19/10/2008

برشامه


قبل لما كنا نلعب مونوبولي الصجية مو مونوبولي هالايام

وأقصد بالصجية ان كانت المناطق البريطانية يعني بارك لين أو وايت هول او بيكاديللي

ومحطات القطار وهالسوالف

مو مونوبولي هالايام اللي فيها حي العزيزية ويعطونك مادري جم ريال أو درهم

وتخيلوا مونوبولي كويتية تلقون الضاحية اهيا المنطقة اللي قبل نقطة البداية

ولما نروح حق صندوق الجماعة يقول لنا مبروك تم اسقاط القروض

او منطقة موقع جامعة الكويت بنات وبعدها باربع مناطق موقع جامعة الكويت شباب

او يطلع لكم بدال محطة القطار باص 38 وغيره وغيرها من سوالف

تهقون طولت السالفة وما دشيت بالموضوع

:)

المهم اقول لكم قبل

كنا لما نبي نطول اللعبة وايد وما نبيها تخلص لي فلّس أحد وإحنا قاعد نلعب

وطب بمنطقة حاطين فيها احنا مليون فندق مع ان ما يصير الا فندق واحد

ونبي نطول اللعبة

نطوفها لهم وما ناخذ منهم فلوس

او حتى نسلفهم ساعات

او تلاقون المفلس فينا دمعته بعينه واهوا يطالع صاحبة المنطقة ويقول تكفين طوفي لي هالمرة

ونطوف على ابو ان وناسة ونستهبل على قوانين اللعبة

وكبرنا ودشينا المدارس ومن اول حصص الدين يقولون لنا

من غشّنا فليس منّا

وحرام وما يجوز

ومع هذا تلاقون اللي يايب مدرس المادة وشاري منه الامتحان واللي مسوي برشامه اطول من الكتاب

واللي يلبس نظارة يوم الامتحان بس عشان يشوف ورقة اللي يمه

لا وكان في حركة يمكن ليما الحين موجوده

اللي يبرشم على القلم اللي يكتب فيه؟؟

انا افتكر لو دارس المنهج احسن من معاناة كتابة المنهج على قلم

وهذا التبرشم والغش على الرغم من تحريمه من اول حصة دين

الا ان كنا نشوف المنقبه والمتحجبة والسفور والملتحي أو اللي قاعد يتل شعر ويهه عشان تطلع له لحية وام نفنوف طويل وابو بنطلون قصير

واللي مسوي تمليس وغيرهم كلهم يجتمعون على البراشيم وطايحين له

يعني بالضبط نفس حب اليمنيين للقات

انزين مايصير حرام؟؟

ولا رادين على الحلال والحرام الربع وليما الجامعة نفس السالفة

اللي تلبس الحجاب ومطلعه اذونها ورقبتها وشعرها بس يوم الإمتحان تلبس حجاب مسكر من كل مكان عشان ما يبين الهاند فري

واللي كل يوم سبايكي يدش بس يوم الإمتحان مغتّر لا وشوي ويتلثم عشان الهاند فري

بعدين طلع البلوتوث وصار الغش من خلاله

وصارت معانا مرة وحده تبي تغش جواب بس طلعت دازه حق الدكتوره المسج

:)

الزبده شنو من هالهذره كلها

مع ان موضوع اليوم كان وايد مختلف

بس اللي صار خلاني اغير الموضوع

الزبده ان باليمن مع ان المخدرات مجرّمه قانونا ومحرّمه شرعا بعد

الا انهم يحللون القات

بإختصار لأن ما يقدرون يهدونه

فيولي القانون ويتحايلون عليه عشان ما يستغنون عن اللي يحبونه

والظاهر ربعنا عاجبهم مثال اليمن وايد فشصار؟؟

الرئيس ناصر الدويلة أخو الوزير بدر واخو منا قابضة
وعلي الهاجري مقرر اللجنة ودكتور بعد
واحمد المليفي المحامي والدستوري
وعبدالله الرومي المحامي والدستوري
وعبداللطيف العميري
ومحمد هايف المطيري
ومحمد سليمان الرشيدي الدكتور وتوني ادري ان عندنا نائب بهالإسم
هذيل اعضاء اللجنة التشريعية بالمجلس

قرروا يخلون البرشامه وتحليلها قانون رسمي

وقرروا اليوم من خلال لجنتهم اللي يخلص دورها بعد جم يوم

ان يلغون تجريم الفرعية؟؟؟

يعني الفرعية باختصار اهيا تصفيات بين قبيلة او عائلة او طائفة قبل الانتخابات الرسمية

يعني تلغي مبدأ التكافؤ خير شر

ويون اللي مفترض انهم

حماة الدستور و اللي حالفين على احترامه

ويذبحونه اشكره ويتغاضون عن هالغش

مثل تغاضي الطلبة وتعاملهم مع البرشامة

المليفي والرومي بالذات يفترض تصريح يعلن رفضهم لهذي المهزلة

واللي بيتحجج بالعادات والتقاليد

وان هالتصفيات من عاداتنا

نقول ترى حتى وأد البنات كان عاده

وحتى زواج البنت من ولد عمها غصب كان عاده ويمكن ليما الحين

بس مو كل عاده وتقليد يعني صح

خربتوا البلد ودمرتوها والغيتوا فيها دعامات المجتمع

العدل والمساواة

البراشيم مخالفة للقانون
والغش مخالف للقانون
والفرعية جريمة بحق الكويت
حسبي الله عليكم

25 comments:

سيدة التنبيب said...

سأعلق بنفس تعليقي على موضوع مدونة التفاؤل قبل دقائق

القانون في بلدنا ميت دماغيا منذ سنوات

و نحن فقط ننتظر إعلان ساعة الوفاة

آجركم الله

Anonymous said...

المليفي والرومي والعمير ما كانوا حاضرين الجلسة
يعني باقي الأعضاء توبكوها بروحهم

Bad-Ran said...

نفس هاللجنة و الظاهر بنفس الاجتماع .. قالوا إن توزير الحمود والصبيح غير دستوري لعدم التزامهم بالضوابط الشرعية

Anonymous said...

الفرعية شر لا بد منه

Anonymous said...

سخيفة وغبيه ولااشياب البراشيم للانتخابات الفرعية

Bashar said...

مساء الخير الدانة

النواب العميري والرومي والمليفي لم يكونوا في اجتماع اللجنة وهذا للتوضيح

الـبـيـرق said...

ذكـرتـيـنـي خـل أزهـب بـرشـامـة أمـتـحـان يـوم الـخـمـيـس


:d

Sn3a said...

هذيل من صجهم

انا بعرف شغله
ليش الناس صارت عيونهم قويه
يسوون الغلط يشجعون ينادون فيه بس الحين قامو يشرعونه

حسبي الله عليهم من بشر خربو الديره عشان كرسي وخرده

وينهم الوطنيين؟
وين الكويتيين الصجين

لين لقيتوهم قولولي

الدســتور said...

الرومي رفض اقرار القانون داخل اللجنة
ولكن لاحياة لمن تنادي

بالمجلس راح يبين

Hussain said...

ابي اصحح لج معلومة ماعليه
ترى القات من المخدرات ان صح التعبير بس مو نفس الحشيش والهيرويين والكوكايين وهالسوالف يعني مايسوي بالمخ شي ولا يخربط الافكار اللهم انه مفعوله يعطيج شعور حلو شوي يعني مزاج و يخليج تسهرين واذا سألتيني شلون عرفت ترى مايبيله :)

Anonymous said...

يازينج ساكته بس

أنا كويتي said...

وين العزا؟؟

JiBLa CiTY said...

اذا غاب القط العب يا
:)

Anonymous said...

etha mesha el qanoon saliimli 3ala e9la7ik ya bo 9baa7 !

kena eb kel ezwara nel3ab monopoly o lazim a5er shay en9eer a7zab o bel nehaya nethawash ;p

DiLLi O MiLLi said...

حسبي الله ونعم الوكيل علييييييييهم

وقرارهم الثاني ما ذكرتيه
أعتبار توزير الحمود والصبيح مخالفا للدستور لعدم ألتزامهم باللباس الشرعي

بيت القرين said...

سيدة التنبيب
يعني ماكو فايده؟؟

أنو
واللي غايبين ما يدرون ان هالاشكال تنتهز الفرص

بدران
اي ادري بس في شي يمشي وفي شي ما يمشي
الفرعيات والغاء تجريمها راح يمشي
بس الحجاب مستحيل

ام الهيماني
ابعد عن الشر وغني له
أحسن

أنو
اذا انا غبية شتفسر ان الكل فهم الموضوع الا انت
:)

بشار
وليش ما حضروا ما يدرون بالاشكال الموجودة باللجنة

البيرق
اي روح مو حرام
:)

سنعه
موجودين بس كسالى

ابو الدستور
اذا الشعب يوما اراد الحياة

حسين
اكيد ؟؟
ولا لأن عاجبك تقول جذيه

انو
لا اتكلم احسن
عشان اخليك تكتب :)

أنا كويتي
باقي شوية محاولات انعاش

جبله
ما ارضى على الفار

نوخذانا
منو اصلاح؟؟

دللي ومللي
قرار نورية وموضي ما راح يمشي
عشان جذيه ما كتبته

بعد نظر said...

ahaga

vancouver said...

لانه الدوله بجلاله قدرها
ما قدرت توقف الفرعيات
فقالوا خنحللها

هذي سياسه
الانحنااااء للريح
:P

لانه اكتشفوا انه مااااكو فايده
شله الصراع مع ناس مخها مقففففل
???
ههههه

بس بعض الاعضاء اللي ذكرتيهم ما كانوا متواجدين
يومها

wa6an-alnhar said...

استنكر مشاركة الرومي و المليفي في هذه الجريمة

أما الباجي ما عليهم شرهه

Anonymous said...

بس للعلم, القات مو ممنوع في لندن. مرة قلت حق شرطي انه في ناس يبيعون قات فقال لي ماقدر أسويلهم شي.

Anonymous said...

الانتخابات الفرعية ظاهرة دخيلة سلبية

Unknown said...

يا حيلو البراشيم

Manal said...

المشكلة
ان هذي الاشياء سبب من اسباب التخلف

لما نفكر النجاح معناه اطوف الامتحان باي شكل

بدون فهم

الله يستر
:)

MakintoshQ8 said...

عجبني كلامج عن المونوبولي والبراشيم وايد

عادي انا عقب الفرعيات

صرت اتوقع الغير متوقع من هالمجلس
وبعدين المجلس متروس عيال قبائل يعني هالشي كان متوقع حدوثه
حسافه على القنابل المسيله للدموع بس مخاسير على الفاضي

Mozart said...

السجائر مثلا محرمه من غالبيه العلماء الا انها منتشره و مقبوله اجتماعيا

التقاليد أقوى من الدين أحيانا