24/08/2008

أيام الطفولة



طبعا لو هذي صورتي ايام الطفولة

جان من زمان بايعتها على اللي يسوون كروت ومطلعه الاف

بس التمني سهل

المهم

بشارككم وشاركوني بايام الطفولة

أيام الطفولة

فكرت إن بما إن نلبس طفاحيات بأيادينا ونطفح بالحوض

فأكيد إذا لبسناهم بريولنا نمشي عالماي

سويتها وريولي طفحت بس

:)

أذكر مرة كنا بلندن

وكنا بسيلفرج
شلون تنكتب عاد طوفوا

وسألت أمي وإهيا عند الكاشير

ليش ما تعطينهم رقم الصندوق

وكان في حجية كويتية واقفه صوبنا

ضحكت علي وايد ليما اليوم حارتني

:p

أنا ليما الحين ماني فاهمه شلون كنا نقدر ننسدح ورا عند ليت البريك بهالمرسيدس؟؟


أيام الطفولة كنت أحسب إن هولك هوغان صج قوي ومحد يفوز عليه الا ابوي

:)

انا مادري ليش وإحنا صغار

اذا عجبنا اي شي بالفيديو او التلفزيون اول ما يخلص نعيده ونطالعه مرة ثانية

انا من ناحيتي مسرحية طرزان يمكن شايفتها 1000 مرة



وكنت أتنرفز إذا أحد قال لي ان السنافر احلى من الشناكل

وأبجي بعد

حبيت عبدالله رويشد من أغنية حق فرقة الإخوة إسمها البارحة عبالي رويشد يغنيها

:)

فات فات والله وفات اهيا اغنيتي المفضلة حق منى عبدالغني

بس المشكلة ماني لاقيتها الحين حتى
شروق مو موجوده عندها

كنت احسب ان السيايير لما يكونون بالشارع يكون هدفهم انهم يتسابقون

وكنت لما اركب مع امي اتضايق لأن اسرع شي عندها 80 يعني كله خسرانين بالسباق

:(

المشهد اللي بخالتي قماشه اللي ينطرد فيه عبدالرحمن العقل من بيت النفيسي كان يبجيني وليما اليوم ما احب اشوفه


أما أغبى شي كنت أظنه صج وأنا صغيرة إن الحرامي بالكويت يودونه السجن

اشوه اني تشافيت من هالغباء

أنا قلت ذكرياتي

ونسونا بذكرياتكم ولا تستحون منها

31 comments:

Anonymous said...

hatha a7la post garetah in august (maybe in the summer cause el kel mwagef)... el sanafer a7la :p

kila ma6goog said...

lool

aham shay el benz

حمودي said...

انا كنت مدمن مسريحةالعصابة مالت مريم الغضبان وهدى حسين

http://www.youtube.com/watch?v=buRO4kdUmCQ
---------
وكنت اخاف اتسبح عشان لا يطلع لي القرش من الشاور
:)

secret said...

على سالفة الحرامي .. حتى انا قالولي جذي .. الله يسامحهم

Zaydoun said...

تعليقات

سالفة الطفاحيات على الريول اعتقد كلنا سويناها

غالبية الكويتيين يعتقدون انهم بسباق سيارات... ما غلطتي

الحرامي اللي يبوق ٥٠٠ دينار يدخل السجن والحرامي اللي ينهب حلال الشعب والدولة يستقبلونه بالدواوين... اشوه ما هو من نسل مبارك، جان الحين يحق له يصير امير بعد

Dalal_eng said...

وانا قلت الحمدلله اخيرا طلعتي من السياسة شوي بس طلعت حدي متفائلة

:)

مشكلتي اني عندي ذاكرة ضعيفة ما اذكر الا شوي امي قالتلي راح تذكرين بعد الاربعين

زهرة الرمان said...

كنت مثلج مفكره كل حرامي يودونه السجن .. بس للحين ما شفيت :)

.
.

بس أكثر شي مضحكني بطفولتي كنت مطبقة " أنظمة لجنة الظواهر السلبيه " .. قصيت شعر ولد عمي لأن شعره كان خنافس وناعم .. قلت له مو حلو بناتي .. بس كليتها زف بالطالع والنازل .. فقير بعدها حلق صفر

.
.

أحلى بوست :)

دوار الجوازات said...

حلوه ايام الطفوله :)

ايام الغزو كنت اسوي اسلحه من كراتين الماي، واقول حق اهلي ابي احارب فيهم!!

طول فترت الغزو ما ادري شسالفه عبالي عطله مدرسيه وكنت احن على امي توديني المدرسه ! ليمتى عطله مليناااا

حلووووه الطفووله حلوووه

كاريكاتير said...

السلام

شخباري الشناكل والسنافر صج كان صراع عليهم كل واحد فينا يبي يصير واحد منهم

وبعد ما كبرت شفت السنافر بالجامعة!! والشناكل شفتهم بمجلس الامة

وعلى طاري ايام الطفولة

ودي اسأل سؤال بريء

جم مرة جذبت لما كنت ياهل وشنو اقوى جذبة قلتها وصدقتها بعد؟!

تحياتي

ManalQ8 said...

الجمال جمال الروح وانتي كسبانة الشهرة والصداقة في عالم المدونات
ولا لازم تكونين على الكروت يعني
:)

وشنو هالذكريات الحلوة

انا نفسج اسال شلون كنا ننام ورا بالسيارة
كانت جاكوار
ومو بس انا
واختي بعد

:)

ايام

دمتي بخير عزيزتي
واسرحي بذكريات الطفولة البريئه
:)

Anonymous said...

http://alwatan.com.kw/Default.aspx?MgDid=664749&pageId=67

Bad-Ran said...

بالتمادي

يصبح اللص بأوروبا
مديرا للنوادي

و بأمريكا
زعيماً للعصابات و أوكار الفساد

و بأوطاني التي
من شرعها قطع الأيادي

يصبح اللصّ
رئيساً للبلاد

أحمد مطر

al-nokhitha said...

Wala el post qawii 7ada :D

Ana Kent Af9el 3ala e'3niyat el genawii 7eta athkir kel youm kanaw e7ii6onha eb 9aba7 el khair ya kuwait kent agoom men el noom
3ashanha ;p

http://www.youtube.com/watch?v=g6PqLyECc7o

lama nerja3 men bait yaditi belail o 6reej baitna ejbari enmiir 3ala shari3 el 7ub o kanaw el shabab eshaf6oon 3end
a5ir U turn fa telgaiina ana o ekhwanii net hawash meno yeg3ad
3ala el yesar
3ashan eshoof awtha7 ;p

athkir kent atsaba7 eb may 7aar el 9eb7 3ashan agool 7ag umi ena feni e95oona o ma aroo7 el madrisa bs lel asaf kel youm asaweeha o
a7tirig o wala mara meshat
3alaiha ;p

Fii sowalif kelish '3air qabiila lel nashir ;p

3asach 3al guwa o mashkoora wayed wayed
3ala hal post el akthar men 7elo :)

5ayrhaa said...

alsanafer wayed a7la :P

ana lma kent e9'3er 3abaly efargon ben alwalad o albent lma enwaldoon men altarachy :P etha 3andah tarachy esawonah bent o etha mako e5alonah walad :P ....

bas 9ij a3ba6 shay kent afaker feeh o ana 9'3eer eny kent afaker athba7 kel ahaly o e5wany 3alashan 2oreth albeet o a3eesh feeh bro7y :P ayaaaaaaaaam

thanx 3al post alraw3a

Cute But Imperfect said...

اخييه عالطفووله! اشتقت لها تصدقين! كان كل شي وناسه! كل طلعه حلوة! حتى روحه المدرسه كانت حلوة!
بس شلون نسيتي ماما انسيه! هذي جزء كبير صراحه من طفولتي :p كنت استانس عليها و احن على امي عشان تخليني اروح لها و لما رحت لها مع المدرسه تبلعمت و ما عرفت اقول شي :S
انا بعد احب الشناكل اكثر من السنافر! السنافر كانوا يخرعون فكنت ما احبهم وايد فدايما اشجع شرشبيل :D
اول كان في قرقيعان بالشوارع صج! و كنت اروح المدرسه مشي مع امي بدون ما احس روحي مو كوول :S و دايما اشتري بريد من اللي يدور عند بيتنا! و كل مناسبه لازم احصل باربي! حتى لو عيد اهم شي كان الباربي! و ترا انا حافظه كل مسرحيات اول مالوت هدى حسين و كنت احب عبدالرحمن العقل حبا جما لووووووول
الحمدلله استمتعت بكل جزء من طفولتي! ما تحسفت على شي منهاالحمدالله! بس مادري شفيني لما كبرت الدنيا كلها قامت تخرف اعوذ بالله :D

بعد نظر said...

شطيتي عن مألوفج بس خوش بوست
و انا مع انونيمس السنافر أحلى
:P

Anonymous said...

برافو .... اي جذييه شي يديد وونيس (:

بيت القرين said...

أنو
ترى أبجي
:p

مطقوق
اشكره كنت تسويها

حمودي
مو شايفتها
وما فكرت ان الشور اصغر من ان يشيل قرش؟

سيكريت
اي بس الحمدلله وعينا

زيدون
اشوه
:)

دلال
خلاص ننطرج بعد الاربعين

زهرة الرمان
لا وظواهرج على ولد عمج مو على نفسج
صج نحاسة
:)

دوار الجوازات
لوول
أهم شي مليت من العطلة

كاريكاتير
أقوى جذبه اني كنت أفطر وأقول صايمه
وأدش الفطور شبعانه
:)

منال
مادري إن بالجاغوار هم يصير
:p

أنو
خلني شوي ناسيه البلاوي

بدران
أحمد مطر قال، احنا مالنا شغل

نوخذانا
تقوم من النوم عشان اغنية وما تقوم للمدرسة
صج ما ينعرف لكم يا يهال الكويت

خايرها
لأنك خايرها تقول السنافر احلى
:p
أما سالفة شلون تعرف البنت من الولد عجيبة

وعلى طموح الطفولة الدموي
مفروض تحط دراكولا بدال الجوكر

كيوت
ماما أنيسه ما يات مدرستنا
بس اذكر الفنان الصغير
:)
وعبدالرحمن العقل ليما الحين اذا شفته عالطبيعة استانس

بعد نظر
بهذي قصر نظر الصراحة
:p

بيت القرين said...

أنو
التغيير مطلوب أحيانا
:)

بعد نظر said...

لول اوكي
من ذكريات طفولتي
كنت أحب وليد الي مع الكابتن ماجد
و كنت أحب ادوارد حبيب ليدي ليدي
كنت امشي و أحب يحليلي
و كنت أشرب ماي و انا صايمة عبالي عادي

Mr. Remington said...

Thank you wayed 3ala hal post, ni7taaj baain fatra o fatra shay e6alli3na min mode majlis el omma o jaredat el wa6an eli ma warahom ghair 3awar el ras o rabi3 nabeel el 3awathi eli ma warahum ghair el maghatha o thegat el khilq

Abdullah said...

خووووش بوست
الصراحة ملينا من السياسة و الكلام اللي يعور الراس


من ذكرياتي
بذكر لكم فلم يتكرر بشكل يومي لما "كنت ياهل" ... ههه
:)

الله يسلمكم اذا طق الجرس و رديت البيت
كنت اروح لحديقة البيت و اتل ولد خالي معاي
يوميأً كنت اخذ شبليين صغار و احفر و اقص على ولد خالى و اقوله يالله احفر احفر ... باقي شوي و نوصل الى الكنز
و الخبل كان يصدقني !!!
احفَفَر و اهوو وراي ... ليما نسمع هرن سيارت امه علشان تاخذه و اقوله باجر نكمل الحفر علشان نحصل على الكنز و الغبي يقولي غط الحفرة لحد يشوفها

نيي ثاني يوم نلقى الحفره مصكرها صبينا و عااد انا اطقهااااا بجووه
ابببببييييييي الللكككنننزز !!!

الصرااااااحة راااحة
حزتها الخيال ماخذ حاصله و
كنا قمة في العبط و احنا نكرر العمليه كل يوم



تحياتي

zaradacht said...

للاسف ذكريات
كنت اعتقد انه رياضتنا احسن رياضه ونغلب الي كان
وكنت اعتقد اذا تهاوشت مع احد بالمدرسه انه قريندايزر راح يطلع ويتهاوش معاي
كنت احسب انه الكويت واهلها كلهم بلا استثناء احسن واكرم وانبل ناس
وكنت وكنت بس قتلج ذكريات
بس بصراحه صج ما ادري شلون كنا ننام بالطبلوم الوراني

Anonymous said...

صورة السيارة المرسيدس

لوحة السيارة تدل على أنها من فلوريدا

بس وقفة السيارة بالشارع تدل على أنها بشارع في بريطانيا


بانتظار الأجابة على أحر من جمر
: )

amwaaj said...

looooooooooooooooooool dana...aham shay salfat il6afa7eya !! jarabt nafs ilshay bel ba7ar wentahayt baal3a shkether maay baghayt amoot! :-p hmmm... chaleyhatna thak ilwagt dowr wa7ed men khashab + cheenko; sej ka7yana bas laha roo7 :-) wel ba7ar kan eroo7 b3eed (wagt iljazr)...wel 7aywanat shketherhom (khsoosan khyar ilba7ar)! namshy masafat men ghair la ey'2athoona iljet-skis aw masanaat men conrete tejra7 ilreel! bel lail nensede7 oh nesra7 eb sawaad ilsema wen3ed ilnojoom men ghair la ta3mneena kashafat ilmala3eb ely nshoofha il7een :-p ma atkhayal 6ofoolty men ghair bnaider- ayam 3ez'ha... :-) i know i sound like the senyaar advertisement but its true! our beaches used to be one of the world's best

فريج سعود said...

:)))
بشنو نشاركج
انتي كاتبة كل الي كنا نسوية

ما عدا سالفة الطفاحات

هههههههههههه

وانت لازم تيبين طاري شروق بكل بوست ؟
شنو تعويذة ؟

حمودي said...

زيدون
اشوه ان مو من ذرية مبارك جان احكمونا حراميه
;p

Anonymous said...

لا تحزني يا أختاه فالجمال جمال الروح ولك في علي بحر مثال.

Anonymous said...

قوة دانه
احس انه لي تاثير عليج لانه اخر تعليق لي طلبت منج موضوع اجتماعي ولبيتي الطلب :>
الي اتذكره كنت لما اشوف كبتن ماجد بعد مايخلص على طوووول اطلع الحوش وحتى لو بعز القايله وأشوت بالطوفه ظربات كبتن ماجد والي منها (ظربه خط النار,الظربه الساحقه..الخ
بالنسبه للذكريات الاخرى اهي ذكريات الغزو وخصوصا اني من كيفان واتذكر عدل المدرعات الي بحديقه المهندسين(حاليا مالت الصم والبكم الي لونها وردي)واتذكر القذيفه الي حاشت جيرانا بيت ماالله واتذكر المقاومه الي ينطون من بيت لي بيت ويرددون صيحات الله واكبر واتذكر طوابير الخبز لما كنت اروح مع الوالد واسوأ شي الي اتذكره وتعقدت منه اهو صوت المدافع والرشاشات

عبدالله الهاجري
كيفان :>

بيت القرين said...

بعد نظر
شنو الماي مو عادي برمضان؟
:p

مستر
صدقت

عبدالله
وشصار لقيت الكنز ولا بعد؟؟

زارادشت
لول
أحسن شي غريندايزر

أنو
هذي العولمة
:)

أمواج
يا جارتنا العزيزة سؤال المهم
الكويت فيها بحر؟؟؟
ما خلوا لنا شي منه

فريج سعود
شروق عبارة عن المرح والأدب والفن والهدوء والمشاكسة
منو ما يبي يكون مثل شروق علمني؟

حمودي
اشوه
:p

أنو
حلو علي بحر ما فيه شي
:p

عبدالله
صح انت اللي أثرت علي لكتابة هالموضوع
وضربة تنكتب بال ضاد
:p

صامدة أيام الغزو said...

كنت أحب رامبو ، لا والله عاشقه رامبو
وادعي ربي شكثر إنى أسافر أمريكا علشان أشوفه هناك وأعيش معاه قصة حب

الحمدالله والشكر :) طفوله دايخه بس حلوه