10/02/2008

حقيقة قانون فصل الإختلاط



قانون فصل الإختلاط مثل ما يسمونه


أو القانون رقم 24-96

يمكن من أكثر القوانين اللي أثارت جدل بالدولة مو على مدى سنة أو سنتين

على مدى 42 سنة يعني من تأسيس جامعة الكويت ليما اليوم

الكل يدلي بدلوه

سواء كان الدلو فاضي أو مليان

أو حتى الدلو يكون أغلى واثمن من اللي قاعد يدلي فيه

ميخالف تحملوا هالشي عن خاطري

الحين اهل البحرين لما يسولفون بال
msn

ويبون يقولون بردانه أو رايحه او أي شي فيه ألف شلون يكتبونها بالألف ولا الواو؟؟

المهم فصل الإختلاط بالنسبة لبعض الناس سببه ديني

وهذيل ردهم سهل

مع ان مو مفروض نتكلم بالدين بحكم إن احنا دول قانون

بس عشان لا يعيدون إسطوانة مشروخة

الدين ما منع الإختلاط والدليل الحج والصلاة في المساجد في صدر الإسلام

وبما أن في حقائق ثابتة فإحنا ما نحتاج فتاوي حق شي قائم وواضح

وأحاديث مثل ما إجتمع إثنان وثالثهم الشيطان ما تنطبق على التعليم
لأن قاعة الدراسة فيها 20 واحد غير المدرس او المدرسة

واللي يقول الحج والصلاة عبادة ووضعهم غير
هم العلم عبادة

إنزين اللي يقول الاسباب إجتماعية وعادات وتقاليد وهالكلام

عمرها العادات والتقاليد ما كانت قانون هذا واحد

ثاني شي العادات والتقاليد ما تقول ما يصير الجنسين يتعاملون مع بعض

والدليل إن الكويت يشترك فيها الجنسين بكل المجالات سواء الصحية الفنية الأدبية الإجتماعية وغيرها وغيرها

إنزين اللي يبي يصدق خونة الكويت ملوت الجامعة

الإئتلافية أو الحركة الدستورية الصغار لا تصدقونهم ترى جذابين والدليل

اللي نازل بالسياسة صفحة أولى وبالصور بعد

لا يطوفكم الموضوع وعلى فكرة هذي مو اول مرة يسوون شي مختلط ويطالبون بفصل الإختلاط

بس هذي طازجة

شنو ترجمة
cup cake?

انزين

الكل سمع وعرف إن تيار الإسلام السياسي يطالبون بفصل الإختلاط بناءا على القانون ولازم مباني منفصلة ولازم على قولة حسين جاسم

البنات والشباب

ما يمشون في شارع يوم أنا وياك مشينا مشينا مشينا فيه

وإن القانون يلزم فصل الإختلاط وموقع الشدادية اللي بيخلص مع الدائري الخامس يعني ما راح يخلص

راح يكون متكون من مبنى منفصل للطالبات وثاني للطلبة

وهالكلام الفاضي

بس بالشارع يلتقون وبالسوق هم يلتقون وبالمستشفى يلتقون وبالوزارة يلتقون وبالبنك يلتقون وحتى بحفلات هلا فبراير يلتقون وحتى بالطيارة يلتقون

وحتى النواب عندهم سكرتيرات

بس الجامعة لازم مباني منفصلة

بالصدفة وصلني قانون فصل الإختلاط

وقريته وإنصدمت

وإنتوا تقرونه وهم تنصدمون

تدرون إن القانون ما يفصل الإختلاط بالشكل اللي يبونه تيار الإسلام السياسي؟؟؟؟


القانون يقول وبوضوح وبدون اي تفسير
بمادته الأولى إن يكون في اماكن خاصة للطابات في المباني وقاعات الدرس والمختبرات وغيرها
يعني القانون ما قال قاعات خاصة لهم ومباني خاصة لهم
كل اللي قاله يا وزارة التربية بكل قاعة دراسية او مختبر يكون في مكان للطالبات
لا أكثر او اقل
يعني الطالبة تدش القاعة الدراسية يكون لها مكان خاص بالقاعة والشباب بمكان ثاني بنفس القاعة
القانون ما ذكر لا من قريب أو بعيد إن مباني منفصلة للطلبة وأخرى للطالبات
هذي إهيا حقيقة القانون
وسئلوا أي دكتور قانون او دكتور لغة هم بيعطيكم نفس الإجابة
وهذي الصجية
كل اللي ينقال الحين عن فصلهم الكامل تأليف بتأليف
يا ريت من علي الراشد وغيره يلتفتون لهالنقطة بس
ويركزون عليها لأني اعتقد إنها وايد مهمة
عموما يوم الثلاثا في مهرجان خطابي الساعة 6 بالجمعية الثقافية النسائية بالخالدية عن موضوع التعليم المشترك
اتمنى الكل يحضر
ثاني شغلة اي تنظيم طلابي يوقف مع التعليم المشترك خل يدز لي إسم تنظيمه وشعاره ومنصبه بالتنظيم عشان أحط شعاره بالمدونة
يالله همتكم وخنبلش نعرّيهم وعقب باجر الثلاثا هم محكمة الوزرا راح تنظر بتظلم الحكومة على حفظ قضية علي الخليفة

33 comments:

Anonymous said...

lol

DiLLi O MiLLi said...

يالله ويييين الأمور اللي ما سمعناها

صــارلج 20 دقيقة من نزلتي الدعــاية



:)

Anonymous said...

يعني بعد الغدا ؟

بيت القرين said...

نطروا قاعده أكتب

وأنا شدراني متى غداكم؟؟؟

أبو جيج يدور نعاله said...

عيل إنبلش بالمقبلات




هريس لحم النعام

Anonymous said...

يلا خوش

c u belkhaldiya
:)

بيت القرين said...

وليش ما تعزم يا بو جيج؟؟؟

أبو جيج يدور نعاله said...

غده مختلط؟

أوف قوية

الحين دعيج الشمرى يحرم أكل النعام

Mohammad Al-Yousifi said...

طلعتي منتي هينة

واصلة واصلة

بيت القرين said...

بوجيج
دعيج اذا قال شي عكسه يصير على طول

مطقوق
افا عليك انت ليما الحين ما تدري

حمودي
ذكرتني خل اعلن

Anonymous said...

كب كيك يمكن لان شكلها جنه كوب ؟؟

Anonymous said...

http://www.alwatan.com.kw/default.aspx?pageId=55
-----
see zis

فتى الجبل said...

معاكم وضد قانون منع الاختلاط

MFTELET said...

انا بصراحه ضد قانون فصل الاختلاط ,, بس في شغله مو واضحه بالسالفه ,, شالي خلا علي الراشد يقدم القانون ,,, لا وبهالحزه ,,انا اعتقد ان الموضوع وراه ان ,,,,,, اليوم الخبر بفلوس ..باجر بلاش :)

أبو جيج يدور نعاله said...

أول شى القانون الأهوج لا ينطبق على واقعنا الحالى

عدد الطالبات كما هو معروف يتفوق بشكل كبير على عدد الطلبة الذكور و بالتالى إذا كان لا بد من توفير أماكن خاصة لفئة معينة...فيجب أن تكون لفئة الذكور الأصغر عددا

شغلة ثانية لازم نسمع من نوابنا الحلوين تعريف لكلمة (إختلاط)...حتى نقدر نميز بين إختلاط وكيح...و إختلاط مو وكيح

إذا كان جلوس الطلبة و الطالبات فى قاعة محاضرات و يتلقون تعليمهم يعتبر إختلاط وكيح...إذا ماذا نسمى مخالطة النواب ربعنا للسيدات من الوفود الزائرة و فى رحلاتهم البرلمانية مع نائبات إناث من دول أجنبية؟


بعد ما يصير تحللون و تحرمون الإختلاط على كيفكم و بالأوقات إللى ترونها و بعيدا عن عدسات الكاميرات

إذا فعلا الإختلاط حرام خل يتحركون نوابنا الحلوين بإتجاه إصدار فتوى أو حزمة فتاوى و الفتاوى هاليومين تنباع بالدرزن

خل إنشوف فتوى تحرم إختلاط الذكور بالإناث بكل مكان و خاصة بالحج و عند أداء الصلاة و عندها نقدر (نتفهم) بأن القضية تمس ثوابتنا الإسلامية و يجب أخذها بشكل جدى...و حتى صدور تلك الفتوى ليعذرونا الأخوة السلف و ربع عدنان عبد الصمد بأن نطلق كلمة (هراء) و بالكويتى (خرابيط) و بالهندى (هلوسة محششين) على قانون منع الإختلاط



آسف للإطالة و نتمنى فوز الفراعنة اليوم على الأفيال و تحنيطهم كمومياءات

أبو جيج يدور نعاله said...

نسيت مو أفيال ساحل العاج

الكاميرون هم الأسود

Bad-Ran said...

والله نفطة القانون وايد مهمة .. بس ما عليج امر حطي صورة اكبر .. ما يبين شي

Anonymous said...

مفتلت
تحبون تعيشين بنظرية المؤامره وايد ؟
كل شي لازم وراه انه ؟

Anonymous said...

المهرجان الساعة ٦ مو ٧!! لا تعفسينهم يا دانة!! لووووول


الحضور مهم مهم بالغ الاهمية..و لتكن لنا وقفة احتجاج!!!


لا للوصاية على حرياتنا..لا للوصاية حياتنا


نراكم في الجمعية النسائية!

مــعـــارض said...

تحترق القلوب، وتدمع العيون... ولا تزال كويتنا تنزف من غزاة التخلّف!

آن الأوان لنهضة "كويتية" صادقة وأصيلة لردع زمن القردة الذين غزوا الكويت الجميلة بثقافتها وفنها ورياضتها وتعليمها واقتصادها وعاداتها وتقاليدها ودينها وشعبها... وريادتها

UmmEl3yal said...

"ما اجتمع ذكر وانثى الا كان الشيطان ثالثهما" لو كان حديث صحيح فهو لا يعني انه لا يجوز اجتماع الذكر والانثى لأن الشيطان موجود دائما!!!! حتى بين الشخص ونفسه وبين مجموعة من نفس الجنس ! الفرق هو الشخص وأخلاقه وليس الشيطان ووسوسته .. الله يفكنا من كل الشياطيين يارب

Anonymous said...

Wala il 3atheeem hathoola nas em3a'3deen ana 6ool 3umri ib madrisa amriikiya min il K.G lain Te5arajt Wala il 3atheem kena en3amil il banat chenhum 5awatna bs ehma ele tafkeerhum wa9i5 (3ala fekra ni9 3yal il dayneen eb madaris amreekiya) :)

o sajid il 3abdli il youm katib 5osh maqala 3an hal mawthoo3 o man6ii'3iya :)

http://aljarida.com/aljarida/Article.aspx?id=45928

ana al7een ga3iid aktib min
il ma6ar o emsafiir wela kan wedii eni a7athiir il nadwa :(

Anonymous said...

واضح أن الليبرالي اللي حدد موعد الأجتماع الساعة 6 مساء ما عنده فكره عن مواعيد صلاتي المغرب والعشاء ! الا اذا كانت العملية مقصودة يعني اجتماعكم اثناء صلاة مطاوعة الأخونجية
. والسلف حتى لا يخربون عليكم الاجتماع
سؤال مهم وأهم من موضوع الاجتماع

فيه عشا ؟

Anonymous said...

دانه

القانون 24 -96 يشمل كذلك المدارس الخاصة

Sn3a said...

يعطيج الف عافيه
الدبل ستاندرد اي لون ؟ ازرق ابيض احمر؟
لونه:حدس

تدرين انا رغم اختلافي الشديد عن السلف وعدم التفائي معهم في نقطه ثانيه غير الاسلام كاسم الدين

الا اني احترمهم جدا لأن نادرا القى لهم موقف او مبدأ متلون

اما حدس اللي بنت الاخوان واللي منبعها مصر واللي قالو عن الغزو خلاف هذول شي ثاني موليه
كل يوم مبدأ
كل يوم موقف
كل يوم رد
وكل يوم فلم




الواجب الغاء تطبيق القانون والعوده الى نص القانون الاساسي وهالشي احنا ماشين عليه بمواد التخصص
تصير حوادث؟
اكيد تصير احنا مو بالمدينه الفاضله
بس الحوادث جدا نادره
لكن الاحترام بين الجنسين بالجامعه متبادل

Q80 Blogger said...

المشكلة الكل يتلكم بكل شي

عرض الراي شي حل

بس توزيع الفتاوي ليش؟

كان ودي الاستناد على ادله ولا على فتاوي حتى يتم اثبات نقطه الغاء فصل الاختلاط

بس اشعلاقة الحج بالموضوع ؟
ولا حديث ثالثهم الشيطان !!
من قال الي افتى بمنع الاختلاط استند على هذا الحديث !!!!

جان زين اشويه منطق

شكرا

nEo said...

القارء لقرار قانون الاختلاط يضحك !

عيل ليش مسوين لويه دام القانون بهذي الصورة !

mantovani said...

تحية طيبة و بعد

انا من مؤيدي التعليم المشترك

لكن للاسف التيارات الطلابية المؤيدة
لهذا الموضوع شوية , و مؤيديها شوي

بالجامعة الطلبة يبون التعليم المشترك
و يصوتون للأتلافية

المجتمع اغلبه متفتح و الناس مافي حواجز بينها , و تلاقيهم سف و تف بالتعليم المشترك

هذا الموضوع وايد معقد و متشابك

مو بالسهولة اللي يتصورها البعض

و تحياتي

Mok said...

نــــــــــبيها حــــرية أرفع صوتك

هنا

http://shrqawi-mok.blogspot.com/

Anonymous said...

خلص وقتهم.. نشاز في تاريخ الكويت. الكويت الليلة بنبتدي نردها الكويت!

نبيها حرية! الليلة نهضة كويتية وطنية..ندق برجولنا الليلة بالخالدية!


بعض المقالات في المدونات:



http://www.ma6goog.com/2008/02/blog-post_12.html


http://mu3aratha.blogspot.com/2008/02/blog-post_06.html


http://om9edda.blogspot.com/2008/02/11.html


http://shrqawi-mok.blogspot.com/2008/02/15-word-verification.html


http://beit-elgrain.blogspot.com/2008/02/blog-post_10.html


http://wa6an-alnhar.blogspot.com/2008/02/blog-post_11.html




و زيدوا علي!


اشوفكم الليلة.. حاط بمخباتي وردة حمرا.. لا مو حق الفالنتاين!

Anonymous said...

و هنا


White wings

http://istherelight.blogspot.com/2008/02/blog-post_09.html


حمد

http://mypenpiazza.blogspot.com/2008/02/blog-post_10.html



من يزيد؟؟؟؟


نبيها كويــــــــــــــــــــــت!!٠



٠

Anonymous said...

يقولون والله اعلم بانه بيقترحون قانون للاختلاط داخل البيت يعني الابو مايقعد مع زوجته ولا بناته و الام ماتقعد مع اولادها وزوجها والصبيان مايقعدون مع امهم او خواتهم صج افيدوني

Anonymous said...

اذا الناس بالغلط تنتخب الائتلافية اللي ا تأيد التعليم المشترك

و بالغلط يفوزون كل نواب حدس بالانتخابات

و بالغلط لهم شعبية

و الناس ضد قانون الفصل بس اهي بالغلط تختار الشخص الغلط

يا أختي خليكم ديموقراطيين و ورونا شطارتكم

امشوا في توعية الناس و احترام عقولهم

و اذا ما مشى المجلس على هواكم

رجااااااااء حااااااار

لا تسفهون عقول الآخرين

اللي يعتبرون اهم الأغلبية

و انتو الأقلية

و هذا الميدان يا حميدان

أنا شخصيا أحترم الوزيرة جدا
انسانة حقانية حتى لو تكانت تخالف شخص بالفكر و الرأي و له حق عندها

حقه ما يضيع

و القانون ماشي باذن الله
على الجامعة و الجامعات الخاصة و على المدارس الخاصة ان شاء الله

للعلم : هناك جمعية أمريكية تدعو للتعليم غيييييييييييييييير المختلط

هم هذيل ما يفهمون

مو ربعكم هذيله
سألوا بوش خبري علاقتكم تمام معاه :)

عموما .. لنشر الفكر أدوات
ليش ما نشوف لكم مؤتمرات بقوة مؤتمرات حدس
ليش حضوركم دائما ضعيف ترى هذا مؤشر مهم على شيء ما

خلكم منصفين

و دمتم