11/10/2009

بلاش لماضه

عشان نحرق الفيلم من بدايته

ولا يستمرون يدندنون عليه وايد

ب 2007 انقرت قوانين رياضية بالمجلس

منها ان يتكون الاتحاد الرياضي من 14 عضو على ان يكون لكل نادي عضو في مجلس ادارة الاتحاد

زعلوا احمد وطلال الفهد لأن هذا راح يخلي 3 اعضاء معارضين لسياساتهم الرياضية يطلعون على بلاويهم عن قرب ويمكن يحدون منها

فقرروا وبتبعية 9 اندية والقادسية عاشرهم

ان يعارضون هالقانون تحديدا

وحجتهم ان الفيفا ما راح يوافق على 14 عضو وما يصير نتعارض مع الفيفا لأن الفيفا اهم من القانون الكويتي

المهم المطالبين بتطبيق القانون كانوا يقولون لهم وببساطة

انتوا يا اندية طلال واحمد وافقوا على قانون الدولة واذا الفيفا ما رضى نعدل القوانين

قالوا لا مانوافق لأن الفيفا ما راح يرضى

يقولون لهم وافقوا

يقولون لأ ما نوافق

المهم شصار عاد

أول ما مسك واحد مو محسوب عليهم حاليا اللجنة المؤقتة للإتحاد

وبعد 3 اشهر من تعيينه وافقوا الفيفا على 14 عضو بالاتحاد

يعني مثل ما نص القانون الكويتي

طبعا اندقروا

ومن خلال جريدة خليف

نزّلوا ان الفيفا وافق لأن اللجنة المؤقتة قصّت عليهم وقالت لهم ان كل الأندية موافقين

وهذا تزوير وما يصير ولا يجوز

طبعا من باب العلم بالشيء

أحمد الفهد لما مسك اللجنة المؤقتة قبل احمد اليوسف اللي ماسكها حاليا

يمّع الأندية بديوانية تشاورية ودز كتاب من ورا هالاندية ان هذا كان اجتماع جمعية عمومية!!؟؟

بس تزوير بو فهد يجوز حق الوطن

المهم مو هذا موضوعنا

موضوعنا اني بوافق الوطن للمرة الأولى وأقول اي اللجنة المؤقتة الحالية خدعت الفيفا

واللجنة الحالية زورت

بس تعالوا

الفيفا طلع يوافق على ال 14 عضو وعلى القانون الكويتي اذا اندية الكويت وافقت على القانون الكويتي

يعني حجة ان محنا موافقين لأن الفيفا ما راح يوافقون باطلة ومو صحيحة وعلقتونا من 2007 بسبتها وطلعت عالطل

يعني يا وطن الإسم مو الواقع طبعا

الفيفا اعلنها صراحة احترموا دولتكم نسوي لكم اللي تبون

هذا البوست ننشره من الصبح عشان لا تستمرون بفيلمكم الماصخ

ويالله عاد بلاش لماضه

20 comments:

جبريت said...

الفيفا والفيفا والفيفا ومشكله مسوينها لنا من غير اي مشكله عيال الشهيد

بالنهايه محد استفاد غير البيدان انه خلى اسم ولده طلال الفهد يوسف البيدان اشكره يقول انا فداوي

جبريت said...

وصباح الخير لا انسى

بيت القرين said...

جبريت
لا تزعل عندك أحمد وضاري وخالد وعذبي الفهد
تقدر تسمي عيالك بهالاسامي
:p

وصباح الورد

well_serviceman said...

مو شي يديد على نفس الأسامي اللي تتكرر في كل جهة فاسده بالدوله او في كل جهه "تخلفت" ورجعت إلى الوراء!

الله كريم , وبالفعل اول مره جريدة الوطن تنزل شي يستحق الوقوف عنده!

تحياتي

Faisal said...

أدري إن الخبر إنكتب في الجريدة، وتوقعت إن صج سمى ولده طلال الفهد، ولكن آخر شي طلع إشاعة. جنه سماه بس طلال.

المهم، ليش نقص على روحنا إن احنا عندنا إنتخابات ونقول حق الإتحاد الدولي إن إحنا عندنا إنتخابات، والصج هي تمثيلية، كل نادي يرشح واحد (سواء كان زين ولا مو زين ما يفرق) وهالواحد راح يصير عضو بالإتحاد بدون لا يسوون إنتخابات، الفيفا أعلنها أكثر من مرة، وأنا أكثر من مرة قلت لج وقلت في مدونة علي خاجه، الفيفا يبي إنتخابات ديمقراطية للإتحادات، ولكن لأنج تدرين إنتي ومرزوق يدري وبوصلوح يدري إن الأغلبية (سواء رضيتوا معاهم ولا ما رضيتوا) هي معارضة للقوانين المدسوسة، وهي قانون الإتحادات اللي من 14 وقانون الجمع بين مناصب الذي خرق من قبل مرزوق الغانم حتى إنتخابات 2008، وهنا أعني إنتخابات الأندية اللي كانت في شهر أكتوبر، وليست إنتخابات مجلس الأمة في شهر مايو.

المهم قانون ال14 راح أعطيج شي واحد يثبت فشله، عندنا بالكويت لعبات ما تشارك فيها كل الأندية ال14، مثل الكاراتيه والجمباز وكرة الماي، بس وفقا للقانون "الإصلاحي"، فإن كل الأندية ال14 يجب أن يكون لديها "ممثلين" في الإتحادات الرياضية، وإلا تعتبر هذه الإتحادات لاغية، يعني سواء عندك كفاءات ولا ما عندك ما يهم.

وبعدين منو قالج إن قانون ال14 ما تطبق؟ للأسف تطبق ونسي وفشل وتوقفنا بسببه، وراح أعطيج أسامي اللي كانوا بالإتحاد علشان تتأكدين.

* الرئيس: محمد المسعود
* نائب الرئيس: دهام الشمري
* أمين سر: مشلش العجمي
* أمين صندوق: هايف المطيري
* أمين السر المساعد: جواد مقصيد
* جهاد الغربللي
* ناصر الطاهر
* عياد سالم
* مبارك النزال
* جالي الجريد
* بدر العنبري
* يوسف صالح
* عبد اللطيف الدواس

وهالحجي كان في سنة 2007، وبعدها توقفنا وانرفع الإيقاف، والسنة اللي بعدها، هم بعد توقفنا وإنرفع الإيقاف.
المشكلة فيكم إنكم تبون الديمقراطية ما تخالف آراءكم، فإذا خالفت آراءكم أصبحتم ضدها.

مرزوق الغانم إجتمع مع الأندية (كلها بدون إستثناء، وأعتقد اجتمع مع الأندية المتخصصة مثل نادي الفروسية) وناقش معاهم خمسة قوانين من القوانين الرياضية السبعة، والكل وافق عليهم وأثنى عليهم، ولكن لما طرح القانون زاد عليه حبتين (أو قانونين ما يفرق) وخالف ما اجتمع عليه الرياضيين.

القوانين اللي تخص التجار، تطلع بعد الإجتماع مع عينات من التجار، وتطلع القوانين موافقة لهم أو مقاربة لتوجهاتهم، القوانين التي تخص المزارعين تطلع بعد الإجتماع بالمزارعين والمفروض تطلع موافقة لتطلعاتهم، وصناع الأجار والطرشي يتفقون على حجم بستوك الأجار، إلا الرياضة فلازم مرزوق الغانم وحده يطلع القرارات المناسبة له.

مليت من كثر ما أعيد هالكلام، ويمكن إنتي مليتي من كثر ما تقرين هالكلام مني، بس شسوي لازم أوضح لج، وبعدين في نهاية كلامي، لا تعتبريني مدافع لطلال وأحمد، ولا تعتبريني ضد مرزوق وصالح، أنا أبي أوضح اللي صار وهدفي إنكم تقارنون بين الوضعين وتشوفون، ما أبيكم تقتنعون بكلامي واللي ما يبي يقرا كلامي هم بعد أحسن له

Mohammad Al-Yousifi said...

مشكلة الرياضة ان ما فيها مشكلة

أهل شرق said...

الشرهة على الكبارالي مخلين اليهال - احمد وطلال - يلعبون بالرياضة لين دمروها

بيت القرين said...

ويل
لا انا كتبت عنهم مو لأنهم كاتبين الصج
بس بفترض جذيه

فيصل
كل قانون اكيد له مثالب
وهذي ممكن نناقشها ونعارضها وفق الاطر الشرعية
لكن الحضرات يبونها لهم وبكيفهم
انتخاب 14 عضو في 2007 ومعاه رسالة للفيفا تقول ترى احنا مو راضين كلام فاضي

مطقوق
الا فيها ونص

اهل شرق
الله كريم

q8ity said...

ملاحظه بسيطه فقط
لفيصل و لبيت القرين
اغلب الناس يخلطون الامر القانون اقر لكل نادي يشارك في مسابقتين لفئتين مختلفتين من مسابقات الاتحاد ان يكون له عضو بمجلس الاداره بمعزل عن الارقام
اي ببساطه ان شارك نادي القرين بمسابقات اتحاد الرجبي لمرحلتين سنتين تحت 17 و عمومي و ببطولتين لكل مرحله اصبح له الحق بان يكون له عضو
المصيبه في القانون شي واحد اذا اصبح لدينا عدد كبير من الانديه حق لها بان بتكون عضو بالاتحاد
و من الممكن ان يكون عدد الاتحاد القدم 17 او 18
اعتقد ان قوانين الرياضه ما هي الا ساحه لتنفيس ضد قوه ابناء الشهيد
علما بان احمد الفهد اتي وزير ولم يستجوب او حتي يهدد بذلك رغم ان السعدون رئيس اللجنه الاسكانيه او الفهد وزيرا لاسكان
حتي التحقيق بخالفات خليجي 16 او المجلس الاولمبي ما هي الا تهديدات صوتيه
للاسف احمد الفهد نائب لرئيس مجلس الوزراء و النواب اصحاب الصوت العالي و الرمزيه لا ياتون علي ذكر الفهد لا سؤال و لا استجواباب
لذا القوانين الرياضيه ما هي الا تنفيس لمريدين من يتهم الفهد نهارا و عقد الصفقات ليلا

Anonymous said...

متابع

بغض النظر عن الموضوع وعن كل المواضيع الي تطرحينها تدرين شنو الشي الي يحببني فيج وفي مدونتج؟؟
انج اخف دم بنت كويتيه بالكويت والله العظيم ماشفت وحده مثل خفت دمج :)
الله يرزقني بوحده خفيفه دم حتى لو جيكره مو مهم

الا انتي متزوجه :)؟؟

مَـــــعْــــمَــــعَـــــه said...

الوطن مكشوووووفه

يا الشيخ احمد واخوه صح ولا الرياضه كلها غلط وتوه الفلم بأوله

Anonymous said...

اهل شرق، صح لسانك!!٠

هالحـــــزة said...

أقــول :

خليك حق الترفيع حق بوعبدالمحسن .. والضرب ببو عبدالعزيز .. اما الرياضة رجاءا خليك بعيد عنها لانها مو لايقه عليك ...

بوناصر said...

الفيفا كان يبي 5

وبن همام لمن وصل الكويت قالها بالحرف الواحد تبون ما يتوقف نشاطكم لازم الأعضاء يكونون 5 حتى جوزيف بلاتر كان مصر على الخمسة

لمن صار اللي صار وعين الأمير الشيخ اخمد الفهد وعطاه رساله يوجهها لبلاتر الفيفا بكبره اندقر من السالفه لأنه بتاريخ الفيفا ما صارت ان يطلب رئيس دولة عدم توقف النشاط الرياضي لبلده لأنه الفيفا حده طمباخيه وبس وماله شغل بالسياسه وهني قدرنا نشارك كأس الخليج

اهني بن همام تراجع عن اللعبه وانسحب واعلن انه ماله شغل وتقدرون ترجعون لمقابلته مع سكوب تشوفون اعترافاته بالأخطاء اللي ارتكبها

اللي بصير الحين تصفية حسابات بين اليوسف و ابناء الشهيد وبإعتقادي الموضوع فيه محاكم إلا اذا تدخل الأمير بنفسه لحسم القضية من غير الرجوع الى الحكومة و المجلس لأنه اللي حاصل هو صراع شيوخ

الزبدة الكل يتحمل المسؤولية

Faisal said...

مشكلتنا في الكويت إذا صارت إنتخابات لازم كل فئة يكون لها "ممثل" في المجلس اللي صارت فيه الإنتخابات، يعني لو في إنتخابات جمعية، نشوف العيم يوقفون ضد الحساوية على سبيل المثال علشان يكون عندهم "ممثلين" في الجمعية، ونشوف النيادة يوقفون ضد الزبارة علشان يكون عندهم "ممثلين" في الجمعية، القانون هذا هو نفس الحالة، حيث كل نادي يطمح أن يكون له "ممثل" في الإتحاد، ولكن ليس لتطوير عمل الإتحاد ووضع خطط عمل مستقبلية ووضع جدول مباريات متزن ويحترم من قبل الأندية، بل للمدافعة عن النادي، هذا بالضبط اللي حصل في مباراة القادسية والكويت في الموسم اللي طاف لما طقوا حميد عرب، شفنا تدخل غسان النصف "ممثل" نادي الكويت في اللجنة الإنتقالية يزور تقرير الحكم، ويشطب الجزء اللي الحكم يطالب فيه بإيقاع العقوبات على لاعبين نادي الكويت، والحادثة موثقة في جريدة الوطن بالوثائق (أدري إنج ما تحبين هالجريدة، وهم بعد أنا، بس للأسف هي الجريدة الوحيدة اللي تكلمت عن الموضوع أما الباجي مادري وينهم)، وبعدها قدم حسن جوهر سؤال برلماني إلى وزير الشؤون عن الحادثة، ولما الحين أنا ناطر الإجابة.

المهم، مافي إتحاد في العالم يمثله جميع الأندية، قبل فترة تقدم مسلم البراك بإقتراح إنشاء نادي اسمه نادي الهلال في محافظة الجهراء، وأهل القرين صار لهم سنين يبون يشهرون نادي القرين، والإتحاد الأسيوي يطالبنا بزيادة عدد أنديتنا علشان نقدر نطبق قانون الإحتراف الأسيوي للمشاركة في دوري أبطال آسيا، يعني إذا فتحت الأندية اليديدة بعد جم سنة، وصار عندنا ثلاثين نادي راح يكون عندنا ثلاثين عضو بالإتحاد، عاد تعالي شوفي هالثلاثين عضو شلون يتفقون، أترك هالأمر لمخيلتج.

ومنو قالج إن إنتخابات 2007 تمت وأرسل بعدها كتاب للفيفا ؟ الكتب أرسلت في عام 2009.

Anonymous said...

اللجنة المؤقته صادت التكتل بأنها إستعملت كتاب أحمد الفهد اللي طرشها للفيفا بأن الأنديه موافقه على 14 عضو ولكن بعد تغير القوانيين بمعنى إن الأنديه ماعندها مانع لل 14 عضو وهذا الأهم بالنسبه للجنة المؤقته والإتحاد الدولي ... اللجنة المؤقته وهقت أندية التكتل بكتاب هي التي أرسلتها وهنا يكمن دهاء اللجنة المؤقته الحاليه وسبب صراخ أندية التكتل .... يا ريت يضعون مصلحة الكويت في المقدمه وليس المصالح الشخصيه .

SHOOSH said...

اهم شي اهم شي

القادسية ما يتاثر

و كيفهم اهما مع غتحادهم مع مشاكلهم مع بلاويهم مع راسهم

ابواسعد said...

مشكلتنا بالكويت انه لا توجد عقوبات تردع المخطا و من امن العقوبة اساء الادب

Anonymous said...

على هالبوست انتي يا ولد يا صبيك مافي روح تعال (:

Anonymous said...

ديموقراطية مرزوق ديموقراطية بطيخ،،،،، طوال عملنا النقابي الجمعية العمومية هي صاحبة القرار النهائي ،،،،١٠ اندية غير موافقين على القانون لكن لازم يمشي!! اقول هذا الكلام لانه حق مع كرهي لطلال و شلته و لكنهم اغلبيه يجب ان يحترم قرارهم و الا يجب ان نلغي كلمة انتخابات ديموقراطيه