09/10/2007

إنتخابات الجامعة -4

هلا


الــمــشــكــلــة

قبل لا ابلش أنوه تنويه مهم

إن علي حسين العوضي أحد مصادري في هذا الموضوع

ماهو علي العوضي عضو الوسط الديمقراطي في كلية العلوم الادارية سابقا

بل شخص مختلف عشان لا يكون في لبس

قسم المشكلة من الموضوع راح ينقسم لقسمين الأول اكتبه اليوم والثاني باجر

القسم اللي راح اتكلم عنه اليوم عبارة عن المشاكل العامة بإنتخابات الجامعة

وباجر راح اتكلم عن المشاكل الخاصة والمتعلقة بالإتحاد وقيادته

المشاكل العامة عبارة عن التالي

الحركة الطلابية ليما الحين مكانك راوح بمعنى إن المشاكل نفسها تتكرر

وأعطيكم نموذج منها بس وهذا اللي كانوا يطالبون فيه القوائم من اكثر من 20 سنة

حل مشكلة الشعب المغلقة
إلغاء إحتكار المواد من قبل هيئة التدريس
المطالبة بتطبيق نظام الفصلين الصيفيين

هذا طبعا غير ان كلية الآداب وكلية البنات وكلية التربية مازالوا يداومون بمباني مدارس
كلية العلوم وكلية الهندسة مازالوا في المبنى نفسه من سنة 66

بعض المناهج اللي تتدرس يرجع تاريخها إلى السبعينيات يعني عادي نلقى جملة
إن الحرب الباردة بين الإتحاد السوفييتي والولايات المتحدة ألقت بظلالها على كل دول المنطقة

عادي عادي نلقى مادة تعلم الطباعة على الآلة الكاتبة

اي صج نهاية عرس الدم ما يتني ليما الحين واذا ما وصلتني اليوم ما راح انزلها وخل يستانسون اللي متابعين

التقسيم الطائفي البغيض لبعض القوائم الطلابية

يعني الإئتلافية والإتحاد الإسلامي على سبيل المثال نلاقيهم وعلى مر تاريخهم اللي اكثر من 30 سنة

ما نزلوا مرشح واحد شيعي بالنسبة للائتلافية والاتحاد الاسلامي

ومانزلوا ولا مرشح سني بالنسبة للاسلامية
وهذي القوائم حصلت على أكثر من 7000 صوت في الانتخابات الأخيرة من اصل 11000 صوت تقريبا؟؟؟؟

قناعة ممثلين وأعضاء القوائم بأنهم انبياء ومنزهين عن الخطأ

يعني عمرنا ما سمعنا إن الإئتلافية تعتذر مثلا عن موقف معين ولا الاسلامية ولا الاتحاد الاسلامي ولا غيرهم
لكن الوسط اعتذر عن حادثة التزوير اللي حصلت بسنة 2000 والمستقلة اعتذرت عن حادثة سب الصحابة بسنة 2002 وفصلت العضو اللي سب مع ان كان ماسك منصب قيادي
وهذا شي يحسب لهم

تمسك القوائم الطلابية بحل مشكلة المواقف على مر السنين

وهذا اللي يخلينا نتوقع إن اذا الطالبة سفطت بمكان عدل معدلها يصير 4 نقاط

والمشكلة إن ليما الحين ما انحلت هالمشكلة البسيطة

العنف الطلابي يعني اذا اختلفوا مع بعض يطقون بعض مثل الميانين الحمدلله والشكر

والغريبة ان 99% من احداث العنف اذا مو 100% تكون الائتلافية طرف فيها او تيارات الاسلام المسيس

موعد الانتخابات الطلابية اهوا من اعظم المشاكل

يعني هالسنة مثلا صارت انتخابات الجامعة خلال اسبوع واحد من بداية الدوام

يعني اكثر من 6000 طالب وطالبة مستجدين ما كان عندهم الا اسبوع واحد يحددون اختيارهم للقائمة اللي تمثلهم
والمستجدين مساكين يتراوالي على ما يدلون قاعاتهم يبون اكثر من اسبوع

مع العلم ان موعد انتخابات الاتحاد يحدده اتحاد الطلبة

إدارة اتحاد الطلبة لانتخابات اتحاد الطلبة هذي بروحها نكتة
طبعا يمكن احد يقول ان كل قائمة لها مندوب ويحضر الفرز

لكن لنفرض ان مندوب القائمة المستقلة شك بالنتايج
وبغى يطعن فيها
وراح وطعن
منو راح ينظر بالطعن؟؟؟

نيو وبشار وينكم؟؟

التغطية الاعلامية السيئة للانتخابات الطلابية
اكثر جريدة تهتم بانتخابات الجامعة اهيا جريدة خليف
خليف عنده مجموعة حبربش وانا قد هالكلمة واعنيها
عبدالحميد المضاحكة نهى الفيلكاوي يوسف كاظم وواحد ولد الحمادي وواحد ولد العجمي
وانا عشان ابين مستواهم بس
المضاحكة مثلا سألوه ليش تنقل اخبار غلط
جان يقول لانهم يدفعون أكثر
ولد الحمادي وولد العجمي أعضاء بالائتلافية حاليا ويهاجمون اي احد ضدهم
حتى لما الإئتلافية طقت صحفي بالقبس
وانفصل طالب الإئتلافية
حبربش الوطن ماذكروا ولا كلمة عن هالموضوع
وطبعا هالاحتضان للائتلافية نابع من سياسة خليف وربعه لأن تيار الاسلام المسيس ما يتكلم عن بوقاتهم

اي على فكرة يوسف كاظم وهذا بروحه نكتة شفتوه بتلفزيون الوطن المتين بوخدود كان صحفي وإنطرد من السياسة لانه كان ينقل اخبار غلط
واول ما انطرد عرضوا عليه الوطن مبلغ خيالي بالاضافة لمبلغ اضافي في حال كتابته اي موضوع يهاجم فيه المدافعين عن المال العام بالجامعة

اللي يبط الجبد صج ان الوسط والمستقلة دايما يطالبون بمحاربة الحرامية
بس نص تصريحاتهم يعطونها حق الوطن!!!؟؟؟

ومن المشاكل بعد ان الاتحاد ما يسمح للقوائم بتوزيع مطبوعاتهم داخل الجامعة الا بفترة الالنتخابات بس
يعني خلال اسبوع او اسبوعين بالكثير لازم يسوقون حق قوائمهم

وتدرون ان الاتحاد ما يسمح لطلبة الجامعات الخاصة الكويتيين بالتصويت بالاتحاد مع ان لهم الحق
المادة 9 من دستور الاتحاد "أن يكون الطالب كويتيا" هذا شرط من شروط العضوية
والمادة 12 من شروط العضوية تقول "الطلبة المنتظمون في الجامعات والدراسات العليا وما يعادلهما" بدون لا تحدد اذا كانوا بجامعة الكويت أو لأ

ومع هذا من أكثر من 5 سنين الطلبة الكويتيين بالجامعات الخاصة مغتصب حقهم بالمشاركة

فقدان ايمان الطلبة بأن الانتخابات تسوي او تغير شي
وهذا اللي يخلي وايد ناس ما يصوتون او يصوتون عشان ربعهم مو عشان مبدأ او فكرة

الاعتماد على الشعارات من قبل القوائم بدون وجود شي على ارض الواقع
يعني مثل ما قلنا الوسط والمستقلة يحاربون سراق المال العام بنشراتهم لكن يتراكضون على جريدة الحرامية للتصريح
وهذا اكبر تناقض
وغيره وايد من الامثله

قناعة البعض ان الائتلافية ساعدتهم بالتسجيل
وطبعا ما ساعدتهم لوجه الله لأن يبون اصواتهم والشرهة على الجامعة اللي تسمح للائتلافية بالوجود داخل صالة المستجدين بروحها
يعني يمعوا اصوات
والطالب المسكين ما يشوف غيرهم فيقول والله ما قصروا

عموما هذا قسم المشاكل العامة
وترقبوا بلاوي الاتحاد والإئتلافية باجر
وصج المدونين خل يسوون دعاية حق موضوعي بعد
اتشرط مو؟ بس أمون

14 comments:

Anonymous said...

صاحبي بيتهم بالقرين مال الاتلافيه ياله لي بيتهم عشان يظبط جدولة
يحليله خوش ريَال ماقصر
;P

مــعـــارض said...

كل الشكر والتقدير على جهودج المبذولة في سرد تاريخ "كلش مو هيّن"... بانتظار المزيد، ومن ثم لنا تعليق على موضوع الحركة الطلابية الكويتية

لا تعليق لدي الآن غير... سيأتي يوم من الأيام فيه، يتم تحقيق عزيزة الأماني

Anonymous said...

This is still the most intresting subject so far.. thank you.. do you know that not only the other universities in kuwait "mo'3ta9ab 7aq'hom" they went and decreased the number of chairs for "Ete7ad america" after they lost it to al wi7da more then 5 years ago.. from 9 votes to 3 only.. and they did declear the lebanon ete7ad lana haman mo ma7soom lihom.. and egypt.. if they would they will close 3loom edareya just so al mustaqela won't win =P thats Bulls**t!

Anonymous said...

** they DIDN'T declear ete7ad lebanon.. sorry kha6a'a ma6ba3y..

Bashar said...

أنا كاني :)

مستمر في متابعة الموضوع حتى النهاية لأدلو بدلوي وتجربتي في المشاركة بالانتخابات الطلابية سواء بجامعة الكويت أو في مشاركتي بتأسيس قائمة في التطبيقي وتأسيس اتحاد التطبيقي :)

تحياتي

f7ee7eely said...
This comment has been removed by the author.
لو دامت لغيرك ما اتصلت اليك said...

السلام عليكم


شكرا ......للجهود المبذوله من قبل ومن بعد

مادري شلون طلعة هل جملة معاي

وتستاهلين يا بيت على جهودج الطيبة

بعد ما تخلصين عندي لكم مهرجان مفاجئاة

f7ee7eely said...

.

فريج سعود said...

مخرج برزن بريك شيصير لج ؟؟
كتبي الموضوع كله خلص رمضان وانتي معلقتنا
بعدين ليش خفتي تحطين نهاية عرس الدم...
ما وصلتج بعد متى بتوصل لي عرضوها ؟ بس ان شاء الله تكون نفس النهاية الي توقعتها
وليش التدخين يفطر ليييييييش ؟

Bad-Ran said...

اللي يبط الجبد صج ان الوسط والمستقلة دايما يطالبون بمحاربة الحرامية
بس نص تصريحاتهم يعطونها حق الوطن!!!؟؟؟

اي والله

ARTFUL said...

نيو بشار نيو وبشار
تعالولها ترا احنا مو تارسين عينها مع الويه

ترا نغار

;p

والله عاد نيو وبشار يستاهلون من يسأل عنهم

تحياتي لج ،، متابعين بس الشرهه علينا اللي صوتنا على ماميش

;p

فتى الجبل said...

الائتلافية-الاتحاد السلامي-الاسلامية
كلهم واحد بعدين اللي استغفرالله عباله قاعد يقص على ربه ويستغل الدين لمصالحه اشلون ما تبينه يقص على خلق الله

Mohammad Al-Yousifi said...

ما ودي أحبطج

بس ممكن تذكريلي شي زين بالقوائم الثانية المنافسة للائتلافية؟

يعني شنو الاضافة اللي بيسوونها اذا فازوا و شنو الأشياء و الانشطة الزينة اللي سووها؟

انا شخصيا مو دارس بالجامعة هني و اعرف اخبارهم من الجرايد

ما نسمع عنهم غير السب و المسابب و الهوشات و تصريحات صاروخية ذكرتني بتصريحات صدام

سنهدم عرش المادري منو

و سندمر تاريخ مدري منو

و سنعود الى قلاعنا في كلية مدري شنو

و هلم جرا

شنو الاضافة اللي سووها؟

لا تقوليلي المواقف

لول

ARTFUL said...

كله مطقوق ((اسم الله عليك))
بهذي صدقت ، انا آخر أيامي بالجامعه ما قمت أهتم

فازت المستقله شبتسوي

بتساعد الطلبه بتفتح الكلاسات بتسوي دوري كرة دوري طائره بتسوي دورة كوت

مهرجان ، رحله تعدل الكافتيريا بتسوي اعتصام وغيره

فازت الائتلافيه
بتساعد الطلبه بتسوي دوري قدم بتسوي مهرجان انشوده بتسوي معرض بس ماراح تسوي دورة كوت برمضان

فازوا الوسط
بساعدون الطلبه بسون مهرجان بسون اعتصام دورة كوت رحلة دورةقدم وغيره

لا تقولي رسالة الحين الوسط عندهم جمعية خل نشوف رسالتهم
والمستقله عندهم جمعية والائتلافيه عندهم جمعيات خل نشوف الطرح الفكري

أناكنت طالب في كلية العلوم الادارية كنت أتمنى يوم أشوف الرابطة تسعى لتنمية الطالب

يعني يوم يايبين لنا بروفسور من جامعه راقية يكلمنا عن الساسية الاقتصاديه في أمريكا
يايبيلنا محلل اقتصادي من ماليزيا يبين لنا التجربة الماليزيا في النهضة الاقتصادية

نقاش اكاديمي بين دكتور مؤيد للطرق التقليدية في الاقتصاد ودكتور مؤيد ما يسمى بالطرق الاسلامية في الاقتصاد

كنت أاتمنى يوم يسوون مسابقة لأفضل بحث في مجال الاستثمار او الاقتصاد او الطرق التحليله اليديده في الاستثمار
والله عندنا طلبه مخوخهم نظيفة راح تطلع لك بحوث حتى الدكاتره يطقون على راسهم منها لان في بعض الدكاترة حسباله ليلحين التدريس ايام الكتّاب

ويتم مناقشة البحوث على أسس علمية اقتصاديه


شغلات تفيد الطالب وتنمي عقله وتوسع مداركه وتخليه يبحث وهذا حسب تخصصي وكل كلية على تخصصها

وذها ما يمنع من الترفيه وغيره من الانشطه اللي تقوي الروابط ما بين الطلبه

جذي أقولك والله الرابطه عطتنا نموذج يحتذى به ، جمعت بين العلم احنا كطلبه أكاديميين والحياة الاجتماعية

تحياتي لكل الروابط والجمعيات وعلى راسهم الاتحاد

=)