف

hasan said...

الحمد الله أنا مرتاح من خدمات الشركة الوطنية ، ولايعه جبدى من خدمات أم تى سى التى تسرق جيوب الناس فى عز النهار .
خليهم ينعقون ليل نهار نفى النهاية لا يصح إلا الصحيح .

Anonymous said...

يا هبله يا دانه

يا خبله يادانه

ولله انا مو قصدي اهينك
او اتلفظ عليلك يا دانه
بس انا حبيت ان اسمي
الاشياء باسمائها

Anonymous said...

قبل لا تكتبين عن المحامى يكيكى أقولك ضحكت على مقالته المنشورة اليوم الأربعاء 30 أغسطس التى يحاول ايهام القراء أنه برىء من تهمة التشهير بموظفي مصفاة الشعيبة ، ولم ينس ترديد اتهام بشار الصايغ وجاسم القامس أنهما كتبا المقال المىء للذات الأميرية بالرغم م براءة النيابة لبشار ، بصراحة هذا المحامى ما أدرى شلون يثقون فيه .

Anonymous said...

هاي

بس حبيت ارد على الكومنت مو اللي فوقي اللي فوقه

اللي يقول يا هبله ويا خبله يا دانه

يا اخي الكريم
دانه لاهذي ولا ذيج دانه دانه عاقله ومومثل ما انت تقول

واذا كان قصدك تنقز وتقول انها تقول

عن البيلر او يكيكي او الزيون بيرق اغبيه فا اهي مايابت شي من عنده لانه هذا الصج والدليل التناقض اللي بجريدتهم وبكتاباتهم
فاا الانسان اللي عنده عقل شوي اذا شاف واحد مايفهم وغبي وصر على غبائه مايصير يقول عنه ذكي وفلته اقول عنه غبي لانه هذا الصج واذا الصج هالايام صار يزعل فاا هذي مصيبه

Anonymous said...

بشار لا زال على ذمة القضية :( بس طلع بضمان شخصي الله يفكه انشالله :(

بالمناسبة عجبني هالفلم:)
http://www.nationalkuwait.com/vb/showthread.php?t=14497

KQ8 said...

السؤال هني بالنسبة للتحديث..يعني الكعبي هل هو جاهل بالسياسية حتى يقول محافظة 19 ام انه علقت بذهنه سالفة المحافظة 19 من يوم كان صغير ايام الغزو ويسمع هالكلام من بغلان حسين واعلامه؟؟؟

وبعدين شكو يقول المحافظة التسعتش...خل يقول العراق بإكمله..صعبة وايد هاذي

ماني مقتنع برده..بصراحه

بيت القرين said...

متفائل
الله يبارك فيك
وأنا ما ادري منو هالمعلقين بس سالفة وكتبتها لاتوهقني

حسن
زين تسوي
:)

أنو
أوكي
:)

أنو
نتصرف وياه لا تحاتي

أنو
أشكرك على الرد
:)

أنو
ما طلع لي الفلم

كراكاتوا
انا ما أعرف بسوالف التعليق
وشنو قال بس الريال معتذر على اللي قاله وبالمباراةالنهائية بعد اللي الكل شافها وهذا اكبر دليل على ان نيته ما كانت شينة
وثانيا وينهم من شهر ونص على قولته؟

Unknown said...

بيت القرين

يبه انتى قاعدة تنفخين بجربة مقضوضة
المشكلة أن هذا نقدر نسميه تداخل حاد بين السياسة والاقتصاد ويعيب واذا حيدنا الموضوع
هناك عادة ما يطلق عليه ميثاق ادبي لم تعلن اى شركة انها تلتزم بالصحافة كلها ولكن الان وبعد العديد الكبير من الصحف يصير من حق الشركة انها تختار مكان النشر اللى تبيه
واتوقع الوطنية حرتهم عددددددل
يوم قامت تحط اعلان صفحتين كاملين فى كل الجرايد
وهذا دليل حرية الاعلان

الوطن اليوم بالصفحة الاولى حاطين خبر عن المحامي حبيبج :) لا يطوفج

Q80 Blogger said...

ماعندي سالفه

بس هذا موقع الكاتل اذا ودج بواحد
http://www.my-onetouch.com/

جاو

بو حامد said...

خطأ مقصود ام غير مقصود

ترى هل سفاره اسرائيل في الخليج ( قطر ) ترضى بان يكون هناك خطأ غير مقصود يمسها ويمس علاقتها بتل ابيب ..

الله يرحم عبدالله السالم said...

هاذي اول مشاركة لي بموقعكم الحلو وحبيت اعلق علي موضوع استقالة الوزيرة معصومة المبارك اللي خذت الدكتوراه تخرجت من الجامعة بمعدل الله بالخير (لو تفتهم كان ماتزوجت مصري)المهم بعد استقالتها وتسلييم الوزارة الى الوزير المحترم المحيلبي وصل لمكتب العلاج بالخارج في لندن بس 50مريض و 40 منهم عازمي
"يعني الظاهر كان ريجهاناشف مع الجماعة ومنشفة ريجهم وقالوا يستجوبونها
لومخلينها وايد احسن"ا"
نفس الموضوع استجواب وزير الداخلية وجابر المبارك "انا ما احبه لانه سوانا خونة "
اللي الظاهر مشالهم اللي بخاطرهم وصاروا عبود عقبها واسكتوا
وانا اجزم مليون بالمية ان كل استجواب وله مصلحة شخصية مو شعبية بهالمجالس اللي بعد التحرير
وواقعنا يقول ان الكويت من سنة تسعين ماتحررت ولا راح تتحرر طالما ان الحرامية معززين مكرمين بينا وينورون العقول الشابة ويشعلون الفتنة بين الأسرة الحاكمة والشيعة والسنة وتحت اسم يدل عالولاء "الوطن"والمشكلة يقولوله طال عمرك وهو مبسوط
شر البلية مايضحك..)