05/02/2008

شعبي حر


مدونتين يدد إنضموا لعالم التدوين

مانتوفاني و من داخل السور

يستحقون الزيارة والتشجيع

شكرا لمجلة أبواب لإشارتها للمدونة في عددها مال شهر 2

وغلافكم حلو

موضوعنا اليوم خاثر نوعا ما

مدونة محاكم الكويت أنقل منها جزء من الباب السابع لقانون المرافعات المدنية واللي فيها الحالات التي يتمتع الخصوم بطلب تغيير القاضي

وهذا الباب والبنود موجودة لتحصين القضاء والمحافظة على نزاهته

البند د من المادة 104 من الباب السابع تقول

إذا كان قد اعتاد مؤاكلة أحد الخصوم أو مساكنته، أو كان قد تلقى منه هدية قبيل رفع الدعوى أو بعده

تلقى منه هدية قبيل رفع الدعوى أو بعده

انزين ممكن ساعات القاضي ماله ذنب بس احد الخصوم نفسه دنية ويقدم هدية بحكم التأثير على القاضي

والهدية طبعا مو محدد شكلها بالباب والبند بس أنا خل أخليكم على بينة

يوم 12-2 مثل ما قلنا المحكمة بتنظر الطعن المقدم من الحكومة بخصوص حفظ قضية علي الخليفة

وياي؟

محكمة الوزراء اللي راح تنظر بالقضية برئاسة المستشار المحترم ونكن له كل تقدير محمد بوصليب

الخصوم بالقضية علي الخليفة الصباح مالك جريدة الوطن والحكومة الكويتية

تم تقديم الطعن في 27-12-2007

قبل الطعن بشهر وتحديدا في 28-11-2007

يعني قبيل الدعوى

تم فرد صفحتين كاملتين بالألوان في جريدة الوطن بمناسبة زواج إبن المستشار بوصليب وهذا أمر لا يحدث بالوطن إلا لأبناء الأسرة وليس كلهم

بمعنى إن الوطن قامت بتغطية إستثنائية لزفاف إبن المستشار

وهذا الأمر ما نلوم فيه المستشار ولكن يعتبر كهدية وتسويق إجتماعي إستثنائي وغير معتاد

والصور اللي تحت تبين اللي أقوله




هذا وخلصنا منه

ندش على الصيحة اللي مسوينها ضد الشركة المنافسة لشركتهم اللي اهيا الوطنية للإتصالات وعقدها مع إسرائيل وهالكلام

نفى نائب المدير العام للشركة الوطنية للاتصالات فؤاد العبلاني نفياً قاطعاً إطلاق شركة نقال جديدة تابعة لشركته في إسرائيل، مؤكدا أنها حصلت على ترخيص بتشغيل الاتصالات المتنقلة في فلسطين مع السلطة الفلسطينية عام 2006

يعني ليش التشلخ ماني فاهمه وتاليها متى تتسنعون

أبلغتني مصادر امريكية مطلعة ان المقال الذي كتبته في عام 1983 مؤيدا فيه العملية الانتحارية ضد قوات «المارينز» في بيروت وارسله جماعة «حزب الله» و«استخبارات فيلق القدس الايراني» الى كل صاحب «ايميل» من المغرب الى سلطنة عمان قد وصل ـ ايضا ـ الى السفارات الامريكية ـ ومترجما الى الانجليزية ـ في كل من

السفارة الامريكية في بيروت، السفارة الامريكية في سلطنة عمان، السفارة الامريكية في الكويت، السفارة الامريكية في أبو ظبي، السفارة الامريكية في دمشق، السفارة الامريكية في لندن، وذلك بتاريخ 3 يناير الماضي، وقد تم ارساله عن طريق مقاهي «الانترنت ـ كافيه» في عواصم هذه الدول كلها!! الطريف في الموضوع ان المقال ارسل ـ أيضا ـ الى السفارة الامريكية في قطر ولكن.. الى العنوان الالكتروني الخاص ـ والسري ـ بمسؤول بارز فيها، وهذا العنوان ليس معروفا لأحد في الدوحة الا لوزارة الخارجية القطرية، مما يعني ان الشيخ «حمد بن جاسم» قد دخل.. «اللعبة معاهم
سفارتان امريكيتان لم يصلهما مقالي سابق الذكر هما السفارة الامريكية في الرياض والسفارة الامريكية في المنامة!! يبدو انني نجحت في فتح أول قناة اتصال ـ غير رسمية ـ بين عناصر حزب الله واستخبارات فيلق القدس الايراني مع.. الامريكيين

أنا راح أسلم إن أمريكا كلها اول ما يقومون الصبح يقرون مقالك عشان يعرفون يبلشون يومهم

بس اللي انا ماني فاهمته
الحين امريكا يعرفون كل شي بالدنيا ويبلغونك فيه
انزين ليش ما لقوا بن لادن ليما الحين ولا انت تعرف وينه وما قلت؟
وليش ما صادوا عزت الدوري؟

وثانيا تعال تعال تعال
شخباري انترنت كافيه؟؟ لا تقول مال النادي البحري بعد؟؟؟ وصج نادي الشعب البحري شخباره؟؟

وثالثا الحين أمريكا عندها إيميل سري بقطر ومحد يعرفه الا وزارة الخارجية مالت قطر؟؟ ما عندهم
channel
بال
IRC
بعد
لا ويقولون حمد بن جاسم معطينه
Op

إلا صج بيلر منو اللي ذبح كينيدي؟؟

ندش على الموضوع الصجي عاد

الحكومة تراقب المدوّنات

شنو هذا بعد؟؟؟

أن توجها لدى الحكومة بتقديم مشروع قانون خاص بمراقبة المواقع الالكترونية والمدوّنات السياسية وتنظيمها

هذا كلام المحيلبي

يا سلام

خلاص انا مدونتي فنية
لا تراقبني

إنتوا متى تفهمون علموني

ليش ما تعرفون إن إحنا كويتيين

تدرون يعني شنو كويتيين

في كلمات عجبتني وايد وأنقلها لكم يمكن تفهمكم شي

شعبي حر
ما يرضى بهوان وإذلال
ولا يتقيّد بأغلال
ولاهو من الذي يامن
بغير الحرية من اشكال
منّه الخطيب أحمد
ومنّه هم بعد أسرار
شعبي ما يسكت على حقّه
ولحمه مر
شعبي حر

شعبي عمره ما إنكسر
ولا يفهم شنهو قهر
شعبي إن حجّت حجايجها
تلقاه ثابت كالشجر
شعبي إن قال وطني الكويت
من أطرافي كش الشعر
شعبي حر

هذا شعبي لا تحاتون
ولا يمكن أبد بيخون
وإن حانت لحظة موت
يردد ثائر بجنون
تعال يا موت خذني
وعلى تراب الوطن حطني
ويهتفها بعالي الصوت
ويسمّع صرخته كل بيت
عايش إهو بالموت
إن كان لجل الكويت

المحيلبي او صباح الخالد أو الحكومة كلها

فهموا عاد خلاص

لا تأزمون الوضع

الكويتي حر
فهموا فهموا فهموا

بتراقبون المدونات والمنتديات وأي شي غيرها

بندش بيت بيت
ونتكلم ونرفض الجذب ونرفض الغلط

مهما يصير

ما يفيدكم

يوزوا فهموا خلاص عاد طولتوها

سمعتوها من قبل وبتسمعونها الحين وبتسمعونها بكل وقت

إستمرارية الكويت هي بسبب أنفاس الحرية التي لا يطيق ابناء الكويت العيش من دونها

محّد يقيّدنا

وفرحة جريدة الوطن ما تستمر بكلام المحيلبي أو غيره

حاطينها مانشيت يعني بنوقف؟؟
ولا بنخاف؟؟

وهم

وانا أكتب الموضوع

وصلني خبر إن علي الراشد بيقدم إقتراح لإلغاء القانون اللي ماله داعي

فصل الإختلاط

وهذا إختبار لنا كلنا ولحريتنا

ويالله خنشوف

موفّق يا بوفيصل

15 comments:

فتى الجبل said...

والله بنلقى مليون طريقة وطريقة نواجه فيها فسادهم لو شنو حطوا من قوانين

al-nokhitha said...

Kalam Jameel :)

3asach 3al guwa :)

kila ma6goog said...

ياكلون تبن يراقبونا

احنا اللي نراقبهم و نسقط حكومتهم

و التاريخ يشهد

Bu Jassem said...

يعطيج العافية خوش موضوع وضربة معلم على موضوع المستشار
ويا ليت مكان ما يحاربون البلوقات يقرونها ويستفيدون

bo bader said...

موضوع رائع وبالذات قصة عرس بوصليب !
صج في الصميم !

موضوع الرقابة عقدة تحوس في قلوبهم وعلى بالهم ان مشلكة الكويت تكمن فقط في اللي يتكلمون عن المشاكل ، ومثل النعامة يظنون ان تكتيم الكلام وتكميم الأفواه عن طرح المشاكل هو أفضل حل يفكهم منها !

الحل بسيط جدا .

إمشي عدل يحتار عدوك فيك .

اشتغلوا صح ولا تخافون من كلام الناس .

قواك الله ...

مُحَسّدْ said...

محسد
معناته من يتعرض للحسد كثيرا

الوطن ما حطت مراقبة المدونات في مانشيت عريض وبالصفحة الاولى الا لانهم مقروصين وايد من المدونات
ياهل يدير جريدة .. شتتوقعون النتيجة يعني

MFTELET said...

كل الي اقدر اقوله


( مادة 30 )

الحرية الشخصية مكفولة

والي موعاجبه يشرب من ماي البحر

Zico supreme said...

و الله طينتج خفيفه يا دانه.

العالم قاعد يمشي جدام و الجماعه بيراقبون المدونات.. صج بلد شيوعي

Z.

mantovani said...

تحية طيبة

في البداية مشكورة على الدعم
و انشالله ما نخيب ظنكم
و معاكم على خط الاصلاح و الوطنية باذن الله

و انا ما دخلت هالعالم الجميل
الا منكم

وشكرا

White Wings said...

هللو دانة
سمعتي عن تهديد النائب الراشد بسبب اقتراحه الجديد؟
المهم الله يوفقه وكلنا معاه

بو ناصر said...

"منّه الخطيب أحمد"

يا سلاااااام!


نعم ثم نعم ثم نعم!

على راسي!


الدكتور، كنت دائماً اشوف يم بيته -لافز بعيد- بشويخ او فنيطيس، يا تيوتا بيضا، يا شفر بيضا، يا نيسان بيضا..

قاعد فيها واحد او اثنين

يعني:
stakeout

غيروا عن الابيض!

لووووول

مري فنيطيس بسكة بيته، و عند الكوع بمساحة فاضية تلاقينهم! هههههههههه

خل يراقبونج مني لي باجر..

احنا مو منخشين

احنا اهل الكويت

احنا مو منخشين

طز باللي خلّفهم

مو انتي يا دانة، و لا احنا المجرمين

ليش يهمج يراقبون وله لا؟

هذا ال
IP
مالي

62.150.41.16

طز

kuwaitawy said...

بوست رائع
وبلنسبة لمراقبة المدونات انا اشوف انهم ما يقدرون يسوون شي راح نوقفهم عند حدهم

Bad-Ran said...

http://www.alaan.cc/client/pagedetails.asp?nid=9347&cid=48

حياتي هدف مو عبث said...

كلام النجار عن المدونه

:p

http://www.alwatan.com.kw/Default.aspx?MgDid=594938&pageId=163

Mok said...

:) بيت القرين
اعتقد عرفتني :)

اولا مشكوره على الاعلان ورفعتي معنوياتي :)

وابيج الحين تركزين على الحرية الشخصية والتميز بين الرجل والمراه :)

وهم لا انسى

ابيج تعلقين اهني في موضوع يهمج :)

http://shrqawi-mok.blogspot.com/