26/07/2007

لا راحة مع جريدة الوطن

أبي إجازة منهم فكوني منهم شوي

كل يوم جذبة كل يوم فضيحة

كل يوم مهزلة اكبر من اللي قبلها

مادري والتالي يعني

صار لهم يومين يحنون على موضوع المصفاة الرابعة وبوقة ومادري شنو

طبعا بعد ما حولوهم النيابة وقرصوهم

اليوم منزلين رد شركة البترول ومعقبين عليه

بس هالمرة مو كاتبين اسم يكيكي على الموضوع كاتبين اسم وحدة يعني تمويه
:)

لأن عبالهم الناس ما يقرون حاطين مانشيتات الانتصار لكن المحتوى كله جذب وفضايح

وأنا صاحية لهم على قولة راشد الماجد

تدرون إن اغنية كلام الناس مالت جورج وسوف كان مفروض يغنيها رويشد بس ما عجبته

شوفوا مانشيتاتهم اليوم بس

يعني انتصار

شركة البترول الوطنية ترد.. والوطن تنشر الوثائق
دور
FLUOR
في المصفاة الرابعة أكثر من مجرد إستشارات

البترول الوطنية أكدت إلغاء المناقصة بزعم إرتفاع العطاءات وفي الوقت ذاته ترفع ميزانية المصفاة إلى مليار دولار
وتضارب المصالح واضح في تكليف
FLUOR
بالاستشارات ثم مشاركتها في المرحلة الثالثة
نسبة ال 2.5% من الكلفة التقديرية التي تحصل عليها
FLUOR
تعادل 350 مليون دولار
وكيف يتحمل المقاول المخاطر بينما الدولة تدفع التكاليف وهامش الربح؟


هذي مانشيتاتهم

واللي يقراها يقول إن الوطن مو مجذبين وبموقف قوي

ناخذها وحدة وحدة

أول مانشيت يقول

الوطن تنشر الوثائق

إنزين خلونا نشوف شنو الوثائق

طبعا ما لقيتها عالانترنت
بس موجودة بصفحة 41

اللي ما عنده الوطن مو الإ يشتريها ما يستاهلون 100 فلس

خل يصدقني او يروح صالون او كافيه ويقراها او حتى يحط الدشداشة بحلجه وياخذها من بقالة سكينة جدام شئؤون القصّر وينحاش

المهم شنو الوثائق

الوثائق طالت اعماركم

عبارة عن
Power Point

عنوانه الآلية المقترحة لتنفيذ المشروع

يعني إقتراح

يعني غير نافذ

يعني اللي كاتب الموضوع أهبل

مسوي لوية على اقتراح


يكيكي قال يوم السبت 21-7 إن الشركة الإستشارية راح تكون منفذة بعد

لكن شنو بإسم ثاني بس يملكها نفس الشخص

طبعاً، الادخال تم عن طريق شركة أخرى، ولكن لنفس مالك الشركة الاستشارية هو وحليفه الحكومي المهم

طيب

يكيكي ممكن تعلن الإسمين هذيل لو إنت من صجك وكلامك ماهو مجرد حجي فاضي

يالله إعلن خنشوف

خنشوف رد شركة البترول شيقولون

وقد قامت شركة البترول الوطنية الكويتية باختيار شركة «فلور» كاستشاري للمشروع من خلال ممارسة وفق الاجراءات القانونية حيث تمت دعوة مجموعة من الشركات العالمية المؤهلة لهذه الممارسة تقدم منها 3 شركات وجاء عطاء شركة فلور هو ارخص الاسعار والافضل فنيا حيث بلغت قيمة العرض المقدم 60 مليون دينار تقريبا وليس نصف مليار دولار كما ورد

هذي جذبة وإنفضحت بدون اي تفسير مني ولا شرح

انزين

الوطن يوم الأثنين اللي طاف قالوا بالصفحة الأولى
ولم ينته الامر إلى ذلك، بل ان شركة البترول الوطنية تعقد العزم على اعادة المناقصة بطريقة مباشرة عن طريقها عوضاً عن لجنة المناقصات المركزية

يعني ماكو مناقصة

شركة البترول تقول
ونظراً لضخامة حجم المشروع فيما يتعلق ببنود شراء المواد وعقود الانشاءات فقد اقترح تشكيل لجنة مناقصات خاصة للمشروع من خارج الشركة تضم اعضاء من لجنة المناقصات المركزية وادارة الفتوى والتشريع واعضاء آخرين

يعني أكو مناقصة وماكو احد مسؤول الا وهو عضو باللجنة

بعد بعد خل اقول بس لحظة شوي

بقول لكم قصة تخوف شوي

مرة سايق تاكسي بمصر (ماعرف أقول القصة بالمصري:) كان يتمشى الفير يدور على ناس يوصلهم

لقى ريّال شايب ملتحي قال له ممكن توصلني للمسيد

التاكسي قاله تفضل وركب جدام

مشى شوي على حسب وصف الملتحي

جان يشوف ريّال ثاني يبي توصيلة ركب الريّال الثاني وقاله ودني شارع الهرم

قاله سايق التكسي حاضر بس أوصل الريّال اللي يمّي المسيد أول شي بعدين أوديك وين ما تبي

جان يقول له اللي يبي يروح الهرم

اي ريّال يمّك ماكو احد يمّك

إستغرب سايق التاكسي والتفت على اللي يمّه

جان اللي يمّه يقول له انا ملك الموت وياي آخذ روحك بعد شوي

السايق مات من الخرعة وقال حق ملك الموت ممكن تنطرني أصلي قبل لا أموت قال له إنزل صل بسرعة

سفط التاكسي ونزل يصلي وهو يبجي

رجع السيارة ولا ما يلقاها

اثاريهم عصابة
:)

المهم بعد هالفاصل

نروح حق أهم فقرة بفضيحة الوطن

يوم الأثنين بالصفحة الأولى بالوطن

قالوا عن إسلوب شركة البترول

وتعزم على طرحها بأسلوب
(cost +)
اي التكلفة زائد الانتاج، وهذا الاسلوب يضمن للمقاول الفائز الربح ويحمل الدولة كافة مخاطر ارتفاع اسعار السوق العالمي لاي من المواد او الاجور

يقولون إن هالاسلوب مو شي

ويحمل الدولة مخاطر

يعني مو عاجبهم الاسلوب

رد شركة البترول شيقول

يقولون عن الاسلوب اللي تسميه الوطن إن مو شي

على غرار ما تم تطبيقه في المشاريع الأخرى لتحديث المصافي الكويتية في الثمانينات بقرار من وزير النفط رقم 66 لسنة 1980 وقراره الصادر بسنة 1982

يعني متطبق من قبل بالثمانينيات

وكان وزير النفط بذاك الوقت

علي الخليفة العذبي الصباح
مالك جريدة الوطن

الإسلوب مو شي

وخطر ومو عاجب جريدة الوطن

طيب يالله تكلموا عن مالك الجريدة لان مارس هالأسلوب

:)

عموما هذا اللي نكتفي فيه اليوم

بس أنصحكم بقراءة رد الشركة وخصوصا هالفقرة

ان قانون حماية الاموال العامة رقم (93/1) يتطلب ان يقوم السيد المحامي نواف سليمان الفزيع بتقديم ما لديه من ادلة وبراهين واسماء للنيابة العامة (حصن المجتمع الواقي) ليأخذ القانون مجراه بدلا من نشر الاتهامات والافتراءات الباطلة. وهذا لا يمنع من احتفاظ الشركة بحقها القانوني في اتخاذ ماتراه مناسبا ضد الكاتب والجريدة فيما ورد بتاريخ 2007/7/23




9 comments:

freekuwait said...

نفس أسلوب تأليف الإشاعات بموضوع المكلسن و المدينة الاعلامية

صج وقاحه

حلوه قصه ملك الموت :)

Anonymous said...

مقال يكيكي الأخير "وباكر"

يقول:

المهم المليارات تدخل بمخباة الوكيل وربعه فـ (م. ص) كطرف منفذ المشروع بدون مناقصة معناه اسكات اعضاء المجلس ..........الخ

و آخر المقال يقول:

ولكن مثلي كثيرون، ومثلنا لا يباعون ولا يشترون، سنقف بوجههم حتى الموت، بس خوفنا على مستقبل البلد.


الملاحظة تقول: الحبيب من كثر ماهو قوي ومستعد يوقف بوجههم حتى الموت، قام يخاف حتى يكتب اسم محمد الصقر علني وصار يرمز له (م.ص.)

اترك الباجي حق بيت القرين عشان لا نعتدي على صلاحياتها ..

و حيلج فيهم

ولد الكويت

Anonymous said...

ولله الوطن مسخره .... ماعندهم
لاكرامه ولا اخلاق ولا احساس
ولا حيا ولا مستحى!!!

شنو هالجريده المنحطه!!!!!!!!!

الحمدلله الحمدلله الحمدلله ان في مدونه
تقعدت حق هالعفن

والله يعينج على العفن


على فكره راح تحتاجين فريق
وانا مستعد اتطوع بس معاشي
مايقل عن 2000 وانتي
وكيفج

احمد عقاب :)

حلم جميل بوطن أفضل said...

لم تذكر لا الوطن و لا الفزيع موقف وزير النفط البائد علي الجراح من هكذا قرارات

لم يطال النقد سامي الرشيد دون سعد الشويب؟

لم يطال النقد سهيل بو قريص دون محمد العليم؟

يعني ما يدرون؟؟

ButterFlier said...

بيت القرين مقالاتج طويله بس ما ألومج كذبهم طويل بعد

أتمنى أن تحاولي تقصير مقالاتج

Anonymous said...

تنويه

المعلومات الواردة عن تسمية بقالة سكينة بحاجة الى تحديث بيانات كون الاسم قد تم تغييره من مدة طويلة لاسباب تتعلق ببرستيج صاحبة البقالة

حمودي said...

يلا فرحي يايج شغل وايد الاسره الكريمه بترد على مذكرات الخطيب بالوطن

:) الله يعينج وكلنا معاج

kila ma6goog said...

مرات احس ان الوطن مسوية عقد استشاري مع الصحاف

يعني الكلك على أصول

بو حامد said...

يقولج يكيكي انا الي بوديهم النيابه مو اهما يودوني ,, بدا بدا يخبص .

يحليله ، يقول بسجل قضيه عليهم بسجل راضوني قبل لا اسجل .