11/07/2007

عهد الشيوخ والفداوية انتهى

قلت مابي أكتب أمس لاسباب وايد مع إن عدد أمس الثلاثا بالوطن كان ملغوم بس قلت أنطر تطورات اليوم وبالمرة أقرى الطليعة يمكن يفيدوني بشي زيادة

عنوان الموضوع إهوا العنوان اللي حاطينه الوطن أمس كعنوان رئيسي على لسان مسلم البراك

وطبعا اللي قايله مسلم البراك نقلا عن الوطن نفسها إهوا هذا

لن نقبل لأنفسنا ان نكون - تبعا.. نحن لسنا تابعين، هذا الزمن ولّى وراح

ولّى وراح عهد الشيوخ ولا يوجد احد فوق القانون

قولولي بس وين المشكلة بهالكلام إذا في واحد يقول غيره وينه خل نتفاهم معاه ونعلمه إن
في شي بتاريخ 11-11-1962 يقول نفس الكلام

وطبعا بعدين حاطين لستة صور واسامي حق الشيوخ تحت عنوان

شيوخ تحت مقصلة المجلس.. وتم خلعهم او التهديد بإستهدافهم من بعد الغزو

وأنا باخذهم واحد واحد على حسب اللي أعرفه

ناصر المحمد - موقف الحكومة ب شهر 5 2006 من الدوائر كان السبب وصلح غلطته وإنتهت المشكلة

جابر المبارك وزير الدخلية - محد حاطه تحت المقصلة إلا إنتوا يا شيوخ المسيلة على قولتكم وآخرها اللي كاتبينه بعدد اليوم ونائبكم الفاضل القدير الجهبذ المغوار سعدون حماد (أخاف ما أمدحه يطقني) مثل ما سوا مع العلاج بالخارج

:)

سعود الناصر - سئلوا حلفاؤكم الإخوان المسلمين اللي ماكو سطر بالجريدة إلا وذاكرينهم فيه اهما اللي حطوه تحت المقصلة

علي الخليفة الصباح- مربط الفرس مالهم ومو بس مقصلة المجلس لازم مقصلة نايف بعد لأنه حرااااااااااامي أو علي بابا على قولة خالد هلال

علي الجراح- التلميذ ما ودّره إلا علي بابا ومفروض الصف كله اللي كان مدرّسه علي الخليفة يحترق مو بس الجراح

طلال مبارك الأحمد مال الكويتية - ما أعرفه ولا اعرف شي عنه بس اللي أعرفه إن إذا شايفين أغنية أنا رديت حق عبدالكريم راح تشوفون طياراتنا ليما الحين نفس الشي واهوا الرئيس والتقصير اكيد بالادارة

مبارك الدعيج مال كونا - اذا ثبت إن إعلان الأهرام منه يستاهل اللي يصير له

أحمد الفهد كل وزارة مسكها الحين فيها مشاكل هذا غير الرياضة وطبعا كل هذا ينغفر له بس إن مرافجكم هذي بروحها مصيبة

طلال الفهد - لأني قدساوية مابي اقول شي عنه
:)
بس اللي اعرفه إن يخوره وايد بره نادي القادسية وما اعرف تفاصيل هالسوالف وايد

ولا تنسون إن إخو أحمد الفهد وعليه فضايح هاليبرتون مثل ما عرفت

فهد السالم خمبق بهيئة الزراعة ليما قال بس وإستجواب شرار فضحه بس أهم شي لما لبس برتقالي وراح ساحة الارادة يعني معارضة

:)

محمد العبدالله الصباح - يقول ماكو ولا قضية أو حالة فساد يتني

وأنا أقوله وإنت شنو؟

الباجي ما اعرفهم
طبعا اللي بيوصلون له إن الشعب مايبي الأسرة الحاكمة ويبينون حق اصحاب القرار من الشيوخ إن ديروا بالكم من الناس

ترى بيقلبون عليكم

والرد ممكن تلاقونه عند عاشق وطن اللي كاتب مقالة بالطليعة عن هالموضوع

انزين خلونا نروح حق رفيج بوش وولد خال بلير ونسيب ساركوزي و يد بوتين فؤاد الهاشم

مقالة إسمها النعاج والشاوي

كاتب فيها إن 3 نواب ما راحوا ديوان أبل على موضوع الزعبي

ألحين ديوان ابل ردوا عليكم وقالوا ما دعيناهم وإنت ليما الحين

بس مو هني الموضوع

لأن كاتب جملة تعتبر أكبر غلطة في تاريخ الكتابة على الإطلاق وتفشل الصراحة ومادري شلون طافت على المدققين بجريدتهم

لأن ما يصير اللي كاتبه إهوا

غلطة صج صج شنيعة

يقول
وانا ارفض دعوات عديدة للانضمام الى احزاب وتكتلات ومجموعات سياسية في الكويت، بعضها مرتبط »عاطفيا« بالخارج،، وبعضها مرتبط عقائديا بالخارج ايضا!! لماذا؟! لأنني انسان ولست.. »تيسا« أو »نعجة

فؤاد الهاشم إنسان

!!!!!!!!

بالكويت عندنا بلبلين

بلبل المغني مااروعك وسكة سفر وانا ناطر وليلحين احبها ورحلتي لا لا رحلتي مالت رويشد صج

تدرون عاد نبيل خيروه بين رحلتي وسكة سفر وإختار سكة سفر؟؟؟

لا لا وين رحت انا

المهم البلبل الثاني اللي عندنا ما يغني بس يطبل حق معزبه علي الخليفة

شيقول بمقالته أمس - سنة الذبحة

طبعا كاتب عن استهداف الشيوخ نفس اللي مكتوب بالصفحة الأولى

أنا يعجبني توارد الخواطر بين كتاب الوطن وإدارة التحرير أشكره يكتبون من نفسهم مو اوامر من خليفوه

:)

يقول

سنة الذبحة بدأت مع إقصاء الشيخ أحمد الفهد اثر أزمة الدوائر، ثم تلاه إعدام سياسي لابن عمه الشيخ أحمد عبدالله الأحمد. وما كدنا نمسح دماءهما من المشهد السياسي حتى تم اغتيال شخصية الشيخ علي الجراح. واليوم تتصاعد الاحتمالات بتصفية الشيخ مبارك الدعيج والقضاء على الشيخ صباح الجابر، ودفن الشيخ طلال المبارك!!.هذا بالطبع إضافة الى المؤامرات المستمرة لتدمير الشيخ علي الخليفة والتهديد باستجواب الشيخ صباح الخالد، لتتوج سنة الذبحة هذه بالتهديد الذي لم يعد مبطناً باستجواب سمو رئيس مجلس الوزراء

وبعدين يسترسل حلوة يسترسل مو؟

لا نستطيع الهروب من سؤال مؤرق يقول: »هل يعقل أن أبناء الأسرة دون غيرهم هم الفاسدون، وهم الفاشلون في أعمالهم عن بقية أبناء الشعب، الذي يبدو أنهم كلهم وطنيون صالحون نزهاء؟

طبعا يبي يسوي فتنة بين الشيوخ والناس مثل ماكان الحجي بالصفحة الاولى

وأنا اجاوب على سؤاله وأقوله السالفة مو بعيال الشيوخ السالفة بمناصب البعض اللي يسيئون إستغلالها مثل احمد الفهد وعلي الخليفة

والدليل إن دعيج الخليفة فرزدق الكويت محد ياي صوبه مع إن كاتب من قبل

طااط وطوط كاهو ياكم الأخطبوط عن المنتخب ومن يومها وإحنا مو مترقعين

وغيره وايد من عيال الصباح ماغلطوا أو خاروها السالفة باللي يغلط

هذا السنعوسي طار بسبة أغلاطه وإهوا مو شيخ هذا النوري وزير المالية هذا الكليب وشرار وغيرهم كلهم مو شيوخ وتحاسبوا

لا تقعد تألف عاد

وأخيرا يكيكي

بنهاية مقالته أمس اللي عنوانها

اشسالفة رئيس ديوان المحاسبة

مادري منو وين مطلع الالف اللي قبل الشين بالعنوان بس ما عليه

كاتب هالجملة

تلقينا تعليمات من السيد الوالد سليمان الفزيع بتقديم أشد الاعتذار لرواد ديوانية ابراهيم ابل على قساوة ردنا على بيانهم وتنفيذا للأوامر السامية أبلغكم باعتذاري الحار والصادق لأي كلام في مقالي قد يكون مسكم بتجريح من غير قصد خصوصا وأن نوايانا القلبية تحمل لكم محبة خاصة منذ أيام الانتخابات واستقبالكم الكريم لشخصنا المتواضع آنذاك وعلى أمل قبول اعتذاري وصدق محبتي لكم

ياليت تسمع كلام أبوك وتكون مؤدب دايما

لكن ما كل ما نتمناه ندركه






12 comments:

qwzx1qwzx2 said...

مساء الخير.......... عهد الشيوخ والفداويه انتهى بالستينيات,,,,, وخلال ذلك الوقت كان هناك تصادم حقيقى بين القوى الوطنيه والسلطه مما فرز عهد جديد فى ذلك الوقت( أخر الستينيات) يتمثل بشكل التالى,,,,,القيادات العليا بالاسره الحاكمه+ التجار + القوى الدينيه,,,,,,,فى احدى المقابلات للفنان المبدع سعد الفرج اسألوه ليش أمنعت مسرحية هذا سيفوه وهذا خلاجينه جوابه كان الاداة اهم التيارات الدينيه بس المحرض هو غرفة التجاره!!!!! والسبب بسيط لانه المسرحيه اتبينلك هذا التحالف ,,,,, وضل هاذا التحالف الثلاثى يحكم الكويت حتى ظهر لنا مصطلح يديد الا وهو العهد الجديد فتبشرنا خير وقلنا الكويت بترجع تركب سكة التقدم والتطور ولكن ولكن ولكن لما تشوف تشكيلات الوزارت المتتاليه والدعم المستمر لقوى الظلام راح تعرف بان العهد الجديد اهو نفس القديم محد بالكويت ضد حكم الاسره بس الاسره باغلبها ضد الدستور للاسف او خل نقول ضد بعض مواده الى تعطى السياده للامه أنا مانى متشائم بس بصراحه لما تبين تروحين لندن مثلا مو لازم طياره اتوصلج ربعنا واقصد اهل الكويت اغلبيتهم مع الاسف مو راضين يركبون الطياره ومصرين على الحمار اتهقين الحمار اوصلهم لندن ما اضن ولكن خل نشعل شمعه أحسن من ان نلعن الظلام والله اوفقج

بوصالح said...

بيت القرين

إلا المزيد من فضائح الوطن :)

على فكرة .. اتوقع ملف الأسبوع الي سوه كان حرة قلوبهم منك .. الله يقويك عليهم إنشالله :)

كل التوفيق إختي الكريمة

ButterFlier said...

قلنالج لاتوقفين

بس خوش مزاج اليوم بعد سطوع نجمج بعالم البلوجز

تستاهلين أصليه

Anonymous said...

الشيخ طلال من أفضل لرؤساء اللى مروا على الكويتية للأسف أنه ضحية لهجوم النواب على الحكومةوالشيوخ حتى الجماعة اللى متهمينهم بالتزوير من انظف الموظفين والمخلصين للكويت

bydvsj said...

الشعب الكويتى طول عمره ولائه للاسره الحاكمه وللامير بس الظاهر كتاب جريده لاوطن يحاولون بشتى الطرق ايبينون انه فى اعداء ضد الاسره الحاكمه بسكم فتن وفساد يا جريده لا وطن


والشى الواضح وضوح الشمس انه احنا فى الكويت مو فى سوريا البعثيه مع احترامى للبلد دوله ديمقراطيه ومن مبادئها العداله ومافى احد فوق القانون

وهالشيوخ ما انحطو تحت قفص الاتهام وعلى راسهم خلف خلاف اله وامسويين بلاوى مو بلوه وحده وهم عارفين مو بس الشيوخ يتم مسائلتهم بس طبعا لازم يستعبطون ولازم ايدافعون وايرقعون وابشرهم ترقيعاتهم فشلت فشل ذرييع

ومدام يا كتاب يا جريده لا وطن خايفين على شيخكم قولوله نصيحه لا اتبوووق لا اتخاف

ولى ملاحظه اختى الكريمه

حرام عليج توصفين نبيل الفضل الى مافيه ذره نباله بالبلبل نبيل الله يسلمج غراب ينعق

تحليلج للموضوع اكثر من رائع وفيه خفه دم مو طبيعيه:)

Mohammad Al-Yousifi said...

nice post....enjoy

Anonymous said...

تعجبني تغطيتك لفضايح الوطن .. خصوصًا هالأسبوع اللي كان واضح مستوى التخبط اللي وصلتله الجريدة منذ صدور حكم ضبط واحضار علي الخليفة!! ان شاء الله قربت نهايتهم :)

keep it up ;)

nEo said...

يا سلام

وايد تيردين القلب

Bad-Ran said...

قالها عبداللطيف الدعيج .. قعدوا ببيوتكم ولكم الحشيمه .. بس تبون تحكمونا ونسكت ما يصير

وارد واقول طاط و طوط كاهو ياكم الاخطبوط

لو دامت لغيرك ما اتصلت اليك said...

السلام عليكم
اذا كان هذا ماقاله فهو غلطان لان لم يكن هناك عهد من 1962 الى اليوم يسنى بعهد الفداويه ....بليوجد ضعفاء النفوس الذين يكونون فداويه لهؤلاء وصبيان عندهم لان كلنا في هالديره مواطنين ولسنا تابعين للاسر الحاكمة.

متلف الروح said...

مساء الخير

أولاً لكل انسان راي ويجب أحترامه ،، وانا احترم راي الاخت ولكن أرى بأن عهد الشيوخ لن ينتهي ولا نتمنى أن ينتهي لاننا لا نريد أن نكون بلد مثل سوريا و مصر و تونس و العراق ،،، وأظن انكم فاهمين القصد ..
و السؤال الذي يطرح نفسه هل عيال الشيوخ هم فقط الذين يغلطون ، و يسرقون !!!!!!!!!؟؟؟؟؟؟؟؟؟؟؟؟؟؟؟؟

اتمنى اعادة النظر حتى يتم التوصل إلى الاجابة السريعه ،،

كما لدى سؤال يتعلق بالكويتية لماذا لم يتم التحقيق بشأن ميزانية الكويتية في عهد أحمد الزين ، وأحمد المشاري ؟!؟!؟

لماذا الآن لما يتم التحقيق مع الشيخ الوسيم طلال المبارك !!!؟؟!

اتمنى ان تجدوا الاجايه

و للحديث بقية

يعطيكم العافيه متلف الروح

بيت القرين said...

qwz
thanx 3ala mola7a'9atek el qaweyya b maw'9oo3 ta7alof el '3orfa ma3a el tayyar el eslamy

bo 9ale7
thanx alot o ta3jebny el stories b freejkom ;)

butterflier
kalam jameel kalam ma32ool ma2darsh a2ool 7aja 3anno :)

ano...
rayek o a7tarma o akhtelef ma3ah

noor
9a7 a3tether 7ag nabeel sh3eil 3ala tashbeeha bhal '3rab

ma6goog
thanx dear :)

feezqra6y
ensha2allah el nehaya garrebat ;)

neo
menkom nastafeed estathy ;)

bad-ran
la o azeedek men d3aij beit
azraq chweety mchawwat.. ketblah notah o nawwat :)

law damat
i think inna elly byoo9allah msallam b kalamah nafs elly ent tgoolah o elly ana agoolah

metlef
tara ma gelna abad enna ma naby shyookh check my post again and check www.ali-khajah.blogspot.com also to know what are we talking about