26/12/2008

أنا بدشّن بعد


في مدونين شاغلين نفسهم بجريدة الدار

يعني جريدة بلشت بتشلخ

إعلانها الدار لأهل الدار وصاحبها محمود حيدر بديعي

عن أي أهل دار بيحجي يعني؟؟

محلات الذهب تشهد يا بديعي أيام الغزو

إذا بتتناسى وتصير الحاج محمود حيدر

إحنا ما ننسى

نروح حق صالح الملا

صالح برايي وأختلف مع نيو ما غلط

عادي رايه وطبعا ما راح يوقف ضد حرية الراي

بس الدار خذت اللي يعجبها من الكلام

وطبعا في مدونين يسيئون للتدوين وهذا شي طبيعي اي مكان فيه الزين والشين

أما الموضوع الأهم برايي اهوا الإرهابي هذا

يقول دشّن جماعة للأمر بالمعروف والنهي عن المنكر

ويقول بالفقرة اللي تحتها

لن نستخدم العنف بل نكتفي بالنصيحة والتذكرة

يعني ودود وطيب وحبّوب

مو ناقص الا اذا شاف شي غلط ينصح ويشتري لنا دب من الشناكل بعد

المصيبة بنفس الجملة شيقول

ونحذر من إحتساء الخمر في رأس السنة

مو من بيع الخمر وتهريبه

لا اذا شربت خمر يا ويلك

المشكلة ان التحذير يتنافى مع النصح والتذكرة

التحذير عبارة عن تهديد

يعني واحد بلّش مادري دشّن بتشلخ وتناقض

ويقول لا نتعارض مع الداخلية بل عملنا مكمل لهم

بكيفه الحبيب لا مو الحبيب

بكيفه يبي يكمل أعمالهم

لا ومبلش من الصليبخات

وبعدين بينتشر بالولايات المجاورة

دام السالفة جذيه

عيل انا ناويه ادشن لجنة مكملة لعمل وزارة الإعلام إختصاصها الحفلات والوناسة

ها شرايكم من معاي؟؟

قبل آخر شي

داو كيميكال

مشروع صح او غلط ما ادري

بس اللي اعرفه ان ناصر المحمد مو قادر ليما الحين يتخذ قرار يقر المشروع او يلغيه

ولاحظوا معاي شي مهم

مشكلة الرياضة اللي انتهت بإنتصار القانون على المتكتلون والخارجون عن القانون

لاحظوا ان ناصر المحمد ما قال ولا كلمة عن المشكلة ولا تدخل لا من قريب او من بعيد

هذا واهوا رئيس الوزراء يعني؟؟

وأنا بعدي معارضة

حق رئيس لا يهش ولا ينش للأسف

أما آخر شي

مطلوب للإيجار أرض بمساحة 50 ألف متر مربع
قررت أسوي مطار

لأن طيران الوطنية صار عنده مطار بروحه

وأكيد إن السبب مو حمد كلّش

فاللي يأجر لي هالأرض عشان افتح مطار يكون خوش واحد

25 comments:

شوق said...

انا اقول خل يستريح شوي البذالي..الظاهر مضيع النمرة..نسى انه بالكويت

و بالنسبة لموضوع صالح الملا، توني قرأت رسالته عند مدونة الاخ زيدون

السالفة طلعت غيييييير...بس في ناس الظاهر تحب تلفق

alsaronah said...

المشكلة مو نحذر من شرب الخمر يعني الشعب موغبي من متى الخمر يدش الكويت..


خلوا الراس الكبيرة الي تدخل الخمور غصبن عنهم وعن الي خلفوهم...

Anonymous said...

إي عدلي خمالك ومره ثانيه خل أشوفك تعارضين سمو الأمير للأقص اللسانك قص .. ولا رئيس الوزراء عندج إياه من اليوم لين الصبح.

ديرة بطيخ said...

والله ان الديره ضايعه ومالها نوخذه يفودها عيل اشلون يتجرئون وسون جماعه ويعلنون عنها عيني عينك لانهم عارفين ان محد راح يقول لهم شي

والله مهزله ورئيس الوزراء مايعرف يتخذ قرار وكل من يلفه صوبه

للاسف والله ان الكويت يصير فيها جذيه

:(

abu eldestor said...

خلوه يهذر البذالي
متعودين عليه كل سنة

Anonymous said...

حجيه بيت القرين ليش اذا كان الحجى عن اى واحد شيعى او شيعه تحاولين تنسحبين بطريقه دبملوماسيه ؟

Safeed said...

لولا هالقضايا جان فلسوا نص المدونين :)

العدالة الكويتية said...

المقال تضمن عدة مواضيع في مرة واحدة :) من انتقاد الممارسات الحكومية إلى إنشاء لجنة شعبية للنهي عن المنكرات مرورًا بحملة صحافية وتصريحات نيابية حول المدونات الالكترونية.

سأركز على الموضوع الأخير وأقول، إن الدستور والمنطق والنصوص تجيز تنظيم ممارسة الحريات العامة، ومن ضمنها حرية التعبير عن الرأي، بشرط أن لا يكون في التدوين إضاعة للحق الأصيل.

al-nokhitha said...

3adel kalamich 9ale7 ma '3ala6 bas el thaher 9a7ebna edawiiir el zala :)

3ala mawthoo3 el dow chemical company 7asafa enich ma sheftay moqabalat
9ale7 el mulla 3ala scope tv
9ara7a 5ala d3ay el shemiri o maha el turkait (CEO 7ag sharika men sharikat el naf6) yetbal3iimon o bayan shloon 9afqa6 el dow 5asara lel kuwait :)

embarak el bathalai esta5af emsaiichen :)

3asach 3al guwa :)

أحمد الحيدر said...

إذا ما كان مثل ما انا متوقع بالون اختبار وبيجربون ردة فعل الدولة والناس عليه السلفيين .. فهو مجرد جاهل يسعى للشهرة ..

مو بعيدة باجر يحلق اللحية وينزل ألبوم ترى ;p

وبالنسبة للجنة المساعدة لوزارة الإعلام ما يحتاج ترى .. روحو سألو الفنادق شمسوية فيهم لجنة الوزارة .. يقولك الظواهر السلبية اهون منها !!

بالتوفيج ..

فريج سعود said...

يعني نقدر نلكه هالسنة بره صليبيخات ؟

Anonymous said...

lol

ترا صالح الملا كلنا نعرف مواقفه من اول يوم من اول جلسة و من اول لحظة و اللي تشكلت فيها اللجان

لا عوير ولا زوير يعلمونا فيه

و ان اتت مذمته من بوبي!، ارتفع عندي قدره

مــعـــارض said...

رايتك بيضه يا بوصلوح!

ترد الروح والأمل... رغم أنف الحاقدين

Eng_Q8 said...

وانتي شاغله روحج بجريدة الوطن عادي

Anonymous said...

ملاحظة: عدد الى يردون عليك يقلون ليش
لانك هيلقية ودلاله ومليقة واسلوبك مليق يابنت ال

Anonymous said...

محلات الذهب تشهد يا بديعي أيام الغزو

دانه

ممكن شوية تفاصيل حول هذا الموضوع ؟

ZooZ "3grbgr" said...

دشني افا عليج

وكله يدشن بعد

بس خل يفتح مطارهم

اول وحده تقز فيه انا

:")

بيت القرين said...

شوق
أنا ضد سالفة تلفيق وهالاشياء كل واحد له رايه

السارونه
منو قصدج
:p

أنو
اقدر ارد واضحّك عليك الناس كلهم
بس مابي

ديرة بطيخ
اي والله للأسف

ابو الدستور
ومحد يحاسبه
ينادونه يحققون معاه وشاي وقهوة وفمان الله

أنو
حجي انت تعرف تقرى؟؟؟
شلون استنتجت هالشي مثلا
رد اقرا الموضوع احسن

سفيد
لول

العدالة
خوش حجي

نوخذانا
مادري ليما الحين مو قادره اكون راي عن الداو

أحمد
لول
حلوة سالفة الألبوم

فريج
اي تقدر بس مو تنساني عاد
كنت يايبه شحنه بس صادوها نسور الجمارك مادري صقور

انو
كل واحد وله رايه اللي يتفق مع صالح او غيره

وصالح بشر عادي يغلط ترى

معارض
شفيكم شوي شوي
عادي نقد ولازم نحترمه
شنو حاقدين الله يهداك
ترى كل ابونا جماعة

مهندس
جريدة الوطن برايي تهدد امن الدولة
مو تهدد لا اثرت على امن الدولة
وعشان جذيه واقفه لهم
ومفروض توقف معاي انت بعد

انو
يقلون يزيدون كيفهم
انا اللي مونسني ان انت شايفني مليقة وما تطوف بوست الا وتقراه وتعلق بعد

وعلى طاري يا بنت ال
اشوه انك ما كملت عشان لا تكتب اسمك
:)

انو
ان حصلت فرصة قريبة نكتب

زووز
دقي علي بعد
:)

Anonymous said...

يحليلج

صج والله ؟ ياليت اتضحكيني من زمان محد دقدقني

كفايه محد عارف اذا انتي رجل أو امرأه

شغل تمسكن و الستضعاف هذا معروف خصوصا عاشوراء ما بقه عليه شي

لا وبعد صايرين لي شيوخ دين
اشوه انه القرآن نزل بالعربي مو بالإيراني .. أول مره اشوف فارسي يقول جدي الرسول مادري من متى الفرس و العرب كانوا انساب.

الحمدالله على نعمة العقل و المنطق ..

ketchub said...

أنومينس .. يا ذكي .. آنا ما أبي أشط بالموضوع علشان لا نميّل الموضوع صوب الشيعة .. لكن أصابعي يحكّوني و ودّي أحكّك بـ رد

مو لأن الجهل عامي عيونك .. هذا إذا إنت أصلا مو عمّي و مطسّس .. لمّن الفارسي (على قولتك) يقول جدّي رسول الله فـ معناه إنه (سيد) .. والسادة أصلهم إجباري يرجع لـ فاطمة الزهراء (ع) اللي هي بنت الرسول (ص) إذا ما تعرف والظلم والإضطهاد اللي لاحق أحفاد الرسول (ص) خلاّهم يتشردون خارج موطن جدهم (ص) .. منهم اللي راح العراق ومنهم اللي راح إيران

فهمت يا (مو ذكي) ليش يقول الفارسي جذي !!

فـ يا (دَخيل) لا تثير النعرات الطائفية بين الكويتين .. لأن الكويتين (شيعة وسنة) عايشين بسلام من قبل لا يتلزّق يدّك بالكويت

وسامحيني حجّية طلعت برّه الموضوع .. بس أقولج (غو أهيد) وخلّي الـ .. ينابحون :)

Anonymous said...

حتى برد تتهربين بعد يا حليلج والله

تونى ادرى انج ارقوزه وعندج قدره انج تضحكين الناس

Anonymous said...

صج انك كتشب

http://ar.wikipedia.org/wiki/%D8%A3%D9%87%D9%84_%D8%A7%D9%84%D8%A8%D9%8A%D8%AA

حتى مذهبك مو عارف عنه شي

الموضوع صحيح مو طائفي لكن رجاء بلا مكابره و استخفاف بعقول البشر

أما وصفي بالغبي فهذا شيئ مو قريب منك

أول مره أسمع أنه الخميني أصله عربي

يعلم الله إني انسان غير طائفي .. ما أدري منو بالأساس اللي قاعد يتكلم عن نبيل العوضي و البذالي

Eng_Q8 said...

ومن قالج اني مو واقف معاج ؟

ولكن ما اتكون اهي المحور الاساسي عندي فبالنسبه حقي اهي محور وفي اشياء اهم منها بوجهة نظري وانتي بوجهة نظرج انها اهم من اولوياتي نختلف بتحديد الاولويات لكن هذا ما يعني اني اقولج انها زينه فهمتي البوينت :)
وهم ترى جريدة الدار بدت اتهدد تدرين ليش لانها مو بس جريده الحبيب قاعد يبني مؤسسات اعلاميه حاله حال الوطن

والدليل مري على ارشيفي وشوفي جم مره تكلمت عن الوطن

والا اقولج ليش الارشيف توني كاتب عنهم في مشروع الداو

ودمتي :)

ABC said...

دانه

نصيحتي لج لأغلاق تعليقات غير المعرف

للأسف هناك دائما من لا يقدر نعمة حرية ابداء الرأي

وكل عام والجميع بخير

ketchub said...

أنومينس .. يا نكرة .. مشكلة أمثالك لمّن يتوهق و يحس إنه مندقر و داش بالطوفة .. يقحّص و يغبّر .. وهذا شي كنت متوقعه

يا غبي .. و ماني رادها عنك .. آنا قلت و وضّحت لكن عقلك المغيّب بغير إرادتك ما فهم نقطتي عن أصل السادة .. ما يحتاج أعيد شرحي مرة ثانية إحتراما لأصحاب العقول

بعدين يا بو عرب .. ترى فيه فرق كبير بين الغين و القاف يعني قريب تفرق وايد عن غريب .. بس بما إنهم نفس الشي عندك .. عيل صج طلعت قبي ومن أقبى الأقبياء بعد.

حجيه .. لا تمنعين الردود من غير معرّف علشان صاحبنا يزيد في إثباته لـ غيره إنه من الأذكياء .. بل أذكى واحد موجود بمدونتج.