28/08/2009

عبدالله لا يمنعنونك


حديث البلاك بيري وبقية وسائل التكنولوجيا المحرمة شرعا كالايميل والفيسبوك وغيرها في الكويت

إهوا عبدالله مال دعاية فيفا



ما ظلت نكته الا وطلعت على هالعبدالله

وتحول الاعلان من اعلان فاشل الى اكثر الاعلانات انتشارا بالكويت برمضان

وفزورة رمضان صارت

هل سيمنع عبدالله من دخول الملعب؟

عبدالله ودي اسولف وياك شوي

عبدالله ..تدري ان ديرتك قاعده تتلاشى

مافيها كهربا ولا فيها ماي وحتى حمامك وانت والحاضرين بكرامه راح يذبح بحرك؟؟

العبد تدري ان وزارة داخليتك المعنية بالأمن والشؤون الداخلية ما تقدر تطلع ابسط معلومة اذا نواب الأمة عندهم جنسيتين او لأ؟؟

عبدالله... تدري إنك إنت ويمكن أبوك بعد ينطر 20 سنة عشان يطلع له بيت وآخرتها البيت يبعد عن مدرستك ساعه كامله بالسيارة مع ان إحنا ما نسكن الا ب 6% من أراضي الدولة؟؟

بوعابد... قالولك إن طيارة ديرتك اللي صار لها اكثر من 50 سنة بالجو ما عندها الا 16 طيارة ويمكن الصاحيين منهم 5 بس

عبّادي... جامعة الكويت اللي ان شاء الله تكبر وتبي تروح لها ما عندها مبنى واحد يجمع كلياتها مع ان الجامعة موجودة من 1966 يعني القرن اللي طاف اللي يمكن انت ما عشت فيه؟

عبّود... تدري إن لو في مسيحي أو بوذي يخدم الكويت ويعطيها كل عمره وحياته مستحيل يعطونه جنسية لأنه مو مسلم؟؟

عبدالله حبيبي ... تدري ان الكويت إهي إحدى أخوات كان

العبد .. تدري ان كل يوم يدش ديرتك اكثر من 100 مليون دولار نتيجة بيع النفط، وتدري ان احنا من نهاية السبعينيات واحنا ما نشوف حق هالملايين اي اثر؟

عبدالله تدري ان الكويت مافيها مستشفيات تكفينا ولا مسارح تسلينا ولا ملاعب ترضينا؟؟

عبّادي.. تدري ان اكبر خلافتنا بالكويت اهيا عن موضوع مخلص قبل 1400 سنة؟

عبدالله اذا كنت شيعي حبيبي اياني واياك تحب سنية ما راح يخلونك تتزوجها واذا كنت بدوي ايناي واياك تحب حضرية واذا كنت اصيل هم اياني واياك تحب بيسيرية ترى سعدون حماد ما يرضى

عبود.. اذا شفت كويتيين ما يوقفون حق علم ديرتك لا تستغرب حبيبي هذا شي عادي

عبدالله.. تدري ان هالمشاكل بديرة شعبها ما يعدون المليون ونص

صج والله لا تضحك مو نكته

عبدالله اذا كنت بتروح عند عيال خالتك تلعب وياهم بعد الفطور

إطلع من قبل الفطور ولا ما راح توصل

عبدالله تدري شلون اشرط على فيفا خل يعطونك مبلغ محترم وايد ولا لا تكمل الاعلان لأن هالشي الوحيد اللي بيفيدك

اي صج عبدالله تدري ان عندنا جريدة اسمها الوطن تتكلم باسم الوطن والناس مصدقتها

خلاص عبّادي حبيبي بس حبيت ارسم لك شويه من ديرتك اليوم

تكفه عبدالله لا يمنعونك دش ملعبنا وغير نتايجنا

21 comments:

Bad-Ran said...

ما سوت عليه

عنيف said...

ما قلتي حق عبدالله عن الي يسيسون الدين؟؟

ما قلتي حق عبدالله انه اخر مستشفى بنوه قبل 28 سنه؟؟

ما قلتي حق عبادين انه مسشفياتنا ما عندها مكان حتى حق مسافط السيايير وفوق هذا يبنون بنص المسافط مستشفى ثاني؟؟


ما قلتي حق العبد انه صارت عندنا تقسيمه يديده غير الشيعه والسنه والحضر والبدو الي اهي منطقه خارجيه وداخليه ؟؟

وانه عندنا تيار هكره اسمه سكوب؟؟؟

ولا تنسين تقولين له لو يتخرج من الجامعه بشهادة دكتوراه بيطلع منها ما يفهم ثلث الثلاثه جم؟؟

t.q8 said...

الله يهداج حطمتي الولد

Sowhat said...

اقرألك من زمان ..
..

عبدالله حبيبي ... تدري ان الكويت إهي إحدى أخوات كان


....
أحسنتي

Anonymous said...

بغيت اضحك على الاعلان
نزلت دموعي على المضمون تسلم ايدك

وعبدالله لايمنعونك

well_serviceman said...

واحب اضيف عليك ، عبدالله لاهي بالكره ومايدري عن هالسوالف ، معنه هالأيام من كثر الهم حتى الياهل يعرف اللي صاير بديرته مو شي بسيط

بوست رائع يحكي واقع نعيشه الآن للأسف، تحياتي

الفنطاس said...

للاسف .. عبدالله مراح يقدر يدش الملعب
بالعكس ... راح تزيد مساحة الملعب وراح يزيدون اللاعبين
وراح نكسر قوانين الفيفا .. وتبقى قوانين المستفيدين
.. وعجبي

أبو الدســتور said...

عيل لو يدري عبادي
ان رئيس حكومته ناصر المحمد
شيبي يسوي
يدش ولا مايدش

al-nokhitha said...

yeslaaam temiiik 3ala hal kalam el 6ayeeb wel waqii3i jedan o
3abdullah sema3 kalamich o dash el
mal3ab o nazaal e3laan ydeed :)

3ala fekra tara el semii weld el ghanim o yel3ab eb barcelona :)

q8yeen said...

لوووول حلوة ابو الدستور
يعطيج العافية حلوة بس كنتس تقدرين تضيفين
عبدالله تدري ان في نواب بالمجلس طالبو بتعليق الدستور
عبدالله تري ان سكر في المجلس كان عنده التيما قديمه والحين عنده ملاااييين
عبدالله تدري ان فيه وزير كانت عليه قضية امن دوله
عبدالله تدري اني حبيتم وابي اتعرف عليك

أهل شرق said...

الله يعينك عبدالله

__________________

بوست يعور القلب

MFTELET said...

والله كلامج يعور القلب

خليها على الله

والبركه في عبدالله انشالله

مَـــــعْــــمَــــعَـــــه said...

والله الكويتيين بطاليه قبل سنتين او ثلاث هبوا في بوراشد جان تذكرينه ( بوراشد نلبس صيفي ولا شتوي) الخ

الحين هابين بعبدالله مسكين ما بقى شي ما قالوه عنه

عاجل : اوباما قرر زيارة الكويت للنظر في مسأله عبدالله ودخوله الملعب وعلى صعيد آخر مجلس الأمن وافق بالاجماع على دخول عبدالله للملعب

والآن يا ترى هل سيسجل الهدف ؟؟؟

فريج سعود said...

عبدالله كويتي ؟!! ولا سعودي ؟

بيت القرين said...

بدران
بوستك عجيب

عنيف
بس عطيته لمحه

تي
لا ازهبه بس

سو
شكرا

انو
منصور باذن الله

ويل
يلهى ايام قليلة وراح يواجه هالازمات تالي

الفنطاس
الله لا يسمع منك
قول آمين

ابو الدستور
مو هذا اللي بيخليه يدش

نوخذانا
ونعم فيك وفيه

كويتيين
اقوله بعدين

اهل شرق
بس يصحي ولو شوي

مفتلت
وفينا بعد

معمعه
اي بيسجل ونص

فريج سعود
على كلام نوخذانا عبدالله من عيال الغانم
ويلعب ببرشلونه
ونوخذانا جذبته صج

Heart To Heart said...

مسكين

Bad-Ran said...

مشكوره :)

وعبدالله ولد اليحي
http://www.frankom.com/?p=6387

C'est La Vie said...

انا اعتقد ان هبة المسجات الغريبة اللي طلعت على عبدالله
كانت دعاية طالعة مباشرة من فيفا او موظفينها
لأن الدعاية ما تسوى بس خذت اكبر من حجمها

بوست رائع
انشالله نسمع خبر يفرح بهالوقت
ونشوف شي يتغير ويتحسن بهالديرة
يعطيك/ج العافية

سلة ميوّه said...

بجيتيني



:(


مساءج سُكر

al-nokhitha said...

lool sorry wa7ed e9eer lah gali ena weld el ghanim ana bacher rad men el sefar as2iila chood yada esma ya7ya el ghanim o men johaiina eyeekum el khabar el akeeed ;p

al-nokhitha said...

ehwa fe3lan yela3ab eb barcelona lakin weld el ee7aya o khawala el ghanim o asef 3ala 3adam el deqa :)