07/11/2008

من شلعته لا بد + شخصية الإسبوع


أول شي المسيد اللي يم الجامعة الامريكية أظن إسمه مسيد الشيخة بدرية

وقت صلاة اليمعة الناس يسفطون عالاشارة وينزلون

يعني بتأدون فرض ربكم وتعتدون عالقانون

عطونا حديث قبل إسمه إماطة الأذى عن الطريق

وسياير المصلين عبارة عن أذى

والله مسكرين الإشارة يعني تشب خضره حمره صفرا محد يقدر يمشي

والداخلية اكيد هم قاعدين يصلون والناس تبتلش

المهم

كلمني علي الراشد عضو مجلس الأمة

شلون عرفني مادري

بس بوفيصل اذا ياك دميثير وقال لك منو بيت القرين قول مادري

حتى راعي الفحماء اذا ياك وقال شنو انترنت هم قول له مكتبه ما فيها كتب

واذا ياك ناصر الدويلة وقال منو دانه هم قول مادري

لا صج الدويله ما راح يسئلك لأن يعرف كل شي

واذا ياك المطير وقال منو بيت القرين قول له عادي

وخل يدق علي بعد وانا اتفاهم معاه

المهم كلمني علي الراشد وقال لي تعليقا على موضوعي مو فاهمين

اللي انتقدت فيه دخولهم للجنة الظواهر السلبية

وشرح لي ان التيار الديني ما خلاهم اهوا وصالح يدشون اللجنة

بالعكس التيار الديني عرف ان الراشد والملا راح يحصلون اغلبية الاصوات

وعشان لا يطلع شكلهم مو شي ان الليبرالين فازوا في اللجنة فخلوا اللجنة بالتزكية لكي لا يحسب انتصار للليبراليين

وهم قال لي ان اهوا ما قال ولا مرة عن لجنة الظواهر السلبية انها لجنة غير دستورية

وبالتالي ما ناقض نفسه بدخولها

وانا راجعت بعض الصحف ايام تشكيل اللجنة وما لقيت ان قال غير دستورية

وقال لي ايضا سبب دخولهم اللجنة واقتنعت فيه

بس ما راح اقوله

مو نحاسة مع اني بالعادة نحيسة

لكن اقدر اقول لكم انه تكتيك

بس اذا شفت ان السبب من خلال اداء اللجنة مو قائم راح اقوله

عموما انا شخصيا اقتنعت بكلامه

بس المهم ان لا يقول الا حق المطير منو دانه
:)

ندش بموضوع الرياضة

مرزوق الغانم بو علي

يقولون أبدع وللأسف ما شفت اللقاء

على قناة الإمبراطورة على نفسها وإخوانها فجر السعيد

والرؤية ناشرين معظم تفاصيل اللقاء اليوم

مرزوق ابدع في اللقاء كما عهدنا منه بشأن الرياضة

ويمكن يكون من افضل المتحدثين بهذا الشأن حاليا

قال

ان حل المشكلة بسيط بس يبيله اوادم

وللخروج من الازمة الحالية ورفع تعليق النشاط الامر جدا بسيط كما قال الغانم، وهو يتمثل في اجتماع عاجل للجمعية العمومية لاتحاد الكرة واعتماد النظام الاساسي للقانون المحلي وارسال موافقة جماعية من خلال محضر رسمي واخطار فيفا بالتعديل الجديد وفيفا سوف يلتفت الى ما تطلبه الجمعية العمومية ويتم حل الازمة سريعا

هل يا ترى في اوادم بأندية طلال الفهد

وعلى طاري الرياضة

بالله ديره حكومتها ما تبي اللي يشرط تطبيق القانون

هذي حكومة تنفع تسير بلد

ولّا حتى يعتمد عليها

اقول بو صباح يقولون الأوستن مارتن مسوين خصم الحق

انا اقول ان النقد الأكبر على ربعنا اللي ظنوا بيوم ان بوصباح وراه اصلاح

من 2006 واحنا ما شفنا شي

متى بنشوف

شكّل ست آلاف حكومة

وماميش

يقولون إن العقيد فيصل الجزاف اهوا بيصير مدير الهيئة

واسمع عنه كلام طيب

بس دام بيحطونه اكيد بيشرطون عليه وخر عن طلال واخوانه ولا ما تمسك

وابتعد عن تطبيق القانون ولا ما نحطك



وهذا هم دليل بعد على إصلاحات الدولة

نائب عنده 76 سكرتير

ووزير بالحكومة متجاوز حده بعدد السكرتارية

ويقول اصلاح

انزين

الحين المليفي يقول ان بوصباح فشل في ادارة الازمات

ومصروفاته عليها علامات استفهام

قام

بوصباح

وسحب جناسي 5 كويتيين

شكو؟؟؟؟

أرد وأقول نكته قديمة ذاكرتها بأحد مواضيع المدونه

واحد قال حق اخته ربطي لي الجوتي
قالت له شنو انا تفاحه
جان يطيح الكبت

شنو يعني المليفي يقول ما تقدر تدير ازمات

تسحب جناسي؟؟؟

على فكرة حالة وحده من حالات المسحوبه جناسيهم

كان عليه قضية من 17 سنة على خدامة مو دافع معاشها وشي جذيه

المهم جنسوه السنة اللي فاتت مع اللي تجنسوا

وجنسوا اخوه معاه

وطبعا عيالهم

المهم الحين سحبوا جنسيته وما سحبوا جنسية اخوه

والسبب القضية اللي قبل 17 سنة

الريال قاعدين يسئلونه عياله

ليش انسحبت جناسينا انت متعاون ايام الغزو؟؟؟

قاموا يشكون بإبوهم

والسبة رئيس الوزرا وحكومته المصلحة

الريال يبجي ويقول عدموني على القضية مالت 17 سنة قبل ما عندي مشكلة حتى لو ما تسوى اعدام

بس خلّوا جناسي عيالي

شنو هالترضية يالمليفي اللي تخليك تعلق استجوابك

وناس ينظلمون بسبتك

تدري يا بوصباح ويا بو انس

دعاوي المظلومين عليكم شكثر الحين

شلون تنام واخوك الانسان يشكي من ظلمك

اللي العن من الاعدام برايه

لي هالدرجة هان الانسان عندكم

عشان واحد يطلع بطل والثاني خوّاف يبي الكرسي يظل معاه

رجعوا كرامة الإنسان وبلا كرسي بلا بطيخ

اي على فكرة سحب الجناسي اذا مقتنعين فيه الحكومة

واهيا نفس الحكومة اللي جنستهم

يعني يا التجنيس كان غلط يا السحب كان غلط وبالحالتين

الحكومة مسويه شي غلط ومو غلط هيّن

نوابنا لا تعدون هالسالفة على خير

صدقوني حكومة مثل هذي ما تصلح تسوي حتى نتفه خبز ياااااو

شخصية الإسبوع
عندي شخصيات اسبوع وايد

مرزوق الغانم على مقابلته الجريئة والصريحة والثبات على تطبيق القانون

كفو بو علي

علي الراشد على اهتمامه وترحيبه بالنقد

ومثل ما اقول دايما ان اهتمام الشخصيات والاعلام بالمدونات يعطينا دفعة قوية للاستمرار

محافظ البنك المركزي الشيخ سالم الصباح

أخيرا شفنا واحد بمنصب حكومي حساس ويملا مكانه

وحبيب كيفان والروضه باراك اوباما

لما رولا دشتي قالت نقدر

ماكو نكته الا وطلعت عليها

لما اوباما قال

yes we can

أشوفها حلت بعيون الناس

:)

على فكره سبب فوز باراك اهما الشباب اللي غيروا فاهمين يا شباب

ونخليكم مع رائعة مسفر الدوسري

اللي حبك قبل احبك

مسفر كثّر من الأشعار وقلل المقالات رجاء لا تحرمنا

وايد تكلمت مو؟

اي على فكرة عنوان الموضوع اقصد فيه احد الصور بالموضوع

17 comments:

Arfana said...

hahahahahahah

لا بد لا بد من شلعته

Anonymous said...

Mal el salmiya Zain bas 9alat el yem3a ! wana 7adir men el shalaih fe masyad 3ala el 5a6 el saree3
a3tiqid bel 9eba7iya kel farth
ya9fi6on el mo9aliin 3ala el 5a6 el saree3 ya3ni esh hal bashar o sheno hal 3aqliya kelna en9ali bas ma7ad fena ya9fi6 eb 5a6 saree3
3ashan e9ali o esh hal mohandis ele bana masyad
3ashan etkoun mawaqfa bel 5a6 :)

hal 7ekouma madrii wain betwadena o ma agoul '3air
ALLAH EL 7AFITH :)

حياتي هدف مو عبث said...

اللي يوقفون عند المسيد ما يوقفون عند الاشارة

يوقفون لما تلفين فوق تحت الاشارة يعني جدام المسيد

او يوقفون في اللفة الفرعي اللي جنج بتروحين الجامعة

ما شفت احد وقف عند الاشارة وخله سيارته وراح


:)

Anonymous said...

اي بس الفرق يوم اوباما قال نقدر وكلم الشباب... الشباب تحمس واتكلم بالانترنت وناقشوا ارائهم

احنى بالكويت تللو شبابنا وطقوهم طق الحمير

هذا حجي؟

ذكرتوني بايام صدامو... عدي ماسك الرياضه... طارق عزيز ضايع ويرقع السالفه... البريعصي قاعد ومعفس حواجبه... وبالنسبه حق صدام انا اقول شوفو الجزء الاول من مسرحية سف العرف

Anonymous said...

علي الراشد كلامه مقنع ولا لا لكن بدخول التيار الوطني "اللبرالي" الى اللجنه اعطاها المزيد من الشرعيه

Cute But Imperfect said...

الله يبرد جبدج مثل ما بردتي جبدي بهالمقال.. ان شاء الله اكو حياة لمن تنادي و لو اني اشك

mantovani said...

اي و الله حرام عليهم سالفة سحب الحناسي

فيها نوع من المذلة

و احنا نعرف ان الكويت ديرة عز

مو ديرة ذل



مانتوفاني

Anonymous said...

مرزوق الغانم نائب بالبرلمان والمفروض عليه ممارسة دوره الرقابي من خلال تفعيل الادوات الدستورية لتطبيق القوانين الرياضية المعطلة . ليش بو على ما أستجوب وزير الشئون على هذا التقصير ؟

اليوم عادل الصرعاوي كاتب مقالة بالصفحة الأخيرة بجريدة الرؤية بنفس موضوع الرياضة . طيب وينك يا عادل عن أستجواب وزير الشئون ؟

المواطن العادي من حقه أن يكتب مقالة في صحيفة أو مدونة أو يتكلم بديوانية ويفضفض أو حتى يتحلطم بس النائب من حقة أن يستجوب الوزير المختص لتطبيق القانون المعطل

والا السالفه كما قال غلام بدرب الزلق
بس كلام بس كلام

والعتب على قدر المحبة لنوابنا الرياضيين ومنهم علي الراشد وصالح الملا على سكوتهم المريب على عدم تطبيق قوانين الرياضة المعطلة

ButterFlier said...

one of the best posts walla

q8mirror said...

؟؟على فكرة عنوان الموضوع اقصد فيه احد الصور بالموضوع؟؟

يعني يكون فيه صور وايد بالبوست!!!؟
هاهاها

Anonymous said...

انا مع الراشد والملا بدخول هاللجنه فوجودهم هحسن من التصريحات والندوات عالاقل حركتهم تعتبر فعل مو كلام واللجنه اصلا خدت شرعيتها من الغالبيه وهدي الديمقراطيه

Anonymous said...

انتي معروفة يابنت الهيلق;)

Anonymous said...

زيادة سكرتارية الأعضاء الهدف منه تنفيع الشللية القبلية كما هو الحال مع الطفل المدلل عسكر العنزي . عسكر بتاع البخور أم مليون ونص

Anonymous said...

الغريب انج تذمين ناصر المحمد اللي عطيتيه تي شيرت بعد حملة نبيها خمسة :)

ZooZ "3grbgr" said...

:\

om comment kuwait said...

من صجهم من 7 الى 76 فرق شاسع بس اللي ابي اعرفه كلهم امادويمين و لا نايمين في البيت و ياخذون راتب ؟؟!!

Unknown said...

بصراحة الله يكون فى عون ناخبى المليفى , بصراحة حسرة وخيبة للامال , بصراحة : مليفى خرابها , بصراحة : يجب على المليفى ان يقدم استقالته نهائيا , بصراحة : يحب حل المجلس لانه مجلس تأزيم , بصراحة: يعيش الشيخ ناصر