خبصه

أول شي اللي يبي أخبار وتطورات أم صدّه وعاجل هذا شغلهم وموفقين فيه ما شاء الله

الموضوع الأهم

يا نساء الكويت ورجالها

روحوا سجلوا بقيد الناخبين

عندكم اليوم وباجر

روحوا عند مختار المنطقة وسجلوا لا تروح عليكم فرصة إختيار نوابكم

بعد السؤال والتأكد

أي وحده شاركت بانتخابات 2006 مسجله تلقائيا بقيود الناخبين

اللي كملوا 21 بعد انتخابات 2006 من الجنسين الاربعا 19-3 آخر يوم للتسجيل


ألحين أقول موضوعي

بس أول شي خنشوف هذا شقاعد يهذي

رئيس إتحاد الطلبة بقيادة الخونة

طبعا ما قال ولا كلمة عن بيان جمعية الاصلاح مع ان بيانهم متعلق بقضية طلابية

بس تكلم عن الرياضة اليوم

يقول

واضاف بان اتحاد الطلبة لايوافق على ان تؤدي ما يسمى بقوانين الاصلاح الرياضي الى تدمير الرياضة الكويتية من خلال ايقاف او تجميد النشاط الرياضي بسبب عدم التطابق مع قوانين الاتحادات الدولية والفيفا مطالباً دعاة الاصلاح الرياضي باصلاح الخلل قبل فوات الاوان. موجها رسالة للمزايدين على آلام الرياضيين والشباب مفادها (بس) لأن الامور وصلت الى مرحلة لا يمكن السكوت عنها

وطبعا مقدمة تصريحه يقول فيه

ان مشاركة الاتحاد في حملة الاصلاح الرياضي (بس) في الماضي

يقول إن الإتحاد شارك بحملة بس

وهذي المعلومة غير صحيحة

الاتحاد ما كان طرف بحملة الاصلاح ابدا

وبعد السؤال عن منظمين حملة الاصلاح

وصلت الاسماء كالتالي

خليفة المزين - فواز المناع - عبدالله بن عيد- علي خاجه - مشعل الغانم - وحده اسمها ابرار مادري ابرار شنو للاسف

كل هالاسماء مالهم علاقة باتحاد الطلبة

يعني رئيس الاتحاد بقيادة الخونة ينسب تحرك ما له علاقة فيه حق نفسه

وبعدين ينتقده

بس مقيولة

الحب طالع على ناصر ودعيج

المهم

فكرت شكتب وشلون اعبر واكتشفت ان الكلام مو قادر يترتب ابد

حتى الابتسامه اللي كنت احاول اني ارسمها لما اكتب أي موضوع ماني قادره اطبقها اليوم

القصة وما فيها

حكومة مو قادرة تتعاون مع المجلس على حد تعبير الحكومة

خنفكر فيها شوي

الحكومة من خلال متابعتي محكورة ب أشياء وايد منها

عدم الموافقة على اي زيادة فوق ال 120 دينار

الرغبة بازالة الدواوين تطبيقا للقانون ونواب الغوغاء يرفضون

الرغبة بتعديل قوانين الاصلاح الرياضي ارضاء للعم طلال والعم احمد والابقاء على المندوب فؤاد رئيسا للهيئة العامة للشباب والرياضة

وهذي صورة حق جمال اللي قاعد مع المجرم طلال"مجرم لأن أعلن رفضه تطبيق القوانين يعني مجرم مو من عندي هذي قانونيا"شوفوا

جمال قاعد بين فؤاد وطلال

حلوه الاسامي وايد

:)

طبعا لو راح نناقش اسباب حكرة الحكومة ما راح نخلص وراح نرد بالتاريخ ليما وايد

بعض الاسباب

تزوير انتخابات 67
التجنيس الغير مستحق على مر السنين لكسب الولاءات
ال 25 دائرة
التحالف مع الثعلب على حد تعبير أحمد شوقي
تمييع القوانين لدرجة صار من يحترم القانون يوصم بالمثالي من باب السخرية مو الاحترام
فتح باب السرقات ليما انشلع الباب والدليل بطل الناقلات

وغيرها وغيرها من أسباب

والملاحظ ان كل الخطوات السابقة ما فادت منفذيها واهيا اللي قاعدين يدفعون ثمنها اليوم

تزوير الانتخابات وصلنا لمرحلة ان اللي يتعدى على اي نص من قانون الانتخابات ما يحاسب
فكل من هب ودب قام يدفع جم دينار او يدش له فرعية بالعلن ويفوز

التجنيس ولد لنا ناس كانت تدين بالولاء لاشخاص وما ان تتعارض مصالح الاشاخاص مع مصالح الدولة طبعا يتجه للاشخاص دون الدولة

ال 25 دائرة وصلتنا لمرحلة ان ديوانية أو قبيلة أو طائفة تهز الحكومة وتوقفها عن شغلها

تمييع القوانيين خلى طلال وربعه من عيال الاسرة يرفضون قانون موقع من الامير وبالعلن
لا ويحاربون اي احد يطالب بتطبيق القوانين

السرقات خلت الحرامي مو يبوق ويسكت لا يبوق ويسب الحكومة اللي عطته المجال للبوق

اما الثعلب فنعيش ازماته وجذباته داخل وبره الجامعة

هذي بعض الاسباب

لكن شالحل؟؟؟

بسمع منكم بعدين اقول رايي

على فكرة ولا تنظيم طلابي يبي يطبق فكرة مقاطعة الفتن

على الرغم من ان كل القوائم المذكورة تدري باللي طرحته

ومو ناسية ومهلتكم ليما الخميس

حددوا تبون صوركم ولا وطنكم

يالمنادين بالمبادئ

على فكرة في طلبة وايد يقرون المدونة يعني اصوات

راح تخسرونها اذا كشفتوا عن تخاذلكم المتوقع