27/06/2008

النتايج + شخصية الاسبوع


our q8
مدونة يديدة زوروها

انزين صج يقولون سعدون حماد وعسكر العنزي شكلهم بيدشون المجلس بدال عبدالله مهدي والوعلان

هذي على ذمة الآن

انزين خنشوف معالي وزير الطاقة المتشقق بالصور شيقول

هل كيف وصلت للاقليمي

يعني هل الدول المحيطه قالت خل تنقطع الكهرباء عنا عشان نسوي حملة مثل ترشيد

ولا اهما بعد قاعد يرشدون

استحوا على ويوهكم شوي

بس شوي ومفروض تفتشلون تقولون ان سوينا حملة بعشر ملايين دينا عشان نوفر كهرباء بديرة نفطها وصل 125 دولار للبرميل

شوية حيا بس مو اكثر

مو قادرين نوفر كهربا حق مليونين واحد بالكويت

والله عيب

احد المدونين دز لي ايميل من فترة يقول

كان راكب مع راعي ونش لأن سيارته كانت مختربة مو موضوعنا سيارته

بس راعي الونش بالطريج قاعد يسولف مع صاحبنا ويقول له

احنا بسوريا نفهم ان عندنا مشكلة كهربا بحكم الظروف الاقتصادية وغيرها

لكن انتوا يالكويتيين شلون عندكم ازمة كهربا؟؟

لا وراعي الونش قدم حل معقول نوعا ما

يقول الحين انارة الشوارع العاده تتكون من 5 لمبات

يقول لو نطفي لمبه وحده من كل شبّه نوفر كهربا وايد وما تتأثر الانارة وايد

بحكم ان اضاءات الشوارع تستهلك طاقة كبيرة بحكم قوتها

يعني راعي الونش عنده حل يوفر على الدولة مثل ما وفرت ترشيد واكثر هذا اذا الحملة فعلا وفرت مو المسؤولية الاجتماعية عند الناس او ظروف السفر

حل راعي الونش يوفر كهربا وبدون عشر ملايين دينار بس عشان يصبغون محولات ويحطون لافتات بكل لغات العالم

بس صج ان لم تستح فإفعل ما شئت

لا وهالموسم الظاهر بتكون عندنا هبّة توفير ماي

يعني من باب التنويع

اما الموضوع الثاني اللي بكتب عنه اليوم اهوا التالي

بيان - مشرف - العديلية - السرة - الجابريه - الخالدية - اليرموك - قرطبه

هذي المناطق تمثل الدائرة الرابعة بتقسيمة المجلس البلدي

ويمكن هالتوزيعة المناطقية للدائرة تعتبر افضل من توزيعة اي دائرة بمجلس الأمة

وقد تصنف هذي الدائرة بأنها تشمل جميع اطياف المجتمع الكويتي بالاضافة الى استنارتها نوعا ما من الجانب الأكاديمي والثقافي نوعا ما قلنا عشان لحد يتصيد كالعادة

بس المشكله شنو

المشكلة بالنتايج

اللي فاز بالدائرة اهوا هشام البغلي

هشام البغلي شيعي المذهب

وطبعا لأن انتخابات البلدي يت بفترة الصيف ونهاية الامتحانات وبعد ارهاق انتخابات مجلس الامة

فهذا اللي خلاها راكده جدا جدا جدا ونسب التصويت قليله فيها

وطبعا اختفت البرامج والندوات عن هالانتخابات

بمعنى آخر ان التصويت غالبا ما كان على اساس فكري او قوائم او غيرهم

المشكله باللي لاحظته من النتايج

شوفوا معاي اللي حاز عالمركز الاول شنو اصواته بمناطق مثل الخالدية وقرطبية واليرموك والعديلية واهيا مناطق ما فيها كثافة شيعية

يايب بس 14 صوت باليرموك
و 10 أصوات بالخالدية
و 37 صوت بقرطبه
و 89 صوت بالعديلية

في حين ان المناطق اللي فيها كثافة شيعية نوعا ما ياب فيها البغلي التالي

يايب 356 صوت في مشرف
و 607 اصوات ببيان
و 800 صوت بالجابريه

اللي ابي اوصل له اهوا التالي

انا ما اعرف ولا مرشح من مرشحين البلدي وشنو خطهم واهدافهم

لكن واضح جدا من ارقام الفايز بالمركز الاول وعضو المجلس البلدي حاليا

ان فاز على اساس طائفي بشكل كبير

مو معناته ان اهوا طائفي لأن مادري عنه شي

لكن معناته ان المذهب السني ما عطاه والمذهب الشيعي ركزوا عليه

يا بختنا بهكذا تفكير

والله يستر
من اللي ياي


شخصية الاسبوع

اللي قريته من مقال عبداللطيف الدعيج المنقول عن جون هنري ميلر عن الكويت اللي شافها بالاربيعينيات والخمسينيات

ليما الحين مأثر فيني

ولذلك فإن جون هنري ميلر اهوا شخصية الاسبوع

واحب اشكيله وأقول له

يا مستر جون لو أنك موجود فيما بيننا اليوم لصفعت نفسك مرات ومرات لتتأكد من أن ما كتبت عنه قبل خمسين عاما لم يعد له وجود للأسف

فكويت الامس التي رأيتها نسفها الكره والفتنة واللصوص
نعم نحن نسعى جاهدين لرسمها كما رأيتها أنت لكن قوى التخلف والفساد تنهش بكويتنا التي رأيتها من كل صوب

نشكر الله انك رحلت قبل ان تراها

ونسأل الله ان نراها نحن مثلما رأيتها

18 comments:

kuwaitawy said...

يستاهل مستر جون ان يكون شخصية الشهر

لأن للحين مئثر فيني انا بعد

al-nokhitha said...

tara etha ma 5ab thani ena laiitat el showarii3 3ala el 6aqa el shamsiya chena mara 3alay hal
ma3looma :)

enshalah lekuwait eb terja3 methil gabil o a7san o e7na ele bensheelha shabab lekuwait :)

khoosh e5teyar 7ag el sha59iiyaa o 3asach 3ala el guwa :)

kila ma6goog said...

سؤال

وين الجداول مالت مجلس الأمة ؟

ليلحين ما اخلصت؟

>>>>>> said...

كذلك اللي أسهم بقلة التصويت في تكميلية البلدي , أن المجلس لم يتبق من عمره إلا سنة واحد إضافة إلى الظروف اللي ذكرتيها طبعا

Anonymous said...

دانة

شفتي صورة العم أحمد السعدون وهو يغادر المستشفى بالسلامه ومعاه المواطن الشيعي بو حمود - عباس

الكويتيين ما يفرقون بين السنه والشيعة
والمواطن البغلي الشيعي هو رئيس جمعية الجابرية ومهندس ويستاهل الفوز

wa6an-alnhar said...

اختيارج للشخصية موفق جدا
:)

اوافقج الراي
فوز هشام البغلي يا على اساس طائفي بحت..و انا شخصيا سمعت من ناس انهم بيصوتون لهشام لانه (شيعي)
!!!

Anonymous said...

wa6an-alnhar

وليش اللي مو معطين البغلي من السنه اهما الطائفيين؟

انا سني و مستعد اعطي صوتي لشيعي اذا كان يستاهل

لا ننسى مساندة الشيعة لجمال الكندري في الرميثية و اشلون طيحوا القلاف

انا شفت شيعه يعطون سنه وايد، خصوصا بالرميثية و الجابرية و بعضهم يشتغلون مفاتيح لهم خصوصا الكندري واللي مو مصدق يسأل جمال الكندري، لكن مره واحده بحياتي شفت سني يعطي شيعي، وكان هالسني ليبرالي

ولا تنسون سالفة المسجات اللي انتشرت بالدائرة الاولى اللي انتشرت بين السنه (خلونا نواجه المد الشيعي)، هالكلام مو طائفي؟ اصلا الكلام كان صدمه بالنسبه للشيعه و حسوا انهم منبوذين، يعني ما الومهم اذا صار عند البعض ردة فعل و خوف، خصوصا مع الهمز واللمز بالمنتديات و غيرها عقب سالفة التأبين انه الشيعه مالهم ولاء للكويت وهذا اتهام خطير جدا و ما يجوز السكوت عنه

ترى انا سني بس اشوف زودناها كل ما صار شي حطينا اللوم على الشيعه، المنتديات الكويتية كلها سب بإخوانا الشيعه و محد من السنه يدخل و يقول حق هالمنتديات الغبيه "بس"

هالمنتديات اللي ما تنادي الشيعة الا بالرافضه كإنه احنا بحرب معاهم ما جنه اهما اخواننا

واللي مو مصدقني انا مستعد اعطيه لنكات المنتديات ويشوف بعينه الطائفيه البشعه منا احنا السنه بعد

Anonymous said...

بوستج هاظا راح يتحول الى بوست طائفي

غطيني يا دانه........ مافيش فايده

Abdul said...

للاسف طرحج و تفكيرج اهو الطائفي،، ليش ما تقولين ان اللي صوتوا للبغلي صوتوله ابحكم انه كان رئيس جمعية الجابرية و أكيد كانت له بصمات واضحة حق سكان الجابرية سنة كانوا ام شيعة علشان جذي اكثر الاصوات اللي حصلها من الجابرية

خنشوف اشلون بترقعينها الحين، هذا اذا كانت عندج الشجاعة و تعترفين انج اخطيتي ابنظريتج،، بس اشك انج راح تعترفين

Abdul said...

Your comment has been saved and will be visible after blog owner approval.

يعني في احتمال قوي انج ما راح اتحطين تعقيبي،، امممممممم

بيت القرين said...

كويتاوي
حده مأثر فيني انا بعد

النوخذه
ممكن بس اذا تقدر تتأكد من سالفة الطاقة الشمسية يكون احسن

مطقوق
ما يعرفون حق الاكسل او ما عندهم مسطره

>>>>>>
هم صح

انو
انا ما قلت ما يستاهل والله يوفقه
انا كل اللي اقوله ليش صار فينا جذيه
ليش ما حصل اصوات من مناطق الكثافة السنية وتركزت اصواته بالمناطق الشيعية
هذا طبعا مو ذنبه عضو البلدي هشام البغلي لكن ذنب عقليات بعض ابناء المجتمع

وطن النهار
صحيح
وفي ناس ما صوتوا له لأنه شيعي
وهذي المصيبة

انو
الغلط من اي واحد من كلا المذهبين اذا صوت له بس لأنه شيعي أو ما صوت له بس لأنه شيعي هذي مصيبتنا
وما نبي نقط اللوم على فريق ضد الثاني مو بمباراة احنا الله يهداكم

انو
ما راح اسمح باي تعليقات طائفية لا تحاتي
واللحف والبطانيات خلصوا من كثر ما نبي نتغطى

عبدول
داش بشرك الله يهداك شرقع وبخاف من شنو بالضبط
انا اللي اقوله اذا ما كنت فاهم ان مصيبة اذا في ناس صوتوا حق هشام بس عشان اهوا شيعي يعني ما يعرفونه ولا يعرفون تاريخه بس يعرفون مذهبه
ومصيبة اذا في ناس ما صوتوا له بس عشان اهوا شيعي
فهمت؟؟

al-nokhitha said...

ana asef el ma3looma '3ala6 :)

tawni ga3ed ma3a mohandiis kahraba o galii la el shabat yeshtaqloon
3ala kahraba o gelt lah el salfa ele entay katbatha bel post chan egooli maku fayda le2ana el thaq6
3endhum bel nahar o bel laiil el kahraba 6abee3iya :)

بوشملان said...

تذكروووون الحملة الشديدة على مشروع ترشيد والتي كان ورائها بنو ليبرال ؟؟

قاموا بالكذب واطلاق التهم والاشاعات كل هذا ليسقطوا مرشح حدس عبدالعزيز الشايجي !!

لكن الله خذلهم



والان



سنرى التناقض الليبرالي على اصوله

الآن حصص الحق

وعرفنا الصادق من الكاذب



شوووووووف



http://m3m3ah.blogspot.com/2008/06/blog-post_28.html

ساحبة سايد said...

أكيد في ناس صوتوله علشانه بس شيعي..

ولكن أصواته الكبيرة بالجابرية بعد تفسيرها المنطقي إن رئيس مجلس إدارة الجمعية..


وكل التوفيق للبغلي..

forzaq8 said...

http://www.alqabas-kw.com/alqabas/Article.aspx?id=408137

أشاد النائب محمد العبد الجادر بإنجازات مشروع «ترشيد»

MFTELET said...

اختيار موفق لشخصيه الشهر ,, عندي راي ودي تتقبلينه بصدر رحب , ليش التهجم هذا على محمدالعليم ؟؟ هل عشان يتبع توجهه الاخوان ,, والا عشان سكت صالح الملا هذاك اليوم وماعرف شنو يرد عليه صالح ؟؟ كل الكلام الي نسمعه كلام فاضي لو كان في دليل واحد على العليم اتمنى انكم تراونه الناس , مايصير نحكم على الناس عن طريق الشك في نواياهم واتمنى اتكون عندج الشجاعه وتجاوبيني على سؤالي .

حمودي said...

انا مو شيعي وصوت حق هشام البغلي
:)

zaradisht said...

للاسف هالوزير قاعد يسوي دعايه حق ربعه بالحركه العدسيه بعد ما خسروا الانتخابات عشان يقولن انهم خوش ناس وقلبهم على الديره وما يمنع دعايه حق روحه
اما الشي الثاني بخصوص راعي الونش الصراحه يفهم اكثر من وزاره الكهربا
اما مقاله بوراكان فكل الكويتيين متأثرين فيها والي قلبهم على الديره وعايشين على امل عوده الكويت دره الخليج