16/06/2008

هذا المخلوق يعيش بيننا؟؟؟؟


مشكلتنا بالكويت إن في صراع بين طرفين أساسيين

خنسميهم س و ص

كل طرف يعتقد ان البلد لازم يمشي على طريقة معينة

طبعا مو معناته ماكو اطراف غير هالطرفين لكن اهما الطرفين الابرز

المهم

شنو المشكلة

المشكلة ان الطرف س يعتقد بأن اذا ما مشى رايه او تمت معارضة رايه معناته ان الطرف ص كافر ويجب تطبيق الحد عليه

في حين ان الطرف ص يحترم الآراء حتى لو ما عجبته لكن عمره ما طالب بإلغائها

اي نعم ممكن ان الطرف ص احيانا يبالغ بردة الفعل

ممكن يوزع لقب الفساد الوطني على وايد ناس واحيانا لأسباب تافهة

لكن عمره ما يطالب بإلغاء الآخر

مشكلة الطرف س شنو

ان الطرف س يحاول الاستحواذ على العقول من خلال الدين والشريعة

وطبعا لأن الناس كلها تتمنى الزين وطبعا الزين المطلق يعني الجنة

فهذا اللي يخليهم دائما يتجهون الى الدين

مشكلتنا شنو عاد

مشكلتنا اهوا المفهوم اللي ترسخ بأذهان وايد ناس ان اللحية تعني الدين

وان كل ملتحي يعني يخاف ربه

وهذا المفهوم الغبي والغبي جدا بعد مدخّل الديرة بدوامة مالها آخر

يعني تخيلوا واحد بلحيته وبصوته الحلو يقدر يحدد مصيري ومصيركم ونظرة الناس لي ولكم

فعندي حل من اثنين

اما اني احاول اكشفه وهذا معناته ان راح يوصفني بالكفر والزندقة

او اني اهادنه وامشي يا معاه يا وراه

وهذي المشكلة

لما يوصفني بالكفر معناته اني اكسب نفسي لكن اخسر ناس وايد ما راح تسمعني خوفا من انهم يتجهون الى جهنم بدال الجنة

ويتبعونه ويحققون اهواءه في سبيل الجنة

لكن ما يحصلون من الجنة بالنهاية الا الاسم لانهم ما استخدموا النعمة اللي فضل الله الانسان فيها على الحيوان

اللي اهيا العقل

فساروا بغير هدى وراء اقرب لحية واجهتهم

اذا نحن امام صراع بين الطرف س اللي يكفر الناس عشان يفوز

والطرف ص اللي اقصى ما يوصل له الفساد الوطني

وطبعا لما نقول عن واحد فاسد وطنيا

غير ان نقول عن واحد كافر وملحد وغيرها

والدليل عندنا مثلا خليف وابوه وبلبل وغيرهم فاسدين وطنيا

لكن عادي وايد ناس يسمعون لهم ويتابعونهم

في حين ان اللحايا يوصفون احمد الصراف بالالحاد ابيه ينزل وييب اصوات عايلته بس مو اكثر

مو لأن أحمد ما يقدر يقدم للبلد لا

لكن خلاص تم الختم عليه انه لا يوافق هواهم

مثال صارخ على نوعيات الطرف س

اهوا المخلوق هذا


يعني هالموضوع اللي مصورته لكم يكفي ان يبين تناقض وازدواجية ما يطرحه هذا المخلوق

لو بس عندنا عقل

المخلوق هذا يوصف الناس المطالبين بالتعليم المشترك واشتراك الجنسين بالرذيلة

ويرأس ويشرف على نادي فتيات!!؟؟

يا إن باجي الذكور بالنسبة له غير محصنين واهوا محصن يا إن ما ندري وين الله قاطنا اللي نتبع مثل هالمخلوقات

شوفوا امس مثلا شيقول

الفريق الأول يأمر الناس «بالمعروف» ويحثهم عليه ويرغبهم فيه، وينهاهم عن «المنكر» ويحذرهم منه ويرهبهم من عاقبته، والفريق الثاني يأمر الناس «بالمنكر» ويشجعهم عليه، وينهاهم عن «المعروف» ويخوفهم منه

قسّم المجتمع وخلص فريق معروف وفريق منكر وطبعا ما اكتفى

فالمسألة باختصار شديد هي «ايمان» و«نفاق»!! مؤمنون بالله يعبدونه ويتبعون شرعه ولهذا فهم يعتقدون ان «المعروف» كل ما أمر الله به، و«المنكر» كل ما نهى الله عنه، فهم والله خير الناس وخير الأمم

فريق يؤمن بالله ويعبده الفريق الثاني شتهقون؟

أما الفريق الاخر والذي يدعو الى الرذيلة، ويحارب الفضيلة، يذم الستر والحجاب ويشجع التبرج والسفور، يبغض بعض أحكام الشريعة التي تخالف هواه، يشجع على الوقوع بالذنوب والمعاصي ويدعو لانتشارها، فهؤلاء هم «المنافقون» الذي قال الله فيهم: (والمنافقون والمنافقات بعضهم من بعض يأمرون بالمنكر وينهون عن المعروف...) فهم يصلون أمام الناس «رياء» وسمعة، ويتصدقون لكن ليس لله، يذكرون الله قليلا بلسانهم ولكنهم يكفرون بدينه وبشريعته وحكمه، هؤلاء الذين قال الله فيهم: (إن المنافقين في الدرك الاسفل من النار

وصف الفريق الثاني بالمنافقين وقطهم بجهنم وخلص

خنشوف انزين منو هذيله

لماذا يصرخ «المنافقون» عندنا عندما علموا أن لجنة «الظواهر السلبية» ستحارب شقق الدعارة وأوكار الرذيلة، وسوف تشدد على وزارة الداخلية لمنعها للخمور؟! هل لأنهم يخافون على لياليهم الحمراء وسهراتهم الماجنة؟

انا احارب اللجنة الدخيلة
معناته على تصنيف هالمخلوق ان عندي بطول خمر وليالي حمراء

هذا هو الواقع باختصار، فئة تدافع عن دين الله وأخرى تصرح وتحذر الناس من دين الله

خلصنا بعد عطانا الواقع ونستسلم له شنسوي بعد

صرنا نحذر الناس من دين الله

بعد كل هالصفات وشلون ان اللي يرفض هاللجنة ما يبي شرع الله وما تؤمن به وهالكلام

كفّر أحد شبابنا الأبطال عالسريع وخلّص

النائب «صالح الملا» يريد أن يصبح بطلا لكن نريد أن نقول له أن البطولة لا تكون على حساب الاخلاق والفضيلة، يا نائب يا محترم يا من اتهمت مناهجنا الاسلامية بأنها تجعل الابن يكفر أمه لأنها غير محجبة!!... اشتغل فيما ينفع البلد ودع عنك هذا الصراخ ضد «لجنة الظواهر السلبية» وابحث عن أمور تنموية تنفع المجتمع، وياليتك تهتم بمعاناة المواطن البسيط بدل التحدث عن الأخلاق

الحين ممكن افهم اذا الناس نفرت من صالح بسبة خوفهم من جهنم واتباع جهنم منو اللي يتحمل المسؤولية؟

صالح هذا تكفير صريح لك مباشرة لا تسكت وكلنا معاك

يختم المخلوق ويقول

ان المراكز الصيفية بحمد الله تمتلئ لأن الناس يعرفون اثرها على أبنائهم، أما أعداؤها فنقول لهم «موتوا بغيظكم» فمراقصكم وملاهيكم باتت خاوية

طبعا ردا على جريدة الجريدة وموضوعهم حول خطورة بعض المراكز الصيفية وتفريخها للارهاب

اللي يخاف من تفريخ الارهاب لازم يكون عنده ملهى ومرقص

يعني بنهاية كلامه طلع عندي بطول خمر وعندي مرقص لأني اعارضه

دام جذيه احد عنده رقم دينا؟

موسم الصيف بلّش

:)

وين الاعلام عن هالاشكال اللي ما خلت مسلم معارض لها الكل كافر

الا من يسايرها

الله يستر من هالمخلوق واشكاله

19 comments:

alhajraf said...

السلام عليكم
الاجابه علي هؤلاء اجابه بسيطه جدا
ان الفقه الوهابي وفقه الاخوان لا يناسبني ولا يناسب اهل الكويت
لدينا فقه ولسنا بحاجه الي استيراد افكار خارجيه
لدينا مراجع ولدينا تاريخ
اسلامي كلنا نفتخر فيه وفقه خاص فينا
وشكرا

kila ma6goog said...

اللي اختشوا ماتوا

Q8yUK said...

الشي المؤسف لما يكونون ابناء الفئة س يسولفون بكل شي ويفهمون بكل شي

يعني من داعية اسلامي إلى كاتب صحفي

إلى ناقد لمجلس الأمة

إلى رئيس لنادي صيفي للفتيات !!

اسمح لي بس وايد مو داشه عقلي

ما انكر اني احترمك كشخص واحب اني اسمعك بس مو جذي !!


وبوست جميل جدا

الظاهر اني قاعده لهم من قلب

شنو باجازة :P

أنا كويتي said...

اللي يربي لحية و يلبس شماغ بدون عقال ويكفر خلق الله علشان يبين للعالم إنه الوحيد المؤمن, هو المنافق بعينه. وإذا يدعي إن اللي يعارض لجنته يلكه و مطيح بالمراقص, أقول له يا دجال, هذا يسمونه قذف. واللي يحاسب هو الله, مو حضرتك أو لجنتك.
وبدل لا يتهم خلق الله, خل يشوف الأشكال اللي حواليه. من طقة الهاشم فؤاد مجنون دينا. لكن مقيوله.. الروس نامت والعصاعص قامت

lwatan-ajmal said...

والله لو ييت على المخلوق هذا جان تهون بس وايد سنافر عندنا وخل الناس يصحوون شوي لا الغير محجبه كافره ولا المنقبه مؤمنه يا ناس بس شنقول بزمن الظواهر الخارجيه اصبحت لها معنى وقيم وانا اقصد بصريح العباره تطويل اللحايا وبس

al-nokhitha said...

entay wayed embalqa eb kalamich
3an ( seen ) shofay ana 3endi nas men rab3ii el graab 7ail men el salaf o el e5wan o a3tiiqid ehma el jema3a ele samaiitehum ( seen ) ehma ma ekafroon o 7aiil eb3ad 3an el takfeer fe majmoom3a ba9ee6a bel kuwait nesaiit shenu esiimhum ehma el takferyeen lakin el salaf o el e5wan ma ekafroon o tara nabeel el
3awathii laaa salafi o mo
e5wanchii o ehwa 3alaih
mola7athat men el majmoo3tain
le2ana emeel lel takfeer :)


ana mo ba6 chabdi ela hatha ele esma nabeel el 3awathii ehwa law
9ej
e5aaf raba chan ma 5ash jenseeta el a9liiya o gal ana bedoon jansooni ma5iith 7ag qaiira lekuwaityeen ( el a9liiyen ) bel bait wel ratiib o egool e5af raba ya6liib jensiiyat el dawla o lama yetjanas ekafiir ahalha o ehwa nooba shaii5 deen o nooba seyasii o nooba katiib ma
3arafnalana !!

Ya Nabeeel Tara lekuwait men gabil la tesma3 feeha derat eslam o ahalha ahal deen fa raja2an la teg3ad etkafiir ahalha :)


ma3a kamiil e7iirami
7ag el 3awathiiya el a9lyeen :)

ela 9ej etha etmonen 3ala nabeel goolela ma yabii moshrfeen 7ag el nadii mala ?


Ana ma3zoom 3ala 7aflat dena ? ;p


allah ya36eech el 3afya :)

Q8aLDesTor said...

يعطيج العافيه
لم توفقي بهذا المقال :)

حياتي هدف مو عبث said...

تعرفين يعني شنو مشرف عام ؟؟؟


يعني في أحد غيرة ..؟؟

وهم من أهله اللي يشرفون على الناادي

مو اهوا اللي يدش عندهم ويشرف عليهم شخصيا

اهوا مؤسس الفكرة ولكن في غيرة يتابع


..

أستغفر الله .. يعني ما عندكم شغل إلا نبيل


:)))

AyyA said...

two thumbs up :)

ساحبة سايد said...

شهل كلام يعني علبالهم الناس كلها بتخاف من الله والعذاب ؟

دايماً جذي كلامهم.. والاتهامات عندهم جاهزة

وصالح الملا ما راح تكون رده فعله إلا إيجابيه أكثر بعد هل كلام من معشوق المغفلين

By the way

نبيل العوضي يذكرني بسالفه.. من جم سنه يمكن عمري ما كان يتعدى الـ15 كان في وحده تحذرني من متابعة المباريات بحجه إن هم المرا لما تشوف الريال ما يجوز وهل شي يؤدي إلي مفاسد..
ووضع صورة باتي ببوكي مفسدة..
وكلام أستحي أقوله!!!

طبعاً أنا الكلام وقتها غريب علي.. وطنشته لأني كنت ولازلت أؤمن أن للناس عقليات مختلفة.. وينتج عنها اراء مختلفة.. وما أطعن بالنية
وكنت وقتها مو وايد أسأل نفسي إهم ليش قالوا ويقولون جذي؟
على نياتي..

بعد فترة عرفت إن هل بنت من شده إعجابها بنبيل كانت لما تتابع حلقاته بالتلفزيون تحاول قد ما تقدر تغطي الشاشة بقطعة خام!!!
علشان ما تنفتن!!!

الحين أنا بعرف منو إلي تفكيره شاذ ومنحرف؟

عالأقل أنا أتابع إعجاباً باللعب:) وحباً بالرياضة

***

وصالح متعود أكيد من بدايه شبابه على هل إتهامات

وأصلاً عندنا حصانه منها

بس إلي صج يحز بالخاطر لما أقرب الناس لنا يردد هل إتهامات السافل عنا من غير تفكير.. وإذا فكروا بما أنهم قريبين منا وعارفينا.. راح تحوشهم شويه جلطه بالمخ..
من
بركات من يمشون ويقطون خلق الله بجهنم !

حمودي said...

اجمل بوست حق بيت القرين من عقب دموعي تهطل
;p
----------
الي يحر ان الناس مريحه مخها وتقول دام ان هذا زين ومربي لحيه ويسمي ويسبح على الطالعه والنازله خلاص خل نطيعه
مو هني المشكله معيشين الناس بهاجس انهم اذا ماطاعوهم ياويلهم من عذاب القبر والبرزخ وجهنم وبئس المصير

متفائلون said...

الله يعطيكم العافية
بس ترى الشيخ نبيل العوضي هو فقط مشرف على النشاط ، ماله شغل بالبنات و لا بالاختلاط !! اتمنى منكم تفهمون طبيعة النشاط قبل لا تتكلمون و تشهرون بالريال بهالحجي . اتقوا الله . طبيعة النشاط مختلف تماما عن اللي تدعونه

Bad-Ran said...

ارد و اقول الشرهه مو عليه ، الشرهه على الأغبياء اللي يسمعونه

nEo said...

اللهم آمين

dektara said...

شفو إلغاء الاخر بهذه المقالات ياعني يا معنا آو إنتو متلبرلين(ماني فاهم شنو هل كلمه)آو إنتو علمانيون..زنادقه!!! أنا ماني ليبرالي و لاني علماني أنا كويتي و توجهي أزرق ... هل كيف أكون زنديق إن وقفت مع الحريات!!!!!!

http://www.alwatan.com.kw/Default.aspx?MgDid=640862&pageId=163

ومن أنتم حتى ترفضوا اللجنة أو تقبلوها؟
(نحن الامه مصدر السلطات جميعا يا نائب يا محترم

http://www.alwatan.com.kw/Default.aspx?MgDid=640846&pageId=163

Bo Jaij said...

الغباء قد يكون داء منتشر بالبلد ..الله يشافينا كلبونا


هناك من يطمع بالسيطرة عن طريق الدينار و هناك من يتخذ من طول اللحية و شكل الغترة وسيلة للوصول لمكاسب مادية بحتة

هل كل صاحب لحية طويلة وإسلوب خطابى بالحديث ملاك و بقية البشر كفار ؟


هذا الهراء ظاهرة دخيلة على مجتمعنا و الأخ نبيل لا يلبس حتى اللباس الكويتى الوطنى المعروف...فهو دخيل شكلا و دخيل بأفكاره...و دخيل بتناقضاته...فهو (يحن) على التسمك بالأخلاق و الفضائل و بنفس الوقت يبث برنامجه و يستلم راتب من قناة تلفزيونية تعرض كليبات الأغانى و الحفلات الراقصة و المسلسلات الفاسدة و الأفلام الأجنبية الكافرة و دون تقطيع


معلش ..بس إلعب غيرها

و بس كافى...خرابيط دخيلة

Don Juan said...

يعني انا عندي بطول و رقاصات و مواخير و أشم كوكايين و أدخن حشيش و و و و و

أنا لو عندي كل هالاشياء ليش اقرب صوب السياسة خل تولي بعد انا شكو ان حطو لجنة ظواهر عبيطة ولا ما حطو ;p

بس من الواضح انه الشيخ عنده شوية مشاكل و اضطرابات معوية فلذلك أوجهله هالنصيحة ببلاااااش

روق المنقا يا شييييييخ ;p

secret said...

كلنا نقول الشرهة على اللي يسمع كلامه

واللي يسمعون كلامه قاعدين يزيدون و يزيدون .. العيب بالوعي

اوكي عرفنا

لكن شنو الحل؟؟

Ku8 said...

انتي انسانه فاضيه وماعندج شغل

ماعندج الا تهاجمين المطاوعه

وصحيح كلام العميري

الليبراليين فاسدين ويحاربون الدين

انا لو بيدي اسوي مثل هتلر محرقه حق الليبراليه كلهم

ونفتك من فسادهم

محد بيخرب الكويت الا انتو

ماتستانسون الا لما ينتشر الفساد بالكويت

انا لاني مطوع ولا شي بس انا ماابي اشوف الكويت تصير مثل بعض الدول الي انترست ملاهي وخمور ودعاره
مانبي الدولة المدنيه الي تسعون لها

نبي دولة اسلاميه

والله يحفظ الكويت من اشكالكم