05/08/2008

إجازة قصيرة بس

ما عليه أعتذر بس إجازة قصيرة جدا يعني لي نهاية الإسبوع هذا

ونعود إن شاء الله

وأخليكم مع النجمة الفنانة المتألقة المتأنقة المتهلقة شمس قبل التعديل



و هم أخليكم مع إحساس راقي جدا جدا جدا صعب ان يتكرر

الزمان أكل من الطفولة وشرب
وصديقتنا سكينه لها خمس أطفال
صارت أم مسكينه
وفلاح
صبينا فلاح..صار شايب
وشبابه راح
الزمان أكل من الطفولة وشرب
ونهب غناوينا وحزاوينا بغضب

وأنا شوفني بعد الطفوله مكسّره بجنحين
مسجونه بسجن أيوب
خمس سنين
وإنت هناك
وأنا يا بعد روحي
حياتي كلها ويّاك

حبيبي يا طفلي البرئ
بعدي طفلة بعيونك؟
قالوا لي بعدي طفلة بعيونك
تكتبني قصايد في سما الأشواق
توزعني قطع حلوى على العشاق

ياما كنّا طول الليل على الدوّه
في ذاك الشتى الوردي
نغرق في حزاوينا ولا ندري
ويذوب الشاي في الغوري
والجمره تصير رماد
والليل الطويل
يقعد ويرد ينام بعد سهاد

ياما كنت أنا افلّيك
ياما كنت تفلّيني
ياما كان يحضنا الدفا وينام
بس طفلين على الدوّه
عينك في وسط عيني

ياما كنت تخجل من كلام أمي
وإهيا تقول
انته من نصيب فلانه
وهي من نصيبك بس
ياما كنت تسابقني على أكل اليقط والخس

وكنت مسكين تحبني وايد وتحتر
وعلّي تغار
حتى من صبينا فلاح
علّي تغار

واذكر يوم هديتني فيه فركيته - يعني شبّاصه
فركيته أم ثلاث آنات
بس كانت جميلة منقّشه بوردات
كانت درّه في عيوني
تسبح في وسط موجات

بعدها الطفله تحبك
بعدها تسأل النسيان
عن قلبك
بعدها تعيش وهي بعيده في قربك
بعدها الطفلة مسكينه
وقلبها الطيب الحبوب
يغني دوم بأشعارك
ويطير فرحان
لما يسمع أخبارك
بعدها الطفله يا طفلي
بعدها تحبك

كبرت
حبيبتك الطفلة كبرت
وين إنت كلمني
عيني في إنتظارك
والشعر منسول على الصوبين
ورموشي ستاير
على طول العين
أبيك تشوفني حلوه

أبيك تقول بخدودي السمر أشعار
من شعرك
أبيك تحطم الحرمان في بيتين
أبي شمس وكواكب
تنبت بصدري
أبيك إنت
إنت يا عمري


من سنابل السمره
فايق عبدالجليل

10 comments:

mowa6en said...

بالسلامة .. اختيار الاغنيه يعبر عن مزاج لطيف

Mohammad Al-Yousifi said...

مزاج اليوم

المطرف

kuwaitforus said...

بالسلامة انشالله

فريج سعود said...

تردين بالسلامة
بس مو تردين جلحة علبو تان

Anonymous said...

entay met2akda ena ele bel video
3endich ehya ele bel bil video hatha ;p

etha ee 9ej 9ej el doctor sha6ir
o a7san men mal shayma2 3ali ;p

http://www.youtube.com/watch?v=Ff6ROiQ4dwU&feature=related


ejazaa sa3eeda enshalah :)

Anonymous said...

dalal.eng:

بالسلامة انشاء الله وانا اقول اخذي اجازة شهر احسلج اواحسن لج

(:

وطالعي مباراة اليوفنتوس مع مان يونايتد واستمتعي باللعب الايطالي

ودمتم سالمين.

3abeer said...

كسوف الشمس مو شمس

خرعتني!! صارت الحين شي ثاني

Bavaud said...

بالسلامة انشالله
بس ترا حيرونا! الحين صج هذه شمس؟
يا جماعة مو معقولة العمليات جذي تسوي؟
ولا لا عدل... اللي يشوف احلام و انغام الحين!

إمـرأة لا تُنسـى said...

سبحان مغير الأحوال
... هي صج كويتية؟
شكيت فيها.. :\

Anonymous said...

الله يرحمك يا فايق

:\