26/11/2007

موضوع استهواني


تحديث
**********
شارك مع مدونة العرزالة
لا لصحيفة سراق الوطن

::::::::::::::::::::::::::::::::::::::::
موضوع غلبته للعزيزة

white wings

إستهواني وايد وخلاّني أفكر وأحاول اكتب موضوع أغطي فيه جوانب معينة

بس دامنا بطاري

white wings

ترى عندها ندوة مع تجمع القوى الطلابية باجر الثلاثا مع عبدالرضا أسيري وجاسم السعدون وعبدالكريم الشمالي

بجمعية المهندسين جبال فدركرز شارع الخليج الساعة سبع

المهم الموضوع اهوا عن مقاطعة مؤسسة الوطن

ويمكن الشي اللي خلاني اكتب هالموضوع الحين

إني قمت ألاحظ إن صج صج ماكو مستوى

يعني بالفترة اللي طافت لما كنت أرد عليهم كان في أمور ممكن تكون خافية على الناس فأوضحها

بس هالايام لما يجذبون فأهما يجذبون أشكره

وماله داعي ينكشفون بس هذا مو معناه كلش إني أوقف عن كشفهم

بس اذا لقيت ان في مستوى

يعني أتمنى يرفعون مستوى الجذب شوي عشان أرد عليهم عدل

المهم ندش بالموضوع

بس قبل الموضوع

كان في اغنية

حريجة مريجة في مدرسة خديجة

ابي شنو بدايتها

صار لي اسبوع افكر وماني قادره اتذكر

يملك مؤسسة الوطن الاعلامية وزير سابق ارتبط اسمه بسرقات اموال عامة

وتحديدا سرقات الناقلات

وبعد ما كان ما عنده الا راتب حكومي صار عنده ملايين

خلص الغزو وشرى اشياء وايد ضخمة بالكويت ومنها جريدة الوطن

والله يسامح اللي باعها على هالاشكال

وطبعا من يوم ما استلموها لصوص الناقلات

واحنا مو شايفين منها اي خير

فتن - تفرقة - افتراءات - كذب

وطبعا لأن الفلوس ما تعب فيها كلش

فقام يصرف على الجريدة ويوزعها ببلاش ليما تغلغلت ووصلت حق عدد كبير من الناس

وطبعا هالانتشار حقق له نسب كبيرة من الاعلانات اللي قامت تزيد فلوس الناقلات اكثر واكثر

إلى أن اتحفنا بتلفزيون الوطن

وطبعا راح يكون مسيس وايد امس مستضيفين سعدون حماد وقبله العيار وقبله طلال الفهد والخرافي ووايد من هالنوعية

والخافي اعظم

شتبين دانه خلصينا؟
انا اقول لكم
لنفرض ان واحد يه وباق بيتج أو بيتك
وبعد جم يوم يه يبي يشتري بيتك من الفلوس اللي باقها
هل راح تبيعين البيت أو تبيعه له؟
او إن طلب منك تشاركه بشركة هل راح تشاركه؟
أو طلب ياخذ بنتك هل راح تعطيه؟

مفروض الإجابة المنطقية منكم تكون لأ

واذا سألتكم ليش لأ؟
راح تكون اجاباتكم
هذا حرامي هذا مو شريف هذا باقني شلون أفكر إني أتعاون معاه

طيب انا راح اسألكم شلون عيل تتعاملون مع اللي باق فلوسنا كلنا ككويتين؟
شدعوه اهوا الوحيد اللي بايق؟؟ ديرة بطيخ الكل يبوق فيها واذا قلت ماني متعامل معاه يعني ما راح اتعامل مع نص الكويت

ليش ما نخلي عدم التعاون مع الحرامية منهج انزين؟
عن المثالية الزايدة اذا ما تعاملنا معاهم ما راح نعيش

اي مو اهما بسبب هالفكرة عندنا اهما يبوقون وبفلوس البوق يستانسون ويربحون؟
شنسوي بعد هذا قدرنا

اذا الشعب يوما اراد الحياة لا بد ان يستجيب القدر؟
هذا شعر وكلام خيالي والشعوب السعيدة لا تكتب شعرا
وعن الخيال الزايد

وتعالي دانة شمعنى علي الخليفة يعني؟
شكو بعلي الخليفة أو دعيج الخليفة حتى؟ مالي شغل فيهم
بس هذا الإنسان باق ونهبنا بوقت الغزو وغير جذيه بفلوس البوق قاعد يفرقنا ويمزق ديرتنا

شلون باق يعني طلع حكم عليه؟
يا جماعة لجنة التحقيق لو كانت تحقق مع صدّام جان طلعوا بعدم كفاية الادلة على الغزو
مو مقياس
احنا عندنا وصولات واشياء ملموسة ان كان يتحول له مبالغ
وشوفوا موضوع اتحاد امريكا عنه، اللي حطيت له رابط بالموضوع اللي تحت
اي صج مبروك فوز الوحدة

خلصينا شنسوي يعني؟
ليش ما نقاطع هالمؤسسة بكبرها؟

إنتي من صجج جريدة ولها إنتشارها وتوصل ببلاش حق وايد ناس؟
إنتوا من صجكم؟!؟؟ مو هذي نفس الجريدة اللي سبتنا أيام نبيها خمس؟ مو هذي نفس الجريدة اللي صورت حملات نبيها خمس انها حفلات رقص؟ مو هذي الجريدة نفسها اللي ما خلت احد بالكويت الا وحرامي، شنو انتوا كلش ما عندكم احساس
تاكلون لحم خنزير؟؟؟
يقولون لحم الخنزير يموت الاحساس مادري عاد صج جذب بس قلتها

قاطعناها شبيصير يعني؟
ابد ما يصير شي، بس يقل الانتشار، يقل الاعلان، تقل ايرادات فلوس البوق
هذا من جانب اقتصادي
من جانب المواضيع
منو يدري مجلة المجتمع موجودة هالايام ولا لأ؟
انا مادري الصراحة بس اللي اعرفه ان قل الانتشار وايد
وما اعتقد إن احد يقرى شي عنها و في ناس ما يعرفونها
شاللي يمنع ان نسوي بجريدتهم جذيه؟

وتلفزيونهم وين بتروحين منه؟
مو اقول لكم اذا صار في مقاطعة من الناس للجريدة انهم ما يتعاملون معاها وما يشترونها او يشتركون فيها نفس الشي نقدر نسويه للتلفزيون
على فكرة سئلوا أي مفتي سني أو شيعي ما حكم العمل وتقاضي الأجر من جهة مشكوك في مصدر أموالها شك كبير؟
راح تكون الاجابة ان حرام ويجب تفاديها
هذا بالنسبة للي ما يعترفون بقانون الدولة ويا كثرهم ناخذهم من جانب ديني عشان يسكتون

إنزين شدعوه بنقدر يعني احنا جم واحد 10 أو 20 شدعوه بتفرق معاهم؟
نبيها خمس بدت بعشرة أو أقل وصارت قضية دولة وانقرت ارادة العشر لأن عندهم ارادة

هذا جزئي الأول من الموضوع ويمكن في جزء ثاني بناءا على ردودكم اللي يمكن تنبهني على اشياء غافلة عني

28 comments:

Anonymous said...

ماقول إلا الله يصلحج.. ونتي ماعندج الا الوطن او سوالفها ترا الناس ملت ..وتقولون تبون اتسنعون الديرة وتبون الناس على قلب واحد بذمتج اشلون الناس اتصير على قلب واحد وانتي اتقولين هل كلام يبا ترى احنا شعب واحد بسنا حش ونميمة وخلنتحجا بالي يفيد الديرة مو فلان قال وفلان سوا ترى مليينااااااااااااا

Anonymous said...

اختي دانة أنا حااس بالي تحسينة و كلنا ميتين قهر لكن هذه ضريبة القوانين اللي تأسست عليها الدولة محد راضي يعدل للأحسن السلطة القضائية محد قرب صبها لا من النواي (الإصلاحيين اللي بديت أشك في جديتهم) ولا النواب الإفساديين ... هذا اللي خلاني آخذ موقف المتفرج على المجلس لا تصوييت ولا حضور مهرجانات انتخابية ... الموضوع الحيين مو بس الوطن ترى لازم تقاطعين شركات ثنية تتبعله (زين) ( شركة طيران) و غيرها من شغلات و أتمنى هالحملة مو بس عن هالحرامس .. في 100 حرامي ما ندري عنه (لعدم كفاية الأدلة) و للأسف أختي اللي صاير الحيين ان في ناس قامت تشط عن مسارها اللي تعهدت عليه سواءا كانوا طلاب او اعضاء او نشطاء سياسيين و نشوفهم قاعديين جنب رؤوس الفساد (شوف عيني) او مشاركتهم في مصالح (شوف عيني) و اذا بطلع أدلة للأسف اخاف تقولون ماكوا ادلة كافيه (صارت الكلمه هذي شماعة)

لذلك قررت اوقف في موقع المتفرج على الوضع لأني صج بديت أفقد المصداقية بكل الأطراف

والله ولي التوفييق و يحفظ ديرتنا

ربنا يمهل ولا يهمل تذكرييها زين و الحرامية يعرفونها أكثر منا انا وياج

DiLLi O MiLLi said...

أبتــديها أنتي يا دانــه
وشيــلي اللنـك مالهـا من بلوقج


وأنـا من شراهـا الحـرامي وأنـا مقاطعتــها
اللـهم بس تعرضت وأنتقدت مقال فداوي الشيخ الحرامي "فؤاد الهاشم" في بوستي
LooK Who's TalKinG !!


أما "قـناة الوطـن" فأنا من طلعت .. ماااا ضبطت القناة عندي


و

(((( لأ ))))

لقنــاة الوطـن
وجريــدة الوطـن

فتى الجبل said...

اتفق معاج بحجيج مع ان الشعب شعب ماكاري وعيشني اليوم ويصير ألف خير باجر
الا ان النقطة اللي ضحكتني صج انج تبين الناس يسألون الملالوة
يدانة مو معظم الملالوة السنة والشيعة لا وملالوة مسيحيي الكويت يشتغلون معاه ويقبضون رواتب منه
عيل اشلون بقولون حق الناس الشغل معاه حرام
ودأي يا مزيكا ورأصني على حبه ونص

فريج سعود said...

فكرة مقاطعة الوطن لازم تبدي من الكتاب والعاملين فيها من الشرفاء
لان في بعضهم اوادم ونبي نقراء لهم لو نشتغل عليهم ونقدر نقنعهم بالتوجه الى جريدة ثانية تكون ضربة لهم وما يبقى لهم الا المتردية والنطيحة
فيسهل مقاطعتها

Anonymous said...

آنا اقول مقاطعه صحيفه الوطن مو حل لانه اولا الصحيفه عليهه انتشار مو طبيعي وما راح يفرق عندهه لو الف او حتى الفين يقاطعونهه هذا فضلا على وجود قناة تلفزيونيه تدعم الصحيفه وتساعدهه على الانتشار وثانيا الفكر يحارب بالفكر وهذا بنظري اهو لحل بواسطه التعقيب على المقالات وكشف الزيف وبيان الحقيقه ولا غير ذلك
الى الامام نحو الفكر السليم

Anonymous said...

انا وياج يالدانه قاطعيهم الله يلعنهم انشالله هم حراميه هم لسان طويل ومالج شغل بهالحجي اللي مايودي ولا ييب اللي يقول قاطعيهم بالفكر واللي يقول هذا مو حل عيل شنو الحل ؟؟
عندي قصة صغيرة وقصيرة لج ياالدانا
اقري القصة الحلوه
مره شريت كتاب من مكتبة ذات السلاسل
وما اذكر اسم الكتاب ولا الكاتب
المهم الكاتب يقول
كان في شركة من الشركات تصيد السمك عن طريق التفجير
طبعا القصة مو بالضبط بس هذا اللي اذكره لان الكتاب موعندي الحين
المهم طال عمرج
حلوه طال عمرج صح !!
قاموا يكتبون عنها بالجرايد بامريكا بس الشركة تنفي وتقول هذا جذب
مثل بنت الملعونه جريدة الوطن
المهم
قام صحفي ذكي تنكر وراح قدم على الشركة على ان يشتغل صياد سمك معاهم
من حظ هذا الصحفي ان الشركة وافقت عليه وتوظف عندهم
قوم اخونا الصحفي الذكي يهرب كاميرا معاه ويصور شلون يصيدون السمك
اهني صارت المصيبة
اول ماراجع البيت دز الفلم حق الجريدة الشريفة بنت الشرفة
وقاموا وفضحوا الشركة الملعونة بنت الملعونة
عاد انتي اهني فكري
الناس بامريكا شنو سووا ؟؟؟؟
طبعا الجمعيات والمؤسسات والناس كلهم قاطعوا هذي الشركة لين اعتذرت وعدلت طريقتها لصيد السمك
عاد الحين خل يفكرون ربعنا الفلاسفة هذا احسن حل ولا !!
يا اخي المقاطعه مو عشان تخسر الشركة او انك تقطع ارزاق الناس
المقاطعة رسالة حظارية تعبر فيها عن عدم رضاك للشيئ او ان توقف هذا الشخص عند حده
واللي يقول المقاطعة مو حل
ليش امريكا تقاطع الدول اللي ماتتماشى مع سياستها ؟؟؟؟؟
خلك ذكي وفكر وجواب

Anonymous said...

جبال فدركرز في شارع الخليج؟؟

شارع الخليج في جبال؟؟

جمعان العازمي

Anonymous said...

يت المطافي و وصوصوت

طووط طووط

وقالت

حريجة مريجة

في مدرسة خديجة

و قبقاب على قبقاب

في مدرسة المرقاب

مريومة..

Eng_Q8 said...

اولا خوش بوست
ثانيا احب اقولج اني كنت متابع مدونتج قبل لا اسويلي مدونه
ثالثا
المشكله الي الحين تتكلمين عنها عن جريدة الوطن والقطيعه معاها موضوع صعب
للاسف ان الجريده منتشره انتشار كبير والناس متابعتها بجنون فصعبه تقنعين احد بالمقاطعه... يعني اعطيج مثال انا لو تقطعين عني جريدة القبس او تاخرت يوم وقمت الصبح وماقريتها ينعفس مزاجي لانها صارت روتين وشي لازم اسويه كل صبح ومو جريده ثانيه لا لازم القبس... وطبعا في ناس مثلي وايد مدمنين على جريدة الوطن

الموضوع الي ابي اتكلم فيه وماادري اذا كان طايفج
هو توجه الوطن لتوظيف الشباب بمؤسستها بدءا بالمذيعين والمخرجين والكتاب حتى الفنيين
وتركيزي راح يكون اكثر على الكتاب فهي مفتوحه امام اي شاب يجد فيه نفسه انه كاتب ممتاز

لا وازيدج من الشعر بيت اهم الي يلحقونج مو انتي الي تلحقينهم .. واذا تبين معاش هم يعطونج... وهالشي مو سامعه من احد الا صار فيني انا وعرضوا علي (طالع عارضين على منو مايدرون اني ما اطيقهم)
بس انا رفضت

خلاصة الموضوع انهم يبون يستحوذون على الشباب وعلى العقول المفكره عشان تصف معاهم واذا اي احد ظمن الشباب راح يلقى وراه جيش لا يهزم

وهذا للاسف الي قاعد يصير شباب مستانسين تطلع صورهم بالجريده والا يطلع بالتلفزيون واهو ما يدري انه اداة بيد العابثين

وهم الشباب ما ينلامون لان مالقوا احد يحتضنهم


سوري طولت شوي بس منبطه جبدي من الردود الي قريتها

واتمنى تشوفين مدونتي وانشالله يعجبج بوستي اليديد

Anonymous said...

السلام عليكم ... إذا سمحتيلي عندي سؤال برئ ... ليش ما يكون علي الخليفة برئ ... شنو اللي يخليكوم متأكدين أنه حرامي ... شفتوه يبوق ؟..... شفتو الأدلة وعاينتوها .... ترى أنا ما تربطني أي علاقة بعلي الخلفية " على شان لا تقولين " ... وانا حالي من حالكم ظليت فترة أعتبر علي الخليفة مدان ... بس بعدين فكرت ... ولقيت أن سبب إدانتي له هو كلام الناس عنه لا أكثر ولا أقل ! يعني يمكن الكلام اللي نقل إلينا مو صحيح.......
المفروض الواحد ما يدين شخص ويحط بذمته إلا بعد ما يتأكد مثل ما أهو متأكد من نفسه... ترى باجر في يوم حساب
( أنا عن نفسي أقول ما أدري ... قد يكون بايق وقد يكون مو بايق الله أعلم ... ليش أحط بذمتي

إذا عندج أدلة ليش ما تنشرينها ؟

مع خالص الشكر

Anonymous said...

Salam,
Ya36eech il 3aafya ikht daana ! Min awwal ma fita7tay il blog waana KIL YOUM adish il blog o astamti3 bas haathy awwal marra a7i6 comment. Ana agool kalamich killa sa7, bas 3ala mawthoo3 il saf7a elly ib site a7san fir3 li firoo3 itti7aad il 6alaba bila monazi3 .. itti7ad amreeka ..3indy 3alaihom 3atab. Dam ohom chithee may7ibboona o yaboon yifthi7oona .. laish yakhthoon minna ri3aaya ? o ham nawy as'alhom o agoollich radhom 3alay inshallah.

bo bader said...

كلامك صحيح وواقعي ١٠٠ %

أنا مقاطع الجريدة من سنين والقناة والله ما أذكر أني جابلتها عشر دقايق !

ترى أكو أنشطة تابعة له ولازم نقاطعها مثل
iCity
ترى تابعة له وأنا مقاطعها من زمان

واللي يبي بديل لمنتجات
Apple
يروح محل ماك آند مور في المارينا
Mac & More
وحتى أسعارهم أحسن

المهم أني ما أنفع من سرقنا

ZwaiZ said...

sa7 elsanich .. e7na el-wa6an wagafna eshterakna men yoom shabaw 3ala esa3doun eb qisat el-fa7am i called them o wagafna lishterak la o kanat tousalna ebalash lain ma zafhoum oboy hehehehe wel qanat salfatHa salfa ba3ad ana 3an nafsi mata3abt rou7i o thaba6tHa bel decoder laish ena adri mawaraha khair bas inshallah allah egaderni wakhali rab3i esawoun methli

Anonymous said...

باختصار الناس مريحه مخها وهذا الي يحر تلقاهم يتحلطمون ومو عاجبهم الوضع واخر شي مشترك بالوطن ويصوت حق جمول يبي ياخذ شانيل ولا الثاني يصوت حق التافه وليد الطبطبائي بعدين يقول المجلس مامنه فايده
بربس

Anonymous said...

يا دانة يا حبيبتي احناشعب ما يشوف في البوق غلط بدليل إن إذا الشخص باق في الصندوق الكويتي انحطه وزير مالية ووللعلم
وزير المالية الأسبق بدر الحميضي طلع في القناة المشبوهة -بكل فخر واعتزاز-وبعد ما استقال الوزير/البواّق/الأفّاق تغنت فيه الناس واعتبرته بطل قومي وكتب فيه الربعي قصيدة عصماء خلتني أزوّع يكرم القاريء

اختلطت المفاهيم يا عزيزتي

وبالرجوع إلى السارق علي الخليفة فعندي يقين إنه ما باق بروحه وكان معاه كبار راح يكتب عنهم التاريخ بأحرف من فحم

وعندي سؤال: إشرايك في فاطمة حسين اللي فجاة -بعد هالعمر-قررت ترجع للكتابة في جريدة الحرامي؟

..... الفنطـــاس said...

كلام عدل وانا مهيتها وماقراها....بس
المقاطعه بالاول لازم تأتي من الكتاب الي لنا فيهم امل انهم اصلاحين

العرزالــــــه said...

انا كنت افكر بشي جذي..حمله للمقاطعه

وكانت احد الافكار ان يايبا محتاج تقراها؟ اقراها على النت اذا كلش كلش ولا انك تشتريها

فعلا الناس يقطون 100 فلس يستخسرونها بس اذا انا اقط وانتي تقطين وذاك يقط صار مبلغ محترم

Anonymous said...

" منو يدري مجلة المجتمع موجودة هالايام ولا لأ؟"

موجوده بالمكتبات العاديه و الجمعيات

ما راح تحصلينها بفيرجن

Bashar said...

دانة ..

فكرة المقاطعة قديمة .. لكن تعتقدين انهم يستحون؟ لا والدليل أن حتى لو قاطعنا فأنهم سيوصلون لنا نسخة مجانية .. يعني باشتراك بدون اشتراك الوطن توصل للبيت وتوزع في الوزارات والجامعة والتطبيقي مجانا :)

وفي صالونات الرجال .. ولا أعلم ان كانت توزع في صالونات النساء مع InStyle :p

العرزالــــــه said...

شارك معي في مقاطعة صحيفة الفتن وسراق الوطن

Anonymous said...

قليسقط الاخونجية فلتسقط حدس الموت لاسرائيل اللعنة على الحرامية

بيت القرين said...

أنو
بعد ما يصير على ابو ان احنا شعب واحد نخلي اللي يبوق ونسكت واللي يفرق ونسكت واللي يذبح ونسكت لازم نتكلم إخوي واللي سواه فلان دمر مبادئ دولة وحفظ القضية دمر امل دولة

أنو
لا تتفرج لازم نتحرك

دللي
اللنك عشان اللي يبي يرجع حق شي من خلال المواضيع اللي اكتبها مو عشان سواد عيونهم

وانا معاج بال لأ

فتى الجبل
وين الصح بهالديرة مادري؟؟؟

فريج سعود
خنطلع اساميهم ونكلمهم دام جذيه
وسلم على اختك
:p

أنو
كشف اكاذيبهم هذا المنهج امارسه من شهر 5 اللي طاف وغيري وايد بس نبي شي زيادة بعد

أنو
عين الصواب

جمعان
وايد فرحان بنكتتك يعني
:p

مريومة
في شي قبل يت المطافي
شنو اهوا؟؟؟

مهندس
اعتقد ان نقطة محد يحتضنهم هذي اهم نقطة يعني احنا بحاجة ان الجرايد تتحرك لاحتضان الشباب قبل لا يصيرون فريسة للحرامية

أنو
سؤالك بسيط ولك حق طبعا تسئله
لو ترجع للموضوع اللي قبل هذا راح تلقى اني حاطه لنك حق موقع اتحاد امريكا اللي فيه كل الوثايق تقدر ترجع لها
وإنت إحكم بعدها

خاجة
ننطر ردهم منك

بوبدر
يا ريت الكل مثلك

زويز
الله يكثر من امثالك
وان شالله تقدر على انك تقنع اللي حواليك

حمودي
لا تحرني اكثر
:(

أنو
للاسف ما ظل عندنا الا قليل وقليل جدا جدا جدا يكونون قدوة من الكبار
حسافة عليج يا كويت

الفنطاس
زين تسوي والله يسمع منك

العرزالة
بالضبط

انو
شكرا على المعلومة

بشار
تتوزع بصالونات النساء
الجريدة معتمدة على الجمهور
اذا ماكو جمهور ماكو جريدة

العرزاله
أكيد معاك

أنو
البقاء للكويت

White Wings said...

عزيزتي
أنا بعد ما طالبت بمقاطعة متابعة الجريدة والقناة، أنا تكلمت عن مقاطعة العمل فيهما ومعهما، وهم واجهت اعتراضات كثيرة

الجريدة موجودة على الانترنت وممكن الاطلاع على سخافاتها لغرض محاربتها، والقناة موجودة كذلك، ومتابعتها أحياناً لانتقادها ممكنة، لكن العمل معهما وقبض المعاش من هالمؤسستين، هذا ما لا أفهمه أبداً، ما أفهم كيف يبرر الناس هذا التصرف، أو كيف يظهرون هذه اللامبالاة...مليارات من أموال أجيالنا القادمة ذهبت في بطن صاحب المؤسستين
أنا لو أحد يسرق مني مئة دينار أموت من القهر، شلون وهو سرق مستقبل أجيالنا قادمة ومصدر عيشهم؟
يلا دانة، نقاطع، ترى هذا أضعف الايمان
سيري ونحن من ورائك
:)

Sn3a said...

تدرين
ابوي مكنسل اشتراكها من فتره طويله يتروالي من سالفه الحرب مالت لبنان
ومازالت توصلنا!
معنهم داقين عالبيت ابوي قال مانبي جريدتكم حتى لو ببلاش

sar7an 3abdelba9eer said...

سؤال محيرني مع هالحمله العنيفه على جريدة الوطن وملاكها , ممكن اعرف لو المقرود ما كان بايق هالمليارات والناقلات جان شنو بيصير مصيرهم ؟
احد بياخذ من هالفلوس شي ؟
الكويت ما عليها قاصر اتوقع بدال هالمليارات اكو مليارات المليارات , احد فيكم طايل شي ؟
بالنهاية ماكو فايده من الحمله تقاطعون واحد لانه باق مبلغ سخيف بالنسبه للي موجود عند الكويت او هم بالنهاية محد بيطول فلس حمر

ودمتم بمليارات

حلم جميل بوطن أفضل said...

لنكن أكثر صراحة

ثلاثة مقالات متتالية كتبتها عبداللطيف الدعيج تدعو للأسف الى نسيان ما يعرف بالمال العام بحجة أن الجميع يسرق

نعم الجميع يسرق أنا كتبت مثل هذا الكلام لكن هل لي أن أسكت بحجة أن أسرق؟ ما هذه الحجة الغريبة؟ خلاص كل واحد يبوق عيل و محد يتكلم عيل

و من سمح للسرقة من أوصل الأمور لهذا الحد من يدافع عن كل حرامي في جريدته؟

السرقة التي يقوم بها العوام مردها إنعدام الثقة في القضاء و غياب العدالة و التقسيمات التي مزقت الوحدة الوطنية و غلبة منطق من صادها عشى عياله و الإحساس العميق من رأس القيادة الى أصغر طفل الى أن الديرة مو باقية .. هذا الإحساس الذي آمن به علي الخليفة يوم أن سرق الأموال في ثاني أيام الغزو

عبداللطيف الدعيج للأسف للاٍسف أصبح مثل الباقين .. عديم إحساس .. أقولها بحسرة شديدة و الله.. فهو بعيد عنا .. و همومنا مختلفة

الأخ ينظر عن حرية نشر و منع كتاب و أذان صلاة الفجر .. بينما الشاب الكويتي لا يملك السكن المناسب .. و لا التعليم الصحيح لأطفاله .. و يخشى أن يصيب مكروهاً أحد أبناءه لأنه يعلم بسوء الخدمات الصحية .. تنتهك و تقتل أحلامه يوماً بعد يوما .. يلجأ للواسطة فهي ملاذه الوحيد .. حقوقه منتهكة في بيته .. و بات يخاف و يخشى من كل شئ .. ينافق و يجامل من أجل لقمة العيش .. و أصبحنا مثل مصر الستينيات و السبعينيات و نحن الدولة النفطية الغنية المليئة بالقدرات البشرية

لا ماء و لا كهرباء .. المصافي تنفجر .. المستشفيات تحترق .. وثائق القضايا تختفي .. الشوارع زحمة و البنى التحتية متهالكة

يظن عبداللطيف الدعيج بأن السعدون و مسلم البراك هم من يسير الشباب .. لا يحس بمعاناة الشاب البسيط .. و يرى الفرصة الذهبية لزرع أفكاره الخاصة في ظل هذا الإحباط المتنامي

من كان يصدق بأن عبداللطيف الدعيج سيستسلم؟ من كان يظن إن هذا المشاكس سيرفع الراية البيضاء؟ هل مبدعون كويتيون هم من سيقلبون الأوضاع و سيحسنون الخدمات المعيشية؟

كفاكم تنظير فقد ذكرتوني بماري إنطوانيت حين قيل لها بأن الشارع لا يجد الخبز ليأكله .. فقالت .. و أين ذهب البسكويت؟

و كم ماري إنطوانيت لدينا في الكويت تستحق أن يدق عنقها

إعذروني إن سمعتم مني ما لا تودون سماعه

Anonymous said...

مقاطعة جريدة العفن عين العقل ..

مع أني مقاطعتها بالفطرة الى أني أدعوا الجميع الى التعاون و ومقاطعتها بأسرع وقت ....

شكرا جزيلا.