عبادة الأشخاص

الظواهر السلبية والدخيلة

وين رايحين فهمونا

شنو لجنة عادات دخيلة أو بالاصح هيئة أمر بالمعروف بإسم ثاني

منو إنتوا اللي تقيمون هذي عادات دخيلة أو لأ

وبأي حق

بس من باب التذكير والتحذير بعد

قبل سنين يمكن ست أو سبع

إحترقت مدرسة بنات بالسعودية

والطالبات كانوا داخل المدرسة ويايين بيطلعون من المدرسة هروبا من الحريق

اللي حصل إن الهيئة مثل ما يسمونها منعتهم من الخروج لأنهم مو لابسين حجاباتهم

والناتج

وفاة عدد من الطالبات!!!؟؟؟

ستار أكاديمي صار عاده دخيلة

لأن الشعب الكويتي ما يسمع اغاني وعمره ما عرف شي اسمه موسيقى

حفلة خاصه

صارت ممنوعه

مع ان جرايد السبعينيات كانت تزخر بصور مثل هالحفلات

المسرح عاده دخيله

البلوتوث هذا الاختراع اللي يسهل الاتصال عاده دخيله

الانترنت وغيرها وغيرها عاده دخيله

على فكرة السعدون صوت مع اللجنه وغيره وايد

ما رفضوا الا اربعه

الراشد والصقر والملا والعبدالجادر

يا جماعه شقاعد يصير وين بتودونا؟؟

اغتيال صريح لكل الحريات في ظل دستور الحريات

شهالكلام الفاضي؟؟

اي على فكرة 9 نواب انسحبوا بسبب توزير الحمود والصبيح

ومحمد مساعد الصالح سألهم خوش سؤال أمس

طبعا بلا إجابة

تدرون شنو مشكلتنا بالضبط

مشكلتنا ان ما نسمي النفاق نفاق

ما نسمي الجذب جذب

اللي يقعد بمكان فيه جنسين ويطالب بمنع الاختلاط ما نقول عنه جذاب ويقول ما لا يفعل

اللي يسبح بالمكسيك ووده ماكو بحر بالكويت مانقول عنه منافق

نغتر وايد بصلاته وصيامه

مع ان صلاته وصيامه حق ربه لكن احنا ودنا نعطي حسنات حق اللي يصلي ويصوم وشكل الحسنات ان نصوت له

وين بعد وين رايحين

العادات الدخيلة حق الكويت اهيا وأد الحرية اللي ارتضاها الشعب واهل الكويت من 300 سنة

هذي اللي نلتفت لها مو غيرها من كلام

الحين نروح حق ربعنا خنشوف شسالفتهم

علي الراشد استقال من التحالف وبعدها جمد استقالته

ليما رمضان مادري بعد رمضان

اول شي وقبل لا ادش بالموضوع لازم انتقد جريدة الجريدة على تجاهلها للموضوع وكأن لم يكن

مع ان دورها الاساسي

ان تكتب الموضوع وتحسمه قبل لا يفسر من الجرايد والناس الثانية مثل تفسير الرؤية اليوم

مالقيت عدد الرؤية بالنت

بس كاتبين ان سبب استقالة الراشد اهوا وجود خالد هلال بالامانة العامة

يا جماعة لا نصير اعلام احادي الاتجاه غلط والله

الحين نروح حق الاستقالة نفسها

بوفيصل والنعم فيه نائب وشخص كفؤ يحرص ويخاف على هالبلد

وإنضمامه للتحالف يعني اقتناعه فيهم

طيب علي الراشد مقتنع بالتحالف ليما يوم 17-5

والدليل خوضه للانتخابات من خلال قائمة التحالف

اذا قناعاته تغيرت خلال اسبوعين واستقال

والسؤال هل طرح علي الراشد ملاحظاته اللي ادت للاستقالة على التحالف

اذا اي طرح الملاحظات قبل الاستقالة

نصل لنتيجة ان التحالف ما تدارك هالملاحظات وتفاهموا وهذا اللي ادى للاستقالة

وبهالحالة يكون التحالف اهوا الغلطان

اما اذا ماكان طارح الملاحظات وبس استقال

اذا علي الراشد غلطان وما قام بدوره كعضو بعمل تنظيمي

خل اي واحد من هالطرفين يشوف شصار ويعترف بالخطأ

والوضع ما يحتمل انشقاقات وانقسامات يديده ونخلي الظواهر الدخيلة يسرحون ويمرحون

الحين نروح حق الموضوع اللي صج باط جبدي وخايفه منه

من بداية المشكلة أو اللي سواها البعض مشكلة بين صالح والتحالف وفريق صالح اللي انوجد للأسف يمارس دور كبير في مدح صالح والتسويق له

وهذا امر طبيعي لدعم مرشح يؤمنون بأفكاره ومبادئه

لكن للأسف أشوف إنها مصخت

وتحول الأمر لتمجيد غير مفهوم

يعني انكم تصورون وتنزلون مقطع فيديو حق سؤال صالح شنو اهيا العادات الدخيلة ويصير بطل الابطال على هالجملة هم مو منطق

اي نعم نحترم اعتراضه على هاللجنة ونقدر هالدور الواجب على اي واحد مؤمن بالحريات اللي كفلها الدستور

لكن يا جماعة صبر شوي

خنتكلم بواقيعة بدون لا نتفخ احد ونحسسه ان ما يغلط ابد

مع ان باليوم الثاني من افتتاح دور الانعقاد بمجلس الامة صالح ارتكب غلطة كبيرة جدا جدا

يوم الاثنين أقيمت ندوة بتنظيم الوحده الطلابية القائمة اللي ماسكه الاتحاد بأمريكا

وكان المحاضرين فيها سعد بن طفله ومشاري العصيمي ووليد النصف وصالح الملا

والندوة كانت من ال 7 ونص ليما ال 9 ونص اذا مو اكثر

المشكلة وين

ان يوم الاثنين الساعة 8 كانت مباراة مصيرية لمنتخب الكويت لكرة القدم ضد سوريا

صالح الملا عضو لجنة الشباب والرياضة بالمجلس

وفي نسبة من الناخبين اختاروه على اساس انه شخصية رياضية قادرة على خدمة الرياضة داخل المجلس

انك تحاضر بندوة يا صالح في نفس توقيت المباراة هذي مشكلة

لنفرض ان طلال الفهد أو أحمد الفهد أو أي أحد من شلة الاسطبل مسويها شنو يكون موقفنا؟؟

اي نعم صالح ما راح يلعب المباراة لكن من مسؤوليته متابعة المنتخب وأحواله وأداءه والاعتذار عن اي نشاط بوقت المباراة

وانا ادري لو مرزوق الغانم مدعو للندوة هذي راح يرفض

حتى لو مايبي يطالع المباراة والكلام نفسه ينطبق على علي الراشد والصرعاوي بعد

أنا ما أشره عالوحدة لأني بفترض انهم ما يدرون عن المباراة

لكن إنت يا صالح شخصية رياضية واكيد تعرف

من باب المسؤولية انك ما تحاضر بالندوة على الاقل بموعد المباراة

انا ادري البعض بيفسر كلامي وهذا مو يديد

لكن الحق حق على ربعنا او مو عليهم

لا تخلونا نوصل لمرحلة عبادة الاشخاص ارجوكم

خلونا نتعلم من اغلاطنا ونتكلم عنها

هذا المطلوب منا مو اكثر

يعني لا نرضى بالنفاق والجذب

ولا نتكلم وننتقد غيرنا وما نعدل بأنفسنا

على طاري المنتخب

ممكن اعرف بس مالفكرة من وجود ما يسمى بالهيئة العامة للشباب والرياضة والمنتخب حسب ما اقرى ما عنده ملعب يتمرن عليه؟؟؟

يا جماعة الشق مو عود وبس الشق شكله ما يتخيط

طبعا الكلام على الحرامية وايد

ولو اكتب عن اللي نشروه باليومين اللي طافوا ما اخلص

بس لازم اول شي نخلص من انفسنا بعدين اتفاهم وياهم وهذا ما يمنع ان نقول حق فؤاد بو نص شارب شي على ترقيعته

رغم ان فترة الاختبار لاتفاق الدوحة لم تنته بعد

يقول ما انتهت فترة اختبار اتفاق الدوحه وعشان جذيه ما حلق نص شاربه

لبنان اختارت رئيس وخلصت ومو عارف شيقول

انزين ممكن تقول متى تنتهي عشان نعرف متى نطالبك بحلاقة شواربك

أو اختصرها واعترف انك مو قد كلمتك وخلاص يعني العموم عارف هالشي بس قوله

أخيرا

من الاسبوع الياي راح اكتب المواضيع بشكل يومي يمكن تكون اقصر بس عشان لا يطوفني شي ومالي خلق او ما يمدي ارجع له

والى اللقاء