باجر بجابل خليفوه

بس أبي اعرف شي واحد

الوطن عبالهم ماكو ناس تعرف اكاذيبهم واللي يسوونه

بس قبل اي شي لازم اقول

ترى ما عجبني الصقر لان نزل لي مستوى سعدون حماد ما كان مفروض يسب

ومو عذر ان يسب ويسحبها

نفس الشي سواه مع علي الجراح لما قاله اقعد بجلسة المال العام وسحبها

المهم ندش بموضوعنا

الصفحة الأولى حاطين رد سعدون حماد على وزير الداخلية

اللي على طريقة يكيكي يتحدى

الحين وزير الداخلية قايل له ان ماكو تجسس على تلفونات النواب

بتوضيح من النائب الأول لرئيس مجلس الوزراء وزير الداخلية وزير الدفاع الشيخ جابر المبارك ردا على اتهامات النائب سعدون العتيبي بمراقبة هواتف النواب.واعتبر المبارك هواتف النواب «خطا أحمر مستحيل تجاوزه» مؤكدا ان «الكويت ليست دولة بوليسية حتى تتعامل بالتجسس

جان يي سعدون ويقول

وجاء هذا عندما تحدث النائب الاول لرئيس مجلس الوزراء وزير الداخلية ووزير الدفاع الشيخ جابر المبارك نافيا مراقبة وزارته هواتف النواب، واعتبرها «خطوط حمر»، فرد العتيبي قائلا: «اتحدى الوزير اذا انكر ان وزارته لم تحقق مع شخص يأتي الى ديوانيتي لصلة قرابة له مع العاملين في سكرتاريتي.. راقبوه وعرفوه من ارقام سيارته انه عسكري.. وحققوا معه امس «امس الاول» من الساعة التاسعة صباحا الى الواحدة ظهرا.. اتحدى الوزير ان ينكر

الحين وين التلفونات بهالسالفة فهموني بالمدرسة يعطوننا ان اذا في موضوع بنكتب عنه لازم نحدد شنو الموضوع بالجملة الرئيسية وما نطلع منه عشان لا يضيع القارئ

يعني لما ابي اكتب عن مجلس الأمة مثلا لازم ما أتكلم عن هدى حسين

سعدون حماد يشتكي مراقبة تلفونه براس الموضوع ويدش بديوانيته وخرابيط مالها داعي

بس ماعلى سعدون حرج

:)

نروح حق الصفحة الأخيرة

ولد فيصل الجناعي مبارك يمشي على مبدا من شابه أباه فما ظلم

طبعا بأوامر من خليفوه يكتب هالولد مثل ما ابوه يكتب بأوامر من أحمدو

المهم حاط صور وايد وكاتب تحتها مواضيع صغيرة

احد الصور فيها وزير الداخلية يضحك مع السعدون ولابس بشت نفس اللون

الحبيب يقول تحالف بينهم وليش يضحك له

بالذمة بالذمة بالذمة هذا موضوع ينكتب حتى بمجلة ماجد؟؟

إي صج تدرون ليما الحين تنباع ماجد وب 300 فلس ليما الحين؟

أبي اعتراف من كل اللي يقرون منو راسلهم من قبل وقال هوايته جمع الطوابع والمطالعة؟ وليش؟

وأخيرا يكيكي

مقالته عنوانها صدام بارت تو

بارت طبعا يعني

part

أخاف عنوان مقالته اليايه

ذا فويس اوف بيبول

طبعا لما قريتها بجيت 12 مرة ليما الحين

لأن مدخّل ولده بالسالفة عشان يحرك مشاعرنا

الله يسامحه خلصت ثلاث قواطي كلينيكس ليما الحين

سمعوا شيقول

ولدي الصغير توه يعرف يقرأ ويكتب.. شاف جريدة »الوطن« وسألني (شنو يعني ولي عهد الشيوخ والفداوية.. يعني الحين أكو بابا مسلم؟) بالله شرد عليه، جاوبني يا بو حمود، شنو تبينا نعلم عيالنا؟

طبعا قبل لا أعلق رديت على جريدة الوطن اللي نزل فيها المانشيت

وكان المانشيت كالتالي

البراك: عهد الشيوخ والفداوية إنتهى

وداخل الخبر مكتوب
واشار البراك الى وجود قائمة لديه لشيوخ «يقومون بالدور المطلوب منهم وعلى رأسهم سمو رئيس الوزراء، غير ان هناك ايضاً حزباً للفساد وعلى رأسه مبارك الدعيج».واضاف: «ولّى وراح عهد الشيوخ ولا يوجد احد فوق القانون ولديّ 22 توقيعاً لإحالة طلال المبارك للنيابة في قضايا تنفيع وتجاوزات

اللي ابي اوصل له ان لا بالمانشيت مكتوب مسلم بس مكتوب البراك ولا بالموضوع مكتوب مسلم بس مكتوب البراك

ولده توه يقرا ويكتب

يعني عمره يمكن ست سنين او سبع سنين بالكثير

بس ماشاءالله عليه

قرى المانشيت واهوا عمره ست سنين

فهم إن البراك اهوا مسلم البراك واهوا عمره ست سنين

فهم إن الحين اكو بابا مسلم بدال بابا صباح وإهوا عمره ست سنين

انا ابي اسأل يكيكي

هل ولدك اهوا نفسه ونستون تشرشيل مثلا؟

والله خوش حجي ما تستحي تدخل ولدك بهالجذب هذا حرام عليك

عيب والله عيب

يعني انت ليش مفترض ان الناس اللي يقرون اكاذيب الوطن بعمر ولدك

هذا اللي بجعبتي اليوم لا فض فوهي او فاهي او اللي اهو