24/07/2009

أنا مدونة ناشئة


مدونة إستكانة مدونة كويتية تستحق الدعم في جائزة هديل

لماذا كان هذا القصف العنيف على صالح الملا وعادل الصرعاوي وعلي الراشد ومرزوق الغانم وعبد الرحمن العنجري.. وهم من هم؟ هذا ما شغل بالي طوال الاسابيع الماضية وانا ألاحظ واحصي الحملة المسعورة في الصحف وفي المدونات «الناشئة» ضد القوى الوطنية. بالمناسبة المدونات التقليدية او مدونات نبيها خمس بالكاد تناولت موضوع الاستجواب بشكل عام

هذي العبارة الأكثر ضجة في عالم التدوين الكويتي آخر يومين وإهيا طبعا جزء من مقالة لعبداللطيف الدعيج في القبس
يوم الأربعاء اللي طاف

بو راكان يقول ويعتقد بأن حملة المدونين ضد كل من وقف مع الوزير كان الباعث لها الاغتيال السياسي للنواب المتصدين لعبث عيال الشهيد الوحيد بالرياضة

وايضا قسّم المدونين بالتقليديين واهما مدونات نبيها خمس ومدونات ناشئة واهما بناءا عليه مدونات ما بعد نبيها خمس

بناء على كلامه فأنا أعتبر مدونة ناشئة بحكم اني للأسف ما كنت مع مدونين نبيها خمس وما ساهمت بالتغيير بواسطة التدوين بذيك الفترة

وبما اني مدونة ناشئة بنظر بوراكان فبتكلم من هذا المنطلق

اول شي تاريخ بدء التدوين ما اعتقد له علاقة يا بوراكان بالانتماء وحب الوطن واتخاذ المواقف

يعني ممكن يكون عندنا مدونات قديمة لكن مخرفة وممكن يكون عندنا مدونات يديدة لكن راقية وعندها راي مبني على اساس يحترم ولو اختلفنا معاه

وهذا الأمر طبعا ينطبق على كل المجالات مو بس التدوين يعني حتى الكتاب والسياسيين ممكن يصنفون بهالطريقة

ثاي شي انت قلت ان هذي الحملة المسعورة من المدونين سببها التغطية على فضايح الحكومة بملف الرياضة

وانا اقول لك ممكن جدا يكون في حملة مسعورة دافعها اللي انت تفضلت فيه

لكن ماهي بعالم التدوين او على الأقل بعالم التدوين اللي اعرفه ويعرفونه اللي حواليني

يعني خل اضرب لك امثلة

مستحيل فريج سعود يكون جزء من الحملة المسعورة هذا برايي ومستحيل موقع الأمة يكون جذيه ومستحيل ان الحلم الجميل يكون جذيه ومستحيل وجهة نظر تكون جذيه ومستحيل ان الدستور وسرحان و حاكي عقالي وانتر كويت وبلوق عمتي يكونون جذيه يا بو راكان

نص اللي ذكرتهم اختلف وياهم وايد

لكن انا على يقين انهم ما ينقادون من عيال الشهيد او غير عيال الشهيد لتوجيه الناس لقضايا واغتيال النواب سياسيا وافقادهم لمصداقيتهم

المدونين الناشئين او حتى التقليديين على قولتك دوم لهم مواقفهم

يبقى تعجبنا أو ما تعجبنا هذا شي ثاني

لكن نقطهم بحظرة الخيانة والإنتماء لقوى الفساد هذا كلام مغلوط وابدا ماهو مقبول خصوصا من قلم مثل قلمك طالما وقف مع المدونين بل واستقى بعض كتاباته منهم

انت تعتقد ان هجوم المدونين على صالح واسيل والعنجري تحديدا اكثر من غيرهم فهذا باعتقاد اللي انتقدهم مو تقصّد مثل ما انت تعتقد

بل من باب الصدمة من موقفهم

ارد واقول لك ممكن يكونون غلطانين يمكن يكونون مبالغين

لكن مو خاينين للديرة وهذا شي اكيد

خانك التعبير جدا يا بوراكان وضيعت البوصلة هذا اكيد

هذا جانب لك انت خصوصا يا بو راكان

اما الجانب الثاني فإهوا للمدونين

خنوديهم لهالفرضية

كل يوم اكو ناس يدّد يدشون المدونات يقرونها ويمكن مع الوقت يسوون مدوناتهم الخاصة

من يوم الاربعاء ليما اليوم ووايد مدونين من اللي ما عجبهم كلام الدعيج كتبوا عن مقالته يعبرون عن استياؤهم كل واحد وطريقته

واللي ما كتبوا علقوا عن اللي كاتبين

وهذا أمر طبيعي

لكن الموطبيعي

ان الرد على الدعيج يكون بالسب انا ماني ذاكره الا شكل واحد من اشكال السب من مدونة أقدرها وايد

فريج سعود يقول له تبا لك بالانجليزي

طبعا الغالبية فهمت المعنى

انا اشير حق سعود لان ادري اني ما راح انسب منه لما انتقد كتابته وطبعا مو شخصه

وفي غير سعود وايد تمادوا جدا بالسب

تقدرون تاخذون جولة وتعرفون بروحكم شقصد

شغالين الربع تسفل بالدعيج؟؟

واللي مو مسفل يتشكر من اللي كاتب موضوع يسب فيه الدعيج؟؟

معقولة يالربع هذا منطقنا إحنا؟؟

الحين نرد على الناس اللي دشوا يتطمشون على عالم المدونين من الاربعا ليما اليوم

شلون بينظرون لنا ولأسلوبنا

مو معقولة ان اسلوبنا يصير السب والصراخ الكتابي على كل من يخالفنا

خصوصا اذا كنا ندري ان اللي يخالفنا مو مسير بل صاحب راي معروف والسنين تشهد له

كلنا نغلط لكن خل نعترف باغلاطنا

واذا كان تعميم الدعيج غلطة كبيرة وما ينسكت عنها

فأكيد ان ردنا بالسب غلطة هم كبيرة ومو صحيحة ابد

آخر شي

نيو يقول عن رويشد هيلقي

ناسي ان بوفهمي كان يصور الأغاني وفي مرق على دشداشته

احب اوضح لك يا نيو ان رويشد خط احمر

وطمني بس
:p

16 comments:

Anonymous said...

اذا كان الكلام من فضة
فمدونتج من ذهب
والسلام
ولد جبلة
ما أبي أحط اسم مدونتي ...

دكتور كويتي said...

كل انـاء بما فيه ينضح
موضوعك في الصميم
و السلام

سيفوه said...

واذا أحد تكلم عنه قالوا مو وطني

ديره تضحك

mantovani said...

مع الاسف

عبدالله الرويشد فعلا هيلقي
و ملك التبهذل بااللبس

الريال ما يعرف يلبس

adel ghaly said...

شكرااااااااااااااااااااا
http://www.egyarena.blogspot.com
http://www.aflam3arabi.blogspot.com
http://www.3elag.blogspot.com
http://www.all-moslems.blogspot.com
http://www.justena.blogspot.com

أبو الدســتور said...

ضربته جايده لنا

و تغيير خطه و خط القبس أثر فينا

نعم احنا ماننقاد من احمد الفهد

بس الاكيد ان احنا ماننقاد من اي شخص

هل هذا جزا اللي يدافع عن المال العام

صرنا شخصانيين
و صرنا داحل السور و بره
و غيره من الكلام

صدمه والله صدمة

راعي تنكر said...

لهم حرية التعبير
ولكِ حرية الاختيار

Anonymous said...

اهو بس مرق (: مرات بعد طايح وسكي الوايت هورس

فريج سعود said...

الريال عايش بامريكا انجبرت اترجمها

لا تلوموني

والله العظيم ما حرني ولا همني كلمة مدونات
ناشئة ولا اشبال

بط جبدي الخيال والاستهبال والربط الغير منطقي الي ما يقوله حتى بوشيخة في الدار

استجواب وزير الداخلية بالذات طلّع مواقف مو طبيعية من وايد ناس نواب وغيرهم

ولا تزال تبعاته على الساحة

nEo said...

بو فهمي دشداشتة ذات المرق تفكس تراث نومة الظهر

مابي اتكلم عن بدلة رويشد في دنيا الوله

خلي الطابق مستور

btw

ترى وايد احب رويشد

بيت القرين said...

انو
ليش ما تحط
وتسلم

دكتور
وعليك السلام

سيفوه
وايد تضحك

مانتوفاني
لبسه صوب وغناءه وصوب وهذا اللي يهم
:)

ابو الدستور
طبعا صدمة
بس ردودنا لازم تكون ارقى مو؟

راعي تنكر
لما يساء للمدونين يساء لي
ولما يمدح المدونين امدح انا

انو
ما اعرف هالسوالف
:p

فريج سعود
وقت الصدمات يبين العقل يا فريجنا العزيز

نيو
بدلة صفرا شفيها
عاشوا القدساوية
:p

Anonymous said...

عسى الله يحط حيلكم بينكم

بوحمد said...

يعني لما الموضوع عن الدعيج لازم نكون راقين !!!
أرجو مراجعة ماكتبته من مواضيع سابقة
مفردات يعف لسان الرجل عن قولها فما بالك أن صدرت من إمرأة ..
في الحقيقة إني أشك بأنك إمرأة ..

al-nokhitha said...

Ana ma adriii esh 9ayer le2ani emsafir o mo emtabi3 el sa7aa bs bo rakan ana men zeman adrii ena ekhoora wayed bas madrii laish fe nas et6abliila :)

laa etha yetay lel 7ag rowaiished haiiligi ;p

alsoot alhoor said...

أنا أشوف إن الزعل صار على كلمة ناشئة أكثر منه على سالفة أحمد الفهد

وشنو العيب إذا اعترفنا مثل ما اعترفت مدونة بيت القرين إن احنا مدونين ناشئين

ولا تنسون دور الرجل في نشر إسم المدونات عن طريق مقالاته

وأقول لعبداللطيف الدعيج.. لا فض فوك وبالعكس انت اللي توجهنا وليس العكس

نعم نختلف معك ولكنك استاذ

تحياتي.. الصوت الحر
مدونة ناشئة جداً جداً جداً وأتمنى الدعم من قبل بيت القرين

http://alsoot-alhoor.blogspot.com/

Anonymous said...

يعطيك العافية على هذا الطرح الراقي
والاختلاف في الفكر والراي يجب ان يقابل بالرد والحجة والمنطق ،،،، لا بالاسلوب الوقح واستخدام كلمات الاستهزاء
وشكرا مرة اخرى