04/11/2008

IQ

أول شي هالخبر


متهم بالنسبة للقضاء ويقين بالنسبة لي أنا على الأقل إن عصام الدبوس واحد من المتلاعبين بإرادة الناس من خلال شراء الأصوات

وهذي النيابة بتخاطب المجلس عشان يرفعون عنه الحصانة للتحقيق معاه بجريمته

وأنا أقولها من ألحين

إذا المجلس فكّر بس فكّر إن يرفض رفع الحصانة

أرد وأقول بس فكّر إن يرفض رفع الحصانة

راح يكون هناك حملة ما شفتوها من قبل

حملة تدوين

وحملة صحف

وحملة حشود جدّام المجلس

وتعرية لكل شخص فكّر إن يرفض رفع الحصانة

وهذا تهديد حق أي نائب ممكن يقوده مخه إلى رفض رفع الحصانة

وقد أعذر من أنذر


نروح حق خبرنا الثاني اللي يحسسنا بمقدار معاناة الدولة

قبل إستجواب مجلس الوزراء أمس كنت أقلّب موضوع إستجواب المليفي الغير مقدم إلى الآن حق ناصر المحمد

وأفكر بحلول حق الأزمة او اللي يسميها أزمة وإهيا طبعا ولا شي

لما هدد المليفي إن راح يقدم إستجواب لرئيس الوزراء

كان الكلام ومجمل الإستغراب إن هذي أول مرة يصير إستجواب حق رئيس الوزراء

مع ان المتوقع بعد الإستجواب إن محد يوقف مع المليفي إلا عدد قليل جدا من النواب

وكل نائب يرفض الوقوف مع المليفي بيلاقيله عذر يعني مو صعبه

لكن شاللي صار

طلع كلام الاسبوع اللي طاف مو رسمي إن مجلس الوزرا يدعم تحويل الإستجواب إلى اللجنة التشريعية بالمجلس

وطلع كلام من عضو اللجنة التشريعية المغوار علي الهاجري

يقول حق أحد النواب لا تحاتون اذا دش الاستجواب اللجنة ما راح يطلع

كل هذا عشان الكرسي

مو عشان مضمون الإستجواب طبعا

الحين لنفرض إن هالدعم الحكومي لتحويل الاستجواب للجنة التشريعية

وأشكال مثل علي الهاجري "قمتوا هالاستجواب باللجنة" ورفعوه للمجلس عشان يصوت عليه

نوابنا الأفاضل شراح يسوون

اللي يصوت مع المليفي راح يكون شجاع واللي ضده راح يكون جبان واشترته الحكومة

وبطبيعة الحال اللي بيخاف اكثر من الشجعان

فراح يطيح الإستجواب لعدم دستوريته

طولوا بالكم السيناريو طويل شوي

لما يطيح الاستجواب بسبب عدم الدستورية

ولان المليفي ذكي

راح يقول يبا مو تقولون الإستجواب مو دستوري

عطوني النقاط الغير دستورية بالاستجواب

يعطونه النقاط الغير دستورية

ويقوم المليفي ويشيلهم

ويقول هذا استجوابي صار دستوري الحين

بهالحالة شنو يكون صاير

المليفي حقق السابقة باستجواب رئيس الوزرا

وهالحالة ممكن تؤدي وبشكل مؤكد لحل المجلس

يرد المليفي للشعب بأنه بطل الأبطال

وكل الجبناء تتقلص حظوظهم

ويعود المليفي للمجلس ويثبت رئيس الوزرا عدم استعيابه للأمور

طبعا السيناريو السابق كان ممكن يصير بس ما صار

وممكن يرد يصير اذا اجراءات الحكومة أمس ما ارضت المليفي وأصر على استجوابه

طيب لنفرض ان اجراءات الحكومة امس

واللي اهيا سحب الجنسية من خمس مواطنين

وتشكيل لجنة تحقيق بالمصروفات

ارضت المليفي وما قدم استجوابه

شنو يصير

باختصار

راح يي دور بورمية يقول طيح القروض ولا استجوب رئيس الوزرا

وهايف يقول حجّب ماما أنيسة ولا أستجوب رئيس الوزرا

وعدنان ولاري يقولون لازم تخلّون نصرالله وزير الدفاع او حتى الشؤون ولا نستجوب رئيس الوزرا

وسعدون حماد يقول لازم ناصر الدويلة يقول ما اعرف مرة وحده بحياته ولا استجوب رئيس الوزرا

وكل شارده ووارده فيها تهديد لرئيس الوزرا

يعني انا بس بعرف منو العبقري اللي شار على رئيس الوزرا ان يتخذ اسلوب تحقيق رغبات المليفي عشان يفتك من الإستجواب؟؟

ابي رئيس الوزرا مو شايف مسلسلات وافلام

يعني ما يدري ان اللي يرضخ لاي ابتزاز يفتح الباب حق ابتزازات ثانية؟؟؟

يا جماعة انا مو مكتشفة الذرة بهالسيناريو

اهيا عملية حسابية بسيطة توصلنا ليما هالنتايج

طيب الحين

شنو جدام الحكومة بعد هالرضوخ لمطالب المليفي

بغض النظر ان كانت مطالب المليفي عادلة او لأ

الحل اللي جدامها

ان تشوف المليفي يقدم الاستجواب او ما يقدم

والارجح ان ما راح يقدم الاستجواب

وبهالحالة

وبعد مدة قصيرة ما تتجاوز شهرين

ينحل المجلس

وبهالحالة يكون المليفي جبان بعين الشعب وما يفوز ويتعاقب على تهديده بالاستجواب
هذا اهوا المخرج الوحيد للحكومة حاليا عشان يكون تهديد لك من تسول له نفسه باستجواب رئيس الوزرا

هذا انا حرقت كل الافلام الممكنة

لكن ارد واقول ان حكومة ناصر المحمد تتألق بفن اللا ممكن

لا تستغربون يشيلون موضي الحمود خلال فترة قصيرة لأن وزارة الأشغال مو قايمه بدورها

عموما

دام الحكومة ترضخ

خل مرزوق او الراشد او الملا او الصرعاوي او الصقر او العبدالجادر يقدمون استجواب لرئيس الوزرا على الرياضة

لعل وعسى نحدّه على شي صح يسويه

عموما

اللي يحب الشعر اليوم امسية شعرية برابطة الادباء الساعة 7 من تنظيم صوت الكويت

واللي يحب الفلوس اليوم ندوة عن الاقتصاد يحاضر فيها الراشد والنيباري والصرعاوي وجاسم السعدون الساعة سبع ونص بديوان علي الراشد بالقادسية

وبالنهاية نهدي هالموقع حق بوصباح ومستشارينه

17 comments:

سرحان said...

معاج على طول الخط

تنرفع الحصانة يعني تنرفع

و باللي تبونه أنا حاضر

Mohammad Al-Yousifi said...

سحب الاستجواب مصيبة

Yang said...

كل شي له مخرج, وراح يطلع منها المليفي وراح يصير البطل.

كلها لعب سياسية قذرة وضحاياها احنا.

Eng_Q8 said...

وهايف يقول حجّب ماما أنيسة ولا أستجوب رئيس الوزرا

وعدنان ولاري يقولون لازم تخلّون نصرالله وزير الدفاع او حتى الشؤون ولا نستجوب رئيس الوزرا

وسعدون حماد يقول لازم ناصر الدويلة يقول ما اعرف مرة وحده بحياته ولا استجوب رئيس الوزرا





ضحكتيني حسبي الله على ابليسج

بس فعلا سحب الاستجواب مو حل وفي سيناريوهات اخرى راح اقولها بعدين

Anonymous said...

المليفي سحب استجوابه لان الحكومه استجابت لمحاور الاستجواب.. اولا اسحبت جناسي الاشخاص اللي كان عليهم تحفظات او قيود امنيه.. و ثانيا شكلت لجنه للتحقيق بمصروفات ديوان رئيس الوزراء لان كان فيها فساد مالي و شبهة تنفيع و طبعا اذا ثبت ان فيها فساد فسيحالون للنيابه... اعتقد الغرض الرئيسي من الاستجواب هو الاصلاح.. و المليفي شاف الخطأ و حاول اني يصلح و اعتقد اني راح يوصل لشيئ

Anonymous said...

المليفي سحب استجوابه لان الحكومه استجابت لمحاور الاستجواب.. اولا اسحبت جناسي الاشخاص اللي كان عليهم تحفظات او قيود امنيه.. و ثانيا شكلت لجنه للتحقيق بمصروفات ديوان رئيس الوزراء لان كان فيها فساد مالي و شبهة تنفيع و طبعا اذا ثبت ان فيها فساد فسيحالون للنيابه... اعتقد الغرض الرئيسي من الاستجواب هو الاصلاح.. و المليفي شاف الخطأ و حاول اني يصلح و اعتقد اني راح يوصل لشيئ... فيجب رفع القبعات للمليفي

ساره النومس said...

على ناس وناس

مع اني كنت احترم الدبوس بس الكويت فوق كل شي :)

Bloggerista said...

وهايف يقول حجّب ماما أنيسة ولا أستجوب رئيس الوزرا
وعدنان ولاري يقولون لازم تخلّون نصرالله وزير الدفاع او حتى الشؤون ولا نستجوب رئيس الوزرا

لول

بدعتي :)

deeratna said...

هو من المفترض ان المليفي ما "يرضخ" لإسلوب الترضيات ويكمل المشوار في طريقه للاستجواب ، بس بنفس الوقت ما استبعد اذا سحب الاستجواب لأن هذه هي السياسة واتمنى مايسحبه!

الدســتور said...

على طاري الرياضة
ماشفنا تعليق طلال الفهد
على زيارة النواب لسمو الامير

q8mirror said...

يسلم تمـــك على هالسيناريو!!؟

بس مهما صار نظل نفتخر اننا انتخبنا انسان جرئ..


عرّى النواب المتخاذلين..المجلبين بالكراسي..



لكن احتمالات الابتزاز تخوف..:(

JiBLa CiTY said...

والله تخرعون انتوا يا زمرة المدونين

:P

q80ya4ever said...

انا مادري شلون اي شخص يبيع صوته عشان فلوس استغفرالله ترى الصوت امانه تعطى لمن يستحقها معقوله مصلحة الكويت صارت تنشرى وتنباع بالفلوس بعدين النائب اللي وصل للمجلس بفلوسه شنو بيقدم لديرته اذا هو ما قدر يوصل لاهل الديره بمبادئه وسياسته والله اني احس انه هالمجلس غير شرعي يعني اغلب نوابه واصلين بفلوسهم او بنفوذهم او عن طريق القبيله او عن طريق ابناء طائفتهم الله يستر على هالديره واهلها ويحفظها لنا ويرزقنا بمجلس سنع يرفع الراس مافيه لاقبليه ولا طائفيه ولامزايدات على حب الوطن

Anonymous said...

9a3ba tenrifi3 el 7a9ana lakin atmana :)


Ya baba deerat
ba6eeeeeeeeeeeeeeeeeeeeeeeee5 !

Mozart said...

مثل ما قلت سابقا اني معترض على رضوخ الحكومة للمشاريع الاستبدادية من قبل النواب المطاوعه كي لا تتعرض للاستجواب و طرح الثقة

و بنفس الوقت اقول ما هي الإضافة التي سيقدمها هؤلاء المجنسين الخمسه للبلد ؟

Anonymous said...

I love how you mention the source of the clippings

WELLTHOUGHT out!

MFTELET said...

قوه دانه , ودي ارشح شخص حق شخصيه الاسبوع ,, وانتي كيفج ,,, بوعلي مرزوق الغانم على كشفه للحقائق في قناه سكوب ..... وشكرا