خل يولون

هذا حل الرياضة من عاشق وطن

بس طبعا ما راح يصير

بس عشان تعرفون الدولة ما تبي تمشي

ولا ماكو اسهل من ان ناصر المحمد وحكومته يلزمون الأندية بالتوقيع على هالعريضة ونلعب بكاس الخليج وغيره

اي صج اذا الحكومة طبقت قوانين الدولة بالرياضة

انا مستعده اراهن راح ناخذ كاس الخليج

المهم

أمس قلت بموضوع بعنوان الفالي

تقدرون تقرونه تحت هالموضوع اذا ما كنتوا قارينه ان المسألة بسيطة

اذا الفالي عليه قيد امني فلازم يطلع حتى لو صارخ القلاف وعاشور وغيرهم

اما اذا ما عليه اي شي فخل يقعد حاله حال اي وافد

والكل من المعلقين اتفق معاي او الغالبية العظمى من المعلقين ان صح التعبير

طيب أمس العقيد محمد الصبر الناطق الرسمي باسم الداخلية شقال

قال الناطق الرسمي باسم وزارة الداخلية العقيد محمد الصبر ان 'السيد باقر سيد احمد راغب زادة لديه اقامة صالحة لغاية عام 2011 وعند دخوله البلاد يوم 13 نوفمبر الجاري ابلغ من السلطات الامنية بانه غير مرغوب باستمراره للاقامة في البلاد'.واضاف الصبر في تصريح لوكالة الانباء الكويتية (كونا) انه 'بعد التحقيق معه حول هذا الامر طلب مهله لانهاء كافة ارتباطاته والتزاماته وقد اعطي مهلة الى يوم الخميس المقبل لمغادرة البلاد

يقول عند الفالي اقامة صالحة ليما 2011 بس غير مرغوب باستمراره للاقامة؟؟؟؟

انزين عيل شالمشكلة

يعني مقيم بصفة قانونية بس لان الطبطبائي وهايف ومحمد المطير ما يبونه يقعد ما يقعد؟؟؟

شهالديرة؟؟؟

لحّد يصوّر لكم إن الصراع الحاصل شيعي سنّي

الصراع ترى سلفي قانوني مو أكثر

أبي الطبطبائي شدعوة منتقل تشيلسي على هالصورة؟؟؟

تذكرون ب 2004 لما ستار اكاديمي سووا حفلة بارض المعارض؟؟

أيام بشار وصوفيا وخلاوي وبرونو يا زينه من ولد برونو كان خوش ربّة بيت

بذيك الايام كان في سلف من طقة وليد وربعه ما يبون ستار اكاديمي يسوون حفلة

او حتى يوطوطون الديرة

يعني كان حالهم حال الفالي غير مرغوب فيهم على قولة الصبر

بالنسبة حق بعض الناس

بس كان في حكومة تحمر العين وقتها

كانت مو مخلية السلف يفرضون رايهم غصب طيب

وعلى فكرة وعلى الرغم من تشابه قضية ستار اكاديمي وقضية الفالي

ستار اكاديمي بالنسبة للسلف دعاة فسق وفجور

والفالي داعي لكره الصحابة

والطبطبائي كان عنصر مشترك بالرفضين

رفض ستار اكاديمي ورفض الفالي

الا ان ورجعوا لأرشيف ذيك السنة ما تجرأ بكلمة استجواب لرئيس الوزرا

بس اليوم يقدم الاستجواب وعالراحة

والسبب شنو

ان هناك شخص يسمى ناصر المحمد معطيهم ويه وايد

وخايف يمارس اختصاصاته

الفالي ما عليه شي على كلام الداخلية اذا الفالي يقعد

مهما تكلم هايف او الطبطبائي او حتى لو وصل الأمر ان المطير يتكلم

ما علينا وباختصار خل يولون

هالبلد بلد قانون

بغى الطبطبائي او ما بغى

لو كان وجود الفالي خرق قانوني كلنا نوقف مع الطبطبائي وهايف بس مو مع المطير

لكن وجوده قانوني اذا يولون وماكو كلمة أذرب منها

طبعا أنا قاعده اقول المفروض

لكن الواقع ان الفالي راح يتسفر لأن ناصر المحمد ما يحب المفروض

وأنا بعدي معارضة