29/08/2008

إستراحة اليمعه + شخصية الإسبوع



نبدى بمقالة جعفر رجب أمس الخميس

حديثنا اليوم عن الخلاف والاتفاق بين السنة والشيعة في الكويت

السني يذهب إلى مسجده مشيا على الأقدام والشيعي بالسيارة

السني يصوم قبل الشيعي بيوم ويعيّد قبله بيوم، فالسني يصوم تسعة وعشرين يوما لان حكومتنا ما تحب تطولها، الشيعي يصوم اثنين وثلاثين يوما، بالإضافة إلى تأخير أذان المغرب ربع ساعة يعني يطلع عليه ثلاثة وثلاثون يوما بالسنة بعد التخفيضات

السني يأكل القبقب، والشيعي يحرمه مع انه طعمه حلو

السني يقول الله بالخير للسلام،الشيعي يقول سلامون عليكم

السني يقول لك «جزاك الله خيراً» ليشكرك، والشيعي يقول أحسنت

الشيعي يضع ملصقا اخضر على زجاج سيارته، وبعض شباب السنة أيضا يضع الملصق لزوم المغازل

الشيعي عندما يذهب لمسؤول شيعي يريد واسطته، يرد عليه المسؤول: ما اقدر القانون ما يسمح، أما السني إذا ذهب لمسؤول سني لواسطة، يرد عليه بالقول: ما اقدر القانون ما يسمح لي، ويخرج الطرفان وهما يرددان جماعتنا ما فيهم خير

الشيعي يذهب لسوق السمك لشراء الزبيدي... ولأنه غال يصّور معاه ويرجع البيت، أما السني فيأخذ توقيع الزبيدية للذكرى

الشيعي نوابه «يقصون عليه» لينتخبهم، أما السني فنوابه أيضا يقصون عليه

الشيعي يذهب لنائب سني ليمشي معاملته لان ربعه ما فيهم خير، اما السني فيذهب لنائب شيعي لأن ربعه ما فيهم خير

الشيعي مثل السني مسكين وعلى قد حاله... يعاني من مشكلة الأقساط، ويقف في نفس الطابور، ويعلقون في نفس الشارع وهم يتأفأفون من الازدحام، ويعانون من نفس المشاكل، ويضحكون على وزارة التربية في منعها نور ومهند وسماحها للميس، ويبكون على الاوضاع السياسية والاقتصادية والصحية والتعليمية في البلد، وينادون بدولة القانون، ويأسفون على الماضي، ويضحكون على نفس النكت

يا امة ضحكت عليها الدنيا كفى... فالعالم اكبر من فلان شيعي وفلان سني

مقالة حلوة واهيا الجزء الاخير من سلسلة مقالاته عن موضوع الشيعة والسنة

جعفر قول الصج تقرى بيت القرين؟؟؟


تدرون إن فيلم شمس الزناتي سوّاه عادل إمام كرد فعل على غزو صدّام للكويت


وتدرون إني إقترحت من سنة إن يدخلون بعض الشيعة لهيئة الرؤيا عشان الكل يصوم ويعيّد بنفس اليوم


وتدرون إن كلمة ديوانية بحسب دليل ديوانيات القبس اللي وزعوه امس الخميس


أصلها إن كسرى شاف الناس عنده يسولفون جان يقول لهم ديوانه


ومعناها ميانين بالفارسي


:)


تدرون إن اللي سوى الدشداشه عمره ما فكّر إن تستخدم مثل ما يستخدمونها بالصورة اللي فوق

على فكرة هالصورة بالكويت

إي صج

إذا ركبتوا سياراتكم وشغلتوها وشفتوا بالمرايا ان في ورقة محطوطه على الجامه الخلفية

مو تنزلون والسيارة شغّاله وتشيلون الورقة

لان هذي خطة من حرامية السيارات ناطرينكم تنزلون ويركبون السيارة ويمشون

وتكونون انتوا شايلين لهم الورقة مرة وحده بعد و مشغلين لهم التكييف

:)

تدرون إن عبدالله الهدلق الكاتب المينون بالوطن يقول

وستنتصر اسرائيل بإذن الله

تدرون إن فنان اللي مسوي هالعرض
:)


تدرون إن موقع وزارة الخارجية الإسرائيلية يزخر بمقالات لكتاب من الكويت من جريدتين السياسة والوطن


شخصية الإسبوع

يايب 6 أهداف بعشر ايام بس وسبب من أسباب تصدر القادسية لمجموعته ببطولة الخليج


بدر المطوع شخصية الإسبوع


قدساوية وكيفي


:p


وهيه هيه قادسية


12 comments:

كاريكاتير said...

السلام

الزميلة بنت القرين بما انج عنونتي مقالتج باستراحه اليمعه فراح اغير من مقالتي اللي اكتبها كل جمعه واللي مسميها استراحه الجمعه وراح تصير آخر الاسبوع لأنج اكبر مني في التدوين وعشان لا طلع احد يقول فلان قلد فلان..

بالنسبة لجعفر رجب استاذي في الرسم والكتابة دائما ما يبحث عن نقطة التلاقي بين الشيعة والسنة واللي للأسف هالنقطة ضايعه!!

شمس الزناتي فيلمي المفضل مو لأنه في اكشن "مصري" لا بس لأن عادل امام يستغل سذاجة الكومبارس بالفيلم ويضحك الناس عليهم مثل بعض اعضاء مجلس الامة لما يضحك على الناخبين والناخبين يصفقن له ويقطون عقلهم بحضنه!!

اما كونج قدساوية فانا قدساوي ومن عمر واحد تلاميذ المدرب زوران اليوغسلافي بالنادي اللي ما كملت فيه أكثر من شهر لأن مشرف الفريق اختار اللاعبين والمدرب واقف يمه يطمش "ليش ما اختارني"

عموما بانتظار جديدج.لاتطولين

تحياتي

Salah said...

المجد للقادسية!

ان شاء دوم فوز وبطولات

:)

kila ma6goog said...

يا رب الأثنين

kuwaitforus said...

حسنا عدل بالبوست
:)
كرهنا مواضيع الشيعة والسنة
بس خلاص

Anonymous said...

مرحبا دانه
تحليلي لظاهرة موضوع انت سني او انت شيعي في بدايتها الظروف الاقليميه بعدها موضوع التابين وتاجيج جريده الوطن له بعدين انشاء عدنان وربعه لتكتل شيعي ولبس الشيعه الطاقيه المذهبيه والمظلوميه واصبح بعدها فريقين شيعي عدناني ايراني الهوا والفريق المضاد له
ولا احنا من قبل من متى نفرق بين شيعي ولا سني اصلا ماكنا نعرفها واهلنا يزفونا اذا قلنا فلان شيعي او فلان سني ..الوالد الله يطول بعمره من عمر واهو يسمع حق الشيخ الوائلي الله يرحمه ويروح لدوانيه البغلي (الشيعه) ولا كنا نفكر بهالشي
على فكره لو السيد عدنان بدائرتنا جان صوت له ولا يهمني مذهبه او ديانته يهمني ادائه واخلاصه
دانه والي يعافيج جيكي اذا اكو (ظ)كاتبها (ض)اوالعكس وانا مادري :)

عبدالله الهاجري
كيفان:)

Anonymous said...

هذي المشكله

نشوف المقاله ولا نشوف تعليقات المعتوهين عليها

شوفوا بس جزء من التعليقات علشان تعرفون ان بعض الكويتيين يبيلهم نسف

-------


سني ولا شيعي
احمد العنزي
والله كلام فاضي ولا له معنى ولا له اي موضوعيه سني شيعي مالنا شغل فيهم والي يحاسبهم رب العباد والله يحاسب الي يسحب الصحابه ابو بكر وعمر وعثمان وام المؤمنين عائشه والي براسه في عقل يتمعن النظر في سيرة الخلفاء وبعدين يقرر وين يكون سني ولا شيعي ولا يقول مالي شغل اهم يسبون



-----


السني يستعين بالله مباشرة
أبو اسليمان
السني يستعين بالله مباشرة ويقول يا رب اهدني والشيعي يستعين بالله ويقول يا علي والسني يبدأ بالسلام والبسملة والشيعي يبدأ بالصلاة على أل محمد ولعن أل محمد ويبدأ التعوذ من الشيطان


-------

مقاله بلا معنى او هدف
العجمي
ما عندك سالفه ومقالتك مثل وجهك

al-nokhitha said...

Baiiih 3ala esiim el mawthoo3 thakartni eb barnamij estiira7at el yem3a o 3ala 6ool eqniyathum gamat etwiin eb athooni ;p

Wala Chena hal Sena bet9eer o eb yetafqoon o ben9oom ma3a ba3ath :)

wala shawagtini abi ashoof film shams el zenati ;p

Kafu walah khoosh e5tiyar 7ag
sha59eyat el esboo3 oo
HEYA HEYA EL QADSIIIYA :D

Eng.f said...

الطائفيه.... شيعي-سني
التفرقه.... بدوي- حضري
المهري... الخكري
وهايف ... الهايف
الظاهر انتوا ما راح ترتاحون يالشعب الطائفي الا ليمن يصير عندنا حرب طائفيه نفس لبنان على العن ابو كل واحد يقوله ان مذهبه صح وما ابي اعلق وايد على هالموضوع لان احس الشعب الكويتي يستاهل الي يطق على راسه نفس الشعب العراقي ما تبون تركدون والله يعزك يابو ناصر الي ساكت على هالأشكال ويحفظ ديرتنا
وعموما لا تشجعين ولا فريق احسن لج لان هذاعنصريه بالألوان

Anonymous said...

السني يذهب إلى مسجده مشيا على الأقدام والشيعي بالسيارة

والسبب كثرة عدد مساجد السنه وقربها للبيوت
مع قلة عدد مساجد الشيعة وبعدها عن البيوت

والدليل اللغط الوارد بالصحف اليومية في قضية بناء مسجد الشيعة بمنطقة غرب الجليب

ومبارك عليكم الشهر

a.b.a said...

مرحبا ابي اعلق على فقرة بأن " السني يحط ستيكر اخضر عشان المغازل " هههه ،، هذا اكيد مغازلين اخته عشان جذي ذاكر هالسالفة ولا اهوا شدراه عن هالحركات !! :)

Chaotic pOsha said...

سني شيعي سني شيعي سني شيعي انغثينا الوضع من سيء لي اسوأ

لو تسمعون سوالف الوالد عن السنه والشيعه قبل على ايامهم تنقهرون من اللي صاير الحين! مادري ليش هالعنصرية بين الطرفين اللي انخلقت من ولا شي. شالسبب ليش قبل متوالمين والحين اعداء بعض ابي افهم! لييييييش

حمودي said...

مبارك عليكم الشهر
:)