21/09/2008

مريضة و سؤال

بما إني مريضة وما أشوف شر إن شاء الله

وبما أن مواضيع الساحة محدوده هاليومين

ودي أسأل سؤال محيرني من زمان

إذا كنتوا مسافرين

ولا سمح الله توفى أحد من أقارب الدرجة الأولى

هل تبون يخبرونكم وانتوا هناك او ينطرون ردتكم؟؟

وهل تتقبلون ان ينقل لكم الخبر رفيجكم، مو واحد من الأهل؟

مبروك 500 نقطة من البورصة

يالله باي وشوية مراويس بعد


10 comments:

Athoob Alshuaibi said...

ماتشوفين شر اختي
و ماجورة ان شاء الله

بالنسبة لسؤالج ... انا صار لي شخصيا

توفت والدتي و انا مغتربة الله يرحمها
و كنت ادري انها مريضة لكنهم مغبين عني خطورة مرضها و المرحلة اللي واصلة لها
فبكل براءة بعثت رسالة لمعارفي و كان بأيام الوقوف بعرفات و عيد الاضحى
اطلب منهم انهم يدعون لامي بالشفا
جان يرد علي واحد الله يهديه و يسامحه و بكل برود

انه اسم امي بالجريدة مكتوب وانها توفت

اطالع الجريدة والا امي متوفية امس !!!!!!!!!!!!!!!!!!!!!

واخواني خاشين عني وانا كنت اترجا اخوي ابي اكلمها يقولي مستحيل ..

انتي طلبتي تعرفين راينا باننا هل نفضل والا لا


ليش اهي راح تفرق ..!! الغالية راحت رحمة الله عليها

و بعد ما هديت عقب مدة قولبتها براسي
عرفت ان رب ضارة نافعة
اللي صار قط حمل جبيير عن ظهور اخواني
كانوا موووو عارفين شلون يفاتحوني
خصوصا اني كنت ناوية وقتها ارجع الكويت بزيارة
و اللي صار على كثر ما آلامني و يؤلمني إلى الآن
إلا أن اللي صار خيرة لاخواني

المشكلة الحين ان الواحد لما يفقد اغلى انسان وهو بغربة بعيد عنه وبلمح البصر
خوفه من لحظات الوداع يصل إلى درجة المرض النفسي
صار فيني خوف مو طبيعي و انهااار تماما عقب كل لحظة فراق بعد ما يزورونا الاهل كل صيفية
كله اخاف ما اشوفهم مرة ثانية
انا مؤمنة بان الاعمار بيد الله

لكن اللي صار .. مو سهل :((((((((((((((((

سامحيني اختي اول مرة ارد على مدونتج
لكن كلامج هيج فيني شجووون و جرح مايبرى

ALI said...

سلامات و ماتشوفين شر

و بنسبه حق الموضوع الثاني انا افضل انه اتبلغ و يفضل اكون من اقرب واحد لك لان اعرف اشلون يتعامل معاك

بيت القرين said...

عذوب
الله يرحم والدتج ان شاء الله

وآسفه اذا تضايقتي من السؤال
لكن بالفعل اعتقد الموضوع حسّاس ويحتاج نفتحه عشان نفهمه اكثر

بيت القرين said...

علي
خوش راي

ZooZ "3grbgr" said...

سلامتج أجر وعافية انشاالله
الله يقومج بالسلامة

وبالنسبة حق سؤالج
الله لا يحطنا ولا يحط المؤمنين بهالموقف
بس شي الانسان ما يختاره
بس لو حصل لا سمح الله
أفضل أعرف بلحظتها
ولا أنصدم تالي

وعذوب
الله يرحمها برحمته ويتقبلها من عباده الصالحين

Anonymous said...

ma tshofeen shar... oo i would like to know... bs it depends 3ala el other person... madri wallah :S

Anonymous said...

ماتشوفين شر دانه وانا بعد الحساسيه شاقتني شق شر لانه الي حايشنا شكله فايروس منتشر بالجو وانصحج بالزيرتك حبه حق الحاساسيه وحده بوحده
........

لازم يعلمونا بلح(جيكر)ه الوفاة عشان نقدر نرد من السفر باقرب وقت ونلقي النظره الاخيره على المتوفي ونقدر نصلي على الميت ونمشي بجنازته وثقي تماما انه النظره الاخيره على جثمان الميت لها اثر ايجابي بعكس اذا مات وماشفتيه راح تكون الم وحسره مثل ما صار بعذوب
........
خذيت بنصيحه الجيكر مالتج
........
عبدالله الهاجري
كيفان

Anonymous said...

Salamat o kha6ach el soo :)

Ana 3an nafsi ashoof kalam el hajri 3adel lazim egolon li 3ala
6ool 3ashan arja3 wa9ali 3alaih wadiifna o ogaf eb 3azah :)

ya rab yab3id 3ana el a7zan o
e5ali 7ayatna sa3ada eb sa3ada Golaw ameen :)

3asach 3ala el guwa :)

Eng.TaRiQ said...

ألف لا باس عليج يا بنت القرين وما تشوفين شر ...
وبالنسبة لسؤالج أنا أفضل أنه الشخص يتبلغ أحسن ما ينصدم عن طريق مسج بكل برود ...
وهذا أمر الله ولا راد لقضاؤه
والله لا يوريكم مكروه بعزيز إن شاء الله
مع بالغ تحياتي

طارق

الدســتور said...

ماتشوفين شر