هايف مو سنّي

قولوا اسامي 4 ممثلين كويتيين مشهورين بهالصورة

تم انتخاب رئيس مجلس الأمة اليوم وطبعا الرئيس المنتخب اهوا جاسم الخرافي للمرة الرابعه عالتوالي

في ناس زعلانين ويقولون عبدالله الرومي كان كبش الفدا وقصوا عليه وغيرها من المصطلحات

أول شي ترى عبدالله الرومي عضو من 1985 يعني من قبل لا ينولدون وايد ناس يتكلمون الحين عن ان انقص عليه

يعني مو توه يخوض التجربة او غشيم ابد

والكل كان عارف ان الفكرة من خوض أحمد السعدون او الرومي لإنتخابات الرئاسة كانت في سبيل عدم حصول الخرافي على المنصب بالتزكية

اي نعم البعض حط أمل ان ممكن يفوز أو ينافس بقوة

بس يا جماعة انتوا شايفين مجلسنا شلون صاير؟؟

شايفين تركيبته؟

من صجكم انتوا يعني؟

على ذمة الآن فإن اللي صوتوا للرومي أهما
الصقر - الملا - الصرعاوي - الحربش - جوهر - مسلم - السعدون - الحبيني - الراشد - العبدالجادر - والرومي نفسه

واللي امتنعوا اهما رئيس الوزراء ووزير الدفاع

طيب هذا معناته كل السلف وقفوا مع الخرافي - الاخوان 2 من 3 صوتوا له -اربعة من الشيعة بمن فيهم المؤبنين صوتوا له - وكل القبايل اجمعت عليه

هذا مجلسنا أمرنا لله

يلعلع برّه وقت الانتخابات وحزّة الصجيه يوقف مع اللي يلعلع ضده

وطبعا ما ينلامون لأن احنا اخترنا هالمجلس

لوموا انفسكم

بس الصراحة نبارك للسيد حسين القلاف ومحمد هايف الاتفاق في اول تصويت لهم داخل المجلس

اي على طاري هايف البعض يعتقد ويطرح طرح مافيه من العقلانية شعره ان الهجوم على هايف لأنه سني!!؟؟؟

يعني بالذمة انا بحسب هايف على السنة والله ما افكر فيها ابد لأن ماله شغل خير شر

اي وعلى طاري التأبين حق اللي ربط الموضوعين مع بعض

خل اقتبس لكم من الكاتب بو نص شارب فؤاد الهاشم يوم اليمعه شكتب في معرض دفاعه عن رولا دشتي

على الصورة اللي انتشرت لها مع حسن نصر الله

تبين انها لوفد شعبي كويتي أمر بسفره الى بيروت الامير الراحل جابر الاحمد لتهنئة «حزب الله» وقائده وذلك على متن طائرة أميرية خاصة غادرت البلاد عقب تحرير الشريط الحدودي في جنوب لبنان من الاحتلال الاسرائيلي في شهر مايو من عام 2000

صراحة ما فهمت

الامير الراحل جابر الاحمد الله يرحمه أمر بسفر وفد شعبي على طائرة أميرية بعد لتهنئة حزب الله وقائده!!؟؟؟؟

الحين حزب الله اهوا نفسه مال عماد مغنية؟؟؟

رأس الدولة ارسل وفد لتهنئة حزب الله؟؟؟

فهموني يا جماعة ما فهمت ولا الأمير الراحل بعد ما يحب الكويت وولائه مو لها؟؟؟؟

يعني اذا بننتقد هايف لازم ننتقد واحد شيعي معاه

واذا بننتقد قبلي لازم ننتقد حضري

واذا بننتقد ريّال لازم ننتقد إمرأة

ترى كلش مو منطق خنكبر عقولنا شويه وين قاعدين

احنا ننتقد ممارسة وما ننتقد مذهب او طائفة

كاني صار لي سنة انتقد فؤاد ونبيل وخليف ونواف وكلهم سنّة ليش محد أثار موضوع المذاهب لما انتقدتهم شفيكم يا ناس احنا الأمل لا نصير اردى من اللي مخوخهم راحت ورا القبيلة والطائفة

اي صج يا ليت نحتفظ بالعشر اصوات اللي صوتت حق الرومي بأجنده وأولويات ثابته ونكون بهالحاله نشكل 10 من اصل 49 يعني خمس المجلس

طبعا انا استثنيت جمعان الحربش بسبب ان حدس لها اولويات اخرى

وطبعا هالعشرة قابلين للزيادة في قضايا عدة يعني راح يكونون من اقوى الكتل بالمجلس

يالله توكلوا على الله وعمروا البلد واللي يرحم والديكم

بعد شعندي وما قلته

شعندي بعد

هالموضوع كلش ما يساعد على التعليقات بس يالله ما عليه

صيف وحر والواحد نفسه بخشمه

اي عندي شخصية الاسبوع

تأخرت شوي بس موجوده

وعلى فكرة الاسبوع الياي يعني يوم اليمعه الياي راح أكلف نيو بإختيار شخصية الاسبوع حق المدونة

ادري وهقته بس كيفه يتصرف

اي شخصية الاسبوع مو المغنية

لكن الاغنية عن منو

يالله الى اللقاء