06/06/2008

صالح أقرب + شخصية الإسبوع


قلت من قبل إن في مشكلة

وقلت إن الحقد اللي موجود بين التحالف وغير التحالف من القوى الوطنية الله يستر منه

الكل يتشمت بالثاني والكل يتصيد على الثاني

الكل ما اقصد فيها كل التحالف ولا كل المو تحالف اللي اقصده كل الحاقدين او اللي يبون يتصيدون من الطرفين

وطبعا الطرفين فيهم الزينين وفيهم الشينين لأنهم مو ملائكة

انتقدت جريدة الجريدة المملوكة لعضو التحالف محمد الصقر ويرأس تحريرها خالد هلال عضو المكتب التنفيذي والأمين العام السابق للتحالف

وبنفس الموضوع انتقدت صالح الملا عضو التحالف ايضا وعضو المنبر ومرشح خارج قائمة التحالف بالانتخابات اللي طافت

اللي حصل شنو

ان الناس شافت ان انتقادي لصالح غير منطقي وهذا شي اهما حرّين فيه واحترمه ولو اني اختلفت معاه

لكن المو معقول اني اصنف كعدوة ومحتره واتشفى وانتقم واطلع حرتي بمنو ؟

بصالح الملا؟؟

راح اقسم السالفة حق قسمين القسم الاول اللي يقول اني بنتقم من صالح

والقسم الثاني بشرح وجهة نظري بالانتقاد

صالح محمد الملا كشخصية وطنية يعتبر من اقربها بين الشباب لآرائي

صالح الملا اهوا الشخصية اللي استقالت من مجلس ادارة النادي العربي لما قرر مجلس الادارة منح العضوية الفخرية لعلي الخليفة

صالح الملا اهوا اللي يطبق اللي انا اطالب فيه بعدم التعاون مع جريدة الوطن

هذا طبعا بالاضافة الى تبنيه الطرح الليبرالي الاقرب لي

على هذا الاساس عمره ما راح يكون صالح الملا عدو بالنسبة لي ولا بتشفّى وبطلع حرّتي فيه

صحيح انا انتقدته لكن الخوف ماكان من انتقادي له لأني أدري يتقبله حتى لو ما عجبه

الخوف من اللي شفته من مهاجمة غير منطقية من بعض المعلقين

الحرية تعني احترام الآخرين حتى لو اختلفنا معاهم

خصوصا لما تكونون عارفين منو الآخرين

انا ماني فؤاد الهاشم أو نبيل الفضل أو نواف الفزيع أو احمد الفهد او خليفة او غيرهم

أنا بيت القرين اللي تعرفونها وتعرفون مواقفها وماكو اي مبرر لهذا الهجوم

وهذا كل خوفي لما كتبت الموضوع

الدفاع من أجل الدفاع

لنفرض الحين ان صالح قال انا غلطان شنو موقفكم

بيطلع محتر من نفسه مثلا؟؟

شوي هدّوا يا ناس

الحين أروح حق الشق الثاني من الموضوع واللي اهوا ليش انا شفت ان صالح غلط بمشاركته بالندوة بيوم المباراة

شوفوا هالصورتين اول




بو فهد رايح حق اللاعبين بالملعب بعز الحر والهوا الوصخ وقاعد معاهم ويضحك ويحفزهم

والصورة الثانية رايح ومتغدي معاهم ويضحك ويعاملهم بأخوية

تقدرون تقولون لي أحمد الفهد بصفته شنو رايح؟؟

أحمد الفهد رئيس المجلس الأولمبي الحالي ورئيس اتحاد القدم الأسبق

المجلس الأولمبي مو من اختصاصاته تصفيات كاس العالم ورئيس اتحاد القدم الأسبق ماله شغل حاليا يعني

ليش أحمد قاعد يروح تهقون

هل هو فعلا حس وطني؟؟

افعال احمد من ايام الوزارة وبعد خروجه تبين ان ماهو الشخص اللي ينطلق من باب حس وطني

ليش قاعد يروح عيل؟
وشنو تأثير روحته لتمرين المنتخب او غدا المنتخب على اللاعبين؟

ليش نتساءل ان وايد ناس يوقفون مع احمد الفهد؟

لانهم يشوفون إهتمامه وحرصه حتى وإن كان شكلي
احنا مشكلتنا ان مفروض نهتم صج ومو بس شكليات احمد الفهد
لكن بالوقت نفسه ما نملك غير الكلام

الكلام والإنتقاد بمحيط واحد وثابت

احنا نفسنا

نسمع نفس الكلام من نفس الشخصيات ونكرره بصيغة او بأخرى

في الوقت اللي احنا نقول يجب ملامسة معاناة اللاعبين

احمد الفهد يروح ويعيش مع اللاعبين

في الوقت اللي نقول ان يجب الارتقاء بالحركة الفنية

احمد الفهد يروح ويسوي جائزة للفنانين ويدعم اعمالهم

ان ملامسة المشاعر تأتي بالافعال لا الاقوال يا ناس

وهذا اللي يحز بالنفس وهذا اللي يخليني انتقد تصرفاتنا

انا اقدر ارد على المليق احمد الفهد الكاتب وغيره لما يكتب عن صالح الملا أو عن غير صالح الملا

لكن شالناتج

خلونا بالاول نقوّم تصرفاتنا

وساعتها بتشوفون شلون ارد واسكت كل واحد يتجرأ علينا

وهذا الشي مو صعب علي مو من شطارتي من سهولتهم مو أكثر

نبي نكون صوت الرأي العام فعلا

لازم نكون ونعيش مع هالرأي العام بالفعل مو بالكلام

الكلام ما يعبر دايما عن الافعال

بس الافعال دوم تعبر وتقول

هذا سر انتقادي

احترم عدم اقتناع وايد ناس برايي لكن لا تتهموني باللي مو فيني

ترى والله اذا ابي انتقم راح اقول ما استحي منكم

مدونتي وكيفي اعبر عن رايي فيها

صدقوني لا اخاف ولا استحي منكم

شخصية الإسبوع

طلبت من ام صدّه يحددون شخصية الإسبوع لكن حقروني وصار لهم 9 ايام مو منزلين شي يديد

مادري عسى ما شر

لكن اليوم طلع موضوع من استاذ كبير بجريدة القبس يستحق ان يكون اهوا شخصية الاسبوع على موضوعه اللي فيه مقارنة بسيطة وراقية على احوالنا بالكويت

الاستاذ عدنان قاقون الف شكر لك على الموضوع الراقي

وإن شاء الله من يوم الأحد راح تكون مواضيعي يومية بس طبعا مواضيع صغيرة ماهي بحجم المواضيع السابقة



23 comments:

Anonymous said...

Wejaht nathar saleema o moqni3a o ana ayadiich :)

allah ya36eech el 3afya :)

Bad-Ran said...

وضحت النقطة ، بس هم ليلحين مو مقتنع بأن اللي سواه صالح غلط :)

...

بو فهد قص الجدايل ؟

lwatan-ajmal said...

انا مع الأنتقاد سواء حق صالح الملا اوغيره من المنبر او التحالف بس مشكلتنا لازم نتقبل الأنتقاد بصدر رحب احنا كلنا خط وطني نحب الديره ومو راضيين عن نواب التأزيم صح ولا لا؟؟
خل نكون ايد وحده نتحد وخل ننتقد صح ونتقبل الأنتقاد بموضوعيه الكويت راح تظل الكويت , طول ما نسمع اغنيه بوعلي

Mok said...

انتقدي على راحتج

:)

بس لا تدخلين في الامور التنظيمية اللي مالها علاقه بشأن العام

:)

Mohammad Al-Yousifi said...

لا تحاولين دانة

رجاء لا تحاولين

Y.M said...

احمد الفهد مجابلهم بصفته الرئيس الفخري لاتحاد القدم :)


يا جماعه وسعو بالكم وكبرو عقولكم ننتقد نعاتب بعض مو مشكله بس لا نتفرق ونهاجم بعض :)

والله يوفقكم :)

Anonymous said...

هههههههههههه

رقعي عدل

ما يهزك ريج يا بوصلووووووح

Anonymous said...

لا يعني لا
;p

Catalina said...

ماعندي تعليق على انتقادج بس عندي تعليق على المقالة.. اعجبتني لما قريتها و سألت نفسي هل تناسينا الجوهر وأصبحت القشور أولويات في مجتمعنا؟

I like your blog, keep up the good work.

Anonymous said...

عزيزتي أحمد الفهد هو حالياً الرئيس الفخري لإتحاد كرة القدم.

Anonymous said...

حبيبتي .... صالح يوم استقال من النادي حط اخوه ...و بو فهد رئيس الاتحاد الفخري لكره القدم ...

Anonymous said...

حاولي يا دانة

رجاء حاولي مرة أخرى

دا أنتي واخده في نفسك ألم

Unknown said...

ضربتين بالراس توجع فما بالكم باكثر
سواء من الملا او الشايع او الراشد او
الامين العام الي ما صوت والبقيه تأتي

انا من وجهه نظري انه التنظيمات
السياسيه مجرد تكسب
لو تسيريين على المدونه تلقين هل شئ مكتوب :)

ثاني شي مهما كان كرهنا لشخص سواء احمد الفهد او على الخليفه او اي اسم يكون

وبما انج كتبتي عن احمد الفهد بيكون كلامي محدد

احمد الفهد رغم اختلافي مع افعاله وانتقادي لعمله السياسي
فما فعله مع اللاعبين ارفع له قبعه احترام

كلنا نعرف ان احمد الفهد انسان يتقن فن الحديث ورجل يعطي الروح المعنويه للاعبين وهذا الشئ لم يأتي من فراغ فقد توارثه من ابوه

وليش ما ناخذ الي سواه بحسن نيه ويمكن بكلامه يحرك شئ باليهال يحسسهم انهم قاعد يلعبون لرفع اسم دوله مو يرفعون اسم دوانيتهم بدوره برمضان

انا لا ادافع عن احمد الفهد ولكن فسرت ما فعله بحسن نيه

واخيرا سؤال لج يا دانه لو كان الشخص الي رايح التمرين والغدا الدكتور احمد الخطيب او مشاري العنجري
شنو بيكون تعليقج ؟؟

Hamad Alderbas said...

انتقدني الجميع كما تريدين

بالعكس هذا الامر مطلوب وخصوصا في هذه المرحلة

هذا ما تعودنا عليه وهذا اهو خطنا كلنا

التحالف والمنبر ونوابهم واعلامهم وكل شي قابل للانتقاد

بيت القرين said...

نوخذانا
مشكور

بدران
لا ما قصهم بعد

لوطن اجمل
فعلا الوطن اجمل مع عقليتك

موك
ما تدخلت

مطقوق
لا الله يخليك خل احاول عن النحاسه
سيف الندم ذبحني
:)

واي ام
اي والله سمعوه

انو
عندك رغوه؟؟

حمودي
امرنا لله
اقرا بعض الكومنتات وشوف

كاتالينا
من زمان
:)

أنو
انزين ولما يسوي جائزة للتلفزيون هل حضرته تلفزيون فخري بعد؟؟
والرئاسة الفخرية لا تعطيه اي صفة اعتبارية

انو
مو صحيح ما حط اخوه وعطني دليلك وييب اسامي اعضاء مجلس الادارات وشوف
اما على احمد الفهد اقرى ردي على اللي قبلك

أنو
انتي واخذه بنفسك مألب مش ألم يابني مالهاش معنى أبدا
ما تعرفش تتكلم مصري تكلم باللي تعرفوا

كويت الدستور
انا ما قلت ان اللي سواه احمد الفهد غلط انا اقول ان للاسف ربعنا واللي اعتقد ان يطالبون بالخط الوطني الصحيح مو قاعد يسوون هالشي مو اكثر

حمد
الله يا زينك

usef said...

ya36eech el-3afya khosh 7achey.

Anonymous said...

اذا الفخريه مالها اي صفه اعتباريه عيل استقاله صالح من النادي مالها معنى

ماكو أمل said...

http://makoamal.blogspot.com/

nEo said...

نقاهة كانت طويلة شوي

ما حقرت رديت بالموضوع اللي طاف

و جديدنا قريب
:)

Anonymous said...

أحترم وجهة نظرك فى الصحافى عدنان قانون ولكن أتمنى ان تتأكدى من طبيعة العلاقه الماديه والمعنويه التى تربطه بالشيوخ أحمد الفهد ومحمد العبدالله ومدى أختراقهما للقبس من خلاله

Arfana said...

البوست اللي فات عجبني موضوع التأليه بس ما تحمست لموضوع المباراة

ألحين فهمت قصدك... وصح لازم يكون في دعم من اللجنة كلها مو بس صالح

أما أحمد الفهد.. فيعرف يسوي كل اللي ربعنا ما يسوونه....للأسف

فتى الجبل said...

صالح حط ايده بايد التحالف لأن الافكار وحدة
عيل ليش احنا نختلف...مادري؟

أبــو بنــــدر said...

كنت منتظر تقولين ليش أحمد الفهد يسوق سيارة صاحب السمو بعد ؟

ما خلصنا من احمد الفهد وطلابت احمد الفهد ؟

والله جد صجيتونا باحمد الفهد