09/06/2008

بين هايف وعجب


طبعا أحمد عجب شخصية الإسبوع طبعا بدون لا أنطر ليما يوم اليمعة

طبعا منتخب الكويت برجاله امس نجوم الاسبوع

طبعا ويهي خير على الفريق ما شاء الله علي طبعا

كل هذا خلوه على صوب خنشوف شالسالفة



وين اللي كانوا يقولون ان اللجنة الدخيلة همها الوقاية من المخدرات والتشبه بالجنس الآخر؟؟؟

هايف مناشب البلاي ستيشن

تذكرون لعبة البطريق مالت الاتاري

كان في حفرة باللعبة اللي ينزلها يقدر يلعب قمار بو مكاين هذا اللي لازم الصور تطلع نفس الشي

اشوه ماكانوا هالاشكال بيننا بذاك الوقت جان ليما الحين على المونوبولي

لا هم مونوبولي يعني احتكار وما يجوز بعد

جان عندنا لعبة اسمها مرابحة الحين

لا وبدون صندوق جماعة وفرصة عشان لا يصير يانصيب

يعني ابد ماكو ذرة حيا

هذي اولويات؟؟ مجتمعين ومصرحين عليها

مرة قالوا قاطعوا كوكا كولا لأن اسمهم مكتوب بطريقة لا محمد لا مكه

ومره يقولون بوكيمون كفار لان اساميهم يهودية وما يصير

لا ولأنهم يقدمون نظرية التطور وهذا كفر

على طاري اساميهم يهودية ليش ما تحرمون اسم عيسى بعد

ميانين وتسوونها

ومرة فنيلة مادري اي نادي عليها اسم شركة خمر وما يصير تدش الكويت

ما اقول الا كانت مدينتنا ذهب ومن يوم ما حكم الغريب غير موازين البشر

تعليق
لولاّدة عند أم صده شدني جدا

هذا جزء منه

جئنا إلى هذه البقعة الصحراوية نبحث عن الحرية وثقافة اللون الأزرق

اي والله يا
ولاده كلام سليم ولن يقتلوا اللون الازرق فينا

لن نرضى بغير الحرية

لن نرضى بهؤلاء الدخلاء على حرية وامن وثقافة وعقلية الكويت الحرة الابية

ولن يطول ظلامكم ابدا

المليق الظاهر يستانس ان كل يوم ينضحك عليه

والظاهر بعد ما طراق الانتخابات أدّب يكيكي وخلاه
يمدح المليفي مرة وحده

بيتألق المليق هالمرة

يقول شدعوة اعتذار صالح الملا عن تسلم سيارة المجلس لأن ما يبي الهدر بالاموال العامة يفرق شي

لما ربعك من اللجان الخيرية يقولون تبرع حتى لو ب 100 فلس

ليش ما تتكلم بنفس المنطق ان شبتسوي ال 100 فلس
لان 100 على 100 تشكل ثروة


ولأن صالح الملا يحاول يسن عادة يديدة ان من يملك ومقتدر ومو بحاجه لسيارة المجلس ماله داعي يهدر اموال الدولة واليوم بداها صالح

وبعدها ما يندرى يمكن تمتد

برافو صالح هاردلك كالعاده يالمليق

تسربت الينا أنباء «خاصة جداً» ومن ملف كتب عليه «سري للغاية» موجود لدى المخابرات البريطانية

يا جماعة
هذا فؤاد الهاشم شوفوا له حل

مسكين استخف كل معلومات العالم عنده

اي صج دامك واصل ليش ما يعطونك فيتو بمجلس الامن

ولا اقول لك ليش ما تقول لنا وين عزت الدوري؟؟





هايف يبي يفرق بين الشيعة والسنة

عجب ويسامحني الا نبيذي بقلده بهالجملة

ياب الاهداف امس من صناعة علي مقصيد الشيعي ومحمد جراغ الشيعي

هايف وشلته يبون يقتلون الفرح في بلدي

وعجب وربعه يقولون الفرح دين برقابنا لكم يا اهل الكويت



هايف يدز مسج وقت نشيد وعلم الدولة وربعه يرقعون له

عجب وربعه يرددون نشيد الوطن بحماس يخلي الجسم يقشعر

هايف يفوز بجريمة ضد بلده

عجب يعفس اللي يبي يتغلب على ديرته

هايف ياخذ معاش الدولة وسيارة من الدولة وتلفون من الدولة وبيت من الدولة

وكل همّه يفرق أهل الدولة

وعجب لا الدولة موفرتله ملعب بسبة هايف واشكاله من النواب والوزرا

ولا معاش نفس الناس بسبة هايف واشكاله من النواب والوزرا

ولا استقرار نفسي يتيح له مجال الابداع بسبة هايف واشكاله من النواب والوزرا

ومع كل هذا ما يهمه الا اسم وسمعة الدولة

هذا هايف وهذا عجب

من فيهم يمثل الكويت يا ترى؟

18 comments:

Secular said...

بالأول كان عندي شوية أمل بأن الديره تتعدل، لكن اتضح لي مما لا يدع مجال للشك بأن الديره عمرها ما راح تتعدل، دام فيها ناس يصوتون حق عوير والزوير
ومبدأ الانتخابات صاير فيها على أساس الفزعة

للأسف الفكر ما راح يتغير بالنسبه للناس، دام في قيود فرضها علينا الأموات وسجنونها فيها إحنا الأحياء ... طبعا أقصد بهالكلام بما يسمى بالعادات والتقاليد والثوابت

كأني بصير من أنصار الحل غير الدستوري!!!!

نعم.. لقد كفرت بالديمقراطية كما كفرت بكل خيال سُمي ديانة سماوية

بعد نظر said...

ماقووول غير
عجب يا عجب

SECRET said...

اللجنة؟ ما عندهم شغل

على قولة اخواننا المصريين

الفاضي يعمل قاضي

يقصدون الفاضي عمل ... فما بالكم الفاضي مخ

المونوبولي لوووول والله ضحكتيني .. يعني ماراح يكون فيه صندوق الجماعة ولا فرصــة .. بيكون فيه تورق .. مرابحة و وكالة بالاستثمار

سؤال .. بدال مايفير شبيحطون؟

ابي منو الفاضي اللي قاعد يقلب بعلبة الكوكاكولا و مادري شيفكر فيه ؟؟

مع الاسف .. عجب يمثل الرياضة الكويتية اللي ما تعني لهايف شي و هايف يمثل المجلس الي يعني لكل الكويتيين شي

مريم الموعذراء said...

هايف شنو يبينا نسوي بالله ؟ اذا الانذار مو كافي خل يخلينه نهده عليهم ونقوله سوووو

Fair.chair said...

العجب كل العجب ان هناك اكثر من 7000 اثول

صوت حق الهايف

الغريبه ان هناك ناس تعتبر هذا الرجل خير من يمثلها في المجلس ؟؟

Fahad Al Askr said...

روعة

بالذمة عقب هالبوست

شنو أكتب

كل شي حلو بخاطري أكتبه، لقيته هني

عوافي

تحياتي

al-nokhitha said...

khalas el dera ra7at al7een ahal lekuwait malhum shay el dera
al7een mo 7ag ahalha yaw kuwaityeen el 70's o el 80's
o ehdiimaw el dera o kela eb sebat rabi3na kel men ya7siid el thanii kel men 7a6 dooba doub el thanii o ehma gamaw ye6li3oon 9ej lai galaw el roos namat o el
3a9a3ii9 gamat !

Allah ya36eech el 3afya :)

Mok said...

بوستج حلو

خليج على هالمواضيع لانه الوضع الحين مو وصع بلبل ويكيكي

الناس قاعده تتمدى بسرقة الحريات الناس

استمري

شاطره
:)

bunaz said...

متألقة كالعادة

Anonymous said...

اخذفي التعليق الاول ل سكييولار

lwatan-ajmal said...

مقاله حلوه يا بيت القرين وصح لسانج اللي يحب الديره ويبي يرفع اسمها فوق ويبي يرسم البسمه للكويتيين اهم صاروا الشواذ والدخلاء وهايف وربعه خوووش صاروا بس ما عليج الزين يبقى والشين يذلف ويروح , وبالنسبه للمليق خليييه يكتب ترا يونس والله ما شاء الله عليه بيبي فيس الحبيب

Anonymous said...

لكل شيء طاحون يطحنه

وطاحونة هايف ........ الحبيب ياسر

: )

Zaydoun said...

يوم كنا صغار أيام عز المنتخب.. كانت وحدة من خالاتي دايماً تقول "والله هذول اللي رافعين راس الكويت أحسن من الوزراء والسفراء اللي كل واحد كرشته شكبرها

:-P

حمودي said...

تسربت الينا أنباء «خاصة جداً» ومن ملف كتب عليه «سري للغاية» موجود لدى المخابرات البريطانية

لوووووووووووول استخف الريال
:)

kila ma6goog said...

3ajab ya 3ajab

nEo said...

بوستك عجب !

فتى الجبل said...

اسم على مسمى فعلا
هايف واهوا هايف بفكره
ما يدري ان اكو شي اسمه داونلود من الانترنت

bo_sale7 said...

للامانة والتاريخ
اول عضو يستغني عن سيارة المجلس هو الدكتور احمد الخطيب