على قدر الألم

اليوم الفتن جندوا مقاتلينهم البواسل بلبل والبيلر بالاضافة الى احسن نائب متحدث بالمجلس وليد الطبطبائي عشان يهاجمون عبداللطيف الدعيج

بوراكان انت شسويت فيهم مساكين

مو عارفين شيسوون جريدة وقناة ومو قادرين عليك لانك صوت الحق والمنطق

البيلر على سبيل المثال يقول

الشعب الياباني ما يرضى احد من اليابانيين يمدح اللي قط قنبلة على هيروشيما

ولا الشعب الألماني يرضى أحد يمدح هتلر

ولا الشعب الإسرائيلي يرضى احد يمدح منفذ المحرقة المزعومة أقول المزعومة عشان يحتر فؤاد مو عشان نجاد

:)

وكلامك لا مشكلة فيه يا بيلر

بس ما لاحظت شي

ان كل اللي تقول عنهم أدانتهم حكومات البلدان الرسمية بجرايمهم

عبداللطيف الدعيج قال شي بسيط مو قادرين تفلتون منه

قال التأبين صار قبل اعلان الحكومة الكويتية رسميا اتهام عماد مغنية بخطف الجابرية

يعني ما صدر موقف رسمي من الدولة بإتهام عماد مغنية فأي شي سووه عدنان واحمد قبل الاعلان الرسمي عن الاتهام اهوا من باب حريتهم بالتعبير

اي نعم كان في شكوك مو اعلان رسمي عن اتهام مغنية

وهذا معناه ان التأبين كان تصرف اهوج لأن ما قدّر ولا شاف الظروف لكنه مو خيانة

يعني لنفرض ان صار في عمل ارهابي لا سمح الله بالكويت

واللي سواه اسمه جلال فيصل

لا تدققون بالاسم المهم الفكرة

جلال فيصل عزمه وليد الطبطبائي على العشا وعطاه درع بعد

بس قبل لا تتهمه الكويت بالعمل الارهابي هل يكون وليد خاين؟؟

بسيطة بس مخوخكم مو قادره تستوعب صفعة بوراكان ليما الحين

اي صج بوراكان هالاسبوع لا تكتب مابي اعطيك شخصية الاسبوع مرتين ورا بعض
:)

خنشوف التحفة الثانية الحين

بلبل مقالتك تونس بس لحظة خل اعطيك هذي وبعدين نتفاهم

والآن دعونا نسأل الفطحل الذي ظل يقود الجهلة والسذج في الشارع السياسي على مدى سنوات، اذا كان تجمع شباب الجابرية ارهاباً فماذا كان تجمع البرتقالي في نفس ساحة الارادة منذ سنتين؟! ام حلال على ربعك حرام على من لا تتفق مع رأيه يا صحافي يا محترم؟

الفطحل قصده عن عبداللطيف الدعيج اللي يقول اليوم

منع وزارة الداخلية لمظاهرة او تجمع «الزرق» تعدٍّ على حقوقهم الدستورية وقرار لا يستند الى قانون واضح وصريح

هذا الفرق بينك وبين الفطحل غصبا عليك عبداللطيف الدعيج

يختلف مع من يدعون انهم شباب الجابرية

بس هم يقول ما يصير تتعدون على حقوقهم الدستورية

توصل هالمواصيل انت؟؟

خنشوف سالفتك الحين

بلبل يقتبس جزء من مقالة عبداللطيف الدعيج

المهم ان هؤلاء الشباب واضحي الوطنية اسماهم عمهم عبداللطيف الدعيج بالارهابيين! لماذا؟ لانهم اعلنوا ودعوا »الى قلب النظام والى التدخل بالعنف لتعطيل عمل مجلس الامة عبر منع اعضائه من الوصول الى قاعة عبدالله السالم

ويعلق عليه بتعليق منطقي سكتني الصراحة

اولا. كانت الدعوة الى التجمع في يوم سبت، وهو يوم عطلة حتى في امريكا، فكيف كان ذلك التجمع سيمنع اعضاء المجلس من الوصول لقاعة عبدالله السالم.. وبالعنف؟! وبأي عين حولاء قرأ دعوة العنف في اعلان شباب الجابرية؟

لاحظوا إن كاتب أولا، تصدقون المقالة كلها ما فيها ثانيا
:)

مو هني الموضوع

يقول شلون التجمع كان راح يمنع النواب؟؟

السلام عليكم
باجر السبت تاريخ1-3-2008 ان شاء الله
الساعه 3 العصر بساحة الارادة مقابل مجلس الخمه اقصد الامه
بنسوي اعتصام كويتي وطني يعزز روح الوحده الوطنية وهدفه منع كل من الخونه
لاري وعبدالصمد دخول مجلس الامه من جديد
والهدف الاخر هو الحفاظ على كرامه الشيعه والسنه
لان الكويت لن تكون كويتا دون سنه او شيعه
فالشيعه والسنه امتزجا ببعض وكونا الكويت
وشعارنا غدا وابدا هوشيعه وسنه ولائنا للكويت
اتمنى من الجميع الحضور ونشر هذه الرساله بجميع المنتديات والقروبات

هذا إعلان الإعتصام وعلى طريقة اللي كاتبه بقروب تجمع شباب الجابرية بالفيس بوك متعمده اكتبها بالعربي عن الطنازة

على فكرة القروب كان مكون من ثلاث اداريين

هالاداريين الثلاثة اثنين منهم كاتبين اسمهم الصريح وواحد مسمي نفسه شباب الجابرية

الاثنين اصحاب الاسماء الصريحة اهما ي.ك و ن.ع

محررين بجريدة الفتن بصفحة الجيل الجديد

بس عشان لا يبين ان جريدة الفتن اهيا اللي مسويه السالفة انسحبوا من ادارة القروب

كلامهم واضح وصريح بالدعوة للاعتصام

منع كل الخونة من دخول المجلس

يعني عبداللطيف ما ياب شي من عنده هذي دعوتهم

وحتى بإعلانهم اللي صفحة اولى بكل الجرايد تهقون منو اللي دافع مبلغ الإعلانات؟؟

يقولون لا لدخولهما المجلس ثانية

إحتجاج عبداللطيف كان إن ما يصير يطالبون بشي غير قانوني

وانت يا بلبل بروحك تقول إن اسقاط العضوية يصير بالشكل التالي

فموت العضو يسقط عضويته، واستقالة العضو تسقط عضويته، وتجريم العضو بما يخل بالشرف والامانة يسقط عضويته، والادانة في قضية تمس امن الدولة أو الذات الأميرية تسقط العضوية، فأي من هذه الاسباب لا تفهمه حتى نسهب في شرحه لعقلك يا عم؟

إنزين يالفاهم أي من الأسباب التالية يقدر شباب الجابرية المزعومين انهم يطبقونه بروحهم

الموت يعني بيقتلونهم مثلا؟
استقالة يعني بيستقيلون بسبة ناس سبوهم؟
تجريم العضو هل يتحقق بيد شباب الجابرية المزعومين؟
الادانة هل تتحقق بيد شباب الجابرية المزعومين؟

كافي استهبال وعيب عليك كل شوي فاضحتك انا

الحين نروح حق بداية مقالتك اللي صج تضحك

لا نعرف من هم جماعة »شباب الجابرية« الذين نشروا إعلانا عن اقامة تجمع جماهيري في ساحة مجلس الامة يوم امس السبت، تعبيرا عن استيائهم من فعلة عضو مجلس الامة عدنان عبدالصمد وتأبينه المسخ لارهابي نافق

يا مسكين تصدق اني صدقتك؟؟؟

يعني سبحان الله الواحد اذا بغى يجذب ما يعرف

ناس يحطون اعلان بالوطن ربع صفحة ملونة يوميا لمدة اسبوع تقريبا

دق على قسم الاعلان وتعرف باسم منو ماهي صعبة بس لانك عارف منو تحاول تجذب وتنفضح

بس خل اقول لك منو دام جذيه

محرر عندكم اسمه م.ف.ق

ابوه صحفي مخضرم في مجال التطبيل وبجريدة السياسة

أنا صج زعلت إن الاعتصام ما صار لأن كانوا بينكشفون للعلن بس ما عليه

سووا فريق ازرق حق الدوائر وركبوا صور وجذبوا واختفوا سبحان الله

والحين هم سووا فريق ازرق وهم فشل

يعني كل شي بتسوونه فاشل

حتى منتخب اليد اللي يفوز بكاس اسيا من 95 اول ما تبنيتوه فشل حسبي الله عليكم

الا صج دام قلبكم على الديرة ليش ما ترعون منتخب القدم

ولا تدرون ان حالته سيئة ما يفوز فقلتوا نوخر عنه ونمسك منتخب اليد اللي يفوز وهم خسر

هذا وخلصنا منه

تذكرون لما حطيت لكم صورة المطار وعدد المناطق اللي يستوعبها

وطبعا مو انا اللي كنت مفكرة او مسويه هالشي واحد اسمه احمد عقاب اهوا اللي كان داز لي الايميل وفكرته

اليوم أحمد داز لي مقابلة عضو المجلس البلدي عبدالعزيز الشايجي بالراي

وحاط بالمقابلة صورة المطار واستيعابه للمناطق السكنية اللي نقلتها لكم واهيا من اعداد احمد عقاب

بس شوفوا شيقول

قال الشايجي خلال اللقاء إنه «طرح فكرة أن يلصق على خارطة موقع المطار الحالي عدد من مخططات المناطق السكنية، فما كان من أحد الشباب إلا أن أعجب بهذه الفكرة وقام بتنفيذها، عن طريق القص واللصق فوجد أن موقع المطار استوعب 14 منطقة سكنية

أحمد يقول لا يعرف هالنائب ولا عمرها شافه والحبيب يقول فكرته

شنو سر ارتباط لحية السياسيين بالتشلخ عندنا؟

أحمد دز لي ايميل ثاني يقول فيه

ان جمعية المهندسين منزله اعلان مدفوع الاجر يقول فيه ان راتب المهندس الكويتي اقل راتب بدول الخليج وإن أقل راتب مهندس بالخليج يعادل 1400 دينار

يقول أحمد إن بالسعودية وبعد الزيادتين للرواتب صار معاش المهندس عندهم 6400 ريال يعني 500 دينار تقريبا

وهم جمعية المهندسين تشلخ واللي ماسكينه هم لحايا؟؟؟؟
والله حرام شوهتوا الدين

زوروا عاجل وخاصة فؤاد ونبيل وشوفوا شنو كتب الكويتي خالد العبيسان بالسياسة عن صدام وما تكلمتوا يا محبين الوطن

آخر شي

من فترة وصلني ايميل يقترح فتح مجال الاعلان بالمدونة

وقررت أخوض التجربة

على اخوض التجربة أحس إني بنزل انتخابات
:)

وعلى هالاساس بحط هالايميل لكل من يرغب بالاعلان بالمدونة وطبعا لاني ما اعرف بهالسوالف راح يكون عندي شخص مشكور متكفل بهالمهمة

الايميل لراغبين الاعلان

adv.elgrain@gmail.com