29/06/2009

مالت عليهم

عاجل جدا جدا جدا
اللي يقدر يطلع لي كلمة خليفة ولد وزير النفط الأسبق علي الخليفة ببرنامج تو الليل البارح
حلقة الاستجواب
أكون ممنونه له
خنشوف شسالفة خليف

مو هني سالفتي طبعا

طلع حكم على مجرمين الناقلات أخيرا واهما عبدالفتاح البدر وحسن قبازرد ونسيم محسن وتيموثي

كل واحد طلع له بخوش سنين يقضيهم ورا القضبان اذا انصاد

بس مو هني موضوعي

ابي اكبر جريمة سرقة بتاريخ الكويت
والوطن عندها صفحة امن ومحاكم ليش ما نشرتها؟؟

ترى علي الخليفة بريء عادي نشروها
:)

انزين

الاستجواب الأخير قسم الناس لي رايين وهذا شي طبيعي وعادي بكل موضوع

الطرفين اللي عندنا الحين طرف مؤيد لطرح الثقة ويقول هذي خمس ملايين يا ناس وموضوع غير قابل للنقاش

بغض النظر منو اللي مقدم الاستجواب
وبغض النظر منو اللي واقف معاه والهدف من وراه

أما الفريق الثاني فمنقسم لأقسام

طرف رافض طرح الثقة لان نوايا المستجوب وطارحي الثقة موشي ولأنه معظمهم خريجين فرعيات
وطرف رافض طرح الثقة لأن الحكومة ما تغلط ابد
وطرف رافض طرح الثقة لأن الاستجواب قام على اساس غير دستوري في المحور الأول سبب المشكلة تحديدا

الآراء كلها تقريبا حصرتها باللي انذكر اعلاه

طيب انا ماني محدده مع اي طرف اوقف

بس بقول شي للطرف الأول اللي اظنه تطرّف وايد بطرحه

بقتبس احد ردود العزيز جدا نيو وادري ان اهوا من الناس اللي يفهم ان الاختلاف مو خلاف

شوفوا هالرد من عزيزنا
نيو

اذا نواب التحالف و التحالف نفسه كتيار صوتوا مع الوزير مالت على النواب و التحالف فوقهم

طبعا كثيرين من مؤيدي طرح الثقة من المدونين خصوصا والرأي العام بشكل أكبر يتبون هذا التطرف اللي اشوفه من عزيزنا نيو

يمكن اقل حدّه عند البعض وأكثر عند البعض الآخر

اللي أبي اقوله إن بإستثناء بعض البصامين واصحاب المصالح من الطرفين ففريق طرح الثقة وفريق منح الثقة فيهم ناس فعلا اصحاب رأي يا جماعة

يعني ما يصير نكفّر صالح والعنجري واسيل مثلا لأنهم فقط يشوفون موضوع الخمس ملايين من زاوية ثانية حتى لو اختلفنا معاها

محد منهم قال إن الخمس ملايين مافيها شي
وهذا شي كلنا نجمع عليه
من دون إستثناء

لكن هدوّا اللعب شوي والحوار الحوار الحوار مو أكثر

خلنسمع خل نتحاور خل ننظم لقاء مفتوح حتى بهاليومين شالمشكلة؟؟

بس مو كل واحد ينبذ الثاني وبعدين نقول ديمقراطية وتعدد اراء

المسألة ماهي مسألة فساد وإصلاح ولا كل الفاسدين متعسكرين بمعسكر والصالحين بمعسكر ثاني

كل معسكر بالقضية فيه الزين والشين

على سبيل المثال بس المجرم خالد الطاحوس والمجرم سالم النملان والمجرم الصيفي الصيفي وأحمد السعدون بتيار واحد واللي اهوا طرح الثقة بهالقضية

بالمقابل هم في مجرمين فرعيات وخلف دميثير بالاضافة الى معصومة وعلي الراشد وعادل الصرعاوي حسب ما وصلني بتيار واحد اللي اهوا مع منح الثقة

هدوا بالكم شوي

ولا تكفرون أحد أرجوكم
للعلم فإن ملاّك شركة مايكروسولوشينز أصحاب العقد ال 5 مليوني اهما
أحمد حامد الغانم - حمد ناصر العلي الصباح - حازم خالد سليمان الجارالله - سعد محمد الحميدي


وأخيرا أحلام غنّت أغنية حلوة
:)

16 comments:

راعي تنكر said...

شنو هي الزاوية الثانية ؟

بيت القرين said...

راعي تنكر
ننطرهم يعلنونها
انا قلت كل الآراء اللي سمعتها وقريتها
بس الملا واسيل والعنجري ما سمعت او شفت اراؤهم بعد
فننطرهم

راعي تنكر said...

مالنا الا الصبر

انا ودي يصوتون ضد الوزير
واذا ما صوتوا ضده
عندها اتمنى انهم يقنعوننا لماذا صوتوا معه بالحجة والبرهان العقلانيين

لكن ما لا اتمنها اطلاقا ان يكون موقفهم الامتناع
عندها سينضمون بكل شرف الى مجموعة نواب لا طعم لا رائحة لا لون

بيت القرين said...

راعي تنكر
يا زين عقلك
:)

Anonymous said...

خليف السخيف قال ابوي شريف غصبن على شواربك يا مسلم البراك وقال ابوي أشرف منك هذا متأكد منه بس مادري ليش يتراوالي انه بعد قط كلمه بالنص اقوى انا الحين قاعد اطالع الاعاده

haifa said...

بالنسبة لقضية الناقلات

جنهم يجددون فينا الحسرة والقهر

وعلى فكرة واحد من المحكوم عليهم والحين طبعا متنغنغ بالعز جنسيتة فلسطينية

ورغم الاحكام اتحداهم يتلونهم بالانتربول .. للاسف السالفة كلها حبر على ورق

Anonymous said...

شنو الزاويه الثانيه اللي تسمح للوزير بهدر 5 ملايين من المال العام

بغض النظر عن العذر السخيف اللي يقول ان الصفقه صارت في الوزارة السابقه
مو الوزير رجع نفسه يعني شلون نأمن على وزير اهدر 5 ملايين ولم يرد على اسألة النواب ولم يرد على ديوان المحاسبه وحول القضية بدون اتهام تمهيدا لحفظها
والله ان اعذار المؤيدين لاتمت للعقل بصله ولاتقنع طفل

MFTELET said...

ياعمي صوت خليف حده مرتبك وهو يتكلم , لو تسمعونه عدل جنه حايشته رجفيه ,, وانا حاط امل بس على العنجري وبشوف شنو رايه

بوحمد said...

سواء كان الاستجواب كيدي أم قبلي أم غير دستوري ولا ندري ماذا يخبىء لنا علي الراشد من تسميات في المستقبل...يبقى هناك تعدي على المال العام من قبل الوزير وتجب محاسبة المخطأ سياسيا وجنائيا..
ودور الشعب محاسبة النائب إن أخطأ ..
بالنهاية .. أين مصلحتنا نحن كشعب ؟؟
نحاسب المخطأ ؟؟
إني أرى مايحدث الآن مشابها لما يحدث عندما يتم القبض على تاجر المخدرات متلبسا من قبل النيابةويحكم له القاضي بالبراءة بسبب خطأ في الإجراء الإداري ..

سالم said...

خليف ؟

شنو هذا؟؟

وين أمن الدولة عنج؟؟

والله عاد ماهميتيني لا أنتي ولا أهو .. بس قاعد أشوف الدول اللي حولنا وأقارنها فينا

لو أنتي بإيران شصير فيج ؟

اي نسيت .. مو ذيلاك
أساميهم كلها دلع .. أحمدي .. خامنئي .. مو ناقص إلا عبودي


بصراحه أسلوبج مافيه لا منطق ولا احترام للقارئ .. فجأه تنطين للإستجواب من غير أي سبب .. أما الأغنية خلتني أحس أنه كل الكلام اللي قلتيه و هالعقلية اللي توزن بلد وتعرف أسرار الأمور وخباياها مو لازم نعرف أكثر عنها عشان لا نعطيج عين

بصراحه .. بدّعتي


:)

الأستاذ حمام said...

حيادج وايد حلو.. وطرحج موضوعي.. وعقلاني..

محد عنده الصح المطلق ولا الغلط المطلق.. كلمة جق، وشكرا على تبني هذا الطرح المعتبر.

al-nokhitha said...

Khlaiif gal : emsalam el barrak
9ara7 men gabiil o gal efri7aw ya ahal el kuwait ba7ii6 3ali el khalifa waraa el ghothban bs ana agoola em3a9ii 3ala showarbik o oboy ashraaf menik ya emsalam :)

khlaiif 7adaa qathnii ekhaloona
3ala ra7ta o egi9oon el 5a6 3an jwaiihel !!

http://www.youtube.com/watch?v=CND1NLXCPyo

khoosh eqniiya feeha seerat a6yab naas
sem3eeha o ray7ay baliich ;p

nEo said...

انا لا اتحدث عمن يقف هنا ام هناك

الموضوع بسيط و واضح بالنسبة لي

هناك تعدي على اموال الدولة

و المسؤول عن هذا التعدي هو وزير الداخلية

اذا

يستاهل يطير بكل بساطة حاسبةه مسلم ام حاسبه الدويسان او الطبطبائي

الوزير يتحمل مسؤولية كاملة و ليست فقط سياسية

اعتب على من يريد المساومة على مبادئه في سبيل عدم انجاح الاستجواب او المستجوبين

حتى انت يا دانه

هدفك كان دائما المال العام

لا اتهمك لكن الزمان للاسف وصل الى مرحلة قمنا ننتناقش فيه بيننا احنا هل نقف مع ام ضد مبادئنا

حرمة المال العام خط احمر و اسود ، و اسود غامج بعد

مو عشان مسلم حارنا طرحه و قبليته نطوف بوقة

باجر شلون نتريا من ربعنا يطاردون سراق المال العام او يحاسبون اي وزير على سرقة ؟

حزتها انا اول واحد بقول جب !!

bofaisal said...

http://www.youtube.com/watch?v=4hL49vhIHVM

هذا الفيديو في كلمة خليف حق البراك

Anonymous said...

lel asaf agool shi3aar el nuwaab itha ta7alof wela ekhwan wela bado wela she3a... "Edeeney el kersy ya 3ami o fekni"

el ta7aluf lel asaaf khthalookom nowab ma7soben 3alekom o khathaltom etayar lama estalamtaw el-raya el wa6aneya...

7asafa 3alekom ya ta7alof.. wasajel ya tareekh!!

نــــــوف said...

السلام عليكم جميعا ..
أولا بالنسبة حق خليفة ولد صاحب أكبر سرقة في التاريخ "حسب وصف الصحف الأجنبية" لسرقة الناقلات فأنا مجرد ماسمعت صوته حولت القناة مايستاهل اسمعه ورب العالمين أحكم الحاكمين سبحانه بيوريهم حوبة أهل الكويت
ثانيا.. بالنسبة للاستجواب أنا ضد الفساد وضد سرقة المال العام لكن العقاب يكون للمخطئ الي أهم البطانة الفاسدة تحت الوزير وأقدر أسميهم بالاسم مو الوزير خصوصا ان الرجال "نظيف" وحولهم للنيابة وقبل يصعد المنصة الي صارت بعبع أي وزير كويتي اذا أهو راح ضحية هالفاسدين ماراح يرتدعون وبيكررون فعلتهم دام لقو كبش فدا يلصقون فيه سرقاتهم بس ان شالله بحيل واحد أحد ينزل فيهم عقاب رب العالمين وينولون جزاء فسادهم..
ثالثا وعذروني عالتطويل مع كامل احترامي للبراك واهو ايضا شخص نظيف ماعليه شبهات ولاسرقات وولد عايلة كريمة وكويتي أبا عن جد لافيه عروق ولا مزدوج بس سؤال واحد وينه عن بــــوقـــات أحــمــد الــفهـــد؟ ليش مااستجوبه بالسابق؟ اعتقد ان تاريخ أحمد الفهد حافل بمليون محور لمليون استجواب، وحاليا استجوابه اتى في الوقت الغلط كان الأولى فيه بهالوقت أن يتبنى أي مبادرة لحل مشكلة الشباب
الكويتي المسرح من القطاع الخاص؟ الي يعاني احباط معنوي كبير الى جانب الضائقة المالية؟ صح ولاكلامي فيه غلط يارب تحفظ الكويت