19/05/2009

لكل إختيار سبب

واحد: ليش انت سلفي؟
واحد ثاني: يطالعه واهوا مكشر ويقول لأنهم يدعون إلى الله والإسلام دين التسامح والإبتسامه والكلمة الطيبة

واحد غير الأولاني: ليش تحبين تامر حسني مع ان اغانيه وصوته مثل مصطفى قمر وإنتي ما تحبين مصطفى قمر؟
الوحدة: لأن كيوت وشكله ما يشرب ماي شفايفه دايما ناشفين ومادري تحس ان مصري

واحد غيرهم: ليش تحب نادي القادسية؟
الثاني: وليش ما احبهم واهما حسينين الوصايف وتوهم ماخذين الدوري وواصلين نهائي الكاس وفايزين على الفحيحيل سبعه فوق البيعه

واحد يقول للشيعي: ليش صوّط حسن جوهر؟
الثاني الشيعي: لأن أحسن واحد ما يسوي شي بالمجلس ويحسسك انه أنجز

واحد يقول لحضري: ليش مصوتين حق االسلطان والمطير والنيباري والعنجري بورقة وحده؟
الحضري: لأنهم عيال بطنها أبوي إنت

واحد يقول حق مطيري: ليش عطيتوا هايف 16 الف صوت
المطيري: نسوّي دقّه بالكويت


واحد يقول حق نبيل الفضل ليش تكره عمامك الخطيب والنيباري والمنيس الله يرحمه؟
يقول سئلوا عبدالباري عطوان

واحد يقول حق ليبرالي ليش تقولون حق النيباري راحت عليه ولازم يعطي فرصة للشباب وما تقولون جذيه للسعدون مع انه اكبر؟
يقول الليبرالي النيباري شكله اكبر


كل الأسئلة اللي طافت وغيرها ملايين لها أجوبة ولها أسباب سواء الأسباب كانت منطقية او هبله او مضحكه

بس في سؤال واحد ما اظن له اجابة او سبب

ليش الحكومة تعطي اصوات الرئاسة للخرافي؟

يعني أبي سبب واحد منطقي مو منطقي مو مهم بس سبب

يعني افهم ان بعض النواب يصوتون للخرافي لأنه عنده شي ماعند السعدون اوغيره

بس الحكومة ليش تعطي الخرافي

وقبل الأخير
في ناس متفائله إن ناصر المحمد اهوا رئيس الوزراء المقبل
هل رحلة العلاج خلته جريء وقوي وما يخاف؟

وشوية فن هندي


34 comments:

Anonymous said...

لانه عم من عمامج

بيت القرين said...

لا ما يصير لي
:)

كيفي said...

اسباب فوز محمد هايف معروفة انها اسباب قبيلة بحتة وبدون اصوات القبيلة ما كان محمد هايف وصل للمجلس لانه ابعد عنه من القمر
واسباب فوز حسن جوهر تعود فى المقام الاول الى تصويت الناس له خاصة وانه مرشح فى دائرة تغيب عنها الاعتبارت القبلية وهو يستحق الوصول للمجلس ان لم يكن انجز شىء فى المجلس السابق ولكن الناخبين صوتوا له
وبخصوص رجوع الشيخ ناصر المحمد لرئاسة الوزراء فهذا امر يخص سمو الامير حفظه الله ورعاه والتفاؤل الموجود نتج من الكثير من الدلائل منها الاستقبال الكبير الذى استقبله الشعب الكويتى للشيخ ناصر المحمد وكذلك ظهور حقيقة المؤزمين وخاصة فيصل المسلم الذى كذب على الجميع بخصوص الشيكات وكذلك اخير خروج حدس من المجلس وهو اكبر رمز للمعارضة كل هذه الدلائل تؤكد عودة الشيخ ناصر المحمد

Anonymous said...

الجواب

لأن العود يبي جذي

أبو جيج مع الورقة البيضاء said...

مو مشكلة الخرافى إذا كان محبوب و مرغوب (حكوميا)...المصيبة من يعارضون ترؤسه المجلس...و ما يسوون شى...بس حجى و كلام فاضى و آخر شى تزكية و بوسة على الخشم

إللى معارض ترشح الخرافى للرئاسة خل يحط بديل له و يصوت له فعلا..ما يقطه على صخر مثل ما سوه بالرومى آخر مرة

أو على الأقل يوقف على ريوله بجلسة الإفتتاح و يسجل موقف معارض

بدل من الإختباء داخل غترته

Bad-Ran said...

يصوتون حق الخرافي و يقولون احسنوا الاختيار

بو حامد said...

ليش الحكومة تعطي اصوات الرئاسة للخرافي؟


لأن ما اعتقد ان نزل الى بايعاز من الجكومه وربما بطلب وترجي منها

Anonymous said...

واحد يسأل مدون الكتروني: ليش مدونة بيت القرين منتشرة اكثر من غيرها؟

واحد ثاني يرد : لان صاحبها مشعّر ويكتب باسم دانة

ma6goog said...

واحد يقول حق ليبرالي ليش تقولون حق النيباري راحت عليه ولازم يعطي فرصة للشباب وما تقولون جذيه للسعدون مع انه اكبر؟
يقول الليبرالي النيباري شكله اكبر



لأان السعدون ما خسر ب ولا انتخابات و النيباري ما فاز بآخر ثلاث مشاركات


فهمي عاد

مـغـاتيــــــــــــر said...

looool 5oosh post

صراحة شر البلية ما يضحك !
أكثر ما أزعجني صراحة هو فوز "الوجه المكفهر" بهالأصوات!!
صج وفر علي فلوس لأني كنت واعدة الأهل إن خسر أو قلت شعبيته على الأقل راح أنفذ أي طلب يطلبونه مني! فااا وصلتني طلبات من مستوى سيارة وسفرة وطااالع ..

أما النيباري أعتقد إن احنا كنا محتاجينه هالمرة وأنا شخصيا عطيته صوتي، لكن للأسف يبدو أن "التسويق" مهم جدا في حملات هذي السنة ، والنتايج أكبر دليل! .. النيباري اعتمد على تاريخه فقط فلا حملة اعلامية كبيرة ولا حتى ظهور في الاعلام المرئي أمام شعب "لا يقرأ إلا مايراه على شاشات التلفاز أو الكمبيوتر" في الغالب..

أماااا الخرافي فااااا "جاسم أبووونا" ، السنة اللي طافت قريت عنها والسنة هذي سمعتها بنفسي خارج مقار الاقتراع ، واللــه يرحم شي اسمه "وعي الناخب" !!!

أتمنى أسمع رايج بهالبوست اللي كتبته بأمل أن يخف الردح "اللي يفشل" على وسائل الإعلام

http://kashtah.blogspot.com/2009/05/blog-post_4995.html

تحيــــــــــــاتي

مَـــــعْــــمَــــعَـــــه said...

شدعوه ما تعرفين السبب وما تعرفين العلاقه بين الخرافي والنظام


انا اجزم انج تعرفين السبب وما يخفى عليج

khalid al-Qabandi said...

السلام عليكم
انا من وجهة نظري المتواضعه انه الخرافي وايد محسوب على الحكومة وبالعكس من جهة السعدون
ثانيا الخرافي وايد اهدا بالطرح في ظل الاوضاع السابقه من عدم انسجام بين المجلس والحكومة
ثالثا العم السعدون وايد صارم في قراراته ومايسمح لاحد في تجاوز اللوائح الداخلية للمجلس والمعنى احنا محتاجين لي هالشي لانه انا اتوقع راح اخفف من التجاوزات اللي صايرة داخل قبة عبدالله السالم

khalid al-Qabandi said...

السلام عليكم
انا من وجهة نظري المتواضعه انه الخرافي وايد محسوب على الحكومة وبالعكس من جهة السعدون
ثانيا الخرافي وايد اهدا بالطرح في ظل الاوضاع السابقه من عدم انسجام بين المجلس والحكومة
ثالثا العم السعدون وايد صارم في قراراته ومايسمح لاحد في تجاوز اللوائح الداخلية للمجلس والمعنى احنا محتاجين لي هالشي لانه انا اتوقع راح اخفف من التجاوزات اللي صايرة داخل قبة عبدالله السالم

khalid al-Qabandi said...

السلام عليكم
انا من وجهة نظري المتواضعه انه الخرافي وايد محسوب على الحكومة وبالعكس من جهة السعدون
ثانيا الخرافي وايد اهدا بالطرح في ظل الاوضاع السابقه من عدم انسجام بين المجلس والحكومة
ثالثا العم السعدون وايد صارم في قراراته ومايسمح لاحد في تجاوز اللوائح الداخلية للمجلس والمعنى احنا محتاجين لي هالشي لانه انا اتوقع راح اخفف من التجاوزات اللي صايرة داخل قبة عبدالله السالم

Cat said...

شعب دمه شربــــات

Anonymous said...

يقولون والله أعلم أن نص الكويت تحت أيد الخرافى أخوان

وأن من عمر حكومتنا تاخذ فلوس منهم

أعتقد وصلت المعلومة :>

Anonymous said...

المطران وغير المطران صوتو لمحمد هايف

عشان يكون شوكة بلحجكم

وانا واحد من الناس صوتله

بـو حـظـيـن said...

آآآخ بطني صج ضحكتني الأسئله الله يغربل ابليسج

بس سؤالج الأخير صدقيني الخرافي أفضل الموجود بإدارة الجلسة و شوفي اللي يمسكون الجلسة كنواب له و الخسبقة اللي تصير بيي يوم و بنذكر

أما هذا الغير معرف أول واحد فمعروفين منين إيون مثل اللي يطلعون بالليل حق الجبن .. حفرته شارع الصحافة عند واحد ينقاله يكيكي

بوعبدالله said...

سببين لتصويت الحكومه للخرافي ..

1- اكو ناس حالفين ان السعدون عمره مايوصل الرئاسه مره ثانيه (ما اقدر اقول منو هالناس)

2- تصويت الحكومه مو بكيف ناصر المحمد.. هذي اوامر عليا .. والدليل زيارة الخرافي ل"مراجع عليا" قبل اعلانه الترشيح للانتخابات حتى لا يفتح المجال امام السعدون لرئاسة المجلس

Q80 Blogger said...

لأنه ولد بطنها :)

ماعنده 4 اصوات ولا جان عطو السلطان والمطير والعنجري معاه

Q80 Blogger said...

بس بعرف شكو شفايفه ومايشرب ماي !!!

انا احسه وصخ الصراحه !!

عنيف said...

السبب انه الحكومه تصوت له باعتقادي طبعا

نعطيك مناقصات سكت السعدون وربعه وكل ما واحد صارخ شوي ارفع الجلسه

والسبب الثاني

يدز فراش المجلس بورقه ويقول حق الحكومه انسحبي مو من صالحج تقعدين

حتى مره من المرات نسوا يقولون حق صاحبهم وزير الماليه الشمالي وخلووه داخل الجلسه يضغطونه النواب

وهذي هي الاسباب المقنعه

زائد انه مخطط انه كل يوم ينحل المجلس

عشان يتستر على المناقصات

انور عبدالله - القصر الأحمر said...

ناصر المحمد قلبه طيب واشاد فيه السعدون نفسه

وعندي سؤال

ليش الناس اتدخل بصلاحيات الامير ؟

طبعا منهم انتي

بعدين ديري بالج لا تصيرين ضد راي اسيل ترى تزعل منج

أبو الدســتور said...

توهتينا
كل وحده يبيلها رد و يبيلها بوست انرد عليج فيها

جوهر من افضل النواب من وجهة نظري
وانا سني ولو كنت بالدائرة الاولى سيكون صوتي لجوهر

Anonymous said...

تبين الاجابه


لانهم مايعرفون الرياييل

ان الحق لابد ان ينتصر اذا وجد من ينصره

إمـرأة لا تُنسـى said...

سمجة بدون الماي ما تعيش


:)

بيت القرين said...

كيفي
تعليقي بس على استقبال ناصر المحمد
شعب الكويت بطبعه يلتف حول أهله وعياله
وذا الشعب يحبه
مو معناته ابد ان يكون قائد ناجح

انو
ممكن

ابوجيج
انا طرحت علي الراشد كإسم من قبل
انت هم اقترح
يمكن نلاقي اسم توافقي
ونحن عليه وايد
بدال التطمش على الخرافي

بدران
اي والله اي والله

بوحامد
هم صح

انو
يعني الناس تقرى حق اللي عنده شعر؟
شتبي؟

مطقوق
صوتوا له واشتغلوا معاه ما يخسر
افهم عاد

مغاتير
بالنسبة لموضوعج الفكرة روعة
بس المشكلة عندنا ماهي نصوص
المشكلة تطبيق النصوص
وابسط شي
شخبار منع الموبايل بالسيارة اللي خبونا فيه؟

معمعه
انا ابي اجابتهم اهما
ندري في مليون سبب
بس اجابتهم شنهي وليش؟

خالد
اي بس الخرافي شنو قاعد يقدم حق الحكومة
اللي متمسكين فيه؟

كات
يعني انا
:p

انو
يعني الاخوان الرحباني عطونا موسيقى وفن جميل
الخرافي اخوان شعطونا؟

انو
الله يهديك ان شاء الله

بوحظين
يعرف يدير المجلس وثلاث مرات ورا بعض ينحل؟

بوعبدالله
عيل ماكو الا ان النواب اللي احسنا اختيارهم يحسنون الاختيار

كويتي
لا حرام عليك حتى بالسجن كان يسبح
:)

عنيف
انزين متى يقتنعون انه ما منه اي فايدة

انور عبدالله
وين راي الأمير بالموضوع؟
وحتى لو اختلفت الآراء
ترى الكويت من عمر يختلفون فيها الناس
عادي ترى مو عيب

ابو الدستور
هل كيف
نورني؟

انو
ما يعرفون الرياييل خل يعطون رولا او سلوى او اسيل او معصومة
:)

امرأة
منو السمجة ومنو الماي؟

انور عبدالله - القصر الأحمر said...

رئيس الوزراء يتعين بصلاحيات من الامير يعني اهو يختاره فأنتي مالج شغل ليش اهو يتعين رئيس وزراء

بعدين سالفة رجع من العلاج وصار قوي عيب هاذي اسمونها سخرية وليس ابداء رأي

والسخرية عيب عند اهل الكويت

حدس + سلف = الاصلاح وتطبيق الشريعه الاسلاميه said...

لان عايلة الصقر متهاوشه ويا الحكومه وويا الخرافي فشلون يقهرون الصقر يقهرون اذا خلو الخرافي رئيس المجلس

عنيف said...

يقتنعون انه ما منه فايده اذا هيئ ولده للمجلس بأسرع وقت ممكن ولا اهو ما كان يبي ينزل بس يوم راح العمره هناك سمع صوت يقوله انت رئيس المجلس القادم انزل الانتخابات والصوت قريب ويتلفت ومحد كان يكلمه

ولا يطلع حاط سماعة بلوتوث على اذنه وناسي عنها

معلومه:تدرين انه بصليبخات كان في رنج ابيض تسوقه بنيه مكتوب عليه من اوله لي اخره الخرافي والغانم
والبنيه تدش بيت ورا بيت وبيدها جنطه سامسونايت تتوقعين شنو فيها؟؟؟

عنيف said...

ممكن تعطيني رايج بالمقاله الاخيره الي كتبتها رايج يهمني

http://kuwaitfreevoice.blogspot.com/2009/05/blog-post_21.html

Anonymous said...

كنت أحد المعجبين بهذه المدونة في بداياتها ما تقدم الان من قراءة ما هو اسلوب اطفال سطحي
عيب نتكلم عن رجال باعمار اباءنا بهذه الصورة
وطالما لا يستطيع القائمين على المدونة كتابة ما هو رصين فالتنحي افضل لان التدوين امر خاص
وما تتفضلون فيه شان عام فأما ان يكتب باسلوب محترم او التوقف افضل

الـبـيـرق said...

لأنـه صـاحـب أمـريـكـانـا

:)

Anonymous said...

ندعوكم لحضور مسرحية "فريج بني نايم" والتي ستعرض على مدى يومين يوم السبت والأحد 23-24/5 في تمام الساعة السابعة والربع على مسرح جامعة الخليج-مشرف..
مسرحية شبابية هادفة مقدمة من فريق وصال الإعلامي بالتعاون مع فريق شبابي مميز..
فكرة المسرحية: مسرحية كوميدية إجتماعية و إنسانية تعكس حياة فريج كويتي مميز و تدور الاحداث في يوم واحد بانتظار شروق الشمس..
حياكم الله ..
لمزيد من الإستفسار : wesal.media@live.com